1. Penggelaren kai nge si iban Daud man Jahwe bas Masmur 18:46?

 MON-MON siadapi masalah si erban susah kel geluhta ntah pe rempet berubah kel kegeluhenta. Ngata bujur kel kita perban banci siandalken Dibatata Jahwe. Bas artikel sebelumna, enggo sibahas maka Jahwe e Dibata si nggeluh si lalap nggit nampati kita. Sanga sialoken penampatNa, tek kita maka ‘Jahwe e Dibata si nggeluh.’ (Baca Masmur 18:46.) Tapi kenca ikataken Daud maka Dibata e nggeluh, iandingkenna ka Dibata e ras benda mati. Ikataken Daud maka Jahwe e ‘Gunung Batuna.’ Kai nge maksudna?

2. Kai kari sipelajari bas artikel enda?

² Bas artikel enda, sipelajari kari engkai maka Jahwe iandingken ras gunung batu janah kai si banci sipelajari arah gambaren e. Sibahas kari uga carata gelah banci siandalken Ia selaku Gunung Batuta. Sibahas ka kari uga carata ngusih sipat-sipat Jahwe si bali bagi gunung batu.

ENGKAI MAKA JAHWE IUMPAMAKEN BAGI GUNUNG BATU?

3. Bas Pustaka, uga nge rusurna Jahwe e igambarken bagi “gunung batu”? Ban contohna. (Nen gambar.)

³ Bas Pustaka, Jahwe igambarken bagi “gunung batu” guna nampati kita ngangkai piga-piga sipatNa. Sanga umat Dibata muji Dibata perban sipat-sipatNa si luar biasa, rusur kel ikataken kalak e bas Pustaka maka Dibata e bagi gunung batu. Tangtangna Jahwe ipeseri bagi “Gunung Batu” lit bas Ulangen 32:4. Kenca si e, sanga ertoto Hanna ikatakenna, “La lit gunung batu bagi Dibatata.” (1 Sam. 2:2) Habakuk pe ikatakenna maka Jahwe e ‘Gunung Batuna.’ (Hab. 1:12) Penulis Masmur 73 pe ikatakenna, “Pegegehi Dibata pusuhku, Ia kap gunung batuku.” (Ms. 73:26) Jahwe pe ikatakenNa diriNa bagi gunung  batu. (Jes. 44:8) Mari sibahas telu sipat si erban Jahwe bali bagi gunung batu. Sipelajari ka kari uga carata erban Jahwe jadi ‘Gunung Batuta.’—Ul. 32:31.

4. Uga Jahwe banci jadi ingan erlindung? (Masmur 94:22)

⁴ Jahwe e ingan erlindung. Bali bagi gunung batu banci ngelindungi kita sanga terjadi badai, Jahwe pe banci ngelindungi kita sanga lit situasi si sulit bas geluhta. (Baca Masmur 94:22.) IsampatiNa kita gelah tetap rembak ras Ia janah ipetetapNa ukurta maka la lit si banci erban kita susah si akibatna seh rasa lalap. Erjanji ka Jahwe maka bas masa depan, imasapkenNa kerina si erban kita kuatir ras susah.—Esek. 34:​25, 26.

5. Uga carata erban Jahwe jadi Ingan Erlindung?

⁵ Salah sada carata erban Jahwe jadi Ingan Erlindung eme ertoto man baNa. Sanga ertoto kita, ibereken Jahwe man banta ‘kedamen arah Ia nari’ si ngelindungi pusuh ras perukurenta. (Pil. 4:​6, 7) Perdiateken pengalamen turang senina si gelarna Artem si ipenjaraken perban kinitekenna. Mulih-ulih ia iinterogasi sekalak petugas penjara si seh kel kejamna. Itekan ia ras ihina. Nina Artem, “Tiap idilo aku guna interogasi, stres kel aku. . . . Tapi lalap aku ertoto man Jahwe, kupindo gelah bereNa aku kepentaren ras sampatiNa aku gelah tetap tenang. Hasilna, la aku nyerah sanga itekan. . . . Perban isampati Jahwe aku, kugejapken bagi lit tembok batu si ngelindungi aku.”

6. Engkai maka banci lalap siandalken Jahwe? (Jesaya 26:​3, 4)

⁶ Jahwe e banci iandalken. Bali bagi gunung batu si lalap lit bas inganna, Jahwe pe lalap banci nampati kita. Banci kita tek man baNa perban Ia “Gunung Batu seh rasa lalap.” (Baca Jesaya 26:​3, 4.) Lalap Ia nggeluh guna nepati janjiNa, megiken totota, janah mereken penampat man banta. Banci siandalken Jahwe perban setia Ia man kalak si ngelayani Ia. (2 Sam. 22:26) La pernah lupakenNa kai si enggo silakoken janah pasti terus kita upahiNa.—Heb. 6:10; 11:6.

