1. Itini ˈOlic 18:46, patinakoan ni Tafiti ci Yihofa to maanan hani?

 ITINIAY maˈorip kita tonini kalikiay a mafalic a hekal, talifahal sanay a pasangar safanaˈ sanay a mifodifod to nokaˈorip ita. Kawrira ngaˈayay kita pasayra ci Yihofaan micangacang to sapadama no Kawas, pakayni toninian tada miakoˈiday kita Cingranan. I fafekangay lalakaw mananamay ita, soˈlinay materek maˈoripay ci Yihofa a Kawas, ano hacowato ngangaˈay mipadang kitaanan. Ano malifokto ita ko sadama Ningra i, mamatirato ci Tafitian matomes ko pakasoˈlinay falocoˈ a pasowal: ‘O soˈlinay materek maˈoripay ci Yihofa!’ (ˈOsien ko ˈOlic 18:46.) Ikor noka somowal ci Tafiti tora sowal i, o ‘ˈOngcoy no mako’ hananay ningra ci Yihofa. Misamaanay hano patatinakoen ni Tafiti ko midaˈocay maˈorip a Kawas ci Yihofa to awaay ko ˈorip a ˈongcoy hani?

2. Oniya lalakaw mamilengo to maanan?

² Onini lalakaw mamilengo o ˈongcoy ci Yihofa hano saan ko sowal no Fangcalay Cudad, ato sasamaan kita mikitini toniya sapatinako mihapinang to masamaanay a Kawas ci Yihofa. Wa minanamho kita, sasamaan palo ˈOngcoy no mita ko pinengneng ci Yihofaan. Maminengnengho kita, sasamaan mitodong ci Yihofaan malo ˈongcoy no tao.

HANO O ˈONGCOY HAN CI YIHOFA

3. Hano mararid ko Fangcalay Cudad tano ‘ˈongcoy’ hananay a somowal ci Yihofaan hani? (Nengnengen ko coka.)

³ Patinakoan no Fangcalay Cudad ci Yihofa to ‘ˈongcoy,’ papadama konini kitaanan cipinang to kasapaan a capeling ni Yihofa. Itini adihayay pahemekay ci Yihofaan a fedengan, masowalay ko Kawas to o ˈongcoy. Sakinacecay no Fangcalay Cudad patinako ci Yihofaan to ˈOngcoy i, itiniay i Limoˈot 32:4. Roma i, itini i satolon sanay ci Hana pasowal: ‘Awaay ko ˈongcoy to malecaday to Kawas no mita a tanektek.’ (1 Samuil 2:2) Ano ci Hapakukto ‘o ˈOngcoy no mako’ ci Yihofa saan. (Hapakuk 1:12) Mitiliday to ˈOlic saka 73 fedengan ‘ˈongcoy no falocoˈ no mako’ sanay to Kawas. (ˈOlic 73:26) Roma i,  patinakoan ni Yihofa ko Niyah to ˈongcoy. (Isaya 44:8) Dotoc nengnengen ita, ci Yihofa samanen iraay ko maanan tolo a capeling mansa hato o ˈongcoy han Cingra. Mamananamho ita, sasamaan ko pidemak ngaˈ o ‘ˈOngcoy no mita’ han ko pinengneng ci Yihofaan.—Limoˈot 32:31.

4. Ci Yihofa o pikiˈadingan hano saan ko sowal hani? (ˈOlic 94:22)

⁴ O pikiˈadingan ci Yihofa. O taˈangayay a ˈongcoy ngaˈayay pikiˈadingan to katalawan a faliyos, ci Yihofa i, ngangaˈay midipot kitaanan ano tahasiˈayaw to katalawan kita. (ˈOsien ko ˈOlic 94:22.) Mamidipot Cingra to nika lawidang ita Cingranan, cowa ko papakihateren Ningra ko maamaan a demak midaˈoc a midokaˈ kitaanan. Mikiˈokayho Cingra o papalahdawen Ningra noikor ko kihcod kacarirawan anca karorayan ita a demak.—Icikil 34:25, 26.

