1. Сарын 18:46-да Давид Иегованы неге тӱҥейлеген?

 БИС коркышту шакпыртту ӧйдӧ јададыс. Бистиҥ јӱрӱмис кенете солынардаҥ айабас. Карын бис јаҥыскан эмезис, бистиҥ јаныста Иегова бар. Ӧткӧн јӧрмӧлдӧ кӧргӧнисле, «Иегова — тирӱ Кудай», ол бисти качан да болуш јок артыргыспай јат. (Сарын 18:46 кычырыгар.) Давид Иегованы кайага тӱҥейлеген. Је тирӱ Кудай тирӱ эмес кайага незиле тӱҥей? Давид нени айдарга сананган?

2. Бу јӧрмӧлдӧҥ нени билип аларыс?

² Бу јӧрмӧлдӧҥ бис нениҥ учун Иегованы кайага тӱҥейлеп турганын ла мындый тӱҥдештирӱнеҥ Иегованыҥ кандый кылык-јаҥы кӧрӱнип турганын билип аларыс. Анайда ок Иегова биске канайып кайа болорын ла бис оноҥ неге ӱренип аларысты билип аларыс.

ИЕГОВА НЕНИҤ УЧУН КАЙАГА ТӰҤДЕШТИРИЛЕТ?

3. Иегова — Кайа деп, Агару Бичиктиҥ кандый ӱлгерлеринде айдылат, нениҥ учун? ( јурукты кӧрӱгер.)

³ Иегованыҥ ишчилери нениҥ учун оны кайага тӱҥейлейт? Нениҥ учун дезе анайып Иегованыҥ кайкамчылу кӧп кылык-јаҥдарын кӧрӱп ийерге јараар. Иегова — «Кайа» деп, Агару Бичикте баштапкы катап Јаҥды такыганы 32:4-тӧ айдылат. База бир учурал — Аннаныҥ мӱргӱӱлинде айдылган. Анда мындый сӧстӧр бар: «Бистиҥ Кудайыс ошкош кайа јок» (1 Сам. 2:2). Судурчы Аввакум Иегованы: «Мениҥ Кайам» — деп айткан (Авв. 1:12). А 73-чи Сарынныҥ чӱмдеечизи Иегованы «јӱрегимниҥ кайазы» деген (Сар. 73:26). Керек дезе Иегова да бойын «Кайа» — деп адаган (Иса. 44:8). Айдарда, Иегова канайып «бистиҥ Кайа» болор аргалу деп билип аларга, оныҥ ӱч кылык-јаҥын кӧрӱп ийектер (Јаҥ. т. 32:31).

4. Нениҥ учун Иегованы кору беретен јерге тӱҥейлеерге јараар? (Сарын 94:22).

⁴ Иегова — коруланатан јерис. Јаан јоткон болзо, кайа-таш  кижиге кору берет. Анайып ла Иегова бисти кандый бир јеткердеҥ корулаар аргалу. (Сарын 94:22 кычырыгар.) Темдектезе, Кудай биске оныла јуук колбуларлу болорго болужат ла кем де, не де биске јоголтып болбойтон каршу эдип болбос деп сӧзин берет. А келер ӧйдӧ ол бисти санааркаштардаҥ ла кыйын-шыра јетирип турган немедеҥ јайымдап саларын айдат (Иез. 34:25, 26).

5. Иегованыҥ корузын аларга нени эдер керек?

⁵ Иегованаҥ кору аларга, бис нени эдер аргалу? Биске мӱргӱӱр керек. Мӱргӱп турзаас, Иегова биске јӱрегисти ле санаабысты корулап турган «Кудайдыҥ амырын» берет (Флп. 4:6, 7, ЈТ). Кудайга бӱдӱп турганы учун арестке алдырган Артём аканыҥ учуралын кӧрӱп ийектер. Ол кажы ла шылуныҥ алдында тыҥ санааркап туратан, нениҥ учун дезе следователь кату-казыр кижи болгон. Артём нени эткен? Ол сӱӱнип эске алат: «Мен Иеговага мӱргӱп, јӱрегиме амыр ла ойгор сурагам. Анайып следовательдиҥ тӱҥей ле нени де эдип болбой турганын кӧрзӧм, Иегова мени кайа-таш чылап корулап алгандый билдирген».

6. Бис нениҥ учун Иеговага јаантайын иженер аргалу? (Исайя 26:3, 4).

