1. O le ā e fesoasoani i tagata o Ieova e tapuaʻi ai pea iā te ia e ui i faafitauli?

 O LOO faamatalaina i le Tusi Paia, ua tatou ola i “aso e sili ona faigatā.” (2 Timo. 3:1) E ese mai i le tele o luʻi o loo fesagaʻia e tagata uma, ae o loo tauivi foʻi tagata o Ieova ma teteega ma sauāga. O le ā e fesoasoani iā i tatou e tapuaʻi ai pea iā Ieova e ui i nei faafitauli? O se tasi o vala, o lo tatou iloaina lea, o Ieova “o le Atua soifua.”—Iere. 10:10; 2 Timo. 1:12.

2. Aiseā ua taʻua ai Ieova o le Atua soifua?

² E silafia e Ieova faigatā o loo tatou fesagaʻia, ma e naunau o ia e saunia mai le fesoasoani ina ia tatou onosaia ai na faigatā. (2 No. 16:9; Sala. 23:4) Pe a tatou manatua o Ieova o le Atua soifua, o le a fesoasoani lenā iā i tatou e taulau ai i le fesagaʻia o so o se luʻi e tulaʻi mai. Seʻi o tatou iloilo le faaaʻoaʻoga a le tupu o Tavita.

3. O le ā le uiga o le faamatalaga a Tavita “o loo soifua Ieova”?

³ Na iloa e Tavita Ieova, ma na ia faalagolago foʻi iā te ia. Ina ua tuliloaina o ia e ona fili, e aofia ai le tupu o Saulo, na tatalo atu Tavita iā Ieova mo se fesoasoani. (Sala. 18:6) Ina ua tali mai e Ieova lana tatalo ma laveaʻiina o ia, na alaga atu Tavita: “O loo soifua Ieova!” (Sala. 18:46) O le ā le uiga o le faamatalaga a Tavita? Ua faapea mai se tasi tusi, na faailoa mai e Tavita lona mautinoa, o Ieova “o le Atua soifua, e gaoioi o ia i taimi uma e fesoasoani i ona tagata.” O le mea moni, o mea na tutupu i le olaga o Tavita, na ia mautinoa ai o Ieova o le Atua soifua, ma na faamalosia ai lona maumauaʻi e auauna ma vivii atu iā Ieova.—Sala. 18:​28, 29, 49.

4. O ā aogā o lo tatou manatuaina o Ieova o le Atua soifua?

 ⁴ O lo tatou mautinoa o Ieova o le Atua soifua, e fesoasoani iā i tatou e auauna atu ai iā te ia ma le maelega. E tatou te maua ai le malosi e onosaia ai faigatā, ma uunaʻia i tatou ia galulue mamafa pea i le auaunaga iā Ieova. O le a tatou maumauaʻi foʻi e mafuta vavalalata atu pea iā te ia.

O LE A FAAMALOSIA OE E LE ATUA SOIFUA

5. E faapefea ona tatou maua le lototele e onosaia ai faigatā? (Filipi 4:13)

⁵ E mafai ona tatou onosaia so o se faigatā, pe afai e tatou te manatua o Ieova o le Atua soifua, ma e nofosauni o ia e fesoasoani mai iā i tatou. E leai se mea e faigatā iā Ieova, auā o ia o Lē e ona le malosi uma lava, ma e na te foaʻi mai le mana e tatou te manaʻomia ina ia onosaia ai so o se faigatā. (Faitau le Filipi 4:13.) Po o ā lava faafitauli e tulaʻi mai, e tatou te maua pea le lototele e onosaia ai. Pe a tatou tofo i le fesoasoani a Ieova i taimi e feagai ai ma faafitauli lāiti, e tatou te mautinoa foʻi, o le a ia fesoasoani mai i taimi e feagai ai ma faafitauli tetele.

6. O ā mea na tutupu iā Tavita a o talavou na faamalosia ai lona mautinoa iā Ieova?

⁶ Seʻi mātau ni mea se lua na tutupu iā Tavita a o talavou, na atili ai ona faamalosia lona mautinoa iā Ieova. I se tasi aso a o ia leoleoina le lafu mamoe a lona tamā, na osofaʻi ai e se leona le lafu ma ave se mamoe. I se isi foʻi taimi, na osofaʻi e se pea le lafu, ma ave foʻi se isi mamoe. I na taimi taʻitasi, na tuliloa e Tavita na manufeʻai ma laveaʻi mai mamoe. Peitaʻi, na mautinoa e Tavita o le mana mai iā Ieova na ia taulau ai, ae e lē o lona malosi. (1 Samu. 17:​34-37) E leʻi galo iā Tavita na mea na tutupu. O lona manatunatu loloto i ai, na ia mautinoa ai o le a faamalosia foʻi o ia e le Atua soifua i le lumanaʻi.

