1. Como cosa puede le na Salmo 18:46, na cosa ya compara si David con Jehova?

 TIENE vez, posible kita bigla experiencia maga problema que bien dificil o puede pa gane cambia con el diaton vida. Pero bueno ya lang, ta puede kita pidi ayuda con Dios Jehova! Del ya pasa articulo, ya aprende kita que si Jehova el vivo Dios y pirmi le preparao para ayuda kanaton. Si ta experiencia kita el de suyu ayuda, mas ta asigura se kanaton que “vivo si Jehova!” (Le con el Salmo 18:46.) Pero, despues menciona si David con ese expresion, ya llama le con Dios “el de mio Piedra.” Ciendo si Jehova el vivo Dios, porque con ele ya compara na un piedra—un cosa que nuay vida?

2. Cosa kita discuti na este articulo?

² Na este articulo, hay considera kita si porque ya llama un piedra con Jehova y si cosa se ta enseña kanaton acerca con ele. Hay aprende tambien kita si paquemodo kita dale mira que ta confia kita con ele como diaton Piedra. Na uliji, hay discuti kita si paquemodo kita puede imita con el maga calidad de Jehova.

SI PORQUE UN PIEDRA SI JEHOVA

3. Na Biblia, onde mas mucho ta usa con el palabra “piedra”? (Mira con el letrato.)

³ El Biblia ya usa con el palabra “piedra” para ayuda kanaton entende el cuanto calidad de Jehova. Mas mucho, puede con ese le na maga texto donde ta alaba con ele el de suyu maga siervo. Na Deuteronomio 32:4, puede kita le por primer vez que si Jehova “el Piedra.” Cuando ya reza si Ana, ya habla le que “nuay piedra igual con el diamon Dios.” (1 Sam. 2:2) Ya llama tambien si Habacuc con Jehova como “de mio Piedra.” (Hab. 1:12) El escritor del Salmo 73 ya llama con Dios como “el piedra del de mio corazon.” (Sal. 73:26) Gane, maskin si Jehova ya llama con el de suyu mismo cuerpo como un piedra. (Isa. 44:8) Discuti kita tres calidad que ya demonstra si Jehova como un piedra y si cosa kita  hace para queda ele el “diaton Piedra.”—Deut. 32:31.

4. Na cosa manera un refugio si Jehova? (Salmo 94:22)

⁴ Un refugio si Jehova. Si tiene tifun, el un bien grande piedra puede sirvi como un proteccion na un persona. Na igual manera, ta protege kanaton si Jehova si ta enfrenta kita maga dificil situacion na diaton vida. (Le con el Salmo 94:22.) Ta protege le kanaton na maga cosas que puede causa kanaton permanente peligro. Y ya promete tambien le que na futuro, hay quita le con el maskin cosa que ta causa kanaton lingasa o sufrimiento ahora.—Eze. 34:25, 26.

5. Cosa kita hace para queda si Jehova diaton Refugio?

⁵ El un manera que puede kita hace con Jehova diaton Refugio amo si reza kita con ele. Si hace kita se, hay dale le kanaton “el paz del Dios” que ta protege con el diaton corazon y pensamiento. (Fil. 4:6, 7) Considera con el experiencia de Artem, un hermano quien yan preso por causa na de suyu fe. Manada beses con ele yan interrogate, ya maltrata y ya hace huya el un investigador. “Tan lingasa gayot yo cada vez tan interrogate conmigo el investigador. . . . Pirmi yo ta reza con Jehova. Ya pidi yo que dale conmigo paz na corazon y sabeduria,” ya habla si Artem. “Nuay vale conmigo el maga tactica del investigador. . . . Na ayuda de Jehova, dol aquel yo parao atras del un pader de piedra.”

6. Porque kita puede pirmi confia con Jehova? (Isaias 26:3, 4)

⁶ Puede confia con Jehova. Igual con el un grande piedra que pijo na lugar de este, pirmi talli si Jehova para kanaton. Puede kita confia con ele cay ele “el Piedra hasta para cuando.” (Le con el Isaias 26:3, 4.) Ciendo ele el vivo Dios, puede le cumpli con el de suyu maga promesa, oi con el diaton maga rezo y dale kanaton el ayuda que necesita kita. Puede tambien kita confia con Jehova cay leal le con el de suyu maga siervo. (2 Sam. 22:26) Gendeh gayot le ulvida con el cosa kita ta hace y hay premia gayot le kanaton.—Heb. 6:10; 11:6.

7. Cosa el resulta si confia kita con Jehova? (Mira tambien con el letrato.)

⁷ Hay queda si Jehova el diaton Piedra si confia kita con ele completamente. Sabe kita que hay beneficia gayot kita si obedece kita con ele maskin durante el maga dificultad. (Isa. 48:17, 18) Mientras ta experiencia kita con el de suyu ayuda, mas hay confia pa kita con ele. Como resulta, si experiencia man kita maga probanza na futuro, sabe kita que gendeh gayot kanaton deja si Jehova. Mas mucho, ta puede kita mira que puede gayot kita confia con Jehova si ta experiencia kita maga situacion donde nuay otro el quien puede ayuda kanaton. El un hermano que si Vladimir ya habla: “Ya queda yo mas cerca con Jehova cuando na detention center yo. Cay solo lang yo y gendeh yo puede controla con el de mio situacion, ya aprende yo que mas confia con ele.”