⁶ Иеговага бӱдерге јараар. Канайып кайа бир јерде бек турат, анайып ла Иегова јаантайын бистиҥ јаныста болор. Бис ого бир де алаҥзыбай иженер аргалу, нениҥ учун дезе Иегова «јажын-чакка туратан Кайа». (Исайя 26:3, 4 кычырыгар.) Кудай бистиҥ јӱрӱмистеҥ качан да јоголып калбас. Ол бойыныҥ берген сӧзин бӱдӱрип салар, бистиҥ мӱргӱӱлдеристи јаантайын угар ла биске јаантайын болужар. Бис Иеговага база нениҥ учун бӱдер аргалу? Нениҥ учун дезе ол бистиҥ јакшы керектеристи ундыбас ла бисти кайрал јок артыргыспас чындык Кудай (2 Сам. 22:26; Евр. 6:10; 11:6).

7. Иеговага иженгенистеҥ кандый туза аладыс? (Јурукты база кӧрӱгер.)

⁷ Иеговага бир де алаҥзыбай иженип турзаас, ол бистиҥ коруланатан кайа јерис болот. Оныҥ берген јӧптӧриниҥ ончозы биске тузалу деп билип јадыс. Оныҥ учун Иегова Кудайыска кӱч те ӧйлӧрдӧ сӧсуккур болодыс (Иса. 48:17, 18). А оныҥ болужын кӧрӱп турзаас, бис ого оноҥ тыҥ бӱдӱп баштайдыс. Мынайып бис келер ӧйдӧ Иегованыҥ болужы јокко ӧдӱп болбойтон ченелтелерге белетенедис. Качан кемнеҥ де болуш јок, јӱк ле Иегованыҥ болужын сакыйтан айалга боло берзе, Иегова чыннаҥ ла коруланатан јер деп, јакшы оҥдой бередис. Тӱрмеде отурган Владимир аканыҥ учуралын кӧрӱп ийектер. Ол айткан: «Тӱрмеде отурганым Иеговала колбуларымды тыҥыткан эҥ ле јакшы ӧй болгон. Анда сен чек јаҥыскан артып каладыҥ, айалганы эшти солыыр аргаҥ да јок, оныҥ учун јӱк ле Иеговага иженерге ӱренип јадыҥ».

8. а) Иегова база незиле кайага тӱҥей? б) Иегова — бистиҥ кайа болгонына нениҥ учун сӱӱнедис? (Сарын 62:6, 7).

⁸ Иегова качан да солынбай јат. Коркышту јаан бийик кайа-таштар канча  ӧйлӧргӧ јемирилбей турат. Анайып ла Иегова бир де солынбай јат. Ол амадузын да качан да солыбас (Мал. 3:6). Эдем садта Адам ла Ева Иеговага удура да болордо, Кудай бойыныҥ амадузын солыбаган. Апостол Павел мынайып айткан: «[Иегова] бойынаҥ јана тӱжӱп болбос» (2 Тим. 2:13). Бу дезе не де болуп турза, улус та нени де эдип турза, Иегова качан да солынбас, бойыныҥ нормаларын ла амадузын качан да буспас дегенин кӧргӱзет. Оныҥ учун бу шакпыртту ла кӱч ӧйлӧрдӧ бис Иеговага алаҥзу јогынаҥ иженер аргалу. Ол бисти аргадаар да, корулаар да. (Сарын 62:6, 7 кычырыгар.)

9. Татьяна эјениҥ учуралынаҥ неге ӱренедеер?

⁹ Бис Иегованыҥ кылык-јаҥдарын ла амадузын шӱӱп сананып турзаас, ол бистиҥ кайабыс болор. Анайып бис кӱч ӧйлӧрдӧ эмоциональный јанынаҥ бек болорыс (Сар. 16:8). Андый учурал Татьяна эједе болгон. Ол Кудайга бӱдӱп турганы учун домашний арестте отурган. Эје куучындайт: «Ол ӧйдӧ мен чек јаҥыскан артып калган болгом. Баштап тарый коркышту кӱч болгон, оныҥ учун кӧп кунугып туратам». Је эјеге эмоциональный јанынаҥ бек артарга не болушкан? Ол Иегова керегинде ле оныҥ амадузы керегинде шӱӱп сананган. «Мен недеҥ улам шыралап турганымды аайлап ийеримде, јеҥил боло берген. Чынынча болзо, мен Иегова учун шыралап тургам не. Мыныҥ ла кийнинде бойым керегинде кӧп сананбаска албадангам» — деп, эје куучындайт.

10. Иегова бистиҥ кайагыс болзын деп турган болзоос, эмди ле нени эдер керек?

