1. ¿Imam yanapawasun sasachakuykunapipas Diosta hinalla servinapaq?

 BIBLIAPIM niwanchik kay tiemponchikqa ‘mana haykapipas qawasqanchik sasallaña punchawkuna kasqanmanta’ (2 Tim. 3:1). Kunan tiempopiqa lliw runam sasachakuypi kanku, chaywanpas Diosta serviqkunaqa chiqnisqaraq hinaspa carcelkunaman apasqaraqmi kanchik. Tukuy chaykunapi tarikuptinchikpas, ¿imam yanapawasun Jehova Diosta hinalla servinapaq? Puntataqa yanapawasun Jehova Dios ‘kawsaq Dios’ kasqanta yuyariyninchikmi (Jer. 10:10; 2 Tim. 1:12).

2. ¿Imaynatam yachanchik Diosqa kawsaq Dios kasqanta?

² Jehova Diosqa ‘kawsaq Dios’ kasqanraykum listo kachkan ima sasachakuypi kaptinchikpas yanapaykuwananchikpaq (2 Cron. 16:9; Sal. 23:4). Diosninchik ‘kawsaq Dios’ kasqanta yachaymi yanapawasun ima sasachakuy kaptinpas aguantanapaq. Chaypaqyá kamachiq Davidmanta yachaykusun.

3. ¿Imatam Davidqa nichkarqa ‘¡Jehova Diosqa kawsanmi!’ nispanqa?

³ Davidqa Diostam allinta riqsirqa, hinaspapas paypim confiakurqa. Chaymi kamachiq Saul hinaspa huk runakuna wañuchinankupaq qatikachaptinku Diosta mañakurqa yanapaykunanpaq (Sal. 18:6). Mañakusqanta uyariykuptinmi hinaspa harkaykuptinmi Davidqa nirqa: ‘¡Jehova Diosqa kawsanmi!’, nispa (Sal. 18:46). Chaywanqa nichkarqa manam Dios kasqallanmantachu. Huk libropa nisqanman hinam nichkarqa sapa kuti serviqninkunata yanapaq Dios kasqanmanta mana iskayrayasqanta. Davidqa cuentatam qukurqa Dios yanapasqanta,  chaywanmi manapuni iskayrayarqachu Diosqa kawsaq Dios kasqanmanta. Chaytaqmi yanaparqa hinalla servinanpaqpas chaynataq hatunchananpaqpas (Sal. 18:​28, 29, 49).

4. ¿Imapaqmi yanapawasun Jehova Dios kawsaq Dios kasqanmanta mana iskayrayasqanchik?

⁴ Jehova Dios kawsaq Dios kasqanmanta mana iskayrayasqanchikmi yanapawasun kusisqa servinapaq, ima sasachakuy kaptinpas aguantanapaq, paypaq tukuy imata hinalla ruwanapaq hinaspa paymanta manapuni karunchakunapaq.

KAWSAQ DIOSMI KALLPATA QUWASUN

5. ¿Imataq yanapawanchik ima sasachakuytapas mana iskayrayaspa atipanapaq? (Rimarimuytaq Filipenses 4:13 nisqanmantapas).

⁵ Jehova Dios kawsaq Dios kasqanta hinaspa yanapawananchikpaq listo kasqanta yuyarispaqa aguantasunmi ima sasachakuytapas. Paypaqqa ima sasachakuypas allichanallam. Hinaspapas tukuy atiyniyuq kasqanraykum kallpata quwasun ima sasachakuytapas aguantanapaq (leey Filipenses 4:13). Chaykunam yanapawanchik ima sasachakuytapas mana iskayrayaspa atipanapaq. Imallawanpas sasachakuptinchik yanapawasqanchikwanmi manapuni iskayrayanchikchu hatun sasachakuykuna kaptinpas Dios yanapawananchikmantaqa.

6. ¿Imakuna pasasqanmi Davidta yanaparqa Jehova Diospi astawan hapipakunanpaq?

⁶ ¿Imakuna pasasqanmi Davidta yanaparqa Jehova Diospi astawan hapipakunanpaq? Warmallaraq kachkaspan ovejata michichkaptinmi huknin ovejanta leon apakurqa. Huk kutipipas osom ovejanta apakurqa. Iskaynin kutipim Davidqa leontawan osota qatispan qichuramurqa. Payqa yacharqam Dios yanapaptillan leontawan osota wañurachisqanta, chaymi mana alabakurqachu (1 Sam. 17:​34-37). Davidqa manamá haykapipas qunqarqachu chayna yanapasqantaqa. Chaykunapi yuyaymanaspanmi manapuni iskayrayarqachu hamuq punchawkunapipas kawsaq Dios yanapaykunanmantaqa.

