1. Kiki ekikonyera abantu ba Yahwe kwikara nibamuramya n’obukiraaba ngu nibaraba omu bizibu?

 BAIBULI negamba ngu tuli “omu biro ebyakabi kaingi”. (2 Tim. 3:1) Kwongerra ha bizibu buli omu ebyatangatangana omu nsi enu, Abakaiso ba Yahwe nibahikwaho okuhakanizibwa n’okuhiiganizibwa. Kiki ekitukonyera kwikara nituramya Yahwe nobukiraaba ngu nituraba omu bizibu binu? Ensonga enkuru niyo ngu tweroliire obukonyezi bwa Yahwe kandi twamumanya nka “Ruhanga omwomezi.”—Yer. 10:10; 2 Tim. 1:12.

2. Yahwe ali Ruhanga omwomeezi omu mulingo ki?

² Yahwe ali Muntu wenyini ow’arora buli kizibu kyona ekiturabamu kandi aikara nagonza kutukonyera. (2 Byom. 16:9; Zab. 23:4) Kumurora nka Ruhanga omwomeezi nikisobora kutukonyera kugumira buli birengo byona ebiturukurabamu. Tekeerezaaho omulingo kinu kyahikiriire hali omukama Daudi.

3. Kiki Daudi ekiyamanyisize obuyagambire ngu “[Yahwe] ayomiire”?

³ Daudi akaba amanyire Yahwe kandi yamwesigaga. Abanyanzigwa ba Daudi otwaliiremu n’Omukama Saulo obubakaba nibaserra kumwita, Daudi akasaba Yahwe obukonyezi. (Zab. 18:6) Hanyuma ya Ruhanga kugarukamu esaara ze n’okumujuna, Daudi akagamba ati: “[Yahwe] ayomiire”. (Zab. 18:46) Daudi akaba namanyisa ki obuyagambire ebigambo binu? Ekitabu kimu nikigamba ngu Daudi akaba nayoleka obwesige bwe omuli Yahwe “nka ruhanga omwomeezi ow’aikara narwanirra abantu be.” Ego, Daudi akaba akimanyire kusigikirra ha biyarabiremu ngu Ruhanga we mwomeezi, kandi eki kikamwekambisa kucweramu kimu kuhereeza Yahwe n’okumukugiza.—Zab. 18:​28, 29, 49.

4. Tugasirwa tuta obuturora Yahwe nka Ruhanga omwomeezi?

⁴ Obutukigumya ngu Yahwe ali Ruhanga omwomeezi nikisobora  kutwekambisa kumuheereza n’obwekambi. Nitwija kutunga amaani ag’okugumira ebirengo kandi kitwekambise kugumizaamu nitukora n’amaani omu buheereza bwaitu haluwe. Ekindi, nikiija kutwekambisa kucweramu kimu kwikara haihi na Yahwe.

RUHANGA OMWOMEEZI NAIJA KUKUGUMYA

5. Kiki ekisobora kutugumya obutuba nituraba omu birengo? (Abafiripi 4:13)

⁵ Nitwija kusobora kugumira buli kirengo kyona kakibe ky’amaani rundi kitaito kakuba twijuka ngu Yahwe ali mwomeezi kandi aikara ayeteekaniize kutukonyera. Nasobora kutukonyera omu buli kirengo kyona habwokuba busaho kizibu kyona ekirukumukiza amaani. Ali Ruhanga ow’Obusobozi bwona kandi nasobora kutukonyera kugumira ebizibu. (Soma Abafiripi 4:13.) Kinu nikitukonyera kuguma obutuhikwaho ebirengo. Obuturora omulingo Yahwe atusagikamu obutuba nituraba omu birengo ebitaito kitukigumya ngu naija kutusagika obuturaaba nituraba omu birengo eby’amaani.

6. Bintu ki Daudi ebiyarabiremu ebyagumize obwesige bwe omuli Yahwe?

⁶ Teekerezaaho ebintu bibiri Daudi ebiyarabiremu ebyayongiire kugumya obwesige bwe omuli Yahwe. Omu myaka ye ey’obuto obwakaba akyali muliisa, emirundi erikwahukana edubu n’entale bikaija kulya entaama za ise. Omu mirundi egi yoona, n’obumanzi Daudi akabihambya kandi yajuna entaama za ise. Baitu nabwo Daudi atateekereze ngu eki akakikora habw’amaani ge. Akaba akimanyire ngu Yahwe nuwe akaba amuhaire amaani ag’okubisingura. (1 Sam. 17:​34-37) Daudi ateebwe ebintu ebi ebiyarabiremu. Kuraba omu kubyecumiitirizaaho akakigumya ngu Ruhanga omwomeezi akaba naija kumuha amaani omu kasumi ak’omumaiso.

