SIJÉ POU LÉTID 26
CHANSON 8 Jéhova Sé Pwotèksyon Nou
Dépan Asou Jéhova, Sé Li Ki Kayè’w’!
“La pa ni pyès kayè kon Bondyé nou.”—1 SANMYÈL 2:2.
SA NOU KAY APWANN AN ATIK SALA
An atik sala, nou kay apwann konsèné adan sé kawaktè-a Jéhova ni ki ka fè’y on kayè. Èk nou kay apwann osi, koumannyè nou kay sa imité sé kawaktè sa-a.
1. An Sam 18:46, apwé David di ‘Jéhova vivan’, kisa i kwiyé’y?
ANYEN pa asiwé an vyé sistèm sala. Mové bagay sa wivé nou an népòt lè. Èk délè lè sé mové bagay sala fèt, bagay ka tèlman mové, i ka tounen lavi nou tèt anba. Mé mèsi Bondyé nou sav nou sa kwiyé asou Jéhova èk i kay édé nou. Nou sav sa, paski an atik-la avan sa-a, nou té ja diskité Jéhova sé Dyé vivan-an épi i toujou pawé pou édé nou. Lè nou apiyé asou’y èk nou jwenn sipò’y, sa ka ban nou asiwans-lan ‘Jéhova [vwéman] vivan!’ (Li Sam 18:46.) Mé, lamenm, apwé David di ‘Jéhova vivan’, i kwiyé’y ‘Kayè mwen.’ Pouki David kwiyé Jéhova on kayè, lè nou sav on kayè pa vivan? Ès sa ka fè syans?
2. Kisa nou kay apwann an atik sala?
2 Adan atik sala, nou kay apwann pouki Bib-la ka kwiyé Jéhova on Kayè. Nou kay apwann koumannyè nou sa konfyé Jéhova kon Kayè nou. Èk finalman, nou kay apwann koumannyè nou sa imité sé kawaktè-a Jéhova ni-a?.
POUKI BIB-LA KA KWIYÉ JÉHOVA ON KAYÈ
3. Pou ki wézon Bib-la ka kwiyé Jéhova on “Kayè”? (Gadé pòtwé-a.)
3 Bib-la ka kwiyé Jéhova on kayè paski sa sé on bagay nou tout konnèt, èk sa kay édé nou konpwann adan sé kawaktè-a Jéhova ni-a pli mèyè. Plizyè fwa an Bib-la, lè sèvant Jéhova té ka ba’y lonnè pou sé bèl kawaktè’y-la, yo té ka dékwi’y kon on “kayè”. Ditonronnonmi 32:4 sé pwèmyé koté an Bib-la, yo té kwiyé Jéhova on kayè. An lapwiyè pou Jéhova, Hanna té di: ‘La pa ni pyès kayè kon Bondyé nou.’ (1 Sanmyèl 2:2) Habakòk té osi kwiyé Jéhova, ‘Kayè mwen.’ (Habakòk 1:12) Moun-lan ki té ékwi Sam 73 té di: ‘Bondyé sé kayè tjè mwen.’ (Sam 73:26) Èk Jéhova menm di konsèné kò’y an Izaya 44:8, ‘la pa ni pyès lòt kayè.’ Bon. Apwézan nou kay diskité twa (3) kawaktè ki ka fè Jéhova kon on kayè, èk mannyè nou sa fè’y ‘Kayè nou.’—Ditonronnonmi 32:31.
Pèp Jéhova ka gadé’y kon on Gwo Kayè ki byen fèm, fò èk solid (Gadé pawagwaf 3)
4. An ki mannyè Jéhova ka pwotéjé nou? (Sam 94:22)
4 Jéhova ka pwotéjé nou diwan tan ki difisil. Si la ni on mové tan, on moun sa twapé pwotèksyon adan on kayè ki ni on kav. An menm mannyè-a, Jéhova ka pwotèkté nou lè nou ka èspéyansé mové sitiwasyon an lavi nou. (Li Sam 94:22.) I ka édé nou pou pwotéjé wilasyon nou épi’y èk i ka ban nou asiwans-lan ki, anyen ki ka afèkté nou apwézan pa kay diwé pou tout tan. Anfen, i pwonmèt nou, an tan pou vini, i kay tiwé tout sa ki ka fè tjè nou antjèt èk tout sa ki ka annékòz nou pou soufè. An lè sa-a, la pa kay ni anyen pou mennasé nou!—Izikèl 34:25, 26.
