1. Ino ty hagnampe o vahoa i Jehovah-o hahavita hanompo aze avao ndra tie miatreke olagne aza?

 “FOTOAN-TSAROTSE mahaore” ze iaignantika zao hoe ty Baiboly. (2 Tim. 3:1) Ankoatse ty olagne fa atrehe o ndatio amy ty tontolo toy eto, le mbe miatreke fanoheragne naho fagnenjehagne ka o vahoa i Jehovah-o. Ino ty hagnampe antika hahavita hanompo i Jehovah avao ndra tie eo aza o olagne reo? Agnisa ty magnampe antika amy izay ty fahafantarantikagne tie “Andrianagnahare velogne” ty Jehovah.​—Jer. 10:10; 2 Tim. 1:12.

2. Ino amy ty raha fantantikagne miomba i Jehovah ro magnatanjake antika?

² Mahaonigne ze kila olagne mahazo antika ty Jehovah sady te hagnampe antika lognandro mba hahavita hiatreke ireo. (2 Tan. 16:9; Sal. 23:4) Hahavita hiatreke ze olagne mahazo antika tikagne naho mitadidy tie mitretré naho vognogne hagnampe antika i Andrianagnaharentikagney. Izay ty raha niseho tamy i Davida Mpanjaka.

3. Ino ty tea i Davida horehafegne naho fa nirehake reke tie “velogne ty Jehovah”?

³ Nahafantatse i Jehovah ty Davida sady tena natoky aze. Naho fa nite hamono i Davida i fahavalo’e rey, agnisa izay ty Saoly, le nangatake fagnampeagne tamy i Jehovah reke. (Sal. 18:6) Naho fa namale i vavake natao’ey ty Jehovah sady namonje aze, le nirehake reke tie “velogne ty Jehovah!” (Sal. 18:46) Ino ty tea i Davida horehafegne? Nirehake ze boke raike zay tie nasongady i Davida teo fa “Andrianagnahare maregne ty Jehovah sady lava magnampe ty mpanompo’e avao.” Ie, tena nitrea i David tamy ty raha niaigna’e tie velogne i Andrianagnahare’ey, le izay ty nahavy aze vao mainke tapa-kevetse ty hanompo i Jehovah avao naho hidera aze.​—Sal. 18:28, 29, 49.

4. Ino ty soa horambesentika naho heverentikagne ho Andrianagnahare velogne ty Jehovah?

 ⁴ Naho rese lahatse tika tie Andrianagnahare velogne ty Jehovah, le handrisike antika hazoto hanompo aze avao zay. Hanagne hery hiatrehagne olagne tika ty amy izay sady hanohy hiasa mafe amy ty fanompoagne aze. Ho tapa-kevetse ty hifandrambe maifitse ama’e avao ka tika.

HAGNATANJAKE AZO I ANDRIANAGNAHARE VELOGNEY

5. Ino ty toky anagnantika ndra tie miatreke fitsapagne aza tikagne? (Filipianina 4:13)

⁵ Hahavita hiatreke fitsapagne lahibey ndra kede tika naho mitadidy avao tie velogne ty Jehovah sady lava eo avao mba hanohagne antikagne. Naho ty maregne le tsy misy dika’e ama’e ty olagne manjò antika. Mahery Fara Tampo’e reke, le afake magnomey hery antika mba hahavitantika hiaretse. (Vakio ty Filipianina 4:13.) Magnomey toky antika zay naho fa miatreke olagne tikagne. Naho treantika tie fa nagnampe antika hahavita hiatreke tsapa hevetse madinedineke ty Jehovah, le hatoky tika fa hagnampe antikagne hiatreke tsapa hevetse lahibey ka reke.

6. Ino amy ty raha niaigna i Davida tamy tie ireke mbe nikede ro nampitombo ty fatokisa’e i Jehovah?

⁶ Andao handineke raha roe niaigna i Davida, nampitombo ty fatokisa’e i Jehovah. Nisy orsa naho liona nangalake tamy i agnondrin-drae’e rey tamy tie i Davida mbe nikede. Bey herim-po reke, le hinea’e i biby rey le nalae’e i agnondry rey. Faie tsy nieretseretse ty Davida tie noho ty heri’e manokagne ty nahavita’e izay. Fanta’e fa i Jehovah ty nagnomey hery aze. (1 Sam. 17:34-37) Tsy nihaligno i Davida o raha reo. Naho fa nisaintsaigne ireo reke, le nanjare natoky tie mbe afake hagnomey hery aze ka i Andrianagnahare velogney amy ty hoavy.

