ZÃMSGÃ YĨNGA 25
YƖƖLL A 7 Zeova, fo yaa tõnd pãng zĩiga
Tẽegd-y t’a Zeova n yaa “Wẽnnaam ning sẽn vɩ wã”
“A Zeova vɩɩme!”—YƖƖN. 18:46.
D SẼN NA N BÃNGE
D na n yãame tɩ d sã n tẽegdẽ tɩ Wẽnnaam ning d sẽn tũuda n yaa “Wẽnnaam ning sẽn vɩ wã,” nafd-d-la wʋsgo.
1. Bõe n sõngd a Zeova nin-buiidã tɩ b tũud-a baa ne zu-loeesã?
BIIBLÃ yeelame tɩ tõnd wakatã, “yɛlã na n yɩɩ kãn-kãe hal tɩ vɩɩmã lebg toogo.” (2 Tɩm. 3:1) Zu-loees nins nebã fãa sẽn paamdã sẽn yãk a toogo, a Zeova nin-buiidã paamda namsg b tũudmã yĩnga. Bõe n sõngd tõnd tɩ d ket n tũud a Zeova baa ne zu-loeesã? Bũmb a ye yaa d sẽn paamd a Zeova sõngrã la d sẽn mi tɩ yẽ n yaa “Wẽnnaam ning sẽn vɩ wã.”—Zer. 10:10; 2 Tɩm. 1:12.
2. Bõe la d mi a Zeova zug tɩ tõe n keng d raoodo?
2 A Zeova mii zu-loees nins fãa d sẽn maood ne wã, n dat n sõng-d wakat fãa. (2 Kib 16:9; Yɩɩn. 23:4) D sã n ning d yamẽ tɩ yẽ la Wẽnnaam ning sẽn vɩ wã, d tõe n paama raood n mao ne zu-loɛɛg buud fãa. D ges rẽ sẽn sõng rĩm a Davɩɩd to-to.
3. A Davɩɩd sẽn yeel t’a “Zeova vɩɩme” wã rat n yeelame tɩ bõe?
3 A Davɩɩd ra mii a Zeova la a teeg-a. Rĩm a Sayull ne neb a taab sẽn wa n baood a Davɩɩd n na n kʋ wã, a pʋʋsa a Zeova n kos sõngre. (Yɩɩn. 18:6) Wẽnnaam sẽn leok a Davɩɩd pʋʋsgã n fãag-a wã poore, a yeelame yaa: “A Zeova vɩɩme!” (Yɩɩn. 18:46) A Davɩɩd sẽn yeel woto wã pa rat n yeel t’a kɩsa sɩd t’a Zeova beeme bal ye. Sebr a yembr pʋgẽ, b yeelame t’a Davɩɩd gomdã wilgdame t’a kɩsa sɩd t’a Zeova “yaa Wẽnnaam sẽn vɩ, n sõngd a nin-buiidã wakat fãa.” Bũmb ning sẽn paam a Davɩɩdã kɩtame t’a miẽ t’a Wẽnnaamã vɩɩme, la kɩt t’a maneg n dat n tũ-a la a waoogd-a.—Yɩɩn. 18:28, 29, 49.
4. D sã n kɩs sɩd t’a Zeova n yaa Wẽnnaam ning sẽn vɩ wã, wãn to la rẽ nafd tõndo?
4 D sã n kɩs sɩd t’a Zeova n yaa Wẽnnaam ning sẽn vɩ wã, tõe n sõng-d lame tɩ d tũ-a ne yẽesem. D na n paama raood n mao ne zu-loeesã, la d kell n tʋm a tʋʋmdã ne d sũur fãa. D na n modgame me tɩ tõnd ne a Zeova zoodã kell n tall pãnga.
