1. Hadia mbörö wa anau gölö nono mbanua Yehowa ba wamosumange yaʼia hewaʼae oya gabula dödö nitaögöra?

 IFATUNÖ khöda Sura Niʼamoniʼö wa no so ita ba ”mbaŵa si lö sökhi sabua fanaögö” ba ngaluo safuria andre. (2 Ti. 3:1) Baero daʼö, oya nasa gabula dödö nitaögö nono mbanua Yehowa ba gulidanö nifatörö Zatana andre börö me lafosumange Yehowa. Hadia zanolo yaʼita irege anau gölöda ba wamosumange Lowalangi Yehowa? Sambua ba gotaluania yaʼia na no tarasoi samösa wanolo moroi khö Yehowa ba taʼila wa ”yaʼia Lowalangi sauri”.—Yer. 10:10; 2 Ti. 1:12.

2. Hadia geluahania wa Yehowa andrö Lowalangi sauri?

² Sindruhu-ndruhu wa so Lowalangi Yehowa ba omasi ia wanolo yaʼita na alua khöda gabula dödö. (2 Ng. 16:9; Si. 23:4) Na lö olifu ita wa Yehowa andrö Lowalangi sauri ba hasambalö itolo ita, tola tobali fangabölöda daʼö ba wanaögö abula dödö. Nehegö hewisa waʼalua daʼö ba waʼauri Dawido.

3. Hadia geluaha wehede Dawido me iwaʼö ”sauri sa Yehowa”?

³ Aboto ba dödö Dawido haniha Yehowa ba iʼodaligö Lowalangi. Me edöna Razo Saulo hegöi niha tanö böʼö ba wamunu yaʼia, iʼangaröfili Yehowa ba wangandrö fanolo. (Si. 18:6) Imane Dawido me no ifondrondrongo wangandrönia Yehowa ba teʼefaʼö ia, ”Sauri sa Yehowa!” (Si. 18:46) Hadia geluaha wehede Dawido andrö? Moloʼö sambua karya referensi, fehede  daʼö zangoromaʼö faʼafaduhu dödö Dawido wa Yehowa andrö ”Lowalangi sauri si lö tebulö ba wanolo ono mbanuania”. Faduhu dödö Dawido wa iʼila Lowalangi hadia zalua khönia ba hasambalö itolo ia Lowalanginia. Daʼa zameʼe faʼanau gölö khö Dawido ba wamosumange hegöi ba wanuno Yehowa.—Si. 18:​28, 29, 49.

4. Hadia mbuania na faduhu dödöda wa Yehowa andrö Lowalangi sauri?

⁴ Na faduhu dödöda wa Yehowa andrö Lowalangi sauri, daʼö zanolo yaʼita ba wamosumange yaʼia si fao faʼowölö-ölö. Tola tataögö wanandraigö ba tefarou dödöda ba wangai halöwö khö Lowalangi. Baero daʼö, tola tahalö gangetula enaʼö itugu ahatö ita khö Yehowa.

IBEʼE KHÖU WAʼABÖLÖ LOWALANGI SAURI

5. Hadia zameʼe khöda faʼafaduhu dödö na göna ita fanandraigö? (Filifi 4:13)

⁵ Tola anau gölöda wanaögö fanandraigö, sebua mazui side-ide, na lö olifu ita wa Yehowa andrö Lowalangi sauri ba no ihenaigö ia ba wanolo yaʼita. Gofu hadia gabula dödö salua khöda, lö hadöi si tebai iʼasiwai Lowalangida. Yaʼia andrö Fondrege Zabölö, ba tola ibeʼe khöda waʼabölö enaʼö anau gölöda. (Baso Wilifi 4:13.) Daʼa zameʼe khöda faʼafaduhu dödö na alua khöda wanandraigö. Baero daʼö, ba ginötö tarasoi wanolo moroi khö Yehowa na göna ita fanandraigö side-ide, tatu itugu faduhu dödöda wa hasambalö itolo ita na alua wanandraigö sebua.

6. Hadia manö zalua khö Dawido irege monönö waʼafaduhu dödönia khö Yehowa?

⁶ Nehegö zi dombua ngawalö zalua khö Dawido irege monönö waʼafaduhu dödönia khö Yehowa. Me awuyu-wuyu, tobali ia kubalo mbiri-biri. So sageu mberua hegöi singo sangoloiʼö biri-biri namania. Ba zi dombua salua andrö, lö ataʼu Dawido ba wolohi urifö samuʼi andrö ba iʼefaʼö mbiri-biri namania. Hizaʼi, lö irai so ba wangera-ngerania wa tola ifalua daʼö börö waʼabölönia samösa. Iʼila wa Yehowa zameʼe khönia faʼabölö. (1 Sa. 17:​34-37) Lö irai olifu Dawido zalua khönia andrö. Börö me ihaogö iʼangerönusi daʼö, so khönia waʼafaduhu dödö wa ibeʼe khönia waʼabölö Yehowa, Lowalangi sauri ba zi so miföna.

