1. So pomožini e Jehovase slugenđe te služinen lese iako isi len problemija?

 I BIBLIJA opisujini o vreme ko kova amen živinaja sar „poslednja dive“ (2. Tim. 3:1). E Jehovase sluge isi len problemija kola isi len hem sa avera manuša. Uzo odova, isi len hem progonstvo sose služinena e Jehovase. So pomožini amen te služina e Jehovase, iako isi amen problemija? Odova so osetinđam sar o Jehova angleder pomožinđa amen hem so đanaja soj tano „đivdo Devel“ (Jer. 10:10; 2. Tim. 1:12).

2. So šaj te del amen snaga ked isi amen kušnje?

² O Jehova tano svesno kola problemija isi amen hem mangela te pomožini amenđe (2. Let. 16:9; Ps. 23:4). Ked na bistraja so ov brinini pe amendar hem soj tano spremno te pomožini amen, tegani šaj te istrajina ki bilo savi kušnja. Akana ka dikha sar pomožinđa e kraljese, e Davidese.

3. So o David mislinđa ked phenđa soj tano o Jehova đivdo Devel?

³ O David đanđa e Jehova hem osloninđa pe upro leste. Ked o kralj Saul hem avera manglje te mudaren le, ov molinđa pe e Jehovase asi pomoć (Ps. 18:6). Palo odova so o Devel odgovorinđa ko olese molitve hem spasinđa le, o David phenđa: „O Jehova tano đivdo Devel“ (Ps. 18:46). Akale lafencar ov na phenđa samo so postojini o Devel. Jekh knjiga phenela so o David naglasinđa so o Jehova tano ćaćutno Devel kova uvek pomožini pe slugenđe. Ov đanđa so oleso Devel tano svesno so desini pe oleja hem soj tano  spremno te pomožini lese. Odova podstakninđa le hem ponodri te služini e Jehovase (Ps. 18:28, 29, 49).

4. Sar pomožini amen odova so hijam uverime so o Jehova tano đivdo Devel?

⁴ Ked hijam uverime soj tano o Jehova đivdo Devel, odova pomožini amen te služina lese revno. Ka ovel amen snaga te istrajina ki bilo savi kušnja hem ka ovel amen želja te da amaro najšukar e Jehovase ki služba. Isto ađahar, ka ova odlučna te aćhova paše uzo Jehova.

O ĐIVDO DEVEL KA ZORJAĆERI TUT

5. Sose šaj te ovel amen poverenje upro Jehova ked isi amen problemija? (Filipljanima 4:13)

⁵ Amen šaj te istrajina ko bilo savo problemi, bilo baro ja tikno, ako na bistraja so o Jehova tano đivdo Devel hem soj tano uvek othe te pomožini amen. Nijekh problemi nane pobaro ando Jehova. Ov tano Svemoćno hem šaj te del amen snaga te istrajina. (Čitin Filipljanima 4:13.) Odolese, šaj te ovel amen poverenje so ka pomožini amen ked isi amen pharipa. Ako o Jehova pomožini amen ked isi amen tikne problemija, šaj samo te zamislina kobor ka pomožini amen ked ka oven amen bare problemija.

6. Kola iskustvija zorjaćerđe e Davideso pouzdanje upro Jehova?

⁶ Te razmotrina duj iskustvija ando Davideso životi kola zorjaćerđe oleso pouzdanje upro Jehova. Ked hine terno, jekhvar alo o medved, a aver puti o lav hem lelje e bakre ando olese dadeso stado. Ko solduj situacije, o David hrabro borinđa pe akale životinjencar hem ađahar spasinđa e bakren. Ama, o David niked na mislinđa so odova ćerđa pe snagaja. Ov đanđa so o Jehova pomožinđa lese (1. Sam. 17:34-37). O David niked na bisterđa akala iskustvija. Ked god razmislinđa olendar, odova zorjaćerđa oleso poverenje so o đivdo Devel ka zorjaćeri le hem ki budućnost.

7. Sostar o David razmislinđa hem sar odova pomožinđa lese?

⁷ Đi o David pana hine terno, alo ko than kaj hine i izraelsko vojska. Ov dikhlja so o vojnikija but darandilje ando jekh Filistejco kova hine but baro hem vićinđa pe Golijat. O Golijat phenđa lenđe: „Ko ando izraelska ratnikija šaj te ikljol avdije hem te borini pe mancar?“ (1. Sam. 17:10, 11). O vojnikija darandilje sose razmislinđe samo odolestar kobor tano o Golijat baro hem so phenđa lenđe (1. Sam. 17:24, 25). Ama, o David na razmislinđa odolestar. Ov đanđa so ked o Golijat marđa muj e izraelsko vojskaće, ov u stvari marđa muj e „đivde Devlese“ (1. Sam. 17:26). O David razmislinđa kobor tano baro o Jehova. Ov hine le poverenje so o Devel kova pomožinđa lese ked hine pastiri hem akana ka pomožini lese. Uzi Jehovasi pomoć, uspinđa te borini pe protiv o Golijat hem pobedinđa le (1. Sam. 17:45-51).

