1. I mpsini leswi pfunaka vanhu va Yehovha swaku va tama va mu tirhela hambi va kumanaka ni swikarhatu?

 LOKO Bibele li vulavula hi minkama ya hina, li vula swaku hi hanya ka “minkama ya ku karhata leyi swi tikaka ku hanya ka yona.” (2 Tm. 3:1) Vanhu hinkwavu va kumana ni swikarhatu ka minkama ya hina kambe vanhu va Yehovha minkama yin’wani va kumana ni ku hluphiwa. Se i mpsini leswi pfunaka vanhu va Yehovha swaku va tama va mu tirhela hambi va kumana ni swikarhatu hinkwaswu leswi? Xivangelo xin’wani hi leswaku va khumbuka swaku Yehovha i “Xikwembu lexi hanyaka”. — Yer. 10:10; 2 Tm. 1:12.

2. I yini leswi hi swi tivaka hi Yehovha leswi swi hi tiyisaka hintamu?

² Yehovha i Munhu wa hikakunene. Loko hi kumana ni swikarhatu a lavetela tindlela ta ku hi pfuna. (2 Tik. 16:9; Ps. 23:4) Ku tiva swaku Yehovha a ni mhaka na hina funtshi a lava ku hi pfuna, swi hi nyika ntamu wa ku va hi lwisana ni swikarhatu swin’wani ni swin’wani. Ka maparagrafu lawa ma landzelaka, hi ta vona swaku Yehovha a mu pfunise ku yini Davhida ni vanhu van’wani lava va nga tirhela Yehovha hi ku tshembeka.

3. Davhida a a lava ku vula yini nkama a nga ku “Yehovha wa hanya”?

³ Davhida a a mu tiva kahle Yehovha naswona a a mu tshemba. Nkama lowu Hosi Sawulo ni vanhu van’wani lava a va mu nyenya Davhida a va lava ku mu dlaya, a khongelile ka Yehovha a kombela swaku a mu pfuna. (Ps. 18:6) Nkama Yehovha a nga xi hlamula xikhongelo xa Davhida a tlhela a mu pfuna, Davhida a game a hlaya swaku “Yehovha wa hanya!” (Ps. 18:46) Davhida a a lava ku vula yini hi marito lawa? Buku lin’wani li vula swaku hi marito lawa, Davhida a o kombisa swaku a a mu tshemba hintamu Yehovha funtshi a a swi tshemba swaku “Yehovha hi yena ntsena Xikwembu xa ntiyiso lweyi  a nga tinyimisela ku pfuna vanhu va yena.” Phela Davhida a swi vonile leswo ka wutomi la yena hikusa a a swi tiva swaku Yehovha minkama hinkwayu a a ta mu pfuna loko a kumana ni swikarhatu. Phela ku tiva leswo swi pfune Davhida kuva a tama a tirhela Yehovha hi ku tshembeka a tlhela a mu dzunisa. — Ps. 18:28, 29, 49.

4. Hi mhaka muni swi li swa lisima ku tiyiseka swaku Yehovha i Xikwembu lexi hanyaka?

⁴ Phela loko hi tiyiseka swaku Yehovha i Xikwembu lexi hanyaka, swi ta hi pfuna swaku hi tama hi mu tirhela hi ku hiseka. Swi ta hi nyika ntamu wa leswaku hi lwisana ni swikarhatu swin’wani ni swin’wani leswi hi nga ha kumanaka na swona, hi tlhela hi yendla hinkwaswu leswi hi nga swi kotaka swaku hi mu tirhela. Funtshi swi ta hi pfuna swaku hi va kusuhi na Yehovha.