5. Sasamaan kita malo Pikiˈadingan no mita ci Yihofa hani?

⁵ Ano ciharatengay kita malo Pikiˈadingan ci Yihofa, cecay ngaˈayay pakayraan i, pasayra Cingranan mitolon. Maherek kita mitolon, papafeli ci Yihofa to rihaday midipot to falocoˈ ato ponoˈ no mita. (Filipi 4:6, 7) Nengnengen ko nalifetan no faˈinayan salikaka ci Aretem. Pakayni pihakelongan mapalitay cingra, itini kapalitan iraay ko cecay mariˈangay mitiyawcaay a tamdaw marariday misamsam cingranan, miroero cingranan. Sanay ko sowal ni Aretem: “Ano miliclic koya mitiyawcaay takowanan i, pasangaran nanay kako misiˈayaw. . . . Oranto mitolonay kako ci Yihofaan, micangacang Cingranan pafeli to taneng takowanan, padama takowanan rihaday ko falocoˈ.” Sanayho cingra: “O mihalakaan noya mitiyawcaay tamdaw awaay ko kapo takowanan. . . . Hato patadoay ci Yihofa takowanan patireng to tanektekay a lowil a paˈading.”

6. Hano ngaˈay kita padadotoc mitadiˈec ci Yihofaan hani? (Isaya 26:3, 4)

⁶ Ci Yihofa o ngaˈayay tadiˈecen. O taˈangayay a ˈongcoy kamayanto caay ka ngiyangi a tomireng. Malecaday, ci Yihofa itiniayto i tatihi ita a padama kitaanan. Ci Yihofa i, o ‘midaˈocay a ˈOngcoy,’ ngaˈayay tadiˈecen ita Cingra. (ˈOsien ko Isaya 26:3, 4.) Ci Yihofa tahadaˈocay a materek, padadotocay milahci to sakiˈok no Niyah, mitengilay to satolon no mita, itini kapisaalian no mita a tatokian i, midamaay kitaanan. Madimadiay ci Yihofa to midokoay Cingranan a tamdaw. (2 Samuil 22:26) Cowa ko mamapawan Ningra ko na midemakan ita Cingranan a demak, hanaca o papalifon kitaanan.—Hipray 6:10; 11:6.

7. Ano mitadiˈec kita ci Yihofaan i, mamilifok to maanan a haepoc hani? (Nengnengen ko coka.)

⁷ Ano ciharatengay to malo ˈOngcoy no mita ci Yihofa, sasarocoden ko falocoˈ a mitiˈer Cingranan wangaˈ. Pakasoˈlinay kita, soˈlinto tahalifa to pades kita i, o mamidofdof Cingranan, mihaen mamalifok ko epoc. (Isaya 48:17, 18) Malifok ita ko pipadama Ningra to kinacecacecay i, mamatongal ko kaciˈicel to nika pakasoˈlin no falocoˈ Cingranan, mihaen i, ngangaˈayto a misiˈayaw to mangalefay ko nika pakidem a sapalifet. Latek ano hacowaay tahalifa kita to sapalifet i, awaay ko tamdaw i tatihi a milayaˈ to kamay a mipadang, edengan ci Yihofa ko mamidama kitaanan milakowit to pasangar. Itini tohatiniay a pakayraan i, wa misasoˈlinto kita matinako to o ngaˈayay a tadiˈecen ci Yihofa. Faˈinayan salikaka ci Folacimil sanay ko sowal: “Marofo kako i, mahapinangay  ako matongalay ko nika kedec no kalalaˈed ci Yihofaan. Ano matoˈolento kako a cecay, awa ko salomaanan i, minanamay kako mitongal to kapitadiˈec ci Yihofaan.”

