1. Со поможинела е Јеховаскере слугенге понадари да те служинен леске иако иси лен проблемија?

 КИ БИБЛИЈА пишинела кај авдиве живинаја ко „бут пхаро време“ (2. Тим. 3:1). Е Јеховаскере слуген иси лен о иста проблемија сар са е јаверен ко акава лошно свето колеа со владинела о Сатана. Ама, амен исто аѓаар иси амен противибе хем прогонство. Со поможинела аменге понадари да те служина е Јеховаске иако иси амен асавке проблемија? Јекх главно причина тани адаја со осетинѓем сар о Јехова поможинела аменге хем адава со џанаја кај „ов тано џивдо Девел“ (Ерем. 10:10; 2. Тим. 1:12).

2. Со џанаја башо Јехова, хем сар адава дела амен сила?

² О Јехова тано чачутни личност која со поддржинела амен кеда иси амен неволје хем родела начинија те поможинел аменге (2. Лет. 16:9; Пс. 23:4). Ако дикхаја ки лесте сар џивдо Девел, адава ка поможинел аменге те икљова ко крајо секоле пхарипаја со ка овел амен. Те дикха сар акава сине чаче ко е Давидескоро случај.

3. Со мислинѓа о Давид кеда вакерѓа: „О Јехова тано џивдо“?

³ О Давид пенџарела сине е Јехова хем сине ле доверба ки лесте. Кеда о цари о Саул хем јавера мангле те мударен ле, о Давид молинѓа е Јехова баши помош (Пс. 18:6). Откеда о Девел одговоринѓа ки лескири молитва хем спасинѓа ле, о Давид вакерѓа: „О Јехова тано џивдо“ (Пс. 18:46). Акале лафенцар, о Давид на мангља само те вакерел кај о Девел постојнела. Ко јекх лил башо псалмија, пишинела кај о Давид сикавѓа пли доверба ко Јехова сар „џивдо Девел, кова со секогаш поможинела пле народоске“. Таро лично искуство о Давид  џанља кај о Девел тано свесно таро со накхела хем кај тано спремно те поможинел леске. Адава охрабринѓа е Давиде хем поможинѓа леске понадари да те служинел е Јеховаске хем те фалинел ле (Пс. 18:28, 29, 49).

4. Сар ка користинел аменге адава со џанаја кај о Јехова тано џивдо Девел?

⁴ Ако сием увериме кај о Јехова тано џивдо Девел, адава шај те поможинел амен те служина леске ревно. Ка овел амен сила те истрајна ко неволје хем желба понадари да те да амендар са те служина е Девлеске. Исто аѓаар, ка ова одлучна те ачхова паше е Јеховаја.

О ЏИВДО ДЕВЕЛ КА ДЕЛ ТУТ СИЛА

5. Сар шај те ова храбра кеда иси амен неволје? (Филипјања 4:13).

⁵ Ка шај те истрајна ки секоја неволја, бизи разлика дали тани бари или тикни, ако на бистраја кај о Јехова тано џивдо хем кај тано акате те поможинел аменге. Ов шај те поможинел амен адалеске со нијекх проблеми со иси амен нане леске пхаро. Ов тано Семоќно хем шај те дел амен сила те истрајна. (Читин Филипјања 4:13.) Адалеске, иси амен бут причине храбро те борина амен секоле пхарипаја. Кеда дикхаја сар о Јехова поможинела амен ко потикне неволје, адава уверинела амен кај ов исто аѓаар ка поможинел амен кеда ка овен амен побаре неволје.

6. Кола ситуацие таро тернипе бајрарѓе е Давидескири доверба ко Јехова?