7. Kiki Daudi ekiyataireho omutima, kandi eki kikamukonyera kita kurwanisa Goliasi?

⁷ Hanyuma, Daudi obwakaba atakahikize emyaka 20, akagenda omu nkambi y’amahe ga Isaleri. Akasanga abaserikale batiinire habwokuba omusaija ow’amaani Omufirisiti ow’arukwetwa Goliasi akaba aliyo ‘nagaya amahe ga Isaleri.’ (1 Sam. 17:​10, 11) Ekintu ekyaletiire abaserikale kutiina nukwo kuteeka omutima ha musaija ogu owamaani hamu n’okugaya kwe. (1 Sam. 17:​24, 25) Baitu uwe Daudi akateeka omutima ha kintu ekindi, akaba akimanyire ngu Goliasi okugaya amahe ga Isaleri akaba nagaya “amahe ga Ruhanga omwomezi.” (1 Sam. 17:26) Daudi akaba nateekerezaaho Yahwe. Daudi akaba nakigumya ngu Ruhanga ayamukonyiire obwakaba naliisa entaama akaba naija kwongera amukonyere omu nyikara egi. Obu nakigumya ngu Ruhanga akaba namusagika, Daudi akarwanisa Goliasi kandi yamusingura!—1 Sam. 17:​45-51.

8. Kiki ekisobora kugumya okwikiriza kwaitu ngu Yahwe naija kutukonyera obuturukuba nituraba omu birengo? (Rora n’ekisisani.)

⁸ Naitwe nitusobora kugumira ebirengo kakuba tukiijuka ngu Ruhanga omwomeezi ayeteekaniize kutukonyera. (Zab. 118:6) Nitusobora kukurakuraniza obwesige bwaitu omuli Yahwe ngu naija kutukonyera kuraba omu kuteekerezaaho omulingo yatukonyiiremu omu busumi obwa kara. Soma Ebyahandiikirwe omu Baibuli kukwijukya omulingo Yahwe yakonyiire abaheereza be aba kara. (Is. 37:​17, 33-37) Ekindi, soma rundi orole ripooti kuruga ha mukura gwaitu ogwa jw.org ezirukwoleka omulingo Yahwe akonyiiremu ab’oruganda na banyaanya itwe kasumi kanu. Ekindi, ijuka obusumi Yahwe obuyakukonyiire. Otahwamu amaani obworaaba otasobora kwijuka ekiro na kimu Yahwe obuyakukonyiire kurwanisa ekizibu ky’amaani  ekirukusisana n’okurwanisa edubu rundi entale. Habwaki? Amananu gali ngu Yahwe akukoliire ebintu bingi omu bwomeezi bwawe! Yahwe akuraaliize kuba munywani we. (Yoh. 6:44) N’akasumi kanu nuwe akyakukonyiire kwikara n’omuheereza. Nahabweki, musabe akukonyere kwijuka akasumi obuyagarukiremu esaara zaawe, yakuha eky’orukwetaaga omu kaire akahikire rundi obuyakukonyiire kuraba omu nyikara ey’egumire. Kuteekerezaaho ebintu binu nikiija kugumya obwesige bwawe ngu Yahwe naija kwikara naakukonyera.

9. Kiki ekitusemeriire kwikara nitwijuka obuturukuba nituraba omu birengo? (Enfumo 27:11)

⁹ Kurora Yahwe nk’Omuntu omwomeezi nikiija kutukonyera kuba n’enteekereza ey’ehikire obukirukuhika ha birengo byaitu. Omu mulingo ki? Sitaani agamba ngu obuturahikwaho ebizibu nitwija kulekaho Yahwe. Nahabweki, omulingo twetwazaamu obutuhikwaho ebirengo kikwataho omulingo Yahwe ayehurramu. (Yob. 1:​10, 11; soma Enfumo 27:11.) Baitu obutwikara tuli besigwa hali Yahwe nobutuba nituraba omu birengo twoleka ngu nitugonza Yahwe kandi ngu Sitaani abaza ebisuba. Nambere orukwikara, gavumenti nehakaniza omulimo gwa Yahwe, rundi nohikwaho ebizibu omu byetaahya, abantu tibarukuhuliiriza obw’orukuba n’obatebeza, rundi nohikwaho ebizibu ebindi? Obukiraaba nukwo kiri, ijuka ngu enyikara ey’orumu nekuha omugisa ogw’okusemeza omutima gwa Yahwe. Ekindi, ijuka ngu Yahwe talikuleka okwohebwa kukira eky’osobora kugumira. (1 Kol. 10:13) Naija kukuha amaani kugumiiziriza.

