1. Según Sálumu 18:​2, ka uma lagoubaguagüdei Dawidi Heowá?

 UGUÑE WEYU wawinwanduña lidan aban ubóu le ñein lubéi gayara lan lasansirun wabagari sódini. Ruti darangilaü woun wasubudiruni gayara lan wamuriahan ídemuei luma Heowá! Furendeitiwa lidan aturiahani le lubaragiñebei le Heowá lan Búngiubei le wínwanbei ani súnwandan ñeinbei lan lun líderaguniwa. Sagü wibihin ídemuei lúmagiñe Heowá, adügati katei le lun wariñagun lau ichouruni: Wínwanla Heowá!, ítara kei lariñaguni urúei Dawidi lidan Sálumu 18:46. Gama lumoun, lidan Sálumu 18:2 (aliiha huméi) wati urúei Dawidi lun Bungiu óunwenbu “dübü le gayaraabei naramudagun lanagangiñe”. Ka san uagu lagoubaguagüdei Dawidi Heowá, aban Bungiu wínwanti, luma aban óunwenbu dübü, aban katei le mabagariti?

2. Kaba wariha lidan aturiahani le?

² Lidan aturiahani le, wafuranguagüdübei ka lan uagu tariñaga Bíbülia luagu ítara liña lan Heowá kei aban óunwenbu dübü, wafurendeiruba giñe ka lan larufudahabei le woun luagu Heowá. Warihubei giñe ka lan gayaraabei wadügüni lun ítara lan Heowá woun kei aban óunwenbu dübü. Ani lagumuhóun, wakutihaba saragu katei luáguti ida luba lan wáyeihani ligaburi Heowá.

KA UAGU LARIÑAWAGÚA ÍTARA LIÑA LAN HEOWÁ KEI ABAN ÓUNWENBU DÜBÜ?

3. Ka tabusenrubei Bíbülia tafuranguagüdün dan tariñaguni dimurei óunwenbu dübü? (Ariha huméi dibuhu le luágubei).

³ Lun gayara lan gunfuranda wamani fiu lídangiñe ligaburi Heowá, ariñagatu Bíbülia ítara liña lan kei aban óunwenbu dübü. Saragu wéiyaasu dan le halawahani lubúeingu Heowá luagu lubuidun burí ligaburi, ariñagatiña ítara liña lan kei aban óunwenbu dübü. Kei hénpulu, ariñagati 2 Samueli 22:3: “Nubungiute, buguya dübü le óunigirubalina”. Ariñagatu Ana lidan aban furíei: “Úati aban óunwenbu dübü le  ítarabei kei Wabungiute!” (1 Sam. 2:​2, TNM). Ariñagati Abakúku luagu Heowá “dübü le naramudaguagüle buguya” (Aba. 1:​12, TNM). Lidan Sálumu 31 ariñagayati Dawidi luagu Heowá: “Buguyalá dübü le naramudaguagüle” (Sal. 31:2). Ani ariñagati Heowá luougua aban lan óunwenbu dübü ligía (Isa. 44:​8, TNM). Akutiha wamá ǘrüwa igaburi le adügübei lun ítara lan Heowá kei aban óunwenbu dübü, ani ariha waméi ida luba lan ítarala woun kei aban óunwenbu “dübü le aramudaguagülei” (Sal. 71:3).

4. Ka uagu gayara lubéi wariñagun aban lan aramudaguagülei Heowá? (Sálumu 94:22).

⁴ Aban aramudaguagülei Heowá. Dan le liabin aban liñawan dan, gayaraati laramudagun aban gürigia lau lebelurun lidoun aban lagadábugiñe dübü o lábugiñe aban óunwenbu dübü. Ítarameme, dan le wagagibudagun luma sügǘ hénrenguti lidan wabagari gayaraati giñe wanügüni Heowá keisi waramudaguagüle (aliiha huméi Sálumu 94:22). Góunigi lumutiwa ani adügati lun másügürün wamá lídangiñe somu sügǘ le máraninati. Ani mámarügüñein lira. Füramasehaali giñe lagidarubei lan sun katei le adügübei lun wasufurirun, ámuñegü gidaléime sun burí katei le adügübei lun weferidiruni wadarangilan (Ese. 34:​25, 26).

