СТАТЬЯ ВАЖ И ИЗУЧЕНИЯ 25
ДИЛИ 7 Иегова, зор амаро
Сэр, кай о Иегова — «жундо Дэл»
«О Иегова — жундо Дэл!» (ПС. 18:46).
АМЭ УӶАНАСА
Васо важно тэ сэрас, кай о Дэл, савэсти амэ служысарас, — «жундо Дэл».
1. Со поможыя амэнди тэ служысарас лэ Иеговасти, кала исин ԥаримос?
«ФАРТЭ ԥари время». Кадя андэ Библия пистромэ пала амарэ деса (2 Тим. 3:1). Кай лэ Дэвлэско народо исин кацаво жэ ԥаримос, сар и всаворэ́ манушэндэ андэ кадэя люма. Ай инке пар мэндэ тасавэн и ӷонин. Со поможыя амэнди и май дур тэ служысарас лэ Дэвлэсти, дажэ кала найвушэро? Кода, кай амэ полям па пэстири жызня, кай о Иегова — «жундо Дэл» (Иер. 10:10; 2 Тим. 1:12).
2. Со сыкавэн и алава, кай о Иегова — жундо Дэл?
2 Амэ точно ӷанас, кай о Иегова исин. Во ӷанэн пала амарэ трудности и вся и время подритярэл амэн (2 Лет. 16:9; Пс. 23:4). Если амэ сэрас, кай о Иегова — жундо Дэл, када поможыя амэнди тэ виритярас любо ԥаримос. Давайте уӷанаса, сар када дицол па лэ Давидостири жызня.
3. Пала со дэлас дума о Давидо, кала ԥэндя «о Иегова — жундо Дэл»?
3 О Давидо ӷанэнас лэ Иеговас и надеияспэ пэр лэстэ. Кала во гарадёлас лэ Саулостар и аврэ вороӷонэндар, во родэлас помощь кай о Иегова (Пс. 18:6). Посли кода сар о Дэл спасысардя лэс, о Давидо анда вся оди ԥэндя: «О Иегова — жундо Дэл!» (Пс. 18:46). Кадя о Давидо най кати прижангля, кай о Дэл исин. Сар пистромэ андэ ек справочнико, о Давидо сыкадя о патяимос андэ кода, кай о Иегова — «жундо Дэл, и вся со во терэл, анэн лашымос лэстирэ народости». Чаче, о Давидо па пэстири жызня драго поля, кай о Иегова — жундо Дэл. Во анда вся оди камэлас и май дур тэ терэл лэ Иеговастири дила и тэ хвалий лэс (Пс. 18:28, 29, 49).
4. Саво лашымос амэнди анэна, если амэ полас, кай о Иегова — жундо Дэл?
4 Если амэ патяс, кай о Иегова — жундо Дэл, када поможыя амэнди анда вся оди тэ терас лэстири дила. Када побудия амэн и май дур тэ трудисавас важ лэстэ, и амэндэ авэла зор тэ виритярас о ԥаримос. Кадяжэ амэ на домэкаса, кай варисо тэ дурярэл амэн лэ Иеговастар.
О ЖУНДО ДЭЛ ПОДРИТЯРЭЛА ТУТ
5. Васо амэ можэм тэ патяс, кай виритяраса любо ԥаримос? (Филипы 4:13).
5 Амэндэ вижала тэ виритярас любо ԥаримос, если амэ ласа тэ сэрас, кай служысарас лэ жундэ Дэвлэсти, саво вся и время ӷотово амэнди тэ поможый. Нинай кацаво ԥаримос, саво авелоп най па лэ Иеговаско зор. Во зорало Дэл, и поможыя амэнди вся тэ виритярас. (Проадинон Филипы 4:13.) Важ када амэндэ на трэбуй тэ авэл дар англа ԥаримос. Кала амэ диқас, кай о Иегова подритярэл амэн дажэ андэ варисо найбаро, амэ лас инке май фартэ тэ патяс, кай во на ашавэла амэн и тоди, кала авэла фартэ ԥарэс.
6. Со сас андэ лэ Давидостири жызня, кай во ля инке май фартэ тэ патял лэ Иеговасти?
6 Погиндосарам пала кода, со сас андэ лэ Давидостири жызня. Акэ сар во инке май фартэ ля тэ патял лэ Иеговасти. Кала во сас тэрноро, во пасыяс пэстирэ дадэско стадо. Еқвар авеля о лево и ундярдя лэ бакрорэс, ай пэ авэр разо по стадо дя о медведё. О Давидо смило прастая пала лэндэ и спасысардя лэ бакрорэн. Но во на абурояс, кай вся стердя екжэно. Во прижанэнас, кай када о Иегова дя лэсти зор (1 Сам. 17:34—37). О Давидо никала на бистрэлас, сар о Иегова лэсти поможысардя. Кала во гиндояс пала када, во ля инке май фартэ тэ патял, кай о жундо Дэл подритярэла лэс и май англэ.
