1. Problemacunata o llaquicunata charishpapash Jehovata sirvishpa catichunga ¿imata ayudanga?

 BIBLIAPI nishcashnami cunan punllacunapica ‘shinlli, na aguantai ushanalla tiempocunapi’ causanajupanchi (2 Tim. 3:1). Cai mundopica tucui gentecunallatami ashtaca ashtaca problemacunata charin. Ashtahuanbash Jehová Diosta sirvijcunataca catiriashpami llaquichin. Shinallata imapash jarcaicunatapashmi charin. Cashna llaquicunata charishpapash Jehová ‘causaj Dios’ cashcata yarinami paita sirvishpa catichun ayudanga (Jer. 10:10; 2 Tim. 1:12).

2. Jehová Diosca causaj Dios cashcataca ¿imashinata ricuchin?

² Jehová Diosca ciertopacha causaj Diosmi can. Chaimandami ñucanchicuna imapash llaquicunata o problemacunata charijpica ñucanchita ayudangapaca siempre listo can (2 Crón. 16:9; Sal. 23:4). Jehová Dios causaj Dios cashcata yarishpaca ima problemacuna ricurijpipash aguantashpa, ñaupaman catichunmi ayudanga. Cunanga rey Davidta Jehová Dios imashina ayudashcatami ricupashun.

3. Davidca ‘Jehová Diosca causaj Diosmi can’ nishpaca ¿imatapachata ningapaj munarca?

³ Davidca Jehová Dios ayudanapi tucui shungu confiai cashcamandami rey Saúl paita huañuchingapaj catiriajujpica Jehová Diospa ayudata mañarca (Sal. 18:6). Jehová Dios imashina ayudajta ricushpami Davidca: ‘Jehová Diosca causaj Diosmi can’ nirca (Sal. 18:46). Cashna nishpaca Davidca Taita Diosca tianmi ningapallaca na munarcachu. Bibliata ashtahuan intindichingapaj shuj libropica cashnami nin: “Davidca Jehová Diospi tucui shungu confiashcata y Jehová Dios paipa sirvijcunata siempre cuidangapaj listo cashcatami paica seguro carca” ninmi. Davidca paipa causaipi Jehová Dios imashina ayudashcata  cuenta japimandami Jehová Dios causaj Dios cashcataca seguro carca. Y chaimi Jehová Diosta tucui shungu sirvishpa y adorashpa catichun ayudarca (Sal. 18:​28, 29, 49).

4. Jehová Dios causaj Dios cashcata seguro canaca ¿imashinata ayudan?

⁴ Jehová Dios causaj Dios cashcata seguro cashpaca ima llaquicunata, problemacunatapash aguantashpami Jehová Diostaca cushilla sirvishpa catipashun. Shina rurashpaca Jehová Dioshuanga ashtahuan ali amigomi caita ushapashun.

JEHOVÁ DIOSCA AGUANTASHPA CATICHUNMI AYUDANGA

5. Llaquicunata o problemacunata aguantachunga ¿imata ayudanga? (Filipenses 4:13).

⁵ Jehová Dios causaj Dios cashcata yarina y ñucanchita ayudangapaj listo cashcata yarinami imapash llaquicunata o problemacunata charishpapash aguantashpa catichunmi ayudanga. Jehová Diosca ashtaca poderta charimandami ñucanchiman fuerzata carashpa ayudanga (Filipenses 4:13​ta liipangui). Shina ayudan cashcamandami ima llaquicuna o problemacuna ricurijpipash aguantaita ushapashun. Shinaca Jehová Dios tucuipi ayudan cashcataca seguromi caita ushapanchi.

6. Jehová Diospi ashtahuan confiachunga Davidtaca ¿imata ayudarca?

⁶ Cunanga David imashina causashcata y Jehová Diospi confiachun ima ayudashcata ricupashun. Shuj viajeca shuj leonmi Davidpa shuj llamaguta aparca. Catipica shuj osopash shinallatami rurarca. Cai ishcandi viajecunapica Davidca na manllashpami llamagucunata salvangapaj catirca. Davidca Jehová Diospa ayudahuanlla chaita rurai ushashcatami ricuchirca (1 Sam 17:​34-37). Jehová Dios cashna ayudashcapi pensarinami shamuj punllacunapi fuerzata cushpa ñaupaman catichun ayudana cashcataca Davidca ashtahuan seguro carca.

