1. Dahme kin sewese sapwellimen Siohwa aramas akan en pousehlahte kaudokiong ih mendahki arail kahpwal kan?

 PAIPEL mahsanih me kitail kin mi erein “ahnsou apwal oh keper.” (2 Tim. 3:1) Sapwellimen Siohwa aramas akan kin lelohng kahpwal kan me aramas koaros kin lelohng nan ahn Sehdan koasoandi suwed. Ahpw kitail pil kin lelohng kalokolok pwehki kitail kin papah Siohwa. Dahme kin sewese kitail en pousehlahte kaudokiong Siohwa mendahki kahpwal pwukat? Ehu kahrepe iei me kitail eseier duwen eh kin ketin sewese kitail oh Ih “me Koht ieias.”—Ser. 10:10; 2 Tim. 1:12.

2. Ni ahl dah me Siohwa iei Koht ieias?

² Siohwa ketin mwahngih duwen kahpwal koaros me kitail ahneki oh kin ahnsou koaros ketin kupwurki sewese kitail. (2 Kron. 16:9; Mel. 23:4) Atail kin wiahki Ih Koht ieias men kak sewese kitail en dadaur pahn kahpwal koaros oh pweida. Medewehla dahme wiawihong Nanmwarki Depit.

3. Ia wehwehn ahn Depit koasoio ni eh nda “KAUN-O ketin ieias”?

³ Depit ese Siohwa oh kin koapworopworki. Ni ahnsou me Nanmwarki Sohl oh imwintihti teikan kin songosong en kemehla Depit, e kapakap ong Siohwa oh peki sawas. (Mel. 18:6) Mwurin Koht eh ketin sapengala eh kapakapo oh kapitala ih, Depit koasoia: “KAUN-O ketin ieias!” (Mel. 18:46) Ia wehwehn ahn Depit koasoio? Ehu pwuhk koasoia me Depit kin kasalehda eh likih Siohwa “nin duwen koht ieias emen me kin ahnsou koaros ketin sewese sapwellime aramas akan.” Ei, Depit ese me eh Kohto kin ketin mwahngih dahme kin wiawihong oh kin kupwurki sewese ih. Met kangoange Depit en pousehlahte papah oh kapinga Siohwa.—Mel. 18:​28, 29, 49.

4. Ia duwen atail kin paiekihda ni atail kilangwohng Siohwa nin duwen Koht ieias?

 ⁴ Atail uhdahn kamehlele me Siohwa iei me Koht ieias kak sewese kitail en papah ih ni ngoang. Kitail pahn ahneki kehl pwehn dadaurete pahn kahpwal kan oh pil kahrepe mwahu en pousehlahte doadoahk laud nan sapwellime doadoahk. Kitail pil pahn koasoanehdi teng en karanihete Siohwa.

KOHT IEIASO PAHN KETIN KAKEHLAKAIUK

5. Dahme kak kihong kitail koapworopwor ni atail kin lelohng kahpwal kan? (Pilipai 4:13)

⁵ Kitail pahn kak dadaur pahn kahpwal kan, sohte lipilipil ma laud de tikitik, ma kitail taman me Siohwa kak ahnsou koaros ketin kupwurki sewese kitail. E kak ketin sewese kitail nan kahpwal sohte lipilipil pwehki sohte kahpwal ehu me nohn apwal ong atail Kohto. Ih me Keieu Manaman, oh e kak ketikihong kitail kehl pwe kitail en dadaur. (Wadek Pilipai 4:13.) Eri, mie kahrepe tohto me kitail en likih Ih ni atail kin lelohng kahpwal kan. Oh ni atail kin kilang Siohwa eh ketin sewese kitail nan kahpwal tikitik kan, met kin kamehlelehiong kitail me e pahn pil ketin sewese kitail erein kahpwal laud kan.

6. Dahme wiawihong Depit ni ahnsou me e pwulopwul me kalaudehla eh likih Siohwa?

⁶ Medewehla dahme wiawihong Depit pak riau me kalaudehla eh likih Siohwa. Ni ahnsou me Depit wia sounsilepen sihpw pwulopwul men, pehr men wahsang emen nein eh pahpao sihpw ko, oh ehu pak, laion men pil wahsang emen. Ni ahnsou ko, ni eimah Depit pwakih mahn ko oh doarehla sihpw ko. Ahpw Depit sohte medewe me pein ih me wia met. E ese me Siohwa me ketikihong ih kehl en wia met. (1 Sam. 17:​34-37) Depit sohte manokehla ahnsou ko. Eh doudouloale soahng pwukat kalaudehla eh likih me Koht ieiaso pahn ketin kakehlaka ih ni ahnsou kan mwuhr.

