1. Tae-e Jehovab ǃoaba-aona ra hui în ǁîba ǃoaba ǃgomsinan ga hōǃâ xawe?

 ELOBMÎS ge ra mî, “ǀuni tsēdi ǃnâ gu kaise ǃgom ǁaega nî hâsa.” (2Tim. 3:1) Nē ǃhūbaib ǃnâ hâ khoen hoan ra hōǃâ ǃgomsin ǂamain ge Jehovab ǃoaba-aona mâǃoahes tsî ǁgâiǀāhes tsîna ra hōǃâ. Tae-e ra hui da i da aiǃgû tsî Jehovaba ǃoaba nē ǃgomsin ǂamai? ǀGui xū-i hîna ra mâǂoa i ge Jehovab di huiba da ge ge hōǃâ “ûitsama Elob” a ǃkhaisa.—Jer. 10:10; 2Tim. 1:12.

2. Mâ ǀgaub ǃnâb Jehovaba a ûitsama Elo?

² Jehovab ge ûitsama khoeba, sida ǃgomsin ǃnâ kōǃgâ da tsî ǃēde ra ôaba îb ǂkhâǃnâ da. (2Kro. 16:9; Psa. 23:4) Ûitsama Elob ase ǁîba mûs ge nî hui da i da ǀgaiba ūhâ tsî ǃgomsina mâǃkharu. ǃGaoǃgâ re nēs ge mati ama isa Gao-aob Davidi ǃaroma.

3. Davida tae-e gere ǂâibasen “ǃKhūb ge a ûitsama!” tib ge mî o?

³ Davidi ge Jehovaba ge ǂan i tsî ǁîb ai gere ǂgomaiǂnûi. Gao-aob Sauli tsî naun ge Davida gere ǃgam ǂgao, ob ge Davida Jehovaba ǃoa huib ǃaroma ge ǀgore. (Psa. 18:6) Elob ge ǁîb ǀgoresa ǃeream tsî ǀûbabis khaoǃgâb ge Davida ge ǂanǂan: “ǃKhūb ge a ûitsama!” (Psa. 18:46) Nē mîdi ǀkhab ge Davida Jehova Elob a ûitsama ǃkhais ǀguisa ge ǂanǃgâ tama hâ i. Tae-eb gere ǂâibasen? Davidi ge gere ǂanǃgâ Jehovab ge ama Elo isa ǁîb ǃoaba-aona hoa ǁae ra huiba. Davidi ge ge ǂan-i Jehovab a ǂansa ǁîb ǀkha i tae-e ra isa tsîb hoaǁae ǁîba ra hui ǂgaosa. ǁNās ge Davida ge ǂkhâǃnâ îb aiǃgû Jehovaba ǃoaba tsî koasa.—Psa. 18:​28, 29, 49.

4. Mati da ǃgâiba ra hō Jehovaba ûitsama Elob ase mûs ǃnâ-ū?

⁴ Jehovab a ûitsama ǃkhaisa ǂanǃgâs ge nî hui da î da ǁîba ôasasib ǀkha ǃoaba. ǀGaiba da ge nî ūhâ i da ǃgomsin  ǃnâ mâǀgai tsî ǂkhâǃnâhe ǃgarise ǁîb ǃoabas ǃnâ sîsen ǀgarasa. ǀGaisa turab tsîna da ge ūhâ Jehovab ǀgūse hâ ǀgarasa tae-i ǀgui-i ga ī xawe.

ÛITSAMA ELOB GE NÎ ǀGAIǀGAI DU

5. Tae-e ǂgomǃgâsiba nî mā da ǃgomsina da ga hōǃâ o? (Filipeǁîn 4:13)

⁵ Mâ ǃgomsi-i ǀgui-i ga hâ xawe da ge nî mâǀgai, Jehovab a ûitsama ǃkhaisa da ga ǂâihō o tsîb hoaǁae nî hui dasa. ǁÎb ge mā ǃgomsi-i hoa-i ǃnâ nî hui da, sida Eloba a ǃgomba ǃgomsi i ge a ǀkhai. ǁÎb ge Hoaǀgaixa tsî ǀgaiba ra mā da î da mâǀgai. (Khomai re Filipeǁîn 4:13 sa.) Nēs ge ǂgomǃgâsiba ra mā da ǃgomsina da ga hōǃâ o. Jehovab ǂkhâǃnâsa da ga ǂkhari xūron ǃnâ hōǃâ os ge ǁnāsa ra ǂgomǃgâ kai da ǁîb kai ǃgomsin ǃnâ nî hui dasa.