8. (a) Porque kita puede habla que gendeh ta cambia si Jehova? (b) Cosa el beneficio si hace kita con Dios el diaton Piedra? (Salmo 62:6, 7)

⁸ Gendeh ta cambia si Jehova. Igual si Jehova na un bien grande piedra que gendeh ta cambia. Claro se puede mira na de suyu personalidad  y proposito. (Mal. 3:6) Cuando yan rebelde kanda Adan y Eva na Eden, nuay gayot cambia el proposito de Jehova para na maga gente. Como cosa ya escribi si apostol Pablo, “gendeh gayot ta cambia el . . . pensamiento” de Jehova. (2 Tim. 2:13) Poreso, maskin cosa pa sucede o hace el otro, gendeh gayot cambia el personalidad de Jehova, de suyu proposito o de suyu principio. Como resulta, puede kita confia que ayuda le kanaton durante el diaton probanza y hay cumpli le el de suyu promesa na futuro.—Le con el Salmo 62:6, 7.

9. Cosa tu ya aprende na experiencia de Tatyana?

⁹ Hay queda si Jehova el diaton Piedra si medita kita si cosa le clase de Persona y si pirmi kita acorda con el de suyu proposito. Si hace kita se, puede kita esta calmao y leal durante el maga probanza. (Sal. 16:8) Ese el cosa ya sucede con el un hermana que si Tatyana con quien ya pone na house arrest por causa na de suyu fe. “Solo-solo lang gayot yo,” ya habla le. “Yan dificil yo del primero. Gane, pirmi ya lang yo triste.” Pero, ya medita le que envuelto si Jehova y el De Suyu proposito na cosa le ta experiencia. Ya ayuda quel con ele para esta calmao y ya dale con ele fuerza para aguanta. Ele ya habla: “Ya entende yo si porque este ya sucede conmigo. Ya acorda yo que taqui yo na ese situacion cay ta ama yo con Jehova y quierre yo hace alegre con ele. Ya ayuda tambien se para gendeh yo man focus na de mio mismo cuerpo.”

10. Cosa kita hace ahora para puede confia con Jehova como diaton Piedra?

¹⁰ Gendeh mas tarda, hay experiencia kita maga probanza donde mas necesita ya gayot kita confia con Jehova. Poreso ahora pa lang, necesita ya kita hace mas fuerte con el diaton confianza que hay dale le el cosa kita necesita para puede aguanta con el maskin cosa situacion. Paquemodo se kita puede hace? Le maga istoria na Biblia y maga experiencia del maga Testigo na moderno tiempo. Mira si paquemodo el Dios ya ayuda con el de suyu maga siervo y medita con ese. Puede se ayuda contigo para confia con Jehova como de tuyu Piedra.

IMITA CON EL MAGA CALIDAD DE JEHOVA

11. Porque kita quierre imita con el maga calidad de Jehova? (Mira tambien con el cajon “ Si Cosa Puede Hace el Maga Joven Hermano.”)

¹¹ Ya puede kita discuti si paquemodo ya dale mira si Jehova que un piedra le. Considera kita ahora si paquemodo kita puede imita con el de suyu maga calidad. Importante este cay puede este ayuda kanaton para hace fuerte con el maga hermano y hermana. Por ejemplo, ya dale si Jesus con Simon el nombre Cefas (o Pedro) que quierre decir “Un Pedazo de Piedra.” (Juan 1:42) Ta dale este mira que ta confia si Jesus que si Pedro hay dale comforta y hace fuerte con el congregacion. Ya refiri tambien con el maga anciano na congregacion como “sombra del un grande piedra.” Ta dale este mira que ta protege sila con el congregacion. (Isa. 32:2) Pero hay beneficia gayot el congregacion si todo kita, hermano man o hermana, hay imita con el maga calidad de Jehova.—Ef. 5:1.

12. Cosa el cuanto manera que puede kita ayuda con el diaton maga hermano y hermana?

 ¹² Ayuda con el maga hermano y hermana. Si tiene maga calamidad, gulu na comunidad o guerra, puede kita invita con el maga hermano y hermana que esta na diaton casa. Pero mientras ta queda grabe el situacion na “ultimo maga dia,” mas tiene ya kita manada oportunidad para ayuda con uno y otro. (2 Tim. 3:1) Puede tambien kita dale comforta con el maga hermano y hermana, y manda sinti kanila que ta ama kita kanila. El un manera que puede se kita hace amo si man cuento kita kanila na Kingdom Hall. Quierre kita que sinti sila el diaton amor na maga miting. El maga gente na mundo nuay queber y nuay amor con uno y otro. Poreso, si ta atende na maga miting el diaton maga hermano y hermana, quierre kita hace el todo para sinti sila refrescao, protegido y sinti sila diaton amor.

