1. Tiheeni yaakhavihenrye alapeli a Yehova otitelela omulapelaka owo moohipwacha makacamiho mancipale?

 “ILUKULUKU sa sookacamiha, soovila ovilela”—tihiiha Piipiliya onaloceiye sa mmahiku yaawo nnakhalaahu olelo. (2 Tim. 3:1) Ohiya pahiru makacamiho yaawo oothene ahu nnahoolelaahu mmukhalelo yoola wa ichu, alapeli a Yehova nlelo annahoolela wiikariwa. Nyenya tiheeni enanikhaviherya otitelela omulapela Yehova moohipwacha makacamiho mancipale? Nthowa nimoha tinawi hiyaano noosuwela wi Yehova “Muluku mukumi.”—Yer. 10:10; 2 Tim. 1:12.

2. Tiheeni nsuwenlaahu vooloca sa Yehova yeeyo enanlipiha vancipale?

² Yehova muchu eeparipari, owo onnanikhaviherya vaavaa nnahoolelaahu makacamiho nave ilukuluku soothene onnaavya mukhalelo wa onikhaviherya. (2 Math. 16:9; Sal. 23:4) Vaavaa nnuupuwelaahu wi Muluku ahu onnuukhuwa vancipale ni hiyaano nave wi ilukuluku soothene onachuna onikhaviherya, ninnakhalanoxa ikuru wi nihoolele makacamiho vyakala yaawo anakhumelela. Hankooni noone mukhalelo eyo yaaryaaya yeeparipari wa Mwene Tavite ni wa alapeli akina a Yehova.

3. Tiheeni Tavite aachuneiye oloca vaavaa aalonceiye wi “Yehova mukumi”?

³ Tavite aahimusuwela phaama Yehova nave aanamuroromela Yoowo. Vaavaa owo iikariweiye ni amwiicani awe, ophitaanyerya mwene Sawuli, Tavite aahivekela wa Yehova avekaka nikhaviheryo. (Sal. 18:6) Nave voocharela vaavaa Yehova aakhunleiye nivekelo na Tavite nave amukhaviherya, Tavite aahiloca: “Yehova mukumi!” (Sal. 18:46) Tiheeni Tavite aachuneiye oloca ni masu yaala? Makupa makina a ereferensiya yohooniherya wi Tavite ooniherya ororomela wawe wa Yehova wi owo Muluku mmoharu eeparipari nave wi ilukuluku soothene onnaakhaviherya alapeli awe.” Moorweela wa yaweereya awe, Tavite aanasuwela wi ilukuluku soothene Yehova aari oomaaleleya ni woona soothene seereya  wa owo nave wi aari ooreheryeya omukhaviherya owo, ti yeeyo yaamukhavihenrye Tavite otitelela omurumeela ni omucicimiha Yehova.—Sal. 18:28, 29, 49.

4. Ntakhara heeni ti woochuneya olekecheya wi Yehova Muluku mukumi?

⁴ Ororomela wi Yehova Muluku mukumi, echu yeeyo enahaala onikhaviherya omurumeela owo mwa mvai. Ti yeeyo enahaala onivaha ikuru wi nihoolele yaweeha vyakala ni onikhaviherya otitelela opaka owetha wahu mmuteko awe. Nave tho nnahaala okhala oolakelela otitelela omwaacamelaka Yehova.

MULUKU MUKUMI ONAMOOLIPIHAANI

5. Tiheeni enahaala waaceererya ororomela wahu vaavaa nnahaalaahu ohoolela makacamiho? (Afilipi 4:13)

⁵ Hiyaano nnanwerya ohoolela nikacamiho vyakala ntokweene naari nikhaani, wakhala wi ninnuupuwelela wi Yehova Muluku mukumi nave wi ilukuluku soothene ori ooreheryeya wi anikhaviherye. Wa Yehova makacamiho yaawo nnahoolelaahu makhaani. Owo ta Ikuru Soothene nave onanwerya onivaha ikuru seiyo nnachunaahu. (Mwaalakhanye Afilipi 4:13.) Mwawiihiiha, nnanwerya ohoolela nikacamiho vyakala moororomela. Vaavaa nnoonaahu wi Yehova onnanikhaviherya ophiyerya tho mu ichu ikhaani, ororomela wahu nlelo onnakhala woolipaxa wi owo onahaala onikhaviherya mu ichu itokweene.

