1. ¿Imataj yanapawanchej problemaspi rikukojtinchejpis Diosta yupaychanallapajpuni?

 BIBLIAQA nin kay tiempopi “kausay may llakiy” kasqanta, ‘maytataj sajrayasqanta’ (2 Tim. 3:1). Diospa kamachisnenqa tukuy runas jinallataj Satanaspa mundonpi llakiykunasniyoj kanchej. Chaywanpis Jehovata sirvisqanchejrayku qhatiykachasqas ima kanchej. Ajinapi rikukojtinchejpis, ¿imataj yanapawasunman Jehovata yupaychanallapajpuni? Amapuni qonqanachu Jehovaqa ‘kausaj Dios’ kasqanta (Jer. 10:10; 2 Tim. 1:12).

2. ¿Imaynapí yachanchej Jehová kallpachayta atiwasqanchejta?

² Jehová Diosninchejqa imaspichus rikukushasqanchejta qhawamushan, yanapaytataj munawanchej (2 Cró. 16:9; Sal. 23:4). Diosninchej kausaj Dios kasqanta mana qonqapusunchu chayqa, ima pruebata atipananchejpajpis kallpanchej kanqapuni. Ajina karqa rey Davidwan, chayta qhawarina.

3. ¿Imatá David niyta munarqa “Jehová Diosmin kausaj Diosqa” nispa?

³ Davidqa Jehovata rejserqa, paypitaj atienekorqa. Rey Saúl, waj enemigosninpis payta wañuchiyta munajtinku, Davidqa Jehovamantapuni yanapata mañakoj (Sal. 18:6). Dios chay mañakuykunasninman kutichejtin, yanapajtin ima Davidqa nerqa: “Jehová Diosmin kausaj Diosqa”, nispa (Sal. 18:46). Chayta nispaqa mana Dios kasqallantachu nisharqa. Uj libro sutʼinchasqanman jina, Davidqa nisharqa Jehovaqa cheqa Dios kasqanta, llajtantataj yanapasqantapuni. Payqa kausayninpi sutʼita repararqa Diosqa imachus payta pasasqanta qhawamushasqanta, yanapananpajtaj wakichisqa kashasqanta.  Chayta yachasqanrayku Davidqa kallpata japʼerqa Jehovata sirvinallanpajpuni, jatunchanallanpajpunitaj (Sal. 18:28, 29, 49).

4. ¿Imaynatá yanapawanchej Jehovata kausaj Diosta jina qhawasqanchej?

⁴ Noqanchejpis Jehová kausaj Dios kasqanmanta mana iskayrayasunchu chayqa, payta sonqo kʼajaywan sirvillasunpuni. Ajinamanta kallpanchej kanqapuni ima pruebatapis aguantanapaj, Diospaj tukuy atisqanchejta llankʼanapaj ima. Chantapis ni imarayku Jehovamanta karunchakuyta munasunchu.

KAUSAJ DIOS KALLPACHAWASUN

5. Pruebaspi rikukuspa, ¿imatataj Diosmanta yuyarikunanchej tiyan? (Filipenses 4:13).

⁵ Amapuni qonqakunachu Jehová kausaj Dios kasqanta, yanapanawanchejpajtaj chaypipuni kashasqanta. Ajinamanta ima pruebatapis, jatunpis juchʼuypis kachun, aguantayta atillasun. Diosninchejpajqa mana ima problemapis may jatunchu. Payqa Tukuy Atiyniyoj kasqanrayku, imata aguantanapajpis kallpata qoyta atiwanchej (Filipenses 4:13 leey). Chayrayku sutʼita yachanchej ima pruebatapis aguantayta atisqanchejtapuni. Juchʼuy pruebaspi rikukojtinchej imaynatachus Jehová yanapawasqanchejta rikuspaqa, sutʼita yachanchej jatun pruebaspi rikukojtinchejpis yanapanallawanchejtataj.

6. Joven kashajtin, ¿imaspi rikukusqantaj Davidta yanaparqa Jehovapi astawan atienekunanpaj?

⁶ Davidtaqa kausayninpi iskay imaspi rikukusqan yanaparqa Jehovapi astawan atienekunanpaj. David jovenllaraj kashajtin, tatanpa ovejasnintataj michishajtin, uj león, uj ovejata apakaporqa, waj kutipitaj uj jukumariñataj uj ovejata apakaporqa. Chay iskaynin kutispi Davidqa mana manchachikuspa, leontapis jukumaritapis qhatiykuspa japʼimorqa, ovejasnintataj siminkumanta qhechukanporqa. Chaywanpis Davidqa mana yuyarqachu kallpallanwan chayta ruwasqanta, manachayqa yacharqa Jehovaj yanapaynillanwan chayta ruwasqanta (1 Sam. 17:34-37). Chaytataj Davidqa manapuni qonqakorqachu. Chay kutispi imaynatachus Dios yanapasqanpi tʼukurisqanrayku, mana iskayrayarqachu aswan qhepamanpis kausaj Dios yanapananmanta.

