1. Sa ano ikinumparar ni David si Jehova, arog kan nakasurat sa Salmo 18:46?

 NABUBUHAY kita sa kinaban na diyan an dai linalauman na mga kadipisilan puwedeng makaapektar—o lubos pa nganing makapabago—sa satong buhay. Nagpapasalamat nanggad kita na makakaasa kita ki Jehova para sa tabang! Sa sinusundan na artikulo, ipinagirumdom sa sato na si Jehova sarong buhay na Diyos asin na pirmi siyang andam na tabangan kita. Pag naeeksperyensiyahan ta an saiyang tabang, naaasigurar kita kaiyan na “Buhay si Jehova!” (Basahon an Salmo 18:46.) Alagad, pagkatapos iyan na sabihon ni David, inapod niya an Diyos na “sakuyang Gapo.” Taano ta iinagid niya si Jehova, an buhay na Diyos, sa sarong bakong buhay na bagay—sa sarong gapo?

2. Taano ta dapat na magin interesado kita na inapod ni David si Jehova na “sakuyang Gapo”?

² Sa artikulong ini, pag-uulayan niyato kun taano ta si Jehova inaapod na sarong gapo asin kun ano an itinutukdo sa sato kan metaporang iyan manungod sa saiya. Aaramon ta man kun paano ta siya ibibilang na satuyang Gapo. Panghuri, tutukaron niyato an mga paagi na maaarog ta an arog-gapong mga kuwalidad ni Jehova.

KUN TAANO TA SARONG GAPO SI JEHOVA

3. Sa anong paagi parating ginagamit kan Bibliya an tataramon na “gapo”? (Hilingon an ritrato sa .)

³ Ginagamit kan Bibliya an terminong “gapo” bilang paglaladawan tanganing tabangan kitang masabutan an mga kuwalidad ni Jehova. Sa parati, yaon iyan sa mga teksto na nagpapahayag nin pag-umaw sa saiya bilang Diyos na daing kapantay. An inot na beses na pag-apod ki Jehova bilang “an Gapo” mababasa sa Deuteronomio 32:4. Sa pamibi, sinabi ni Hana na “mayo nin gapo na kasingsarig kan satong Diyos.” (1 Sam. 2:2) Inapod ni Habakuk si Jehova na “sakuyang Gapo.” (Hab. 1:12) An kagsurat kan Salmo 73 inapod an Diyos na “an gapo kan sakong puso.” (Sal. 73:26) Asin maski si Jehova inapod niya an saiyang sadiri na sarong gapo. (Isa. 44:8) Pag-ulayan ta an tulong arog-gapong mga kuwalidad na ipinapahiling ni Jehova  asin aramon kun paano ta siya ibibilang na “satuyang Gapo.”​—Deu. 32:31.

4. Sa anong paagi sarong pailihan si Jehova? (Salmo 94:22)

⁴ Si Jehova sarong pailihan. Kun paanong an sarong dakulaon na gapo puwedeng magin taguan sa mapandestrosong bagyo, pinoprotektaran man kita ni Jehova pag napapaatubang kita sa masakit na mga sitwasyon sa satong buhay. (Basahon an Salmo 94:22.) Pinapagdanay kitang ligtas ni Jehova asin dai niya tutugutan na magsapar kita nin permanenteng danyos. Asin urog pa diyan an ipinapanuga niya: Pag-abot nin panahon, hahalion niya an ano man na nagigin dahilan na mahali an satong katuninungan asin katiwasayan.​—Ezek. 34:​25, 26.

5. Paano ta magigin satong arog-gapong Pailihan si Jehova?

⁵ An sarong paagi na ginigibo tang satuyang arog-gapong Pailihan si Jehova iyo an pagpamibi sa saiya. Pag namimibi kita, tinatawan kita ni Jehova kan “katuninungan nin Diyos” na nagpoprotektar sa satong puso asin isip. (Fil. 4:​6, 7) Pag-isipan an eksperyensiya ni Artem, sarong brother na napreso huli sa saiyang pagtubod. Pauruutro siyang inusisa nin sarong maringis na imbestigador. Piggipit saka pinasupog man siya kaini. “Nai-stress talaga ako sa kada ipinapaapod ako kan imbestigador. . . . Pirmi akong namimibi ki Jehova. Hinahagad ko sa saiya na tawan akong katuninungan asin kadunungan,” an sabi ni Artem. “Dai nag-aser sa sako an mga taktika kan imbestigador. . . . Sa tabang ni Jehova, namati kong garo ako nakatindog sa likod nin sarong gapong pader.”

