1. Yini lesita bantfu baJehova kutsi bachubeke bamkhonta ngisho babhekana netinkinga?

 LIBHAYIBHELI litsi siphila ‘etikhatsini letibucayi lokumatima kubhekana nato.’ (2 Thim. 3:1) Ngetulu kwetinkinga umuntfu ngamunye labhekana nato kulelive lelibi, bantfu baJehova bayaphikiswa futsi baphatfwe kabi. Yini lesisita kutsi sichubeke sikhonta Jehova ngisho sibhekana naletinkinga? Lokunye lokusisita kakhulu kutsi sesiyati kutsi Jehova “unguNkulunkulu lophilako.”​—Jer. 10:10; 2 Thim. 1:12.

2. Yini leyenta sitsi Jehova unguNkulunkulu lophilako?

² Jehova unguMuntfu mbamba losisitako nasibhekene netinkinga futsi uhlale afuna ematfuba ekusisekela. (2 Khr. 16:9; Hla. 23:4) Kubuka Nkulunkulu njengaNkulunkulu lophilako kungasisita sibhekane nanobe nguyiphi inkinga. Asesicoce ngekutsi loko kwenteka njani eNkhosini Davide.

3. Bekasho kutsini Davide nakatsi “Jehova uyaphila”?

³ Davide bekamati Jehova futsi beketsembela kuye. Ngesikhatsi iNkhosi Sawula kanye nalabanye bafuna kumbulala, Davide wathantaza kuJehova wacela kutsi amsite. (Hla. 18:6) Ngemuva kwekutsi Nkulunkulu aphendvule imithantazo yakhe futsi wamsita, Davide watsi: “Jehova uyaphila!” (Hla. 18:46) Ngalamavi, akusiko nje kutsi Davide bekamane avuma kutsi Nkulunkulu ukhona. Lenye incwadzi itsi Davide bekakhombisa kutsi uyametsemba Jehova “kutsi ungunkulunkulu lophilako lohlale abasita bantfu bakhe.” Davide wafundza kulokwenteka kuye kutsi Nkulunkulu wakhe uyaphila, futsi loko  kwamenta watimisela kakhulu kutsi achubeke akhonta Jehova futsi amdvumise.​—Hla. 18:28, 29, 49.

4. Kusisita ngani kwati kutsi Jehova unguNkulunkulu lophilako?

⁴ Kuciniseka ngekutsi Jehova unguNkulunkulu lophilako kungasisita kutsi sitimisele nasimkhonta. Sitawuba nemandla ekubeketelela noma ngabe nguyiphi inkinga futsi sitawutimisela kuchubeka sisebenta kamatima emsebentini wakhe. Sitawuphindze sitimisele kuhlale sisondzelene naJehova.

NKULUNKULU LOPHILAKO UTAKUNIKETA EMANDLA

5. Yini leyenta kutsi sibe nesibindzi nasibhekene netinkinga? (KubaseFiliphi 4:13)

⁵ Sitawukhona kubeketelela nobe nguyiphi inkinga, ngisho iyincane nobe iyinkhulu nangabe sikhumbula kutsi Jehova uyaphila futsi uhlale akhona kuze asisite. Ngetulu kwako konkhe, nobe nguyiphi inkinga lesibhekana nayo ayisilutfo nayicatsaniswa naNkulunkulu wetfu. UnguSomandla futsi angasiniketa emandla ekucinisela. (Fundza KubaseFiliphi 4:13.) Loku kusenta sibe nesibindzi nasibhekene netinkinga. Nasibona kutsi Jehova uyasisita nasibhekene netinkinga letincane loko kusenta siciniseke kutsi utasisita ngisho sesibhekene netinkinga letinkhulu.

6. Ngutiphi tintfo letenteka ngesikhatsi Davide asemusha letamenta wametsemba kakhulu Jehova?

⁶ Cabanga ngetintfo letimbili letenteka ekuphileni kwaDavide letenta wametsemba kakhulu Jehova. Ngesikhatsi asemusha futsi angumelusi, kwefika libhele latsatsa imvu yababe wakhe, kwaphindze kwefika nelibhubesi, nalo lenta lokufanako. Kuto totimbili letikhatsi, Davide waba nesibindzi sekucosha letilwane, wasindzisa letimvu. Nobe kunjalo, akazange atishaye sifuba ngaloko bekakwentile. Bekati kutsi usitwe nguJehova. (1 Sam. 17:34-37) Davide akazange akukhohlwe loko lokwenteka. Kucabangisisa ngako kwamenta waciniseka kakhulu kutsi Nkulunkulu lophilako bekatamsita nasesikhatsini lesitako.