7. Davidtaca ¿imata seguro canata Goliat runahuan macanajuchun ayudarca?

⁷ Shuj viajeca Davidca israelita soldadocunapamanmi rirca. Chai pushtuman vitsiashpaca israelita soldadocuna ninanda manllarishca cajtami ricurca. Porque Goliat runaca ‘carpacunapi tianajuj israelitacunataca’ pita ñucahuan macanajungapaj shamugringuichi nishpa caparijurca (1 Sam 17:​10, 11). Israelita soldadocunaca Goliat jatun jatun cashcata ricuimanda, shinallata imashina rimajujta uyaimandami ninanda manllanajurca (1 Sam 17:​24, 25). Goliat runa israelita soldadocunamanda burlarijujpica Davidca, ‘Taita Diospaj tandanajushca soldadocunamanda’, burlarijujtashnami sintirca (1 Sam 17:26). Davidca Jehová Dios llamagucunata salvangapaj ayudashcashnallata cai situacionbipash ayudanataca seguromi carca. Jehová Diospa ayudahuanmi Davidca Goliat runataca mishaita usharca (1 Sam 17:​45-51).

8. Llaquicunahuan o problemacunahuan cashpapash Jehová Diospi confiachunga ¿imata ayudanga? (Fotota ricupangui).

⁸ Jehová Dios ñucanchita ayudangapaj listo cashcata yarishpaca David runagushnallatami imapash llaquicunata o problemacunataca chimbapuraita ushapashun (Sal. 118:6). Por ejemplo, Jehová Diospi ashtahuan confiangapaca punda tiempopi paipa sirvijcunata imashina cuidashpa salvashcata yachajuna y pensarinami ayudanga (Is. 37:​17, 33-37). Ashtahuanbash cunan punllacunapi huauquipanicunata Jehová Dios imashina ayudajushcatapashmi jw.org paginapi ricuita ushapangui. Shinallata quiquinda imashina Jehová Dios ayudashcatapash yaripangui. Quiquinga Davidshnallata shuj osota o leondaca na mishaparianguichu. Pero Jehová Diosca quiquindaca paipa ali amigo cachunmi ayudapashca (Juan 6:44). Shinallata Jehová Diospa ayudahuanllami paipa organizacionbi catijupangui. Jehová Diosta mañajushpaca  imashina quiquinba oraciongunata contestashcata, shinallata llaquicunata o problemacunata charijpi imashina ayudashcata yaringapaj ayudahuai nishpami mañana capangui. Shinaca Jehová Dios imashina ayudashcapi pensarishpaca Jehová Dios quiquinda ayudashpa catinata seguro cachunmi ayudanga.

9. Problemacuna o llaquicunata charishpaca ¿imatata seguro cana capanchi? (Proverbios 27:11).

⁹ Jehová Dios ñucanchita siempre ayudan cashcata seguro canami problemacuna o llaquicuna ricurijpipash shinlli tucushpa ñaupaman catichun ayudan. Llaquicunata o problemacunata charishpaca Jehová Diosta sirvijcunaca paita sirvinata saquingallami nishpa Diabloca llullajun. Chaimandami llaquicunahuan o problemacunahuan cashpaca Jehová Diosta ciertopacha tucui shungu sirvijushcata ricuchina capanchi (Job 1:​10, 11; Proverbios 27:11​ta liipangui). Shina rurashpaca Diablopa nishcacuna llulla cashcata y Jehová Diosta ciertopacha tucui shungu juyashcatami ricuchipashun. Por ejemplo, ¿quiquinga gobiernocunapa jarcaicunata, predicacionbi pipash na uyajpi o culqui faltallaguchu causapangui? Cashna problemacunata o llaquicunata charijpi Jehová Dios aguantashpa catichun siempre ayudan cashcataca na cunganachu capangui. Cashna situaciongunapi cashpaca Jehová Diosta cushichina oportunidadtapashmi charipangui (1 Cor. 10:13).

