1. Duzu a boa Gyihova menli ɔmaa bɛkɔ zo bɛsonle ye ɔnva nwo ngyegyelɛ mɔɔ bɛyia la ɛ?

 BAEBOLO ne se yɛde “mekɛ mɔɔ anu yɛ se la” anu. (2 Tim. 3:⁠1) Ɛye ngyegyelɛ mɔɔ awie biala yia wɔ ewiade ye anu la ɛsie ahane a, eza ɔwɔ kɛ Gyihova menli gyinla dwazotia nee kpɔdekpɔdeyɛlɛ nloa. Duzu a boa yɛ ɔmaa yɛkɔ zo yɛsonle Gyihova ɔnva nwo ngyegyelɛ ɛhye mɔ mɔɔ yɛyia la ɛ? Debie titili ko a le kɛ yɛranwu Gyihova kɛ ɔdaye a ɔle “tease Nyamenle ne” a.​—Gyɛ. 10:​10; 2 Tim. 1:⁠12.

2. Kɛzi Gyihova a le tease Nyamenle ne ɛ?

² Gyihova le Awie mɔɔ ɔwɔ ɛkɛ amgba mɔɔ ɔboa yɛ wɔ yɛ sɔnea ne mɔ anu na ɔkpondɛ ndenle ɔdua zo ɔsɔ yɛ nu a. (2 Ek. 16:⁠9; Edw. 23:⁠4) Saa yɛnwu kɛ ɔdaye a ɔle tease Nyamenle ne a, ɔbahola yeaboa yɛ yeamaa yɛagyinla ngyegyelɛ biala mɔɔ yɛbayia la anloa. Nea kɛzi Belemgbunli Devidi nwunle ɛhye na ɔboale ye la.

3. Mɔɔ Devidi hanle kɛ “Gyihova de aze” la, ɛnee duzu a ɔlɛkile a?

³ Ɛnee Devidi ze Gyihova na ɔvale ɔ nwo ɔdole Ɔ nwo zo. Mɔɔ Belemgbunli Sɔɔlo nee awie mɔ gyɛne bɔle mɔdenle kɛ bɛku Devidi la, ɔyɛle asɔne ɔzɛlɛle Gyihova kɛ ɔboa ye. (Edw. 18:⁠6) Mɔɔ Nyamenle buale Devidi asɔneyɛlɛ ne na ɔliele ye la, ɔhanle kɛ: “Gyihova de aze!” (Edw. 18:​46) Devidi edwɛkɛ ɛhye ɛngile kɛ ɛnee ɔdie ɔto nu ala kɛ Nyamenle wɔ ɛkɛ. Buluku bie hanle kɛ ɛnee Devidi ɛlɛkile kɛ ɔlɛ Gyihova anu anwodozo kɛ “ɔle tease Nyamenle ne mɔɔ dahuu ɔboa ye menli a.” Amgba, Devidi mumua ne nwunle kɛ ye Nyamenle ne de aze, na zɔhane anwodozo ne maanle ɔbɔle kpɔkɛ kyengye kɛ ɔbazonle Gyihova na yeaye ye ayɛlɛ.​—Edw. 18:​28, 29, 49.

4. Saa yɛnwu kɛ Gyihova a le tease Nyamenle ne a, kɛzi ɔboa yɛ ɛ?

 ⁴ Saa yɛdie yɛdi bɔkɔɔ kɛ Gyihova a le tease Nyamenle ne a, ɔbaboa yɛ yeamaa yɛava mɔdenlebɔlɛ yɛazonle ye. Yɛbanyia anwosesebɛ yɛagyinla sɔnea nloa na yɛanyia ɛhulolɛ kɛ yɛbahɔ zo yɛayɛ gyima ɛsesebɛ wɔ ye ɛzonlenlɛ nu. Eza yɛbabɔ kpɔkɛ kɛ yɛbabeta Gyihova.

