1. ¿Imaraq yanapamäshun problëmakunapa pasarpis Jehovä Diosnintsikta sirwita mana dejanapaq?

 BIBLIACHÖQA nimantsik “alläpa mana alli y mana aguantëpaqnö” tiempukunachö kawëkanqantsiktam (2 Tim. 3:1). Kë tiempuchöqa llapan nunakunam problëmakunapa pasayan, peru noqantsikmi mas problëmakunapaqa pasantsik nunakuna chikimashqa y qatikachämashqa. ¿Imaraq yanapamäshun Jehovä Diosnintsikta sirwirnin sïguinapaq? Tsëpaqqa yanapamäshun sirwinqantsik Diosqa “kawëkaq” kanqanta yarpanqantsikmi (Jer. 10:10; 2 Tim. 1:12).

2. ¿Imanötan musyantsik Jehovä kawëkaq Dios kanqanta?

² Jehoväqa kawëkaq Dios karmi, alkäbu këkan imakunapa pasanqantsikta y mana allikunapa pasashqaqa yanapamantsikmi (2 Crön. 16:9; Sal. 23:4). Kawëkaq Dios kanqanta musyanqantsikmi yanapamantsik problëmakunapa pasarnin aguantanapaq. Rikärishun Davidta imanö yanapanqanta.

3. ¿Imanirtan Davidqa, “¡Teyta Jehovällam kawaq Diosqa!” nirqan?

³ Davidqa Jehoväta allim reqeq y pëmanmi confiakoq. Gobernanti Saul y wakin nunakunapis wanutsiyänampaq qatikachäyaptinmi, Davidqa yanapanampaq Teyta Diosman mañakurqan (Sal. 18:6). Y mañakunqanta Jehovä contestaptinmi y yanapaptinmi kënö nirqan: “¡Teyta Jehovällam kawaq Diosqa!” (Sal. 18:46). Tsënö nirqa, manam kawaq  Dios kanqanllapaqtsu David parlëkarqan. Juk librum nin, sirweqninkunata Dios imëpis yanapanqanman confiakurnin David tsënö ninqanta. Davidqa kutin kutinmi rikarqan Jehovä yanapanqanta y tsëmi Jehoväman mas confiakurqan y imëpis alabarqan (Sal. 18:28, 29, 49).

4. ¿Imanötan yanapamantsik Jehovä kawëkaq Dios kanqanta següru kanqantsik?

⁴ Jehovä kawëkaq Dios kanqanta següru kanqantsikqa, ¿imanötan yanapamantsik? Diosnintsikta kushishqa sirwinapaq, sirwirnin alli trabajanapaq, sirwita mana dejarinapaq y problëmakunapa pasarnin alli aguantanapaq.

KAWËKAQ DIOSMI KALLPAYOQTA TIKRATSIMANTSIK

5. ¿Imatan yanapamantsik alläpa problëmakunapa pasarpis alli tsarakunapaq? (Filipensis 4:13).

⁵ Jehovä rasumpa kawanqanta y yanapamänapaq kaqta següru karqa, alläpa problëmakunapa pasarpis allim tsarakushun. Jehovä Diosnintsikqa Llapanta Puëdeq Diosmi, imëka problëmatapis ushakätsitam puëdin (leyi Filipensis 4:13). Tsëmi pëmanqa confiakunantsik. Ichiklla problëmakunapa pasanqantsik hörakuna imanö yanapamanqantsikta rikarmi, alläpa problëmakunapa pasanqantsik hörakunapis yanapamänapaq kaqman mas confiakuntsik.

6. ¿Imakunata yarpanqantan Davidta yanaparqan Jehoväman confiakunampaq?

⁶ ¿Imatan Davidta yanaparqan Jehoväman confiakunampaq? Pasanqankunata yarpanqanmi. Juk kutim papänimpa üshanta mitsikuykaptin juk leon üshanta apakurqan, y juk kutichönam juk ösu üshanta apakurqan. Ishkan kutichöpis Davidqa üshankunata salvarqanmi. Peru musyarqanmi valienti kanampaq Jehovä yanapashqa kanqanta, tsëmi alabakurqantsu (1 Sam. 17:34-37). Davidqa Jehovä tsënö yanapanqanmanmi alli pensarqan. Tsëmi yanaparqan shamoq tiempuchö mana allikunapa pasaptimpis, Jehovä yanapanampaq kaqman confiakunampaq.