6. Davida ǁîb ǂkhamsis ǃnâ tae-e ge hōǃâ ǁîb ǂgomǃgâsiba ge Jehovab ǃnâ ǀgaiǀgai-e?

⁶ ǃGaoǃgâ re ǀgam xūn Davidi ge ǃkharu ǃnâna ǁîb ǂgomǃgâsiba ge Jehovab ǃnâ ǀgaiǀgaina. Davidi ge ǂkham gū ǃûi-ao i, o i ge bēri tsî xammi tsîna dadasab di gū-e ū tsî ge ǃkhoe. Hoa ǀgam ǃnāra aib ge Davida ǁkhoaǂgaose nē xamanina ge sauru, gūra sâus ǃaroma. Xaweb ge aitsama ge koasen tama hâ i. ǁÎb ge ge ǂan i Jehovab ge ǀgaiba mābisa. (1Sam. 17:​34-37) Davidi ge ǃkharu ǃnâb ge xūna ge ǀuru tama hâ i. ǁNā xūna ǂâiǃgâs ǃnâ-ūb ge ǃnāsa ǂgomǃgâsiba ge omkhâi ûitsama Elob hānîǁaeb ǃnâs tsîna nî ǀgaiǀgaibi ǃkhaisa.

7. Davida tae-i ai ǂâisa gere ǂnûi tsî tae-i ǃaromas ge ǁnāsa huibi Goliata ǃkham ǃoasa?

⁷ Noxobab ǀnîsi a ǂkham hînab ge Davida toroǂnubis di kampsa sī ge sari. Sīb ge, o gu ge soldaga kaise ge ǃao hâ i kaihâ Filisteǁîb Goliat ti ǀon hâb ge “Israeli toroǂnubisa . . . ǃharaxū” amaga. (1Sam. 17:​10, 11) Soldagu ge gere ǃao ǁîgu ge Goliati kaimâ hâ ǀgaus tsî ǁîb gere mî xūn ai ǂâisa a ǂnûi amaga. (1Sam. 17:​24, 25) Xawe Davidi ge ǀkhara xū-i ai ǁîb ǂâisa ge ǂnûi. Davidi ge ge ǂan i Goliati ge Israeli toroǂnubisa gere ǃkhāǃkhā ob ge “uitsama Elob” di toroǂnubisa gere mîǁgaiǁgaisa. (1Sam. 17:26) Davidi ge Jehovaba ǂâis ǃnâ ge ūhâ i. ǁÎb ge ǂgomǃgâsiba ge ūhâ i Elob ǁîba ge gū ǃûi-aob a hîna a huib, nē mâsib ǃoagu ǁîba nî huisa. Elob ǁîba nî hui ǃkhaisab a ǂan amagab ge Goliati ǀkha ge ǃkham tsî ge dan.—1Sam. 17:​45-51.

8. Tae-e sida ǂgomǃgâsiba nî ǀgaiǀgai Jehovab nî hui dasa ǃgomsina da ga hōǃâ o? (Ai-īsiba mû re.)

⁸ Sida tsîn ge ǃgomsina nî tanihō ǂâi-oa da ga o ûitsama Elob ra hui da ǂgaosa. (Psa. 118:6) Sida ǂgomǃgâsiba da ge a ǀgaiǀgai ǁkhā Jehovab nî hui dasa ǃkharu ge ǁaeb ǃnâb ge hui da ǀgauba ǂâiǃgâs ǃnâ-ū. Jehovab ge ǃkharu ge ǁaeb ǃnâ ǁîb ǃoaba-aona sâu hâ i ǀgaub xa ra ǂâiǂâi ǃnâ du Elobmîs ǃnaeǃkhaide khomai re. (Jes. 37:​17, 33-37) Jehovab nētsē sida ǃgâsana ra ǂkhâǃnâ tsî ra hui ǀgaub xa jw.orgs ai khomai re. Jehovab ge sado a hui ǀgaub xas tsîna ǂâiǃgâ re. Tā ǂâiǂhansen re ǀnîsi du ga kai ǀgaub Jehovab ge sâu duba ǂâihō tama i o, aiǁgause ǀnîsi bēri tamas ka io xamma ǃkham ǃoasa. Tae-i ǃaroma? Ī-a ǃkhais ge Jehovab ge ǂgui xūna sadu ûib ǃnâ ge dī. ǁÎb ge ge ǂgae du î du ǁîb ǀhō kai. (Jhn. 6:44) Nēsis tsîna du ge ǁîb huib ǃaroma ǀgui amab ǃnâ hâ. Tae-i ǃaroma du ǁîb ai huiba ǂgan tama î du ǂâihō, ǁîb ge mati sadu ǀgorede ǁnâu-am tsî ǂkhâǃnâ ǀgausa. Tsî ǂhanu  ǁaeb ai huiba mā dusa î du ǃgom ǁaegu ǃnâ mâ ǃkharu. ǁNāti ī xūn xa ǂâiǃgâs ge sadu ǂgomǃgâsib Jehovab aiǃgû tsî sado nî huisa ra ǀgaiǀgai.

