1. Saida mak ajuda Jeová nia povu atu kontinua adora nia maski hasoru problema?

 BÍBLIA hatete katak ita moris iha “loron ikus sira” neʼebé iha problema barak no susar atu tahan. (2 Tim 3:1) Jeová nia povu hasoru problema neʼebé ema hotu hasoru iha sistema aat neʼe, maibé sira mós hasoru susar tanba ema kontra no fó-terus. Saida mak ajuda ita atu kontinua adora Jeová maski hasoru problema? Razaun importante ida mak ita hatene katak Jeová mak “Maromak neʼebé moris”.—Jer 10:10; 2 Tim 1:12.

2. Hodi hatene katak Jeová mak Maromak neʼebé moris, oinsá neʼe ajuda ita?

² Jeová iha duni no haree susar hotu neʼebé ita hasoru, no nia prontu atu ajuda ita. (2 Krón 16:9; Sal 23:4) Hodi hanoin-hetan katak nia mak Maromak neʼebé moris, neʼe bele ajuda ita tahan hasoru susar naran deʼit. Mai ita haree toʼok oinsá Liurai David halo nuneʼe.

3. David nia liafuan “Jeová mak Maromak neʼebé moris” katak sá?

³ David hatene didiʼak Jeová, no tau fiar ba Nia. Bainhira inimigu sira, inklui Liurai Saul koko atu oho nia, David halo orasaun ba Jeová atu ajuda nia. (Sal 18:6) Depois Maromak hatán tiha ninia orasaun no salva nia, David hatete: “Jeová mak Maromak neʼebé moris!” (Sal 18:46) David nia liafuan neʼe katak sá? Referénsia ida esplika katak David uza liafuan sira-neʼe atu hatudu katak nia tau fiar ba Jeová nuʼudar Maromak neʼebé moris no sempre ajuda ninia atan sira. Sin, David rasik sente duni katak ninia Maromak mak moris, no neʼe hametin David atu kontinua serbí no fó hahiʼi ba Jeová.—Sal 18:​28, 29, 49.

4. Benefísiu saida mak ita hetan hodi fiar katak Jeová mak Maromak neʼebé moris?

 ⁴ Bainhira ita fiar katak Jeová mak Maromak neʼebé moris, neʼe ajuda ita atu serbí nia ho laran-manas. Ita sei iha forsa atu tahan hasoru susar naran deʼit no motiva ita atu kontinua halo Maromak nia serbisu ho badinas. No mós ajuda ita deside metin atu nafatin hakbesik ba Jeová.

MAROMAK NEʼEBÉ MORIS SEI FÓ FORSA BA ITA

5. Saida mak bele fó konfiansa ba ita bainhira ita hasoru susar? (Filipe 4:13)

⁵ Se ita hanoin-hetan katak Jeová mak Maromak neʼebé moris no sempre prontu atu apoia ita, neʼe bele ajuda ita tahan hasoru susar naran deʼit maski kiʼik ka boot. La iha problema ida neʼebé susar liu ba Jeová atu hadiʼa. Nia mak Maromak neʼebé Kbiit Boot Liu Hotu, no nia bele fó ita forsa atu tahan. (Lee Filipe 4:13.) Neʼe fó ita konfiansa atu tahan hasoru susar naran deʼit. Bainhira ita haree katak Jeová ajuda ita iha susar kiʼik sira, neʼe halo ita fiar metin katak nia mós sei ajuda ita bainhira hasoru susar neʼebé boot.

6. Bainhira David sei kiʼik, nia hasoru situasaun saida neʼebé hametin ninia fiar ba Jeová?

⁶ Haree toʼok akontesimentu rua neʼebé hametin David nia fiar ba Jeová. Bainhira David sei kiʼik no serbisu nuʼudar bibi-atan, ursu ida no leaun ida mai ataka ninia aman nia bibi-malae. Iha situasaun ida-idak, David ho aten-brani luta hasoru animál sira-neʼe no salva bibi-malae sira. Maibé, David la hanoin katak nia halo ida-neʼe ho ninia kbiit rasik. Nia hatene katak Jeová mak fó kbiit ba nia. (1 Sam 17:​34-37) David nunka haluha kona-ba akontesimentu sira-neʼe. Bainhira David medita kona-ba neʼe, neʼe fó konfiansa ba nia katak Maromak neʼebé moris mós sei hametin nia iha futuru.

