1. Зәбур 18:46 ајәсиндә Давуд падшаһ Јеһованы тәсвир етмәк үчүн һансы бәнзәтмәдән истифадә етмишди?

 БУ ДҮНЈАДА гәфил башымыза һәр шеј ҝәлә биләр. Нәтиҹәдә, һәјатымыз чәтинләшәр вә ја үмумијјәтлә алт-үст олар. Нә јахшы ки, белә мәгамларда Аллаһымыз Јеһоваја үз тута билирик. Өтән мәгаләдә өјрәндик ки, Јеһова вар олан Аллаһдыр вә дадымыза чатмаға һәр заман һазырдыр. Јеһованын дәстәјини ҝөрәндә Онун «вар олан» Аллаһ олдуғуна бир даһа әмин олуруг. (Зәбур 18:46 ајәсини охујун.) Мараглыдыр ки, Давуд падшаһ Јеһованын вар олан Аллаһ олдуғуну демәклә јанашы, Ону «Гајам» адландырмышды. Нәјә ҝөрә о, Јеһованы — јашајан Аллаһы ҹансыз ҹисмә — гајаја бәнзәтмишди?

2. Бу мәгаләдә һансы суаллара ҹаваб тапаҹағыг?

² Бу мәгаләдә нөвбәти суаллара ҹаваб тапаҹағыг: «Јеһова нәјә ҝөрә гаја адланыр? Бу метафорадан Јеһова барәдә нә өјрәнирик? Јеһоваја Гајамыз кими јанашмаға нә көмәк едә биләр? Јеһованын гајајабәнзәр хүсусијјәтләрини неҹә тәзаһүр етдирә биләрик?»

НӘЈӘ ҜӨРӘ ЈЕҺОВА ГАЈА АДЛАНЫР?

3. Мүгәддәс Китабда чох вахт «гаја» сөзү неҹә истифадә олунур? (Шәклә бахын.)

³ Мүгәддәс Китабда Јеһованын бәдии диллә «гаја»ја бәнзәдилмәси Онун бәзи хүсусијјәтләрини анламаға көмәк едир. Чох вахт бу сөз Јеһованын бәнзәрсиз хүсусијјәтләринин вәсф олундуғу ајәләрдә ишләнир. Илк дәфә Јеһова Ганунун тәкрары 32:4 ајәсиндә «Гаја» адланыр. Һәннә дуасында демишди ки, «Аллаһымыз кими гаја јохдур» (1 Ишм. 2:2). Һәбгуг Јеһоваја «Гајам» дејә мүраҹиәт етмишди (Һәб. 1:12). 73-ҹү мәзмурун јазары Јеһованы «гәлбимин гајасы» адландырмышды (Зәб. 73:26). Һәтта Јеһова Өзү дә Өзүнү гаја адландырмышды (Әшј. 44:8). Ҝәлин Јеһованын гајајабәнзәр үч ҹәһәтинә нәзәр салаг вә ҝөрәк Она Гајамыз кими јанашмаға нә көмәк едә биләр (Ган. 32:31).

4. Јеһова сығынаҹаг олдуғуну неҹә ҝөстәрир? (Зәбур 94:22).

 ⁴ Јеһова сығынаҹагдыр. Шиддәтли фыртына баш верәндә инсан горунмаг үчүн бөјүк гајаја ҝизләнә биләр. Ејнилә һәјатымызда гопан фыртыналар заманы Јеһоваја сығынсаг, Онун мүдафиәсини дуја биләрик. (Зәбур 94:22 ајәсини охујун.) Јеһова бизи әмин-аманлыг ичиндә сахлајыр, нәјинсә бизә сағалмаз јара вурмасына иҹазә вермир. Һәм дә бизә белә бир вәд верир: О, нараһатлығымыза, әзабларымыза сәбәб олан һәр бир шеји бирдәфәлик мәһв едәҹәк (Һизг. 34:25, 26).

5. Јеһованын сығынаҹағымыз олмасы үчүн нә етмәлијик?