7. ¿Pi yanapananpim Davidqa astawan piensarqa? ¿Imaynatam chayqa yanaparqa Goliatwan peleananpaq?

⁷ Warmallaraq kachkaspantaqchusmi Davidqa Israel soldadokunapa kasqanman rirqa. Chaypim Israel soldadokunata hatunkaray Goliat nichkasqa: “¡Kunanmi Israel soldadokunata pinqayman churasaq!”, nispa. Chaynata nisqanwanmi Israel soldadokunaqa mancharisqallaña kachkasqaku (1 Sam. 17:​10, 11). Paykunaqa kikinkupa kallpallankuwan Goliatta venceyta piensaspankum hatunkaray kasqanwan hinaspa ima nisqanwan mancharikurqaku (1 Sam. 17:​24, 25). Davidmi ichaqa mana chaynatachu piensarqa. Chaymi paypaqqa Goliatpa insultakusqanqa karqa kawsaq ‘Diospa soldadonkunata’ insultasqan hina (1 Sam. 17:26). Davidqa Dios yanapananpim astawan piensarqa. Ovejata michiptin yanapasqanman hina chay kutipipas Dios yanapananmantaqa manam iskayrayarqachu. Dios yanapaptinmá Goliattaqa vencerurqa (1 Sam. 17:​45-51).

8. ¿Imataq yanapawasun sasachakuykunapi Dios yanapawananchikmanta mana iskayrayanapaq? (Qawaytaq fototapas).

⁸ Kawsaq Dios yanapaykuwananchikmanta mana iskayrayaspaqa David hinam mana manchakusunchu ima sasachakuypi tarikuspapas (Sal. 118:6). Ñawpaqpi imakunata Jehova Dios ruwasqanpi yuyaymanaspaqa manam iskayrayasunchu yanapawananchikmantaqa. Chaypaqqa bibliapim leechwan serviqninkunata Dios imayna yanapasqanmanta (Is. 37:​17, 33-37). Leechwantaqmi kunan tiempopi serviqninkunata imayna yanapasqanmantapas, chaykunam kachkan jw.org  nisqapi. Yuyarichwantaqmi kikinchikta imayna yanapawasqanchiktapas. Manapaschá Diosqa osomanta utaq leonmanta hinaqa imamantapas salvawarqanchikchu. Chaywanpas payqa tukuypim yanapawarqanchik. Paymiriki akllaykuwarqanchik amistadnin kananchikpaq (Juan 6:44). Pay yanapawaptinchiktaqmi llaqtanpiqa hinalla kachkanchik. Chaymi yuyariykachiwananchikpaq Diosta nichwan mañakusqanchikman hina yanapawasqanchikta, necesitasqanchik tiempopi yanapawasqanchikta hinaspa sasachakuypi kaptinchikpas mana qunqaruwasqanchikta. Imapipas yanapawasqanchikpi yuyaymanaspaqa astawanraqmi seguro kasun hinalla yanapawananchikmanta.

9. ¿Ima ruwaytam atichwan sasachakuypi kaspapas? (Rimarimuytaq Proverbios 27:11 nisqanmantapas).

⁹ Jehova Dios kawsaq Dios kasqanta yachayninchikmi yanapawasun sasachakuykunata mana manchakunapaq. Sasachakuykunapi kaspanchikqa piensananchik Dios imayna sientekunanpim. Diabloqariki nin sasachakuypi kaspa Diosta saqirunanchiktam (Job 1:​10, 11; leey Proverbios 27:11). Chaymi sasachakuykunata aguantaspaqa sutillata qawachisun Diosta kuyasqanchikta hinaspa satanas llulla kasqanta. Ichapas ñakarichkanchik autoridadkuna contranchikpi hatariptinku, qullqinchik mana kaptin, Diosmanta willakusqanchikta mana uyariwaptinchik utaq ima sasachakuywanpas. Chaynapi kaspam yuyarinanchik sasachakuypi kaspapas Diosta kusichiyta atinanchikta. Payqa manamá saqiwasunchu mana aguantay atinanchikkama sasachakuypi kananchiktaqa (1 Cor. 10:13). Aguantananchikpaqmi kallpata quwasun.