7. David fokus ba saida, no tanbasá neʼe ajuda nia atu halo funu hasoru Golias?

⁷ Tuirmai, bainhira David sei joven, nia bá vizita tropa Izraél nia hela-fatin. Nia haree katak tropa sira taʼuk tebes tanba jigante ida husi Filístia naran Golias “sadik tropa Izraél”. (1 Sam 17:​10, 11) Tropa sira taʼuk tanba sira fokus liu ba Golias nia isin-boot no ninia liafuan sadik. (1 Sam 17:​24, 25) Maibé David tau fokus ba buat seluk. David hatene katak bainhira Golias sadik tropa Izraél, loloos nia sadik “Maromak moris nia tropa sira”. (1 Sam 17:26) David hanoin liu kona-ba Jeová. David fiar katak Maromak neʼebé ajuda ona nia sei ajuda mós nia iha situasaun neʼe. Tanba David fiar metin katak Maromak sei ajuda nia, nia bá funu hasoru Golias, no nia manán!—1 Sam 17:​45-51.

8. Saida mak bele hametin ita-nia fiar katak Jeová sei ajuda ita kuandu hasoru susar? (Haree mós foto.)

⁸ Ita mós bele tahan susar sira se ita hanoin-hetan katak Maromak neʼebé moris prontu atu ajuda ita. (Sal 118:6) Ita bele hametin ita-nia fiar hodi hanoin kona-ba buat neʼebé Jeová halo ona iha tempu uluk. Ita bele lee istória sira iha Bíblia neʼebé fó-hanoin ita kona-ba oinsá Jeová salva ona ninia povu. (Isa 37:​17, 33-37) No mós, Ita bele haree notísias sira iha ita-nia website jw.org neʼebé fó sai oinsá Jeová apoia ona irmaun-irmán sira ohin loron. Liután neʼe, Ita mós bele hanoin-hetan tempu neʼebé Jeová ajuda  ona Ita. Keta hanoin barak se Jeová la halo buat neʼebé kmanek ba Ita hanesan salva Ita husi leaun ka ursu. Tanba loloos, Jeová halo ona buat barak ba Ita! Nia dada Ita atu sai ninia belun. (João 6:44) No agora Ita nafatin iha lia-loos tanba deʼit ninia ajuda. Diʼak atu husu Jeová ajuda Ita atu hanoin-hetan tempu neʼebé nia hatán ba Ita-nia orasaun, fó apoia ba Ita iha tempu neʼebé loos, ka tau matan ba Ita iha tempu susar. Hodi hanoin fali kona-ba buat sira-neʼe sei hametin Ita-nia fiar ba Jeová katak nia sei kontinua ajuda ita.

9. Ita presiza rekoñese saida kona-ba ita-nia susar sira? (Provérbios 27:11)

⁹ Se ita haree Jeová nuʼudar Maromak neʼebé moris, neʼe sei ajuda ita atu iha hanoin neʼebé loos kona-ba ita-nia susar sira. Tanbasá? Tanba neʼe sei ajuda ita rekoñese katak ita-nia susar sira liga ho asuntu importante entre Jeová no Satanás. Diabu duun katak bainhira ita hasoru susar, ita sei husik hela Jeová. (Job 1:​10, 11; lee Provérbios 27:11.) Maibé bainhira ita tahan hasoru susar sira ho susesu, ita hatudu katak ita hadomi Jeová no prova katak Diabu mak bosok-teen. Karik Ita hasoru daudaun susar sira hanesan governu kontra, problema ekonomia, ema iha Ita-nia haklaken-fatin la hatudu interese, ka Ita hasoru susar seluk tan. Se nuneʼe, hanoin-hetan katak neʼe mak oportunidade ba Ita atu halo Jeová nia laran kontente. No mós keta haluha katak Jeová sei nunka husik Ita atu hasoru susar neʼebé liu fali Ita-nia kbiit. (1 Kor 10:13) Nia sei fó Ita forsa atu tahan.

