1. Wetin de help Jehovah people continue to worship-am even with the problem wey them de face?

 BIBLE talk say this time wey we dey na the last days and say na “serious hard time wey no go dey easy to handle.” (2 Tim. 3:1) Jehovah people de face the kind problem wey everybody de face for this wicked world wey Satan de control. Apart from this one, some people de suffer us because we de serve Jehovah. But wetin de help us fit continue to serve Jehovah even with this problem? Na as we de see how Jehovah de help us and we know say na God wey dey alive.—Jer. 10:10; 2 Tim. 1:12.

2. Wetin we know about Jehovah wey fit help us face any problem?

² Jehovah de see all the problem wey we de face and e always ready to help us. (2 Chron. 16:9; Ps. 23:4) When we de see Jehovah as the God wey dey alive and wey always ready to help us, this one go help us fit face any problem. Make we see how this one help King David.

3. Wetin David mean when e talk say, “Jehovah dey alive”?

³ David know Jehovah well-well and e trust-am. David pray make Jehovah help-am when King Saul and other people de try to kill-am. (Ps. 18:6) Jehovah hear im prayer and save-am. Na this one make David talk say: “Jehovah dey alive!” (Ps. 18:46) Wetin David mean when e talk say, “Jehovah dey alive”? One book talk say wetin David mean be say Jehovah “na the true God wey de always help im people.” David know say Jehovah  de see everything wey de happen to-am, and e ready to help-am. This one give David the mind to continue to serve Jehovah and praise-am.—Ps. 18:​28, 29, 49.

4. When we de see Jehovah as the God wey dey alive, how this one de help us?

⁴ When we dey sure say Jehovah na the God wey dey alive, this one go help us use all our power serve-am. E go give us the power to fit face any problem, and e go move us to continue to try our best as we de serve Jehovah. E go still help us make we no leave Jehovah.

THE GOD WEY DEY ALIVE GO GIVE YOU POWER

5. Wetin go help us no fear when we de face problem? (Philippians 4:13)

⁵ We go fit face any problem whether e big or e small, if we remember say Jehovah dey alive and e always ready to help us. The truth be say no problem big pass-am. Na im get power pass, and e go fit give us the power to endure. (Read Philippians 4:13.) This one de help us no shake when we de face problem. When we see how Jehovah support us when we de face small problem, e go make us dey sure say Jehovah go help us when big problem come.

6. Wetin happen to David when e dey young wey make-am trust Jehovah more?

⁶ Make we talk about two things wey happen to David wey make-am trust Jehovah more. When David de care for im papa sheep when e dey young, e get one time wey one bear carry one of the sheep. Another time, one lion carry another one. The two times wey e happen, David use strong mind pursue the animal and save the sheep. But David no begin boast say e do-am with im own power. E know say na Jehovah help-am fit do-am. (1 Sam. 17:​34-37) David no ever forget how Jehovah help-am. As e de think deep about the two times wey Jehovah help-am, this one make-am dey sure say Jehovah go help-am when problem come for future.

7. Wetin David put mind for, and how this one help-am fight Goliath?

⁷ Later, David go visit im brothers for Israel army camp. E fit be say that time e never reach 20 years. When e reach there, e see say one giant from Philistia people side wey e name na Goliath “de challenge Israel army.” And all Israel soldiers de fear-am. (1 Sam. 17:​10, 11) Them de fear because them put mind for wetin Goliath de talk and how Goliath big reach. (1 Sam. 17:​24, 25) But David no put mind for that one. David know say Goliath no de only challenge Israel army, but na the God wey dey alive e de insult. (1 Sam. 17:26) Na Jehovah David de think about. E dey sure say the God wey save-am from the bear and lion, go still help-am fit win Goliath. This one make-am fight Goliath and win-am!—1 Sam. 17:​45-51.

8. Wetin fit help us dey sure say Jehovah go continue to help us when we de face problem? (Still check the picture.)

⁸ We go fit handle any problem if we remember say the God wey dey alive always ready to help us. (Ps. 118:6) We go fit trust Jehovah more say e go help us if we think about wetin e don do before. You fit read different-different story for Bible wey talk about how Jehovah save people wey de worship-am. (Isa. 37:​17, 33-37) You fit still read or watch the story of our brothers and sisters for jw.org, wey show how Jehovah de help im people for this our time. Another thing be say, make you remember the different-different time wey Jehovah don help you. But you fit de tell yourself say, ‘Jehovah never help me for any wonderful  way, the way e help David kill bear and lion.’ But the truth be say Jehovah don do plenty things for you! E don bring you come im organization and make you im friend. (John 6:44) And you still de serve-am come reach now because e de help you. So pray make Jehovah help you remember different-different times wey e don hear your prayer, give you wetin you need for the correct time, or take care of you when things really hard. If you de do all this things, e go make you really dey sure say Jehovah go continue to help you.

9. Wetin we need to remember when we de face problem? (Proverbs 27:11)

⁹ We go de see our problem for the correct way, if we de see Jehovah as the God wey dey alive. How we fit do this one? When we de face problem, e good make we de think about wetin dey important pass. Devil talk say we go leave Jehovah when we de face problem. So, the way we de behave when we de face problem de affect how Jehovah de feel, because e de show which person side we dey. (Job 1:​10, 11; read Proverbs 27:11.) When we continue to serve Jehovah even when we de face problem, we de show say we love Jehovah and show say Satan na liar. You de suffer because of money matter, or government for your area dey against Jehovah people, or people wey you de preach to no want hear the good news, or e get other problem wey you de face? If na so e be, remember say the problem wey you de face de give you the chance to make Jehovah happy. And still remember say e no go allow you face any problem wey big pass your power. (1 Cor. 10:13) E go always give you the power wey you need to fit endure.

