1. Bays pahn Saam 18:​46, da weh Dayvid mi kompyaa Jehoava tu?

 WI MAIT fays prablemz weh mek laif haad, ahn dehndeh prablemz ku chaynj wi laif. Soh ih mek wi feel hapi fi noa dat wee ku pen pahn Jehoava fi help wi. Eena di laas aatikl, wi mi laan dat Jehoava da di livin Gaad ahn hihn wilin fi help wi weneva wi need it. Ahn wen hihn help wi, ih gi wi moa kanfidens dat “Jehoava alaiv!” (Reed Saam 18:46.) Bot afta Dayvid mi seh dat Jehoava alaiv, hihn mi kompyaa Jehoava tu sohnting weh noh alaiv. Hihn mi kaal Jehoava “mi Rak.” Weh dat meen?

2. Weh wi wahn laan eena dis aatikl?

² Eena dis aatikl, wi wahn taak bowt wai dehn rifaa tu Jehoava az wahn rak ahn weh dat teech wi bowt hihn. Wi wahn aalso laan how wi ku pen pahn Jehoava az wi Rak ahn how wee ku kapi Jehoava kwalitiz weh mek hihn laik wahn rak.

WAI JEHOAVA DA WAHN RAK?

3. How di Baibl yoozhwali yooz di werd “rak”? (Koment pahn di picha pahn di kova.)

³ Di Baibl kompyaa Jehoava tu wahn “rak” fi help wi andastan som a fi hihn kwalitiz weh ku help wi. Eena di Baibl, wen dehn taak bowt Jehoava az wahn rak, dehn akchwali di taak bowt Jehoava kwalitiz. Di fers taim di Baibl rifaa tu Jehoava az “di Rak” da eena Deuteronomy 32:4. Wen Hana mi pray tu Jehoava, shee mi rifaa tu Jehoava az wahn rak ahn seh: “Yoo da di onli wan weh schrang laik wahn rak.” (1 Sam. 2:2) Habakuk mi kaal Jehoava “mi Rak.” (Hab. 1:12) Di persn weh rait Saam 73 mi kaal Gaad “di rak weh schrentn mi haat.” (Saa. 73:26) Eevn Jehoava mi rifaa tu ihself az wahn rak. (Isa. 44:8) Mek wi taak bowt chree kwalitiz weh mek Jehoava laik  wahn rak ahn mek wi laan how wee ku mek hihn “fi wee Rak.”—Deut. 32:31.

4. How Jehoava wahn protek wi? (Saam 94:22)

⁴ Wi ku goh tu Jehoava fi protekshan. Joorin wahn staam, wahn persn ku goh fi shelta eena wahn kayv. Sayhn way soh, Jehoava ku protek wi wen wi goh chroo wahn sichuwayshan weh wi kyaahn handl. (Reed Saam 94:22.) Hihn help wi kip wi rilayshanship wid hihn schrang an ih mek wi noa dat notn weh wi di goh chroo wahn laas fareva. Jehoava pramis wi dat hihn wahn geh rid a eniting weh di mek wi wori ahn sofa.—Ezek. 34:​25, 26.

5. How wi ku mek Jehoava bee wahn protekshan fi wi?

⁵ Wen wi pray tu Jehoava, da laik wi di goh tu ahn fi protekshan. Wen wi pray, Jehoava gi wi “wahn kaina pees” weh protek wi haat ahn wi main. (Fil. 4:​6, 7) Mek wi luk pahn di egzampl a wahn brada weh naym Artem. Hihn mi gaahn da prizn, ahn wail ih mi deh da prizn, wahn polees man mi kweschan ahn oava ahn oava. Ih mi chreet ahn bad ahn chrai fraitn ahn. Artem mi seh: “Evri taim di polees man kaal mi fi taak tu ahn, dat schres mi owt wahn lat. . . . Ah mi aalwayz pray tu Jehoava an aks ahn fi help mi stay kaam ahn fi gi mi wizdom. Eevn doa di polees mi chrai presha mi, Ah mi stay kaam bikaaz Jehoava mi-di help mi. Ah mi feel laik Ah mi-di stan op bihain wahn big waal.”