7. Пала со гиндояс о Давидо и сар када поможысардя лэсти тэ жал против о Голиафо?
7 Ӷэт май интя о Давидо авеля каринг пэстирэ ԥрала андо тэрмино кай и израильски халавдэ. Андэ кодэя время лэсти на сас дажэ 20 лет. Во додиқля, кай и халавдэ тинонаспэ даратар англа Голиафо. Во сас фартэ вучё филистимско халавдо, саво вижалас, кай тэ приасалпэ лэ израильтянонэндар (1 Сам. 17:10, 11). Вонэ даранас, важ кода кай лэндирэ гиндоря сас кати пала кадэва фартэ вучё мануш и лэстирэ найлашэ алава (1 Сам. 17:24, 25). Ай о Давидо гиндояс пала авэр. Во полэлас, кай о Голиафо приасалпэ най лэ израильтянонэндар, ай лэ жундэ Дэвлэстирэ манушэндар (1 Сам. 17:26). О Давидо гиндояс пала Иегова. Во сэрэлас, сар о Дэл поможыяс лэсти, кала во сас пастухо, и патялас, кай о Иегова на ашавэла лэс и акана. О Давидо сас уверено, кай о Иегова лэса, кочай во вижыля тэ марэлпэ лэ Голиафоса и, сар амэ ӷанас, победисардя лэс! (1 Сам. 17:45—51).
8. Со тэ терэс, кай инке май фартэ тэ патяс, кай андо любо ԥаримос о Иегова авэла паша тутэ? (Диқэн кадяжэ и картинка.)
8 Амэндэ тожэ вижала тэ виритярас о ԥаримос, если амэ ласа тэ сэрас, кай о жундо Дэл всегда ӷотово тэ поможый (Пс. 118:6). Со тэ терас, кай инке май фартэ тэ патяс андэ када? Адиносар андэ Библия пала кода, сар о Иегова спасыяс пэстирэ манушэн андэ дэлмутни время (Ис. 37:17, 33—37). Кадяжэ по амаро сайто jw.org ту можэш тэ проадинос пала мануша, савэн о Иегова подритярэлас андэ амари время. Ай инке вспоминай, сар о Иегова дэлас помощь лично тути андо ԥаримос. Ту можэш тэ гиндос: «Манди на прижаласпэ тэ борисавав лэ левонэнца и лэ медведёнэнца». Но дила най андэ када. Само ӷлавно, кай о Иегова вся кадэя время сас туса, кажно дес! Во закамля, кай ту тэ авэс лэско друӷо (Иоан. 6:44). И акана во подритярэл тут, кай ту тэ на парашэс тэ служыс лэсти. Манг лэ Иеговас тэ поможый тути тэ вспомниш, сар во отвечал пэ тирэ молитвы, дэлас тути зор, кала када сас трэбуй, и сас паша тутэ, сар бы ԥарэс тэ на авэл. Если ту лэса тэ гиндос пала када, ту инке май фартэ лэса тэ патяс, кай о Иегова никала тут на ашавэла.
Кала амэ на ашавас лэ Иеговас андо ԥаримос, амэ доԥэнас, кай о Сатана — хохавно. (Диқэн и абзацоря 8, 9.)
9. Пала со трэбуй тэ сэрас, кала амэндэ исин ԥаримос? (Притчи 27:11).
9 Если амэ сэрас, кай о Иегова — жундо Дэл, када поможыя амэнди правильно тэ диқас по ԥаримос. О Сатана ԥэнэн, кай если амэ попэраса андэ бида, амэ одбандюваса амарэ Дэвлэстар. Важ када лэ Иеговасти най всаек, сар амэ пэс андярас андэ найвушэро ситуацыя (Иов 1:10, 11; проадинон Притчи 27:11). Если амэ на парашас тэ кандас лэ Иеговас, амэ сыкавас, кай любисарас лэс, и доԥэнас, кай о Сатана — хохавно. Можэт, и тути акана найвушэро? Например, через кода, кай ӷонин важ и вера, ԥарэс лэ ловэнца, и мануша на ашунэн, кала росԥэнэс пала Дэл, или через варисо авэр. Со бы тэ на авэл, гиндосар пала кода, со по ди кай о Иегова. Сэр: ту можэш тэ радуис лэско ди. Кала ашэспэ састо андэ ԥари время, на бистэр: ту можэш тэ виритярэс любо ԥаримос, важ кода кай о Иегова дэла тути зор (1 Кр. 10:13).