XIKWEMBU LEXI HANYAKA XI TA KU TIYISA

5. Loko hi kumana ni swikarhatu hi nga tiyiseka hi yini? (Vafilipiya 4:13)

⁵ Hi nga lwisana ni swikarhatu hinkwaswu swa hina, ku nga na mhaka swaku i swikulu kumbe i switsongo loko hi khumbuka swaku Yehovha i Xikwembu lexi hanyaka naswona a lava ku hi pfuna. Phela Yehovha a nge hluliwi hi nchumu hikusa yena i Xikwembu xa Matimba Hinkwawu, naswona a ta hi nyika matimba lawa hi ma lavaka leswaku hi tiyisela. (Lerha Vafilipiya 4:13.) Hi nga lwisana ni swikarhatu hinkwaswu leswi hi nga na swona na hi tshemba swaku Yehovha a ta hi pfuna swaku hi swi hlula. Loko hi vona swaku Yehovha wa hi pfuna ka swikarhatu swa hina swaswitsongo, hi ta ya hi tiyiseka swaku Yehovha a ta hi nyika ntamu swaku hi swi kota ku lwisana ni swikarhatu swaswikulu.

6. I mpsini leswi nga yendlekela Davhida leswi nga mu pfuna swaku a ya a tshemba Yehovha?

⁶ Ku ve ni swiyimu swimbirhi leswi nga pfuna Davhida swaku a ya a mu tshemba hintamu Yehovha. Na wa ha li mutsongo, siku lin’wani ku humelele ursu leli nga teka nyempfu ya papayi wa yena, se a lwa na lona; kasi ka khambi lin’wani nghonyama na yona a yi teke nyempfu ka ntlhambi wa papayi wa yena. Ka makhambi lawa mambirhi a swi kotile ku lwisana ni swiharhi leswi, hambileswi a swi li swikulu, a tlhela a ponisa xinyempfani lexi a xi tekiwile. Kambe Davhida a nga zanga a swi pimisile swaku a swi kotile leswo hi ntamu wa yena ntsena. Kambe a a swi tiva swaku i Yehovha lweyi a nga mu yendla swaku a nga chavi a tlhela a va ni ntamu wa ku hlula ka swiyimu leswiyani. (1 Sa. 17:34-37) Davhida minkama hinkwayu a a swi khumbuka swiyimu leswi swa swimbirhi. Funtshi loko a pimisa hi leswi swi nga mu yendlekela, a a ya a mu tshemba hintamu Yehovha na a tiyiseka swaku Xikwembu lexi hanyaka a xi ta mu pfuna ka swikarhatu leswi a a ta kumana na swona ka nkama lowu taka.

7. I mpsini leswi nga pfuna Davhida swaku a lwa na Goliyadi a tlhela a mu hlula?

⁷ Hi ku famba ka nkama na Davhida a nga se tlhanganisa 20 wa malembe, a yile lomu masonchwa ya Israyele a ma li kona. A tsumbule swaku phela a masonchwa a mo chava, hikusa Mufilista mun’wani wa ku leha swinene lweyi a vitaniwaka Goliyadi ‘a poyile Vayisrayele’. (1 Sa. 17:10, 11) Phela masonchwa ya Israyele a ma chava hikusa a mo pimisa ntsena hi leswi Goliyadi a a lehile ni leswi a a va chavisela hi swona. (1 Sa. 17:24, 25) Kambe Davhida a nga swi yendlanga leswo. A a swi tiva leswaku Goliyadi a a ngo poyila Vayisrayele ntsena, kambe a a poyila a tlhela a lwa ni “Xikwembu lexi hanyaka.” (1 Sa. 17:26) Davhida a a tshemba Yehovha! A a swi tiva leswaku leswi a nga mu pfuna nkama na a li mulusi wa tinyempfu ta papayi wa yena, ni swoswi a a ta mu pfuna. Hi mhaka leyo, Davhida a swi kotile ku lwa na Goliyadi a tlhela a mu hlula! — 1 Sa. 17:45-51.