WẼNNAAM NING SẼN VƖ WÃ NA N KÕ-Y-LA PÃNGA
5. D sã n wa maood ne zu-loeese, bõe n tõe n kɩt tɩ d bas d yam? (Filip rãmbã 4:13)
5 D sã n tẽegdẽ t’a Zeova vɩɩme, la t’a na n sõng-d-la wakat fãa, d tõogd m maoo ne zu-loɛɛg buud fãa, a yaa kãseng t’a yaa bilfu. Sɩd me, zu-loɛɛg kae n yɩɩd a Zeova nug ye. Yẽ n yaa Sẽn-tõe-a-fãa wã. A tõe n kõ-d-la pãng tɩ d tõog toogo. (Karm-y Filip rãmb 4:13.) Rẽnd sẽn wa n yaa zu-loɛɛg ning fãa la d maood ne, d tõe n basa d yam. A Zeova sã n sõng tõnd zu-loe-bõones sasa, kɩtdame tɩ d kɩs sɩd t’a na n sõng-d-la zu-loe-kãsems sasa me.
6. Bõe n maan a Davɩɩd sẽn wa n yaa bi-bɩɩgã, tɩ kɩt t’a maneg n kɩs a Zeova sɩda?
6 D gom bũmb a yiib sẽn paam a Davɩɩd tɩ kɩt t’a maneg n kɩs a Zeova sɩd yelle. A sẽn wa n yaa bi-bɩɩg n gũud a ba wã piisã, urs n wa n yõk pesgo, tɩ gɩgemd me wa yõk pesg daar a to. Naoor a yiibã fãa, a Davɩɩd riga we-rũms a yiibã n tɩ fãag piisã. La a pa yeel tɩ yaa ne yẽ meng pãng la a sẽn tõog n maan woto wã ye. A miime tɩ yaa a Zeova n sõng-a. (1 Sãm. 17:34-37) A Davɩɩd zɩ n yĩm dẽ ye. A sẽn bʋgs rẽ zugã, kɩtame t’a kɩs sɩd tɩ Wẽnnaam ning sẽn vɩ wã na n sõng-a-la beoog sẽn wate.
7. Bõe n kɩt t’a Davɩɩd paam raood n tɩ zab ne a Golyate?
7 Daar a ye, a Davɩɩd kẽnga Israyɛll tãb-biisã sẽn da beẽ wã. Tõe tɩ rẽ t’a ket n yaa bi-bɩɩga. A taame n mik tɩ tãb-biisã yɛɛsa wʋsgo, bala Filisti nin-wobg a ye yʋʋr sẽn boond t’a Golyat n da “baood Israyɛll tãb-biisã noore.” (1 Sãm. 17:10, 11) Tãb-biisã yɛɛsame, bala b ra geta a Golyat sẽn yaa bedr to-to wã, la goam nins a sẽn da togsda bala. (1 Sãm. 17:24, 25) La a Davɩɩd yẽ ra geta bũmb a to. A ra pa get tɩ yaa Israyɛll tã-biisã bal la b ra paoogd ye. Yaa “Wẽnnaam ning sẽn vɩ wã tãb-biis noor” la b ra baooda. (1 Sãm. 17:26) A Davɩɩd ra tagsda a Zeova yelle. A ra kɩsa sɩd tɩ Wẽnnaam ning sẽn sõng-a a sẽn wa n yaa pe-kɩɩmã na n sõng-a-la so-kãng me. A Davɩɩd sẽn da kɩs sɩd tɩ Wẽnnaam bee a poorẽ wã, a tɩ zaba ne a Golyat n tõoge.—1 Sãm. 17:45-51.
