1. Ngu kuya ngu Masalmo 18:46 Mkoma Dhavhida a fananisile Jehovha ni txani?

 ATHU hi hanya ka mafu ya sikarato mwendo siduko si nga txitxako wutomi wathu ngu txikuluveta. Kambe ha bonga ngutu nguku hi ni txivhuno txa Jehovha. Ka gondo ayi yi nga pinda, hi khumbuxetilwe ti to Jehovha Txizimu txi txi hanyako ni ti to ene mbimo yotshe a ti emisete ku hi vhuna. Mbimo yi ene a mahako toneto athu ha pfisisa ti to “Jehovha wa hanya!” (Lera Masalmo 18:46, NM.) Kambe Mkoma Dhavhidha msana ko bhala toneto a dhani Jehovha kota “Dirigwi dangu.” Ngu kutxani msana ka kuva adi wombile ti to Jehovha wa hanya adi mu fananisile ni dirigwi, tximaha txo mbi na wutomi?

2. Hi na bhula ngu txani ka gondo yiya?

² Ka gondo yiya hi na wona ti to ngu kutxani Jehovha atxi dhanwa kota dirigwi ni ku toneto ti hi gondisa txani ngu ngene. Hi na tshumela hi wona ti to ngu kutxani hi nga thembako Jehovha ni ku m’dhana kota dirigwi dathu. Ngu magwito hi na wona tinzila ati hi nga etetelako ngu tona tifanelo ta Jehovha.

NGU KUTXANI JEHOVHA ATXI FANANISWA NI DIRIGWI?

3. I ngu nzila muni Bhiblia yi tolovelako kuthumisa dipswi “Dirigwi”? (Wona ni mfota wa kapa.)

³ Bhiblia yi fananisa Jehovha ni dirigwi kasi ku hi vhuna ku hi ziva kwati tifanelo takwe. Makhambi a mangi, mbimo yi malanda a Jehovha ma m’dhumisako ngu tifanelo takwe to xamatisa, ona ma m’dhana kota dirigwi. Ka Bhiblia dikhambi do khata adi a dhanwako kota “Dirigwi” nga dibhuku da Dhewuterenome 32:4. Ka mkombelo wakwe, Ana ati khene “kha ku na dirigwi ni da dimwedo do fana ni Txizimu txathu.” (1 Sam. 2:2) Habhakuki a dhani Jehovha kota “Dirigwi.” (Hab. 1:12) M’bhali wa masalmo 73 a dhani Jehovha kota “dirigwi da mbilu yangu.” (Mas. 73:26, NM) Jehovha ene apune ati fananisile ni dirigwi. (Isaya  44:8) Hi na wona tifanelo tiraru ta Jehovha ati ti kombisako ti to ene a fana ni dirigwi ni kutshumela hi gonda nzila yi hi nga wonako Jehovha kota “Dirigwi dathu.”—Dhewut. 32:31.

4. I ngu nzila muni Jehovha i ku wuthavelo wathu? (Masalmo 94:22)

⁴ Jehovha wuthavelo wathu. Kufana ni dirigwi adi di nga hi vhikelako ka moya wa hombe, Jehovha nene wa hi vhikela mbimo yi hi wonisanako ni sikarato. (Lera Masalmo 94:22.) Jehovha a na hi vhuna ku hi vhikela wungana wathu ni nene. Ene wa hi tsanisekisa ti to kha txi ngaho txikarato atxi hi wonisanako natxo konku txi no mbi guma. Kambe Jehovha a hi thembisa ku hi mahela timwani. Ka mbimo yi yi tako ene ana thavisa tximwani ni tximwani atxi txi hi mahaku hi vilela ni kuxaniseka.—Eze. 34:25, 26.

5. Jehovha a nga va wuthavelo wathu ngu nzila muni?

⁵ Nzila yimwani yo mana Wuthavelo ka Jehovha ngu maha mkombelo. Mbimo yi hi mahaku mkombelo Jehovha wa hi ninga “kuthutha ka Txizimu” ku veketako timbilu tathu ni mialakanyo yathu. (Vaf. 4:6, 7) Wona ti ti nga mahakela mwanathu Artem awu a nga ñolwa ngu konaha ka likholo lakwe. Awu a nga txi m’thethisa a m’mahete siwotiso makhambi a mangi atxi m’xupha ni ku m’dhukisela. Artem a womba tiya: “Yotshe mbimo yi awu a nga txi ni thethisa a nga atxi ni dhana ni ti xtresareka. Mbimo yosthe ni txi maha mkombelo ka Jehovha ni txi kombela kurula ni wutxhari. Marindi ya wu a nga txi ni thethisa kha ma thuma. Ngu kuvhunwa ngu Jehovha ti txo fana ni ku ni di vhiketwe ngu diguma.”