MAROMAK NEʼEBÉ MORIS SEI FÓ KOLEN BA ITA

10. Maromak neʼebé moris sempre fó saida ba ninia atan sira?

¹⁰ Jeová sempre fó kolen ba sira neʼebé adora nia. (Ebr 11:6) Nia fó ba ita dame no kontente agora, no sei fó ba ita moris ba nafatin iha futuru. Ita bele tau esperansa ba Jeová, no fiar metin katak nia iha hakarak no kbiit atu fó kolen mai  ita. Tanba ita iha fiar neʼebé metin, neʼe book ita atu nafatin badinas iha ita-nia adorasaun ba Jeová, hanesan buat neʼebé ninia atan sira halo iha tempu uluk. Neʼe mak buat neʼebé Timóteo halo.—Ebr 6:​10-12.

11. Tanbasá Timóteo halo serbisu ho badinas iha kongregasaun? (1 Timóteo 4:10)

¹¹ Lee 1 Timóteo 4:10. Timóteo tau esperansa ba Maromak neʼebé moris. Tan neʼe, nia hakaʼas an no halo serbisu ho badinas. Iha dalan oinsá? Apóstolu Paulo anima nia atu aumenta ninia matenek nuʼudar mestre iha serbisu haklaken no kongregasaun. Timóteo mós presiza hatudu ezemplu neʼebé diʼak ba irmaun-irmán sira neʼebé joven no mós idade. Nia mós hetan knaar balu neʼebé susar, neʼe inklui fó konsellu neʼebé makaʼas ba sira neʼebé presiza, maibé ho domin. (1 Tim 4:​11-16; 2 Tim 4:​1-5) Maski dala ruma ema la haree ka la hafolin buat neʼebé Timóteo halo, maibé nia fiar katak Jeová sei fó kolen ba nia.—Rom 2:​6, 7.

12. Saida mak motiva katuas sira atu kontinua badinas iha sira-nia knaar? (Haree mós foto.)

¹² Ohin loron, katuas kongregasaun mós bele fiar katak Jeová haree no hafolin sira-nia serbisu diʼak. Katuas sira tau matan ba bibi-lubun, hanorin, no haklaken, no katuas barak mós apoia iha projetu konstrusaun no ajuda bainhira dezastre akontese. Katuas balu serbí nuʼudar Grupu neʼebé Vizita Pasiente ka Komisaun neʼebé Komunika ho Ospitál. Katuas sira neʼebé fó sira-nia an atu halaʼo knaar sira-neʼe rekoñese katak kongregasaun mak Jeová nia arranju, laʼós ema nia arranju. Tan neʼe, sira halaʼo sira-nia knaar ho laran tomak no tau fiar tomak ba Maromak katak nia sei fó kolen ba serbisu neʼebé sira halo.—Kol 3:​23, 24.

13. Jeová sente oinsá kona-ba buat neʼebé ita halo ba nia?

¹³ Laʼós ema hotu bele sai katuas kongregasaun. Maibé, ita hotu bele fó buat ruma ba Jeová. Ita-nia Maromak hafolin tebes bainhira ita hakaʼas an atu serbí  nia ho laran tomak. Nia haree kuandu ita fó kontribuisaun atu apoia serbisu iha mundu tomak, maski neʼe kiʼik deʼit. Nia kontente kuandu ita hakaʼas an atu manán ita-nia sentimentu moe no hiʼit liman hodi fó komentáriu. Nia mós kontente bainhira ita fó perdua ema neʼebé halo ita laran-kanek. Fiar bá katak Jeová hafolin buat neʼebé Ita halo ona maski Ita hanoin katak buat neʼebé Ita halo mak kiʼik deʼit. Nia hadomi Ita, no nia sei fó kolen ba Ita.—Lc 21:​1-4.