8. Bõe la d tõe n maan n maneg n kɩs sɩd t’a Zeova na n sõng-d lame? (Ges-y fotã me.)
8 Tõnd me sã n tẽegdẽ tɩ Wẽnnaam ning sẽn vɩ wã bee ne-do, d tõogd n maoo ne zu-loeesã. (Yɩɩn. 118:6) D sã n tẽeg bũmb nins a Zeova sẽn maan pĩndã, d manegd n kɩsa sɩd ne rẽ. Karm-y Biiblã kibay sẽn wilgd a Zeova sẽn fãag a nin-buiidã pĩnd wẽndẽ wã to-to. (Eza. 37:17, 33-37) Y sã n kẽ jw.org me, y na n yãa kibay sẽn wilgd a Zeova sẽn teend d tẽed-n-taasã rũndã-rũndã to-to. Sẽn paase, tẽeg-y-yã a Zeova sẽn sõng yãmb mengã to-to. Bũmb nins a sẽn maan n sõng-yã sã n pa bõn-kãsems wa a sẽn sõng a Davɩɩd t’a kʋ urs la gɩgemdã, bɩ y ra sãam y sũur ye. Bala wilgdame t’a Zeova sõngd-y lame. A taka yãmb tɩ y wa a nengẽ n lebg a zoa. (Zã 6:44) Baa rũndã-rũndã, yaa ne yẽ sõngr bal la y sẽn ket n be sɩdã pʋgẽ wã. Woto wã, kos-y-yã-a t’a sõng-y tɩ y lebg n tẽeg a sẽn leok-y pʋʋsg to-to, a sẽn kõ-y bũmb tɩ zems ne y sẽn da rat bõn-kãng wakat ningã, la a sẽn sõng-y to-to zu-loɛɛg sasa. Y sã n bʋgsd bõn-kãens zugu, y na n maneg n kɩsa sɩd t’a Zeova na n kell n sõng-y lame.
D manesem sẽn yaa a soab zu-loees sasa wã tõe n nooga a Zeova sũuri, wall sãam a sũuri (Ges-y sull a 8-9)
9. D sã n wa tar zu-loeese, bõe la d pa segd n yĩmi? (Yel-bũnã 27:11)
9 D sã n wa tar zu-loeese, d segd n tagsa bũmb ning sẽn tar yõod n yɩɩdã yelle. A Sʋɩtãan yeelame tɩ d sã n wa tar zu-loeese, d na n basa a Zeova. Dẽnd d manesem sẽn yaa to-to zu-loees sasa wã tõe n nooga a Zeova sũur wall sãam a sũuri. (Zoob 1:10, 11; karm-y Yel-bũn 27:11.) La d sã n kell n maan sɩd ne a Zeova zu-loeesã pʋgẽ, d wilgdame tɩ d nonga a Zeova, la t’a Sʋɩtãan yaa pʋ-yagda. Tõe tɩ tẽng ning pʋgẽ yãmb sẽn vɩ wã taoor dãmb gɩdga a Zeova Kaset rãmbã tũudum, wall y maooda ne ligd zu-loeese, pa rẽ bɩ yaa neb nins y sẽn moond koɛɛgã n pa kelgde, wall y tara zu-loees a taaba. Sã n yaa woto, bɩ tẽeg tɩ zu-loe-kãens kõt-y-la segb tɩ y tõe n noog a Zeova sũuri. Tẽeg-y me t’a pa na n tol n bas tɩ y paam makr sẽn yɩɩd y nug ye. (1 Kor. 10:13) A na n kõ-y-la pãng tɩ y tõog toogo.
WẼNNAAM NING SẼN VƖ WÃ NA N KEO-Y LAME
10. Bõe la Wẽnnaam ning sẽn vɩ wã na n maan n kõ neb nins sẽn tũud-a wã?
10 A Zeova keooda neb nins sẽn tũud-a wã wakat fãa. (Ebre. 11:6) Rũndã-rũndã, a kõt-d-la sũur pʋgẽ bãan la sũ-noogo. La beoog sẽn wate, a na n kõ-d-la vɩɩm sẽn kõn sa. D tõe n teega a Zeova n kɩs sɩd t’a rat n keo-d lame, la t’a tõe n keo-d lame. D sẽn kɩs sɩd ne rẽ wã kɩtame tɩ d tʋmd a tʋʋmã ne yẽesem wa pĩnd wẽn-tũudbã sẽn da maandã. Yaa woto la a Tɩmote sẽn da be pipi kiris-nebã wakatẽ wã maan-yã.—Ebre. 6:10-12.