TEASE NYAMENLE NE BAMAA WƆ ANWOSESEBƐ

5. Saa yɛyia sɔnea a, duzu a bahola amaa yɛanyia anwodozo a? (Felepaema 4:⁠13)

⁵ Saa yɛkakye kɛ Gyihova de aze na ɔbaboa yɛ a, yɛbahola yɛagyinla sɔnea biala, kɛ ɔle kpole anzɛɛ ekyi la anloa, ɔluakɛ ngyegyelɛ biala ɛmbo yɛ Nyamenle ne anwo zo. Ɔdaye a ɔle Tumivolɛ Bedevinli ne a na ɔbahola yeamaa yɛ tumi yeamaa yɛagyinla ɔ nloa. (Kenga Felepaema 4:​13.) Ɛhye ati yɛlɛ debie mɔɔ yɛbahola yɛagyinla zo yɛava anwodozo yɛagyinla yɛ sɔnea ne mɔ anloa a. Saa yɛnwu kɛ Gyihova boa yɛ wɔ yɛ sɔnea ngyikyi nu a, ɔmaa yɛnyia anwodozo kɛ eza ɔbaboa yɛ wɔ yɛ sɔnea mgbole nu.

6. Anwubielɛ boni mɔ a Devidi nyianle wɔ ye ngakula nu mɔɔ ɔmaanle ɔnyianle Gyihova anu anwodozo kpole a?

⁶ Nea anwubielɛ nwiɔ mɔɔ maanle Devidi nyianle Gyihova anu anwodozo kpole la. Mɔɔ ɔle kakula la, ezizile nee awenade hyele ye papa mboane ne mɔ bie. Wɔ tɛnlabelɛ nwiɔ ɛhye mɔ anu, Devidi vale akɛnrasesebɛ doale nane ne mɔ na ɔliele mboane ne. Noko yeanlie nwolɛ nganvolɛ ne yeammaa ɔ nwo. Ɛnee ɔze kɛ Gyihova a boale ye a. (1 Sa. 17:​34-37) Devidi arɛle anvi anwubielɛ ɛhye mɔ ɛlɛ. Mɔɔ ɔdwenledwenlenle nwolɛ la, ɔmaanle ɔnyianle anwodozo kɛ tease Nyamenle ne bamaa ye anwosesebɛ kenle bie.

7. Kɛzi debie mɔɔ Devidi vale ye adwenle ziele zo la boale ye maanle ɔ nee Golayate honle ɛ?

⁷ Nzinlii, mɔɔ ɔbayɛ kɛ ɛnee Devidi tɛde kakula la, ɔhɔle Yizilayɛ sogyama azokoɛleɛ. Ɔnwunle kɛ sogyama ne ahonle ɛdu kpalɛ ɔluakɛ ɛnee Filisitianli kakanyinli bie mɔɔ bɛfɛlɛ ye Golayate la ɛra kɛ ɔbagolo “Yizilayɛma mɔɔ ɛra baho la anwo.” (1 Sa. 17:​10, 11) Kɛmɔ sogyama ne vale bɛ adwenle ziele kakanyinli ne nee ye agolobɛnwo ne azo la ati a ɔmaanle ɛzulolɛ hanle bɛ a. (1 Sa. 17:​24, 25) Noko Devidi vale ye adwenle ziele debie gyɛne zo. Ɔnwunle kɛ tɛ Yizilayɛ sogyama ne angomekye a ɛnee Golayate ɛlɛgolo bɛ nwo a, emomu ɛnee ɔlɛgolo “tease Nyamenle ne ɛlɔne mɔɔ ɛra baho la anwo.” (1 Sa. 17:​26) Ɛnee Gyihova a Devidi ɛlɛdwenle ɔ nwo kpalɛ a. Devidi nyianle anwodozo kɛ Nyamenle ne mɔɔ boale ye wɔ mekɛ mɔɔ ɛnee ɔle mboaneneavolɛ la baboa ye bieko wɔ tɛnlabelɛ ɛhye anu. Kɛmɔ ɛnee ɔze ye wienyi kɛ Nyamenle boka ɔ nwo la ati, ɔ nee Golayate hɔhonle na ɔlile konim​—1 Sa. 17:​45-​51.