6. Ngu kutxani mbimo yotshe hi nga thembako Jehovha? (Isaya 26:3, 4)

⁶ Jehovha a thembekile. Kufana ni mmango mwendo dirigwi da hombe adi di si khukhiko ka wukhalo wa dona, Jehovha kha na mbi txitxa ni ku mbimo yotshe ati emisete ku hi vhuna. Kambe hi nga m’themba ngu ku ene “Dirigwi da yotshe mbimo.” (Lera Isaya 26:3, 4.) Jehovha mbimo yotshe a na va atxi hanya ni ku tiemisela ku hetisisa sithembiso sakwe, kuengisa mikombelo yathu ni ku hi vhuna nga ku hi txi lava txivhuno. Athu hi nga tshumela hi themba Jehovha nguko ene a thembekile ka avale va m’thumelako. (2 Sam. 22:26) Ene kha mbi thuka e divala tile hi nga m’mahela ni ku mbimo yotshe a na hi hakela ngu toneto.—Vaheb. 6: 10; 11:6.

7. Nji txani txi no maheka ngako hi txi themba Jehovha? (Wona ni mfota.)

⁷ Athu hi maha Jehovha e va dirigwi dathu mbimo yi hi mthembako ngu mbilu yotshe. Ha tsaniseka ti to ngako hi txi muengisa hambi hi txi manana ni sikarato eto ti na hi wuyelisa. (Isaya 48:17, 18) Mbimo yi hi yako masoni hi wona ti to Jehovha a hi vhuni, themba yathu kwakwe yo ya yi engetela ni ku hi ya masoni hi tsaniseka ti to Jehovha ngene basi a nga hi vhunako kutsanisela txikarato txihi txihi ti si nga ni mhaka ni ti to txikarata kuhokela hayi. Makhambi a mangi, mbimo hi wonisako ni sikarato asi ti wonekako nga ta karata ku si tsanisela ha pfisisa ti to mbimo yotshe hi nga themba Jehovha. Ngu toneto mwanathu Vladimir a nga tipfisa tona, ene a womba tiya: “Mbimo yi ni nga yi heta ni di  jele wungana wangu ni Jehovha wu yite masoni wu tsana. Ani ni gondile kuthemba ngutu Jehovha ngu ku ni ti nokha, ngene basi a ndi no ni vhuna kutsanisela txiemo txileya.”

8. a) Ngu kutxani hi nga wombako ti to Jehovha kha txitxi? b) Ngu kutxani i di tatinene kuva ni Jehovha kota dirigwi dathu? (Masalmo 62:6, 7)

⁸ Jehovha kha txitxi. Kufana ni dirigwi da hombe, wuthu ni txikongomelo txa Jehovha kha si txitxi. (Mal. 3:6) Mbimo yi Adhamu ni Evha va nga tshurarela Jehova ene kha txitxa txikongomelo txakwe ngu vathu. Mpostoli Paulo a wombile ti to Jehovha “kha na ku ti kaneta apune.” (2 Tim. 2:13) Eto ti lava kuwomba ti to ti si nga ni mhaka ni ti ti humelelako mwendo ti vathu va ti mahaku, Jehovha kha na mbi thuka e txitxa sikongomelo sakwe, tifanelo takwe kumweko ni milayo yakwe. Athu hi nga themba Txizimu txathu atxi txi si txitxiko ni kutsaniseka ti to txi na hi vhuna ka timbimo to karata ni ti to txi na hetisisa sithembiso sa txona sa mbimo yi yi tako.—Lera Masalmo 62:6, 7.

