1. ¿Tlen techpaleuis matiktekichiuilikan Jehová maski tikixnamikij miak tlamantli?

 BIBLIA kijtoua tikatej “itlamian tonalmej” ikinon panotok miak tlamantli oui uan ualeua tikitaj oui titlaxikoskej (2 Tim. 3:1). Axkan tinochtin titlajyouiaj porque tlanauatijtok Satanás. Pero tejuan okachi titlajyouiaj uan techkokoliaj porque tiktekichiuiliaj Jehová. ¿Tlen techpaleuis matiktekichiuilikan Jehová maski titlajyouiaj? Techpaleuis tla tikilnamikij Jehová “ye Dios akin yoltok” (Jer. 10:10; 2 Tim. 1:12).

2. ¿Ken kiteititia Jehová melauak yoltok?

² Jehová melauak kajki ikinon ye techpaleuia ijkuak titlajyouiaj (2 Crón. 16:9; Sal. 23:4). Techpaleuis matitlaxikokan ijkuak itlaj techpanos tla tikilnamiktokej toTajtsin Dios yoltok. Tekiua David ijkon okitaya toTajtsin Dios. Matikitakan ken okichiuaya.

3. ¿Tlen okinekiaya kijtos David ijkuak okijto “¡Jehová yoltok!”?

³ David okineltokaya Jehová porque kuali okixmatiaya. Okilui Jehová makipaleui ijkuak tekiua Saúl uan oksekimej okinekiayaj kitlajyouiltiskej (Sal. 18:6). Ijkuak David okitak Jehová okinankili uan okimakixti, ye okijto: “¡Jehová yoltok!” (Sal. 18:46). David amo san okinekiaya kijtos Jehová melauak kajki. Se amochtli kijtoua tlen David okilui Jehová  okiteititiaya okineltokaya “toTajtsin Dios melauak yoltok uan nochipa kipaleuia ialtepe”. David okitaya Jehová okipaleuiaya. Non okipaleui okachi makineltoka Jehová yoltok. Noijki okiyolchika uan okipaleui makitekichiuili uan makiueyichiua (Sal. 18:​28, 29, 49).

4. ¿Ken techpaleuis tla tikneltokaj Jehová yoltok?

⁴ Tla tikneltokaj Jehová yoltok tiyolpakiskej ijkuak tiktekichiuiliskej. Noijki ijkuak itlaj tikixnamikiskej uelis titlaxikoskej uan ye techpaleuis okachi matiktekichiuilikan. Noijki techpaleuis amo keman matikkauakan.

TOTAJTSIN DIOS TECHPALEUIS PORQUE YE YOLTOK

5. ¿Tlen techpaleuis matitlaxikokan? (Filipenses 4:13).

⁵ Uelis titlaxikoskej maski sapanoua titlajyouiskej tla tikilnamiktokej Jehová yoltok uan nochipa techpaleuia. Jehová kipia sapanoua miak chikaualistli ikinon nochipa uelis techpaleuis. Noijki maski san tlen tlamantli tikixnamikiskej uelis techpaleuis matitlaxikokan (xiktlajtolti Filipenses 4:13). Tlen yotikitakej techyolchikauas ijkuak itlaj tikixnamikiskej. Ijkuak tikitaj Jehová techpaleuia, okachi tikneltokaj techpaleuis ijkuak sapanoua titlajyouiskej.

6. ¿Tlen okipaleui David okachi makineltoka Jehová?

⁶ Matikitakan ome tlamantli tlen okipanok David uan non okipaleui okachi makineltoka Jehová. Ijkuak okatka telpochtli uan okinmaluiaya ichkamej, se león okiuikak se ichkatsin. Okse tonal se oso noijki okiuikak okse ichkatsin. Pero David amo omomojti uan okinmikti nonmej yolkamej. Ijkon okinpaleui ichkatsitsintin. Ye okimatiaya Jehová okipaleui uan amo san iselti ijkon okichi (1 Sam. 17:​34-37). David nochipa okilnamikiaya tlen okipanok. Omokuayejyekouaya tlen okipanok uan non okipaleui makineltoka toTajtsin Dios yoltok uan nochipa kiyolchikauaskia.

