EMHUOGHAẠPH ITUUGHẠ PHỌ 26
AḌUỌR PHỌ 8 Jehovah Is Our Refuge
Ḍighi AZihova Ḍighiigh Anạ
“Aḍighiigh dị eeleeny Enhaạn phọ ayira i/lo.”—1 SAM. 2:2.
EGBON
Iyaạr phọ eḍighi bọ kụ omaaniọm bọ aZihova ḍighiigh ḅilhẹ r’ipẹ yira kotue bọ otuughaạny raagharạ phọ otụ bọ omaaniọm nyodị ḍighiigh.
1. Odaphạn Psalm 18:46, aDevid amaaniọm aZihova eeghe iyaạr?
YIRA odi aḅirinhi dị ipaanhaạn dị yira u/seere olhoghi remite ghan obobọ ketue ni bịn enme ghuḍum mọ ayira. P’eeghe idị eḅaạl olhoghi ayira olhegheri mọ yira kotue ni ooghiraan osoman aZihova Enhaạn phọ owạ olhoghonhaạn aḍighaạgh! Siphẹ emhuoghaạph phọ eten bọ, yira utuughạ mọ aZihova kụ Enhaạn phọ edi ghan bọ, kụ mọ odị aakolhobian ni olhoghonhaạn ayira ḍighaạgh. Torobọ amem dị odị ulhoghonhaạn iyira ḍighaạgh, ringọ ghan iyira okuphom owol mọ “aZihova kụ Enhaạn phọ edi ghan bọ.” (Bạl Psalm 18:46.) Toroboiperolbọ, aDevid r’oḅạ ikpo onhụ phọ iphẹn phọ, odị amhạgh Enhaạn mọ “aḍighiigh amhị.” Eeghe kụ iḍighi kụ aDevid amaaniọm bọ aZihova Enhaạn phọ edi ghan bọ iyaạr dị re/pooghu ghan?
2. Yira kotuughạ eeghe esi ipẹ aDevid amhạgh bọ aZihova mọ “Aḍighiigh amhị”?
2 Siẹn emhuoghaạph phọ ephẹn phọ, yira kooḅeghiọn iyaạr phọ eḍighi bọ kụ omaaniọm bọ aZihova ḍighiigh ḅilhẹ r’araraạr dị oghaạph omaaniọm mọ ophọn phọ utughemhị iyira ilọ odị. Yira kotuughạ kẹn ni idị yira kotue omiịn nyodị idiphọ Aḍighiigh ayira. Kụ yira okureriom r’areten dị yira kotue otuughaạny raagharạ phọ otụ bọ omaaniọm nyodị ḍighiigh.
IYAẠR PHỌ OTỤ BỌ OMAANIỌM AZIHOVA ḌIGHIIGH
3. Ighẹn areten kụ edị aBaibul phọ aḍighinhom ekpo onhụ phọ ‘ḍighiigh’? (Miịn oḅẹl opoḍi phọ.)
3 ABaibul phọ aḍighinhom ekpo onhụ phọ “ḍighiigh” eḍighi bọ iyaạr dị yira kotue ni omiịn, olhoghonhaạn ayira ḍighaạgh okuamhị onhaghanhạn iniin araagharạ phọ aZihova. Ekpo onhụ phọ “aḍighiigh” emite ibadị ariisi aBaibul dị reḍeenhaan ghan mọ ooleeny odị o/lho. Eḅẹl esi aBaibul dị eghaạph eghol aZihova idiphọ “Aḍighiigh” pọ aDeuteronomy 32:4. Esi iiḅereghị, aHannah aḅẹm mọ “Aḍighiigh dị eeleeny Enhaạn phọ ayira i/lo.” (1 Sam. 2:2) AHabakkuk amhạgh aZihova mọ “Aḍighiigh amhị.” (Hab. 1:12) Oye phọ agẹ bọ Psalm 73 amhạgh aZihova mọ “aḍighiigh ekpom amhị.” (Ps. 73:26) AZihova r’aloor bịn aḅẹm ni mọ onọ aḍighiigh. (Isa. 44:8) Ooḅeghiọn iraạr araagharạ phọ otụ bọ omaaniọm aZihova ḍighiigh r’idị yira kotue oḍighi nyodị ‘Ḍighiigh ayira.’—Deut. 32:31.