THE GOD WEY DEY ALIVE GO BLESS YOU

10. Wetin the God wey dey alive go do for people wey de worship-am?

¹⁰ Jehovah de always bless people wey de worship-am. (Heb. 11:6) E de give us peace now and de help us dey okay with wetin we get. E still promise us say for future, e go give us life wey no go end. We really trust  Jehovah say e de hungry-am to bless us, and e get the power to do-am. This one go move us to continue to give Jehovah our best, just like people wey serve-am before our time. Na wetin Timothy do be that.—Heb. 6:​10-12.

11. Wetin make Timothy do im best for the work wey e de do for congregation? (1 Timothy 4:10)

¹¹ Read 1 Timothy 4:10. Timothy really believe say Jehovah go bless-am. This one make-am do im best as e de serve Jehovah and e still help other people. How e take do this one? Apostle Paul encourage-am say make the way e de preach, and the way e de teach people for congregation de better. Paul still encourage Timothy say make e be better example to brothers and sisters, both young and old. E still give-am some work wey no easy to do. For example, e tell-am say make e use love give strong correction to people wey need-am. (1 Tim. 4:​11-16; 2 Tim. 4:​1-5) Sometimes people no de see the work wey Timothy de do, or e fit be like say them no value im work. But Timothy dey sure say Jehovah go bless-am.—Rom. 2:6, 7.

12. Why elders de put body for the work wey them de do for congregation? (Still check the picture.)

¹² For this our time, elders dey sure say Jehovah de see the work wey them de do, and e value-am. Them de visit brothers and sisters to encourage them, teach for congregation, and still de preach. Many elders no de only do this one, but them still de support the building work wey our organization de do, and help brothers and sisters wey bad things happen to. Some elders dey Patient Visitation Groups; them de visit brothers and sisters wey de sick for hospital to encourage them. And some elders dey for Hospital Liaison Committees; them de help brothers and sisters for hospital matter wey concern blood. Elders know say the work wey them de do for congregation na for Jehovah. Because of this one, them de put body for all the work wey them de do for Jehovah, because them  know say na Jehovah go bless them.—Col. 3:​23, 24.

13. How Jehovah de feel about wetin we de do for-am?

¹³ All servant of Jehovah no fit be elder. But all of us get something wey we fit give Jehovah. E de make Jehovah happy when we do our best to serve-am. Jehovah de see-am when we contribute to support im work even if e small. E de happy well-well when we no allow shame stop us to answer question for meeting, and e still de happy when we forgive people wey do wetin we no like. Even if you de feel say you no fit do reach how you for like to do, make you know say Jehovah value the one wey you fit do. Jehovah love you for wetin you de do, and e go bless you.—Luke 21:​1-4.

CONTINUE TO NEAR THE GOD WEY DEY ALIVE

14. If Jehovah na our tight friend, wetin we no go do? (Still check the picture.)

¹⁴ If we make Jehovah our tight friend, we no go want do anything wey go make-am vex. Na wetin happen to Joseph be that. Joseph know say Jehovah dey, and say Jehovah de see everything wey e de do. Because of this one, e no gree put hand for sex wey no clean for Jehovah eye, because e no want do anything wey go make Jehovah vex. (Gen. 39:9) If Jehovah dey real to us, we go de take time pray to-am and de study im Word. This one go de make our friendship with-am de strong more-more. If Jehovah na our tight friend just as e be for Joseph, e go make us no do anything wey E no like.—Jas. 4:8.

15. Wetin we fit learn from wetin happen to Israel people for wilderness? (Hebrews 3:12)

¹⁵ E dey easy for person wey forget say Jehovah dey, to comot from im side. See wetin happen to Israel people when them dey wilderness. Them know say Jehovah dey, but them no dey sure say e go give them wetin them need. Na im make them begin ask say, “Jehovah dey with us or e no dey?” (Ex. 17:2, 7) This one make them do wetin Jehovah no like. E dey important make we learn  from their example, because wetin happen to them na warning for us.—Read Hebrews 3:12.

16. Wetin fit test our faith?

¹⁶ This world wey we dey, de make-am hard for us to fit continue to hold Jehovah tight. Many people no want even use ear hear say God dey. Sometimes e de be like say people wey no de follow wetin God talk de live better life. This kind thing fit test our faith. Even if we believe say God dey, we fit come de doubt whether e go help us. E get one time wey the person wey write Psalm 73 feel like that. E see say people wey dey around-am no de follow wetin God talk, but them still de enjoy life. This one come make-am de doubt if gain dey as e de serve God.—Ps. 73:​11-13.

17. Wetin go help us continue to hold Jehovah tight?

¹⁷ Wetin help the person wey write Psalm 73 to change the way e de think? E think deep about wetin go happen to people wey forget God. (Ps. 73:​18, 19, 27) E still think about wetin e de gain as e de serve God. (Ps. 73:24) We too fit think about how Jehovah de bless us as we de serve-am. Make we think about how our life for be if to say we no de serve Jehovah. This one go help us continue to hold Jehovah tight, and we go fit talk like the person wey write Psalm 73. E talk say: ‘As for me, na to near God good for me.’—Ps. 73:28.

18. Why we no need to fear wetin go happen for future?

¹⁸ For this last days, we go fit face any problem wey we get because we de serve “the true God wey dey alive.” (1 Thess. 1:9) Jehovah really care about us and we dey sure say e go always help us. E no leave people wey don serve-am well before our time, and e no go ever leave us. Small time, serious trouble wey never happen before, go start and e go shake the whole world. But Jehovah go dey with us. (Isa. 41:10) Make all of us “get strong heart and talk say: ‘Na Jehovah de help me, I no go fear. ’”—Heb. 13:5, 6.