6. Tiheeni yeeren’ye ni Tavite vaavaa owo aareiye mmiravo, yeeyo yeerinhe wi amuroromelekexa Yehova?

⁶ Moone saweereya piili seiyo saaceerenrye ororomela wa Tavite wa Yehova. Vaavaa Tavite aareiye mukukhula ari mmiravo, mu ikwaha piili soohiyana uursu ni mwaco yaahiphara epucepuche ya apapaawe. Mu ikwaha piili seiya Tavite aahiikara inama seiya nave aavuluxa epucepuche. Nyenya Tavite haawoone wi eyo eenreno moorweela wa ikuru sawe. Owo aasuwela wi aari Yehova aamvahe owo olipa murima ni ikuru wi eereno yeeyo. (1 Sam. 17:34-37) Tavite hantonko ocuwala saweereya sawe seiya piili. Vaavaa uupuweleiye yeeyo yeeren’ye, ororomela wawe wa Yehova waanakhala woolipaxa, asuwelaka wi ilukuluku soothene Muluku mukumi aahaala omukhaviheryaka omwaahiyu vaavaa onahaaleiye ochuna nikhaviheryo.

7. Tavite aatikitheryen’ye mu eheeni, nave eyo yaamukhavihenrye hai omvootha Koliya?

⁷ Elukuluku vakhaani ohoolo waya, woonaru vaavaa Tavite aaryeiye mmiravo, owo aahiya omixakalani weiwo yaariwo anakhoco o Isarayeli. Owo aahiiwa wi anakhoco yaari awoova nthowa nawi mfilisti awiichaniwa Koliya, ‘aanavaanyihana ni anakhoco o Isarayeli’. (1 Sam. 17:10, 11, PMM) Anakhoco yaahikhala awoova nthowa nawi awo yaatikitheryen’ye mu winnuwa ni woopopiha wawe yoowo aapakeiye. (1 Sam. 17:24, 25) Nyenya Tavite aatikitheryen’ye mmukhalelo woohiyana. Tavite aahisuwela wi Koliya haavaanyihana pahiru ni anakhoco o Isarayeli, nyenya tho ni “anakhoco a Muluku ookumi.” (1 Sam. 17:26, PMM) Tavite aatikitheryen’ye mwa Yehova. Owo aahisuwela wi Muluku mmohamoha yoowo aamukhavihenrye vaavaa aaryeiye mukukhula, aahaala weerano echu emohamoha wa owo mu elukuluku yeele. Tavite haakhwa minikwa wi aahaala okhalano nikhaviheryo na Yehova, nthowa na yeeyo Tavite aahiwerya omvootha Koliya!—1 Sam. 17:45-51.

8. Tiheeni enahaala olipiha ororomela wahu wi Yehova ilukuluku soothene onahaala onikhaviherya mu ilukuluku soovilaxa? (Moone tho eruku.)