О ЖУНДО ДЭЛ БЛАӶОСЛОВИЯ ТУТ
10. Сар о жундо Дэл блаӷословия кодэлэн, ко терэл лэстири дила?
10 О Иегова всегда блаӷословий кодэлэн, ко терэл лэстири дила (Евр. 11:6). Ужэ акана во дэл амэнди спокойство андо ди и поможый тэ авас бахталэ, ай англэ во подария амэнди вечно жызня. Амэ патяс, кай о Дэл зритярэла всаворэ пэстирэ алава, важ кода кай лэстэ исин зор и во камэл када тэ стерэл. Кала амэ гиндосарас пала када, амэ инке май фартэ камас тэ терас лэ Дэвлэстири дила анда вся оди и тэ пристас пэ када вся о зор. Кадя терэнас лэ Дэвлэстирэ мануша андэ дэлмутни время, например, о Тимафеё (Евр. 6:10—12).
11. Васо о Тимафеё анда вся оди терэлас дила андэ собрания? (1 Тимафеё 4:10).
11 Проадинон 1 Тимафеё 4:10. О Тимафеё надеияспэ по жундо Дэл и важ када анда вся оди терэлас дила андэ собрания. Со во терэлас? Сар и ԥэндя лэсти о Павло, во пристолас вся пэско зор, кай тэ ашэл лашо учителё и тэ сытярэл аврэн. Кадяжэ о Тимафеё сыкавэлас лашо примеро лэ ԥралэнди и лэ ԥэянди, лэ тэрнэнди и лэ взрослонэнди. Дэкала лэсти дэнас найвушэро дила. Например, кала када сас трэбуй, о Тимафеё дэлас советоря кодэлэнди, ко змарделя па дром. Во терэлас када ковлэс, но ворта (1 Тим. 4:11—16; 2 Тим. 4:1—5). И мануша дэкала на шонас сама пэ кода, со терэлас о Тимафеё, и най вся и время цэнинас лэстири дила, но во патялас, кай о Иегова лэс точно блаӷословия (Римо 2:6, 7).
12. Васо и барэдэр ԥрала анда вся оди терэн и дила андэ собрания? (Диқэн кадяжэ и картинка.)
12 Кучутнэ барэдэр ԥрала, ӷанэн: о Иегова диқэл и цэний вся, со тумэ терэн. Тумэ най кати заботинпэ пала лэстирэ бакрорэ, сытярэн лэ манушэн и росԥэнэн пала Дэл. Бут андар тумэндэ кадяжэ поможын андэ строительни проекторя или кала андэ люма фартэ ԥари ситуацыя. Варико терэл дила андэ ӷрупы, кай тэ подритярэн лэ насвалэн, или андэ камитеторя па связи лэ больницэнца. И барэдэр ԥрала ӷанэн, кай о хулай пэ собрания о Иегова, ай най и мануша. Важ када вонэ анда вся оди терэн пэстири дила и патян, кай о Иегова блаӷословия лэн (Клс. 3:23, 24).
О жундо Дэл блаӷословия тут важ и дила, сави ту анда вся оди терэс важ и ԥрала и ԥэя. (Диқэн и абзацоря 12, 13.)
13. Цэний о Иегова вся, со тумэ терэн важ лэстэ? Росԥэнэн.
13 Най всаворэ моӷут тэ служын сар барэдэр ԥрала. Но всаворэ моӷут варисо тэ дэн лэ Иеговасти. Во фартэ цэний, кала амэ анда вся оди терас лэстири дила. О Дэл шол сама, кала амэ дас ловэ важ лэ Царствостири дила, дажэ если када фартэ набут. Лэсти чалёл, кала амэ ваздас о вас пэ собрания и дас каминтариё, дажэ если фартэ лажас. Кадяжэ лэско ди лошавэл, кала амэ на грабисавас тэ холявас и простисарас аврэн. Дажэ если тути здэлпэ, кай ту терэс важ о Иегова набут, патя: во цэний вся, со ту терэс. Во любий тут и обязательно блаӷословия (Лука 21:1—4).
НА ДУРЁН ЛЭ ЖУНДЭ ДЭВЛЭСТАР
14. Сар и дружба лэ Иеговаса поможый амэнди тэ кандас лэс андэ вся? (Диқэн кадяжэ и картинка.)