7. ¿Tlen okipaleui David makitlanili Goliat?

⁷ Satepan ijkuak David ok okatka telpochtli okinmitato soldados israelitas. Okinmitak soldados sapanoua omomojtiayaj porque se tlakatl uejkapantik tlen omotokayotiaya Goliat okijtouaya okinekiaya inuan momakas (1 Sam. 17:​10, 11). Soldados omomojtiayaj porque okitayaj okatka uejkapantik uan okinmomojtiaya tlen okinmiluiaya (1 Sam. 17:​24, 25). Pero David omokuayejyeko okse tlamantli. Ye okajsikamatki Goliat okiuijuikaltijtoka toTajtsin Dios uan amo san okinuijuikaltijtoka soldados israelitas (1 Sam. 17:26). David omokuayejyeko ken Jehová yokipaleuijka. Ye okineltokaya toTajtsin Dios kipaleuiskia ijkon ken ijkuak okipaleui amitlaj makinpano ichkauan. Jehová okipaleui makitlanili Goliat (1 Sam. 17:​45-51).

8. ¿Tlen techpaleuis okachi matikneltokakan Jehová techpaleuis ijkuak titlajyouiskej? (Noijki xikita foto).

⁸ Tejuan noijki uelis titlaxikoskej ijkuak tikixnamikiskej seki tlamantli ijkon ken David okichi. Uelis ijkon tikchiuaskej tla tikilnamiktokej toTajtsin Dios yoltok uan techpaleuis (Sal. 118:6). Okachi tikneltokaskej Jehová tla timokuayejyekoskej ken yokinpaleui itekipanojkauan. Matiktlajtoltikan Biblia kanin kijtoua Jehová okinmakixti akinmej okitekichiuiliayaj (Is. 37:​17, 33-37). Noijki matimomachtikan seki tlamantli tlen kajki itech jw.org kanin kijtoua  Jehová yokinpaleui tokniuan. Noijki matikilnamikikan ken yotechpaleui Jehová. Amo matimotekipachokan tla amo techpanoua itlaj tetlajtlachialti ijkon ken ijkuak David okimikti se oso uan se león. Porque Jehová yotechpaleui miak. Matikitakan tleka ijkon tikijtouaj. Ye otechpaleui iuan matimouikakan (Juan 6:44). Tipouij itech ialtepe Jehová porque ye techpaleuia. Matikiluikan matechpaleui matikilnamikikan ken yotechnankili ijkuak otiktlatlaujtijkej. Noijki matikiluikan matikilnamikikan ken yotechpaleui ijkuak otitlajyouijtokaj noso ijkuak amo otikmatiayaj tlen tikchiuaskej. Ijkuak timokuayejyekouaj Jehová yotechpaleui okachi tikneltokaj ye nochipa techpaleuis.

9. ¿Tlen moneki tikilnamiktoskej ijkuak itlaj tikixnamikiskej? (Proverbios 27:11).

⁹ Axkan tikixnamikij miak tlamantli. Xamo amo techajxilia tomin, amo kinekij techkakiskej ijkuak titetlapouiaj noso tekiuajkej kinekij techtlajyouiltiskej. Pero timoyolseuiaj ijkuak tikilnamikij toTajtsin Dios tlen yoltok techpaleuia. Matikilnamikikan tlen tikchiuaskej kiteititis akin tikpaleuiaj, kox tikpaleuiaj Jehová noso Satanás. Satanás kijtoua ijkuak itlaj tikixnamikiskej san niman tikkauaskej Jehová (Job 1:​10, 11; xiktlajtolti Proverbios 27:11). Pero tla tiktlakamatij Jehová tikteititiskej tiktlasojtlaj uan tikteititiskej Satanás san tlakajkayaua. Ikinon tla itlaj tikixnamiktokej matikilnamikikan uelis tikyolpaktiskej Jehová tla tiktlakamatij. Noijki matikilnamiktokan Jehová amo kitekauilis matechyoltilana tlen amo uelis tikxikoskej (1 Cor. 10:13). Ye techpaleuis matitlaxikokan.