⁸ Hiyaano tho nnanwerya ohoolela nikacamiho vyakala wakhala wi ninnuupuwela wi Muluku mukumi ori ooreheryeya ilukuluku soothene wi anikhaviherye. (Sal. 118:6) Vaavaa nnuupuwelaahu yeeyo owo opankeiye khalai, ninnawerya olipiha ororomela wahu wa Yehova. Mwawiihiiha, mwaalakhanye saweereya sa Mpiipiliyani seiyo inooniherya mukhalelo Yehova aakhavihenryeiye alapeli awe. (Yes. 37:17, 33-37) Ohiya yeeyoru, munanwerya waalakhanya saweereya sa annihu mu jw.org, saweereya  seiya sinnahiya mookwakwaleya wi Yehova onnaakhaviherya alapeli awe olelo. Nyuwaano tho munanwerya wuupuwelela ilukuluku seiyo Yehova ookhavihenryeiyeni. Vakina vaya, honahaala okhala echu yootikhiniha ntoko owana ni uursu naari mwaco, eparipari ti yawi Yehova ilukuluku soothene ari vakhiviru vanyu! Ntakhara heeni? Nthowa nawi ti yoowo oothanlileeni wi mukhale nthamwene awe. (Yoh 6:44) Nave orweela wa nikhaviheryo na Yehova nyuwaano munnawerya otitelela okhala oororomeleya wa yoowo. Vano, munoona hai ovekela wa Yehova mvekaka wi ookhaviheryeeni wuupuwela mikhalelo seiyo aakhunleiye mavekelo anyu, ookhavihenryeiyeni mu elukuluku yoophwanelela naari vaavaa aaryeiye vakhiviru vanyu mmikhalelo soovila? Wuupuwelela ichu seiya onahaala oweerihaani nyuwaano olekecheya wi ilukuluku soothene munanwerya omuroromela Yehova.

9. Tiheeni nnaphwanelaahu wuupuwela vaavaa nnahoolelaahu makacamiho? (Masiposipo 27:11)

⁹ Omoona Yehova ntoko Muluku mukumi onahaala onikhaviherya woonaka saweeha sahu mmukhalelo woophwanelela. Mwawiihai? Vaavaa nnahoolelaahu makacamiho, nnaphwanela wuupuwelaka wa yeeyo eri yoochuneyaxa. Satana olonce wi vaavaa nneeraahu nihoolele makacamiho nnahaala omuhiya Yehova. (Yupu 1:10, 11; mwaalakhanye Masiposipo 27:11.) Mwawiihiiha, vaavaa nnatitelelaahu okhala oororomeleya wa Yehova moohipwacha makacamiho, ninnooniherya osivela wahu wa owo, nave tho ninnooniherya wi Satana nawoothe. Hanka vooloca sa nyuwaano? Apwanne munnahoolela wiikariwa ni alamuleli, makacamiho a ikhorowa, okhoociwa mmuteko woolaleerya naari makacamiho makina? Mmukhalelo ori woothene yoowo munahoolelaanyu, munaphwanela wuupuwela wi eyo ekari ya omuhakalaliha Yehova. Nyenya muupuwele ela: Yehova harwa oohiyaani wi muhoolele makacamiho opwaha vaavaa munaweryelaanyuvo. (1 Ako. 10:13) Ilukuluku soothene owo onahaala woovahaani ikuru wi nwerye ovilela.

MULUKU MUKUMI ONAMOOREELIHAANI

10. Tiheeni Muluku ororomelinheiye wa yaale ari oororomeleya wa yoowo?

¹⁰ Yehova onnaareeliha yaale ari oororomeleya  wa Yoowo. (Ahe. 11:6) Owo onnanivaha murecele ni waakhwaneliwa hiihaano nave tho onahaala onivaha ekumi yoohimala omwaahiyu. Hiyaano ninnamuroromela Yehova, nthowa nawi noosuwela wi owo onahaala onireeliha nave ookhalano owerya ni nchuno wa weerano yeeyo. Mwawiihiiha nnaphwanela otitelela opaka owetha wahu wi nimulapele, hiiha ntoko alapeli oororomeleya akhalai yeenraaya. Ti yeeyo Timotiyu eenreiye.—Ahe. 6:10-12.

11. Ntakhara heeni Timotiyu aahipaka owetha wawe ntakhara muloko? (1 Timotiyu 4:10)

¹¹ Mwaalakhanye 1 Timotiyu 4:1. Timotiyu aakhalano nroromelo wa Muluku mukumi. Wa nthowa na yeeyo owo aahipaka owetha wawe wi alape ntakhara Yehova ni annawe. Owo eenreno hai yeeyo? Murummwa Paulo aahimuceenyerya okhala muhusiha aphaama mmulokoni ni mmuteko woolaleerya. Paulo tho aahimuleela Timootiyu wi avahe yootakiherya yaphaama wa anna, amiravo hiihaa tho wa awunnuwelavo. Nave tho Timotiyu aahaakhela mirici mikina soovila, seiyo saaphitaanyerya ovaha ekano yoolipa nyenya yoosivela wa yaawo yaaphwanela. (1 Tim. 4:11-16; 2 Tim. 4:1-5) Vakina vaya, akina hiyaahaala wiiwexexa muteko woothene yoowo Timotiyu aahaaleiye opaka naari mano othamalela, nyenya owo aanasuwela wi muchu oochuneyaxa Yehova, aanoona muteko woothene owo aapakeiye nave wi aahaala omureeliha.—Aro. 2:6, 7.