⁵ Гајамыз Јеһоваја сығынмағын бир јолу Она дуа етмәкдир. Биз дуа едәндә Јеһова бизә Өз сүлһүнү бәхш едир. Бу сүлһ үрәјимизи вә фикирләримизи горујур (Филип. 4:6, 7). Ҝәлин әгидәсинә ҝөрә һәбс олунан Артјом гардашын нүмунәсинә бахаг. Ону дәфәләрлә сорғу-суал едән сәрт бир мүстәнтиг һәмишә она тәзјиг ҝөстәрир вә ону алчалдырды. Артјом дејир: «Һәр дәфә мүстәнтигин јанына ҝедәндә мәни һәјәҹан басырды... Һәмишә Јеһоваја дуа едирдим. Ондан гәлб раһатлығы вә һикмәт истәјирдим. Мүстәнтигин әл атдығы һијләләр һеч бир нәтиҹә вермәди... Јеһова дағ кими архамда дурурду».

6. Нәјә ҝөрә Јеһоваја һәмишә етибар едә биләрик? (Әшија 26:3, 4).

⁶ Јеһова етибарлыдыр. Нәһәнҝ гајаны тәрпәтмәк мүмкүн дејил, о, һәр заман өз јериндә дурур. Ејнилә Јеһова да һәр заман јанымыздадыр. Биз Она етибар едә биләрик, чүнки О, «әбәди гајадыр». (Әшија 26:3, 4 ајәләрини охујун.) О, һәмишә вар олдуғу үчүн вәдләрини јеринә јетирәҹәк, дуаларымызы ешидәҹәк вә бизә дајаг олаҹаг. Јеһоваја ҝүвәнмәк үчүн даһа бир сәбәбимиз вар: О Өз хидмәтчиләринә гаршы садигдир (2 Ишм. 22:26). Јеһова Онун јолунда ҝөрдүјүмүз ишләри һеч вахт унутмајаҹаг вә бизи мүкафатсыз гојмајаҹаг (Ибр. 6:10; 11:6).

7. Јеһоваја ҝүвәнсәк, бунун һансы хејрини ҝөрәҹәјик? (Һәмчинин шәклә бахын.)

⁷ Јеһованын бизим Гајамыз олмасы үчүн Она там етибар етмәлијик. Биз архајыныг ки, һәтта һәјатымызын ән чәтин анында белә Јеһоваја итаәт етсәк, бунун бөјүк хејрини ҝөрәҹәјик (Әшј. 48:17, 18). Онун дәстәјини ҝөрдүкҹә исә Она етибарымыз даһа да артаҹаг. Онда биз гаршыдакы сынаглара даһа һазырлыглы олаҹағыг; о сынаглара ки јалныз Јеһованын сајәсиндә таб ҝәтирә биләрик. Бәзән елә вәзијјәтлә үзләширик ки, һеч кимдән көмәк истәјә билмирик. Чох вахт белә мәгамларда Јеһованын нә гәдәр етибарлы олдуғуну баша дүшүрүк. Владимир гардаш дејир: «Истинтаг тәҹридханасында кечирдијим вахт Аллаһла мүнасибәтләрим үчүн ән јахшы вахт иди. Дүшдүјүм вәзијјәтлә тәкбәтәк галмышдым вә ону дәјишә билмәздим, она ҝөрә дә Јеһоваја даһа чох ҝүвәнмәји өјрәндим».

8. а) Нәјә әсасән дејә биләрик ки, Јеһова дәјишмәздир? б) Јеһованын Гајамыз олмасынын һансы хејрини ҝөрүрүк? (Зәбур 62:6, 7).

⁸ Јеһова сабит Аллаһдыр. Неҹә ки нәһәнҝ  гаја илләр кечсә дә олдуғу кими мөһкәм галыр, Јеһова да сарсылмаз вә дәјишилмәздир. О һәмишә ејнидир вә нијјәтиндән дөнмүр (Мәл. 3:6). Әдән бағында үсјан галханда Јеһова ҝери чәкилмәди. Һәвари Булусун гејд етдији кими Јеһова «өзүнү дана билмәз» (2 Тим. 2:13). Бу о демәкдир ки, нә баш верирсә версин, башгалары нә едирсә етсин, Јеһова һеч вахт Өз тәбиәтинин, нијјәтинин вә нормаларынын зиддинә ҝетмәз. Јеһова дәјишмәз Аллаһ олдуғу үчүн әминик ки, һәјатымызда сәрт күләкләр әсәндә Јеһова бизи горујаҹаг, ҝәләҹәкдә исә бизә гуртулуш верәҹәк. (Зәбур 62:6, 7 ајәләрини охујун.)

