1. Ano an nabulig ha katawohan ni Jehova nga padayon nga magsingba ha iya bisan pa han mga problema nga ira gin-aatubang?

 “PELIGROSO nga mga panahon nga makuri pakiangayan”—ito an pagkahulagway han Biblia ha panahon naton yana. (2 Tim. 3:1) Labot pa han mga problema nga gin-aatubang han tanan hini nga sistema han mga butang, kinahanglan atubangon han katawohan ni Jehova an pagkontra ngan pagtimaraot. Ano an nabulig ha aton nga makapadayon ha pagsingba kan Jehova bisan pa hini nga mga problema? An usa han nangunguna nga butang amo an paghibaro nga hi Jehova “an buhi nga Dios.”​—Jer. 10:10; 2 Tim. 1:12.

2. Kay ano nga makakasiring kita nga hi Jehova buhi nga Dios?

² Hi Jehova tinuod nga Persona ngan nakikita niya an tagsa nga problema nga aton gin-aatubang ngan andam hiya pirme nga buligan kita. (2 Cron. 16:9; Sal. 23:4) An paghunahuna ha iya sugad nga buhi nga Dios makakabulig ha aton nga malamposan an bisan ano nga problema nga naabot ha aton. Pansina kon paonan-o ito nahimo ni Hadi David.

3. Ano an karuyag sidngon ni David han nagsiring hiya nga “hi Jehova buhi”?

³ Kilala ni David hi Jehova ngan sinarig hiya ha Iya. Han hi David igin-ikaparatay han iya mga kaaway, upod na hi Hadi Saul, nag-ampo hiya kan Jehova para hin bulig. (Sal. 18:6) Katapos batunon han Dios an iya pag-ampo ngan talwason hiya, hi David nagsiring: “Hi Jehova buhi!” (Sal. 18:46) Pinaagi hini nga mga pulong, hi David diri la kay basta maaram nga may Dios. An usa nga reperensya nasiring nga hi David nagpahayag han iya pagsarig kan Jehova “sugad nga buhi nga Dios nga padayon nga nagios para ha iya katawohan.” Oo, nahibaro hi David tikang ha iya eksperyensya nga buhi an iya Dios, ngan tungod hito determinado hiya nga padayon nga mag-alagad ngan dayawon hi Jehova.​—Sal. 18:​28, 29, 49.

4. Paonan-o kita nagpapahimulos ha paghunahuna nga hi Jehova buhi nga Dios?

 ⁴ An aton pagin kombinsido nga hi Jehova buhi nga Dios nakakabulig ha aton nga mag-alagad ha iya nga may kadasig. Magkakaada kita han kusog basi mailob an mga problema ngan determinasyon nga padayon nga maningkamot ha pag-alagad ha iya. Magigin determinado liwat kita nga magpabilin nga duok kan Jehova.

PAPAKUSGON KA HAN BUHI NGA DIOS

5. Ano an maghahatag ha aton hin pasarig kon naatubang kita hin mga problema? (Filipos 4:13)

⁵ Maiilob naton an bisan ano nga problema, daku man ito o guti, kon hihinumdumon naton nga hi Jehova buhi ngan aada hiya basi buligan kita. Kaya kita niya buligan ha bisan ano nga problema kay waray gud problema nga makuri para ha aton Dios. Hiya an Makagarahum-ha-ngatanan, ngan mahahatagan kita niya hin gahum basi makailob. (Basaha an Filipos 4:13.) Naghahatag ini ha aton hin pasarig kon naatubang kita hin mga problema. An pakaeksperyensya han bulig ni Jehova kon naatubang hin gutiay nga mga problema nagpapasarig ha aton nga bubuligan liwat kita niya kon naatubang kita hin mas dagku nga problema.

6. Ano nga mga eksperyensya ni David han bata pa hiya an nakadugang han iya pagsarig kan Jehova?

⁶ Pansina an duha nga eksperyensya mismo ni David nga nakadugang han iya pagsarig kan Jehova. Han bata pa hi David nga paraataman han panon, usa nga oso ngan leon an inabot ngan gintabag o ginkuha an karnero han iya tatay. Hiton duha nga sitwasyon, maisugon nga ginlanat ni David an mga hayop ngan gintalwas an mga karnero. Pero waray niya hunahunaa nga nahimo niya ito nga hiya la. Maaram hiya nga ginbuligan hiya ni Jehova. (1 Sam. 17:​34-37) Waray gud hingalimti ni David ito nga mga eksperyensya. Pinaagi ha pagpamalandong hito, nagkaada hiya pagsarig nga an buhi nga Dios magpapakusog ha iya ha tiarabot.