12. Ntakhara heeni atokweene annapaka owetha waya ophiyerya vaavaa anaweryelaayavo ntakhara muloko? (Moone tho eruku.)

¹² Olelo tho, atokweene ananwerya olekecheya wi Yehova onnoona soothesene seiyo awo anapakaaya, nave onnatepa ovaha esisapo muteko aya. Ohiya pahiru okukhula, ohusihani ni olaleerya, atokweene ancipale annakhaviherya muteko wa oteka ni okhaviherya yakhumelela epahu. Akina anarumeela mu Makhuuru Anaaxekurya Areca naari mu Makhuuru Aniiwanana ni Espitali. Atokweene yaawo ari oorehereryeya ntakhara muteko yoowo annasuwela wi muloko ti wa Yehova ohiya wa muchu. Mwa yeeyo awo ennapaka owetha waya ophiyerya vaavaa  enaweryelaayavo nave ennaroromela wi Yehova onahaala waareeliha mu soothene awo epankaaya.—Ako. 3:23, 24.

13. Yehova onoona hai vaavaa onooneiye wiilipixerya wahu wa omurumeela?

¹³ Tahi wi oothene ananwerya orumeela ntoko atokweene. Nyenya oothene ahu nnanwerya omvaha echu Yehova. Muluku ahu onnatepa ohakalalaxa vaavaa nnapakaahu owetha wahu wi nimurumeele. Owo onnoona soovaha sahu nnapakaahu ntakhara muteko wa elapo yoothene, naamwi iho sihaance. Owo tho onnahakalala vancipale vaavaa nniilipixeryaahu wi nivoothe wuuliwa muru ni oviiha nwono wi nivahe maakhulo mmuthukumano, nave murima awe onnasareya wiirumiha vaavaa owo onooneiye wi hiyaano hannakhapelela soohesa sa annihu nave ninnaakhurumuwela yaawo. Naamwi nyuwaano moonaka wi hamuwerya opaka sincipale ntoko mwaachunelaanyuvo, munaphwanela ororomela wi Yehova onnavaha esisapo soothene muneeraanyu. Owo onnoosivelaani vancipale, mwa yeeyo owo onahaala wooreelihaani vancipale.—Luka 21:1-4.

MUTITELELE OKHALA VAKHIVIRU VA MULUKU MUKUMI

14. Ti mwawiihai onthamwene woolipa ni Yehova onanikhaviheryaaya otitelela okhala oororomeleya? (Moone tho eruku.)

¹⁴ Onahaala okhala wookhweyaxa otitelela okhala oororomeleya wa Yehova wakhala wi ninnamoona owo okhala muchu eeparipari wa hiyaano. Ti yeeyo yeeren’ye ni Yosefe. Owo aahikhooca opaka mararuwo. Muluku aari eeparipari wa yene nave haachuna omuhiciha vancipale. (Map. 39:9) Wakhala wi ninnachuna wi Yehova tho akhale muchu eeparipari wa hiyaano, nnaphwanela omaliha elukuluku nichekulaka ni yoowo nave tho nihuseryaka masu awe. Mmukhalelo mmohamoha, onthamwene ahu ni yoowo onahaala winnuwaka nihiku ti nihiku. Nave hiiha ntoko Yosefe, hanrwa nchuna opaka echu yeeyo enahaala ohiciha murima Awe.—Tiy. 4:8.