7. Dahme Depit kin medemedewehte, oh dahme kahrehda met sewese ih en peiong Kolaiad?

⁷ Mwuhr, ni eh pwulopwulte, Depit kohla wasa me sounpei en Israel ko mi ie. E diarada me sounpei ko uhdahn masakada kodon en Pilisdia me adaneki Kolaiad me kodohngehr “peiong karis en mehn Israel kan.” (1 Sam. 17:​10, 11) Sounpei ko uhdahn masepwehkada pwehki re kilikilangete uwen lapala en kodono oh pil dahme e ndindaiong irail. (1 Sam. 17:​24, 25) Ahpw en Depit eh kilangwohng irairo weksang irail. Ong ih, dahme wiewiawi wia mwekid en pelian ehu ong kaidehn karis en mehn Israel kohte ahpw pil ong “karis en Koht ieias.” (1 Sam. 17:26) Depit kin medemedewehte duwen Siohwa. Depit likih me Kohto me ketin sewese ni ahnsou me e wia sounsilepen sihpw men pahn pil pwurehng sewese ih nan irairo. Pwehki e kamehlele met, Depit peiong Kolaiad oh kana!—1 Sam. 17:​45-51.

8. Dahme kak sewese kitail en kakehlakahla atail likih me Siohwa pahn ketin sewese kitail ni atail lelohng kahpwal? (Pil kilang kilel.)

⁸ Kitail pil kak powehdi kahpwal kan ma kitail kin tamataman me Koht ieiaso kin ketin kupwurki sewese kitail. (Mel. 118:6) Kitail kak kakehlakahla atail likih met sang ni atail kin medemedewe dahme Siohwa ketin wiadahr mahso. Wadek koasoipen Paipel kan me kin katamankihong uhk ia duwen Siohwa eh ketin doarehla sapwellime tohnkaudok kan. (Ais. 37:​17, 33-37) Pil wadek oh kilang ripoht kan nan neitail website en jw.org me kin karasahda ia duwen Siohwa eh kin ketin sewese riatail Kristian kan nan atail ahnsou. Patehng met, tamanda ahnsou kan me Siohwa ketin seweseiuk. Ele ke medewe me Siohwa sohte ketin seweseiuk ni ahl kapwuriamwei ehu, duwehte doareiukasang  laion de pehr men. Ahpw ni mehlel, Siohwa ketin wiahionguhkehr soahng tohto nan omw mour! E ketin lukeiuk en wiahla kompoakepah. (Sohn 6:44) Pil ahnsou wet, kitail kin papahte ih pwehki sapwellime sawas. Eri, peki rehn Siohwa en ketin seweseiuk en tamanda ahnsou kan me e ketin sapengala omw kapakap kan, ketikihong uhk dahme ke keieu anahne ni ahnsou me konehng, de apwalihiuk nan kahpwal ehu. Atail kin medemedewe soahng pwukat pahn kakehlakahla atail kamehlele me Siohwa pahn ketin pousehlahte sewese kitail.

9. Dahme kitail en tamataman ni atail kin lelohng kahpwal kan? (Lepin Padahk 27:11)

⁹ Ni atail kin lelohng kahpwal kan, kitail anahne medemedewe dahme keieu kesempwal. Tepilo kose me dene ni atail kin lelohng kahpwal kan, kitail pahn kesehla Siohwa. Eri, mwomwen atail mwekidki atail kahpwal kan kin kak kaperenda de kansensuwedihala Siohwa. (Sohp 1:​10, 11; wadek Lepin Padahk 27:11.) Ni atail kin loalopwoatohngete Siohwa mendahki atail kahpwal kan, kitail kin kasalehda atail poakohng ih oh pil kadehdehda me Tepilo likamw. Ele koperment en omw wasao kin uhwong sapwellimen Siohwa aramas kan, mwein ke ahneki kahpwal en mwohni, de ele aramas akan me ke kin kalohk ong sohte men rong rongamwahwo, de mwein ke kin wie lokolok ni ahl teikan. Ma ei, tamataman me omw irairo kin kihong uhk ahnsou mwahu en kaperenda Siohwa. Pil tamataman me e sohte pahn ketin mweidohng uhk en ale songosong me ke sohte kakohng. (1 Kor. 10:13) E pahn ketikihong uhk kehl me ke anahne pwehn dadaur.