TOTAJTSIN DIOS TECHTEOCHIUAS PORQUE YE YOLTOK

10. ¿Ken kinteochiuas toTajtsin Dios akinmej kiueyichiuaj?

¹⁰ Jehová kinteochiua akinmej kiueyichiuaj (Heb. 11:6). Axkan techpaleuia matimoyolseuijtokan  uan matipakikan. Satepan kichiuas nochipa matiyoltokan. Tejuan tikneltokaj ye kineki techteochiuas uan amitlaj kitsakuilis ijkon makichiua. Ijkuak non tikilnamiktokej techpaleuia matiktekichiuilikan ken yiuejkika okichijkej itekipanojkauan. Matikitakan tlen okichi Timoteo (Heb. 6:​10-12).

11. ¿Tlen okiyolini Timoteo makinpaleui tokniuan? (1 Timoteo 4:10).

¹¹ (Xiktlajtolti 1 Timoteo 4:10). Timoteo okineltokaya toTajtsin Dios yoltok uan kiteochiuaskia. Ikinon okitekichiuili uan okinpaleui tokniuan. ¿Tlen okichi Timoteo? Apóstol Pablo okilui Timoteo kuali matlamachti. Ijkon tokniuan kitaskiaj kuali okichiuaya iteki. Noijki okilui makichiua seki tlamantli oui. Okilui makinyektlapoui tokniuan pero amo makinmajua (1 Tim. 4:​11-16; 2 Tim. 4:​1-5). Timoteo okineltokaya Jehová kiteochiuaskia maski oksekimej amo kitaskiaj tlen okichiuaya noso amo kipatioitaskiaj (Rom. 2:​6, 7).

12. ¿Tlen kinpaleuia tlayekankej kuali makichiuakan inteki? (Noijki xikita foto).

¹² Tokniuan tlayekankej kichiuaj ken Timoteo. Yejuan kinmaluiaj tokniuan, tlamachtiaj uan tetlapouiaj. Noijki sekimej tlapaleuiaj ijkuak kinchiuaj kalmej kanin timonechikouaj noso tlapaleuiaj kanin tlaxixini. Oksekimej kintlajpalouaj tokniuan tlen mokokouaj noso motlapouiaj inuan akinmej tlapajtiaj para kuali makinpajtikan tokniuan. Tokniuan kuali kichiuaj inteki porque kilnamikij Jehová okintlali matlapaleuikan. Noijki kineltokaj Jehová kipatioita tlen kichiuaj uan ye kinteochiuas (Col. 3:​23, 24).

13. ¿Ken momachilia Jehová ijkuak timochijchikauaj tiktekichiuiliskej?

¹³ Amo tinochtin titlayekankej pero Jehová kipatioita tlen tikchiuaj itech tlanechikol. Maski amo ueli tikchiuaj nochi  tlen tiknekiskiaj ye kita ijkuak tiktemakaj totomin maski amo sapanoua miak. Noijki yolpaki ijkuak kita timochijchikauaj titlanankiliskej ijkuak timonechikouaj maski tipinauaj. Noijki tikyolpaktiaj ijkuak tikintlapojpoluiaj oksekimej. Matikilnamiktokan Jehová techtlasojtla, kipatioita tlen tikchiuaj uan techteochiuas (Luc. 21:​1-4).

MATIMOUIKAKAN IUAN TOTAJTSIN DIOS PORQUE YE YOLTOK

14. ¿Tlen techpaleuis nochipa matimouikakan iuan Jehová? (Noijki xikita foto).