Awe phọ aZihova omiịn nyodị idiphọ Aḍighiigh dị eghoph bidị (Miịn ekpịgh phọ 3)
4. Ika kụ idị aZihova aḍighi bọ esi ibooghiạn ayira? (Psalm 94:22)
4 AZihova esi ibooghiạn. Idiphọ aḍighiigh dị ebụgh ketue bọ ni ekoph oye esi ogbagarạ oghim, kụ edị aZihova katue ughoph iyira mem dị yira osoman igbagarạ asidọl. (Bạl Psalm 94:22.) Odị aḍighi esi ibooghiạn ayira, kụ rughoph ghan iyira kasighẹ esi igbagarạ araraạr dị ketue ni ikpophonhom iyira. Odị akạr kẹn aguanhaan: M’onọ kasiemhi eekuna torobọ iyaạr dị kengọ iiḅaghamhị eephọ phọ r’adọl eborọph phọ ayira.—Ezek. 34:25, 26.
5. Ika kụ idị aZihova katue aḍighi ḍighiigh ibooghiạn ayira?
5 Eniin eten dị yira kotue oḍighi aZihova esi Ibooghiạn ayira pọ ooḅereghị ghan. Mem dị yira ooḅereghị, aZihova rungọ ghan iyira “eephọ phọ [odị]” reeko ghan bọ iitughiạn r’ilhoghi phọ ayira. (Fil. 4:6, 7) Ooḅeghiọn eḍeenhaan onyọ umor dị oghol mọ Artem, dị olhọgh ikoli loor omheeraam mọ odị. Epẹ otu ikoli phọ, ugbor ghan ni oopuru yogh nyodị sipuru, kụ oye phọ aapuru yogh ghan bọ sipuru phọ aḍighi ogbagarạ oye dị agilaạm ghan aḅilhẹ awạ oḍighi idị odị kakiilhaan. Artem aḅẹm mọ, “aloor amhị i/pọ ghan torobọ amem dị oye phọ umhạgh imhị oopuru amhị sipuru. . . . Mị uuḅereghị ghan oomo amem alhọm aZihova ongọ amhị eephọ ekpom r’osụ-olhoghi. Ikeḍi phọ odị i/moọgh ekol. . . . R’olhoghonhaạn aḍighaạgh aZihova, ighịgh esi amhị mudị mị ameerạ atuman iikpe aḍighiigh.”
6. Eeghe kụ iḍighi kụ yira kobeḍenhọm bọ aZihova oomo amem? (Isaiah 26:3, 4)
6 AZihova oye dị akpẹ obeḍenhọm. Idiphọ aḍighiigh dị emhiigh, aZihova odi ghan r’ayira oomo amem. Yira kotue ni oḍuom nyodị olhoghi loor esi dị odị “Aḍighiigh dị edi ghan bịn.” (Bạl Isaiah 26:3, 4.) Odị ra/mugh ghan, loor esi iduọn phọ, odị katọl li r’ighuḍum omhunhenhi aruguanhaan phọ odị, anaghạn iiḅereghị phọ ayira, aḅilhẹ ungọ iyira olhoghonhaạn aḍighaạgh phọ yira omhoghi bọ. Yira kotue ni obeḍenhọm aZihova, loor esi dị odị aḅạr ri buphẹ rokumu bọ nyodị. (2 Sam. 22:26) R’amem r’amem odị ka/bula ipẹ yira oḍighi bọ, kụ odị kunmo ni iyira ruunmo.—Hib. 6:10; 11:6.