7. Ha ano nagpokus hi David, ngan kay ano nga nakabulig ito ha iya nga makig-away kan Goliat?

⁷ Ha urhi, hi David nga posible gud tin-edyer pa, binisita hiya ha kampo han sundalo han mga Israelita. Nahibaroan niya nga an mga sundalo nalisang tungod han higante nga Filisteo nga hi Goliat nga ginawas basi ‘ayaton an nakarumbay nga mga sundalo han Israel.’ (1 Sam. 17:​10, 11) Nahadlok an mga sundalo kay nagpokus hira ha kadaku ni Goliat ngan ha iya mga pagtamay ha ira ha patag-awayan. (1 Sam. 17:​24, 25) Pero ginhunahuna ni David an kahimtang ha iba nga paagi. Maaram hi David nga han gintatamay ni Goliat an mga sundalo han Israel, an iya gin-iinsulto amo an “buhi nga Dios.” (1 Sam. 17:26) An nahuhunahuna ni David amo hi Jehova. Sinarig hi David nga an Dios nga binulig ha iya han paraataman hiya han panon mabulig utro ha iya hini nga sitwasyon. Tungod kay nasarig hi David nga bubuligan hiya han Dios, nakig-away hiya kan Goliat, ngan syempre, nagdaog hiya!—1 Sam. 17:​45-51.

8. Ano an magpaparig-on han aton pagsarig nga bubuligan kita ni Jehova kon naatubang hin mga problema? (Kitaa liwat an piktyur.)

⁸ Malalamposan liwat naton an mga problema kon hihinumdumon naton nga an buhi nga Dios andam ha pagbulig ha aton. (Sal. 118:6) Mapaparig-on liwat naton an aton pagsarig nga bubuligan kita ni Jehova pinaagi ha paghunahuna han iya mga ginbuhat ha naglabay. Pagbasa hin mga rekord ha Biblia nga magpapahinumdom ha imo kon paonan-o gintalwas ni Jehova an iya mga magsiringba. (Isa. 37:​17, 33-37) Basaha o kitaa liwat an mga report ha aton jw.org nga website nga nagsusumat kon paonan-o ginsuportaran ni Jehova an aton kabugtoan ha moderno nga panahon. Dugang pa, hinumdumi an mga panahon nga ginios hi Jehova para ha imo. Bangin hunahunaon mo nga  waray hi Jehova ginhimo nga nakakabilib para ha imo, sugad han pagtalwas tikang ha usa nga oso o leon. Ha tinuod la damu na an ginhimo ni Jehova ha imo kinabuhi! Iginpahirani ka ni Jehova ha iya basi magin iya sangkay. (Juan 6:44) Bisan yana, tungod han iya bulig aada ka la gihapon ha kamatuoran. Kay ano nga diri maghangyo ha iya nga buligan ka nga mahinumdoman an mga kahimtang han ginbaton niya an imo mga pag-ampo, han ginbuligan ka ha eksakto nga panahon, o han gin-ataman ka han naatubang ka hin makuri nga sitwasyon? An pagpamalandong hito nga mga eksperyensya magpaparig-on han imo pagsarig nga hi Jehova padayon nga magios para ha imo.

9. Ano an dapat naton hinumdoman kon naatubang hin mga problema? (Proberbios 27:11)

⁹ Kon huhunahunaon mo hi Jehova sugad nga buhi nga Persona, magkakaada kita tama nga panhunahuna ha aton mga problema. Kay ano? Huhunahunaon naton an aton mga problema sugad nga bahin han mas daku nga isyu butnga ni Jehova ngan ni Satanas. An Yawa nasiring nga kon mag-aantos kita hin kakurian, babayaan naton hi Jehova. (Job 1:​10, 11; basaha an Proberbios 27:11.) Kon magpabilin kita nga maunungon kan Jehova bisan pa han aton mga problema, iginpapakita naton nga hinigugma naton hi Jehova ngan ginpapamatud-an nga buwaon an Yawa. Naatubang ka ba hin pagkontra han gobyerno, problema ha ekonomiya, kawaray-interes han mga tawo han maopay nga sumat, o iba pa nga problema? Kon oo, hinumdumi nga an imo sitwasyon naghahatag ha imo hin oportunidad nga mapalipay an kasingkasing ni Jehova. Hinumdumi liwat nga diri gud niya tutugotan nga sulayon ka labaw han imo maiilob. (1 Cor. 10:13) Tatagan ka niya hin kusog basi makailob.