7. Ino ty raha nifantoha i Davida, le nagnino zay ro nagnampe aze hahavita hialy tamy i Goliata?

⁷ Nitilike ty tafy o Israelitao tan-tobe agne reke tafara tatoy. Mbe ni-20 taogne latsake reke ty tamy izay. Nitrea’e tie natahotse i maramila rey, satria nisy Filistina bey naho abo atao tihoe Goliata ‘nipay aly amy ty tafy o Israelio.’ (1 Sam. 17:10, 11) Natahotse i maramila rey satria nifantoke tamy ty habey i Filistinay naho ty vava natao’e. (1 Sam. 17:24, 25) Faie raha hafa ty nifantoha i Davida. Nitrea’e tie tsy nipay aly tamy ty tafy o Israelio ty Goliata fa ‘nipay aly tamy ty tafy i Andrianagnahare velogney.’ (1 Sam. 17:26) I Jehovah ty natao i Davida an-tsaigne. Tena natoky ty Davida fa mbe hagnampe aze ndraike i Andrianagnahare nagnampe aze tamy ie mbe ni-mpiarake agnondrỳ. Nialy tamy i Goliata reke le nandresy satria nampea i Jehovah.​—1 Sam. 17:45-51.

8. Ino ty hahavy antika vao mainke hatoky tie hagnampe antika ty Jehovah naho fa miatreke fitsapagne tikagne? (Henteo i sarey.)

⁸ Hahavita hiatreke tsapa hevetse ka tikagne naho mitadidy tie vognogne hagnampe antika i Andrianagnahare velogney. (Sal. 118:6) Hagnamafe ty fatokisantikagne aze ty fisaintsaignagne ty raha fa natao’e ho antika taloha. Mamakia tantara mampiseho ty fomba namonjea i Jehovah ty mpanompo’e amy Baiboly ao. (Isaia 37:17, 33-37) Magnentea ka ndra mamakia ty tantara ty rahalahy naho ty rahavave nampea i Jehovah amy izao, amy jw.org ao. Ankoatse izay, le tadidio ty fotoagne fa nagnampea i Jehovah azo. Va’e hahatsapa rehe tie mbe tsy nanao raha miambake ho azo ty Jehovah, ohatse nagnavotse azo tamy ty orsa ndra liona. Faie naho ty maregne, le fa maro ty raha fa natao i Jehovah ho azo tamy ty fiaigna’o! Nitaogne azo hifandrambe ama’e reke. (Jaona 6:44) Noho ty  fagnampea’e ka ty mahavy azo mbe manompo aze ty amy izao. Magnino areke naho mangatake amy i Jehovah rehe mba hampea’e hahatadidy ty fomba namalea’e ty vavake natao’o, ty fagnampeagne nimei’e azo tamy ty fotoagne nila’o aze naho ty nikarakara’e azo tamy ty fotoan-tsarotse? Naho misaintsaigne o raha reo rehe, le vao mainke hatoky tie mbe hagnampe azo avao ty Jehovah.

9. Ino ty toko’e hotadidientika naho fa miatreke fitsapagne? (Ohabolana 27:11)

⁹ Naho mihevetse i Jehovah ho Andrianagnahare velogne tika, le handrae ty fitsapagne mahazo antikagne amy ty fomba soa. Nagnino tika ro mirehake izay? Misy raha lahibey toko’e hifantohantika naho fa miatreke fitsapagne tika. Nirehake ty Devoly tie hivalike amy i Jehovah tika naho fa miatreke olagne. Misy voka’e amy i Jehovah areke ze raha ataontikagne naho fa miatreke fitsapagne. (Joba 1:10, 11; vakio ty Ohabolana 27:11.) Faie naho tsy mivalike tika ndra tie miatreke fitsapagne aza, le atorontika boake amy izay tie teantika ty Jehovah sady mpavande ty Devoly. Manohetse ty vahoa i Jehovah vao ty fanjakagne ama’areo agne, sa rehe managne olagne ara-bola, ndra ka tsy liagne amy i talily soay ty ndaty itoria’o, ndra misy raha hafa va’e mampijale azo? Naho izay ty raha misy, le tadidio fa magnomey fahafahagne azo mba hampifale ty arofo i Jehovah zay. Tadidio ka fa tsy hienga antika hiatreke tsapa hevetse mihoatse ty zakantikagne reke. (1 Kor. 10:13) Homei’e hery rehe mba hahavita’o hiaretse.