5. Ki mannyè nou sa twapé pwotèksyon hòd Jéhova? Ba yon ègzanp.
5 Lapwiyè sé yon mannyè nou sa twapé pwotèksyon hòd Jéhova. Lè nou pwédyé, Jéhova ka ban nou “lapé” èk lapé sala ka pwotéjé tjè nou èk lidé nou. (Filipay 4:6, 7) Bon. Konsidiwé ègzanp yon fwè ki té an pwizon pou lapéti lafwa’y, non’y sé Artem. Paditan i té an pwizon, on ofisyé gouvèdman té ni labitid ka kwèstyonnen’y. Ofisyé-a té ka maltwété’y èk i té vlé fè Artem pè. Artem di: “Mwen té ka ni mal tèt chak fwa ofisyé sala voyé aché mwen. . . . Mwen toujou té ka pwédyé bay Jéhova. Mwen té ka mandé’y pou édé mwen wèsté kam èk pou ban mwen lasajès. Wi, Jéhova édé mwen, épi sé taktik ofisyé-a pa té twavay asou mwen. Sé konmsi pwotèksyon Jéhova té tout owon mwen menm kon on bawad.”
6. Pouki nou sa toujou dépan asou Jéhova? (Izaya 26:3, 4)
6 Nou sa dépan asou Jéhova. Menm kon on montany ki fèt épi wòch fè kay toujou la, Jéhova kay toujou la pou édé nou. Alò, nou sa mété tout konfyans nou adan’y paski i sé ‘Kayè étonnèl-la’. (Li Izaya 26:3, 4.) Wi, kon Kayè étonnèl-la, i pa kay janmen mò. Alò i kay toujou la pou tjenn pwonmèt li, kouté lapwiyè nou, èk pou ban nou sipò-a nou bouzwen-an. Osi, nou sa dépan asou Jéhova paski i fidèl èk i pa kay kité sa ki fidèl pou li. (2 Sanmyèl 22:26) Épi i pa kay janmen obliyé sa nou fè ba li, èk i kay toujou wékonpansé nou.—Hibrou 6:10; 11:6.
7. Pouki nou ni pou dépan asou Jéhova? (Gadé pòtwé-a osi.)
7 Nou ka fè Jéhova Kayè nou, lè nou dépan asou’y. Lè nou apiyé asou Jéhova èk obéyi’y, sitou an tan difisil, sa kay an bennéfis nou. (Izaya 48:17, 18) Épi chak fwa nou èspéyansé sipò Jéhova, sa ka fè nou konfyé’y pli. Konsa nou asiwé sé li yonn ki sa édé nou andiwé anba népòt difikilté. Anfen, byen souvan, lè nou adan on mové sitiwasyon èk nou pa sa tounen ni dwèt ni gòch, nou sav nou sa toujou dépan asou Jéhova. Mi sé sa yon fwè, non’y sé Vladimir di: “Lè mé té an lajòl, mwen té ni pou mété pli konfyans an Jéhova paski mwen té pa kò mwen. Épi sé li yonn ki té sa édé mwen pou tjébé fò anba sitiwasyon sala. Konsa, tan-an lè mwen té an lajòl-la, sé tan-an mwen té ka santi pli pwé Jéhova.”
Nou ka fè Jéhova Kayè nou, lè nou dépan asou’y (Gadé pawagwaf 7)
8. (a) Lè Bib-la di Jéhova pa sa chanjé, kisa sa vlé di? (b) Silon Sam 62:6, 7, ki bennéfis nou ka twapé lè nou fè Jéhova Kayè nou?