6. Wai wi ku aalwayz pen pahn Jehoava? (Isaiah 26:​3, 4)

⁶ Jehoava laayal ahn hihn wahn neva lef wi. Jos laik how yu kyaahn moov wahn mongtin an ih wahn aalwayz dehdeh, Jehoava wahn aalwayz dehdeh fi wee. Wee ku chros hihn bikaaz hihn da “di rak weh wahn laas fareva.” (Reed Isaiah 26:​3, 4.) Hihn wahn aalwayz alaiv fi kip ih pramis, fi hyaa wi pryaaz, ahn help wi wen wi need it. Wi ku pen pahn hihn bikaaz ih laayal tu dehn wan weh serv ahn. (2 Sam. 22:26) Hihn wahn neva ferget weh wi du far ahn, an hihn wahn aalwayz bles wi.—Heeb. 6:10; 11:6.

7. Weh wahn hapm wen wi pen pahn Jehoava? (Koment pahn di picha.)

⁷ Wen wi pen pahn Jehoava, wi di mek hihn bee fi wee rak. Wi noa dat wen wi obay Jehoava wen tingz geh haad, tingz gwehn gud fi wi. (Isa. 48:​17, 18) Evri taim wi si how Jehoava help wi, dat wahn mek wi chros ahn moa ahn moa. Dat wahn gi wi kanfidens dat Jehoava wahn help wi wen wi di fays prablemz weh wi feel laik wi kyaahn handl. Lata taimz wen nobadi dehdeh fi help wi dat da wen wi noatis humoch wi ku pen pahn Jehoava. Vladimir mi seh: “Ah mi feel kloasa dan eva tu Jehoava wen Ah mi deh da prizn. Ah mi laan fi chros Jehoava moa bikaaz Ah mi deh bai miself ahn hihn da-mi di onli wan weh kuda mi help mi bayr op wid weh Ah mi-di goh chroo.”

8. (a) Wai wi ku seh dat Jehoava noh chaynj? (b) If wi ga Jehoava az wi rak, how dat help wi? (Saam 62:​6, 7)

 ⁸ Jehoava noh chaynj. Jehoava da laik wahn mongtin weh stay di saym. Fi hihn persnaliti an ih perpos neva chaynj. (Mal. 3:6) Wen Adam ahn Eev mi disobay Jehoava, fi hihn perpos fi hyoomanz mi stay di saym. Di apasl Paal mi seh dat Jehoava: “Kyaahn disoan ihself.” (2 Tim. 2:13) Dis meenz dat noh mata weh hapm er weh peepl du, Jehoava kwalitiz, ih perpos, er ih standadz noh chaynj. Soh sins wi serv wahn Gaad weh noh chaynj, wi noa dat wi ku aalwayz goh tu hihn fi help wen wi di fays haad taimz. Ahn wi noa fi shoar dat hihn wahn kip ih pramis dehn fi di fyoocha.—Reed Saam 62:​6, 7.

9. Weh wi laan fahn weh hapm tu Tatyana?

⁹ If wi meditayt pahn Jehoava kwalitiz an ih perpos fi hyoomanz pahn di ert, dat ku help wi fi chros ahn an mek hihn bee wi Rak. Wen wi du dat, dat ku help wi fi stay kaam ahn bee laayal tu hihn wen wi di goh chroo chraiyalz. (Saa 16:8) Wi laan dat fahn wahn sista weh naym Tatyana. Shee mi deh anda hows ares bikaaz a ih fayt. Shee seh: “Wen dat mi jos hapm tu mi, ih mi reeli haad an Ah mi geh diskorij.” Bot den, shee staat tu meditayt pahn Jehoava an ih perpos fi hyoomanz ahn dis mek shee riyalaiz wai ih soh impoatant fi bayr op. Dat mi help shee fi stay kaam an ih mi giv ahn di schrent weh ih mi need. Shee seh: “Wen Ah mi andastan wai dis mi hapm tu mi, dat mi help mi fi stap tink bowt miself.”