7. ¿Imataj Davidta yanaparqa Goliatwan mana manchachikuspa maqanakunanpaj?

⁷ Aswan qhepamantaj, Davidqa ichapis niraj 20 watasniyoj kashaspa israelita soldados kasharqanku chayman rerqa. Chaypitaj rikorqa israelita soldados manchariymanta wañushasqankuta, Goliat sutiyoj jatun filisteo contrankupi sayaykusqanrayku (1 Sam. 17:10, 11). Israelita soldadosqa may mancharisqa kasharqanku Goliat may jatun kasqallanpi yuyasqankurayku, paykunamantataj burlakusqanrayku (1 Sam. 17:24, 25). Davidtajrí mana ajinatachu yuyarqa. Payqa repararqa Goliatqa mana israelitaspa contrallantachu sayaykushasqanta, manachayqa “kausaj Diospa soldadosninpa contranpi” sayaykusqanta (1 Sam. 17:26). Davidqa Jehovapi ñaupajta yuyasharqa. Payqa sutʼita yacharqa imaynatachus ovejasta michishajtin Dios yanaparqa, ajinallatataj chay kutipipis yanapananta. Jehová paywan kashasqanmanta mana iskayrayasqanrayku Goliatwan maqanakorqa, atiparqataj (1 Sam. 17:45-51).

8. ¿Imatá ruwasunman Jehovapi astawan atienekunapaj? (Fototawan qhawariy).

⁸ Noqanchejpis David jina yuyarikunapuni kausaj Diosninchejqa yanapanawanchejpaj wakichisqa kashasqanta, ajinamanta ima pruebatapis aguantayta atillasun (Sal. 118:6). ¿Imaynamantá Jehová yanapanawanchejpi astawan atienekusunman? Imatachus ñaupa tiempopi ruwasqanpi tʼukurispa. Chaypajqa  ñaupa tiempopi imaynatachus Jehová kamachisninta yanapasqanta Bibliapi leerina (Isa. 37:17, 33-37). Chantapis jw.org paginanchejpi imaynatachus Jehová kay tiempomanta hermanosninchejta yanapasqanmanta yachaqanasta leerisunman chayri videosta qhawarisunman. Chantapis yuyarikunapuni ima kutispichus Jehová noqanchejtapis yanapawasqanchejta. Ichapis Jehovaqa mana uj leonmantachu, nitaj uj jukumarimantachu librawarqanchej. Chaywanpis kausayninchejpi ashkha imaynasmanta yanapawarqanchej. Pay wajyarikuwarqanchej amigosnin kananchejpaj (Juan 6:44). Kunanpis pay yanapawasqanchejraykulla siga llajtanpi kashanchej. Jehovamanta mañakusunman yuyarichinawanchejpaj ima kutispichus pay mañakuykunasninchejman kutichiwasqanchejta, ima kutispichus necesitashajtinchejpuni yanapariwasqanchejta chayri llakiypi kashajtinchej mayta cuidawasqanchejta. Chaykunapi tʼukurisun chayqa, nipuni iskayrayasunchu Jehová siga yanapanawanchejmanta.

9. ¿Imatá yuyarikunanchej tiyan pruebaspi rikukuspa? (Proverbios 27:11).

⁹ Jehovata kausaj Diosta jina qhawasun chayqa, ima pruebapi rikukuspapis mana llakiywan atipachikusunchu. Uj pruebapi rikukuspaqa yuyarikunanchej tiyan imachus aswan importante kasqanta. Diabloqa nin llakiykunapi rikukojtinchej Jehovamanta karunchakunanchejta. Chayrayku chay pruebata aguantasun chayqa, Jehovata kusichisun (Job 1:10, 11; Proverbios 27:11 leey). Pruebapi kaspa Jehovamanta mana karunchakuspaqa, payta munakusqanchejta, Diablotaj llulla kasqanta rikuchinchej. Ichapis tiyakunchej chaypi gobierno noqanchejman churanakuwanchej, chayri ichapis qolqemanta pisichikushanchej, chayri ichá predicajtinchej runas mana uyarillawanchejchu, chayri ichapis waj problemaspi rikukushanchej. Jina kajtenqa yuyarikunapuni chay kutispi Jehovata kusichiyta atisqanchejta. Chantapis kayta yuyarikuna: Jehovaqa mana saqenqachu mana aguantay atinata pruebaman churasqa kananchejta  (1 Cor. 10:13). Pay kallpata qowasun aguantanapaj.