RUHANGA OMWOMEEZI NAIJA KUKUHA EMPEERA

10. Kiki Ruhanga omwomeezi ekyalikorra abo abamuramya?

¹⁰ Yahwe aha empeera abo abamuramya. (Baheb. 11:6) Atuha obusinge n’okumarwa hati kandi naija n’okutuha obwomeezi obutahwaho omu kasumi ak’omumaiso. Nitusobora  kuteeka obwesige bwaitu omuli Yahwe, obu nitukigumya ngu aine amaani kandi nagonza kutuha empeera. Kugumya ekintu kinu nikitukonyera kwikara twine bingi eby’okukora omu kuheereza Yahwe nk’oku abaheereza be abakara bakozere. Eki kyonyini nikyo Timoseo yakozere omu kyasa eky’okubanza.—Baheb. 6:​10-12.

11. Kiki ekyayekambisize Timoseo kukora n’amaani omu kitebe? (1 Timoseo 4:10)

¹¹ Soma 1 Timoseo 4:10. Timoseo akaba aine okwikiriza kw’amaani omuli Ruhanga omwomeezi kandi egi niyo nsonga habwaki yayekambire kuheereza Yahwe hamu n’abantu abandi. Omu miringo ki? Omukwenda Paulo akamwekambisa kukurakurana nk’omwegesa omu kitebe hamu n’omu buheereza. Ekindi, Timoseo akaba aine kuteekaho eky’okurorraho ekirungi hali Abakristaayo bagenzi be, abato n’abakuru. Ekindi, akaheebwa obujunanizibwa obugumire obwatwaliremu kuha obuhabuzi obw’amaani baitu obw’okugonza hali abo abakaba nibabwetaaga. (1 Tim. 4:​11-16; 2 Tim. 4:​1-5) Obwire obumu abantu tibaaroraga rundi tibaasimaga omulimo Timoseo yakoraga baitu akaba naakigumya ngu Yahwe naija kumuha empeera.—Bar. 2:​6, 7.

12. Kiki ekisobora kwekambisa abagurusi kukora n’amaani omu kitebe? (Rora n’ekisisani.)

¹² Kasumi kanu, abagurusi nabo nibasobora kukigumya ngu Yahwe arora kandi asiima omulimo omurungi ogubakora. Kwongerra ha kubungira Abakristaayo bagenzi baabo kubagarramu amaani, okwegesa hamu n’okutebeza, abagurusi baingi basagika purojekiti ez’okwombeka kandi bakonyera nambere hali ebigwererezi. Abandi baheereza ha Patient Visitation Groups rundi Hospital Liaison Committees. Abagurusi abakonyera omu mirimo egi barora ekitebe nk’enteekaniza ya Yahwe hatali ey’abantu. Ekirugamu bakora n’amaani omu kitebe, kandi nibakigumiza kimu ngu Ruhanga naija kubaha empeera habw’emirimo eibakora.—Bak. 3:​23, 24.

13. Yahwe ayehurra ata obututeekamu amaani kumuheereza?

 ¹³ Buli omu weena tasobora kuba mugurusi. Baitu itwena nitusobora kuba n’ekintu eky’okuha Yahwe. Ruhanga waitu asiima muno obutukora kyona ekirukusoboka kumuheereza. Arora kandi asiima kyona ekituhayo kusagika omulimo gw’ensi yoona. Kimusemeza muno obutwimukya omukono kuhayo eky’okugarukamu omu nsorrokano nobukiraaba ngu twine ensoni, kandi n’obutuganyira abo abatusobeza. Nobukiraaba ngu noyehurra ngu tosobora kukora nk’oku wakugondeze, kigumye ngu Yahwe nasiima kyona eky’orukukora. Nakugonza kandi naija kukuha empeera.—Luk. 21:​1-4.