¹⁰ Келер ӧйдӧ бисти коркышту јаан кӱчтер сакып јат. Ол ӧйдӧ биске, алдындагызына кӧрӧ, Кудайга оноҥ тыҥ иженер керек болор. Оныҥ учун эмди ле Иеговала колбуларысты тыҥыдарга албаданар керек. Анайып, кандый да кӱч ӧйлӧрдӧ Кудайыска чындык артарыс. Бого нени эдер керек? Алдындагы ӧйдӧ Иегова бойыныҥ ишчилерине канайып болушканын ла бӱгӱнги кӱнде канайып болужып турганын кычырып турарыс. Олорго Иегова канайып кору болгонын шӱӱп сананарыс. Ол тушта Иегова слердиҥ де кайагар болор.

ИЕГОВА ОШКОШ БОЛУГАР

11. Биске ончобыска Иегованаҥ неге ӱренер керек? ( «Карындаштардыҥ амадузы» деген рамканы база кӧрӱгер.)

¹¹ Иегова нениҥ учун кайага тӱҥдештирилип турганын кӧрдис. А эмди бис оноҥ кандый тем алар аргалу деп кӧрӧрис. Иеговага канча ла кире тӱҥей болуп калзаас, ака-эјелериске ончо ло кире кӧп болужар аргалу болорыс. Темдектезе Иисус Симонды Кифа (грек тилге Пётр) деп адаган. Бу дезе «кайаныҥ тажы» дегени (Иоанн 1:42). Иисус Симонды мынайып адап, Пётр ака-эјелерди токунадарын ла олордыҥ бӱдӱмјизин тыҥыдарын  кӧргӱскен. А аксагалдар дезе Агару Бичикте «бийик кайаныҥ кӧлӧткӧзиндий» деп адалат. Нениҥ учун дезе олор јуунды корулап турган (Иса. 32:2). Је јӱк ле аксагалдар эмес, бис ончобыс Иегованаҥ тем алып, бой-бойыска кайадый болор аргалу (Эф. 5:1).

12. Бис ака-эјелериске канайып кору болор аргалу?

¹² Кору болугар. Кезикте бистиҥ ака-эјелерге ар-бӱткенниҥ тӱбегинеҥ улам, јуу-согуштаҥ ол эмезе улустыҥ тӱймеен кӧдӱргенинеҥ улам качарга келижет. Бис олорды бойыстыҥ айылыска кычырып, олорго кору болор аргалу. Агару Бичикте айдылганыла, бу «калганчы кӱндерде» телекейдеги айалга там ла катуланып јат (2 Тим. 3:1). Оныҥ учун биске бой-бойыска болужатан учуралдар там кӧптӧӧр. Анайда ок бой-бойыска эмоциональный ла ич-кӧгӱс јанынаҥ болужары керектӱ болор. Бис нени эдер аргалу? Темдектезе, Каандыктыҥ Туразында бой-бойыска тоомјылу ла јылу баштанып турзаас, јуунга келген ака-эјелер бойлорын керектӱ деп сезер. Бу соок ло кату телекейдеҥ улам кӧп улус стресске табартат. Оныҥ учун бис јуундарысты ака-эјелериске ийде-кӱч алынатан ла коруланатан јер болзын деп кӱӱнзеп јадыс.

13. Аксагалдар ака-эјелерге канайып кору болор аргалу? (Јурукты база кӧрӱгер.)

¹³ Аксагалдар ака-эјелерге кандый ла кӱч ӧйдӧ кору болор аргалу. Темдектезе, ар-бӱткенниҥ тӱбегиниҥ ӧйинде эмезе та кемге де су-кадыгы јанынаҥ болуш керек боло берзе, олор тӱрген ле болужып јат. Анайда ок олор ака-эјелерди Агару Бичиктиҥ болужыла токунадып јат. Аксагал ака-эјелерди угуп турза, оҥдоорго албаданып турза, олорло јалакай куучындажып турза, ака-эјелерге ого баштанарга јеҥил болор. Аксагал  бисти сӱӱп турган деп сезип турзаас, биске оныҥ Агару Бичикке тайанган јӧбин де алынарга јеҥил болор (1 Фес. 2:7, 8, 11).

14. Бӱдӱмјилӱ кижи болорго нени эдер керек?

¹⁴ Бӱдӱмјилӱ кижи болугар. Кӱч ӧйлӧрдӧ улус бистиҥ болужыска иженер аргалу болзын деп кӱӱнзейдис (Укаа 17:17). Мындый кижи болорго нени эдер керек? Јӱк ле кезикте эмес, је јаантайын христиан кылык-јаҥду болор керек. Темдектезе, берген сӧзисти бӱдӱрип турарыс, оройтыбай турарыс (Матф. 5:37). Кемге-кемге болуш керек болзо, болушпай, тууразында туруп калбазыс. Анайда ок биске јакылта берилген болзо, оны башкарту аайынча бӱдӱрип турарыс.