5. Ka gayaraabei wadügüni lun waramudaguagülebei lan Heowá?

⁵ Ábanya igaburi lun warihini Heowá keisi waramudaguagüle dan le wafurieidun lun. Dan le wadügüni ítara, resibi wamuti “lidarangilan” Bungiu, le óunigirubarun wanigi luma wasaminan (Fili. 4:​6, 7). Ariha waméi likesin Artiom, aban íbiri le adaürǘbei ladüga lafiñen. Mosu meha lawandun ladügüdarun aban gürigia luagu saragu wéiyaasu dan le lálügüdagunbalin luagu lafiñen, ani adügati gürigia ligía lun wuriba lan lasandiragun Artiom lungua. Ariñagati Artiom: “Sanditina saragu idiheri sagü liabin gürigia ligía lun lálügüdagunina. […] Súnwandan meha nafurieidun lun Heowá amuriaha darangilaü luma lichú aau. Meberesenga ladügüni sun liyaraati lun nabürühan úaraguatina meha lun Heowá […]. Lidan meha sun sügǘ burí ligía, ariha numuti Heowá kei aban óunwenbu baríeiru le óunigirubalina”.

6. Ka uagu gayara lubéi wafiñerun luagu Heowá súnwandan? (Isaíasi 26:​3, 4).

⁶ Gayaraati lafiñerúniwa luagu Heowá. Ítara kei mánhingichun lan aban óunwenbu dübü lídangiñe lilugaarun, subudi wamuti ñeinbei lan Heowá súnwandan lun líderaguniwa. Gayaraati wafiñerun luagu “ladüga aramudaguagülei magumuchaditi ligía” ítara kei aban óunwenbu dübü (aliiha huméi Isaíasi 26:​3, 4). Súnwandan wínwanñu lan Heowá lun lagunfuliruni le füramase lubéi, lun laganbuni wafurieidun luma lun líchuguni ídemuei le wemegeirubei woun. Afiñetiwa giñe luagu Heowá ladüga úaragua lan hama ha eseriwidubaña lun (2 Sam. 22:26). Maweiyasunti abulieidei le wadügübei luagu ani súnwandan líchuguba lan wafayeiruaha (Ebü. 6:10; 11:6).

7. Ida liña líderaguniwa wafiñerun luagu Heowá? (Ariha humóun giñe iyawaü).

⁷ Ábanya igaburi lun warufuduni lun Heowá waramudaguagülebei lan lau wafiñerun sunsuinagubei luagu. Subudi wamuti buidu lan lidin woun dan le gaganbadi wamá lun íbini dan le wagagibudagun luma lénrengunga (Isa. 48:​17, 18). Ani sagü warihin ida liña lan líderaguniwa Heowá, ábatima léredun wafiñen luagu. Ítara, aransetimabadiwa lun wagagibudagun luma turobuli le siñabei wiñuragun lídangiñe sin lídehan Heowá. Anihein dan lasuseredun somu sügǘ woun le siñabei líderaguniwa ni aban gürigia, lau sun lira rútiwa fe gayara lan wafiñerun  luagu ñeinbei lan Heowá wama súnwandan. Ariñagati aban íbiri gíriti Vladímir: “Dan le nadaürǘnbei ligía nasandirun yarafatima nan lun Heowá. Ñéintima nafiñera luagu Heowá lugundun nábuguarügüñadina lan ñein ani úati ni kata le gayaraabei nadügüni lun nasansiruni le gádanbalina”.

8. a) Ka uagu gayara lubéi wariñagun masansiragun lan ligaburi Heowá? b) Ida liña lahuudun woun warihini Heowá kei aban óunwenbu dübü le waramudaguagüle? (Sálumu 62:​6, 7).