7. Kai si banci sigejapken adi siandalken Jahwe? (Nen ka gambar.)

⁷ Siban Jahwe bagi Gunung Batuta adi tuhu-tuhu siandalken Ia. Tek kita maka adi sipatuhi Ia amin pe mesera siakap, pasti sidat gunana. (Jes. 48:​17, 18) Sanga sigejapken penampatNa, reh tekna me kita man baNa. Tek kita maka Jahwe ngenca si ngasup nampati kita ngadapi tentangen, la soal uga serana tentangen e. Sanga la lit si banci nampati kita, Jahwe pasti lalap banci siandalken. Bage me si igejapken Vladimir. Nina, “Sanga aku ipenjaraken, i je me si ndeherna kuakap aku ras Jahwe. Erlajar aku gelah tuhu-tuhu kuandalken Jahwe perban sisada ngenca aku bas penjara janah la banci kukendaliken situasina.”

8. (a) Engkai maka banci sikataken Jahwe e la pernah berubah? (b) Manpaat kai si banci sidat perban Dibatata bali bagi Gunung Batu? (Masmur 62:​6, 7)

 ⁸ Jahwe la pernah berubah. Bali bagi gunung batu si la pernah berubah, sipat-sipat ras tujun Jahwe pe la pernah berubah. (Mal. 3:6) Contohna, sanga terjadi pemberontaken bas Taman Eden, la iubah Jahwe tujunNa man manusia. Ikataken Rasul Paulus kerna Jahwe, “La banci lawanNa sipatNa ras tujunNa.” (2 Tim. 2:13) Maksudna, la soal kai pe si terjadi ntah kai pe si ilakoken kalak, sipat-sipat, tujun, ras patoken Jahwe la pernah berubah. Perban Dibatata la pernah berubah, tek kita maka pasti Ia ngasup nampati kita ngadapi masalah kai pe, janah pasti tepatiNa janjiNa bas masa depan.—Baca Masmur 62:​6, 7.

9. Kai si banci sipelajari arah pengalamen Tatyana?

⁹ Adi siukuri sipat-sipat Jahwe ras kai tujunNa man manusia ras doni enda, banci sijadiken Jahwe Gunung Batuta. Alu bage, banci kita tetap tenang ras setia man Jahwe sanga ngadapi tentangen. (Ms. 16:8) Bage me si igejapken turang seninata si gelarna Tatyana si jadi tahanen rumah. Nina, “Sisada ngenca aku. Tangtangna mesera kel kuakap ngadapisa. Rusur kel kitik ukurku.” Tapi sanga ukurina kai hubungen tentangenna e ras Jahwe bage pe tujunNa, banci ia tenang ras ngasup ia ngadapisa. Nina ka, “Adi kuangkai engkai maka bagenda situasiku, e ngingetken aku maka kai si kulakoken e situhuna guna Jahwe. Alu bage, lanai kuukuri kerna diriku sendiri.”

10. Uga carana erban Jahwe jadi Gunung Batuta gundari nari?

¹⁰ Ntisik nari siadapi me masa si seh kel susahna, janah perlu siandalken Jahwe lebihen asangken si gel-gel e. Emaka seh kel pentingna mulai gundari nari sipepaguh kinitekenta man Jahwe, janah tek kita maka pasti banci sampatiNa kita tetap setia man baNa ugapa pe situasina. Uga carana? Bacalah kisah-kisah si lit bas Pustaka ras pengalamen turang seninata bas jamanta gundari. Perdiateken uga Jahwe nampati umatNa. Ukurilah alu mbages kerna si e. Alu bage banci jadikenndu Jahwe Gunung Batundu.

USIHLAH SIPAT-SIPAT JAHWE SI BALI BAGI GUNUNG BATU

11. Engkai maka siusih ateta sipat-sipat Jahwe si bali bagi gunung batu? (Nen ka kotak “ Cita-Cita man Turang Senina si Dilaki si Nguda Denga.”)

¹¹ Enggo sipelajari sipat-sipat Jahwe si erban Ia bali bagi gunung batu man banta. Gundari sibahas uga carata ngusih sipat-sipatNa e. Adi siusahaken asa ngasupta ngusih sipat-sipat Jahwe, banci sipegegehi turang seninata bas runggun. Contohna, iban Jesus gelar Simon jadi  Kepas (adi iterjemahken “Petrus”), si ertina “Sada Batu.” (Joh. 1:42) Bage ikataken Jesus perban tehna maka iapuli Petrus pagi turang senina bas runggun, janah ipegegehina kiniteken kalak e. Pertua-pertua bas runggun pe ipeseri ras “bayangen tebing batu si galang.” Ertina, ilindungi kalak e turang seninana bas runggun. (Jes. 32:2) Tapi kerina kita banci mpegegehi sada ras si debanna adi siusih sipat-sipat Jahwe si bali bagi gunung batu.—Ep. 5:1.