JEHOVÁ DIOSCA PAITA NA SAQUISHPA SIRVIJPICA BENDICIANMI

10. Jehová Diosca paipa sirvijcunamanga ¿imata prometishca?

¹⁰ Jehová Diosca paita adorajcunataca siempremi bendician (Heb. 11:6). Por ejemplo, cunanbica tranquilo cushilla causachunmi ayudan. Shamuj punllacunapicarin para siempre causana bendicionda carasha nishpami prometishca. Y cai bendiciongunata ñucanchiman carana munaita charijta y carangapaj ashtaca poderta charijtapash seguromi capanchi. Jehová Dios ñucanchita bendicianata seguro canami punda tiempopi Jehová Diosta sirvijcunashnallata Jehová Diosta sirvishpa catichun ayudanga. Cunanga Timoteopa ejemplota ricupashun (Heb. 6:​10-12).

11. Huauquipanicunata ayudangapaj esforzarichunga Timoteotaca ¿imata ayudarca? (1 Timoteo 4:10).

 ¹¹ (1 Timoteo 4:10​ta liipangui). Timoteoca Jehová Dios paita bendicianataca seguromi carca. Chaimandami Jehová Diosta adorangapaj y shujcunata ayudangapaj ninanda esforzarirca. Por ejemplo, apóstol Pabloca Timoteotaca Bibliamanda ali yachachij cachun, jovengunaman y mayorlla huauquipanicunaman ali ejemplota ricuchichunmi animarca. Shinallata pipash corregichun minishtijujpica corregina responsabilidadtami mingarca. Pero caita rurajushpaca juyaihuanmi rurana carca (1 Tim. 4:​11-16; 2 Tim. 4:​1-5). Timoteoca paipa responsabilidadta imashina pactachijujta shujcuna na ricujpi o na agradicijpipash Jehová Dios ninanda valichijtaca seguromi carca (Rom. 2:​6, 7).

12. ¿Imamandata ancianocunaca huauquipanicunata ayudangapaj ninanda esforzarin? (Fotota ricupangui).

¹² Anciano huauquicuna quiquinba ruraicunata Jehová Dios ninanda valorajtaca seguromi cana capanguichi. Anciano huauquicuna congregacionmanda huauquipanicunata cuidashpa, paicunaman yachachishpa y predicacionbi ayudashca jahuapash ashtaca anciano huauquicunaca construccionbi y llaqui apashca huauquipanicunata ayudangapapashmi ninanda esforzarin. Cutin shuj ancianocunaca Grupo de Visita a Pacientes y Comité de Enlace con los Hospitales nishcapipashmi ayudanajun. Ancianocunaca tucui huauquipanicunata cuidachun Jehová Dios paicunaman mingashcataca alimi yachan. Shinaca anciano huauquicunaca huauquipanicunataca tucui shungumi ayudangapami esforzarin. Y caita rurashcamanda Jehová Dios bendicianataca seguromi can (Col. 3:​23, 24).

13. Jehová Diosca paita sirvingapaj esforzarijpica ¿imashinata sintirin?

¹³ Na tucuicunachu anciano shina sirvina bendiciondaca charipanchi. Pero tucuicunallatami Jehová Diostaca tucui shungu sirvita ushapanchi. Por ejemplo, mundo enteropi huauquipanicunata ayudangapaj tucui shungu contribuciongunata carajpi, manllashpapash  comentangapaj esforzarijpi, shinallata perdonangapaj ninanda esforzarijpica Jehová Diosca ninanda cushijushpami quiquinba rurashcacunataca valichipan. Ashtahuanbash quiquin rurai usharishcagutalla rurangapaj esforzarijpica Jehová Diosca quiquindaca ninanda juyaimandami bendiciapanga (Luc. 21:​1-4).

JEHOVÁ DIOSMANDACA NUNCA NA CARUYANACHU CAPANCHI

14. Jehová Dioshuan ali amigo canaca ¿imata rurachunda ayudan? (Fotota ricupangui).

¹⁴ Jehová Dioshuan ali amigo cashpaca paitaca na saquishpami sirvishpa catipashun. Por ejemplo, José runaguca Jehová Diospa ali amigo caimandami huainayana juchapi urmashpa Jehová Diosta llaquichingapaca na munarca (Gén. 39:9). Ñucanchipash Jehová Dioshuan ali amigo cangapaca Jehová Diosta mañangapaj, Bibliata ali ali estudiangapami tiempota llujchina capanchi. José runagushna Jehová Dioshuan ali amigo cashpaca Jehová Diosta llaquichina ruraicunapica na urmapashunllu (Sant. 4:8).