9. Татјананын һадисәсиндән нә өјрәнирсиниз?

⁹ Јеһованын Гајамыз олмасы үчүн башга нә етмәлијик? Даима Јеһованын хүсусијјәтләри вә бәшәријјәтлә, Јер күрәси илә бағлы нијјәти барәдә дүшүнмәлијик. Бунун сајәсиндә сынаглар заманы емосионал сабитлијимизи горујаҹағыг (Зәб. 16:8). Белә бир шеј Татјана адлы баҹынын һәјатында да баш вермишди. О, етигадына ҝөрә ев дустаглығына мәһкум олунмушду. Баҹы дејир: «Сөзүн әсл мәнасында тәк галмышдым... Әввәл-әввәл мәнә чох чәтин иди. Тез-тез руһдан дүшүрдүм». Амма баҹы сынағынын Јеһова илә вә Онун нијјәти илә бағлы олдуғуну баша дүшәндә сакитлијини горуја билди вә сынаға таб ҝәтирмәк үчүн емосионал ҝүҹү олду. Татјана дејир: «Нәјә ҝөрә бу вәзијјәтә дүшдүјүм барәдә фикирләшәндә баша дүшдүм ки, бу шејләри Јеһованын уғрунда јашајырам. Мәһз бу мәнә диггәтими өзүмә ҹәмләмәмәјә көмәк етди».

10. Јеһованын индидән Гајамыз олмасы үчүн нә етмәлијик?

¹⁰ Гаршыда бизи чох ағыр сынаглар ҝөзләјир. Һәмин вахт Јеһоваја һәмишәкиндән даһа чох етибар етмәк лазым ҝәләҹәк. Буна ҝөрә дә биз индидән Јеһоваја етибарымызы мөһкәмләндирмәлијик вә тамамилә әмин олмалыјыг ки, О, истәнилән вәзијјәтдә Она садиг галмағымыза көмәк едәҹәк. Бәс буна неҹә наил ола биләрик? Мүгәддәс Китабдакы әһвалатлары вә бизим дөврүмүздәки Јеһованын Шаһидләринин һадисәләрини охумагла. Бу заман фикир верин ки, Јеһова хидмәтчиләринә дајаг олмаг үчүн гајајабәнзәр хүсусијјәтләрини неҹә тәзаһүр етдирмишди. Бу һадисәләрин үзәриндә дәрин дүшүнүн. Бунун сајәсиндә Јеһова сизин дә Гајаныз олаҹаг.

ЈЕҺОВАНЫН ГАЈАЈАБӘНЗӘР ХҮСУСИЈЈӘТЛӘРИНИ ТӘЗАҺҮР ЕТДИРИН

11. Нәјә ҝөрә Јеһованын гајајабәнзәр хүсусијјәтләрини тәзаһүр етдирмәк истәјирик? (Һәмчинин « Ҝәнҹ гардашлар үчүн мәгсәд» адлы чәрчивәјә бахын.)

¹¹ Биз Јеһованын гајајабәнзәр хүсусијјәтләриндән данышдыг. Инди исә ҝәлин ҝөрәк биз бу хүсусијјәтләри неҹә тәзаһүр етдирә биләрик. Чүнки онлары нә гәдәр јахшы тәзаһүр етдирсәк, бир о гәдәр чох јығынҹагдакы баҹы-гардашлары мөһкәмләндирә биләҹәјик. Мисал үчүн, Иса Шимона Кифа (јунанҹа Бутрус) адыны вермишди. Бу адын мәнасы «даш», «гаја парчасы»  демәкдир (Јәһ. 1:42). Бу она ишарә иди ки, Бутрус јығынҹагдакы баҹы-гардашлара тәсәлли верәҹәк вә онларын иманыны мөһкәмләндирәҹәк. Мүгәддәс Китабда јығынҹагдакы ағсаггаллар «нәһәнҝ гаја көлҝәси»нә бәнзәдилир. Бу ону ҝөстәрир ки, онлар баҹы-гардашлары горујурлар (Әшј. 32:2). Әслиндә, һамымыз — гардашлар да, баҹылар да Јеһованын гајајабәнзәр хүсусијјәтләрини тәзаһүр етдириб бир-биримизи руһландыра биләрик (Ефес. 5:1).