IKARA HAIHI NA RUHANGA OMWOMEEZI

14. Kuba n’enkoragana enungi na Yahwe kitukonyera kita kwikara tuli besigwa? (Rora n’ekisisani.)

¹⁴ Kakuba turora Yahwe nk’ow’aroho kwo, eki nikiija kutukonyera kwikara tuli besigwa haluwe. Eki nikyo kyahikire hali Yusufu. N’obumanzi akanga kusiihana. Akarora Ruhanga nk’owaroho kwo, kandi akaba atarukugonza kumubiihiza. (Kub. 39:9) Kusobora kurora Yahwe nk’ow’aroho kwo, tusemeriire kumusaba kandi n’okwesomesa ekigambo kye Baibuli. Obuturakikora enkoragana yaitu nawe naija kuba y’amaani. Nka Yusufu obuturaatunga enkoragana enungi na Yahwe titurukwija kukora ekintu kyona ekiramubiihiza.—Yak. 4:8.

15. Isomo ki eriturukwegera ha kyahikire hali Abaisaleri omu irungu? (Abaheburaniya 3:12)

¹⁵ Abo abebwa ngu Ruhanga mwomeezi kibanguhira kuleka kumwesiga. Teekerezaaho ekyahikire h’Abaisaleri obukaba bali omu irungu. Bakaba nibakimanya ngu Yahwe aroho baitu bakatandika kigurukyagurukya obwaraaba akaba nasobora kubarolerra omu byetaago byabo. Bakakaguza bati: “[Yahwe] ali hagati yaitu, nandiki taroho?” (Kurug. 17:​2, 7) Ekyarugiremu bakajeemera Ruhanga. Mali titwakugondeze kuhondera eky’okurorraho kyabo eky’obujeemu.—Soma Abaheburaniya 3:12.

16. Kiki ekisobora kulenga okwikiriza kwaitu?

 ¹⁶ Kigumire kwikara tuli besigwa hali Yahwe omu nsi enu. Baingi tibaikiriza ngu Ruhanga aroho. Emirundi erikukira obwingi abo abajeemera Yahwe bazooka nk’abaine obwomeezi oburungi. Obuturora ebintu binu nibibaho okwikiriza kwaitu nikusobora kulengwa. Nobukiraba ngu nitukigumya ngu Ruhanga aroho nitusobora kugurukyagurukya obwaraba nasobora kutukonyera. Omuhandiiki wa Zabuli 73 na uwe akatunga enyehurra nk’egi. Akarora abo abamwetoroire abatarukuhondera endengo za Yahwe nibengondeza omu bwomeezi. Ekyarugiremu, akatandika kugurukyagurukya obukiraaba nikigasa kuheereza Ruhanga.—Zab. 73:​11-13.

17. Kiki ekiratukonyera kwikara haihi na Yahwe?

¹⁷ Kiki ekyakonyiire omuhandiiki wa zabuli kuterekereza enteekereza ye? Akecumitiriza ha bintu ebisobora kuhika hali abo abeebwa Yahwe. (Zab. 73:​18, 19, 27) Akateekerezaaho ebirungi ebiruga omu kuheereza Ruhanga. (Zab. 73:24) Naitwe nitusobora kuteekerezaaho emigisa Yahwe atuhaire. Teekerezaaho omulingo obwomeezi bwaitu bwakubaire kakuba twakubaire tutarukuheereza Yahwe. Obuturakikora nikiija kutukonyera kwikara tuli besigwa kandi tugambe nk’oku omuhandiiki wa zabuli yagambire: “Baitu kisemeriire nyowe okuirra haihi Ruhanga.”—Zab. 73:28.

18. Habwaki tutasemeriire kutiina ebiraabaho omu kasumi ak’omumaiso?

¹⁸ Nitusobora kuraba omu bizibu byona ebitutangatangana habwokuba “[nitukorra] Ruhanga omwomezi owamazima.” (1 Bas. 1:9) Ruhanga waitu ali Muntu wenyini ow’arwanirra abo abamuramya. Akakonyera abaheereza be omu kasumi aka kara kandi naitwe atukonyera kasumi kanu. Omu kasumi akatali ka hara nitwija kuhikwaho omuhito omwingi ogutakabahoga mu nsi. Baitu titurukwija kugurabamu itwenka. (Is. 41:10) Leka itwena ‘nobumanzi oburungi tugambe ngu [Yahwe] nuwe mukonyezi wange; tinditiina.’—Baheb. 13:​5, 6.