13. Paquemodo el maga anciano puede ayuda con el maga hermano y hermana? (Mira tambien con el letrato.)

¹³ Puede ayuda el maga anciano con el maga hermano quien ta enfrenta dificultad. Si tiene maga calamidad y medical emergencia, ta hace dayun manera el maga anciano para puede extende ayuda. Ta dale tambien sila comforta usando el Biblia. Grande el posibilidad que atraca el maga hermano y hermana con el un anciano si sinti sila que amable le, tiene empatia y preparao oi kanila. Si tiene este maga calidad el un anciano, puede este ayuda para sinti el otro que ta ama kanila. Como resulta, mas preparao sila aplica con el maskin cosa direccion estaba na Biblia que hay dale el anciano.—1 Tes. 2:7, 8, 11.

14. Paquemodo kita dale mira que puede kanaton confia?

¹⁴ Dale mira que puede contigo confia. Quierre kita que puede depende kanaton el otro, especialmente na tiempo de dificultad. (Prov. 17:17) Cosa kita hace para confia kanaton el otro?  Puede se kita hace si imita kita con Jehova. Por ejemplo, ta pricura kita cumpli con el diaton promesa y ta anda na hora. (Mat. 5:37) Puede tambien kita extende ayuda con aquellos quien necesita con ese. Mas pa, ta pricura tambien kita cumpli con el diaton maga assignment asegun na instruccion que ya ricibi kita.

15. Paquemodo ta beneficia el congregacion si ta puede confia con el maga anciano?

¹⁵ Si ta puede confia con el maga anciano, ta beneficia el congregacion. Paquemodo? Ta sinti el maga publisher que preparao kanila suporta el maga anciano si facil sila ta puede man contact kanila, igual por ejemplo con el diila field service group overseer. Ta sinti tambien el maga publisher que ta ama kanila si sabe sila que preparao kanila ayuda el maga anciano. Y si tan base el maga anciano con el diila consejo na Biblia y na publicacion del fiel esclavo en vez na diila mismo opinion, mas confia kanila el maga hermano y hermana. Mas confia tambien con el un anciano si gendeh le ta revela maga confidencial cosas y si ta cumpli le con el cosa le ta habla.

16. Na cosa manera kita ta beneficia y el otro si ta sigui kita na maga principio de Jehova?

 ¹⁶ Pirmi sigui na maga principio de Jehova. Puede kita queda buen ejemplo con otro si ta obedece kita con Jehova y ta hace maga decision que base na principio na Biblia. Mientras mas ta queda fuerte el diaton fe y ta omenta el diaton saber na Biblia, mas ta puede kita sigui con el de suyu maga principio. Mas pa, gendeh kanaton puede influencia el maga falso enseñanza y idea del mundo. (Ef. 4:14; Sant. 1:6-8) El diaton fe con Jehova y na de suyu maga promesa puede tambien ayuda kanaton para esta calmao maskin pa tiene maga mal noticia. (Sal. 112:7, 8) Mas pa, puede tambien kita ayuda con aquellos quien ta enfrenta maga probanza.—1 Tes. 3:2, 3.

17. Paquemodo puede ayuda el maga anciano con el maga hermano para queda calmao y tene fuerte fe con Jehova?

¹⁷ El maga anciano necesita queda balance, tiene buen pensamiento, arreglao y razonable. Este maga hermano ta ayuda con otro para queda calmao y tene fuerte fe con Jehova. Mas pa, ta puede tambien sila hace fuerte con el congregacion cay ta “esta [sila] pijo na mensaje” que base na Biblia. (Tito 1:9, El Nuevo Testamento; 1 Tim. 3:1-3) Por medio na diila ejemplo y na diila esfuerzo que man shepherding, ta puede ayuda el maga anciano con el maga publisher para queda regular na miting, predicacion y personal estudiada. Si tan lingasa el maga hermano y hermana por causa na diila maga problema, ta hace kanila acorda el maga anciano que confia con Jehova y na de suyu maga promesa.

18. Porque kita quierre alaba con Jehova y queda mas cerca con ele? (Mira tambien con el cajon “ Si Cosa Hace Para Queda Mas Cerca con Jehova.”)

¹⁸ Despues considera con el maga bonito calidad de Jehova, puede kita habla con el cosa ya habla si Rey David: “Ojala alaba con Jehova, el de mio Piedra.” (Sal. 144:1) Puede kita asigura que puede gayot kita confia con el diaton Dios. Maskin pa de edad ya kita, puede siempre kita habla: “Ele el de mio Piedra,” cay asigurao kita que hay continua le ayuda kanaton para esta cerca con ele.—Sal. 92:14, 15.