6. Taano ta pirmi kitang makakaasa ki Jehova? (Isaias 26:​3, 4)

⁶ Si Jehova maaasahan. Arog nin sarong dakulaon na gapo na dai kayang mahiro, si Jehova yaon pirmi para sa sato. Makakapagtiwala kita sa saiya huling siya “an daing sagkod na Gapo.” (Basahon an Isaias 26:​3, 4.) Si Jehova pirming magdadanay na buhay para utubon an saiyang mga panuga, dangugon an satong mga pamibi, asin tawan kita kan tabang na kaipuhan ta. Makakaasa man kita ki Jehova huling maimbod siya sa mga naglilingkod sa saiya. (2 Sam. 22:26) Nungka niyang lilingawan an satong mga ginigibo, asin pirmi niya kitang tatawan nin balos.​—Heb. 6:10; 11:6.

7. Ano an maeeksperyensiyahan ta pag nag-aasa kita ki Jehova? (Hilingon man an ritrato.)

⁷ Ginigibo tang satuyang Gapo si Jehova pag lubos kitang nag-aasa sa saiya. Tiwala kita na paagi sa pagkuyog sa saiya dawa sa dipisil na mga panahon, makikinabang kita. (Isa. 48:​17, 18) Mantang naeeksperyensiyahan ta an saiyang suporta, lalo man na nagkukusog an satong pagtitiwala sa saiya. Dangan magigin mas andam kitang atubangon an mga pagbalo na si Jehova sana an makakatabang sa sato. Sa parati pag nasa mga sitwasyon kita na mayo nang iba pang makakatabang sa sato, diyan ta narerealisar kun gurano nanggad kamaaasahan si Jehova. “Kan panahon na nasa detention center ako, diyan ko namatian na pinakadayupot ako sa Diyos,” an sabi ni Vladimir. “Nanudan kong urog na magtiwala ki Jehova dahil solo-solo lang ako saka dai ko kontrolado an sitwasyon.”

8. (a) Taano ta masasabi tang masarig si Jehova? (b) Paano kita nakikinabang pag ginigibo tang satuyang Gapo an Diyos? (Salmo 62:​6, 7)

⁸ Si Jehova masarig. Arog sa sarong dakulaon na gapo, si Jehova marigon asin masarig. Bakong paburubago an saiyang personalidad  saka nungkang nagbabago an saiyang katuyuhan. (Mal. 3:6) Kan mangyari an rebelyon sa Eden, dai liniwat ni Jehova an saiyang katuyuhan para sa katawuhan. Arog kan isinurat ni apostol Pablo, “dai [ni Jehova] magigibong dai magin totoo sa sadiri niya.” (2 Tim. 2:13) Nangangahulugan iyan na ano man an mangyari o gibuhon kan iba, nungkang babaguhon ni Jehova an saiyang personalidad, katuyuhan, o mga pamantayan. Dahil lubos an pagtitiwala ta sa satong bakong paburubagong Diyos, makakaasa kita na ililigtas niya kita asin tatabangan kitang makayanan an masakiton na mga sitwasyon.​—Basahon an Salmo 62:​6, 7.

9. Ano an nanudan mo sa eksperyensiya ni Tatyana?

⁹ Ginigibo tang magin satuyang Gapo si Jehova paagi sa pagpokus sa saiyang mga kuwalidad asin padagos na pagsaisip niyato kan saiyang katuyuhan. An paggibo kaiyan makakatabang sa sato na magdanay na kalmado asin magdanay na maimbod sa saiya mantang nagtatagal kita nin mga pagbalo. (Sal. 16:8) Nagin totoo iyan ki Sister Tatyana, na iprineso sa saiyang harong huli sa saiyang pagtubod. “Solo-solo lang ako kan panahon na idto,” an sabi niya. “Kan primero masakit. Parati ako kaidtong munduon.” Pero, kan mapag-isip-isip niya kun paano konektado ki Jehova asin sa katuyuhan niya an pagbalong inaagihan niya, nagibo niyang matagalan iyan asin nagkusog giraray an saiyang buot. Sinabi niya: “Dahil nasasabutan ko kun taano ta nangyayari ini, naipapagirumdom sa sako na yaon ako sa sitwasyon na ini dahil namumutan ko si Jehova asin gusto ko siyang mapaugma. Nakatabang iyan sa sako na dai na magparapokus sa sadiri ko.”

