1. So ajutil le manușen le Iehovasche te na mechen-pe, chiar cana nachen prin pharimata?

 I BIBLIA phenel că traisaras ande ‘timpuri phare, cai phares cărdiol lenghe fața’. (2 Tim. 3:1) Pașa le pharimata prin save nachen sea le jene, amen sar manușa le Iehovasche, nachas vi prin persecuții hai le manușa așen amenghe contra. So ajutil amen te na mechas amen? Sam zuriarde anda codoia că prinjianas le Iehovas hai jianas că vo si „o Del jiuvindo”. (Ier. 10:10; 2 Tim. 1:12)

2. So ciacimos anda o Iehova daștil te zuriarel amen?

² O Iehova si iech Jeno ciacio cai jianel sea le pharimata prin save nachas hai camel te ajutil amen. (2 Cron. 16:9; Ps. 23:4) Cana dichas le Iehovas sar iech Del jiuvindo, daisaras te așias zurale angla orisavo pharimos. Te dichas sar sas ciaces cadaia anda o rege David.

3. So camlea te sicavel o David cana phendea că „o Iehova si jiuvindo”?

³ O David prinjianelas le Iehovas hai pachialas-pe ande leste. Cana o rege Saul hai aver manușa phirenas pala leste caște mudaren-les, o David manglea-pe le Iehovasche caște ajutil-les. (Ps. 18:6) Pala so o Del așundea lesco manglimos hai salvisardea-les, o David phendea: „O Iehova si jiuvindo!”. (Ps. 18:46) Prin cadal dumes, o David hachiardea na numai că si iech Del andel ceruri. Ande iech lil phenel-pe că o David sicadea pesco pachiamos că o Iehova si „iech Del jiuvindo, cai rodel sea o timpo o miștimos pesche manușengo”. O David dichlea pe peschi morci că o Iehova, lesco Del, si jiuvindo, hai cadaia zuriardea-les te slujil anda sea o ilo le Iehovasche hai te așarel-les. (Ps. 18:28, 29, 49)

4. So miștimata si amen cana hachiaras că o Iehova si o Del jiuvindo?

 ⁴ Dacă pachias ciaces că o Iehova si o Del jiuvindo, va avela te slujisaras lesche anda sea o ilo. Cadaia va ajutil amen te așias zurale cana nachas prin pharimata hai te das sea amari zor andi buchi le Iehovaschi. Sa cadea, va ajutil amen te avel amen iech amalimos chidino le Iehovasa.

O DEL JIUVINDO VA DELA TUT ZURALIMOS

5. So va ajutila amen te avas pherde pachiamos cana nachas prin pharimata? (Filipeni 4:13)

⁵ Daisaras te nachas prin orisavo pharimos, baro sau țâno, dacă anas amenghe andi goghi că o Iehova si jiuvindo hai silo pașa amende. Ji la urmă, niciech pharimos na-i mai baro sar lesco zuralimos. Vo si O Mai Zuralo hai daștil te del vi amen o zuralimos cai si amen nevoia caște na mechas amen. (Citisar Filipeni 4:13.) Cadea că, na-i amen sostar te daras cana nachas prin pharimata. Dacă dichas o vast le Iehovasco cana nachas prin pharimata mai țâne, va avela te pachias anda sea o ilo că vo va avela pașa amende vi cana nachas prin pharimata mai bare.

6. So buchia prin save nachlea o David cana sas-lo tărno, zuriarde lesco pachiamos ando Iehova?

⁶ Te dichas dui situații prin save nachlea o David, cai zuriarde lesco pachiamos ando Iehova. Cana sas-lo iech tărno păstorii iech riș hai iech leo avile hai line po iech bacrii andai turma lesche dadeschi. Ande le dui situații, o David gălea hai salvisardea pherdo tromai le bacrean. Tha, vo jianglea că ci daisardea te cherel cadaia prin pesco zuralimos, hai numai anda codoia că o Iehova sas-lo pașa leste. (1 Sam. 17:34-37) O David ci bâstărdea niciechdata sar dichlea o vast le Iehovasco ande peschi viața. Cadaia ajutisardea-les te pachial anda sea o ilo că o Iehova, o Del jiuvindo, va zuriarela-les hai va avela pașa leste vi cana va nachela prin aver pharimata.