BABALOSAN KA HAN BUHI NGA DIOS

10. Ano an bubuhaton han buhi nga Dios hadton nagsisingba ha iya?

¹⁰ Hi Jehova an nagbabalos hadton nagsisingba ha iya. (Heb. 11:6) Gintatagan kita niya yana hin kamurayawan ngan pagin kontento ngan tatagan kita hin kinabuhi nga waray kataposan ha tiarabot. Bug-os kita nga makakasarig  kan Jehova, nga may hingyap hiya ngan gahum ha pagbalos ha aton. Ngan ito nga pagsarig magpapagios ha aton nga magpabilin nga busy ha aton pagsingba, sugad la han ginbuhat han matinumanon nga mga surugoon han Dios ha naglabay. Ito an ginbuhat ni Timoteo han siyahan nga siglo.​—Heb. 6:​10-12.

11. Ano an nagpagios kan Timoteo nga maningkamot para ha kongregasyon? (1 Timoteo 4:10)

¹¹ Basaha an 1 Timoteo 4:10. Sinarig hi Timoteo ha buhi nga Dios. Salit naningkamot hiya para kan Jehova ngan ha iba. Ha ano nga mga paagi? Gin-aghat hiya ni apostol Pablo nga mag-uswag ha pagtutdo ha ministeryo ngan ha kongregasyon. Ginsidngan liwat hi Timoteo nga magpakita hin maopay nga ehemplo ha mga igkasi-tumuroo, batan-on man o edaran. Ngan gintokahan liwat hiya hin pipira nga magkuri nga asaynment, nga nag-uupod han paghatag hin mapwersa pero mahigugmaon nga sagdon hadton nanginginahanglan hito. (1 Tim. 4:​11-16; 2 Tim. 4:​1-5) Makakasiguro hi Timoteo nga bisan ha mga panahon nga an iya ginbubuhat diri nakikita o diri gin-aapresyar han iba, hi Jehova magbabalos ha iya.​—Roma 2:​6, 7.

12. Ano an makakaaghat ha mga tigurang nga magpabilin nga busy ha ira buruhaton? (Kitaa liwat an piktyur.)

¹² An mga tigurang liwat yana makakasiguro nga nakikita ngan gin-aapresyar ni Jehova an ira mag-opay nga buhat. Labot pa han pag-shepherding, pagtutdo, ngan pagsangyaw, damu nga tigurang an nasuporta ha mga proyekto han pagpanukod ngan nabulig kon may mga kalamidad. An iba nag-aalagad sugad nga membro han Patient Visitation Group o Hospital Liaison Committee. An mga tigurang nga andam magpagamit hini nga buruhaton naghuhunahuna ha kongregasyon sugad nga kahikayan ni Jehova diri han mga tawo. Sugad nga resulta, bug-os-kalag hira ha ira mga asaynment ngan bug-os nga nasarig nga babalosan hira han Dios ha ira ginbubuhat.​—Col. 3:​23, 24.

13. Ano an inaabat ni Jehova ha aton mga paningkamot ha pag-alagad ha iya?

¹³ Diri ngatanan mahimo magin tigurang.  Pero kita ngatanan may maihahatag kan Jehova. Gin-aapresyar ito han aton Dios kon ginhihimo naton an aton pinakamaopay ha pag-alagad ha iya. Nakikita niya an aton mga igindudonar ha worldwide work, bisan kon diri gud ito daku. Nalilipay hiya kon naniningkamot kita nga maatohan an aton kaawod ngan nag-aalsa hin kamot basi magkomento ha mga katirok, ngan ginpapasaylo adton nakapasakit ha aton. Bisan kon inaabat mo nga diri na damu an imo nahihimo para kan Jehova, sarig nga gin-aapresyar niya kon ano la an imo makakaya. Hinigugma ka niya tungod hito, ngan babalosan ka niya.​—Luc. 21:​1-4.

MAGPABILIN NGA DUOK HA BUHI NGA DIOS

14. Kay ano nga an pagkaada duok nga pakigsangkay kan Jehova nabulig ha aton nga magpabilin nga matinumanon? (Kitaa liwat an piktyur.)