7. O le ā na taulaʻi i ai Tavita, ma na faapefea i lenā mea ona fesoasoani iā te ia e tau ai ma Koliata?

⁷ Mulimuli ane a o talavou pea Tavita, na ia agaʻi atu ai i le mea o loo tolauapi ai le ʻautau a Isaraelu. Ua ia vaai atu i le matuā fefefe o le ʻautau, ona ua sau le sauʻai mai i Filisitia e igoa iā Koliata e “[luʻi] le itu taua a Isaraelu.” (1 Samu. 17:​10, 11) Na māfua ona latou fefefe, ona sa latou taulaʻi atu i le telē o le tino o Koliata ma ana taufaifaiga iā i latou. (1 Samu. 17:​24, 25) Peitaʻi e ese le mea na taulaʻi i ai Tavita. Na ia vaai i le mea na tupu o se luʻi e faasaga i “le itu taua a le Atua soifua,” ae e lē o le itu taua a Isaraelu. (1 Samu. 17:26) Na faamuamua i le mafaufau o Tavita Ieova. Na maufaatuatuaina e Tavita o le a fesoasoani Ieova iā te ia, e pei foʻi ona fesoasoani iā te ia a o ia leoleoina le lafu mamoe a lona tamā. O lona mautinoa i le fesoasoani a Ieova, na ia tau ai ma Koliata ma manumalo ai.—1 Samu. 17:​45-51.

8. E faapefea ona faamalosia lo tatou mautinoa e fesoasoani mai Ieova iā i tatou pe a fesagaʻia faafitauli? (Tagaʻi foʻi i le ata.)

⁸ E mafai foʻi ona tatou taulau i le fesagaʻia o faafitauli, pe afai e tatou te manatua, o loo nofosauni le Atua soifua e fesoasoani mai iā i tatou. (Sala. 118:6) E mafai ona faamalosia lo tatou mautinoa i lenā mea moni, e ala i le iloiloina o mea na ia faia i taimi ua teʻa. Ia faitau i tala o loo i le Tusi Paia, lea e faamanatu mai ai auala na faasaoina ai e Ieova ona tagata tapuaʻi. (Isa. 37:​17, 33-37) Ia faitau pe matamata foʻi i lipoti o loo i le jw.org, lea e faamatala ai le auala o loo lagolago ai e Ieova o tatou uso ma tuafāfine i aso nei. Ia mafaufau foʻi i taimi na fesoasoani mai ai Ieova iā te oe. Atonu e te lagona e leʻi faia e Ieova se mea  mataʻina mo oe, e peiseaʻī ua ia laveaʻiina oe mai i se leona po o se pea. Ae o le mea moni, e tele mea ua faia e Ieova mo oe. Na ia tosina mai oe iā te ia ina ia iai se lua faiā. (Ioa. 6:44) O lana fesoasoani foʻi ua e tumau ai pea i le upu moni seʻia oo mai i le taimi lenei. Ia talosaga atu mo lana fesoasoani, ina ia e manatua ai taimi na ia tali mai ai i au tatalo, lagolagoina oe i taimi na e manaʻomia ai, pe faamalosia oe e onosaia se tulaga faigatā. O le manatunatu i na mea, e faamalosia ai lou mautinoa, o le a faaauau ona fesoasoani mai Ieova iā te oe.

9. O le ā le auala e tatau ona tatou vaai ai i o tatou faafitauli? (Faataoto 27:11)

⁹ O le manatuaina o Ieova o le Atua soifua, o le a fesoasoani ai iā i tatou ina ia iai se vaaiga saʻo i faafitauli. E faapefea? O le a tatou vaai ai i o tatou faafitauli, o se vaega o le finauga i le vā o Ieova ma Satani. Ua faapea mai le Tiapolo, e tatou te tuua Ieova pe a feagai ma tulaga faigatā. (Iopu 1:​10, 11; faitau le Faataoto 27:11.) Ae pe a tatou tumau ma le faamaoni e ui i luʻi, ua faaalia ai lo tatou alofa mo Ieova ma faamaonia ai le pepelo o le Tiapolo. Po o e feagai ma teteega mai i faigāmalo, utiuti le faasoa, lē talilelei mai tagata i le talaʻiga, po o se isi foʻi luʻi? Pe afai o lea, ia manatua o lenā ua e maua le avanoa e faafiafia ai le finagalo o Ieova. Ia manatua foʻi, e na te lē tuua oe i se faaosoosoga e sili atu nai lo o le mea e te lavātia. (1 Kori. 10:13) O le a ia foaʻi mai le malosi e te onosaia ai na tulaga faigatā.