8 Jéhova pa sa chanjé. Menm kon on montany ki fèt épi wòch fè byen établi, kawaktè èk divwa Jéhova byen établi; i pa sa chanjé. (Malakay 3:6) Pou ègzanp, lè Adanm èk Èv wivòlté kont Jéhova, sa pa té fè’y chanjé divwa’y pou lézonm. Zapòt Pòl di: “[Jéhova] pa sa janmen chanjé.” (2 Timòfi. 2:13) Sa vlé di, népòt bagay ki fèt, èben népòt sa moun fè, pa sa janmen fè Jéhova chanjé kawaktè’y, divwa’y èben wèg li. Konsa, paski nou sav Jéhova pa sa janmen chanjé, nou ni konfyans-lan ki i kay édé nou an tan ki difisil èk i kay tjenn pwonmèt li pou tan ki ka vini.—Li Sam 62:6, 7.
9. Kisa ou apwann an ègzanp Tatyana?
9 Si nou mèdité asou kawaktè Jéhova èk divwa’y pou lézonm èk latè-a, sa kay édé nou pou konfyé’y, èk pou fè’y Kayè nou. Sa kay osi édé nou pou wèsté fidèl pou Jéhova diwan tan ki difisil. (Sam 16:8) Annou gadé ègzanp yon sè, non’y sé Tatyana. Yo té mété’y pwizon an kay li pou lapéti lafwa’y. Sè-a di: “Mwen té pa kò mwen. I pa té ézé an koumansman-an, épi byen souvan, mwen té ka santi dékouwajé.” Mé kisa ki édé sè Tatyana? Sè Tatyana koumansé mèdité asou Jéhova, divwa’y pou lézonm, èk wézon-an i té enpòtan pou’y andiwé anba sitiwasyon sala. Épi sa édé’y pou wèsté kam èk i jwenn fòs-la pou wèsté fidèl pou Jéhova. Sè Tatyana osi di: “Lè mwen vini konpwann wézon-an pou sa ki té ka wivé mwen-an, sa édé mwen pou chonjé sé pou Jéhova mwen ka fè tout sa. Épi sa édé mwen pou pa fiksé asou kò mwen.”
10. Kisa ki kay édé nou pou fè Jéhova Kayè nou dépi apwézan?
10 An tan ki ka vini, bagay kay byen difisil, èk nou kay bizwen pou dépan asou Jéhova plis pasé avan. Konsa, apwézan sé lè-a pou nou fòtifyé lafwa nou an lavéwité sala: Jéhova kay potjiwé sa nou bizwen pou nou sa wèsté fidèl pou li. Kisa ki kay édé nou fè sa? Èben, nou ni pou li sé wakont-lan ki an Bib-la, èk sé èspéyans sé fwè èk sè nou-a jòdi. Èk kon nou ka fè sa, nou ni pou gadé pou wè mannyè Jéhova té sipòté sèvant li èk mèdité asou sé wakont-la. Lè’w fè sa, i kay édé’w fè Jéhova Kayè’w.
IMITÉ KAWAKTÈ JÉHOVA
11. Pouki nou vlé imité sé kawaktè-a Jéhova ni-a? (Osi, gadé enfòmasyon-an “ Sé Jenn Fwè-a—Sa Ou Sa Koumansé Fè Dépi Apwézan.”)
11 Nou ja konsidiwé sé kawaktè-a ki ka fè Jéhova on kayè pou nou. Apwézan, annou konsidiwé mannyè nou menm sa imité sé kawaktè sala. Si nou éséyé pou fè sa nou pé pou imité sé kawaktè-a Jéhova ni-a, nou sa fòtifyé sé fwè èk sè nou-a. Pou ègzanp, Jézi bay Simon non-an Sifas èben “Pita”, ki vlé di “an kayè.” (Jan 1:42) Pwen-an Jézi té ka fè-a sé sa: Pita té kay konfòté èk fòtifyé lafwa sé fwè èk sè-a an kongwigasyon-an. Osi, Bib-la ka konpawé sé ansyen-an an kongwigasyon-an épi “lonbwaj-la an gwo wòch ka bay adan yon tè ki sèk.” (Izaya 32:2) Ilistwasyon sala ka moutwé, sé ansyen-an ka pwotèkté sé moun-lan an kongwigasyon-an. Anfen, nou tout an kongwigasyon-an sa ankouwajé yonn a lòt lè nou imité kawaktè Jéhova.—Èfésòs 5:1.