15. Nihusiheryo taani nnahuseryaahu ni yeeyo yeeren’ye ni Aisarayeli mu ntakhwa? (Ahepri 3:12)

¹⁵ Yaale anamucuwala Yehova wi owo Muluku mukumi, mookhweya ananwerya omurakameela yoowo. Moone yeeyo yeeren’ye ni Aisarayeli  vaavaa awo yaaryaaya mutakhwani. Awo yaanasuwela wi Muluku ookhala, nyenya awo yaahipacerya okhala ni minikwa waakhanle wi chiryene Yehova ahaala waakhapelela yaawo. Awo yaahikoha: “Apwiya ari ni hiyo? Hanihiyale?” (Muk. 17:2, 7, PMM) Ntoko yookhumelela, awo yaahimmwareela Muluku. Hiyaano, hannachuna opaka echu emohamoha ntoko yaawo ni oneeriha okhala achu oohimwiiwelela Yehova.—Mwaalakhanye Ahepri 3:12.

16. Tiheeni enahaala weeha nroromelo nahu?

¹⁶ Tahi wookhweya otitelela omwaacamela Yehova mu elapo yeela nnakhalaahu. Ophiyerya tho wi achu ancipale analoca wi Muluku haawo. Ophiyerya tho yaale ahinampwacha Muluku enakhala ntoko wi aakhalano ekumi yaphaama. Vaavaa nnoonaahu yeeyo yeereyaka nroromelo nahu nnanwerya weehiwa. Eparipari wi haniphiyerya makuchuwelo awi Muluku haawo, nyenya nnanwerya opacerya okhwa minikwa waakhanle wi chiryene owo onahaala onikhaviherya. Mulipa oomurepa Salmu 73 ohoolela nikacamiho nenla. Achu yaawo yaamurukurenrye yaanakhooca malamulo a Muluku mwaayini, nave yaanakuxa okumi mmukhalelo yoowo yaachunaaya. Wa nthowa na yeeyo owo aahipacerya okhwa minikwa waakhanle ti wamphurelo otitelela omurumeelaka Yehova.—Sal. 73:11-13.

17. Tiheeni enahaala onikhaviherya otitelela omwaacamelaka Yehova?

¹⁷ Tiheeni yaamukhavihenrye mulipa oomurepa Salmu otoroka moonelo awe? Owo aahuupuwela yeeyo yaahaala weereya wa yaale yaahaala omucuwala Yehova. (Sal. 73:18, 19, 27) Owo tho aahimaala wi uupuwele miphurelo soothene sa omurumeela Muluku. (Sal. 73:24) Hiyaano tho nnanwerya wuupuwela sa mareeliho oothene yaawo Yehova onanivaheiye. Mweererye waanyiherya mukhalelo okumi anyu waahaalaaya okhala waakhanle wi hamunamurumeela Yehova. Wuupuwelela ichu seiya onahaala onikhaviherya otitelela okhala oororomeleya, nave hiiha ntoko mulipa oomurepa Salmu aalonceiye wi: “Nto wa miyaano, ti waphaama waacamela wa Muluku.”—Sal. 73:28.

18. Ntakhara heeni hannaphwanela okhala awoova wa yeeyo enahaala weereya omwaahiyu?

¹⁸ Hiyaano nnanwerya ohoolela nikacamiho vyakala nenlo nnakhumelela ohoolo wahu variyari va mahiku yaala ookuchula nthowa nawi na “akapuro a Muluku mukumi ni eeparipari.” (1 Ate. 1:9) Yehova, Muluku eeparipari nave ilukuluku soothene ori ooreheryeya wi anikhaviherye. Owo aahikhala vakhiviru wa alapeli awe khalai nave onahaala weerano emohamoha tho wa hiyaano olelo. Moohilekela hiyaano nnahaala ohoolela yoohooxa etokotoko. Nyenya hiyaano hanikhala mukhatiihu, Yehova onahaala okhala mmakupa ahu. (Yes. 41:10) Mwawiihiiha oothene ahu nnanwerya okhala “oolipa murima ni oloca: ‘Yehova tonakikhaviherya; nkirwa koovaru echu.’”—Ahe. 13:5, 6.