8. Saa yɛlɛyia sɔnea a, kɛ ɔkɛyɛ na yɛalie yɛali kɛ Gyihova baboa yɛ ɛ? (Eza nea nvoninli ne.)

⁸ Saa yɛdayɛ noko yɛkakye kɛ tease Nyamenle ne ɛziezie ɔ nwo kɛ ɔbaboa yɛ a, ɔbamaa yɛahola yɛagyinla sɔnea nloa bɔkɔɔ. (Edw. 118:⁠6) Saa yɛdwenledwenle mɔɔ Gyihova ɛyɛ ye dɛba la anwo a, ɔbamaa yɛanyia anwodozo kɛ ɔbaboa yɛ. Kenga Baebolo ne anu edwɛkɛ mɔɔ bamaa wɔahakye kɛzi Gyihova liele ye azonvolɛ la. (Aye. 37:​17, 33-37) Eza kenga anzɛɛ nea amaneɛbɔlɛ mɔɔ wɔ yɛ jw.org wɛbsaete ne azo mɔɔ maa yɛnwu kɛzi Gyihova ɛboa yɛ mediema bie mɔ wɔ yɛ mekɛ ye anu la. Eza kakye mekɛ bie mɔ mɔɔ  Gyihova boale ɛdawɔ mumua ne la. Saa ɛngakye anwubielɛ titili bie mɔɔ le kɛ asɛɛ Gyihova liele wɔ vile ezizile anzɛɛ awenade asa anu a, mmamaa ɔgyegye wɔ. Duzu ati ɔ? Nɔhalɛ ne a le kɛ Gyihova ɛyɛ ninyɛne dɔɔnwo ɛmaa wɔ wɔ wɔ ɛbɛlabɔlɛ nu! Yemaa wɔrayɛ ɔ gɔnwo. (Dwɔn 6:​44) Kɛkala bɔbɔ, ye moalɛ zo ti a ɛtɛbɔ nɔhalɛ ne anu a. Ɔti sɛlɛ Gyihova kɛ ɔboa wɔ ɔmaa ɛhakye mekɛ bie mɔ mɔɔ ɔbuale wɔ asɔneyɛlɛ, ɔboale wɔ wɔ mekɛ mɔɔ ɛnee ɛhyia moalɛ anzɛɛ ɛwɔ tɛnlabelɛ mɔɔ anu yɛ se la anu la. Saa ɛdwenledwenle ninyɛne ɛhye mɔ anwo a, ɔbamaa wɔanyia anwodozo kpole kɛ Gyihova bahɔ zo aboa wɔ.

9. Kɛzi yɛbahola yɛabu yɛ sɔnea ne mɔ ɛ? (Mrɛlɛbulɛ 27:⁠11)

⁹ Saa yɛnwu Gyihova kɛ ɔle Awie mɔɔ de aze a, ɔbaboa yɛ yeamaa yɛanyia yɛ sɔnea ne mɔ anwo adwenle kpalɛ. Adenle boni azo? Ɔmaa yɛnwu yɛ sɔnea ne mɔ kɛ ɔboka edwɛkɛ kpole mɔɔ la Gyihova nee Seetan avinli la anwo. Abɔnsam se saa yɛyia ngyegyelɛ a yɛbakpo Gyihova. (Dwobu 1:​10, 11; kenga Mrɛlɛbulɛ 27:​11.) Noko saa yɛdi nɔhalɛ yɛmaa Gyihova wɔ yɛ sɔnea ne mɔ anu a, ɔmaa yɛda ye ali kɛ yɛkulo ye na yɛmaa Seetan yɛ adalɛ. Arane ne ɛlɛdwazo atia wɔ, ɛlɛyia ezukoa nwo ngyegyelɛ, ɛkɔ daselɛlilɛ a bɛndie wɔ anzɛɛ ɛlɛyia sɔnea gyɛne ɔ? Saa ɔle zɔ a, kakye kɛ wɔ tɛnlabelɛ ne bamaa wɔanyia nwolɛ adenle wɔamaa Gyihova ahonle ali fɛlɛko. Eza kakye kɛ ɔnrɛmaa bɛnrɛzɔ wɔ bɛnrɛnlea mɔɔ ɛnrɛhola ɔ nloa gyinla a. (1 Kɔl. 10:​13) Ɔbamaa wɔ anwosesebɛ yeamaa wɔagyinla ɔ nloa.