11. Bõe n kɩt t’a Tɩmote sak n tʋm wʋsg tigingã pʋgẽ? (1 Tɩmote 4:10)
11 Karm-y 1 Tɩmote 4:10. A Tɩmote ra teega Wẽnnaam ning sẽn vɩ wã. Rẽ n so t’a ra tʋmd wʋsg a Zeova la neb a taabã yĩnga. Bõe la a maan-yã? Tẽn-tʋmd a Poll sagl-a lame t’a paas a minimã koe-moonegã la nebã zãmsgã wɛɛngẽ. A ra segdame me n kõ a tẽed-n-taasã mak-sõngo, kom-bɩɩsã la kãsembã fãa. B kõ-a-la tʋʋm kẽer sẽn da pa nana me. Wala makre, a ra segd n demsa neb sãnda la a maan rẽ ne nonglem. (1 Tɩm. 4:11-16; 2 Tɩm. 4:1-5) A Tɩmote ra miime tɩ baa nebã sã n da pa ne tʋʋmd ning a sẽn tʋmdã, wall b pa nand rẽ, a Zeova yẽ na n keo-a lame.—Rom. 2:6, 7.
12. Bõe n kɩt tɩ kãsem-dãmbã tʋmd wʋsg tigingã pʋgẽ? (Ges-y fotã me.)
12 Kãsem-dãmbã tõe n basa b yam t’a Zeova nee tʋʋm nins b sẽn tʋmdã, la t’a nanda rẽ. Kãsem-dãmbã sẽn get tigingã neb yell n zãmsd-b la b moond koɛɛgã sẽn yãk a toogo, b wʋsg sõngd n meta siglgã roto, la b sõngd sabab-wẽns sẽn paam-b rãmbã. Kẽer naaga sull ning sẽn get logtor-yirẽ tɩbsg zu-loees yellã (CLH) wall sull ning sẽn kẽnd n kaagd bãad-rãmbã (GVM). Kãsem-dãmbã miime tɩ pa ninsaal n lugl tigingã ye. Yaa a Zeova meng a toore. Rẽ n so tɩ b tʋmd b tʋʋmã ne b sũur fãa n kɩs sɩd zãng-zãng tɩ Wẽnnaam na n keo-b lame.—Kolo. 3:23, 24.
Y sã n tʋmd wʋsg tigingã yĩngã, Wẽnnaam ning sẽn vɩ wã na n keo-y lame (Ges-y sull 12-13)
13. A Zeova tagsg yaa wãn ne bũmb nins d sẽn maand a tũudmã yĩnga?
13 Pa nebã fãa n tõe n yɩ kãsem-dãmb ye. La d fãa tõe n kõo a Zeova bũmbu. D sã n maand d sẽn tõe fãa Wẽnnaam tʋʋmdã pʋgẽ noom-a-la wʋsgo. A nee d sẽn kõt kũun n teed koɛɛgã moonegã, baa pa waooge. A sã n neẽ tɩ d zẽkda d nug n leokd tigissã sasa baa d yaa yãn-zoeta wall d modgda wʋsg n kõt d taabã sugri, noom-a-la wʋsgo. Baa y sã n getẽ tɩ sẽn maandã pa waooge, bas-y y yam t’a Zeova nanda rẽ. A nong-y-la rẽ yĩnga, n na n keo-yã.—Luk 21:1-4.
RA TOL-Y N ZÃAG-Y Y MENG NE WẼNNAAM NING SẼN VƖ WÃ YE
14. D sã n tar zood sõma ne a Zeova, bõe yĩng tɩ na n sõng-d tɩ d kell n maan sɩd ne-a? (Ges-y fotã me.)
14 D sã n kɩs sɩd t’a Zeova vɩɩme, na n yɩ nana tɩ d kell n maan sɩd ne-a. Yɩɩ woto ne a Zozɛfe. A zãgsa fasɩ t’a kõ yo ye. A ra miime t’a Zeova ne-a lame, n pa rat n maan bũmb n sãam a sũur ye. (Sɩng. 39:9) D sã n dat n maneg n kɩs sɩd t’a Zeova beeme, d segd n baooda sẽk n pʋʋsdẽ la d zãmsd a Gomdã. Woto na n paasda tõnd ne yẽ zoodã pãnga. D sã n tar zood sõma ne a Zeova wa a Zozɛfe, d pa na n sak n maan bũmb n sãam a sũur ye.—Zak 4:8.