7. Haʼokhö iʼosambuaʼö dödönia Dawido, ba hana wa tobali fanolonia daʼö irege tola möna ia?

⁷ Me bohou ebua Dawido, möi ia ba nose ndra saradadu ndraono Gizaraʼeli. Iʼila wa agataʼu ndra saradadu me so samösa niha Wilisiti sebua niha sotöi Goliato sangumaʼö, ”Uʼailasi ndraono Gizaraʼeli si no mamaʼoli yaʼira ba naha wasuwöta.” (1 Sa. 17:​10, 11) Ataʼu ndra saradadu börö me no laʼosambuaʼö dödöra ba waʼebua mboto Goliato hegöi fehedenia khöra. (1 Sa. 17:​24, 25) Hizaʼi tenga ba daʼö iʼosambuaʼö dödönia Dawido. Aboto ba dödö Dawido wa niʼoʼaya Goliato tenga ha ira saradadu ndraono Gizaraʼeli, hizaʼi no ”iʼailasi ndra saradadu Lowalangi sauri”. (1 Sa. 17:26) Iʼosambuaʼö dödönia Dawido khö Yehowa. Börö me no irai itolo ia Yehowa ba zilalö me tobali ia kubalo, andrö wa faduhu dödönia wa hasambalö itolo ia Yehowa ba zalua andre. Daʼö mbörö wa barani ia iʼondrasi Goliato, ba möna ia!—1 Sa. 17:​45-51.

8. Hadia zangaʼaroʼö faʼafaduhu dödöda wa hasambalö itolo ita Yehowa na tataögö wanandraigö? (Faigi göi gambara.)

⁸ Tola tataögö ngawalö wanandraigö salua khöda na lö olifu ita wa hasambalö itolo ita Lowalangi sauri. (Si. 118:6) Enaʼö aro waʼafaduhu dödöda, moguna taʼangerönusi hadia zi no irai ifalua ba zilalö. Moguna tabaso waö-waö nitutunö ba Zura Niʼamoniʼö  hewisa Yehowa ba wangefaʼö ono mbanuania. (Yes. 37:​17, 33-37) Baero daʼö, nehegö göi gangombakhata si so ba jw.org, sanutunö khöda hadia zi no ifalua Yehowa ba wanolo ira talifusöda iadaʼa. Törö göi tödöu hewisa me itolo ndraʼugö Yehowa. Te öwaʼö tödöu wa lö irai ifalua khöu zahöli-höli dödö Yehowa, simane ba wangefaʼö yaʼugö moroi ba mbawa zingo hegöi berua. Tenga daʼö geluahania wa lö nitolo Yehowa ndraʼugö. Sindruhunia, no oya nifalua Yehowa khöu ba waʼaurimö. No idöni ndraʼugö tobali si fahuwu khönia. (Yoh. 6:44) Irugi iadaʼa, börö wanolonia andrö wa tola anau gölöu ba wamosumange yaʼia. Börö daʼö, andrö khö Yehowa enaʼö ifasugi ba dödöu hewisa me ifondrondrongo wangandröu, ibeʼe khöu wanolo ba ginötö si tefaudu, mazui me iʼameʼegö tödö ndraʼugö ba ginötö alua gabula dödö. Na öfalua woʼangerönusi simane daʼö, tola monönö waʼafaduhu dödöu khö Yehowa wa lö tebulö itolo ndraʼugö.