HAMALE SOA AZO I ANDRIANAGNAHARE VELOGNEY

10. Ino ty hatao i Andrianagnahare velogney hoahy ze manompo aze?

¹⁰ Lava mamale soa ze manompo aze avao ty Jehovah. (Heb. 11:6) Omei’e fiadanagne naho fifaleagne tika ty amy izao, le amy ty hoavy homei’e fiaignagne nainai’e. Matoky tanterake tika tie te hamale soa antikagne ty Jehovah sady managne hery hanoagne izay. Izay ty mahavy antika te hagnomey lognandro ze fara’e soa boake amantikagne, manahake  ty natao ty mpanompo’e tsy nivalike taloha. Izay ka ty natao i Timoty tamy ty taonjato voaloha’e.​—Heb. 6:10-12.

11. Ino ty nahavy i Timoty niasa mafe tagnivo o fiangonagneo eo? (1 Timoty 4:10)

¹¹ Vakio ty 1 Timoty 4:10. Tena nino ty Timoty tie hamale soa aze ty Andrianagnahare. Le izay ty nahavy aze niasa mafe hoahy i Jehovah naho ty ndaty hafa. Tamy ty fomba akore? Nampirisike aze ty Paoly mba hikezake ho mpampianatse mahay amy i fanompoagney ey naho amo o fiangonagneo eo. Nirehafe i Paoly ka ty Timoty mba ho modely soa hoahy ty mpiharo finoagne ama’e, ndra tanora zay ndra ndaty bey. Nisy asa sarotse ka nankinegne tama’e, agnisa izay ty magnomey torohevetse hentetse naho aman-katea ze ndaty mila izay. (1 Tim. 4:11-16; 2 Tim. 4:1-5) Va’e tsy nahatrea ty asa mafe atao i Timoty o ndatio kindraike ndra tsy nankasitrake aze. Faie natoky ty Timoty fa hamale soa aze ty Jehovah.​—Rom. 2:6, 7.

12. Ino ty mahavy ty androanavi-pagnahy miasa mafe agnivo o fiangonagneo eo? (Henteo i sarey.)

¹² Afake matoky ka ty androanavi-pagnahy amy izao tie fohy i Jehovah sady sarobily ama’e ty asa soa atao iareo. Mitilike agnondry, mampianatse naho mitory o androanavi-pagnahio, faie mbe magnampe amy ty asa fagnoregnagne naho magnampe ze nizoem-boigne ka ty ankamaroa iareo. Agnisa ty Antoko Mpitilike Marare, ndra agnisa ty Komity Mifandrae amy ty Lapotaly ka ty ila’e. Fanta o androanavi-pagnahio fa ahy i Jehovah o fiangonagneo fa tsy an’o ndaty. Miasa amy ty fo areke iareo naho fa manao ty andraiky iareo sady matoky tanterake tie hamale soa ty asa mafe atao iareo ty Andrianagnahare.​—Kol. 3:23, 24.

13. Ino ty tsapa i Jehovah naho fa mahafohigne ty kezake ataontika amy ty fanompoagne aze?

¹³ Tsy ty ndaty iaby ro afake ho androanavi-pagnahy. Faie sambe afake magnomey raha i Jehovah tika tsikiraidraike. Fale i  Andrianagnaharentikagney naho manao ze fara’e soa vitantika amy ty fanompoagne aze tikagne. Naho manao fagnomezagne mba hanohagnagne i asa magneran-taney tika, le voamare i Jehovah zay ndra tie kede avao aza ty nimeintikagne. Fale ka reke mahafohigne ty saro-kegnatse mikezake manangan-tagnagne mba hagnomey toin-drehake am-pivoriagne agne naho mahafohigne antika mamela ty fahadisoa ty hafa. Naho mahatsapa rehe tie tsy mahavita bey hoahy i Jehovah arake ty iteava’o aze, le matokia fa sarobily ama’e ze azo’o atao ho aze. Tea azo reke, le hamale soa azo.​—Lioka 21:1-4.