12. Биз һансы јолларла баҹы-гардашларымыз үчүн сығынаҹаг ола биләрик?

¹² Сығынаҹаг олун. Бәзән биз тәбии фәлакәтдән зәрәр чәкән вә ја вәтәндаш иғтишашларына, мүһарибәјә ҝөрә евләриндән дидәрҝин дүшән баҹы-гардашлара евимизин гапысыны ачыб сығынаҹаг веририк. Јашадығымыз бу «ахырзаманда» вәзијјәт ҝетдикҹә писләшир, буна ҝөрә дә баҹы-гардашлара көмәк әли узатмаг үчүн даһа чох имканымыз олаҹаг (2 Тим. 3:1). Бундан әлавә, биз онлара руһани вә емосионал сығынаҹаг да ола биләрик. Буну етмәјин бир јолу ибадәт евиндә онлара хош мүнасибәт ҝөстәрмәкдир. Беләҹә, јығынҹагда меһрибан аб-һава олаҹаг. Бу дүнја чох гәддар, сојуг, стреслә долудур. Буна ҝөрә дә әлимиздән ҝәләни едирик ки, баҹы-гардашлар јығынҹаг ҝөрүшләринә ҝәләндә севилдикләрини һисс етсинләр, тәравәтләнсинләр вә раһатлыг тапсынлар.

13. Ағсаггаллар баҹы-гардашлара чәтин анларында неҹә сығынаҹаг ола биләр? (Һәмчинин шәклә бахын.)

¹³ Ағсаггаллар һәм һәрфи, һәм дә мәҹази фыртыналарла үзләшән баҹы-гардашлара әсл сығынаҹаг ола биләрләр. Тәбии фәлакәт баш верәндә вә ја баҹы-гардашларын тәҹили тибби јардыма еһтијаҹы оланда ағсаггаллар онлара көмәк етмәк үчүн дәрһал тәдбир ҝөрүр. Һәмчинин онлар руһани ҹәһәтдән дә көмәк едирләр. Әҝәр ағсаггал һәлим, ҹаныјанан вә динләмәјә һазырдырса, јығынҹагдакылара она јахынлашмаг асан олаҹаг. Бу кејфијјәтләрин сајәсиндә баҹы-гардашлар севилдикләрини һисс едәҹәкләр вә онлара ағсаггалларын Мүгәддәс Китаб әсасында вердији ҝөстәришләрә әмәл етмәк даһа асан олаҹаг (1 Салон. 2:7, 8, 11).

14. Етибарлы инсан олдуғумузу неҹә ҝөстәрә биләрик?

 ¹⁴ Етибарлы олун. Биз истәјирик, баҹы-гардашлар һәр заман, әсас да чәтин анларында бизә ҝүвәнә биләҹәкләрини билсинләр (Мәс. 17:17). Бәс етибарлы инсан адыны неҹә газана биләрик? Бунун үчүн Јеһованын бәјәндији хүсусијјәтләри һәмишә әкс етдирмәјә чалышмалыјыг. Мәсәлән, сөзүмүзүн үстүндә дурмалыјыг вә пунктуал олмаг үчүн әлимиздән ҝәләни етмәлијик (Мәт. 5:37). Еһтијаҹы оланлара көмәк әли узатмалыјыг. Бундан әлавә, јығынҹагда алдығымыз тапшырыглары верилән ҝөстәришләрә ујғун јеринә јетирмәлијик.

15. Ағсаггалларын етибарлы олмасы јығынҹаға һансы хејри ҝәтирир?