9. Tae-e da ǂâis ǃnâ nî ūhâ ǃgomsina da ga hōǃâ o? (ǂKhoamîdi 27:11)

⁹ Jehovaba ûitsama khoeb ase mûs ge nî hui da î da sida ǃgomsina ǃgâi ǀgaub ǃnâ mû. Mâ ǀgaub ǃnâ? ǃGomsina da ga ūhâ o da ge tae-i ǂhâǂhâsas ai sida ǂâisa nî ǂnûi. ǁGâuab ge ra mî ǃgomsina da ga ūhâ o da Jehovaba nî ǁnâxū ti, ǁnā-amga i ge sadu ǃgomsina ra sîsenǂam ǀgauba Jehovaba ra tsâǀkhā. (Job. 1:​10, 11; Khomai re ǂKhoamîdi 27:11 sa.) Sida ǃgomsin ǂamai da ga ǂgomǂgomsase Jehovab ǃoagu hâ ǀgara o da ge ra ǁgau Jehovaba da a ǀnamsa tsî ǁgâuaba ǂhûmi-aob ase ra ǁgausa. ǂHanuba ra mâǃoa du? Mari ǃgomsina du ra hōǃâ? Sadu aoǁnâ sîsen-e ǃgâi tamase ra ūǃoahe tamas ka io du ǀkhara ǃgomsi-e ūhâ? Ti i nî īs ga o ǂâi-oa re, sadu di mâsib ge ǃēsa ra mā du î du Jehovab ǂgaoba ǂkhîǂkhî. ǂÂis ǃnâs tsîna ūhâ re, Jehovab ge tātsē mā-am tide sadu ǁkhā du as ǂamai nî ǃâitsâhe ǃkhaisa. (1Kor. 10:13) ǁÎb ge ǀgaiba nî mā du î du mâǀgai.

ÛITSAMA ELOB GE NÎ MĀDAWA-AM DU

10. Tae-eb ûitsama Eloba ǁîba ra ǃoabana nî dība?

¹⁰ Jehovab ge hoaǁae ǁîba ra ǃoabana ra mādawa-am. (Heb. 11:6) ǁÎb ge nēsi ǂkhîb tsî ǂkhîǂâixasib tsîna ra mā da tsîb ge ǀamo ûib tsîna hānîǁaeb ǃnâ nî mā da. Sida ǃâubasensa da ge Jehovab ǃnâ a ūhâ ǁkhā ǂgomǃgâsiba ūhâse ǁîb turab tsî ǀgaib tsîna ūhâsa sida mādawa-amsa. ǁNā ǂgomǃgâsib ge ra hui da î da aiǃgû tsî ǁîba ǁkhāda a-i hoa-e sida ǃoabas ǃnâ mā. ǂGomǂgomsa ǃoaba-aon Elob din ge ǃkharu ge ǁaeb ǃnâ dī khami. Nēsab ge Timoteub tsîna ge dī.—Heb. 6:​10-12.

11. Tae-i ǃaromab ge Timoteuba ǃgarise ǀhaohâb ǃnâ gere sîsen? (1Timoteub 4:10)

¹¹ Khomai re 1 Timoteub 4:10 sa. Timoteub  ge ǀgaisa ǂgomsa ge ūhâ i Elob nî huibi ǃkhaisa. ǁNā-amagab ge Jehovab tsî naun ǃaroma ǃgarise gere sîsen. Tae-eb gere dī? Apostel Paulub ge ǁîba ge ǂkhâǃnâ îb aoǁnâ sîsenni tsî ǀhaohâb ǃnâ ǃgâi ǁkhāǁkhā-ao kai. Paulub ge ge mîbabi îb ǃgâi aiǁgause ǁîb ǀkha ǀguiba ra ǃoaba ǃgâsana ība, ǂkhaman tsî kairan tsîn hoan ǃgao. ǁÎb ge ǃgom ǁgaumâidi tsîna ge māhe hâ i. Nēs ge ǀgaisa xawe ǀnamxaǃnâ ǁnâmasa ǂhâ ge hâ i khoena māsa ge ǃkhōǂgā hâ i. (1Tim. 4:​11-16; 2Tim. 4:1-5) ǀNî ǁaegu ain ge nauna ǁîb gere dī sîsen-e ge mû tama hâ i tamas ka io ge ganganoǃnâ i ǁîb ge dī sîsenan ǃaroma, xaweb ge ge ǂan i Jehovab nî mādawa-am bisa.—Rom. 2:​6, 7.