15. Јуун нениҥ учун бӱдӱмјилӱ аксагалдарды баалайт?

¹⁵ Бӱдӱмјилӱ аксагалдар — јуунга берилген баалу сыйлар. Нениҥ учун мынайып айдарга јараар? Аксагалдар (темдектезе, јарлаар иштиҥ бӧлӱгиниҥ кӧрӧӧчизи) ачык-јарык болзо, ака-эјелерге олордоҥ болуш сураарга јеҥил болор. Ака-эјелер аксагалдардыҥ јаантайын болужарга белен болгонын кӧрӱп турза, олордыҥ сӱӱжин сезедилер. Анайда ок аксагалдар јӧп берзе, бойыныҥ кӧрӱмине эмес, је Агару Бичикке ле ого тӧзӧлӧнгӧн бичиктерге тайанып турза, ака-эјелер олорго оноҥ тыҥ бӱдет. Је база бир неме, аксагалдар ака-эјелерле куучындашканын јажытта тудат ла сӧзине турат. Бис олорго бу учун јаан быйанду.

16. Иеговага чындык болгоныстаҥ биске бойыска да, улуска да кандый туза болот?

¹⁶ Иеговага чындык болугар. Бис кажы ла немеде Иеговага сӧсуккур болуп турзаас ла бистиҥ чыгарган тӱп-шӱӱлтелерис  оныҥ Сӧзине тӧзӧлӧнип турза, ака-эјелерге јакшы тем кӧргӱзедис. Агару Бичикти ӱренип, бӱдӱмјибисти тыҥыдып турзаас, чындыкта бек турарыс. Анайып, бисте алаҥзыштар болбос, тӧгӱн ӱредӱлер ле бу телекейдиҥ кӧрӱм-санаазы санаабысты булгабас (Эф. 4:14; Иак. 1:6—8). Анайда ок бис Иеговага ла оныҥ берген сӧзине бӱдӱп турган болзоос, јаман солундар да бистиҥ амырысты айрыбас (Сар. 112:7, 8). Карын кӧп кӱчтер ӧдӱп турган улуска болуш болорыс (1 Фес. 3:2, 3).

17. Аксагалдар јуунды канайып тыҥыдат?

¹⁷ Иегова аксагалдарды бойын ӱзе јанынаҥ тудунып билер, ойгор, керсӱ, керектери аайлу-башту болзын деп кӱӱнзеп јат. Аксагал «чындык сӧстӧҥ» тудунып турза, ака-эјелердиҥ бӱткенин тыҥыдарга ла чындыкта бек турарга болужып јат (Тит. 1:9; 1 Тим. 3:1—3). Бу јалакай кӱдӱчилер ака-эјелерге јуунныҥ туштажуларын божотпос керек, јарлаар ишке јӱрер керек, Агару Бичикти шиҥдеер керек деп эске алындырат. Бу јанынаҥ олор бойлоры да тем болуп јат. Оноҥ кандый бир ака эмезе эје кӱч айалгага туштаган болзо, олор ого эҥ керектӱзин — Иегованы ла оныҥ айткан сӧстӧрин ундыбаска болужат.

18. Иегованы мактаарга ла оныла колбуларысты тыҥыдарга бисти не кӱӱнзедет? ( «Иеговала колбулараарды тыҥыдыгар» деген рамканы база кӧрӱгер.)

¹⁸ Бу јӧрмӧл Иегова Кудайыстыҥ база да ӧскӧ кылык-јаҥдарын билип аларга болушты. Эмди бис Кудайысла оноҥ тыҥ оморкоп јадыс. Оныҥ учун акту кӱӱнистеҥ Давидтиҥ: «Мениҥ Кайам, Иегова, макталзын» — деп сӧстӧрине јӧмӧжип јадыс (Сар. 144:1). Иегова солынбай јат. Ол алдында ӧйдӧ кандый болгон, эмди де андый ла, келер де ӧйдӧ андый ла болор. Иегова јаантайын бистиҥ јаныста болор. Бастыра јӱрӱмиске оныҥ најызы болуп артарга кӱӱнзейдис. Ол тушта канча да јаш јажазаас: «Ол мениҥ Кайам» — деп айдар аргалу болорыс (Сар. 92:14, 15).