TEASE NYAMENLE NE BAMAA WƆ AHATUALƐ

10. Duzu a tease Nyamenle ne bayɛ amaa menli mɔɔ sonle ye la ɛ?

¹⁰ Gyihova bamaa bɛdabɛ mɔɔ bɛsonle ye la ahatualɛ. (Hib. 11:⁠6) Ɔmaa yɛnyia anzodwolɛ nee ahunlundwolɛ kɛkala na ɔbamaa yɛanyia dahuu ngoane kenle bie. Yɛbahola yɛanyia anyelazo kɛ Gyihova bamaa yɛ ahatualɛ yɛɛ ɔlɛ tumi ne mɔɔ ɔbava yeayɛ zɔ la. Na ɔwɔ kɛ zɔhane anwodozo ne maa yɛyɛ dɔɔnwo wɔ ye ɛzonlenlɛ nu, kɛ mɔɔ  Nyamenle tete azonvolɛ nɔhavoma yɛle la. Ɛhye bie a Timote yɛle a.​—Hib. 6:​10-⁠12.

11. Duzu a maanle Timote yɛle dɔɔnwo wɔ asafo ne anu a? (1 Timote 4:⁠10)

¹¹ Kenga 1 Timote 4:​10. Timote vale ɔ nye dole tease Nyamenle ne anwo zo. Ɛhye ati a ɔyɛle dɔɔnwo ɔmaanle Gyihova nee awie mɔ la. Wɔ adenle boni azo? Ɛzoanvolɛ Pɔɔlo maanle ye anwosesebɛ kɛ ɔbɔ mɔdenle ɔnyia anyuhɔlɛ kɛ kilehilevolɛ wɔ edwɛkɛhanlɛ gyima ne nee asafo ne anu. Eza ɛnee ɔwɔ kɛ Timote yɛ neazo maa ɔ mediema diedima, mgbavolɛ nee mgbanyinli kɔsɔɔti. Bɛmaanle ye gyima ɛsesebɛ bie mɔ, bie a le kɛ ɔzi ɔ gyakɛ aze ɔdu menli mɔɔ ɔhyia kɛ ɔtu bɛ folɛ la folɛ noko ɔyɛ ye wɔ ɛlɔlɛ nu. (1 Tim. 4:​11-16; 2 Tim. 4:​1-⁠5) Ɔdwu mekɛ ne bie a, menli ɛnnwu gyima mɔɔ Timote ɛlɛyɛ la anzɛɛ bɛngile nwolɛ anyezɔlɛ noko ɛnee ɔze kɛ Gyihova nwu ye na ɔbamaa ye ahatualɛ.​—Wlo. 2:​6, 7.

12. Duzu a bamaa asafo nu mgbanyima ayɛ dɔɔnwo wɔ asafo ne anu a? (Eza nea nvoninli ne.)

¹² Ɛnɛ noko, asafo nu mgbanyima bahola anyia anwodozo kɛ Gyihova nwu gyima kpalɛ mɔɔ bɛyɛ la yɛɛ ɔ nye sɔ ye. Saa ɛye mboanekpɔlalɛ, ngilehilelɛ nee edwɛkɛhanlɛ gyima ne ɛsie ahane a, eza mgbanyima dɔɔnwo boa azua ɛsisilɛ nee esiane mekɛ nu moalɛ gyima ngakyile. Bie mɔ noko boka Wuliravolɛ Ɛkpɔlalɛ Eku anzɛɛ Asopiti Ngitanwolilɛ Kɔmatii ne anwo. Mgbanyima mɔɔ tu bɛ nwo maa boa gyima zɛhae mɔ la nwu asafo ne kɛ ɔle Gyihova ɛdeɛ na ɔnle dasanli biala ɛdeɛ. Ɛhye ati bɛfa bɛ ahonle muala a bɛyɛ bɛ gyima ne a, na bɛlɛ anwodozo kɛ Nyamenle bamaa bɛ nwolɛ ahatualɛ.​—Kɔl. 3:​23, 24.