KOHT IEIASO PAHN KETIN KATINGIHIUK

10. Dahme Koht ieiaso pahn ketin wiahiong irail kan me kin kaudokiong ih?

¹⁰ Siohwa kin ahnsou koaros ketin katingih irail kan me kin kaudokiong ih. (Ipru 11:6) E kin ketikihong kitail popohl oh nsenamwahu ahnsou wet oh pahn ketikihong kitail mour soutuk ni ahnsou kohkohdo. Kitail uhdahn likih me Siohwa ketin kupwurki katingih kitail oh pil sapwellimanki manaman en wia met.  Pwehki kitail kamehlele met, kitail kin pousehlahte wia uwen atail kan en kaudokiong ih, duwehte me sapwellime ladu lelepek kan mahso kin wia. Timoty pil kin wia met ni mwehin tepin Kristian ko.—Ipru 6:​10-12.

11. Dahme kamwakid Timoty en doadoahk laud nan mwomwohdiso? (1 Timoty 4:10)

¹¹ Wadek 1 Timoty 4:10. Timoty kin koapworopworki Koht ieiaso. Ihme kahrehda e kin doadoahk laud ong Siohwa oh pil meteikan. Ia duwen? Wahnpoaron Pohl kangoange en wiahla sounpadahk mwahu men nan kalohk oh pil nan mwomwohdiso. Pohl pil padahkihong en kin wiahda mehn kahlemeng mwahu ong ienge me pwoson kan, me pwulopwul oh me mah. Oh e pil alehdi pwukoa apwal kei, me iangahki en panawih irail kan me anahne ahpw ni elen limpoak. (1 Tim. 4:​11-16; 2 Tim. 4:​1-5) Ekei pak, meteikan sohte kin tehk de kalahnganki eh doadoahk laud, ahpw e uhdahn kamehlele me Siohwa pahn ketin katingih ih.—Rom 2:​6, 7.

12. Dahme kak kamwakid elder kan en doadoahk laud nan mwomwohdiso? (Pil kilang kilel.)

¹² Rahnwet, elder kan pil kak kamehlele me Siohwa kin ketin mwahngih oh kesempwalki arail doadoahk mwahu kan. Patehng arail kin mwemweitla oh kangoange riarail Kristian kan, wia padahk, oh kalohk, elder tohto kin iang sewese kauwada wasahn kaudok kan de wasa kan me lelohng kahpwal laud duwehte rerrer en sahpw de melimel ape. Ekei kin iang Pwihn kan me Kin Mwamwaitih me Soumwahu oh Pwihn me Kin Ehuiong Imwen Wini kan. Elder kan ese me Siohwa iei me sapwellimanki mwomwohdiso, a kaidehn aramas. Pwehki met, irail kin doadoahk laud nan mwomwohdiso oh uhdahn kamehlele me Koht pahn ketin katingihkin irail dahme re kin wia.—Kol. 3:​23, 24.

13. Ia sapwellimen Siohwa pepehm ong soahng kan me kitail kin wiahiong ih?

¹³ Kaidehn koaros kak wia elder. Ahpw mie soahng kei me kitail kak wiahiong Siohwa.  Atail Koht kin ketin kupwurperenki ni atail wia uwen atail kak koaros en papah ih. E ketin mwahngih ni atail kihda sawas en mwohni ong doadoahk en kalohk sampah pwon, sohte lipilipil ma tikitik de laud. E ketin kupwurperenki ni atail kin doadoahk laud en powehdi atail namenek oh kauwada pehtail pwehn iang pasapeng ni mihting kan, oh e kin kupwurperenkihda atail kin pohnsehsehla sapwung en meteikan oh mahkohng irail. Mehnda ma ke pehm me ke sohte kak wia uwen me ke men wia ong Siohwa, likih me E kin ketin kesempwalki dahme ke kak wia. E kin ketin poakohng uhk pwehki omw wia met, oh pahn ketin katingihiuk.—Luk 21:​1-4.