14 Если амэ патяс, кай о Иегова па чачимастэ исин, амэнди авэла май вушэро тэ кандас лэс андэ вся. Кадя терэлас о Иосифо. Во отԥэнделя тэ терэл о билажавардимос. Во гиндояс пала кода, со по ди кай о Иегова, и на камэлас тэ стерэл лэсти дуқанэс (Быт. 39:9). Кай амэ тэ диқас лэ Иеговас андэ пэстири жызня, трэбуй тэ арақас время, кай тэ мангаспэ и май драго тэ уӷанас и Библия. Если и дружба лэ Иеговаса авэла важ амэндэ кадяжэ куч, сар важ о Иосифо, тоди амэ ласа тэ дурювас всаворэстар, со можэт тэ римой ла (Иак. 4:8).
Если ту патяс, кай о Иегова па чачимастэ исин, тути авэла май вушэро тэ кандэс лэс андэ вся. (Диқэн и абзацоря 14, 15.)
15. Сости амэн сытярэл кода, со сас лэ израильтянонэнца андэ пустыня? (Евреёря 3:12).
15 Кодэла, ко бистрэн, кай о Иегова — жундо Дэл, моӷут вушэро тэ дурён лэстар. Погиндосарам, со сас лэ израильтянонэнца андэ пустыня. Вонэ ӷанэнас, кай о Иегова исин, но линэ тэ на допатян, кай во сможэт пала лэндэ тэ позаботийпэ. Вонэ дажэ пушэнас: «О Иегова амэнца или най?» (Исх. 17:2, 7) Вижыля, кай вонэ звазглэпэ против о Дэл. Кода, со сас лэнца, сыкавэл, сар амэнди на трэбуй пэс тэ андярас. Амэ на камас, кай амэндэ тэ авэл кацаво жэ нэдовольно настроё, сар лэндэ! (Проадинон Евреёря 3:12.)
16. Васо можэт тэ авэл найвушэро тэ патяс?
16 Кадэя люма терэл вся, кай тэ дурярэл амэн лэ Иеговастар. Бут мануша дажэ отшон о гиндо, кай о Дэл исин. И часто можэт тэ здэлпэ, кай кодэлэндэ, ко на ритярэл лэ Дэвлэско законо, бахтали жызня. Через вся када амэнди можэт тэ авэл найвушэро тэ патяс. Дажэ если амэ на парашас тэ патяс, кай о Дэл исин, амэ всаек можэм тэ на допатяс, кай во поможыя амэнди. Кодэлэстэ, ко пистросардя о 73 Псалом, сас кацаво жэ по ди. Во диқэлас, кай и мануша, савэ жувэнас паша лэстэ, дажэ на загиндонаспэ пала лэ Дэвлэско законо и всаек раюинас. Тоди во ля тэ гиндой, саво толко и май дур тэ терэл лэ Дэвлэстири дила (Пс. 73:11—13).
17. Со поможыя амэнди тэ на дурювас лэ Иеговастар?
17 Со поможысардя, кай о псалмопевцо тэ парувэл пэско гиндо? Во погиндосардя, со авэла кодэлэнца, ко бистрэл лэ Иеговас (Пс. 73:18, 19, 27). Кадяжэ во гиндояс пала вся о лашымос, саво исин кай лэ Дэвлэстирэ мануша (Пс. 73:24). Амэ тожэ можэм тэ гиндосарас пала кода, сар о Иегова парудя амари жызня андэ лащи риг. Прицтавь, кай бы ту авелоп би лэ Иеговаско. Када поможыя амэнди тэ на парашас тэ кандас лэс и никала тэ на ашавас лэс. Сар о псалмопевцо, амэ можэм тэ ԥэнас: «Важ мандэ тэ пашував каринг о Дэл — када лашымос»! (Пс. 73:28).
18. Васо амэ на дарас кодэлэстар, со авэла англэ?
18 Амэ на ӷанас, саво ԥаримос можэт тэ авэл амэндэ андэ кадэла послидни деса. Но амэ вся виритяраса, важ кода кай полас «лэ жундэ и лэ чачунэ Дэвлэс» (1 Фес. 1:9). Во любий пэстирэ манушэн и всегда поможый лэнди. Кадя сас и андэ дэлмутни время. И адес о Дэл на паруделя. Ӥто авэла само бари бида, сави инке никала на сас андэ люма. Но амэ на ашасапэ екжэнэ — о Иегова авэла амэнца (Ис. 41:10). Важ када амэ можэм анда вся оди тэ ԥэнас: «О Иегова поможый манди, мэ на лава тэ дарав»! (Евр. 13:5, 6).
ДИЛИ 3 Амари надежда, вера и зор