8. So šaj te zorjaćeri amaro poverenje so o Jehova ka pomožini amen ked isi amen pharipa? (Dikh i slika.)

⁸ Ked isi amen kušnje, hem amen šaj te istrajina ako na bistraja so o đivdo Devel tano spremno te pomožini amen (Ps. 118:6). Amen šaj te zorjaćera amaro poverenje upro Jehova ako razmislinaja so ov ćerđa ko purano vreme. Čitin ki Biblija sar o Jehova spasinđa pe slugen (Is. 37:17, 33-37). Isto ađahar, ko amaro sajt dikh sar o Jehova pomožinđa amare phralenđe hem phenjenđe ko avdisutno vreme. Uzo odova, razmislin sar o Jehova lično tuće pomožinđa. Šaj na ćerđa tuće disave  bare buća, sar soj tano te spasini tut ando medved ja ando lav. Ama, ma bistri so o Jehova već but putija pomožinđa tuće ko to životi. Vićinđa tut te ove oleso amal (Jov. 6:44). Čak hem avdije, samo sebepi so o Jehova pomožini tuće, tu pana hijan ko ćaćipe. Odolese, molin tut e Jehovase te setine tut sar odgovorinđa ko te molitve, sar pomožinđa tut baš tegani ked valjanđa tuće hem sar dinđa tut snaga te istrajine ko disavo pharipe. Ked razmislinaja kotar asavke iskustvija, odova šaj te zorjaćeri amaro poverenje so o Jehova ka pomožini amen hem ponodri.

9. So na valjani te bistra ked isi amen kušnje? (Poslovice 27:11)

⁹ Ked isi amen kušnje, na valjani te bistra i najvažno buti. O Beng phenela so ked isi amen pharipa, amen ka irina amaro dumo e Jehovase. Odolese, odova so ćeraja ked isi amen kušnje but utičini upro Jehova. (Jov 1:10, 11; čitin Poslovice 27:11.) Ked aćhovaja verna, amen mothovaja mangipe e Jehovase hem mothovaja so o Beng hovavi. Šaj othe kuri živineja o vlastija protivinena pe e Jehovase narodose, šaj isi tut finansijska problemija, šaj o manuša đi propovedineja nane zainteresovana asi šukar vest ja isi tut disavo aver problemi. Ako tano ađahar, tegani ma bistri so ti situacija dela tut prilika te radujine e Jehovaso vilo. Isto ađahar, ma bistri so o Jehova niked na ka mukhel te ove iskušimo pobuter nego so šaj te izdržine (1. Kor. 10:13). Ov ka del tut snaga te istrajine.

O ĐIVDO DEVEL KA BLAGOSLOVINI TUT

10. So ka ćerel o đivdo Devel okolenđe kola služinena lese?

¹⁰ O Jehova uvek blagoslovini okolen kola služinena lese (Jevr. 11:6). Ov šaj te pomožini amen te ovel amen mir hem te ova zadovoljna akana, a ki budućnost ka del amen večno životi. Amen šaj te verujina so o Jehova šaj te blagoslovini amen sose isi le moć hem želja te ćerel odova. Odova šaj te podstaknini amen te da  le amaro najšukar ki služba sar so ćerđe olese sluge ko purano vreme. Odova ćerđa hem o Timotej ko prvo veko (Jevr. 6:10-12).

11. Sose o Timotej dinđa sa pestar te pomožini e phralenđe ki skupština? (1. Timoteju 4:10)

¹¹ Čitin 1. Timoteju 4:10. O Timotej hine le bari vera ko odova so o Jehova ka blagoslovini le. Odolese dinđa sa pestar te služini e Jehovase hem e phralenđe. Sar ćerđa odova? O apostol Pavle ohrabrinđa le te ovel šukar učitelj ki služba hem ki skupština. Ov pana phenđa lese te mothovi šukar primer e phralenđe, bilo te oven phure ja terne. Isto ađahar, valjanđa te ćerel disave phare zadatkija. Jekh olendar hine te del ozbiljno savet, ama ko jekh šukar način, okolenđe kase valjanđa odova (1. Tim. 4:11-16; 2. Tim. 4:1-5). Podijekh puti, avera na dikhlje ja na ceninđe odova so o Timotej ćerđa, ama ov hine sigurno so o Jehova ka blagoslovini le (Rimlj. 2:6, 7).

12. Sose o starešine dena sa pestar te služinen ki skupština? (Dikh i slika.)

¹² Avdije, hem o starešine šaj te oven uverime so o Jehova dikhela hem cenini i buti koja ćerena. Uzo odova soj tane pastirija, so poučinena hem propovedinena, but olendar služinena ki gradnja ja pomožinena ked ovela dijekh prirodno katastrofa. Avera služinena ko Odobor aso odnosija e bolnicencar ja tane ki grupa koja posetini e phralen hem e phenjen kola tane ki bolnica. O starešine đanena so i skupština pripadini e Jehovase, a na disave manušese. Odolese, on dena sa pestar te ćeren pe zaduženja ki skupština hem uverime tane so o Jehova ka blagoslovini len sebepi i buti koja ćerena (Kol. 3:23, 24).