7. Ca so încărdea o David peschi goghi hai sar ajutisardea-les cadaia te marel-pe le Goliatosa?

⁷ Mai târzio, daștil-pe că cana sas-lo încă iech tărno șiavo, o David gălea andi tabăra cai arachelas-pe i armata israelito. Vo dichlea că le soldați sas-le astarde daratar anda codoia că code sas iech filisteano zurales ucio. Cado ‘asalas catar i armata le Israeloschi’ hai acharelas-la co marimos. (1 Sam. 17:10, 11) Le soldați sas-le zurales darade, anda codoia că încărenas penghi goghi ca chichi de baro sas codo manuș hai ca so phenelas lenghe. (1 Sam. 17:24, 25) Tha, o David ci dichelas le buchia cadea. Vo hachiardea că cana asalas catar i armata le Israeloschi, o ciacimos sas că, o Goliat asalas catar „i armata le Devleschi cai silo jiuvindo”. (1 Sam. 17:26) Vo încărelas peschi goghi ca o Iehova. O David pachialas că o Del cai ajutisardea-les cana sas-lo păstorii, va ajutila-les vi ande cado pharimos. Le Devlesa pașa leste, o David mardea-pe le Goliatosa hai câștighisardea. (1 Sam. 17:45-51)

8. Sar daisaras te încăras le Iehovas ande amari goghi cana nachas prin pharimata? (Dich vi i imaginea.)

⁸ Cana nachas prin pharimata te na bâstras că o Del jiuvindo silo gata te ajutil vi amen. (Ps. 118:6) Daisaras te zuriaras amaro pachiamos ande leste cana gândisaras amen ca so cărdea vo andel purane ghiesa. Daștis te citis relatări andai Biblia cai sicaven so cărdea o Iehova caște salvil pesche manușen. (Is. 37:17, 33-37) Sa cadea, dich le experiențea pa jw.org cai ajutin tut te hachiares sar silo o Iehova pașa amare phrala hai pheia aghies. Mai but, an ande chi goghi sar sas-lo o Iehova vi pașa tute. Daștil-pe că pachias că o Iehova ci cărdea iech buchi cadea de bari anda tute, sar avelas te scăpil tut catar iech riș sau iech leo. Tha, o ciacimos si că, vi tu dichlean butivar o  vast le Iehovasco ande chi viața. Na bâstăr că o Iehova si codo cai țârdea tut peste caște aves lesco amal. (Ioan 6:44) Vi acana, numai lesche ajutorosa san încă ando ciacimos. Cadea că, mang le Iehovas te ajutil tut te anes ande chi goghi le ocazii cai dea tut răspunso ca che manglimata, ajutisardea tut cana nachlean prin iech pharimos sau dea tut so sas tut nevoia ando mai lașio momento. Cana gândis tut cadale buchiande zuriares chio pachiamos că o Iehova va avela vi mai dur pașa tute.

9. Sar trebulas te dichas amare pharimata? (Proverbe 27:11)

⁹ Dacă dichas le Iehovas sar iech Del jiuvindo, va avela te dichas avere iachența le pharimata prin save nachas. Sar? Trebul te încăras amari goghi ca iech buchi mai importanto. O Satan camel te sicavel că cana nachas prin pharimata va avela te mechas le Iehovas. (Iov 1:10, 11; citisar Proverbe 27:11.) Tha, cana așas zurale ando pachiamos andel pharimata, sicavas amari iubirea caring o Iehova hai că o Satan silo iech hohamno. Si tut chiar acana pharimata le lovența, o guverno anda o them cai beșes așel contra i buchi le Iehovaschi, le manușa ci camen te așunen tut andi predicarea sau naches prin aver pharimata? Dacă da, na bâstăr că cadal situații den tut i ocazia te bucuris o ilo le Iehovasco. Sa cadea, încăr ande chi goghi că vo ci va mechela niciechdata ca iech pharimos prin savo naches te avel mai baro sar chio zuralimos. (1 Cor. 10:13) Vo va dela tut o zuralimos caște naches părdal le pharimata.