12. Kisa nou sa fè pou édé sé fwè èk sè nou-a an tan difisil?
12 Édé sé fwè’w èk sè’w-la lè yo ka èspéyansé tan difisil. Kon kondisyon an dènyé tan-an ka kontiné pou vini pli mové, san dout, sé fwè èk sè-a kay bizwen èd nou. (2 Timòfi. 3:1) Pou ègzanp, si sé fwè èk sè nou-a pèd kay yo akòz di dézas natiwèl, èben ladjè, nou sa ba yo lòjman. Nou vlé bay sé fwè èk sè nou-a soulajman-an èk lanmityé-a yo bizwen. Lè yo vini mitin, palé épi yo èk konfòté yo. Wi, nou vlé fè kongwigasyon-an on plas koté yo kay toujou jwenn lanmityé èk ankouwajman. Ou wè, nou ka viv adan on latè koté ki moun ka maltwété yonn a lòt. Èk sa ka afèkté sé fwè èk sè nou-a. I ka ba yo tèt cho èk i ka jis fè yo santi akonmsi pyèsonn pa enmen yo. Konsa, nou vlé fè asiwé nou ankouwajé yo, konfòté yo, èk moutwé yo nou vwéman enmen yo.
13. Kisa sé ansyen-an ka fè pou sé fwè èk sè-a diwan tan ki difisil? (Gadé pòtwé-a osi.)
13 Sé ansyen-an ka fè sa yo pé pou édé sé fwè èk sè-a diwan tan ki difisil. Pou ègzanp, lè la ni dézas natiwèl, èben on sitiwasyon médikal ki lévé sibitman, byen vitman, sé ansyen-an ka ògannizé pou édé sé fwè èk sè nou-a. Sé ansyen-an osi, ka ofè djid èk ankouwajman ki sòti an Bib-la. Kanmenm, yo ni pou chonjé, sé fwè èk sè-a kay santi pli konfòtab pou mandé on ansyen pou asistans si yo sav i janti, i ka kouté sa yo ka di, épi i ka éséyé pou konpwann mannyè yo ka santi. Sé kawaktè sala ka fè sé fwè èk sè-a wè, sé ansyen-an enmen yo. Konsa, i kay pli ézé pou yo apliké népòt konsèy sé ansyen ba yo ki bazé asou pwensip Bib.—1 Tèsalonnika 2:7, 8, 11.
Sé ansyen-an ka konfòté sé fwè èk sè-a diwan tan ki difisil (Gadé pawagwaf 13) a
14. Ki mannyè nou sa moutwé nou sé on moun lézòt sa dépan asou?
14 Moutwé ou sé on moun lézòt sa dépan asou. Nou vlé sé fwè èk sè nou-a sav yo sa dépan asou nou pou èd, èspwèsman diwan tan ki difisil. (Pwovèb 17:17) Mé kisa nou sa fè pou yo sav yo sa dépan asou nou? Ében, nou sa fè tout sa nou pé pou imité Jéhova touléjou. Pou ègzanp, nou sa imité Jéhova lè nou tjenn sé pwonmèt nou-a, èk lè nou toujou a lè. (Mafyou 5:37) Osi, si nou sav on moun bouzwen èd, nou sa fè tout sa nou pé pou édé’y. An plis di sa, lè nou ni yon asayman an kongwigasyon-an, nou vlé fè asiwé nou swiv diwèksyon-an yo ban nou-a, èk fè asayman-an byen.