10. How Jehoava ku bee fi wee Rak?

¹⁰ Soon wi wahn di goh chroo sohn reeli haad taimz, ahn wi wahn need fi pen pahn Jehoava eevn moa. Dat da wai ih impoatant dat wi schrentn wi chros eena Jehoava dat hihn wahn help wi stay faytful tu hihn noh mata weh prablemz wi fays. Wi ku du dat wen wi reed difrent Baibl egzampl ahn di egzampl a wi bradaz ahn sistaz tudeh day. Dis wahn help wi fi si how Jehoava mi help ih faytful servants. Wen yu meditayt pahn dehndeh egzampl, dat ku help yu mek Jehoava yu Rak.

KAPI JEHOAVA KWALITIZ

11. Wai wi waahn kapi Jehoava kwalitiz? (Koment pahn di baks weh naym “ Wahn Goal fi Yong Bradaz.”)

¹¹ Wi don taak bowt how Jehoava ku bee laik wahn rak tu wi. Now mek wi si how wi ku kapi fi hihn egzampl. If wi chrai wi bes fi du dis, wi ku help wi bradaz ahn sistaz eena wi kangrigayshan. Wi ga di egzampl a Saiman; Jeezas mi gi hihn di naym Seefas (weh meen “Peeta”). Dis naym meen “Wahn Pees a Rak.” (Jan 1:42) Wen Jeezas mi giv ahn  da naym, hihn mi-di seh dat Peeta mi wahn komfert adaz eena di kangrigayshan ahn schrentn dehn fayt. Di eldaz eena wi kangrigayshan da jos laik wahn, “shado fahn wahn big rak.” (Isa. 32:2) Soh dat meenz dat dehn protek wi eena di kangrigayshan. Bot di eldaz da noh di onli wanz weh ku du dis, aala wi ku kapi Jehoava kwalitiz ahn help wi bradaz ahn sistaz.—Ifee. 5:1.

12. Weh wi ku du fi wi bradaz ahn sistaz wen dehn di goh chroo wahn tof sichuwayshan?

¹² Help yu bradaz ahn sistaz wen dehn di goh chroo wahn tof sichuwayshan. Wen wi bradaz ahn sistaz haftu lef dehn hows er dehn hows geh dischrai sayka wahn nachral dizaasta er waar, wi ku invait dehn fi stay wid wi eena wi hows. Az tingz geh haada eena di laas dayz, wi wahn ga di chaans fi help dehn owt eevn moa. (2 Tim. 3:1) Wi ku aalso gi wi bradaz ahn sistaz di komfert ahn lov weh dehn need. Wan way wi ku du dis da wen wi spen taim wid dehn da di Kingdom Haal ahn komfert dehn. Dis werl chreet dehn bad, schres dehn owt, ahn noh shoa dehn no lov. Soh wen dehn kohn da di meetin wi du aal weh wi kud fi mek dehn feel sayf ahn fi mek dehn noa dat wi lov dehn ahn kay bowt dehn.

13. Weh eldaz ku du fi komfert adaz eena wahn tof sichuwayshan? (Koment pahn di picha.)

¹³ Eldaz ku help di bradaz ahn sistaz wen dehn di goh chroo wahn tof sichuwayshan. Wen wahn nachral dizaasta er wahn medikal imerjensi kom op, dehn aalso inkorij di bradaz ahn sistaz. Dehn aalso aafa advais fahn di Baibl an inkorij adaz. If wahn elda taak eena wahn kain way, an ih lisn ahn chrai andastan how adaz feel, ih wahn mek it eeziya fi  mek di bradaz ahn sistaz aks ahn fi help wen dehn need it. Wen dehn du dat, di bradaz ahn sistaz wahn noa dat di eldaz lov dehn. Dat wahn mek it eeziya fi mek dehn fala di advais fahn di Baibl weh di eldaz gi dehn.—1 Tes. 2:​7, 8, 11.