8. (1) Ci Yihofa tanektekay caka ngiyangi hano saan ko sowal hani? (2) O ˈOngcoy no mako saan ko pinengneng ci Yihofaan i, mamilifok to maanan a haepoc hani? (ˈOlic 62:6, 7)

⁸ Tanektekay caka ngiyangi ci Yihofa. O taˈangayay a ˈongcoy tada tanektekay, malecaday ci Yihofa to mahaenay a ˈongcoy tanektek caka ngiyangi. Caay ka falic ko capeling Ningra, ano araawto Ningra caay ka falic. (Malaki 3:6) Soˈliˈlin mitowakang ci Yihofaan ca Atam aci Ifa i Itin, nikawrira caay ka palasawaden ni Yihofa ko araaw to tamdaw. Malecad to misowalan no tarokos ci Pawlo, ‘caay pisamangah ci Yihofa to Niyahan.’ (2 Timoti 2:13) Tatodong noniya sowal i, ano maananto ko mifekaday a demak, ano maananto ko midemakan no tao, caay ko mamafalic ko pakayraan ni Yihofa a dademak, caay ko mamisilikor to araaw ato palinian no Niyah. Samanen tanektekay caka ngiyangi ci Yihofa, ngangaˈay pakasoˈlin kita, ano tahalifa kita to pasangaray o mamilayaˈ Cingra to kamay padama kitaanan, noikor mamisongilaˈ palaˈosi to araaw Ningra to tamdaw.—ˈOsien ko ˈOlic 62:6, 7.

9. Mikitini nalifetan no fafahiyan salikaka ci Taciyana mananamay iso ko maanan hani?

⁹ Ano ciharatengay kita malo ˈOngcoy no mita ci Yihofa i, rariden a miharateng to samaanay a Kawas ci Yihofa, kifalocoˈen ko araaw Ningra to tamdaw. Mihaen i, o ngangaˈayto kita itini i pasangaray a demakan padadotoc a rihaday a fanekfek ko falocoˈ. (ˈOlic 16:8) Fafahiyan salikaka ci Taciyana pakayniay i pihakelongan a tahacada to hakokay, mirofoan i lomaˈ, sanay ko sowal ningra: “Matoˈolan kako a miharateng awaay ko padamaay. Satapang i, pasangaran nanay misiˈayaw, marariday kako matoleden ko falocoˈ.” Ikor, misatapangay cingra midotim to milingatay ci Yihofaan ato araaw Ningra a demak, hanaca mahapinangay to itini i sapalifet padadotoc madimadi hano masakalimlaan. Telocto malifokay ningra ko ˈicel, ngaˈayto a talifak, padadotoc a miemem. Sowal ningra: “Misaˈicelay kako eca ka piharateng to malifaay no niyah, ao patalipaˈelalay to niyah o pifekad nonini a demak, mitadtaday to maolahay kako ci Yihofaan, sakamadimadiaw Cingranan. Mihaen i, cowato ka piharateng kako to kasiniˈada:an ko niyah.”

10. Sasamaan ko pidemak ita ngaˈ malo ˈOngcoy no mita ci Yihofa hani?

¹⁰ Itini kaˈayaway a romiˈad, mamasiˈayaw ita ko mikikakaay ko nika taˈangay a sapalifet, itiya i, mamikikaka to aniniay ko pisaali ita to sapitadiˈecaw ci Yihofaan. Mihaenay, aniniho kita paˈicel to pakasoˈlinay falocoˈ no niyah, pakasoˈlin to papadama ci Yihofa kitaanan madimadi Cingranan. Sasamaan a paˈicel to pakasoˈlinay falocoˈ hani? Ngaˈayay asipen ita ko pakayniay nolitengan madimadiay sikawdan a maˈoningay, minengneng to nalifetan no aniniay lintad madimadiay sikawdan, hanaca misongilaˈ miharateng samaanay ci Yihofa malo ˈongcoy nangra. Mihaen, ngangaˈayto kita pala ˈOngcoy no mita ci Yihofa.

TODONGEN CI YIHOFA, MALO ˈONGCOY

11. Hano sapitodongaw kita ci Yihofaan malo ˈongcoy hani? (Nengnengen ko sapatongal lalakaw “ Patosokan no Kapah a Tamdaw.”)