O LE A TAUIA OE E LE ATUA SOIFUA

10. O le ā o le a faia e Ieova le Atua soifua mo i latou e tapuaʻi atu iā te ia?

¹⁰ E tauia lava e Ieova i latou e tapuaʻi atu iā te ia. (Epe. 11:6) O ia ua tatou maua ai le filemu ma le faamalieina i le taimi lenei, ae i le lumanaʻi, o le a ia foaʻi mai le ola e faavavau. E tatou te matuā maufaatuatuaina Ieova, e iai iā te ia le faanaunauga ma le mana e tauia ai i tatou. O le māfuaaga lea e faaauau ai ona tatou faia le mea sili e tapuaʻi atu ai iā te ia, e pei ona sa faia e ana auauna faamaoni i taimi  ua teʻa. O le mea lenā na faia e Timoteo i le uluaʻi senituri.—Epe. 6:​10-12.

11. O le ā na uunaʻia ai Timoteo e galue mamafa i le faapotopotoga? (1 Timoteo 4:10)

¹¹ Faitau le 1 Timoteo 4:10. Na maufaatuatuaina e Timoteo le Atua soifua. O le māfuaaga lea na ia galue mamafa ai ma finafinau. E faapefea? Na faalaeiauina o ia e le aposetolo o Paulo, ina ia faaleleia le auala e aʻoaʻo atu ai i le faiva ma le faapotopotoga. Sa tatau foʻi ona avea Timoteo o se faaaʻoaʻoga lelei mo Kerisiano, o ē e talavou ma ē e matutua. Na tuuina atu foʻi iā te ia ni tofiga faigatā, lea e aofia ai le avatuina o aʻoaʻiga tuusaʻo i se auala agalelei iā i latou na manaʻomia. (1 Timo. 4:​11-16; 2 Timo. 4:​1-5) Na mautinoa e Timoteo, e tusa pe e lē vaaia pe e lē talisapaia foʻi e isi ana galuega, ae e tauia lava o ia e Ieova.—Roma 2:​6, 7.

12. O le ā e uunaʻia ai toeaina e galulue mamafa i le faapotopotoga? (Tagaʻi foʻi i le ata.)

¹² I aso nei, e mautinoa foʻi e toeaina e silafia ma faatāua e Ieova a latou galuega mamafa o loo fai. E lē gata e faia e toeaina asiasiga faaleoleo mamoe, aʻoaʻo atu i le faapotopotoga, ma talaʻi atu, ae o le toʻatele foʻi o i latou e lagolagoina galuega faufale ma galuega laveaʻi i taimi o mala. O isi e galulue i Vaega e Asiasi i Tagata Mamaʻi po o le Komiti o Mataupu Tau Falemaʻi. O toeaina o ē e faaavanoa atu i latou lava e faia na galuega, e latou te vāai i le faapotopotoga o se faatulagaga a Ieova, ae e lē o se faalapotopotoga faaletagata. O lea, e latou te faia ai ma le lotoatoa o latou tofiga, ma maufaatuatuaina atoatoa Ieova o le a ia tauia i latou.—Kolo. 3:​23, 24.

13. O ā faalogona o Ieova i taumafaiga a tagata taʻitoʻatasi ina ia auauna ai iā te ia?

¹³ E ui e lē o tagata uma e mafai ona avea ma toeaina, ae e mafai e i tatou uma ona faia se sao i le auaunaga iā Ieova. E talisapaia e lo tatou Atua pe a tatou faia le mea sili e auauna atu ai iā te ia. E na te silafia a tatou foaʻi tauofo o loo faia mo le lalolagi aoao, e tusa lava  pe itiiti. E faafiafiaina o ia pe a tatou taumafai e fai ni sao i le sauniga e ui e tatou te matamumuli. E na te talisapaia foʻi pe a tatou lē amanaʻia mea sesē e faia mai e isi, ma faamagalo atu iā i latou. E tusa pe e te manatu ua lē o toe tele ni mea e mafai ona e faia e pei o le taimi ua teʻa, ae ia e mautinoa, e na te talisapaia mea o loo e faia. O le māfuaaga lea e alofa ai o ia iā te oe, ma o le a ia tauia oe.—Luka 21:​1-4.

IA IAI PEA SE FAIĀ MĀFANA MA LE ATUA SOIFUA

14. E faapefea i le iai pea o sa tatou faiā māfana ma Ieova ona fesoasoani iā i tatou e faamaoni ai pea iā te ia? (Tagaʻi foʻi i le ata.)