15. Ki mannyè kongwigasyon-an ka twapé bennéfis lè yo sa konfyé èk dépan asou sé ansyen-an?
15 Ki mannyè kongwigasyon-an ka twapé bennéfis lè yo sa konfyé èk dépan asou sé ansyen-an? Ében, lè sé fwè èk sè-a sav yo sa kwiyé asou sé ansyen-an pou èd, yo ka ni mwens tèt cho. Épi yo ka vwéman santi sé ansyen-an enmen yo èk kay fè tout sa yo pé pou édé yo. Anfen, lè sé ansyen-an bay konsèy ki bazé asou Bib-la èk sé piblikasyon nou-a, èk pa asou wipinyon yo, sé fwè èk sè-a ka ni pli konfyans an yo. Wi, sé fwè èk sè-a kay konfyé on ansyen ki pa ka wépété zafè yo èk ka tjenn sé pwonmèt li-a.
16. Si nou obéyi Jéhova an tout bagay, èk fè disizyon ki bazé asou Bib-la, ki bennéfis sa kay mennen nou èk lézòt?
16 Moutwé ou sé on bon ègzanp. Si nou obéyi Jéhova an tout bagay, èk fè disizyon ki bazé asou Bib-la, nou kay on bon ègzanp pou lézòt. Lè nou étidyé pawòl Bondyé èk fòtifyé lafwa nou an li, sa kay édé nou pou wèsté fidèl pou li èk wèg li. Osi, sa kay édé nou pou idantifyé fo enstwiksyon èk katjil ki pa a ling épi katjil Jéhova. Konsa, yo pa kay enflouwansé nou “kon moun ki ka kité népòt bagay yo tann chayé yo kon van ka chayé fèy sèk.” (Èfésòs 4:14; Jémz 1:6-8) Alò, lafwa nou an Jéhova èk sé pwonmèt li-a, kay tjenn nou kam lè nou wisouvwè mové nouvèl. (Sam 112:7, 8) Épi nou kay sa ankouwajé èk édé lézòt ki kay èspéyansé difikilté.—1 Tèsalonnika 3:2, 3.
17. Ki mannyè sé ansyen-an sa édé sé fwè èk sè-a pou wèsté kam èk ni on lafwa ki fò?
17 Yon ansyen sipozé “ni an lidé ki fò. Sé pou i sa kondwi kòʼy, sé pou i ni wèspé anpami moun” èk sé pou i wézonnab. Paski sé ansyen-an ka “tjenbé konmisyon lavéwité-a” byen fò, yo ka édé lézòt pou wèsté kam èk ni on lafwa ki fò an Jéhova. (Titòs 1:9; 1 Timòfi. 3:1-3) Konsa, pa ègzanp yo èk mannyè yo ka pwan ka kongwigasyon-an, sé ansyen-an ka ankouwajé sé fwè èk sè-a pou atandé sé mitin-lan, alé an minis-la èk fè létid pèwsonnèl yo wéglé. Anfen, lè sé fwè èk sè-a ni pwòblenm ki ka ba yo tèt cho, sé ansyen-an ka fè yo chonjé, yo ni pou dépan asou Jéhova èk fiksé lidé yo asou sé bèl pwonmèt li-a.
18. Pouki nou vlé bay Jéhova lonnè? (Osi, gadé enfòmasyon-an “ Yonn A Sé Mannyè-a Nou Sa Vini Pli Pwé Jéhova.”)
18 Kon nou ja konsidiwé adan sé bèl kawaktè-a Jéhova ni-a, nou sa di, menm kon Wa David, ‘Tout lonnè sé sa Jéhova, Kayè mwen.’ (Sam 144:1) Wi, nou sa toujou dépan asou Jéhova paski i kay toujou édé nou. Èk menm si laj-la ka mouté byen vit èk nou ka vini vyé, nou ni konfyans-lan Jéhova kay kontiné pou édé nou pou wèsté pwé’y. Konsa nou sa di épi tout tjè nou: “Jéhova sé Kayè mwen.”—Sam 92:14, 15.
CHANSON 150 Chaché Pou Jéhova, I Kay Sové’w
a SA PÒTWÉ-A KA MOUTWÉ: On sésé ka èspéyansé on bagay ki difisil. Mé i ka santi alèz pou apwoché sé ansyen-an èk di yo konsèné pwòblenm li. Sé ansyen-an ka byen kouté’y.