10. Paano niyato ngunyan magigin satuyang Gapo si Jehova?

¹⁰ Sa maabot na panahon, mapapaatubang kita sa dipisilon na mga pagbalo na diyan kakaipuhanon ta nanggad na magsarig ki Jehova nin urog kisa kasuarin man. Ngunyan na an panahon na pakusugon ta an satong pagtitiwala na itatao niya sa sato an ano man na kaipuhan ta tanganing maimbod na makatagal. Paano ta magigibo iyan? Magbasa nin mga istorya sa Bibliya asin mga eksperyensiya nin mga Saksi sa presenteng panahon. Mangnuhon kun paano an Diyos nagpahiling nin arog-gapong mga kuwalidad tanganing tabangan an saiyang mga lingkod. Pag-isipan na marhay an manungod sa mga istorya asin eksperyensiyang iyan. An paggibo kaiyan makakatabang na magin saimong Gapo si Jehova.

ARUGON AN AROG-GAPONG MGA KUWALIDAD NI JEHOVA

11. Taano ta gusto tang arugon an arog-gapong mga kuwalidad ni Jehova? (Hilingon man an kahon na “ Sarong Pasuhan Para sa mga Hoben na Brother.”)

¹¹ Pinag-ulayan ta an arog-gapong mga kuwalidad ni Jehova. Ngunyan pag-ulayan ta kun paano ta maaarog an mga kuwalidad na iyan. Mantang mas ginigibo ta iyan, mas makakatabang man kita sa pagpakusog sa kongregasyon. Halimbawa, tinawan ni Jesus si Simon kan pangaran na Cefas (na itrinadusir na “Pedro”), na nangangahulugan na “Sarong Pidaso nin Gapo.” (Juan 1:42) Ipinaparisa kaini na magigin siyang gikanan nin karangahan asin karigunan sa kongregasyon. An mga elder sa kongregasyon ilinadawan na “lindong nin dakulaon na gapo.” An buot sabihon, pinoprotektaran  ninda an mga nasa kongregasyon. (Isa. 32:2) Siyempre, nakikinabang an kongregasyon pag an gabos—mga brother saka mga sister—inaarog an arog-gapong mga kuwalidad ni Jehova.​—Efe. 5:1.

12. Magtao nin mga paagi kun paano kita magigin pailihan sa satong mga tugang.

¹² Magin pailihan. Kun minsan, pag may natural na mga kalamidad, kariribukan sa sosyedad, o giyera, tibaad alukan ta nin literal na pailihan an satong mga tugang, an buot sabihon, padaguson sinda sa satong harong. Mantang lalong nagigin maraot an mga kamugtakan sa “huring mga aldaw,” siguradong magkakaigwa kita nin dakul pang oportunidad na tabangan an lambang saro. (2 Tim. 3:1) Puwede man kitang magin emosyonal asin espirituwal na pailihan sa satong mga tugang. An sarong paagi na magigibo ta iyan iyo an pagpamati sa sainda na welcome sinda sa Kingdom Hall, na nakakatabang na mamatian kan gabos sa kongregasyon na namumutan sinda. Nabubuhay kita sa maringis, bakong mamumuton, asin nakaka-stress na kinaban. Kaya pag nag-aatender sa mga pagtiripon an mga tugang, gusto tang gibuhon an gabos na makakaya ta tanganing mamatian nindang namumutan sinda, nagiginhawahan, asin ligtas.

13. Paano magigin pailihan sa mga tugang partikular na an mga elder? (Hilingon man an ritrato.)

¹³ An mga elder puwedeng magin pailihan para sa mga tugang sa kongregasyon na biktima nin natural na mga kalamidad o nag-aagi nin arog-bagyong mga problema. Pag may natural na mga kalamidad asin medikal na mga emerhensiya, naggigibo tulos nin areglo an mga elder para makatao nin praktikal na tabang. Nagtatao man sinda nin espirituwal na tabang. Dai mag-aalangan an mga tugang na magdulok sa sarong elder kun midbid siyang mabuot, maduminamay, asin andam na magdangog. An siring na mga kuwalidad nakakatabang sa iba na mamatian na namumutan sinda; kaya, nagigin mas pasil sa sainda na iaplikar an ano man na basado sa Bibliyang paggiya na tibaad itao nin sarong elder.​—1 Tes. 2:​7, 8, 11.