12. Tae-i ǃaroma gu ǀhaohâb ǃûi-aoga ǃgarise ǀhaohâgu ǃnâ ra sîsen? (Ai-īsiba mû re.)

¹² ǀHaohâb ǃûi-aogu tsîn ge nētsē ǂgomǃgâsiba ūhâ Jehovab ǁîgu ra dī ǃgâi sîsen-e mû tsî ra ǃgôaǃgâsa. ǃGâsana gagasise ǂkhâǃnâ, ǁkhāǁkhās tsî aoǁnâs ǂamai gu ge ǂgui ǀhaohâb ǃûi-aoga oms sîsen-i tsî tsūkeǃgâb sîsen-i ǀkhas tsîna ra hui. ǀNîgu ge ǀaesen hâ ǃgâsana sari tamas ka io ǀaeǃkhōs komites ǀkha ra sîsenǀhao. Nēti-i sîsenni ǃaroma ra māsen ǀhaohâb ǃûi-aogu ge a ǂan ǀhaohâb a Jehovab disa tsî khoen xa ǂgaeǂguihe tamasa. ǁNās xa ǃaromahe hâse gu ge ǀhaohâb ǃûi-aoga ǃgarise ra sîsen tsî ǀoasa ǂgomǃgâsiba ūhâ Elob nî mādawa-amgusa dī gu ra xūn ǃaroma.—Kol. 3:​23, 24.

13. Jehovaba ǁîba du ra dīban ǃaroma mati ra tsâ?

¹³ Hoa khoen ge ǀhaohâb ǃûi-ao kai tide xawe da ge hoa da xū-e Jehovaba a mā ǁkhā. Sida Elob ge kaise ra ǃgôaǃgâ ǁkhā da a-i hoa-e da ga dī tsî ǁîba ǃoaba o. Nēsi da ga kaise mā tama i xaweb ge ǁîba māsenxase da ga ǃhūbaib ǂhawase ra dīhe sîsen-i ǃaroma mā o ra mû. ǁÎb ge ra ǂkhî sida taoba dan tsî da ga  ǀhaohâb ǀhaodi ǃnâ ǃereams ǃaroma sida ǃomakhui o tsîb ge ra ǃgâiaǂgao tsûtsû da go khoe-e da ga ǀûba o. Jehovaba du ǃnāsa-e dība tama khami du ga tsâ xawe ǂgomǃgâsiba ūhâ re Jehovab ra ǃgôaǃgâsa dī ǁkhā du a xūna. ǁÎb ge ǁnās ǃaroma ǀnam du tsî nî mādawa-am du.—Luk. 21:​1-4.

ÛITSAMA ELOB ǀGŪSE HÂ ǀGARA

14. Jehovab ǀgūse hâ ǀgarasa mati ra hui da î da ǂgomǂgomsase hâ? (Ai-īsib tsîna mû re.)

¹⁴ ǀGū ǀhōsagusisa da ga Jehovab ǀkha ūhâ o i ge nî supu ǁîb ǃoa-ai ǂgomǂgomsase hâsa. ǁNāsab ge Josefa ge hōǃâ. ǁÎb ge ǀgaisase ge ǂkhā îb tā ǀai. Elob ge ǁîb ǃoagu ge ama i tsîb ge ǁîba ge ǂkhîoǃnâ kai ǂgao tama hâ i. (Gen. 39:9) Jehovab ǀkha ǀgū ǀhōsagusisa ūhâs ǃaroma da ge ǁaeba dī tsî nî ǀgore ǁîb ǃoa tsî ǁîb mîsa nî ǁkhāǁkhāsen. Sida di ǀhōsagusis ge ǁnās ǀkha nî kai. Josefi khami da ga ǀgū ǀhōsagusisa Jehovab ǀkha ūhâ, o da ge Eloba ra ǂkhîǂkhî xū-i hoa-e nî dī ǂgao.—Jak. 4:8.