12. Uga carana kita banci jadi ingan erlindung man turang seninata? Jelasken.

¹² Banci jadi ingan erlindung. Banci kita jadi ingan erlindung man turang seninata sanga kalak e jadi korban bencana alam, kerusuhen, ntah pe perang. Perban keadanta bas “wari-wari pendungi” enda reh parahna, emaka reh buena me kesempatenta guna sisampat-sampaten. (2 Tim. 3:1) Banci ka siapuli turang seninata janah sibuktiken maka keleng ateta kalak e. Salah sada carana alu ngalo-ngalo kalak e sanga reh ku perpulungen. Kita tading bas doni si kejam kel. Si e banci erban latih kel ukur turang seninata janah la kapna ia ikelengi. Emaka, sanga reh turang seninata ku perpulungen, sipegegehi ateta kalak e janah sibuktiken maka keleng ateta kalak e.

13. Uga pertua-pertua banci jadi ingan erlindung man turang senina? (Nen ka gambar.)

¹³ Pertua-pertua banci jadi ingan erlindung man turang senina si ngadapi erbage-bage masalah. Sanga terjadi bencana alam ntah pe lit keadan darurat medis, mis ban pertua pengaturen guna nampati turang senina. Ibereken pertua ka petunjuk ras pergegeh arah Pustaka. Turang senina la mbiar mindo penampat pertua adi  pertua lembut, nggit megiken, janah angkaina perasan kalak e. Sipat-sipat e banci nampati turang senina nggejapken kekelengen. Emaka, banci reh nukahna akap kalak e ndalanken petunjuk arah Pustaka si ibereken pertua.—1 Tes. 2:​7, 8, 11.

14. Kai buktina kita banci iandalken?

¹⁴ Banci iandalken. Pasti merhat kita jadi kalak si banci iandalken. Khususna, sanga turang seninata ngadapi situasi si sulit. (Kua. 17:17) Uga carana jadi kalak si banci iandalken? Siusahakenlah asa ngasupta ngusih sipat-sipat Jahwe. Contohna, alu nepati janjita janah jadi kalak si tepat waktu. (Mat. 5:37) Banci ka sisampati turang seninata si merluken penampat. Selain si e, sidalankenlah tugas-tugasta bas runggun sesuai petunjuk.

15. Kai saja manpaat si banci idat turang senina adi pertua-pertua banci iandalken?

¹⁵ Kai saja manpaat si banci idat turang senina adi pertua-pertua banci iandalken? Sanga iteh turang senina maka banci pindona penampat man pertua  katawari pe, banci urak kekuatiren kalak e. Adi iteh turang senina maka pertua-pertua nggit nampati kalak e, banci gejapken kalak e maka ia ikelengi. Selain si e, sanga pertua-pertua mereken nasehat si erpalasken Pustaka ras publikasita, labo arah pendapat pribadi kalak e, turang senina pe banci reh tekna man kalak e. Turang senina pe banci tek man pertua-pertua adi la bocorken pertua masalah pribadi turang senina, janah tepati kalak e janjina.

16. Kai nge manpaatna adi silakoken kai si ikataken Jahwe janah la kita berubah-ubah?

¹⁶ La berubah-ubah. Adi terus sipatuhi Jahwe bas kerinana janah siban keputusen erpalasken Pustaka, banci kita jadi usihen man kalak si deban. Sanga sipelajari Kata Dibata janah sipegegehi kinitekenta man Jahwe, setia me kita man baNa bage pe man patoken-patokenNa. Mis siteh adi lit ajaren palsu bage pe perukuren si la sesuai ras perukuren Jahwe janah la kita nggit terpengaruh. (Ep. 4:14; Jak. 1:​6-8) Kinitekenta man Jahwe bage pe janji-janjiNa, nampati kita tetap tenang sanga sibegi berita si la mehuli. (Ms. 112:​7, 8) Selain si e, banci ka sisampati kalak si deban si banci saja ngadapi situasi si sulit.—1 Tes. 3:​2, 3.

17. Uga pertua banci nampati turang senina tetap tenang ras tek man Jahwe?

¹⁷ Pertua-pertua arus terkuasaina perbahanenna, beluh rukur, tertip, ras masuk akal. Pertua-pertua banci nampati turang senina tetap tenang ras tetap paguh kinitekenna man Jahwe. Pertua pe banci ka mpegegehi runggun alu ‘nteguh nagangi kata si setia.’ (Tit. 1:9; 1 Tim. 3:​1-3) Arah usihen kalak e bage pe arah dahin mpermakani, pertua-pertua banci nampati turang senina gelah ratur reh ku perpulungen, erberita, bage pe pelajaren pribadi. Sanga iadapi turang senina masalah si erban kalak e kuatir, ingetken pertua kalak e gelah ngandalken Jahwe ras ngukuri janji-janjiNa.

18. Engkai maka sipuji ateta Jahwe janah reh rembakna ateta ras Ia? (Nen ka kotak “ Carana gelah Kam Reh Rembakna ras Jahwe.”)

¹⁸ Kenca sibahas sipat-sipat Jahwe si luar biasa, bagi Raja Daud banci sikataken, “Terpujilah Jahwe Gunung Batuku.” (Ms. 144:1) Jahwe e Dibata si banci lalap siandalken. Segedang geluhta banci terus sampatiNa kita gelah tetap rembak ras Ia. Emaka banci sikataken, “Ia kap Gunung Batuku.”—Ms. 92:​14, 15.