KAUSAJ DIOS BENDECIWASUN

10. ¿Imatataj kausaj Dios ruwanqa payta yupaychajtinchej?

¹⁰ Jehovaqa payta yupaychajkunaman tʼinkata qonpuni (Heb. 11:6). Payqa kunanña yanapawanchej sonqo tiyasqas, kusisqas kausakunanchejpaj. Aswan qhepamantaj wiñay kausayta qowasun. Sutʼita yachanchej Jehovaqa bendeciyta munawasqanchejta, chayta ruwananpajtaj atiyniyoj kasqanta. Chayta yachasqanchejraykutaj Jehovapaj tukuy atisqanchejta llankʼallanchejpuni, ñaupa tiempomanta kamachisnin jina. Timoteomanta parlarina (Heb. 6:10-12).

11. ¿Imaraykutaj Timoteo congregacionpi tukuy atisqanta llankʼarqa? (1 Timoteo 4:10).

¹¹ (1 Timoteo 4:10 leey). Timoteoqa kausaj Diospi suyakorqa, yacharqataj bendecinantapuni. Chayrayku tukuy atisqanta Jehovapaj llankʼarqa, wajkunata yanapananpajpis. ¿Imatataj pay ruwarqa? Apóstol Pabloqa Timoteota nerqa predicacionpi, congregacionpipis sumaj yachachej kananpaj astawan kallpachakunanta. Chantapis kallpachakunan karqa jóvenes, kurajkunapis paymanta yachakunankupaj jina kausakunanpaj. Chantapis Timoteoj wakin ruwaykunasnenqa mana juntʼayta atinanpaj jinallachu karqa. Payqa hermanosta munakuywan, sutʼitataj yuyaychanan karqa necesitasqankuman jina (1 Tim. 4:11-16; 2 Tim. 4:1-5). Wakin kuti Timoteoj ruwasqantaqa mana tukuychu rikorqanku, nitaj tukuychu chaymanta agradecekorqanku. Chaywanpis Timoteoqa yacharqa Jehová chay ruwasqanmanta bendecinanta (Rom. 2:6, 7).

12. ¿Imaraykutaj ancianos congregacionpi tukuy atisqankuta yanapakunku? (Fototawan qhawariy).

¹² Kay tiempomanta ancianospis Timoteo jinallataj yachanku, Jehovaqa tukuy ruwasqankuta qhawamushasqanta, jatunpajtaj qhawasqanta. Ancianosqa hermanosta cuidanku, yachachinku, predicanku ima. Ashkha ancianostaj mana chaykunallatachu ruwanku. Yanapakullankutaj construccionpi, maykunapichus desastres naturales tiyan chaykunapi ima. Wakin ancianostaj yanapakunku Grupos de Visita a Pacientes nisqapi, chayri Comités de Enlace con los Hospitales nisqapi. Tukuy chayta ruwanku congregacionmanta  hermanos Jehovajta kasqankuta yachasqankurayku, manataj runaspatachu. Chayrayku tukuy sonqo congregacionpi llankʼanku, manataj iskayrayankuchu chay ruwasqankumanta Jehová bendecinanmanta (Col. 3:23, 24).

13. ¿Imaynatá Jehová qhawan paypaj ruwasqanchejta?

¹³ Mana tukuychu ancianos kayta atinchej, jinapis tukuyninchej Jehovapaj llankʼayta atinchej. Diosninchejtaj payta sirvinapaj tukuy ima ruwasqanchejta jatunpaj qhawan. Payqa llajtanta yanapakunanchejpaj qolqesitunchejta churasqanchejta qhawamushan, may pisisitullata churajtinchejpis. Payqa maytapuni kusikun tantakuypi comentayta manchachikuspapis makinchejta oqharejtinchej. Mayta kusikullantaj pikunachus sonqonchejta nanachiwanchej chaykunata perdonajtinchej. Ichapis yuyasunman Jehovapaj may pisisitullata ruwasqanchejta. Chaywanpis yuyarikuna Jehovaqa chay ruwasqanchejta may jatunpaj qhawasqanta. Payqa chayta ruwasqanchejrayku munakuwanchej, bendeciwasuntaj (Luc. 21:1-4).