7. ¿Pimantan Davidqa pensarqan, y imanötan tsëqa yanaparqan Goliatwan pelyanampaq?

⁷ Tsëpita tiempuwannam, capaz jövinllaraq këkar Davidqa israelïta soldädukunapa campamentunkunaman ëwarqan. Tsëchömi rikarqan, Goliat jutiyoq mantsëpaq soldädu burlakuptin, israelïtakuna mantsakashqa këkäyanqanta (1 Sam. 17:10, 11). Israelïta soldädukunaqa, Goliat-ta jatunta rikëkur y parlanqankunata wiyarmi mantsayarqan (1 Sam. 17:24, 25). Peru Davidpaqqa, Goliatqa manam israelïtakunallapitatsu burlakuykarqan, sinöqa kawëkaq Diospitam (1 Sam. 17:26). Davidqa Jehovämanmi pensarqan. Y üshankunata salvanampaq yanapanqannölla, tsë soldädupitapis salvanampaq kaqmanmi confiakurqan. Tsëmi Jehovä yanapaptin tsë soldäduwan pelyanampaq ëwarqan y ¡wanuratsirqanmi! (1 Sam. 17:45-51).

8. ¿Imaraq yanapamäshun mana allikunapa pasanqantsik hörakuna Jehovä yanapamänapaq kaqman maslla confiakunapaq? (Rikäri fötuta).

⁸ Kawëkaq Diosnintsik, mana allikunapa pasanqantsik hörakuna yanapamänapaq kaqta següru karninqa, imëka problëmakunapa pasarpis Davidnömi alli tsarakushun (Sal. 118:6). Y tsëpaqqa yanapamäshun unë witsanchö sirweqninkunata imanö yanapanqanta Bibliachö leyinqantsikmi (Is. 37:17, 33-37). Tsënöllam yanapamäshun kanan witsan sirweqninkunata imanö yanapanqampita jw.org päginachö leyinqantsikpis.  Rasumpa kaqchöqa qampis mëtsika kutichi rikarqunki Jehovä yanapashunqëkita. Alläpa problëmakunapa pasanqëki hörakuna yanapashunqëkita mana yarparqa ama yarpachakuytsu. ¡Jehoväqa imëkachömi yanapamarquntsik! Këllaman pensari: amïgun kanëkipaqmi invitashurqunki (Juan 6:44). Y pë yanapashuptikim kananyaq sirwikanki. ¿Imanirtan Jehoväman mañakurinkitsu mañakunqëkikunata imanö contestashunqëkita, wananqëki höra yanapashunqëkita y problëmakunapa pasanqëki hörakuna yanapashunqëkita yarpärinëkipaq? Jehovä imanö yanapashunqëkikunaman alli pensarninqa, mas segürum kanki imëka problëmakunapa pasaptikipis yanapashunëkipaq kaqta.

9. ¿Mantsashwanku problëmakunapa pasëta? (Proverbius 27:11).

⁹ Jehovä kawëkaq Dios kanqanta musyanqantsikqa yanapamäshun, problëmakunata mana mantsanapaqmi. Yarpäshunmi Jehoväpa contran Satanas këkanqanta. Hasta noqantsikpaqmi Satanasqa nin, mana allikunapa pasarqa Jehoväta dejarinapaq kaqta (Job 1:10, 11; leyi Proverbius 27:11). Problëmakunapa pasar alli tsarakurqa, Jehoväta kuyanqantsikta y Satanas ulikoq o llullakoq kanqantam rikätsikuntsik. ¿Autoridäkunaku chikiyäshunki? ¿Mikunëkipaqku faltapakuykanki? ¿Manaku nunakuna chaskikuyan yachatsikuptiki? Tsëkunapa pasëkarqa yarpänëkim alli tsarakurninqa, Jehovä Diosnintsikta kushitsinëkipaq kaqta. Pëqa manam permitinqatsu aguantëta puëdinqëkipita masqa tentashqa kanëkita (1 Cor. 10:13). Y alli tsarakunëkipaqmi kallpayoqta tikratsishunki.