⁶ Те дикха дуј ситуацие таро е Давидескоро живото кола со бајрарѓе лескири доверба ко Јехова. Кеда о Давид сине терно, јекх лави, а пало несаво време хем јекх мечка, леле лестар по јекх бакхро таро лескере дадескоро стадо. Ко солдуј ситуацие о Давид храбро прастандило пало лави хем пали мечка хем спасинѓа е бакхрен. Ама о Давид на мислинѓа кај ов керѓа адава пле силаја, соске џанља кај о Јехова поможинѓа леске (1. Сам. 17:34-37). Ов никогаш на бистерѓа акала ситуацие. Адава со размислинѓа ленге уверинѓа ле кај о џивдо Девел ка дел ле сила ки иднина да.

7. Ко со концентриринѓа пе о Давид, хем сар адава поможинѓа леске те боринел пе е Голијатеа?

⁷ Покасно, веројатно панда џикоте сине тинејџери, о Давид гело ко кампи коте со сине и израелско војска. Ов дознајнѓа кај о војникија бут дарандиле адалеске со јекх филистејско џини, кова со викинела пе сине Голијат, иклило те изазивинел е израелско војска (1. Сам. 17:10, 11). О војникија дарандиле соске концентриринѓе пе ко адава кобор о Голијат тано баро хем ко адава со вакерела сине (1. Сам. 17:24, 25). Ама о Давид концентриринѓа пе ко нешто јавер. Ов џанља кај кеда о Голијат асала сине е израелско војскаке, ов уствари вреџинела сине е џивде Девле (1. Сам. 17:26). О Давид мислинела сине ко Јехова. Ле сине ле доверба кај о Девел со поможинѓа ле кеда сине овчари, ка поможинел леске ки акаја да ситуација. О Давид сине сигурно ко адава хем адалеске боринѓа пе е Голијатеа хем џанѓола пе, побединѓа ле! (1. Сам. 17:45-51).

8. Со шај те бајрарел амари доверба кај о Јехова ка поможинел амен кеда ка овен амен неволје? (Дикх хем и слика.)

⁸ Амен да шај успешно те икљова ко крајо е неволјенцар ако на бистраја кај о џивдо Девел тано спремно те поможинел амен (Пс. 118:6). Шај те бајрара амари доверба ко акава ако размислинаја со керѓа о Јехова англедер. Читин библиска извештаија кола со ка сетинен тут сар о Јехова спасинѓа пле слуген (Иса. 37:17, 33-37). Исто аѓаар, ки амари интернет-страница jw.org шај те дикхе или те читине искуствија башо адава сар о Јехова поможинѓа амаре пхраленге хем пхењенге ко амаро време. Освен адава, сетин тут ко ситуацие кеда о Јехова поможинѓа лично  туке. Иако шај о Јехова на керѓа туке добором баре буќа, сар на пример те спасинел тут тари мечка или таро лави, сепак ма бистре кај о Јехова керѓа туке бут буќа ко живото. О Јехова викинѓа тут ки песте хем денѓа тут прилика те ове лескоро амал (Јован 6:44). Чак авдиве, адалеске со ов поможинела тут, ту сиан панда ко чачипе. Адалеске, молин е Јехова те поможинел туке те сетине тут ко моментија кеда ов одговоринѓа ко тле молитве, кеда ко право време денѓа тут адава со ваљанѓа туке или кеда поможинѓа тут ки несави пхари ситуација. Адава со ка размислине башо асавке искуствија панда повише ка уверинел тут кај о Јехова понадари да ка поможинел туке.

9. Сар шај те дикха ко амаре неволје? (Изреки 27:11).

⁹ Адава со ка дикха е Јехова сар џивдо Девел ка поможинел аменге те дикха исправно ко амаре неволје. Соске? Кеда иси амен неволје, ваљани те концентририна амен ко адава сој најважно. О Бенг вакерела кај ако иси амен пхарипа, тегани ка цида амен таро Јехова. Адалеске, о начин сар реагиринаја кеда иси амен пхарипа влијајнела упро адава сар ка осетинел пе о Јехова (Јов 1:10, 11; читин Изреки 27:11). Ако ачховаја верна иако иси амен неволје ка сикава кај мангаја е Јехова хем ка докажина кај о Бенг ховавела. Дали иси тут противибе таро властија или иси тут економска проблемија? Дали о мануша каске со проповединеа на интересинена пе башо шукар хабери или шај иси ту несави јавер неволја? Ако аракхљовеа ки несави таро акала ситуацие, ма бистре кај адава дела тут прилика те радујне е Јеховаскоро вило. Исто аѓаар, ма бистре кај ов никогаш нане те мукхел те ове искушимо повише таро адава со шај те издржине (1. Кор. 10:13). Ов ка дел тут и сила со ваљани туке те шај те издржине.