9. U gondile txani ka ti ti nga mahekela Tatyana?

⁹ Mbimo yi hi alakanyisisako ngu tifanelo ta Jehovha ni makungu akwe ngu mafu ni vathu, eto ti na hi vhuna ku hi simama hi va vo thutha ni kusimama hi di thembekile kwakwe ngu mbimo ya siduko. (Mas. 16:8) Ngu tona ti ti nga humelela mwanathu awu a dhanwako ku i Tatyana awu a nga vhalelwa to asi humi mʼtini ngu konaha ka likholo lakwe. Ene a womba tiya: “Ni ti nokha. Makhatoni ti ni karatete, ni godhote ngutu.” Kambe koneho a khatile kualakanyisa ngu Jehovha ni makungu yakwe ngu vathu ni ku a tumbute ti to ngu kutxani i di ta lisima kutsanisela txiduko atxi a nga ti ka txona. Eto ti mvhuni ku epfa kuthutha ni ku ti m’ningile mtamu wo tsanisela. Ene a womba tiya: “Kupfisisa txivangelo txa ti to ngu kutxani atile ti nga txi maheka ti ni vhune kukhumbula ti to i ve ngu mhaka ya Jehovha ni nga ti ka txiemo txileya. Eto ti ni vhune ku ema kupimisa ngutu ngu ngani.”

10. I ngu nzila muni kukhukhela konku Jehovha a nga vako dirigwi dathu?

¹⁰ I si nga kale athu hi na wonisana ni timbimo to karata ngutu ni ku ti na lava hi themba ngutu Jehovha kupinda kale. Nda lisima ngutu ku konku hi tsanisa themba yathu ni likholo lathu ka Jehovha ka ti to a na hi ninga txivhuno txi hi txi lavako kasi ku hi simana hi di thembekile kwakwe. Hi nga mahisa kutxani toneto? Ngu kugonda madungula a mu ka Bhiblia a malanda a Jehovha o thembeka a mbimo ayi yi nga pinda ni siperiensiya sa konku sa vanathu a va va nga vhunwa ngu Jehovha kasi ku ve tsanisela. Mbimo yi u lerako madungula oneyo, pimisa ngu nzila yi Jehovha a nga vhuna ngu yona malanda yakwe. Tihi mbimo yo alakanyisisa ngu siperiyensiya soneso. Ngaku u txi maha toneto u na ti wona ngu ditshuri ti to Jehovha dirigwi dako.

ETETELA TIFANELO TA JEHOVHA

11. Ngu kutxani hi txi lava ku etetela tifanelo ta Jehovha? (Wona ni di dikwadru adi di ku: “ Ngu yahi makungo aya majovhem ma nga ti vekelako.”)

¹¹ Kala hawa hi woni tifanelo to kari ta Jehovha ati ti hi vhunako ku wona ti to ngu kutxani Jehovha atxi fananiswa ni dirigwi. Konku hi wona ati ti nga hi vhunako ku etetela tifanelo toneto.  Ngako hi txi maha totshe ti hi nga tikotako kasi ku etetela Jehovha hi na sikota kutsanisa vanathu. Ngu txikombiso, Jesu a ningile Simoni ditina adi di ku Khefasi di (hunduluxelwako di va “Pedro.”), ditina donedo di txhamusela “Txikhwemu txa Dirigwi.” (Joh. 1: 42) Ngu nzila yoneyo Jesu atxi lava kuwomba ti to Pedro a ndi na thavelela vanathu dibanzani ni kutsanisa likholo lawe. madhota a dibanza ma dhanwa kota “mtsudi wa dirigwi da hombe.” Eto ti womba ti to madhota ma vhikela vanathu dibanzani. (Isaya 32:2) Ti hakubasani ti to hi nga madhota basi ma nga etetelako tifanelo ta Jehovha ni kutsanisa vamwani dibanzani, hotshethu hi nga maha toneto.—Vaef. 5:1.

12. I ngu nzila muni hi nga vako wuthavelo ka vanathu?

¹² Vana wuthavelo ka vanathu. Mbimo yi vanathu va wonisanako ni tiphango ta mtumbuluko mwendo tiyimbi, mbimo yimwani ti nga lava hi va amukela mitini kwathu. Txiemo ka “masiku aku gwitisa” txi naya txi bava ni ku kha ti kanakanisi ti to ti na lava hi ningela txivhuno. (2 Tim. 3:1) Kambe hahanze ko va vhuna ngu didhawa da nyama, athu hi nga sikota ku thavelela vanathu ni ku vakomba lirando ali va li lavako. Nzila yimwani yo maha toneto ngu bhula navo mitshanganoni ni ku va ninga thavelelo yi va yi lavako. Athu hi lava ti to dibanzani ku va wukhalo wo rula aha vanathu va manako kutsaniswa ni lirando. Vathu vavangi va ñolana ngu nzila yo biha, eto ti nga maha vanathu va tipfa va di extresadhu ni ku tipfa va si dhundwi. Ngu toneto mbimo yi vanathu va tako mitshanganoni, hi lava kutsaniseka ti to ha va thavelela ni ku va kombisa lirando.