13. Sar o Jehova dikhela ko odova so amen daja olese?

¹³ Našti sare te služina sar starešine. Ama, svako amendar isi le diso so šaj te del e Jehovase. O Jehova tano but  radosno ked dikhela so daja sa amendar te služina lese. Ov cenini o prilogija kola daja bizo obzir kobor tane on skromna. But tano ponosno upro amende ked spremno oprostinaja nekase ko povredinđa amen hem dikhela kobor trudinaja amen te vazda amaro vas te da komentari, iako lađaja. Čak ako mislineja so odova so ćereja nane dovoljno, ov uverimo so o Jehova but cenini odova so šaj te ćere. Ov but mangela tut hem ka blagoslovini tut (Luka 21:1-4).

AĆHOV PAŠE UZO ĐIVDO DEVEL

14. Sar odova so hijam paše e Jehovaja pomožini amen te aćhova lese verna? (Dikh i slika.)

¹⁴ Ako hijam paše e Jehovaja, tegani ka ovel amenđe polokho te aćhova lese verna. O Josif mothovđa šukar primer ko odova. Ov odlučno cidinđa pe ando odova te ćerel nemoral. Đanđa so o Jehova dikhela le hem na manglja te razočarini le (Post. 39:9). Te šaj te ova popaše e Jehovaja, valjani te odvojina vreme te molina amen hem te proučina oleso Lafi. Tegani, amaro amalipe oleja ka ovel pana pozoralo. Ked sar o Josif hijam paše e Jehovaja, na ka manga te ćera diso so ka razočarini le (Jak. 4:8).

15. So šaj te sikljova ando odova so ulo e Izraelcenđe ki pustinja? (Jevrejima 3:12)

¹⁵ Okola kola našalđe po poverenje upro Jehova šaj but lokho te ciden pe olestar. Razmotrin so desinđa pe ked o Izraelcija hine ki pustinja. On hine svesna so o Jehova postojini. Ama, sar nakhlja o vreme, počminđe te sumnjinen da li o Jehova ka brinini pe ando olenge potrebe. Čak pućlje pe: „Da li tano o Jehova maškaro amende ja nane?“ (Izl. 17:2, 7). Odolese, buninđe pe protiv o Devel. Amen sigurno na mangaja te ova neposlušna e Jehovase sar olende. (Čitin Jevrejima 3:12.)

16. So šaj te ovel ispit asi amari vera?

¹⁶ Sebepi akava sveto, amenđe šaj te ovel pharo te aćhova paše e Jehovaja. But manuša phenena so o Devel na postojini. But putija dićhola so okola kola na šunena  e Devle isi len šukar životi. Sebepi odova, amari vera šaj te ovel ko ispit. Iako na ka sumnjina so o Devel postojini, amen šaj te počmina te puća amen da li ov ćaće ka pomožini amen. O pisco ando 73. psalam jekh vreme ađahar razmislinđa. Ov dikhlja so o manuša kola na služinđe e Jehovase izgledinđe samći uživinena ko životi. Odolese, počminđa te pućel pe da li vredini te služini e Devlese (Ps. 73:11-13).

17. So šaj te pomožini amen te aćhova paše e Jehovaja?

¹⁷ So pomožinđa lese te ispravini po mišljenje? Ov razmislinđa so ka ovel okolencar kola našalđe po poverenje upro Jehova (Ps. 73:18, 19, 27). Isto ađahar, razmislinđa kobor tano šukar ked služinaja e Jehovase (Ps. 73:24). Amen isto šaj te razmislina ando blagoslovija kola o Jehova dela amen. Zamislin samo kobor averćhane bi ovela amaro životi ked ne bi penđaraja e Jehova. Ako uvek ićeraja ki godi sose tano šukar te služina e Jehovase, odova ka pomožini amen te aćhova lese verna. Tegani hem amen sar o psalmista ka phena: „A maje tano šukar te ovav paše uzo mo Devel“ (Ps. 73:28).

18. Sose na valjani te dara ando odova so ka ovel ki budućnost?

¹⁸ Odolese so služinaja e đivde Devlese, amen šaj te borina amen savi god kušnja te ovel amen (1. Sol. 1:9). O Jehova tano Devel kova uvek brinini pe amendar hem jedva ađićeri te pomožini amen. Ko purano vreme, ov mothovđa so hine pe slugencar. Avdije hem ponodri mothovi soj tano pe slugencar. Pana hari, ki phuv ka ovel i bari nevolja. Ama, amen na ka ova kokri, o Jehova ka ovel amencar (Is. 41:10). Odolese, šaj hrabro te phena: „O Jehova tano mo pomoćniko na ka darav“ (Jevr. 13:5, 6).