О ЏИВДО ДЕВЕЛ КА НАГРАДИНЕЛ ТУТ

10. Со ка керел о џивдо Девел околенге со служинена леске?

¹⁰ О Јехова секогаш наградинела околен со верно служинена леске (Евр. 11:6). Ов дела амен мир хем задоволство авдиве, а ки иднина  ка дел амен хем вечно живото. Амен сием целосно увериме кај о Јехова на само со мангела те наградинел амен, него иси ле хем и моќ те керел адава. Адалеске, понадари да даја ле амаро најшукар џикоте служинаја леске, исто сар со керена сине о верна слуге таро библиско време. Баш адава керѓа о Тимотеј ко прво веко (Евр. 6:10-12).

11. Со поттикнинѓа е Тимотее те дел пестар са те служинел ко собрание? (1. Тимотеј 4:10).

¹¹ Читин 1. Тимотеј 4:10. Е Тимотее сине ле силно вера кај о џивдо Девел ка наградинел ле. Адалеске, ов дела сине пестар са те шај те служинел е Јеховаске хем е јаверенге. Сар керела сине адава? О апостол Павле поттикнинѓа ле панда пошукар те поучинел ки служба хем ко собрание. Исто аѓаар, о Павле вакерѓа леске те овел шукар пример пле пхраленге — хем е терненге хем е пхуренге. Сине леске денде хем несаве пхаре задаче коленде со сине вклучимо те дел директно ама љубезно совет околенге со ваљани сине (1. Тим. 4:11-16; 2. Тим. 4:1-5). Понекогаш, о јавера на приметинена сине адава со керела о Тимотеј или на ценинена сине адава, ама ов сине сигурно кај о Јехова ка наградинел ле (Рим. 2:6, 7).

12. Соске о старешине продолжинена цело вилеа те служинен ко собрание? (Дикх хем и слика.)

¹² О старешине да авдиве шај те овен сигурна кај о Јехова дикхела хем ценинела адава со керена. Освен со керена пастирска посете, поучинена хем проповединена, бут старешине поможинена те градинен пе теократска објектија хем поможинена те организиринел пе помош коте со иси природна катастрофе. Јавера служинена ки Група со посетинела е пациентен или ко Одборија со поможинена машкар о докторија хем е Јеховаскере сведокија. О старешине џанена кај о собрание тано е Јеховаскоро, а на несаве манушескоро. Адалеске, ола цело вилеа керена пумаре задаче ко собрание хем иси лен целосно доверба кај о Јехова ка наградинел лен башо адава со керена (Кол. 3:23, 24).

13. Сар осетинела пе о Јехова башо адава со кераја леске?

 ¹³ Нашти сарине те овен старешине. Ама, секова јекх амендар шај те дел нешто е Јеховаске. Амаро Девел бут ценинела кеда даја ле амаро најшукар те шај те служина леске. Ов дикхела кеда даја прилогија башо активностија со керена пе ко цело свето, чак те овел да адава хари. Леске тано бут мило кеда дикхела кај иако сием лаџутне, ваздаја амаро вас хем коментиринаја ко состанокија. Ов исто аѓаар бут радујнела пе кеда простинаја околенге со дукхавѓе амен. Чак ако мислинеа кај нашти те кере добором кобор со ту мангеа, ов сигурно кај о Јехова ценинела адава со шај те кере. Ов бут мангела тут башо адава хем ка наградинел тут (Лука 21:1-4).