¹⁴ Pe afai e tatou te talitonu o Ieova o le Atua soifua, o le a faigofie foʻi ona tatou faamaoni pea iā te ia. O le manatu foʻi lenā sa iai iā Iosefa. Na matuā maumauaʻi o ia e teena le faia o amioga lē mamā. Sa ia talitonu o Ieova o le Atua soifua, ma e leʻi manaʻo e fai se mea e faatigā ai iā te Ia. (Kene. 39:9) O lea, ina ia tatou talitonu o loo soifua le Atua, e manaʻomia ona tatou faatulaga se taimi e tatalo atu ai iā te ia ma suʻesuʻe lana Afioga. O le iʻuga, o le a faamalosia ai la tatou faauōga ma ia. E pei o Iosefa, pe a iai sa tatou faiā māfana ma Ieova, e tatou te lē mananaʻo e faia so o se mea e faatigā ai iā te Ia.—Iako. 4:8.

15. O le ā e tatou te aʻoaʻoina mai i le mea na tupu i le nuu o Isaraelu a o latou iai i le toafa? (Eperu 3:12)

¹⁵ E faigofie i se tasi ona lē faamaoni iā Ieova, pe afai e galo iā te ia o Ieova o le Atua soifua. Seʻi mātau le mea na tupu i le nuu o Isaraelu a o latou iai i le toafa. Na latou iloa o loo soifua Ieova, ae na amata ona latou masalosalo, po o le a ia tausia i latou. Sa latou fesili foʻi, “Po ua iā i tatou ea Ieova pe e leai?” (Eso. 17:​2, 7) O le iʻuga, na latou fouvale i le Atua. O le mea moni, e tatou te lē mananaʻo e mulimuli i la latou faaaʻoaʻoga lē lelei, lea e avea o se lapataʻiga mo i tatou.—Faitau le Eperu 3:12.

16. O ā tulaga e mafai ona faavaivaia ai lo tatou faatuatua?

¹⁶ O le auala o loo ola ai tagata o le lalolagi,  ua faafaigatā ai ona tatou vavalalata atu pea iā Ieova. E toʻatele e lē talitonu o loo soifua le Atua. E masani lava ona foliga mai e taulau manuia olaga o i latou e lē amanaʻia tapulaa a le Atua. Pe a tatou vaaia na tulaga, e mafai ona faavaivaia ai lo tatou faatuatua. E ui e tatou te talitonu o loo soifua le Atua, ae atonu o le a tatou masalosalo ai pe faamata o le a ia fesoasoani mai. O lagona foʻi na o lē na tusia le Salamo e 73. Sa ia mātauina na ola fiafia pea i latou e leʻi usitaʻia tulafono a le Atua. O lea, na amata ai ona ia fesiligia po o aogā pea ona auauna iā Ieova.—Sala. 73:​11-13.

17. O le ā e fesoasoani iā i tatou e vavalalata atu ai pea iā Ieova?

¹⁷ O le ā na fesoasoani i le faisalamo e faasaʻo ai ona manatu? Na ia manatunatu i le mea e tupu i se tasi e galo iā te ia, o Ieova o le Atua soifua. (Sala. 73:​18, 19, 27) Na ia manatunatu foʻi i aogā e maua mai i le auauna iā Ieova. (Sala. 73:24) E mafai foʻi ona tatou manatunatu i faamanuiaga ua tatou maua mai iā Ieova, ona faatusatusa lea i le ituaiga o olaga e ono oo i ai, pe ana faapea e tatou te lē auauna iā te ia. O le faia faapea, o le a fesoasoani iā i tatou e faamaoni ai pea iā Ieova, ma pei ai o tatou manatu o le faisalamo, “A o aʻu nei, ou te faalatalata atu i le Atua ou te lelei ai.”—Sala. 73:28.

18. Aiseā e lē tatau ai ona tatou fefefe i mea o le a tutupu i le lumanaʻi?

¹⁸ E mafai ona tatou onosaia so o se luʻi i nei aso e gata ai, auā o loo tatou “pologa i le Atua soifua ma lē e moni.” (1 Tesa. 1:9) O Ieova o le Atua soifua, ma e fesoasoani mai i ē e tapuaʻi atu iā te ia. Na ia lagolagoina ana auauna i aso anamua, ma o le a ia faia foʻi faapea mo i tatou i aso nei. Ua toe nei o se aga amata le puapuaga e sili ona mataʻutia. Peitaʻi, o le a faatasi Ieova ma i tatou i lenā taimi. (Isa. 41:10) Tau ina ia tatou “lototetele ma faapea atu: ʻO Ieova o loʻu fesoasoani ia; ou te lē fefe lava.’”—Epe. 13:​5, 6.