14. How wi ku shoa adaz dat dehn ku pen pahn wi?

¹⁴ Bee wahn persn weh adaz ku pen pan. Wi waahn adaz noa dat dehn ku pen pahn wi wen dehn di goh chroo wahn tof sichuwayshan. (Prov. 17:17) Weh wi ku du soh dat adaz ku noa dat dehn ku pen pahn wi? Wi ku chrai wi bes fi kapi Jehoava kwalitiz, fi kip wi pramis dehn, ahn fi deh pahn taim. (Mach. 5:37) If wi noa sombadi weh need help wi ku help dehn. Wi aalso waahn mek shoar dat wen wi geh wahn asainment wi fala di inschrokshanz weh dehn gi wi.

15. Wen di bradaz ahn sistaz ku pen pahn di eldaz, how dat help di kangrigayshan?

¹⁵ How wahn kangrigayshan benifit wen dehn ku chros dehn eldaz? Wen di bradaz ahn sistaz noa dat dehn ku pen  pahn dehn eldaz, dehn wahn feel kaam. Dehn wahn aalso noa dat di eldaz lov dehn ahn wilin fi help dehn. Di bradaz ahn sistaz wahn ku chros di eldaz eevn moa wen di eldaz aafa kongsl fahn di Baibl insteda gi dehn oan opinyan. Di bradaz ahn sistaz wahn aalso ku chros di eldaz wen dehn noh taak bowt praivit mataz ahn wen dehn du weh dehn seh dehn wahn du.

16. Wen wi du weh Jehoava seh rait, how dat benifit wee an adaz?

¹⁶ Aalwayz du weh Jehoava seh rait. If wee obay Jehoava eena evriting weh ih tel wi fi du ahn mek disizhanz bays pahn weh di Baibl seh, den wi wahn bee wahn gud egzampl tu adaz. Wen wi stodi di Baibl ahn schrentn wi fayt eena Jehoava, ih wahn help wi fi bee laayal tu hihn. Wen wi du dat, wi wahn ku rekonaiz eni faals teechin an eni teechinz weh goh gens Jehoava tinkin ahn wi wahn ku stay weh fahn dehn. (Ifee. 4:14; Jay. 1:​6-8) Wen wi geh bad nyooz, wi fayt eena Jehoava ahn di tingz weh hihn pramis wi wahn help wi fi stay kaam. (Saa. 112:​7, 8) Ahn wi wahn ku eevn help dehn wan weh di goh chroo wahn tof sichuwayshan.—1 Tes. 3:​2, 3.

17. How di eldaz ku help di bradaz ahn sistaz fi kip kaam ahn ga schrang fayt?

¹⁷ Eldaz need fi ga self kanchroal eena evriting, dehn need fi bee sensabl, aaganaiz, ahn dehn noh fi bee sohnbadi weh aalwayz waahn dehn oan way. Di eldaz help adaz fi bee kaam ahn schrentn di kangrigayshan wen dehn “hoal aan tait tu di faytful werd.” (Taitos 1:9; 1 Tim. 3:​1-3) Di gud egzampl ahn di inkorijment weh eldaz gi ku help di bradaz ahn sistaz fi aten di meetinz, fi goh owt pahn servis, ahn fi du persnal stodi. Wen di bradaz ahn sistaz goh chroo wahn tof sichuwayshan eena laif, di eldaz rimain dehn fi pen pahn Jehoava ahn fi foakos pan di pramis dehn weh hihn mek.

18. Wai wi waahn prayz Jehoava ahn geh kloasa tu ahn? (Koment pahn di baks weh naym “ Sohn Tingz Weh Yu Ku Du fi Jraa Kloasa tu Jehoava.”)

¹⁸ Afta wi don taak bowt aala Jehoava wandaful kwaliti dehn weh ih ga, wi ku du di saym ting weh King Dayvid mi seh: “Prayz Jehoava hoo da mai Rak.” (Saa. 144:1) Wi wahn ku aalwayz pen pahn Jehoava now, an eevn wen wi geh oalda wi wahn ku stil chros dat hihn wahn kantinyu fi stay kloas tu wi ahn wi wahn ku reeli seh: “Hihn da mai Rak.”—Saa. 92:​14, 15.