⁸ Masansiragunti ligaburi Heowá. Ítara kei masansiragun lan lubara aban óunwenbu dübü le siñati lánhingichun ítara liña giñe masansiragun lan ligaburi Heowá, ni le labusenrubei ladügün (Mal. 3:6). Íbini ebedaagua lan Adán tuma Ewa lun Heowá, masansirun lumuti Heowá buiti le labusenrubei ladügün houn gürigia. Ariñagati apostolu Pábulu luagu Heowá: “Siñati magunfulirun lan lúmawagua” (2 Tim. 2:13). Mini lan le, meberesenga lan le asusereduti o le hadüga amu, maweiyasunbei Heowá asansirei ligaburi ni lilurudun ni buiti le labusenrubei ladügün houn gürigia. Lau wasubudiruni sun le, adügati lun wafiñerun luagu líderagubadiwa lan dan le wásügürün lídangiñe saragu turobuli ani lagunfulirubei lan sun le füramase lubéi woun luba ámuñegü (aliiha huméi Sálumu 62:​6, 7).

9. Ka hafurendeirubei lídangiñe le asuseredubei tun Tatiana?

⁹ Ábanya katei le gayaraabei líderaguniwa lun wanügüni Heowá keisi aban óunwenbu dübü le waramudaguagüle lau wararamagun asaminara luagu ligaburi luma luagu buiti le labusenrubei ladügün lun Ubóu luma houn gürigia. Gayaraabei líderaguniwa katei le lun darangilu wamá danme le wásügürün lídangiñe sügǘ hénrenguti (Sal. 16:8). Ligía asuseredubei tun Tatiana, aban íbiri to adaürǘboun túbiñe ladüga tafiñen. Ariñagatu: “Adügatiña lun nerederun nábuguarügü núbiñe”. Ani aba tariñagun: “Furumiñe hénrenguti meha katei le nun, ani saragu wéiyaasu sanditina maguraasuni”. Ábati tagumeserun asaminara luagu ligaburi Heowá luma luagu buiti le labusenrubei ladügün houn gürigia aba tíchugun fe súdini lan lun tawanduni óuchawaguni ligía, íderagua lumutu katei le lun tárügüdün erei luma lun úaragua tan. Ariñagatu: “Aba naritagun lasuseredunbei lan turobuli le nun ladüga línsiñe Heowá nun ani busentina nadügüni le aubei lagundaara. Adügati le lun masaminarun nan saragu nuougua”.

10. Ka lunbei hadügüni lúmagiñe guentó lun harihini Heowá keisi aban óunwenbu dübü le haramudaguagüle?

¹⁰ Yarafa madise liábinba dan hénrenguti ani mégeibadiwa wafiñerun luagu Heowá sügǘ luéi amu dan. Ligíati lúmagiñe guentó mégeitiwa wachoururuni líchugubei lan sun le wemegeirubei woun lun gayaraabei lan wawandun luma lun úaragua wamá lun. Ida luba wadügüni? Aliiha humá abahüdaguni tídangiñeti Bíbülia luma sügǘ le hani wábirigu ha lánina dan le. Ráramagua humá asaminara luagu ani ariha huméi ida liña lan aban lan óunwenbu dübü le aramudaguagülei Heowá houn lubúeingu súnwandan. Líderagubadün katei le lun harihini Heowá keisi aban óunwenbu dübü le haramudaguagüle.

ÁYEIHA WAMÉI LUBUIDUN BURÍ LIGABURI HEOWÁ

11. Ka uagu buidu lubéi wáyeihani lubuidun burí ligaburi Heowá? (Ariha huméi giñe rekuáduru “ Aban dasi houn íbirigu nibureintiña”).