13. Kɛzi Gyihova te nganeɛ wɔ mɔdenle mɔɔ yɛ nuhua biala bɔ wɔ ye ɛzonlenlɛ nu la anwo ɛ?

¹³ Yɛ muala yɛnrɛhola yɛnrɛyɛ asafo nu mgbanyima. Noko yɛ muala yɛbahola yɛava debie yɛamaa Gyihova. Saa yɛyɛ mɔɔ yɛbahola biala la yɛsonle yɛ Nyamenle ne a, ɔ  nye die nwo. Ɔnwu ndoboa mɔɔ yɛye yɛboa ewiade amuala gyima ne la ɔnva nwo kɛzi ye ekyi de la. Saa yɛbɔ mɔdenle yɛdi yɛ nyianezelɛ zo na yɛmaa yɛ sa zo yɛmaa mualɛ wɔ debiezukoalɛ bo a, ɔ nye die nwo, yɛɛ saa yɛbu yɛ nye yɛgua nvonleɛ zo na yɛfa ɛtane yɛkyɛ a, ɔ nye die. Saa ɛte nganeɛ kɛ ɛngola ɛnyɛ dɔɔnwo kɛ mɔɔ ɛkulo kɛ ɛyɛ bɔbɔ la a, nyia anwodozo kɛ Gyihova anye sɔ mɔɔ ɛkola ɛyɛ la. Mɔɔ ɛyɛ la ati, ɔkulo wɔ na ɔbamaa wɔ nwolɛ ahatualɛ.​—Luku 21:​1-⁠4.

KƆ ZO BETA TEASE NYAMENLE NE

14. Saa yɛkɔ zo yɛbeta Gyihova a, kɛzi ɔboa yɛ ɔmaa yɛdi nɔhalɛ dahuu ɛ? (Eza nea nvoninli ne.)

¹⁴ Saa yɛ nee Gyihova lɛ agɔnwolɛvalɛ kpalɛ a, ɔnrɛmaa ɔnrɛyɛ se kɛ yɛbahɔ zo yɛali nɔhalɛ yɛamaa ye. Zɔhane a Dwosefi yɛle a. Ɔkpole kɛ ɔbabɔ ɛbɛlatane. Ɛnee ɔze kɛ mɔɔ ɔyɛ la fale Nyamenle anwo yɛɛ ɛnee ɔngulo kɛ ɔyɛ debie mɔɔ Ɔ nye ɛnlie nwolɛ la. (Gyn. 39:⁠9) Amaa yɛalie yɛali bɔkɔɔ kɛ Gyihova wɔ ɛkɛ amgba la, ɔwɔ kɛ yɛnyia mekɛ yɛyɛ asɔne na yɛsukoa ye Edwɛkɛ ne. Ɛhye bamaa yɛ nee ye agɔnwolɛvalɛ ne anu amia kpalɛ. Saa yɛ nee Gyihova nyia agɔnwolɛvalɛ kpalɛ kɛ mɔɔ ɛnee Dwosefi nee ye lɛ la a, ɔnrɛra yɛ adwenle nu ɛlɛ kɛ yɛbayɛ debie mɔɔ Ɔ nye ɛnlie nwolɛ la.​—Gye. 4:⁠8.

15. Duzu a yɛbahola yɛazukoa yɛavi mɔɔ dole Yizilayɛma ne wɔ fienemgbole ne anu la anu a? (Hibuluma 3:⁠12)

¹⁵ Menli mɔɔ bɛmaa bɛ rɛle fi kɛ Gyihova a le tease Nyamenle ne la kola twe bɛ nwo fi ɔ nwo ndɛndɛ. Nea mɔɔ dole Yizilayɛma ne wɔ mekɛ mɔɔ ɛnee bɛwɔ fienemgbole ne anu la. Ɛnee bɛze kɛ Gyihova wɔ ɛkɛ, noko ɛnee bɛnlie bɛnli kpalɛ kɛ ɔbanlea bɛ. Bɛbizale bɔbɔ kɛ: “Asoo Gyihova wɔ yɛ avinli.” (Ɛzɛ. 17:​2, 7) Ɛhye ati, ɔmaanle bɛdele Nyamenle anwo atua. Ye biala anu, yɛngulo kɛ yɛsukoa bɛ neazo ɛtane ne mɔɔ le kɔkɔbɔlɛ maa yɛ la.​—Kenga Hibuluma 3:⁠12.