KARANIHTE KOHT IEIASO

14. Ia duwen atail karanihete Siohwa eh sewese kitail en kin lelepekiongete? (Pil kilang kilel.)

¹⁴ Ma kitail kin ahneki nanpwungmwahu keren rehn Siohwa, e pahn mengei ong kitail en kin lelepekiongete. Ih met me wiawihong Sosep. E koasoanehdi teng en dehr wia tiahk samin. Ong ih, Koht uhdahn ieias oh e sohte men kansensuwedihala. (Sen. 39:9) Pwehn ahneki nanpwungmwahu keren rehn Siohwa, kitail anahne wiahda ahnsou pwehn kapakapohng oh onopki sapwellime Mahsen. Eri atail nanpwungmwahu reh pahn kekeirda. Duwehte Sosep, ni atail kin ahneki nanpwungmwahu keren rehn Siohwa, kitail sohte pahn men wia mehkot me pahn kansensuwedihada.—Seims 4:8.

15. Dahme kitail kak sukuhlkihsang dahme wiawihong mehn Israel ko nan sapwtehno? (Ipru 3:12)

¹⁵ Irail kan me sohla kin likih Siohwa kak mwadang en sohla loalopwoat. Tehk dahme wiawihong mehn Israel ko ni ahnsou me re mi nan sapwtehn. Irail ese me Siohwa ketin ieias, ahpw re tepida peikasalki ma e uhdahn pahn ketin apwalih irail. Irail pil kin idek: “KAUN-O ketin ieiang kitail, de soh?” (Eks. 17:​2, 7) Pwehki met, irail uhwongada Koht. Uhdahn kitail sohte men alasang arail mehn kahlemeng suwed.—Wadek Ipru 3:12.

16. Dahme kakete kasonge atail pwoson?

 ¹⁶ Sampah wet kin kahpwalihala atail kin karanihete Siohwa. Me tohto sohte men kamehlele me Koht ketin ieias. E mwomwen me irail kan me kin pohnsehsehla kupwuren Koht kin kalapw ahneki mour nsenamwahu. Ni atail kin kilang met, e kakete kasonge atail pwoson. Mendahte kitail kin kamehlele me Koht ketin ieias, kitail kak tepida peikasalki me e pahn ketin sewese kitail. Sounnting en Melkahka 73 pil ahneki soangen pepehm wet erein ahnsou kis. E kilang irail me kin pohnsehsehla sapwellimen Koht kosonned oh pereperenkihte arail mour. Pwehki met, e tepida peikasalki ma mie katepen eh kin papah Koht.—Mel. 73:​11-13.

17. Dahme pahn sewese kitail en kin karanihete Siohwa?

¹⁷ Dahme sewese sounmelkahkao en wekidala eh madamadau? E kin doudouloale dahme pahn wiawihong irail kan me sohla kin likih Siohwa. (Mel. 73:​18, 19, 27) E pil kin medemedewe kamwahupen papah Koht. (Mel. 73:24) Kitail pil kak medewehla kapai kan me Siohwa ketikihongkitailehr. Medewehla ia pahn mwomwen atail mour ma kitail sohte kin papah Siohwa. Ma kitail tamataman dahme kahrehda e mwahu ong kitail en papah Siohwa, e pahn sewese kitail en kin lelepekiongete. Oh duwehte sounmelkahkao, kitail pahn nda: “A duwen ngehi, ia uwen kesempwal en ei karanih Koht.”—Mel. 73:28.

18. Dahme kahrehda kitail en dehr masak dahme pahn wiawi ni ahnsou kohkohdo?

¹⁸ Kitail kak dadaur pahn kahpwal sohte lipilipil erein imwin rahn pwukat pwehki kitail wia “ladu en Koht ieias oh mehlel.” (1 Des. 1:9) Atail Koht iei Koht ieias men me kin ketin sewese irail kan me kin kaudokiong ih. E ketin kadehdedahr me e kin ketin ieiang sapwellime ladu kan mahso, oh e kin ketin ieiang kitail rahnwet. Ahnsou keren, kitail pahn lelohng kahpwal me keieu laud me pahn wiawi nin sampah. Ahpw kitail sohte pahn kelehpw. Siohwa pahn ketin ieiang kitail. (Ais. 41:10) Kitail koaros en kin “diren eimah oh nda: ‘Siohwa iei sawasepei; I sohte pahn masak.’”—Ipru 13:​5, 6.