¹¹ Akutihaadiwa fiu lídangiñe igaburi le adügübei lun aban lan aramudaguagülei Heowá kei  aban óunwenbu dübü. Guentó wayanuha luagu ida luba lan wáyeihani igaburi burí le. Éibutima wáfaagun lun wáyeihani lubuidun burí igaburi le, gayaraatimabei wíderaguniña íbirigu ha lílana damuriguaü le ñein wabéi. Kei hénpulu, sansi lumuti Hesusu liri Simón lun Séfasime (le ásügürawagüdübei kei Féduru o bun murusun “dübü”) (Huan 1:​42, Lerérun Búngiu to lánina iséri darádu). Ítara liña lariñaguni Hesusu líchuguba lan Féduru dǘgüdaguaü luma iderebugu lun damuriguaü. Ariñagatu giñe Bíbülia ítara haña lan wéiyaaña lidan afiñeni “kei lamuñadina aban óunwenbu dübü” le óunigirubaliña íbirigu ha lílana sun damuriguaü (Isa. 32:2). Inarüni sun lan wagía gayara lan wáyeihani lubuidun burí ligaburi Heowá lun gagaburi wamani, anhein wadüga ítara, wídehaba lun derebugu lan damuriguaü (Efe. 5:1).

12. Ka gayaraabei wadügün lun aban wamá aramudaguagülei houn wábirigu?

¹² Aban humá aramudaguagülei. Ánhaña asufurira wábirigu ladüga liñawan dan kei burí hiriri, hárabaganali o katei líbeina lira, chagaguaü lánina anarimeni o somu wuribu, másiñati gayaraabei lan weresibiruniña wábirigu wábiñe. Aribadeinatima liña katei ubouagu lidan “lagumuhóun dan” le. Ligíati, gachansintima baadiwa lubéi lun wíchugun ídemuei wóuniwagua (2 Tim. 3:1). Ábanya igaburi lun warufuduni aban wamá aramudaguagülei houn wábirigu dan le wíchuguni dǘgüdaguaü luma ínsiñeni le hemegeirubei houn. Kei hénpulu, gayaraati weresibiruniña wábirigu buidu tidan Luban Wadamuridagun, ítara luba wídehan lun gunda hamá buidu ligíame hasandiragun houngua luma lun ñein lan ínsiñeni lidan damuriguaü. Wawinwanduña lidan aban ubóu le ñein lubéi houserúa gürigia lau mínsiñehabuni luma lau éregu. Ligíati, dan le hayabin íbirigu lidoun adamuridaguni, busentiwa lun chóuruñu lan hasandiragun houngua lúmati lun hasandirun houserúña lan lau ínsiñeni.

13. Ida luba aramudaguagülei hamá wéiyaaña lidan afiñeni houn íbirigu? (Ariha humóun giñe iyawaü).

¹³ Gayaraati aramudaguagülei hamá wéiyaaña  lidan afiñeni houn íbirigu ha ásügürübaña lídangiñe lénrengunga. Kei hénpulu, dan le ñein lan somu chagaguaü lánina liñawan dan o dan le ñein lan sandi sódiniti, lau lóufudagun aba hadügün wéiyaaña lidan afiñeni aransehani lun hídehan. Rútiña giñe wéiyaaña lidan afiñeni adundehani tídangiñeti Bíbülia. Ménrenguntimabei houn íbirigu hamuriahan ídemuei luma aban wéiyaali lidan afiñeni dan subudi hamani gamadoun lan, laganbubaña lan, ani houcha ligíame gunfuranda lani ida liña lan hasandiragun houngua. Ladügüba lubuidun burí igaburi le lun hasandirun íbirigu hínsiñewa hamá, ani ménrenguntimabei houn hafalaruni furumiñeguarügü adundehani le híchugubei wéiyaaña lidan afiñeni houn tau Bíbülia (1 Tesa. 2:​7, 8, 11).

14. Ida luba warufuduni gayara lan lafiñerúniwa wawagu?

¹⁴ Gafiñerúadi lan huagu. Chóuruti, busén wamá hasubudiruni amu gayara lan wíderaguniña dántima le hásügürüña lan lídangiñe lénrengunga (Ari. 17:17). Ida luba gayara lan lasubudiruniwa gayara lan lafiñerúniwa wawagu? Gayaraati wáfaagun lun wáyeihani ligaburi Heowá sagü weyu, kei hénpulu, lau wagunfuliruni le füramase wabéi luma lun wachülürün lidan dan lidoun fulasu le ñein lubéi wemegeirúa (Mat. 5:37). Gayaraati giñe wíderaguniña ha mégeibaña ídemuei. Lanwoun lira, anhein ichugúa somu dasi woun, wáfaaguba lun wagunfuliruni lau wasigiruni adundehani le ichugúbei woun.