KONTINUA HAKBESIK BA MAROMAK NEʼEBÉ MORIS

14. Oinsá mak hodi iha relasaun besik ho Jeová bele ajuda ita atu nafatin laran-metin? (Haree mós foto.)

¹⁴ Se ita iha relasaun neʼebé besik ho Jeová, fasil ba ita atu nafatin laran-metin ba nia. Neʼe mak buat neʼebé José sente. Tanba nia iha relasaun besik ho Jeová no lakohi halo Jeová triste, nia deside metin atu la halo sala seksuál. (Gén 39:9) Atu bele iha relasaun neʼebé besik ho Jeová, ita presiza uza tempu atu halo orasaun no estuda ninia Liafuan. Hodi halo nuneʼe, ita-nia relasaun ho nia sei sai metin liután. Hanesan José, se ita iha relasaun besik ho Jeová, ita sei lakohi halo buat ruma neʼebé halo Jeová triste.—Tgo 4:8.

15. Ita aprende saida husi buat neʼebé akontese ba povu Izraél iha rai-fuik? (Ebreu 3:12)

¹⁵ Ema neʼebé haluha katak Jeová mak Maromak neʼebé moris, fasil deʼit ba sira atu hadook an husi nia. Hanoin toʼok buat neʼebé akontese ba povu Izraél bainhira sira iha rai-fuik. Sira fiar duni katak Jeová iha, maibé sira komesa duvida katak Jeová sei tau matan ba sira. Sira husu: “Jeová iha ita-nia leet ka lae?” (Éx 17:​2, 7) Rezultadu mak sira kontra hasoru Maromak. Klaru, ita lakohi duni atu halo tuir sira-nia ezemplu neʼebé la diʼak.—Lee Ebreu 3:12.

16. Saida mak bele koko ita-nia fiar?

 ¹⁶ Mundu neʼe halo susar ba ita atu nafatin hakbesik ba Jeová. Ema barak la fiar katak Maromak iha duni. Dala barak, ema neʼebé lakohi halo tuir Maromak haree hanesan sira iha moris neʼebé diʼak. No bainhira ita haree ida-neʼe, neʼe bele koko ita-nia fiar. Maski ita fiar katak Maromak iha duni, karik ita komesa dúvida katak nia sei ajuda ita. Hakerek-naʼin ba Salmo 73 mós sente buat neʼebé hanesan. Nia haree ema barak la halo tuir Maromak nia ukun-fuan, maibé sira nafatin moris kontente. Neʼe halo nia komesa hanoin katak saugati deʼit atu serbí Maromak.—Sal 73:​11-13.

17. Saida mak bele ajuda ita atu nafatin hakbesik ho Jeová?

¹⁷ Saida mak ajuda hakerek-naʼin ba salmo neʼe atu hadiʼa ninia hanoin? Nia medita kona-ba buat neʼebé sei akontese ba sira neʼebé la tau fiar tan ba Jeová. (Sal 73:​18, 19, 27) Nia mós hanoin kona-ba benefísiu husi serbí Jeová. (Sal 73:24) Ita mós bele hanoin kona-ba bensaun neʼebé Jeová fó mai ita, no imajina ita-nia moris sei sai oinsá se ita la serbí tan Jeová. Hodi halo nuneʼe sei ajuda ita atu laran-metin nafatin. No hanesan hakerek-naʼin ba salmo, ita mós bele dehan: “Kona-ba haʼu, atu hakbesik ba Maromak mak diʼak mai haʼu.”—Sal 73:28.

18. Tanbasá ita la presiza taʼuk kona-ba futuru?

¹⁸ Ita bele tahan hasoru susar naran deʼit durante loron ikus sira-neʼe tanba ita mak “atan ba Maromak neʼebé loos no moris”. (1 Tes 1:9) Ita-nia Maromak iha duni no nia sempre ajuda ita. Nia ajuda ona ninia atan sira iha tempu uluk, no nia mós sei ajuda ita ohin loron. Lakleur tan ita sei hasoru terus boot. Maibé ita la mesak, Jeová hamutuk ho ita. (Isa 41:10) Mai ita hotu “sai brani no dehan: ‘Jeová mak haʼu-nia ajuda-naʼin; haʼu sei nunka taʼuk.’”—Ebr 13:​5, 6.