KAWËKAQ DIOSQA BENDICISHUNKIM

10. ¿Imanöraq Jehoväqa sirweqninkunata bendicinqa?

¹⁰ Jehoväqa adoranqantsikpita bendicimantsikmi (Heb. 11:6). Kanan witsanqa yamë y kushishqa kawakunapaqmi yanapamäshun, y shamoq tiempuchönam mana wanushpa kawakunata permitimäshun. Segürum  këkantsik tsë rurëta puëdinampaq kaqta y bendicimänapaq kaqta. Tsënö següru kanqantsikmi yanapamäshun, unë sirweqninkunanöpis gänas gänaslla sirwinapaq. Rikärishun Timoteu ruranqanta (Heb. 6:10-12).

11. ¿Imatan Timoteuta yanaparqan congregacionchö alli trabajanampaq? (1 Timoteu 4:10).

¹¹ (Leyi 1 Timoteu 4:10). Timoteuqa confiakurqanmi sirwinqampita Diosnintsik bendicinampaq kaqta. Tsëmi Jehoväta y wawqi panikunata sirwirnin alli trabajarqan. ¿Imanötan rurarqan? Apostol Pablum nirqan alli yachatsikoq kanampaq, y jövin y mayor wawqikunapaqpis ejemplu kanampaq. Timoteuqa wawqi panikunatam kuyëllapa y firmi consejanan karqan, y tsë rurëqa manam fäciltsu karqan (1 Tim. 4:11-16; 2 Tim. 4:1-5). Timoteuqa ruranqankunata wakinkuna mana valorayaptimpis, Jehovä bendicinampaq kaqtam següru karqan (Rom. 2:6, 7).

12. ¿Imatan anciänukunata yanapan llapan shonqunkunawan trabajayänampaq? (Rikäri fötuta).

¹² Anciänukunaqa Timoteunömi rurëkäyanqankunata Jehovä rikëkanqanta y valoranqanta següru kayänan. Anciänukunaqa wawqi panikunatam cuidayan, yachatsiyan y yachatsikoq yarquyan. Tsëkunata rurarpis wakinkunaqa Diosnintsikpita yachakunapaq wayikunata rurëchö, o desgraciakuna kaptin, hospitalchö qeshyëkaqkunata watukarnin, o yawarta mana churayänampaqmi yanapakuyan. Anciänukunaqa clärum musyayan, wawqi panikunaqa Jehoväpa sirweqninkuna kayanqanta. Tsëmi llapan rurayanqantapis llapan shonqunkunawan rurayan y segürum këkäyan rurayanqampita Jehovä bendicinampaq kaqta (Col. 3:23, 24).

13. ¿Imanötan Jehovä sientikun puëdinqantsikmannö ruranqantsikta rikar?

¹³ Manam llapantsiktsu anciänu këta puëdintsik, peru imëkachömi yanapakuyta  puëdintsik. Y Jehoväqa llapan ruranqantsikkunatam alläpa valoran. Kushikunmi Bibliapita entëru Patsachö yachatsikunapaq ichikllawampis qellënintsikwan yanapakushqa, mantsapakuykarpis reunionchö parlakurinapaq makintsikta pallarishqa y ofendimaqnintsikkunata perdonashqa. Yanapakuykanqantsik noqantsikpaq ichiknölla kaptimpis Jehoväqa alläpam valoran, kuyamantsikmi y ruranqantsikkunapitaqa bendicimäshunmi (Lüc. 21:1-4).

KAWËKAQ DIOSNINTSIKPA LÄDUNCHÖ IMËPIS KËKÄSHUN

14. ¿Imanirtan Jehoväpa mas lädunchö karninqa jutsa rurëkunaman ishkishuntsu? (Rikäri fötuta).