7. Yira komoọgh eeghe asuọ mem lọ yira obeḍenhọm aZihova? (Miịn kẹn afoto phọ.)
7 Yira roḍighi ghan aZihova Ḍighiigh ayira mem dị yira okạr obeḍenhọm nyodị. Yira oḍuom ni olhoghi mọ yira komooghọm ni suọ mem dị yira onhaghanhạn nyodị, ghalhamọ r’amem dị ekpạr ri. (Isa. 48:17, 18) Mem dị yira omhiịn olhoghonhaạn aḍighaạgh phọ odị, oḍuomolhoghi phọ ayira esi odị rabụgh ghan ni. Iphẹn phọ ringọ ghan iyira okuphom owol mọ aZihova bịn kụ katue ulhoghonhaạn iyira ḍighaạgh okaran iiḅaghamhị lọ yira osoman, etigheri ipẹ ekpạr bọ. Kụ mem dị asidọl phọ erọl mudị oye olhoghonhaạn ayira ḍighaạgh o/lho, yira romiịn ghan ni mọ yira kotue ni obeḍenhọm aZihova. AVladimir aḅẹm mọ, “amem mọ mị arọl bọ siphẹ otu okoli phọ kụ edị mị akuamhị aḍuraan atuman aZihova. Oḍuomolhoghi phọ amhị esi odị akạr kụ abụgh iboom, loor esi dị ogina amhị bịn kụ urọl kụ odị bịn kụ arue ulhoghonhaạn imhị ḍighaạgh okparạm adọl phọ aḍiphẹ phọ.”
Mem lọ yira okạr obeḍenhọm aZihova, opọ kụ amem dị yira osighẹ nyodị idiphọ Aḍighiigh ayira (Miịn ekpịgh phọ 7)
8. (a) Uḍighi ika kụ yira koḅẹm bọ mọ aZihova amiigh ni? (b) Eeghe asuọ kụ edị yira romoọgh ghan esi oḍighi aZihova Ḍighiigh ayira? (Psalm 62:6, 7)
8 AZihova amiigh. Idiphọ aḍighiigh, aZihova amiigh aḅilhẹ akpạr. Odọ oye phọ odị aru bọ ḅilhẹ r’ogbi phọ odị ra/nmia ghan, emiigh bịn oomo amem mọ. (Mal. 3:6) Mem mọ igbagharạn phọ emite bọ siphẹ oghoony phọ Iden, aZihova o/nme ogbi phọ odị. Idiphọ otelhedom mọ Pọl aghaạph bọ, aZihova “okpẹ loor odị ra/gbaanaạn ghan.” (2 Tim. 2:13) Iphẹn phọ remạ ghan mọ etigheri ilọ emite obobọ idị abunhọn oḍighi, aZihova r’amem r’amem ra/nme ghan raagharạ phọ odị, ogbi phọ odị, obobọ siigbu phọ odị. Loor iduọn Enhaạn phọ ayira amhiigh bọ, yira kotue ni oḍuom olhoghi mọ odị odi ni oomo amem ophẹl r’olhoghonhaạn ayira ḍighaạgh mem iiḅaghamhị.—Bạl Psalm 62:6, 7.
9. Nạ atuughạ eeghe esi eḍeenhaan phọ aTatyana?
9 Eḍighi maạr dị yira ogbirima ghan raagharạ phọ aZihova ḅilhẹ r’ogbi phọ odị, pọ yira roḍighi ghan aZihova Ḍighiigh ayira. Oḍighi ghan iduọn phọ kilhoghonhaạn iyira ḍighaạgh ophoomhị aloor kụ oḅilhẹ oḅạr odị mem iiḅaghamhị. (Ps. 16:8) Iphẹn phọ iru ni inẹ esi umaranhi dị oghol mọ Tatyana, dị osophoghom mọ ku/mite erugh loor omheeraam mọ odị. Odị aḅẹm mọ, “mị ulhoghoma mọ ogina amhị bịn odi. Ikpạr ri eḅẹl amem mọ. Mị ugbor ghan ni aḅonyonhu azuan.” Toroboiperolbọ, mem mọ odị agbirima bọ ilọ aZihova r’ogbi phọ odị amhooghonhaạn bọ omhạr awe, odị aru ni amhiịn iyaạr phọ emhạn bọ maạr dị odị kakparạm. Ipẹ phọ iḍighi ni idị odị aphoomhị loor aḅilhẹ amhoọgh inyaạm. Odị aḅẹm mọ: “Onhaghanhạn iyaạr phọ eḍighi bọ kụ iphẹn phọ rimitenhaan bọ imhị, ilhoghonhaạn imhị ḍighaạgh ootughiạn mọ aloor emhụ aZihova kụ edị mị asoman bọ sidọl phọ iphẹn phọ. Ipẹ phọ milhoghonhaạn imhị ḍighaạgh dị mị kaa/tughiạn ghan ilọ aloor amhị bịn.”