KAWSAQ DIOSMI BENDECIWASUN

10. ¿Imaynatam Diosqa lliw yupaychaqninkunata bendecin?

¹⁰ Diosqa lliw yupaychaqninkunatam bendecin (Heb. 11:6). Kunanmi yanapawanchik hawka hinaspa kusisqa kawsakunapaq, hamuq tiempopiñataqmi wiñay kawsayta quwasun. Manamá iskayrayananchikchu chaykunata quwananchikpaq atiyniyuq kasqanmantaqa. Chaymanta mana iskayrayaymi yanapawasun ñawpaq tiempopi serviqninkuna hina  paypaq tukuyta ruwananchikpaq. Chaypaqyá yachaykusun Timoteomanta (Heb. 6:​10-12).

11. ¿Imanasqam Timoteoqa iñiqmasinkunarayku tukuyta ruwarqa? (Rimarimuytaq 1 Timoteo 4:10 nisqanmantapas).

¹¹ (Leey 1 Timoteo 4:10). Timoteoqa Diospim hapipakurqa. Payqa manam iskayrayarqachu Dios bendecinanmantaqa. Chaymi payqa Diosrayku hinaspa hukkunarayku tukuyta ruwarqa. Apostol Pablom kallpancharqa Diosmanta allinta willakunanpaq hinaspa iñiqkunata allinta yachachinanpaq. Kallpancharqataqmi lliw iñiqmasinkunapa qatipakunanpaq hina kananpaqpas. Kamachisqataqmi karqa lliw iñiqkunata kuyakuywan correginanpaqpas (1 Tim. 4:​11-16; 2 Tim. 4:​1-5). Wakin iñiqkunaqa Timoteopa ruwasqankunatam mana kaqpaq hinata hapiqku, chaywanpas segurom karqa Dios bendecinanmantaqa (Rom. 2:​6, 7).

12. ¿Imanasqataq punta apaqkunaqa tukuy sunquwan imapipas yanapakunku? (Qawaytaq fototapas).

¹² Timoteo hinam punta apaqkunapas yachanku allin ruwasqankuta Dios qawasqanta hinaspa valorasqanta. Punta apaqkunaqa iñiqmasinkutam yanapanku, huñunakuypim yachachinku hinaspapas Diosmantam willakunku. Chaywanpas paykunamanta achkam huñunakuna wasi ruwaypi hinaspa ima sasachakuypas kaptin yanapakunku. Wakinkuñataqmi hospitalpi unquq iñiqmasinchikkunata watukunku utaq hospitalpi hampichikuqkunata yanapanku. Punta apaqkunaqa allintam yachanku iñiqkunaqa Jehova Diospa kasqanta. Chayraykum tukuy sunquwan imapipas yanapakunku, hinaspapas manam iskayrayankuchu Dios bendecinanmantaqa (Col. 3:​23, 24).

13. ¿Imaynam Jehova Dios tarikun paypaq imatapas ruwanapaq kallpanchakusqanchikwan?

¹³ Manamá lliwchu punta apaqqa kanchik, chaywanpas llapallanchikmi Diospaqqa imatapas ruwayta atichwan. Tukuy sunquwan imapas ruwasqanchiktam payqa anchata valoran. Arí, valoranmi paymanta willakuy apakunanpaq qullqichanchikta asllata quptinchikpas. Payqa kusikunmi manchakuq kaspanchikpas huñunakuypi rimarinapaq makinchikta huqariptinchikqa. Anchatataqmi kusikun sientirachiwaqninchik  iñiqmasinchikta pampachaykuptinchikpas. Diospaq mana tukuy imata ruwasqanchikta piensaspapas manam qunqananchikchu ruway atisqanchikta anchata valorasqantaqa. Payqa kuyawanchikmi, hinaspapas paypaq imapas ruwasqanchikmantam bendeciwasun (Luc. 21:​1-4).

KAWSAQ DIOSMANTAQA AMAYÁ KARUNCHAKUSUNCHU

14. ¿Imanasqataq Jehova Diosmanta mana karunchakuyninchikqa ancha allin? (Qawaytaq fototapas).