15. Israelitacunamandaca ¿imatata yachajuita ushapanchi? (Hebreos 3:12).

¹⁵ Jehová Diospi confianata saquijcunaca Jehová Diosmandaca asha ashami caruyan. Desiertopi cashpaca israelitacunahuanga ¿imata pasarca? Paicunaca Jehová Dios tiajtaca ali alimi yacharca. Pero Jehová Dios paicunaman minishtirishca cosascunata caranata dudai callarimandami “Jehová Diosca ¿ñucanchihuanllu can o nachu ñucanchihuan can?” nishpa tapui callarirca (Éx. 17:​2, 7). Jehová Diosta shina na cazuimandami paimanda caruyarca. Ñucanchicunapash cai israelitacunashna cangapaca na munapanchichu (Hebreos 3:12​ta liipangui).

16. ¿Imata ricuimandata huaquinbica Jehová Diospi confianaca difícil caita ushan?

¹⁶ Cai mundopi nali ruraicunapa chaupipi causaimandami Jehová Dioshuan ali amigo cashpa catinaca shinlli caita ushan. Ashtaca gentecunaca Taita Diosca na tianllu ninmi. Y Jehová Diospa ñaupajpi nali ruraicunata rurashpapashmi ali causanshnalla ricurita ushan. Caita ricuimandami Jehová Dios ñucanchita  ayudanataca asha asha dudai callaripanchiman. Por ejemplo, Salmo 73 librota escribij runaguhuan ima pasashcata ricupashun. Cai runaguca Jehová Diosta na cazushpa causaj gentecuna imapash na pasajpishna ali causashpa catijtami ricurca. Chaita ricuimandami cai runaguca Jehová Diosta sirvishpa catinaca ¿importantepachacha can? nishpa pensari callarirca (Sal. 73:​11-13).

17. Jehová Diosta na saquishpa sirvishpa catichunga ¿imata ayudanga?

¹⁷ Salmista runagutaca ¿imata ayudarca? Jehová Diosmanda caruyashpaca ashtaca llaquicunata chari ushashcapi pensarinami ayudarca (Sal. 73:​18, 19, 27). Ashtahuanbash Jehová Diosta sirvishpa catimanda ima bendiciongunatalla charinapimi pensarirca (Sal. 73:24). Ñucanchicunapashmi Jehová Diosta na sirvishpaca ima laya causaita charina cashcatami pensarina capanchi. Shinallata Jehová Diosta sirvimanda ima bendiciongunatalla charishcatapashmi pensarina capanchi. Cashna pensarishpaca Jehová Diosmanda na caruyashpami Salmista runagushnallata ‘Taita Diospaman quimirinaca aligupachami’ can nita ushapashun (Sal. 73:28).

18. Shamuj punllacunapi Jehová Dios ayudanataca ¿imamandata confiaita ushapanchi?

¹⁸ Cai último punllacunapi llaquicuna o problemacuna ricurijpipash ‘causajuj ciertopacha Taita Diospa sirvijcuna’ cashcamandami aguantashpa ñaupaman catita ushapanchi (1 Tes. 1:9). Jehová Diosca ñucanchipa ali amigo cashcamandami ñucanchimanda preocuparishpa y tucuipi ayudangapaj siempre listo can. Jehová Diosca punda tiempopi paipa sirvijcunata ayudashcashnallatami cunanbipash ñucanchitaca ayudanga. Ñallami ninan manllanai llaqui tiempocunaca chayamunga. Pero Jehová Dios ayudanata yachaimandami na manllana capanchi (Is. 41:10). ‘Shinaca, tucui shunguhuan confiashpami: “Jehová Diosmi ñucataca ayudahuanga. Ñucaca na manllashachu” nita ushapanchi’ (Heb. 13:​5, 6).