15. Tae-e da a ǁkhāǁkhāsen ǁkhā ǃgaroǃhūb ǃnâ ge Israelǁîn ǀkha ī xūna xu? (Hebreǁîn 3:12)

¹⁵ ǁNān hîna Jehovab a ûitsama Elosa ra ǀurun ge supuse ǁîba xu ra hâbē. ǃGaoǃgâ re tae-i ge Israelǁaes ǀkha ǃgaroǃhūb ǃnâ īsa. ǁÎn ge ge ǂan i Jehovab a ûitsamasa xawen ge ge îganǀgē tsoatsoa ǁîn ǂhâsigab nî kōǃgâ ǃkhaisa. Tsîn ge ge dî: “ǃKhūba amase sida ǀkha hâb a?” (Eks. 17:​2, 7) ǁNās xa ǃaromahe hâsen ge Elob ǃoa-ai ge khâikhâisen. Amase da ge ǁîn di ǁnâuǀnamoǃnâ tanisen ǀgauba xu ra ǂgōsen ǂgao, nēs ge sida aiǁgause ība.—Khomai re Hebreǁîn 3:12 sa.

16. Tae-e sida di ǂgomsa a ǃâitsâ ǁkhā?

¹⁶ Nē ǃhūbaib ge Jehovab ǀgūse hâ ǀgarasa ra ǃgom kai. ǂGuin ge Elob a ûitsama ǃkhaisa ūǃoa tama hâ. ǃNāsa ǁaeba i ge Jehovab ra ǂgaoǀkhā xūna ūǃoa tama khoena ǃgâi ûiba ūhâ. ǁNāsa da ga mû os ge sida ǂgomsa ra ǃâitsâhe. Elob ûitsama  ǃkhaisa da ǂnoagu tama xawe da ge ǀnî ǁaega a îganǀgē ǁkhā sidab a hui ǁkhāsa. Psalmdi 73 di xoa-aob tsîn ge ǁkhā xūn xa gere ǂâi. ǁÎb ǂnamipe hâ khoen Elob ǂhanuga ūǃoa tama i tsî noxopa ǃgâi ûiga ūhâsan ge ge mû. Nēs xa ǃaromhe hâsen ge gere îganǀgē Eloba ǃoabas a ǃgâi ǃkhaisa.—Psa. 73:​11-13.

17. Tae-e nî hui da î da Jehovab ǀgūse hâ ǀgara?

¹⁷ Tae-e Psalmdi xoa-aoba ge hui îb ǁîb ǂâi ǀgauba dawa? Jehovaba ra ǀurun ǀkha i tae-e nî īsab ge ge ǂâiǃgâ. (Psa. 73:​18, 19, 27) ǁÎb ge Jehovaba ǃoabasa xu ra hâ ǃgâib xas tsîna ge ǂâiǃgâ. (Psa. 73:24) Sida tsîn ge Jehovab ge mā da ǀkhaegu xa a ǂâiǃgâ ǁkhā. ǂÂiǃgâ re matib ga sida ûiba ǀkhara hâsa Jehovaba da ga nēsi ǃoaba tama hâ o. Tae-i ǃaroma i a ǃgâi Jehovaba ǃoabas xa da ga ǂâi o? ǁNās ge nî hui da î da ǂgomǂgomsase ǁîb ǃoagu hâ tsî da ge Psalmdi xoa-aob khami nî mî: “Xawe tita xasa, ǃgâiba te a Elob ǀgūse hâsa.”—Psa. 73:28.

18. Tae-i ǃaroma da hānîǁaeba ǁkhoaǂgaosib ǀkha a ǃoa ǁkhā?

¹⁸ Mâ ǃgomsi-i ǀgui-e da ga nē ǀuniga tsēdi ǃnâ ǃkharuǃnâ xawe da ge a ǂan tanihō ǁkhā da nîsa “ûitsama tsî ama Eloba” da ra ǃoaba amaga. (1Tes. 1:9) Sida Elob ge ama khoeb ǁîba ra ǃoaba khoena ra tsâbaba. ǃKharuge ǁaeb ǃnâb ge ǁîb ǃoaba-aona ge hâba i tsîb ge nētsēs tsîna sida ǀkha hâ. ǀGūǁae da ge kai ǁgâiǀāba nî hōǃâ nē ǃhūbaib ai. Xawe da ge ǀguri hâ tide, Jehovab ge sida ǀkha nî hâ. (Jes. 41:10) “ǁNā-amaga da kom ǁkhoase a mî ǁkhāo: ǃKhūb ge a ti Hui-ao tsî ta ge ǃao tide.”—Heb. 13:​5, 6.