7. Kuba nembono lokahle kwamsita njani Davide kutsi alwe naGoliyathi?

⁷ Ngekuhamba kwesikhatsi, Davide nakaseminyakeni yekutfomba, waya enkambu yelibutfo lema-Israyeli. Watfola emasotja esaba kakhulu ngenca yekutsi sidlakela lesingumFilisti lokutsiwa nguGoliyathi besite ‘kutawuhlazisa emabutfo aka-Israyeli.’ (1 Sam. 17:10, 11) Lokwenta lamasotja esaba, kutsi bekanake kakhulu lesidlakela kanye netintfo lebesitisho. (1 Sam. 17:24, 25) Nobe kunjalo, Davide wabuka lesimo ngalelinye liso. Bekati kutsi ngesikhatsi Goliyathi ahlekisa ngelibutfo lema-Israyeli, ecinisweni beketfuka “libutfo laNkulunkulu lophilako.” (1 Sam. 17:26) Davide bekacabanga ngaJehova. Beketsemba kutsi Nkulunkulu lowamsita ngesikhatsi eluse timvu, utamsita nakulesimo. Ngenca yekutsi bekaciniseka kutsi Nkulunkulu utamsita, walwa naGoliyathi futsi wamncoba!​—1 Sam. 17:45-51.

8. Yini lesingayenta kuze simetsembe kakhulu Jehova nasibhekene netinkinga? (Buka nesitfombe.)

⁸ Natsi singakhona kubhekana netinkinga nangabe sikhumbula kutsi Nkulunkulu lophilako ukulungele kusisita. (Hla. 118:6) Singametsemba kakhulu nasicabanga ngaloko lasentele kona esikhatsini lesendlulile. Fundza tindzaba letiseBhayibhelini letikukhumbuta ngendlela Jehova latisindzise ngayo tikhonti takhe. (Isa. 37:17, 33-37) Ngetulu kwaloko, fundza nobe ubukele imibiko leku jw.org lekhombisa indlela Jehova labasite ngayo bazalwane betfu nabodzadze etikhatsini talamuhla. Ngetulu kwaloko,  khumbula netikhatsi lapho Jehova akusite khona. Ungakhatsateki nangabe kute tintfo letinkhulu lotikhumbulako Jehova lakusite kuto, tintfo letinjengekulwa nelibhele nobe nelibhubesi. Ngasiphi sizatfu? Liciniso likutsi Jehova ukwentele tintfo letinyenti ekuphileni kwakho! Ukudvonsile kuze ube ngumngani wakhe. (Joh. 6:44) Ngisho nanyalo usachubeka umkhonta ngenca yekutsi usitwa nguye. Ngako cela Jehova akusite ukhumbule tikhatsi lapho khona aphendvula imithantazo yakho, wakusita ngesikhatsi lebewudzinga ngaso lusito nobe wakusekela ngesikhatsi lesimatima. Kukhumbula loku kutawenta umetsembe kakhulu Jehova kutsi utawuchubeka akusita.

9. Yini lokufanele siyikhumbule nasinetinkinga? (Taga 27:11)

⁹ Kukhumbula kutsi Jehova unguNkulunkulu lophilako kutasisita sibe nembono lokahle ngetinkinga tetfu. Kanjani? Sibese siyabona kutsi yini leyenta sibe netinkinga, lokuyindzaba lenkhulu lesemkhatsini waJehova naSathane. Develi utsi sitamshiya Jehova nasinetinkinga. (Jobe 1:10, 11; fundza Taga 27:11.) Kodvwa nasihlala setsembekile kuJehova ngisho sinetinkinga, sikhombisa kutsi siyamtsandza nekutsi Develi ungumcambimanga. Uphikiswa nguhulumende yini, unetinkinga tetimali, bantfu abakulaleli nawushumayela nobe ubhekene naletinye tinkinga? Nangabe kunjalo, khumbula kutsi simo lokuso sikuniketa litfuba lekwenta inhlitiyo yaJehova ijabule. Khumbula nekutsi akayuze avume kutsi ulingwe ngalokungetulu kwalongakukhona. (1 Khor. 10:13) Utakuniketa emandla kuze ucinisele.