MIHARINEA I ANDRIANAGNAHARE VELOGNEY AVAO

14. Nagnino ty fifandrambesagne maifitse amy i Jehovah ro hagnampe antikagne tsy hivalike? (Henteo i sarey.)

¹⁴ Naho mifandrambe maifitse amy i Jehovah tika, le ho mora amantikagne ty tsy hivalike ama’e. Nanao hoe izay ty Josefa. Tapa-kevetse ty tsy haloto findesam-batagne reke. Nifandrambe maifitse tamy i Jehovah reke, le tsy te hanao raha mampalahelo aze. (Gen. 39:9) Mila manokagne fotoagne mba hivavahagne naho hianaragne ty Saontsy i Jehovah tika naho te hifandrambe maifitse ama’e. Hagnampe antika vao mainke hiharine aze ty fanoagne izay. Naho mifandrambe maifitse amy i Jehovah tika le tsy hanao raha tsy mampifale Aze, manahake i Josefa.​—Jak. 4:8.

15. Ino ty lesogne ianarantika boake tamy ty raha niseho tamo o Israelitao tamy iareo tam-patram-bey agney? (Hebreo 3:12)

¹⁵ Ze ndaty tsy matoky i Jehovah, le mora mivalike ama’e. Andao hodinehentika ty raha niseho tamo o Israelitao tamy iareo tamy i fatrambeỳ agney. Ninoa iareo tie nisy ty Jehovah, faie nanomboke nisalasala iareo tie hagnomey ze raha paliae iareo vao reke. Foy ontane iaby aza iareo tie: “Amantikagne eto vao ty Jehovah sa tsy eto?” (Eks. 17:2, 7) Voka’e, nanjare nivalike tamy i Jehovah iareo. Azo antoke fa tsy te hagnorike ty modely raty nimey iareo tikagne, satria ohatse fampitaoagne antika io.​—Vakio ty Hebreo 3:12.

16. Ino ty raha va’e hitsapa ty finoantika?

 ¹⁶ Manao ze hanimbagne ty fifandrambesantika amy i Jehovah ty tontolo toy. Maro ty tsy mino tie misy ty Andrianagnahare. Mateteke, le hoe raha milamigne ty fiaigna o ndaty tsy miraharaha ty fitsipin’Andrianagnahareo. Va’e hitsapa ty finoantika ty fahatreavagne izay. Va’e hinoantikagne avao tie misy ty Andrianagnahare, faie hanomboke hisalasala tika tie hagnampe antikagne vao reke. Nahatsapa hoe izay ka ty mpanoratse ty Salamo 73. Nitrea’e tie tsy nidare ty lilin’Andrianagnahare ty ndaty nagnodidigne aze faie mbe fale tamy ty fiaignagne avao. Hafara’e nanjare nisalasala reke tie toko’e hanompo an’Andrianagnahare sa tsy toko’e.​—Sal. 73:11-13.

17. Ino ty hagnampe antika hifandrambe maifitse amy i Jehovah avao?

¹⁷ Ino ty nagnampe i mpanao salamoy hagnova ty fomba fisaigna’e? Nisaintsaigne’e ty raha hahazo o ndaty magnaligno i Jehovah-o. (Sal. 73:18, 19, 27) Nidinehe’e ka ty soa nirambese’e noho ireke manompo i Jehovah. (Sal. 73:24) Afake misaintsaigne ty fitahiagne nimea i Jehovah antikagne ka tika. Saintsaigno ka tie ho nanao akore ty fiaignantika naho tsy nanompo i Jehovah tikagne. Hahavita tsy hivalike tika naho manao ireo sady ho tapa-kevetse manahake ty mpanao salamo toy tie: “Ty miharine an’Andrianagnahare ro soa tie amako.”​—Sal. 73:28.

18. Nagnino tika ro tsy toko’e hatahotse ty raha hiseho amy ty hoavy?

¹⁸ Ndra inogn’ino ty olagne hatrehentika amy ty andro fara’e toy, le hovitantika ty hiatreke izay satria ‘manompo i Andrianagnahare velogne naho maregney’ tikagne. (1 Tes. 1:9) Mitretré antika i Andrianagnaharentikagney sady lava hagnampe antika avao. Tagnila o mpanompo’eo eo reke taloha, le mbe hoe izay avao ka ty amy izao. Hiatreke i haoreagne lahibeỳ tika tsy ho ela. Faie tsy ho irerike tika fa ho amantikagne avao ty Jehovah. (Isaia 41:10) Lonike areke tika ho ‘bey herim-po ty hirehake tie: “I Jehovah ty mpagnampe ahy le tsy hatahotse raho.”’​—Heb. 13:5, 6.