8. I mpsini swi nga hi pfunaka ku tshemba swaku Yehovha minkama hinkwayu a ta hi pfuna? (Vona mufoto.)

⁸ Na hina hi nga swi kota ku lwisana ni swikarhatu loko hi khumbuka swaku Yehovha Xikwembu lexi hanyaka minkama hinkwayu a tinyimisele ku  hi pfuna. (Ps. 118:6) Loko hi khumbuka leswi Yehovha a nga swi yendla ka nkama lowu nga hundza, hi ta ya hi mu tshemba. Se u nga ha lerha hi leswi Yehovha a nga va pfunisa xiswona vanhu va yena, lava ku vulavuliwaka hi vona ka Bibele. (Esa. 37:17, 33-37) U nga ha lerha hi swiperiyensiya swa vamakwerhu va hina ka site la jw.org. Ku lerha hi swiperiyensiya leswo swa hi tiyisekisa swaku Yehovha a tama a hi pfuna ni swoswi. U nga ha khumbuka nakambe minkama leyi Yehovha a nga ku pfuna wena hi wexe. Swi nga ha yendleka u pimisa swaku Yehovha a nga se ku pfuna hi ndlela ya ku hlamalisa ya ku fana ni ku lwa ni ursu kumbe nghonyama. Kambe Yehovha a na wena minkama hinkwayu! Yena a yendle swaku u mu tiva u tlhela u va munghanu wa yena. (Yoh. 6:44) Hi mhaka ya leswi a ku pfunaka, wa swi kota ku tama u tshembeka ka yena. Se u nga ha khongela u mu kombela Yehovha swaku a ku khumbukisa minkama leyi a nga hlamula swikhongelo swa wena ni leswi a nga ku pfunisa xiswona nkama lowu u nga kumana ni swikarhatu leswi a wu lava ku pfuniwa ka swona kumbe nkama a nga ku pfuna loko u kumana ni xikarhatu xaxikulu ka wutomi la wena. Ku pimisa hi swilo hinkwaswu leswi, swi ta hi pfuna swaku hi tiyiseka swaku impela Yehovha minkama hinkwayu a ta hi pfuna.

9. Hi fanele hi khumbuka yini nkama hi kumanaka ni swikarhatu? (Swivuriso 27:11)

⁹ Ku vona Yehovha na a li Xikwembu lexi hanyaka, swi ta hi pfuna nkama lowu hi kumanaka ni swikarhatu. Hi fanele hi khumbuka mhaka ya lisima ya leswaku loko hi kumana ni swikarhatu, Sathana a vule swaku hi ta tshika Yehovha. Se leswi hi swi yendlaka loko hi li ka swikarhatu, swa mu khumba Yehovha. (Yob. 1:10, 11; lerha Swivuriso 27:11.) Se loko hi tama hi tshembeka loko hi kumana ni swikarhatu, hi kombisa swaku ha mu rhandza Yehovha hi tlhela hi kombisa swaku Sathana i muhembi. Se loko swi ku na wena u kumana ni swikarhatu swa ku fana ni ku hluphiwa hi mfumu, ku txona, ku kanetiwa a ku chumayeleni kumbe xikarhatu xin’wani, khumbuka leswaku u pfulekeliwile hi nkama wa leswaku u tsakisa Yehovha. Khumbuka swaku Yehovha a nge tshuki a ku tshikile ka xiyimu lexi nga ta yendla leswaku u nga gwenti ni ku yendla nchumu. (1 Ko. 10:13) Phela  yena minkama hinkwayu a ta ku nyika matimba leswaku u swi kota ku tiyisela.

XIKWEMBU LEXI HANYAKA XI TA KU HAKELA

10. Yehovha a va tshembisa yini lava va tshembekaka ka yena?

¹⁰ Minkama hinkwayu Yehovha wa va hakela lava va tshembekaka ka yena. (Heb. 11:6) A yendla leswo hi ku va nyika ku rhula, a va pfuna swaku va tsaka swoswi a tlhela a va tshembisa wutomi la ku kala li nga heli ka nkama lowu taka. Se hina hi mu tshemba hi ku helela Yehovha hikusa ha swi tiva swaku a ta hi hakela. Phela a na wona matimba ya ku swi yendla leswo. Hi mhaka leyo, a hi tameni hi yendla leswi hi nga swi kotaka swaku hi mu gandzela hilani vanhu va yena va minkameni ya khale va nga swi yendla hi kona. Phela hi leswo swi nga yendliwa hi Timotiya. — Heb. 6:10-12.