NKULUNKULU LOPHILAKO UTAKUBUSISA

10. Yini Nkulunkulu lophilako latawuyentela labo labamkhontako?

¹⁰ Jehova uhlale ababusisa labo labamkhontako. (Heb. 11:6) Usiniketa kuthula nekwenetiseka nyalo, futsi utasiniketa kuphila lokuphakadze esikhatsini lesitako. Singetsembela kuJehova, siciniseke kutsi unemandla kanye  nesifiso sekusibusisa. Kuciniseka ngaloko kutawusenta simkhonte ngemandla etfu onkhe, njengobe kwenta tikhonti taNkulunkulu letetsembekile tasesikhatsini lesendlulile. Nguloko lokwentiwa nguThimothi ngesikhatsi semaKhristu ekucala.​—Heb. 6:10-12.

11. Yini leyenta Thimothi watimisela ebandleni? (1 KuThimothi 4:10)

¹¹ Fundza 1 KuThimothi 4:10. Thimothi wametsemba Nkulunkulu lophilako. Kungako asebenta kamatima. Yini layenta? Umphostoli Pawula wamkhutsata kutsi abe ngumfundzisi loncono emsebentini wekushumayela nasebandleni. Thimothi bekudzingeka ababekele sibonelo lesihle bazalwane bakhe nabodzadze labasebasha nalasebakhulile. Waphindze waniketwa leminye imisebenti lelukhuni, lefaka ekhatsi kubeluleka ngalokucinile labo bebadzinga seluleko, kodvwa loko akwente ngelutsandvo. (1 Thim. 4:11-16; 2 Thim. 4:1-5) Bekangaciniseka kutsi ngisho nobe labanye bebahle bangakuboni loko lakwentako futsi bangabongi ngako, kodvwa Jehova bekatambusisa.​—Rom. 2:6, 7.

12. Yini leyenta labadzala belibandla bachubeke basebenta kamatima ebandleni? (Buka nesitfombe.)

¹² Lamuhla, labadzala belibandla bangaciniseka kutsi Jehova uyayibona imisebenti labayentako futsi uyajabula ngayo. Ngetulu kwekutsi bavakashela bazalwane babo nabodzadze kuze babakhutsate, bafundzise futsi bente umsebenti wekushumayela, linyenti labo liyasita ekwakheni takhiwo tenhlangano nalapho kuvele khona tehlakalo. Labanye bangemalunga eLicembu Lalabo Labavakashela Tigulane kantsi labanye bangemalunga eKomidi Yekubonisana Netibhedlela. Labadzala labenta lemisebenti bayati kutsi libandla laJehova, alisilo lemuntfu. Ngenca yaloko, basebenta ngekutimisela etabelweni tabo futsi betsemba mbamba kutsi Nkulunkulu utawubabusisa ngenca yemsebenti labawentako.​—Khol. 3:23, 24.

13. Jehova utiva njani ngaloko lomentela kona?

 ¹³ Akusitsi sonkhe lesingaba ngulabadzala belibandla. Kodvwa sonkhe kukhona lesingamupha kona Jehova. Nkulunkulu wetfu uyajabula nasenta konkhe lesingakwenta kuze simkhonte. Uyabona nasinikelela umsebenti wemhlaba wonkhe ngisho nobe kukuncane kangakanani. Uyajabula nasiphakamisa sandla emihlanganweni kuze siphendvule ngisho nobe sinemahloni, futsi ujabula kakhulu nasingawanaki emaphutsa alabanye futsi sibacolela. Ngisho nobe ubona ngatsi kuncane loko lokwentako, yetsemba kutsi Jehova uyajabula ngako. Nguloko lokwenta kutsi akutsandze, futsi utakubusisa.​—Luk. 21:1-4.