9. Hadia zinangea tatörö tödöda na alua khöda wanandraigö? (Amaedola 27:11)

⁹ Na sauri sa Lowalangi Yehowa andrö ba wamaigida, tobali fanolo khöda daʼö ba wangokhögö tödö satulö na alua khöda wanandraigö. Hewisa wa tola? Ibörögö aboto ba dödöda wa fanandraigö salua khöda moʼamakhaita daʼö ba gamadöniwa sabölö ebua ba gotalua Yehowa hegöi Satana. Iwaʼö Satana na tefakao ita hasambalö taröi dania Yehowa. (Yob. 1:​10, 11; baso Gamaedola 27:11.) Hizaʼi, na anau gölöda ba wanaögö fanandraigö, no taforomaʼö waʼomasida khö Yehowa ba tafaduhuʼö wa falimo Zatana. Tola manö lasaisi nono mbanua Yehowa ira samatörö ba zi so yaʼugö, te abua khöu ba wangalui soguna, lö latemaʼö duria somuso dödö nituriaigömö, mazui oya wanandraigö tanö böʼö salua khöu. Na alua daʼö, törö tödöu wa daʼö ginötönia khöu ba wangomusoiʼö tödö Yehowa. Törö tödöu wa lö ilulu ndraʼugö Yehowa ba wanaögö fanandraigö si  tebai ötaha. (1 Ko. 10:13) Ibeʼe khöu waʼabölö enaʼö so khöu waʼanau gölö.

IFAHOWUʼÖ NDRAʼUGÖ LOWALANGI SAURI

10. Hadia nifalua Lowalangi sauri ba niha samosumange yaʼia?

¹⁰ Hasambalö ifahowuʼö Yehowa niha samosumange yaʼia. (Heb. 11:6) Ibeʼe khöda waʼatulö ba faʼahono dödö iadaʼa, ba faʼauri si lö aetu ba zi so miföna. Faduhu dödöda wa omasi Yehowa wamahowuʼö yaʼita ba tola ifalua daʼö börö me so khönia kuaso. Faʼafaduhu dödöda zamarou yaʼita ba wamosumange yaʼia, simane nifalua niha si lö faröi khö Lowalangi me götö föna. Duma-dumania Timoteo.—Heb. 6:​10-12.

11. Hadia zamarou tödö Dimoteo irege iforege wangai halöwö ba mbanua niha Keriso? (1 Timoteo 4:10)

¹¹ Baso 1 Timoteo 4:10. Iʼokhögö wamati saro Timoteo khö Lowalangi sauri. Andrö wa iforege wohalöwö ba itehegö waʼabölönia. Duma-dumania, simane famarou dödö nibeʼe Waulo, iforege ba wondrouʼö faʼonekhenia ba wamahaʼö hegöi ba wahuhuosa föna niha sato. Ibeʼe göi duma-duma khö ndra talifusö si sara lala wamati, he sawuyu-wuyu hegöi satua. Ba tebeʼe khönia ösa halöwö sabua, farahu ba daʼö ba wameʼe mene-mene sabeʼe hizaʼi si fao faʼomasi. (1 Ti. 4:​11-16; 2 Ti. 4:​1-5) Faduhu dödö Dimoteo wa ifahowuʼö ia Yehowa hewaʼae lö sangila famorege nifaluania mazui lö laʼameʼegö tödö ia niha böʼö.—Rom. 2:​6, 7.

12. Hadia zamarou tödö ndra satua sokubaloi irege laforege wohalöwö ba mbanua niha Keriso? (Faigi göi gambara.)

¹² Simanö göi ndra satua sokubaloi iadaʼa, faduhu dödöra wa iʼila ba iʼameʼegö tödö halöwöra Yehowa. Baero halöwö fokubaloi, ba wameʼe famahaʼö, hegöi feʼamöi manuriaigö, ato göi ndra satua sokubaloi si fao ba halöwö fangehaogö tomosa hegöi ba wameʼe fanolo na alua bencana. Tanö böʼönia  fao ira ba Kelompok Pengunjung Pasien mazui Panitia Penghubung Rumah Sakit. Aboto ba dödö ndra satua sokubaloi wa okhöta Yehowa mbanua niha Keriso, tenga okhöta niha gulidanö. Börö daʼö, lafalua halöwöra soroi ba dödö ba faduhu dödöra wa ifahowuʼö Yehowa nifaluara.—Kol. 3:​23, 24.

13. Hewisa dödö Yehowa ba wamorege nifaluada ba wangai halöwö khönia?

¹³ Lö fefu ahori tobali satua sokubaloi. Hizaʼi, fefu ita so zi tola tabeʼe khö Yehowa. Omuso dödö Lowalangida na tabeʼe khönia wondrege zi sökhi ba wangai halöwö khönia. Duma-dumania, iʼila Yehowa dolo-tolo nibeʼeda soguna ba halöwö ba zi sagörö ulidanö, hewaʼae no ide-ide daʼö. Omuso sibai dödönia na tabeʼe mbua gera-erada ba gangowuloa hewaʼae na aila-aila ita, simanö göi na taʼefaʼö zala niha böʼö. Hewaʼae lö oya zi tola öfalua khö Yehowa, yafaduhu dödöu wa iʼameʼegö tödö nifaluamö, iʼomasiʼö ba ifahowuʼö ndraʼugö.—Luk. 21:​1-4.