16. Duzu a bahola azɔ yɛ diedi ne anlea a?

¹⁶ Ewiade ne maa ɔyɛ se kɛ yɛbahɔ zo yɛabeta Gyihova. Menli dɔɔnwo ɛnlie ɛndo nu kɛ Nyamenle wɔ ɛkɛ. Yɛta yɛnwu ye kɛ ɔzɔho kɛ menli mɔɔ bɛnyɛ mɔɔ Gyihova kulo bɔbɔ la di boɛ. Saa yɛnwu ninyɛne zɛhae mɔ a, ɔbahola yeazɔ yɛ diedi yeanlea. Bie a yɛdie yɛto nu  kɛ Nyamenle wɔ ɛkɛ ɛdeɛ, noko yɛngola yɛnnwu ye saa ɔbaboa yɛ o. Edwɛne 73 kɛlɛvolɛ ne noko dele nganeɛ zɛhae bie wɔ mekɛ bie anu. Ɔnwunle kɛ menli mɔɔ ɛbɔ ye ɛyia la ɛnli Nyamenle mɛla ne mɔ azo noko ninyɛne kɔ boɛ maa bɛ. Ɛhye ati ɛnee ɔngola ɔnnwu ye kɛ saa ɔle kpalɛ kɛ ɔbazonle Nyamenle a.​—Edw. 73:​11-⁠13.

17. Duzu a baboa yɛ yeamaa yɛahɔ zo yɛabikye Gyihova a?

¹⁷ Duzu a akee boale edwɛndolɛnli ne ɔmaanle ɔhakyile ye adwenle a? Ɔdwenledwenlenle mɔɔ bado menli mɔɔ bɛmaa bɛ rɛle fi Gyihova la anwo. (Edw. 73:​18, 19, 27) Eza ɔzuzule nvasoɛ mɔɔ awie sonle Gyihova a ɔnyia la anwo. (Edw. 73:​24) Yɛdayɛ noko yɛbahola yɛadwenledwenle kɛzi Gyihova ɛyila yɛ la anwo. Fa toto kɛzi yɛnzonle Gyihova a anrɛɛ yɛ ɛbɛlabɔlɛ bayɛ la anwo. Saa yɛyɛ ye zɔ a, ɔbamaa yɛahɔ zo yɛali nɔhalɛ na yɛaha edwɛkɛ ɛhye mɔɔ edwɛndolɛnli ne hanle la bie: “Noko mame, Nyamenle mɔɔ mebikye ye la le kpalɛ maa me.”​—Edw. 73:⁠28.

18. Duzu ati a ɔnle kɛ yɛsulo mɔɔ bazi kenle bie la ɛ?

¹⁸ Kɛmɔ yɛrayɛ “tease nee nɔhalɛ Nyamenle ne ngɛkɛlɛ” la ati, yɛbahola yɛagyinla ngyegyelɛ biala mɔɔ yɛbayia ye wɔ awieleɛ mekɛ ɛhye anu la anloa. (1 Tɛs. 1:⁠9) Yɛ Nyamenle ne le Awie mɔɔ ɔwɔ ɛkɛ ne amgba mɔɔ ɔboa bɛdabɛ mɔɔ bɛsonle ye la a. Ɔ nee ye azonvolɛ luale wɔ tete ne yɛɛ ɛnɛ noko ɔ nee yɛ lua. Ɔnrɛhyɛ, anwongyelelɛ kpole mɔɔ tɛla biala la bara azɛlɛ ye azo. Noko Gyihova baboa yɛ. (Aye. 41:​10) Ɔrɛla ye kɛ yɛ muala yɛbanyia “akɛnrasesebɛ kpole na yɛaha kɛ: ‘Gyihova le me boavolɛ; menrɛzulo.’”​—Hib. 13:​5, 6.