¹¹ Mafanaˈayto kita samanen ci Yihofa iraay ko  maanan a capeling, mansa o ˈongcoy hanto Cingra. Ano misaˈicel kita palahad tonini a capeling, o ngangaˈay malo ˈongcoy no salikaka, padama cangranan tanektek. Itini tonini a pakayraan, maharatengay iso ko maanan a taˈarawan hani? Panganganan ni Yis ci Simon to roma ngangan, o “ci Kifas” hananay (hongyaken tono Krisiya a sowal i, “ci Pitiro”), o tatodong nonini a faelohay ngangan i, o ‘Cecay ˈOngcoy.’ (Yohani 1:42) Tatodong i, papakalalok ci Pitiro to salikaka, padama cangranan padadotoc tanektek ko pakasoˈlin. Roma i, o sowal no Fangcalay Cudad to malohemay malitengay malecaday o ‘lidong no taˈangayay ˈongcoy’ sanay, somowalay konini o malohemay malitengay mamidipot to ilalomaˈay no kasakopang a tamdaw. (Isaya 32:2) Polong a salikaka ano mitodong ci Yihofaan malo ˈongcoy i, o caciepocto to kasakopang.—Ifiso 5:1.

12. Sasamaan kita malo pikiˈadingan no tao hani?

¹² Malo pikiˈadingan no tao. Itini ‘salikoray a lintad,’ pakayraan no hekal mangalef mangalefay ko nika tatiih. (2 Timoti 3:1) Mihaenay haw i, mangalefay ko sapafeliaw ita to sapadama i salikaka. Tinakoen, o salikaka pakayniay i pades no serayan anca lalood awa ko pikilomaˈan, itiya i, ngangaˈay kita micada cangranan, pafelien cangra to pikiˈadingan a kitiraan. Roma i, ngangaˈay kita itini nofalocoˈan ato pakasoˈlinay falocoˈ malo pikiˈadingan no salikaka. O cecay pakayraan i, ano tayra cangra masaˈopo i, faedeten ita a mihamham cangra. Mihaen kita o papadiheko to kasakopang, hano tada masakalimlaan konini hani? Itiniay kita tonini lietecay awaay ko olah a hekal, maroeroay a mapaekel ko tamdamdaw, mansa tayni ko salikaka masaˈopo i, saˈicelen ita parihaday ko falocoˈ ato pasinowayen cangra, mihaen mamatinakoto nangra ko nika ciharateng ita cangranan.

13. O malohemay malitengay sasamaan malo pikiˈadingan no salikaka hani? (Nengnengen ko coka.)

¹³ Ano itinito i soˈlinay anca sapatinako a tatodongan tahalifa ko salikaka to faliyos, o malohemay malitengay o ngangaˈay malo pikiˈadingan no  salikaka to fali ato ˈorad. Ano mafekad ko pades anca macalohay a paisingay a demak i, oha tatangsol ko malohemay malitengay a midemak, mipadama to salikaka. O mamisalalangi to Fangcalay Cudad ko malohemay malitengay a pakalalok to salikaka, pafeli cangranan to sakayat. Ano damsay ko waywayan no malohemay malitengay, ira ko siniˈadaay a falocoˈ, makahiho mitengil cangra, o mamakahito ko salikaka pasayra i cangranan micangacang to sapadama. Ira ko mahaenay a waywayan no malohemay malitengay i, mamatinakoto no salikaka ko olah nangra, teloc i, mamado:loto cangra micada to sapaini no malohemay malitengay.—1 Tisalonika 2:7, 8, 11.

14. Sasamaan ko pidemak ita malo ngaˈayay tadiˈecen a tamdaw hani?

¹⁴ Malo ngaˈayay tadiˈecen a tamdaw. Ciharatengay kita malo ngaˈayay pakasoˈlinen no tamdaw, hanaca ano tahalifa to pasangar ko tao i, maharateng nangra kita. (Taneng 17:17) Ano sapilifokaw kita to pakasoˈlin no tao, aka pisafalifalic ko demak, ao aitini i kihcod a demakan mitodong to pakayraan ni Yihofa a dademak, tinakoen mitoor to toki ato milahci to miketonan a sowal. (Matay 5:37) Itini i kapisaalian no tao a tatokian i, milayaˈ kita to kamay a mipadang. Roma i, ano patorod ko kasakopang kitaanan to ˈinorong i, mamidoedo kita to sakayat misongilaˈ a milahci to demak.