¹⁴ Amo oui tiktlakamatiskej Jehová tla kuali iuan timouikaj. Matikitakan tlen okichi José. Ye kuali omouikaya iuan Jehová uan amo okinekiaya kiyolkokos ikinon amo omotekak iuan isiua Potifar (Gén. 39:9). Tla tiknekij tikchiuaskej ijkon ken José okichi, moneki timouikaskej iuan Jehová, matimajxilikan timotlatlaujtiskej uan matimomachtikan iTlajtol. Ijkon amo tikyolkokoskej uan okachi iuan timouikaskej (Sant. 4:8).

15. ¿Tlen okichijkej israelitas uan tleka tejuan amo ijkon matikchiuakan? (Hebreos 3:12).

¹⁵ Akinmej kilkauaj Jehová yoltok uan ayakmo kineltokaj xamo satepan ayakmo kitlakamatiskej. Ijkon okinpanok israelitas ijkuak okatkaj kanin tlauaki. Yejuan okimatiayaj Jehová yoltok pero satepan opejki mokuayejyekouaj kox kinmakaskia tlen okinpolouaya. Hasta okijtojkej: “¿Touan kajki Jehová noso amo?” (Éx. 17:​2, 7). Ikinon satepan okixnamikej. Tejuan amo tiknekij ijkon tikchiuaskej (xiktlajtolti Hebreos 3:12).

16. ¿Tleka ualeua timotlajtlaniaj kox techpaleuis toTajtsin Dios?

¹⁶ Tikitaj oui timouikaskej iuan Jehová porque panotok miak tlamantli uan akinmej kichiuaj tlen amo kuali mota kuali katej. Noijki xamo tikitaj oui tikteititiskej tikneltokaj toTajtsin Dios porque axkan miakej kijtouaj  ye amo melauak kajki. Tejuan tikneltokaj toTajtsin Dios kajki pero xamo satepan peuas timotlajtlaniskej kox melauak techpaleuia. Ijkon okipanok akin okijkuilo Salmo 73. Ye okinmitaya oyolpakiayaj akinmej amo okitlakamatiayaj toTajtsin Dios. Ikinon opejki motlajtlania kox ipati okitekichiuiliaya Jehová (Sal. 73:​11-13).

17. ¿Tlen techpaleuis amo keman matikkauakan Jehová?

¹⁷ ¿Tlen okipaleui akin okijkuilo Salmo ayakmo mamokuayejyeko ijkon ken omokuayejyekouaya? Omokuayejyeko tlen kinpanoskia akinmej amo kitlakamatij Jehová (Sal. 73:​18, 19, 27). Noijki omokuayejyeko ken kiteochiuaskia Jehová tla nochipa kitekichiuiliskia (Sal. 73:24). Tejuan noijki matimokuayejyekokan ken sapanoua yotechteochi Jehová uan matimokuayejyekokan ken tiyetoskiaj tla amo tiktekichiuiliskiaj. Ijkon amo keman tikkauaskej Jehová. Tikijtoskej ijkon ken akin okijkuilo Salmo: “Pero nimotokis itech toTajtsin Dios non okachi kuali” (Sal. 73:28).

18. ¿Tleka amo techmomojtia tlen panos satepan?

¹⁸ Tejuan tikmatij Jehová kitekipachoua tlen techpanoua uan nochipa techpaleuis porque yiuejkika noijki okinpaleui itekipanojkauan. Axkan tikatej itlamian tonalmej ikinon tikixnamikij miak tlamantli pero uelis titlaxikoskej porque tejuan ‘tiitlakeualuan akin melauak toTajtsin Dios tlen yoltok’ (1 Tes. 1:9). Ayakmo miak poliui peuas ueyi tlajyouilistli pero Jehová touan yetos (Is. 41:10). “Ikinon amo matimomojtikan uan matikijtokan: ‘Amo nimomojtis porque Jehová nechpaleuia’” (Heb. 13:​5, 6).