15. Ka buiti lasagarubei damuriguaü dan le gayara lan lafiñerúniwa hawagu wéiyaaña lidan afiñeni?

¹⁵ Ibihatiña lílana damuriguaü saragu buiti hámagiñe wéiyaaña lidan afiñeni ha gayaraabei lafiñerúniwa hawagu. Kéiburi, dan le hemegeirun íbirigu ídemuei, gayaraati hagúarun houn wéiyaaña lidan afiñeni, adügati katei le lun buidu lan hasandiragun  houngua luma lun hasandirun hínsiñewa hamá. Dan le hayusurunu wéiyaaña lidan afiñeni Bíbülia tuma agumeiraguagüdüni to ñǘbuinboun lúmagiñe musu úaraguati lun híchugun adundehani houn íbirigu adügati le lun hafiñerun íbirigu hawagu. Ani ligiaméme asuseredubei dan le hagunfulirun lau hererun luma dan le mabahüdahan hamani le ariñawagúbei houn.

16. Ka buiti wibihubei dan le derebugu lan wafiñen, ani ida luba líderaguniña katei le amu?

¹⁶ Masansiragun lan higaburi. Ánhawa gaganbadi lun Heowá lidan sun katei úara ligía le wanúadirubei wadügün luma le tariñagubei Bíbülia ábanbadiwa buiti hénpulu houn amu. Eibu aganwoundeina lan wafiñen luma wasubudin tuagu Lererun Bungiu derebugutimabadiwa lidan inarüni. Mítaran baadiwa kei ha mederaguagüdünti hasaminan ani ibidiñeti houn kaba lan hadüga, mígirunbadiwa giñe lun ladundehaniwa arufudahani mama inarüniti le lídanbei ubóu le (Efe. 4:14; Sant. 1:​6-8). Adügati wafiñen luagu Heowá luma luagu le füramase lubéi lun derebugu wamá dan le weresibirun luriban ñunsu (Sal. 112:​7, 8). Ani gayaraati giñe wíderaguniña ha ásügürübaña lídangiñe lénrengunga (1 Tesa. 3:​2, 3).

17. Ka íderagubaliña wéiyaaña lidan afiñeni lun gayara lan híchugun iderebugu lun damuriguaü?

¹⁷ Lunti surú lan hanügüni wéiyaaña lidan afiñeni habagari, buidu ligíame hachügü ani adüga hameime sun katei lau lubudubu. Dan le hárügüdün wéiyaaña lidan afiñeni “luagu uganu inarüniti”, ruti iderebugu lun damuriguaü (Titu 1:9; 1 Tim. 3:​1-3). Dan le híchugun wéiyaaña lidan afiñeni aban buiti hénpulu kei burí dan le habisidahaniña íbirigu lun híchugun dǘgüdaguaü houn, ídehati lun gabügürügua lan habasiihan íbirigu adamuridagua, apurichiha, luma lun haturiahan hábuguarügü. Ani dan le hagagibudagun íbirigu luma turobuli le adügübei lun hadiheridun saragu, ínchaha hamutiña wéiyaaña lidan afiñeni lun hafiñerun luagu Heowá luma lun hararamagun asaminara luagu le füramase lubéi.

18. Ka uagu busén wabéi walawahani Heowá luma lun wayarafaduntima lun? (Ariha huméi giñe rekuáduru “ Aban igaburi lun wayarafadun lun Heowá”).

¹⁸ Lárigiñe wakutihani lubuidun burí ligaburi Heowá, sandiguatiwa woungua kei urúei Dawidi, le ariñagubei: “Alawahoualá Aburemei, le óunigirubalina!” (Sal. 144:1). Heowá ligía aban Bungiu le gayaraabei wafiñerun luagu súnwandan. Líderagubadiwa lidan sun wabagari, íbini danme wéiyougaadiwa, lun wayarafadun lun. Ligíati gayara lubéi wariñagun lau ichouruni: “Bungiu óunigirubalina” (Sal. 92:​14, 15).