10. Ika kụ idị yira kotue oḍighi aZihova Ḍighiigh ayira rodon?
10 Moọny amem, yira kosoman ni iiḅaghamhị dị kemoghi mọ yira obeḍenhọm aZihova eten dị k”erọl ghan. Nyiidiphọ kụ amem dị ewạ mọ okuamhị okuphom owol mọ aZihova kamiteom ni ungọ iyira raraạr phọ ipẹ emhoghi bọ orue okparạm osi eekunha phọ. Ika kụ idị yira kotue oḍighi iduọn phọ? Aạl ghan reḍeenhaan aBaibul r’areḍeenhaan awe arodon. Ḅeeḅeghiọn reten dị Enhaạn malhoghonhaạn ghan ḍighaạgh rebenhẹ phọ odị aḅilhẹ abakị bidị. Gbirima agey ilọ areḍeenhaan phọ nạ aạl bọ. Loor esi dị kelhoghonhaạn nyinhạ ḍighaạgh oḍighi aZihova Ḍighiigh anạ.
MOỌGH AANI RAAGHARẠ PHỌ OTỤ BỌ OMAANIỌM AZIHOVA ḌIGHIIGH
11. Uḍighi ika kụ yira rowạ bọ otuughaạny araagharạ phọ otụ bọ omaaniọm aZihova Ḍighiigh? (Miịn igbe phọ “ Aḍiigbu Dị Iḍoọgh Abumor Kotue Oporogh.”)
11 Yira mooḅeghiọn omiịn raagharạ phọ aZihova amhoọgh bọ kụ otụ bọ omaaniọm nyodị ḍighiigh. Nyiidiphọ, ooḅeghiọn ipẹ yira kotue bọ otuughaạny raagharạ phọ otụ bọ omaaniọm nyodị ḍighiigh. Eḍighi maạr dị yira oḍighi oomo ipẹ yira kotue bọ otuughaạny odị, pọ yira kolọgh ni opophe ookpomhoghan phọ. Esi omaạm, aZizọs aghol Saimọn mọ aKifas (iduọn phọ kẹn pọ “aPita”), emhụ phọ pọ “aḍighiigh.” (Jọn 1:42) Iphẹn phọ remạ ghan mọ aPita kaḍighi zin iidereghị angọ bunhọn aḅilhẹ akparamhị omheeraam abunhọn siphẹ ookpomhoghan phọ. ABaibul phọ aḅẹm mọ ikumor awe arookpomhoghan phọ oḍighi “oogho aḍigbogh aḍighiigh.” Ipẹ phọ ekạr kụ eḍeenhaan ipẹ bidị rokoph ghan bọ buphẹ odi bọ siphẹ ookpomhoghan phọ. (Isa. 32:2) Okạr oghaạph, ookpomhoghan phọ romooghọm ghan ni suọ mem dị oomo abumor r’abumaranhi phọ otuughaạny raagharạ phọ otụ bọ omaaniọm aZihova Ḍighiigh.—Efẹ. 5:1.
12. Mạ reten dị yira kotue oḍighi esi ibooghiạn ongọ bunhọn.
12 Ḍighi esi ibooghiạn. Ibadị amem, yira otue ni oḍighi esi ibooghiạn ongọ bumor r’abumaranhi phọ ayira mem dị ekperenhom iiḅaghamhị emitenhaan bidị, obobọ oghiil eghạm. Idiphọ asiḍio “aruukuna” phọ rebeeph bọ kelhoghorị, yira komoọgh ni ibadị aroopoogh olhoghonhaạn aḍighaạgh oniin atum nyoniin. (2 Tim. 3:1) Yira kotue kẹn ni ongọ iidereghị r’ephomhoghiạn bumor r’abumaranhi phọ ayira. Eniin eten dị yira kotue oḍighi iphẹn phọ, pọ oḍighi idị bidị kologhoma ghan eenyuụm mem dị bidị oru ituughạ ḅilhẹ r’oḍighi idị eephọ r’amuḅọph ketọl siphẹ ookpomhoghan phọ. Yira odi aḅirinhi dị awe rozoọm ghan we egbagarạ eten. Iphẹn phọ reḅonyon ghan ni bumor r’abumaranhi phọ ayira kezu. Esi iduọn phọ, mem dị abumor r’abumaranhi phọ ayira oru ituughạ, oḍighi oomo ipẹ yira kotue bọ oḍighi idị bidị kologhoma ephomhoghiạn r’oghoph, kụ oḅilhẹ oomhanham.