АЧХОВ ПАШЕ Е ЏИВДЕ ДЕВЛЕА

14. Сар адава со ка ачхова паше е Јеховаја ка поможинел аменге те ачхова леске верна? (Дикх хем и слика.)

¹⁴ Ако о Јехова аменге реално ка овел аменге полокхо те ачхова леске верна. Адава сине случај е Јосифеа. Ов одлучно одбинѓа те керел неморал. О Девел сине леске реално хем на мангља те дукхавел ле (1. Мој. 39:9). Те шај о Јехова аменге да те овел реално, ваљани те одвојна аменге време те молина амен хем те проучина лескоро Лафи. Аѓаар ка ова попаше амала леа. Ако амен да исто сар о Јосиф, сием паше амала е Јеховаја, нане те манга те кера ништо со ка разочаринел ле (Јак. 4:8).

15. Со шај те сикљова таро адава со случинѓа пе е Израелцонге ки пустина? (Евреија 3:12).

¹⁵ Окола со бистрена кај о Јехова тано џивдо Девел, локхе шај те на овен леске верна. Размислин со случинѓа пе е израелцонге џикоте сине ки пустина. Ола сине свесна кај о Јехова постојнела, ама почминѓе те сумнинен пе дали ов ка грижинел пе башо ленгере потребе. Ола чак пучле: „Дали о Јехова тано машкар аменде или на?“ (2. Мој. 17:2, 7). Адалеске почминѓе те бунинен пе против о Девел. Амен сигурно на мангаја те џа пало ленгоро лошно пример, кова сој аменге предупредување. (Читин Евреија 3:12.)

16. Сар шај те овел испитими амари вера?

 ¹⁶ Акава свето керела аменге пхаро те ачхова паше е Јеховаја. Бут џене на мангена те верујнен кај о Девел постојнела. Бут пути изглединела кај окола со на шунена е Девлескере законија живинена песке шукар. Кеда дикхаја кај случинела пе адава, амари вера шај те овел чхивди ко испит. Иако верујнаја кај о Девел постојнела, сепак шај те почмина те сумнина амен дали ов ка поможинел амен. Несаво време о писатели таро 73-то Псалм осетинела пе сине аѓаар. Ов дикхља сар о мануша околу лесте на шунена е Девлескере законија, а сепак уживинена сине ко живото. Адалеске почминѓа те пучел пе дали врединела те служинел е Девлеске (Пс. 73:11-13).

17. Со ка поможинел амен те ачхова паше е Јеховаја?

¹⁷ Со поможинѓа е псалмистеске те променинел пло стави? Ов размислинела сине со ка овел околенцар со бистерѓе е Јехова (Пс. 73:18, 19, 27). Исто аѓаар, размислинела сине кобор користинела леске адава со служинела е Девлеске (Пс. 73:24). Амен да шај те размислина башо благословија со дела амен о Јехова. Те замислина аменге саво ка овел сине амаро живото ако на служинаја е Јеховаске. Адава ка поможинел амен те ачхова верна е Јеховаске хем исто сар о псалмисти те вакера: „А манге тано шукар те овав паше узо Девел“ (Пс. 73:28).

18. Соске на ваљани те дара тари иднина?

¹⁸ Амен шај те икљова ко крајо секоле пхарипаја со ка овел амен ко акала последна диве соске служинаја „е џивде хем чачутне Девлеске“ (1. Сол. 1:9). Амаро Девел грижинела пе аменге хем секогаш ка поможинел амен. Ов докажинѓа кај сине узо пле слуге ко пурано време хем кај тано узо пле слуге авдиве да. Панда хари ка доживина и најбари неволја со ка случинел пе ки пхув. Ама амен нане те ова коркори, о Јехова ка овел аменцар (Иса. 41:10). Адалеске, храбро шај те вакера: „О Јехова тано мло помошнико, нане те дарав“ (Евр. 13:5, 6).