11. Hi mhaka muni Timotiya a a tirha hi matimba abandleni? (1 Timotiya 4:10)

¹¹ Lerha 1 Timotiya 4:10. Timotiya a a li ni lipfumelo ka Xikwembu lexi hanyaka. Hi mhaka leyo, a tirhe hi matimba a tirhela Yehovha a tlhela a pfuna vamakwerhu. Pawulo a mu kutxile Timotiya swaku a va mudjondzisi wamunene abandleni ni ka ntirho wa ku chumayela. Pawulo a tlhele a mu pfuna swaku a va xikombiso xaxinene ka majovhem ni ka vanhu lava nga kula. Timotiya a tlhele a nyikiwa mintirho ya ku karhata leyi a yi patsa ku kawuka hi ndlela ya lirhandzu lava a va lava ku kawukiwa. (1 Tm. 4:11-16; 2 Tm. 4:1-5) Minkama yin’wani vanhu a va nga swi voni leswi Timotiya a a swi yendla, kasi van’wani a vo kala va nga mu khensi. Kambe Timotiya a a swi tiva swaku Yehovha, ku nga munhu wa lisima hintamu a a yi vona minzamu hinkwayu leyi a a yi yendla naswona a a ta mu hakela. — Rom. 2:6, 7.

12. Hi mhaka muni madoda ma yendla hinkwaswu leswaku ma yendla mintirho abandleni? (Vona mufoto.)

¹² Ninamuntlha madoda ma nga tiyiseka swaku Yehovha wa swi vona hinkwaswu leswi ma swi yendlaka naswona a swi nyika lisima hintamu. Phela handle ka ku risa bandla ni ku djondzisa ma tlhela ma chumayela, madoda man’wani ma pfunisa ka ntirho wa ku yaka ni wa ku pfuna lava nga  humeleliwa hi tinghozi. Madoda man’wani ma tirha ka Mintlawa Leyi Pfuxelaka Lava Nga Swibelhela kumbe ka Ma Comissão Ya Ku Vulavulisana Ni Swibelhela. Madoda lawa ma yendlaka mintirho leyi, ma swi khumbuka swaku a bandla a hi la munhu, i la Yehovha. Hi mhaka ya leswo, ma yendla hinkwaswu leswi swi nga ka matimba ya wona na ma tiyiseka swaku Yehovha a ta ma hakela hi hinkwaswu leswi ma swi yendlaka. — Kol. 3:23, 24.

13. Yehovha a titwisa ku yini hi minzamu leyi hi yi yendlaka swaku hi mu tirhela?

¹³ A hi vamakwerhu hinkwavu va nga vaka madoda. Kambe hinkwerhu, hi nga swi kota ku mu nyika xan’wanchumu Yehovha. Phela Yehovha a tsaka hintamu loko a hi vona na hi yendla hinkwaswu leswi hi swi kotaka swaku hi mu tirhela. Wa swi vona loko hi nyikela hi male ya hina swaku hi pfunisa ka ntirho lowu yendliwaka amisaveni hinkwayu, hambiloko yi li yitsongo. Naswona wa tsaka loko a hi vona na hi yendla minzamu swaku hi hlula ku chava, hi tlakusa voko amintlhanganwini swaku hi hlamula. Funtshi Yehovha wa tibuma hi hina loko a hi vona na hi tikarhatela ku rivalela vamakwerhu. Se hambiloko u vona ingi leswi u swi yendlelaka Yehovha i switsongo hintamu, tiyiseka swaku yena a swi nyika lisima. Yehovha wa ku rhandza funtshi a ta ku hakela. — Luk. 21:1-4.

TAMA U VA KUSUHI NI XIKWEMBU LEXI HANYAKA

14. Wunghanu la ku tiya na Yehovha li nga hi pfunisa ku yini swaku hi tama hi tshembeka ka yena? (Vona mufoto.)

¹⁴ Loko hi vona Yehovha na a li munhu wa hikakunene ka hina, swi ta hi vevukela ku tama hi tshembeka ka yena. Hi leswo Yosefa a nga swi yendla. Yosefa a yalile ku yendla wuntunga la swa masangu hileswi a a nga swi lavi ku mu kwatisa Yehovha. (Gen. 39:9) Na hina loko hi lava leswaku Yehovha a va munhu wa hikakunene ka hina, hi fanele hi bula na yena hi ku khongela, ni ku djondza Rito la yena ku nga Bibele. Hi ndlela leyo, wunghanu la hina na Yehovha li ta ya li kula swinene. Ku fana na Yosefa, wunghanu la ku tiya leli hi nga na lona na Yehovha li ta hi pfuna swaku hi nga lavi ku yendla nchumu lexi nga mu kwatisaka Yehovha. — Yak. 4:8.