13. Ika kụ idị ikumor awe phọ r’aloor kotue oḍighi esi ibooghiạn ongọ bunhọn? (Miịn kẹn afoto phọ.)
13 Ikumor awe ookpomhoghan phọ kotue ni oḍighi esi ibooghiạn obobọ esi oghoph ongọ bulọ osoman iiḅaghamhị siphẹ ookpomhoghan phọ. Mem dị ekperenhom iiḅaghamhị emite obobọ e/moon esuom oye, ikumor awe phọ rokem ghan ni komiteom iikolhobian olhoghonhaạn aḍighaạgh. Bidị rologhonhaạn ghan ḍighaạgh kẹn okparamhị abumor phọ. Reḅeraạn ghan agey bumor r’abumaranhi oghị oteẹny okumor oye ookpomhoghan dị adugh oḅaanhaạn, raler ghan rurụ, ḅilhẹ kanaghanhạn ipẹ bidị olhoghoma bọ. Idọ phọ araagharạ phọ iphẹn phọ reḍighi ghan idị abunhọn kologhoma ephomhoghiạn. Reḍighi ghan kẹn idị kedughanhaan bidị osighẹ oḍighinhom atorobọ oroma aBaibul dị eeni okumor oye phọ angọ.—1 Tẹs. 2:7, 8, 11.
Mem dị abumor r’abumaranhi phọ osoman iiḅaghamhị, ikumor awe phọ roḍighi ghan esi oghoph kongọ bidị (Miịn ekpịgh phọ 13) a
14. Ika kụ idị yira kotue oḍeenhaan mọ yira okpẹ ni obeḍenhọm?
14 Ḍighi oye dị akpẹ obeḍenhọm. Yira rowạ ni dị abunhọn kubeḍenhọm iyira, ekạr ekpaariọm mem iiḅaghamhị. (Prov. 17:17) Ika kụ idị yira kotue oḍighi we dị okpẹ obeḍenhọm? Yira okparaghạ ghan otuughaạny aZihova torobọ aḍio. Esi omaạm, oḍighi ghan ilọ yira oguan oḅilhẹ omhoọgh eegharạ oḅon ghan. (Mat. 5:37) Enhọn pọ, omiteom ghan olhoghonhaạn aḍighaạgh mem lọ emhoghi. Oḅarạm isiẹn, omhadạn ghan torobọ oḍighi dị ungọ iyira siphẹ ookpomhoghan phọ kụ oḅilhẹ odaphạn ghan iiḅakiọm dị ongọ ilọ oḍighi phọ.
15. Ika kụ idị ookpomhoghan phọ romooghọm ghan suọ esi ikumor awe dị okpẹ obeḍenhọm?
15 Ookpomhoghan phọ romooghọm ghan ni suọ mem dị ikumor awe phọ oḍighi we dị okpẹ obeḍenhọm. Ika? Abumor r’abumaranhi ro/kiilhaan ghan oghị owạ olhoghonhaạn aḍighaạgh ikumor awe dị okpẹ obeḍenhọm, idiphọ opọ rapogh bọ egu phọ abidị. Abumor r’abumaranhi phọ rologhoma ghan kẹn ephomhoghiạn mem dị bidị olhegheri mọ ikumor awe phọ ookolhobian ni oomo amem olhoghonhaạn abidị ḍighaạgh. Abumor r’abumaranhi phọ roḍuom ghan olhoghi ikumor awe phọ mem dị bidị omhiịn mọ ikumor awe phọ okpasị oromha abidị siphẹ aBaibul phọ r’arinyạ ookpomhoghan phọ kparipẹ r’iitughiạn abidị. Abumor r’abumaranhi roḍuom ghan kẹn olhoghi ikumor awe dị ro/kaạph ghan raraạr ibooghiạn abidị koḅenhị bunhọn. Robeḍenhọm ghan kẹn ikumor awe dị roḍighi ghan ilọ bidị oghaạph.