15. O ngaˈayay tadiˈecen a malohemay malitengay sasamaan paepoc to kasakopang hani?

¹⁵ O ngaˈayay tatiˈeren a malohemay malitengay sasamaan paepoc to kasakopang hani? Ano hacowato a tatokian ngaˈayay marinnak ko kantok no mitosilay a kasakapot anca romaroma malohemay malitengay, wa dahemhemto ko falocoˈ. Ano mafanaˈ ko salikaka to makalimay ko malohemay malitengay  padama cangranan i, dadihekoto ko falocoˈ nangra. Roma i, o sasalalangien no malohemay malitengay ko Fangcalay Cudad ato mitepangan a cudad no madimadiay a koli mihadak to sapaini, ao cowa ko mamisalalangi to notekedan a harateng a misadak to sapaini, mihaen i, mamangalef ko nika pakasoˈlin no salikaka cangranan. Roma sa, tafoen no malohemay malitengay ko hahimeden a demak, hanaca tooren midemak ko mihayian no niyah a demak, mihaen mamatongal ko nika pakasoˈlin no salikaka cangranan.

16. Ano tanektekay caka ngiyangi kita i, pairaay to maanan a haepoc no niyah ato tao hani?

¹⁶ Ka tanektek caka ngiyangi. Micalep kita mikingkiw to Fangcalay Cudad, padadotoc paˈicel to pakasoˈlinay falocoˈ no niyah, ngangaˈayto tanektek a tomireng i soˈlinay kimad. Mihaen i, cato ka misamisimisi ko falocoˈ a cisasa ko harateng, cowa ko mamadolo makayhid no mararaway sasowalen ato harateng no hekal. (Ifiso 4:14; Yakop 1:6-8) Ano matengil ko tatiihay a lihaf i, wa ngaˈay kita padotoc a rihaday, eca ka rawraw ko harateng, samanen pakasoˈlinay kita ci Yihofaan ato sakiˈok Ningra. (ˈOlic 112:7, 8) Ano kiemel kita midemak to matatodongay a demak, hanaca mitoor to safalod no Fangcalay Cudad a misaˈosi, ngangaˈayto malo taˈarawan no tao, ngaˈayho padama to tahapadesay a tamdaw padadotoc a tanektek.—1 Tisalonika 3:2, 3.

17. O malohemay malitengay sasamaan ko pidemak ngaˈ padama to salikaka padadotoc tanoktok ko pakasoˈlinay falocoˈ hani?

¹⁷ Mafanaˈ a pacaˈi ko malohemay malitengay, masierod ko demak, matatodong ko harateng, itini kihcod a nokaˈorip mitawmec to miˈimeray. ‘O kakakodait cangra misaka dademak to soˈlinay kimad’ pasifanaˈ to kasakopang, padama to salikaka padadotoc a tanektek ko pakasoˈlin. (Titus 1:9; 1 Timoti 3:1-3) Papatireng ko malohemay malitengay to ngaˈayay taˈarawan no salikaka, misongilaˈ a mikingkiw to Fangcalay Cudad, micerid mirienang to saˈopo ato mitosilay, hanaca milisoˈ a misimaw to salikaka, padama cangranan palahad to matiraay ngaˈayay nanaman. Roma i, ano malifa no salikaka ko pasangaray a macariraw caka rihaday i, papakalalok ko malohemay malitengay cangranan misamacay ko harateng ci Yihofaan ato araaw Ningra.

18. Hano halamham kita pakahemek ci Yihofaan, padadotoc miingid Cingranan hani? (Nengnengen ko sapatongal lalakaw “ Sapiingidaw ci Yihofaan a Cecay Hapakayraan.”)

¹⁸ Cipinangto to kasapaan a capeling ni Yihofa i, o mamatira kita to Hongti ci Tafitian a masemeren ko sowal: ‘Nanay mapakahemek ci Yihofa o ˈOngcoy no mako.’ (ˈOlic 144:1) Co:wa ko papatoled ci Yihofa kitaanan, ngaˈayay tadiˈecen ita i hakelong no ˈorip Cingra. Soˈlinto matoˈasto ko mihecaan, ngangaˈayho pakasoˈlin kita to papadama ci Yihofa kitaanan padadotoc miingid Cingranan. (ˈOlic 92:14, 15) Mamidaˈoc kita pakasoˈlinen a pasowal: ‘Ci Yihofa o ˈOngcoy no mako.’