KAUSAJ DIOSPA QAYLLALLANPIPUNI KANA

14. ¿Imaynatataj Jehovaj amigon kasqanchej yanapawanchej payta tukuy sonqo kasukunapaj? (Fototawan qhawariy).

¹⁴ Jehovawan sumaj amigos kasun chayqa, payta tukuy sonqo kasukuyta atillasun. Ajina karqa Josewan, payqa mana khuchichakuy juchapi urmarqachu. Joseqa yacharqa Dios payta qhawamushasqanta, nitaj sonqonta nanachiyta munarqachu (Gén. 39:9). Jehovawan sumaj amigos kanapajqa tiempota orqhokunanchej tiyan paymanta mañakunapaj, Palabranta estudianapajpis. Ajinamanta payman astawan qayllaykusun. José jina Jehovaj sumaj amigon kasun chayqa, manapuni imatapis ruwasunchu sonqonta nanachinapaj jina (Sant. 4:8).

15. ¿Imatá israelitasmanta yachakunchej? (Hebreos 3:12).

¹⁵ Pikunachus manaña Jehovapi atienekunkuchu chaykunaqa, facilta paymanta karunchakunkuman. Ajina karqa israelitaswan chʼin jallpʼapi kashajtinku. Paykunaqa yacharqanku Jehová kasqantapuni. Chaywanpis iskayrayarqanku  tukuy ima necesitasqankuta pay qonanmanta. “¿Noqanchejwanchu Jehová Diosqa kashan, manachu?” nisparajtaj taporqankupis (Éxo. 17:2, 7). Chayrayku Diospa contranta oqharikorqanku. Noqanchejtaj nichá munasunmanchu paykuna jina mana kasukojkuna kaytaqa (Hebreos 3:12 leey).

16. ¿Imataj creeyninchejta pruebaman churanman?

¹⁶ Kay sajra mundopeqa mana atillanchejchu Jehovaj qayllallanpipuni kayta. Ashkhasqa yuyanku Dios mana kasqanta. Diosta mana kasukojkunataqa ashkha kutispi allillan rispa jinan. Chayta rikuytaj creeyninchejpaj uj prueba jina kanman. Ichapis mana nisunmanchu Dios mana kasqanta, chaywanpis yanapanawanchejmanta iskayrayayta qallarisunman. 73 Salmota qhelqajpis ajinallapitaj rikukorqa. Payqa Diosta mana kasukojkunata allin risqanta rikorqa. Chayraykutaj yuyayta qallarerqa Diosta sirveyqa qhasilla kasqanta (Sal. 73:11-13).

17. ¿Imata ruwaytaj yanapawasun Jehovaj qayllallanpipuni kanapaj?

¹⁷ ¿Imataj salmistata yanaparqa amaña ajinata yuyananpaj? Payqa piensarerqa Jehovamanta qonqapojkunawan imachus kananpi (Sal. 73:18, 19, 27). Tʼukurillarqataj ima bendicioneschus Diosta sirvejkunapaj kasqanpi (Sal. 73:24). Noqanchejpis Jehová may chhika bendicionestaña qowasqanchejpi tʼukurillasunmantaj. Chantá tʼukurisunman Jehovata mana sirvejtinchej imaynachus kausayninchej kananpi. Chayta ruwasun chayqa, Jehovata tukuy sonqo kasukullasunpuni, salmista jinataj nisun: “Noqapajrí allinpuni Diosman qayllaykusqayqa”, nispa (Sal. 73:28).

18. ¿Imaraykutaj mana manchachikunchejchu imachus qhepaman kananmanta?

¹⁸ Noqanchejqa “kausaj cheqa Diosta esclavos jina” sirvishanchej (1 Tes. 1:9). Chayrayku kay qhepa pʼunchaykunapi ima prueba kajtinpis, aguantayta atisunpuni. Diosninchejqa noqanchejmanta llakikun, chaypipunitaj kanqa yanapanawanchejpaj. Payqa ñaupa tiempopi kamachisninta yanaparqapuni, kunanpis yanapashallawanchejtaj. Tumpamantawanqa manchay ñakʼariy tiempo qallarenqa. Chaypitaj mana sapallanchejchu kasunchej, Jehová noqanchejwan kanqa (Isa. 41:10). “Chayrayku mana manchachikuspa niyta atinchej: ‘Jehová Diosmin yanapawajneyqa, mana manchachikusajchu’”, nispa (Heb. 13:5, 6).