BÖI TEBULÖ TAHATÖʼÖ ITA KHÖ LOWALANGI SAURI

14. Hewisa wa tobali fanoloda enaʼö lö faröi ita khö Yehowa na lö tebulö ahatö ita khönia? (Faigi göi gambara.)

¹⁴ Na lö tebulö ahatö ita khö Yehowa, aoha khöda wangoromaʼö faʼalöfaröi. Daʼö zalua khö Yosefo. Lö omasi ia wamalua horö börö me ahatö ia khö Yehowa ba lö omasi ia iʼafökhöiʼö dödö Lowalanginia. (1 Mo. 39:9) Enaʼö tobali ita si fahuwu khö Yehowa ba itugu tedou wahuwusada khönia, moguna tabeʼe ginötöda ba wangandrö ba tafahaʼö ita ba Daromalinia. Simane Yosefo, na itugu fahuwu ita khö Yehowa, lö omasi ita tafalua zi fatuwu khönia.—Yak. 4:8.

15. Hadia wamahaʼö si tola tahalö ba zalua khö ndraono Gizaraʼeli me so ira ba danö si mate? (Heberaiʼo 3:12)

¹⁵ Niha sangolifugö wa Yehowa andrö Lowalangi sauri, alio sibai faröi ia. Nehegö hadia zalua ba ndraono Gizaraʼeli me so ira ba danö si mate. Aboto ba dödöra wa so Yehowa, hizaʼi ibörögö aombö dödöra khönia ba  wangaʼasogö soguna khöra. Manofu ira, ”Hadia sindruhu fao khöda Yehowa?” (2 Mo. 17:​2, 7) Lua-luania, lalawa Yehowa. Tatu manö, lö omasi ita taʼoʼö duma-dumara si lö sökhi andrö.—Baso Heberaiʼo 3:12.

16. Hadia zi tola manandraigö famatida?

¹⁶ Iforege ulidanö andre enaʼö fandröndröu ita khö Yehowa. Ato zi lö faduhu tödö wa so Lowalangi. Asese göi taʼila wa sökhi waʼauri niha sanimbagö goi-goi Lowalangi. Tola tetandraigö wamatida na taʼila daʼö. Hewaʼae faduhu dödöda wa so Lowalangi, hizaʼi tola manö ibörögö aombö dödöda wa tola itolo ita. Daʼö nirasoi zanura Sinunö 73. Iʼila wa niha si so ba zi fasuinia sanimbagö oroisa Lowalangi lö tebulö omuso-muso dödöra. Lua-luania, aombö dödönia hadia so mbuania na ifosumange Lowalangi.—Si. 73:​11-13.

17. Hadia zanolo yaʼita enaʼö lö tebulö ahatö ita khö Yehowa?

¹⁷ Hadia zanolo sanura sinunö ba wombulöʼö lala wangera-ngerania? Iʼangerönusi hadia zalua ba niha samöhöli wamaduhusi tödö Yehowa. (Si. 73:​18, 19, 27) Iʼangerönusi göi hadia mbuania nitema niha samosumange Lowalangi. (Si. 73:24) Moguna göi taʼangerönusi howu-howu si no ibeʼe khöda Yehowa. Khalaigö hewisa waʼaurida na lö tafosumange Yehowa. Na taʼangerönusi daʼö, tobali fanoloda enaʼö lö faröi ita khönia. Ba tola tahalö gangetula simane niwaʼö zanura sinunö, ”Na yaʼo, faʼohahau dödö khögu na ahatö ndraʼo khö Lowalangi.”—Si. 73:28.

18. Hadia mbörö wa lö ataʼu ita na so zalua ba zi so miföna?

¹⁸ Tola tataögö ngawalö gabula dödö ba ngaluo safuria andre börö me tobali ita ”sawuyu Lowalangi sauri ba satulö”. (1 Te. 1:9) Iʼameʼegö tödö ita Lowalangida ba lö tebulö itolo ita. No ilumöʼö nono mbanuania me götö föna, ba hasambalö ilumöʼö göi ita iadaʼa. Lö ara tö tataögö wamakao sabölö-bölö. Hizaʼi tenga ha yaʼita, so Yehowa zi fao khöda. (Yes. 41:10) Börö daʼö ”lö ataʼu ita wangumaʼö, ’Yehowa zanolo yaʼo; lö ataʼu ndraʼo.’”—Heb. 13:​5, 6.