¹⁴ Kon may-ada kita duok nga pakigsangkay kan Jehova, magigin mas masayon para ha aton nga magpabilin nga matinumanon ha iya. Ito an ginbuhat ni Jose. Marig-on nga ginsalikway niya an pagbuhat hin imoralidad. Maaram hiya nga importante kan Jehova kon ano an iya bubuhaton, ngan diri niya karuyag nga mapasubo Hiya. (Gen. 39:9) Basi magkaada duok nga pakigsangkay kan Jehova, kinahanglan maggahin kita hin panahon ha pag-ampo ha iya ngan ha pag-aram ha iya Pulong. Salit an aton pakigsangkay ha iya mag-uuswag. Kon may-ada kita duok nga pakigsangkay kan Jehova, pariho kan Jose, diri kita magbubuhat hin bisan ano nga makakapasubo ha Iya.​—San. 4:8.

15. Ano nga leksyon an aton mahibabaroan ha nahitabo ha mga Israelita ha kamingawan? (Hebreo 3:12)

¹⁵ Adton naundang ha pagsarig kan Jehova masayon la magin diri maunungon ha iya. Pansina kon ano an nahitabo ha mga Israelita han nakadto hira ha kamingawan. Maaram hira nga tinuod hi Jehova, pero nagtikang hira magruhaduha kon makakatagana ba Hiya ha ira. Nagpakiana pa ngani hira: “Aanhi ba ha butnga naton hi Jehova o waray?” (Ex. 17:​2, 7) Katapos, nagrebelde hira ha Dios. Sigurado nga diri naton karuyag subaron an ira maraot nga ehemplo.​—Basaha an Hebreo 3:12.

16. Ano an mahimo magpakuri ha aton nga magpabilin nga marig-on an aton pagtoo?

 ¹⁶ Hini nga kalibotan makuri para ha aton nga magpabilin nga duok kan Jehova. Damu an nagsasalikway ha ideya nga may Dios. Agsob nga adton nagbabalewaray han mga iginsusugo han Dios an baga hin may maopay nga kinabuhi. Kon nakikita naton nga ito an nahitatabo, matitestingan an aton pagtoo. Bisan kon natoo kita nga may Dios, bangin magtikang kita pagruhaduha kon magios ba hiya para ha aton. May panahon nga inabat liwat hin sugad hito an nagsurat han Salmo 73. Nakita niya ha iya palibot an mga nagbabalewaray han mga balaud han Dios ngan nag-i-enjoy la gihapon han ira kinabuhi. Sugad nga resulta, nagtikang hiya pagruhaduha kon sulit ba an pag-alagad ha Dios.​—Sal. 73:​11-13.

17. Ano an mabulig ha aton nga magpabilin nga duok kan Jehova?

¹⁷ Ano an nakabulig ha salmista nga bag-uhon an iya panhunahuna? Iya ginpamalandong kon ano an mahitatabo hadton inundang ha pagsarig kan Jehova. (Sal. 73:​18, 19, 27) Iya liwat ginhunahuna an mga mapapahimulsan hadton nag-aalagad ha Dios. (Sal. 73:24) Mahimo liwat naton pamalandungon an mga bendisyon nga iginhatag ni Jehova ha aton. Ngan imadyina kon ano daw la an aton nagin kinabuhi kon diri kita nag-aalagad kan Jehova. An pagbuhat hito makakabulig ha aton nga magpabilin nga matinumanon ha iya ngan pariho ha salmista makakasiring kita: “Ha akon, maopay an pagpahirani ha Dios para ha akon.”​—Sal. 73:28.

18. Kay ano nga dapat diri kita mahadlok ha tiarabot?

¹⁸ Malalamposan naton an bisan ano nga problema nga mahimo naton atubangon hinin kataposan nga mga adlaw kay ‘uripon kita han buhi ngan tinuod nga Dios.’ (1 Tes. 1:9) An aton Dios tinuod nga Persona nga nagios para hadton nagsisingba ha iya. Ginpamatud-an niya nga kaupod hiya han iya mga surugoon ha naglabay, ngan kaupod liwat naton hiya yana. Hirani na naton atubangon an pinakadaku nga kasakitan nga mahitatabo ha tuna. Pero diri kita mag-uusahan ha pag-atubang hito. (Isa. 41:10) Hinaot kita ngatanan “magin maisugon gud . . . ngan makasiring: ‘Hi Jehova an akon parabulig; diri ako mahahadlok.’”—Heb. 13:​5, 6.