14. Paano ta maipapahiling na maaasahan kita?

 ¹⁴ Magin maaasahan. Gusto tang mamatian kan mga tugang na maaasahan ninda kita, lalo na sa masakit na mga panahon. (Tal. 17:17) Paano kita magkakaigwa kan reputasyon na pagigin maaasahan? Hinguwahon tang pirming magpahiling nin diyosnon na mga kuwalidad, arog kan pirming pag-utob sa satong mga pangako asin paggibo kan pinakamakakaya ta na magin pirming nasa oras. (Mat. 5:37) Puwede man kitang mag-alok nin praktikal na tabang pag may nangangaipo kaiyan. Dugang pa, sinisigurado tang isinasagibo ta an satong mga asignasyon kauyon kan mga instruksiyon na itinatao sa sato.

15. Paano nakikinabang an kongregasyon pag an mga elder maaasahan?

¹⁵ Paano nakikinabang an kongregasyon pag an mga elder maaasahan? Namamatian kan mga parahayag an pagsuporta kan mga elder—arog kan paraataman kan saindang grupo sa paglilingkod sa langtad—pag nakokontak tulos ninda an mga elder nuarin man ninda kaipuhan nin tabang. Namamatian man kan mga parahayag na namumutan sinda pag aram nindang andam an mga elder na tabangan sinda. Asin pag an sadol kan mga elder ibinabasar ninda sa Bibliya asin sa mga publikasyon na inandam kan maimbod na uripon imbes na sa sadiri nindang mga opinyon, mas magtitiwala sa  sainda an mga kapwa ninda parasamba. Urog man na magtitiwala an mga tugang sa sarong elder na pinagdadanay na kumpidensiyal an mga pribadong bagay asin na inuutob an saiyang mga pangako.

16. Paano kita nakikinabang asin an iba kun kita masarig?

¹⁶ Magin masarig. Puwede kitang magin marahay na impluwensiya sa iba kun kita masarig o marigon sa kun ano an tama asin kun naggigibo kita nin mga desisyon na lubos na nakabasar sa mga prinsipyo sa Bibliya. Mantang nagkukusog an satong pagtubod asin mas nagkakaigwa kita nin tamang kaaraman, nagigin mas marigon kita sa katotoohan. Bako kitang arog sa saro na dai makapagdesisyon, paburubago, o madalion na madara nin salang mga katukduan asin kinabanon na kaisipan. (Efe. 4:14; Sant. 1:​6-8) An pagtubod ta ki Jehova asin sa saiyang mga panuga pinapagdanay kitang balanse o kalmado pag nakakadangog kita nin maraot na mga bareta. (Sal. 112:​7, 8) Nagigibo ta man na matabangan an mga tibaad napapaatubang sa mga pagbalo.​—1 Tes. 3:​2, 3.

17. Ano an nakakatabang sa mga elder na magin nakakapasarig na impluwensiya?

¹⁷ An mga elder dapat na balanse sa paggawi, tultol an isip, areglado, asin rasonable. An mga lalaking ini may nakakapasarig na impluwensiya sa iba asin napapakusog ninda an kongregasyon paagi sa “[pangangapot] nin higot sa mapagkakatiwalaan na mensahe.” (Tito 1:9; 1 Tim. 3:​1-3) Paagi sa saindang halimbawa asin pagpapastor, tinatabangan kan mga elder an mga parahayag na magin regular sa pag-atender sa mga pagtiripon, pagluwas sa langtad, asin personal na pag-adal. Pag an mga tugang napapaatubang sa nakakapurisaw na mga problema, pinapakusog sinda kan mga elder na magpokus ki Jehova asin sa saiyang mga katuyuhan.

18. Taano ta gusto tang umawon si Jehova asin urog na magin harani sa saiya? (Hilingon man an kahon na “ Sarong Paagi Para Magin Mas Harani ki Jehova.”)

¹⁸ Pagkatapos na pag-ulayan an kahanga-hangang mga kuwalidad ni Jehova, masasabi ta man an arog kan nasabi ni Hading David: “Pag-umawon lugod si Jehova, an sakuyang Gapo.” (Sal. 144:1) Pirmi kitang makakasarig ki Jehova. Sa bilog niyatong buhay, dawa pag gurang na kita, may dahilan kita para ipahayag: “Siya an sakuyang Gapo,” na nagtitiwalang pirmi niya kitang tatabangan na magdanay na makusog sa espirituwal.​—Sal. 92:​14, 15.