HLALE USONDZELENE NANKULUNKULU LOPHILAKO

14. Kuhlala sisondzelene naJehova kusisita njani kutsi sihlale setsembekile? (Buka nesitfombe.)

¹⁴ Nangabe Jehova angumuntfu mbamba kitsi, sitakutfola kumelula kuhlala setsembekile kuye. Nguloko lokwenteka kuJosefa. Wala ngalokucinile kutiphatsa kabi. Nkulunkulu bekanguMuntfu mbamba kuye futsi bekangafuni kumvisa buhlungu. (Gen. 39:9) Kuze Jehova abe nguMuntfu mbamba kitsi, kufanele sitinike sikhatsi sekuthantaza kuye futsi sidadishe liVi lakhe. Nasenta njalo, buhlobo betfu naye butawucina. Nangabe sisondzelene kakhulu naJehova njengaJosefa, angeke siyente intfo letamvisa buhlungu.​—Jak. 4:8.

15. Ngusiphi sifundvo lesingasifundza kuloko lokwenteka kuma-Israyeli ngesikhatsi asehlane? (KumaHebheru 3:12)

¹⁵ Kungaba melula kutsi bakhweshe kuJehova labo labakhohlwako kutsi unguNkulunkulu lophilako. Cabanga ngaloko lokwenteka kuma-Israyeli ngesikhatsi asehlane. Bekati kutsi Jehova ukhona, kodvwa acala kungabata kutsi utawanakekela. Aze abuta atsi: “Jehova unatsi yini nobe cha?” (Eks. 17:2, 7) Ngemuva kwaloko, abese ayamvukela Nkulunkulu. Ngako asifuni kulingisa sibonelo sawo  sekungalaleli, lesisecwayiso kitsi.​—Fundza KumaHebheru 3:12.

16. Yini lengavivinya kukholwa kwetfu?

¹⁶ Lelive lenta kube matima kutsi sihlale sisondzelene naJehova. Labanyenti bayaphika kutsi Nkulunkulu ukhona. Ngalokuvamile, labo labangakwenti loko Nkulunkulu lakulindzele kubo babonakala baphumelela. Kukholwa kwetfu kungavivinyeka nasibona loku kwenteka. Nanobe singeke siphike kutsi Nkulunkulu ukhona, singacala kutibuta kutsi utasisita yini. Umbhali weTihlabelelo 73 naye watibuta loku. Wabona labanye bangayilaleli imitsetfo yaNkulunkulu kodvwa baphila kahle. Ngenca yaloko, wacala kutibuta kutsi kusita ngani kukhonta Nkulunkulu.​—Hla. 73:11-13.

17. Yini letasisita kutsi sihlale sisondzelene naJehova?

¹⁷ Yini leyagcine isite umhlabeleli kutsi ashintje indlela lebekacabanga ngayo? Wacabangisisa ngekutsi yini letawenteka kulabo labakhohlwa Jehova. (Hla. 73:18, 19, 27) Waphindze wacabanga nangetibusiso letitfolakala ngekukhonta Nkulunkulu. (Hla. 73:24) Natsi singacabanga ngetibusiso Jehova lasiphe tona, loko sikucatsanise nekutsi kuphila kwetfu ngabe kunjani kube asimkhonti Jehova. Kwenta njalo kutasisita sihlale setsembekile futsi futsi sitive njengemhlabeleli lowatsi: “Mine kuyangisita kusondzela kuNkulunkulu.”​—Hla. 73:28.

18. Yini leyenta singalesabi likusasa?

¹⁸ Singakhona kubhekana netinkinga kulamalanga ekugcina ngobe ‘sitigcili taNkulunkulu lophilako neweliciniso.’ (1 Thes. 1:9) Nkulunkulu wetfu unguMuntfu mbamba lobasitako labo labamkhontako. Wakhombisa kutsi unetikhonti takhe tasesikhatsini lesendlulile, futsi nalamuhla unatsi. Ngekushesha sitawubhekana nekuhlupheka lokukhulu lokungazange sekube khona emhlabeni, kodvwa sitawube singasisodvwa. (Isa. 41:10) Shengatsi sonkhe “singakhuluma ngesibindzi sitsi: ‘Jehova ungumsiti wami; angeke ngesabe.’”​—Heb. 13:5, 6.