¹⁴ Kawsaq Dios kasqanmanta mana iskayrayaspanchikqa manam paymantaqa karunchakusunchu. Joseypas Jehova Dios kawsaq Dios kasqanmanta mana iskayrayasqanraykum hinaspa kasukuyta munasqanraykum huchaman mana wichiykurqachu (Gen. 39:9). Ñuqanchikpas kawsaq Dios kasqanmanta mana iskayrayanapaqqa tiempochakunanchikmi payta mañakunapaq hinaspa palabranta estudianapaq, chaynapim paywanqa astawan allin amistad kasun. Josey hina Jehova Dioswan allin amistad kaspanchikqa manapunim imaraykupas paypa chiqnisqantaqa ruwasunchu (Sant. 4:8).

15. ¿Imatam yachachwan chunniqpi kaspanku Israel runakunapa imayna kasqankumanta? (Rimarimuytaq Hebreos 3:12 nisqanmantapas).

¹⁵ Jehova Dios kawsaq Dios kasqanta qunqaruqqa paymantam karunchakurunman. Chayraykuyá yuyarisun Israel runakunawan chunniqpi ima pasasqanta. Paykunaqa yacharqakum Dios kasqantaqa, chaywanpas ima necesitasqankuta qunanmantam iskayrayayta qallaykurqaku. Chaymi nirqakuraq: “¿Jehova Diosqa ñuqanchikwanchu kachkan ichapas mana?”, nispanku (Ex. 17:​2, 7). Diostam qipancharurqaku, chaymi paykunataqa mana qatipakunanchikchu (leey Hebreos 3:12).

16. ¿Imakunaraykum Dios serviyninchikpi hukmanyayta qallaykuchwan?

¹⁶ Mana allin runakunapa chawpinpi kawsasqanchikraykum Diosman sunqu kayqa sasa. Achka runakunam ninku Dios mana kasqanta. Chaymantapas, Diospa munayninta mana ruwaq runakunaraqmi allin kawsakusqankupaq  rikchakuwanchik. Tukuy chaykunaraykum Dios serviyninchikpiqa hukmanyayta qallaykuchwan. Arí, Dios kasqanmanta manapuni iskayrayaspapas wakinpiqa yanapawananchikmantam iskayrayayta qallaykuchwan. Chaynam pasarurqa Salmos 73 capitulota qillqaq runata. Paymi qawarqa Diospa kamachikuyninkunata mana kasukuq runakuna kusisqa kawsakusqankuta. Chaymi tapukurqa: “¿Imapaqñataq Diosman sunqu kayman?”, nispan (Sal. 73:​11-13).

17. ¿Imataq yanapawasun Diosmanta mana karunchakunapaq?

¹⁷ ¿Imataq Salmos qillqaqta yanaparqa mana allinman mana wichiykunanpaq? Diosmanta karunchakuqkunata ima pasananpim yuyaymanarqa (Sal. 73:​18, 19, 27). Yuyaymanarqataqmi Diosta serviynin imanasqa ancha allin kasqanpipas (Sal. 73:24). Ñuqanchikpas yuyaymanachwanmi kunankama imakunapi Dios bendeciwasqanchikpi hinaspa payta mana serviptinchik kawsakuyninchik imayna kananpi. Chaypi yuyaymanaymi yanapawasun Diosmanta mana karunchakunapaq hinaspa Salmos qillqaq hina ninapaq. Paymi nirqa: “Ñuqapaqmi ichaqa Diosniyman asuykuyqa allinpuni”, nispa (Sal. 73:28).

18. ¿Imanasqataq hamuq punchawkunapi sasachakuykuna kaptinpas mana manchakusunchu?

¹⁸ ‘Kawsaq hinaspa chiqap Diospa sirvienten’ kasqanchikraykum kay tukupay tiempopi ima sasachakuytapas aguantayta atisun (1 Tes. 1:​9, willakuynin). Payqa kawsaq Dios kasqanraykum ñuqanchikmanta preocupakun hinaspapas yanapaykuwananchikpaqmi listo kachkan. Ñawpaq tiempopi serviqninkunata hinam kunanpas hinalla yanapawasun. Ñamá mana haykapipas qawasqanchik llumpa-llumpay ñakariy punchaw qallaykunqaña, chaywanpas manam sapallanchikchu kasun (Is. 41:10). Hinaptinqa, mana manchakuspam nichwan: “Jehova Diosmi ñuqapa yanapawaqniyqa manam manchakusaqchu”, nispa (Heb. 13:​5, 6).