¹⁴ Jehovä rasumpa kawanqanta creirninqa, Josënömi llakitsita munashuntsu. Josëqa Jehovä rasumpa kawanqantam següru karqan, tsëmi llakitsita mana munar jutsata rurarqantsu (Gen. 39:9). Jehovä rasumpa kawanqanta següru kanantsikpaqqa, seguïdum pëman mañakunantsik y Palabran Bibliatam estudianantsik. Tsëmi yanapamäshun pëwan mas amïgu kanantsikpaq. Y Josënömi Jehoväpa amïgun karqa, llakitsita munashuntsu (Sant. 4:8).

15. ¿Imatataq yachakuntsik tsunyaq jirkachö israelïtakunata pasanqampita? (Hebrëus 3:12).

¹⁵ Jehovä kawaq Dios kanqanta qonqëkoqkunaqa fäcil-llam sirwita dejariyanman. Tsunyaq jirkachö këkäyaptin israelïtakuna imanö kayanqampaq parlarishun. Pëkunaqa allim musyayarqan Jehovä rasumpa Dios kanqanta, peru manam confiakuyarqannatsu yanapanampaq kaqmanqa. Kënömi niyarqan: “¿Teyta Jehoväqa noqantsikwan këkanku o manaku?” (Ex. 17:2, 7). Tsënö pensarmi Jehovä Diosta cäsukuyarqannatsu. Noqantsikqa manam pëkunanö këta munantsiktsu (leyi Hebrëus 3:12).

16. ¿Imanir-raq Jehoväman markäkuyta dejarishwan?

¹⁶ Kanan tiempuqa Diospa lädunchö o amïgun këqa manam fäciltsu. Mëtsikaq nunakunam niyan Dios mana kanqanta. Mana  allikunata ruraq nunakunatapis alli kawakoqtanömi rikantsik. Tsëkunata rikarqa, capaz Jehoväman confiakushwannatsu. Dios kanqanta creirnimpis, capaz yanapamänapaq kaqmanqa confiakushwannatsu. Tsëmi pasarqan Salmus 73 qellqaq nunatapis. Pëqa Diosta mana cäsukoq nunakunatam, allinö kawakuyanqanta rikarqan. Tsëmi pensarqan, Jehovä munanqannö kawanqanqa mana välishqa kanqanta (Sal. 73:11-13).

17. ¿Imaraq yanapamäshun Jehovä Diosnintsikta sirwirnin sïguinapaq?

¹⁷ ¿Imatan Salmus qellqaq nunata yanaparqan juknöpana pensanampaq? Jehoväta mana sirweq nunakunata ima pasanampaq kaqkunaman pensanqanmi (Sal. 73:18, 19, 27). Tsënöllam pensarqan Jehoväta sirwirnin alli kawakunqankunaman (Sal. 73:24). Noqantsikpis Jehovä bendicimanqantsikmanmi alli pensanantsik. Këllaman pensarishun: Jehovä Diosnintsikta mana sirwirqa, ¿tsë bendicionkunata chaskishwantsuraq karqan? Tsëmi chaskinqantsik bendicionkunaman pensanqantsikqa yanapamäshun, Jehovä munanqannö kawakunapaq. Y Salmus qellqaq nunanömi kënö nishun: “Noqapaqqa, Diosnintsikta adorë y pëman mañakuymi alläpa alli” (Sal. 73:28).

18. ¿Imanirtan shamoq tiempuchö pasakunampaq kaqkunata mantsanantsiktsu?

¹⁸ Noqantsikqa kawëkaq Diosnintsikpa sirweqninkunam kantsik, tsëmi kë tiempuchö mana allikunapa pasarnimpis alli tsarakuyta puëdishun (1 Tes. 1:9). Diosnintsikqa rasumpam kawan, llapantsikpaqmi yarpachakun y yanapamantsikmi. Unë sirweqninkunatapis yanaparqanmi y kanampis yanapamantsikmi. Ichikllachönam alläpa sufrimientupa pasashun, peru Jehoväqa manam dejamäshuntsu (Is. 41:10). Tsëmi llapan shonquntsikwan confiakurnin kënö nita puëdintsik: “Teyta Jehovämi yanapamaqnï. Manam imatapis mantsashaqtsu” (Heb. 13:5, 6).