16. Ika kụ edị yira rologhonhaạn ghan ḍighaạgh loor ayira r’abunhọn mem dị yira omhiigh giph?
16 Ḍighi oye dị amhiigh. Yira kotue ni oḍighi egey eḍeenhaan ongọ bunhọn eḍighi maạr dị yira omhiigh giph oḍighi ghan ipẹ eḅeraạn bọ aZihova kụ osopha ghan osopha dị akpasị sinhị iilhogh aBaibul. Idiphọ omheeraam r’olhegheri iyaạr igey phọ ayira rabụgh bọ, idiphọ kụ edị yira komiigh siẹn igey phọ. Yira u/ḍighi we dị iloghi rebạl iyạl yạl, u/miigh, obobọ we dị itughemhị okpẹ r’iitughiạn aḅirinhi phọ kiphighemhi ghan iyira. (Efẹ. 4:14; Jems 1:6-8) Omheeraam mọ ayira esi aZihova r’aruguanhaan phọ odị rimhiighemhi ghan iyira mem dị yira onaghạn ikarạph iinhaghạn. (Ps. 112:7, 8) Kụ yira kẹn kotue ni ologhonhaạn ḍighaạgh we dị osoman odẹgh ophogh.—1 Tẹs. 3:2, 3.
17. Eeghe kụ ketue eloghonhaạn ḍighaạgh ikumor awe phọ oḍighi idị abumor phọ komiigh?
17 Ikumor awe phọ okpẹ oḍighi awe dị omhoọgh eeḅi ezọ, omhaạr erolọm, rooko ghan loor, ḅilhẹ oḍighi we eephọ. Ikumor awe phọ rologhonhaạn ghan ḍighaạgh bunhọn omhiigh ḅilhẹ romhoọgh omheeraam dị akpạr esi iduọn bidị omaạr bọ ophamanhạm Ekpo onhụ phọ Enhaạn. (Taị. 1:9; 1 Tim. 3:1-3) Eḍeenhaan ikumor awe phọ r’ipẹ bidị ropogh bọ iyool phọ, reloghonhaạn ghan ḍighaạgh bumor phọ ogbor ghan oghị ituughạ, omite ghan epẹ erugh phọ, rophạm ghan ituughạ oginha abidị. Mem dị abumor r’abumaranhi phọ osoman iiḅaghamhị kụ omhoọgh ooḅaghamhiạn aloor, ikumor awe phọ rokparamhị ghan bidị esi olhoghonhaạn abidị ḍighaạgh oḍuom olhoghi aZihova r’aruguanhaan ph’odị.
18. Eeghe kụ iḍighi kụ yira rowạ bọ ooseeny ghan aZihova ḅilhẹ roḍuraan ghan otuman odị? (Miịn kẹn igbe phọ “ Eten Oḍuraan Otuman AZihova.”)
18 Mem dị yira ooḅeghiọn iikiạ araagharạ phọ aZihova, kinyu ni iyira oghaạph aani ipẹ Uw-emhạ phọ Devid aghaạph bọ mọ: “Iiseeny erolhonhaạn Ḍighiigh phọ amhị, Zihova.” (Ps. 144:1) Oomo amem yira kotue ni oḍuom olhoghi aZihova. Siẹn oomo aghuḍum mọ ayira, ghalhamọ r’amem aḍikpọ yira kotue ni oḍuom olhoghi mọ odị kulhoghonhaạn ni iyira ḍighaạgh oḍuraan otuman odị. Yira kotue ni oḅẹm mọ: “Odị kụ Aḍighiigh amhị.”—Ps. 92:14, 15.
AḌUỌR PHỌ 150 Seek God for Your Deliverance
a ILỌ AFOTO: Onyọ umaranhi dị u/kiilhaan oghị oteẹny ikumor awe phọ oḅenhị iyaạr, mem dị odi otu ituughạ.