¹⁵ Ағсаггалларын етибарлы олмасынын јығынҹаға бөјүк хејри вар. Һансы мәнада? Тәблиғчиләр биләндә ки, көмәјә еһтијаҹ дујанда раһатлыгла ағсаггалла, мәсәлән, тәблиғ групу нәзарәтчиси илә әлагә сахлаја биләр, даһа аз нараһатлыг кечирирләр. Һәмчинин тәблиғчиләр ағсаггалларын онлара көмәк етмәјә һазыр олдуғуну ҝөрәндә гајғы илә әһатә олундугларыны һисс едирләр. Ағсаггаллар мәсләһәтләрини  өз фикирләринә әсасән јох, Мүгәддәс Китаба вә садиг нөкәрин нәшрләринә әсасән верәндә диндашларынын етибарыны газанырлар. Баҹы-гардашлар ҝөрәндә ки, ағсаггаллар онларын шәхси мәсәләләрини мәхфи сахлајыр, вердикләри сөзүн үстүндә дурур, онлара даһа да етибар едирләр.

16. Биз иманда сабит оланда бунун һәм өзүмүзә, һәм дә башгаларына һансы хејри олур?

¹⁶ Сабит олун. Биз һәр саһәдә Јеһованын бәјәндији кими даврансаг вә гәрарларымызын әсасында Мүгәддәс Китаб принсипләри дајанса, башгалары үчүн ҝөзәл нүмунә олаҹағыг. Иманымыз артдыгҹа, билијимиз дәринләшдикҹә һәгигәтдә даһа мөһкәм дураҹағыг. Јалан тәлимләрә вә дүнјанын дүшүнҹәсинә асанлыгла ујмајаҹағыг, гәтијјәтсиз, сәбатсыз олмајаҹағыг (Ефес. 4:14; Јаг. 1:6—8). Јеһоваја вә Онун вәдләринә иманымыз бизи бәд хәбәр ешидәндә сарсылмаға гојмајаҹаг (Зәб. 112:7, 8). Һәм дә сынагларла үзләшәнләрә көмәк әли узада биләҹәјик (1 Салон. 3:2, 3).

17. Ағсаггаллар баҹы-гардашлара иманларыны сабит сахламаға неҹә көмәк едир?

¹⁷ Ағсаггаллар һәр шејдә һәдди билән, сағлам дүшүнҹәли, низам-интизамлы вә дәрракәли олмалыдыр. Онлар баҹы-гардашлара иманда сабит галмаға көмәк едирләр вә «Аллаһын етибара лајиг сөзүнә бағлы» галмагла јығынҹағы мөһкәмләндирирләр (Тит. 1:9; 1 Тим. 3:1—3). Ағсаггаллар өз нүмунәләри вә ҝөстәрдикләри руһани көмәклә тәблиғчиләрә мүнтәзәм олараг ибадәт ҝөрүшләринә гатылмаға, тәблиғдә иштирак етмәјә вә мүталиә етмәјә көмәк едирләр. Һансыса проблем баҹы-гардашлары нараһат едәндә ағсаггаллар онлары Јеһоваја ҝүвәнмәјә вә фикирләрини Онун нијјәтинә ҹәмләмәјә тәшвиг едирләр.

18. Нәјә ҝөрә Јеһованы һәмд етмәк вә Она даһа да јахын олмаг истәјирик? (Һәмчинин « Јеһоваја даһа да јахын олмағын јолу» адлы чәрчивәјә бахын.)

¹⁸ Јеһованын валеһедиҹи хүсусијјәтләрини арашдырандан сонра биз дә Давуд падшаһ кими дејә биләрик: «Гајам Јеһоваја алгыш олсун!» (Зәб. 144:1). Јеһова һеч вахт бизим етибарымызы сарсытмајаҹаг. Бүтүн һәјатымыз боју, һәтта јаша доланда да архајынлыгла «О, мәним гајамдыр» дејә биләрик. Чүнки руһани ҹәһәтдән бар вермәјимиз үчүн Онун бизә һәр заман дајаг олаҹағына әминик (Зәб. 92:14, 15).