15. Hi djondza yini ka leswi nga yendlekela Vayisrayele nkama na va li mananga? (Vaheberu 3:12)

 ¹⁵ Phela lava va khohlwaka swaku Yehovha i Xikwembu lexi hanyaka, swi nga yendla swaku va mu tshika, va nga ha tshembeki ka yena. Hi leswo swi nga yendlekela Vayisrayele nkama na va li mananga. Phela a va swi tiva swaku Yehovha wa hanya, kambe va sungule ku kanakana leswaku Yehovha a a ta va hlayisa. Hi mhaka leyo va vutisile va ku: “Indjhe Yehovha a kona xikarhi ka hina kumbe a nga kona?” (Eks. 17:2, 7) Leswo swi yendle swaku hi wugamu va djikela Yehovha. Hina a hi swi lavi ku fana na vona, ivi hi sungula ku kala hi nga ha mu yingisi Yehovha. — Lerha Vaheberu 3:12.

16. Hi mhaka muni swi nga ha karhataka ku tama hi va ni lipfumelo la ku tiya?

¹⁶ A swi vevuki ku tama hi va kusuhi na Yehovha ka misava leyi. Vanhu vanyingi a va kholwi swaku Xikwembu xi kona. Minkama yin’wani swi nga ha tikomba ingi lava va kalaka va nga na mhaka ni Xikwembu swi va fambela kahle awuton’wini. Phela leswo swi nga ha khumba lipfumelo la hina. I ntiyiso swaku a hi nge zi hi pimisa leswaku Yehovha a nga kona, kambe hi nga sungula ku kanakana swaku impela a ta hi pfuna. Hi leswo swi nga yendleka mutsali wa buku la Tipisalema 73. Vanhu lava a a hanya na vona a va nga na mhaka ni minawu ya Xikwembu, a va hanyisa xileswi a va swi lavisa xiswona. Hi mhaka leyo, a sungule ku kanakana swaku a swi pfuna ku tama a tirhela Yehovha. — Ps. 73:11-13.

17. I yini lexi nga ta hi pfuna ku tama hi tirhela Yehovha?

¹⁷ I mpsini leswi nga pfuna mupisalema swaku a txintxa mavonelo ya yena? A pimise hi leswi a swi ta yendlekela lava va tshikaka ku tshemba Yehovha. (Ps. 73:18, 19, 27) A tlhele a nyimanyana a pimisa hi minkateko leyi nga kona hi ku va munhu a tirhela Yehovha. (Ps. 73:24) Na hina hi nga pimisa hi ndlela leyi Yehovha a nga hi katekisa hi yona. Se hi swi fanisa ni swaku wutomi la hina a li ta tshamisa ku yini loko a hi nga mu tirheli Yehovha. Ku khumbuka minchumu leyi, swi ta hi pfuna swaku hi tama hi tirhela Yehovha hi ku tshembeka naswona ku fana na mupisalema, hi ta swi vona swaku ‘ku tshinela ka Xikwembu i swinene ka hina.’ — Ps. 73:28.

18. Hi mhaka muni hi nga fanelanga hi chava leswi nga ta yendleka ka nkama lowu taka?

¹⁸ Hi nga swi kota ku lwisana ni xikarhatu xin’wani ni xin’wani lexi hi nga ha kumanaka na xona hikusa hina hi “tirhela Xikwembu lexi hanyaka ni xa ntiyiso.” (1 Tes. 1:9) Yehovha i Munhu wa hikakunene naswona a lunghile swaku a hi pfuna. Yena a pfune vanhu va yena va khale naswona na hina a ta hi pfuna. Ku nga li khale, hi ta kumana ni nhlomulu wawukulu. Kambe a hi hoxe; Yehovha a na hina. (Esa. 41:10) Hi mhaka leyo, a hi nge “chavi ku vula hi ku: ‘Yehovha i mupfuni wa mina; a ni nge chavi nchumu.’” — Heb. 13:5, 6.