O DEL JIUVINDO VA POCHINELA TUT

10. So va cherela o Del jiuvindo anda codola cai slujin lesche?

¹⁰ O Iehova si o Pochinitorii codolengo cai slujin lesche. (Evr. 11:6) Aghies, vo del amen pacea ando ilo, cherel amen te avas mulțumime sosa si amen hai ando viitorii va dela amen viața veșnico. Pachias ciaces că o Del va pochinela amen anda codoia că camel hai siles o zuralimos te cherel cadaia. Cado pachiamos zuriarel amen te cheras mai but ande leschi buchi, cadea sar lesche manușa andal purane ghiesa. Iech anda cadala sas o Timotei, iech creștino anda o iechto secolo. (Evr. 6:10-12)

11. Sostar cărdea phares buchi o Timotei anda i congregația? (1 Timotei 4:10)

 ¹¹ Citisar 1 Timotei 4:10. Le Timoteios sas-les iech pachiamos zuralo că o Del jiuvindo avelas te pochinel-les. Cado pachiamos zuriardea-les te cherel buchi phares anda o Iehova hai anda le coaver. Sar exemplo, o Pavel zuriardea-les te arăsăl iech lașio sicaitorii hai te del duma șucar angla le manușa. Sa cadea, vo trebulas te avel iech lașio phral pala savo daștinas te len-pe vi codola tărne, hai vi codola phure. Mai but, sas-les but buchia phare te cherel, sar avelas te del sfaturi zurale tha pherde iubirea. (1 Tim. 4:11-16; 2 Tim. 4:1-5) Daștil-pe că poiechdata, le coaver ci dichenas leschi buchi sau ci sicavenas pachiv caring late. Tha, vo jianelas ciaces că o Iehova avelas te pochinel-les. (Rom. 2:6, 7)

12. Sostar cheren phares buchi le phure anda i congregația? (Dich vi i imaginea.)

¹² Vi aghies le phure de congregație daștin te pachian anda sea o ilo că o Iehova dichel lenghi phari buchi hai sea so cheren si cuci anda leste. Von cheren mai but sar te păstorin i congregația, te sicaven averen hai te jian andi predicarea. Le phure cheren buchi vi ca le proiectea ande save vazden-pe sau lașiaren-pe thana anda i închinarea hai den pengo ajutorii cana si iech dezastro naturalo. Aver cheren partea andal grupuri cai jian te dichen le phralen nasfale sau andal comitetea cai ajutin amen cana jias co spitalo. Le phure cheren cadal buchia anda codoia că dichen i congregația sar le Iehovaschi, na sar ieche manușeschi. Cadea că, von cheren phares buchi anda i congregația hai pachian anda sea o ilo că o Iehova va avela te pochinen-len parpale anda sea so cheren. (Col. 3:23, 24)

13. So si ando ilo le Iehovasco cana dichel sea le buchia cai cheras-len anda leste?

¹³ Ci daisaras te avas savore phure de congregație. Tha daisaras te das le Iehovas so si amen mai lașio. O Iehova dichel cuci sea le buchia cai cheras-len anda leste. Vo dichel cuci sea le love cai das-len anda leschi buchi  cai cherel-pe pe sea i phuv, orichichi de but sau țâra das. O ilo le Iehovasco silo voime cana dichel că chiar cana sam lajiavune, vazdas amaro vast ca i întrunirea caște das răspunsuri. Sa cadea, vo dichel amen lașe iachența cana iertisaras le coaveren anda sea o ilo cana duchaven amen. Chiar cana, poiechdata fal tut că ci daștis te cheres cadea de but anda o Iehova sar cames, pachia ciaces că o Iehova dichel cuci sea so cheres anda leste. Vo iubil tut hai va pochinela tut. (Luca 21:1-4)