Y sã n bao zood sõma ne Wẽnnaam ning sẽn vɩ wã, na n sõng-y lame tɩ kell n maan sɩd ne-a (Ges-y sull 14-15)
15. Bũmb ning sẽn paam Israyɛll nebã we-raoogẽ wã wilgda tõnd bõe? (Ebre-rãmbã 3:12)
15 Ned sẽn tũud a Zeova sã n wa pa le kɩs-a sɩd zãng-zãnga, a tõe n zãaga a meng ne-a nana-nana. Tẽeg-y bũmb ning sẽn paam Israyɛll nebã b sẽn wa n be we-raoogẽ wã. B ra miime t’a Zeova beeme, la b wa n sãmbda a sã n tõe n gesa b yelle. B pʋd n sokame yaa: “A Zeova bee tõnd sʋk bɩ, bɩ a pa be tõnd sʋkã?” (Yik. 17:2, 7) Rẽ kɩtame tɩ b kɩɩs Wẽnnaam. Yaa vẽeneg tɩ d pa rat n dɩk b togs-n-taar n yɩ kɩɩsdb ye.—Karm-y Ebre-rãmb 3:12.
16. Bõe n tõe n kɩt tɩ yɩ toog tɩ d tõog tɩ d tẽebã kell n tall pãnga?
16 Dũniyã kɩtame tɩ yɩl n kell n yɩ a Zeova zoa yaa toogo. Neb wʋsg pa rat n sak n deeg tɩ Wẽnnaam beeme ye. Mi n yaa wa neb nins sẽn maand-b toog kae ne Wẽnnaam noyã yɛl yaa sõma. D sã n get rẽ, tõe n komsa d tẽebã. Baa d sẽn pa na n yeel tɩ Wẽnnaam pa be wã, d tõe n wa maanda sãmbs a sã n sɩd sõngd-d lame. Wakat n zĩnd tɩ Yɩɩn-sõamyã 73 soabã gʋlsd ra tagsd woto. A ra nee neb sẽn pa tũud Wẽnnaam noyã, tɩ b vɩɩmã yaool n noomẽ. Rẽ kɩtame t’a ra sãmbd Wẽnnaam tũubã sã n nafda neda.—Yɩɩn. 73:11-13.
17. Bõe n na n sõng-d tɩ d kell n maan sɩd ne a Zeova?
17 Bõe n wa n sõng yɩɩn-gʋlsdã t’a toeem yam? A bʋgsa bũmb ning sẽn na n paam neb nins sẽn kɩɩsd a Zeova wã zugu. (Yɩɩn. 73:18, 19, 27) Sẽn paase, a tagsa bark nins sẽn tũud-b a Zeova wã sẽn paamdã yelle. (Yɩɩn. 73:24) Tõnd me tõe n bʋgsda bõn-sõma nins a Zeova sẽn kõt-dã zugu. D mams d vɩɩmã sẽn da na n yɩ to-to d sã n da pa tũud a Zeova. D sã n maand woto, na n sõng-d lame tɩ kell n maan sɩd ne Wẽnnaam. Tõnd me na n yeela wa yɩɩn-gʋlsdã yaa: “Sã n yaa ne maam, Wẽnnaam kolgr n nafd maam.”—Yɩɩn. 73:28.
18. Bõe yĩng tɩ d pa segd n yɛɛs sẽn wate?
18 D tõe n maoo ne zu-loɛɛg buud fãa d sẽn na n paam yaoolem wakatã, bala d tʋmda wa yembs n kõt “Wẽnnaam sẽn vɩ la sẽn yaa sɩd-sɩdã.” (1 Tes. 1:9) D Wẽnnaamã sɩd vɩɩme, n maand neb nins sẽn tũud-a wã neere. A wilgame t’a ra bee ne neb nins sẽn tũ-a pĩnd wẽndẽ wã, la t’a bee ne tõnd rũndã-rũndã. Ka la bilfu, to-kãseng ning buud sẽn zɩ n zĩnd tẽngã zugã na n sɩngame. La wakat kãnga, a Zeova pa na n bas-d tɩ d mao d yembr ye. (Eza. 41:10) Woto wã bɩ d fãa “paam raood wʋsg n yeele: ‘A Zeova yaa mam sõangda. Mam pa na n zoe rabeem ye.’”—Ebre. 13:5, 6.
YƖƖLL A 3 Foo la tõnd pãng zĩiga, foo la tõnd teeg-yã