AȘ PAȘA O DEL JIUVINDO

14. Sar ajutil amen iech amalimos chidino le Iehovasa te așas lesche loialo? (Dich vi i imaginea.)

¹⁴ Dacă si amen iech amalimos chidino le Iehovasa va avela amenghe mai ușoro te așas lesche loialo. Cadai buchi sas ciaci vi anda o Iosif. Vo nașlea catar i imoralitatea anda codoia că sas-les iech amalimos chidino le Iehovasa hai ci camelas te duchavel-les. (Gen. 39:9) Dacă camas vi amen te avel amen iech amalimos chidino le Iehovasa trebul te cheras amenghe timpo te mangas amen lesche hai te sichioas andai Biblia. Cadaia va ajutila amen te așas pașa leste. Cadea sar o Iosif, dacă vi amen si amen iech amalimos chidino le Iehovasa, ci va avela te cheras chanci cai daștil te duchavel-les. (Iac. 4:8)

15. So sichioas anda o exemplo nasul le israelițengo? (Evrei 3:12)

¹⁵ Codola cai bâstren că o Iehova si o Del jiuvindo daștinas te duriaren-pe sigo lestar. Te dichas so întâmplosardea-pe le israelițența ando timpo so sas-le ando șuco than. Chiar cana von jianenas că o Iehova si iech Del ciacio, astarde te daran anda codoia că ci jianenas dacă o Iehova avelas te lel sama lendar. Von chiar pușle-pe: „Si o Iehova mașcar amende sau nici?”. (Ex. 17:2, 7) Pala codoia, von vazdine-pe contra o Del. Le israeliți sile iech exemplo nasul anda amende. Anda codoia, amen ci camas te las amen niciechdata pala lende. (Citisar Evrei 3:12.)

16. Sostar daștilas te avel amenghe pharo te încăras amaro pachiamos zuralo?

¹⁶ Ande cadai lumea na-i amenghe ușoro te  așas pașa o Iehova. But manușa ci pachian ando Del hai butivar fal-pe că jial mișto codolenghe cai ci încăren le Devlesche legi. Cana dichas cadal buchia, amaro pachiamos daștil-pe te na mai avel cadea de zuralo. Chiar cana amen jianas ciaces că si iech Del opre ando cerii daștil-pe că astaras te daras hai te pușias amen dacă Vo va ajutil amen. Prin cadaia nachlea vi o manuș cai scriisardea o Psalmo 73. Vo sas-lo holiardo cana dichelas că codolenghe cai uștarenas le legi le Devlesche jialas lenghe mișto hai bucurinas-pe catar iech traio lașio. Anda codoia, vo astardea te pușel-pe dacă meritilas te slujil le Devlesche. (Ps. 73:11-13)

17. So va ajutila amen te așas pașa o Iehova?

¹⁷ Sar ajutisardea ji la urmă, le manușes cai scriisardea o Psalmo te dichel le buchia avere iachența? Vo gândisardea-pe so avelas te întâmplol-pe codolența cai bâstărde le Iehovas. (Ps. 73:18, 19, 27) Sa cadea, vo gândisardea-pe ca so miștimata si le Devlesche amalen. (Ps. 73:24) Vi aghies si importanto te dichas le miștimata cai del-len amenghe o Iehova. Te gândisaras amen sar avelas amari viața dacă ci prinjiandeamas le Iehovas. Cadaia, va ajutila amen te așas zurale ando pachiamos hai te phenas sar o psalmisto: „Tha me pachiav, că si ande mânro miștimos te pașioav le Devlestar”. (Ps. 73:28)

18. Sostar ci trebul te daras le buchiandar cai va avena?

¹⁸ Anda codoia că slujisaras „sar sclavi ieche Devlesche jiuvindo hai ciacio”, va avela te nachas părdal orisavo pharimos. (1 Tes. 1:9) Amaro Del si ciacio hai lel sama pesche manușendar. Vo si sea o timpo pașa amende cadea sar sas-lo vi pașa pesche manușa andal purane ghiesa. Vi andel ghiesa cai aven, cana va astarela iech baro necazo sar ci mai sas niciechdata, o Iehova va avela pașa amende hai ci va mechela amen corcore. (Is. 41:10) Cadea că, daisaras „te avas pherde tromai hai te phenas: «O Iehova si mânro ajutorii; ci va avela te darav»”. (Evr. 13:5, 6)