13. Madhota ma nga va wuthavelo ka vamwani ngu nzila muni? (Wona ni mfota.)

¹³ Madhota ma nga va wuthavelo ka vanathu va va wonisako ni siduko so hambana hambana. Ngaku ku txi humelela phango ya mtumbuluko mwendo ti txi laveka ku ya sibhejela koha ni koha, madhota ngu txikuluveta ma lulamisela  txivhuno para vanathu. Va tshumela va thumisa Bhiblia kasi kuningela mkongomiso ni kutsanisa vamwani. Vanathu va na tipfa va di txhatxhekile ku ya kombela txivhuno ka didhota ngako di txi ziwa ngu wunene ni ku tikaratela ku pfisisa ti vanathu va tipfisako tona. Didhota di di kombisako tifanelo toneto di maha ti to vanathu ve tipfa va txi dhundwa. Ngu nzila yoneyo ti na hehuka ku vanathu ve londisela mkongomiso awu wu seketelwako mu ka Bhiblia awu madhota ma wu ningelako.—1 Vat. 2:7, 8, 11.

14. Hi nga kombisa ngu nzila muni ti to hi vo thembeka?

¹⁴ Vana wo thembeka. Hi lava kumaha vamwani ve themba ti to hi na va vhuna ngako ti txi laveka. (Mav. 17:17) Kambe hi nga maha txani kasi ku vanathu ve ti ziva ti to hi vo thembeka? Hi nga maha totshe ti hi nga tikotako kasi ku hi etetela Jehovha ditshiku ni ditshiku. Ngu txikombiso ngu kuhetisisa ati hi nga ti thembisa ni ku hoka ngu mbimo. (Mat. 5:37) Hi nga tshumela hi maha totshe ti hi nga tikotako kasi ku hi vhuna awu a lavako txivhuno. Hahanze keto hi lava kuhetisisa siyavelo sathu dibanzani ngu kuya ngu mkongomiso wu hi nga ningwa.

15. I ngu nzila muni madhota ya ma thembekako ma wuyelisako dibanza?

¹⁵ Madhota o thembeka tiningo ka dibanza.  Ngu nzila muni? Ngako vanathu va txi ziva ti to va nga dhana madhota mbimo yi va lavako txivhuno, va nga tipfa va di txhatxhekile. Vanathu va na tshumela va tipfa va txi dhundwa ngu ku ziva ti to madhota matiemisete ku va ninga txivhuno mbimo yi va txi lavako. Ni ku vanathu va na simama ve themba madhota mbimo yi va pfisisako ti to va thumisa Bhiblia ni mabhuku athu kasi ku va ninga txialakanyiso. Hahanze keto vanathu va themba madhota aya ma si wombeteliko sihunja sawe ka vamwani ni kuhetisisa ti va nga ti thembisa.

16. Ngu kutxani mbimo yotshe i di ta lisima kuengisa mkongomiso wa Jehovha?

¹⁶ Mbimo yotshe londisa mkongomiso wa Jehovha. Ngako hi txi engisa mkongomiso wa Jehovha ka totshe ni kumaha sisungo asi si nga seketelwa mu ka Bhiblia hi na va txikombiso txa txinene atxi vamwani va nga txi londisako. Ngako hi txi gonda Bhiblia ni kutsanisa likholo lathu mu ka Bhiblia hi na va vo thembeka kwakwe ni ka milayo yakwe. Athu kha hi na mbi timetwa ngu tigondo ta makuhu nem ngu mapimiselo aya ma hambanako ni ti Jehovha ati gondisako ka Bhiblia. (Vaef. 4:14; Jak. 1:6-8) Mbimo yi hi amukelako madungula o mbi tsakisa, athu ha zumba hi di thuthile nguko hi ni likholo ka sithembiso sa Jehovha. (Mas. 112:7, 8) Hi nga tshumela hi vhuna vale va wonisanako ni sikarato.—1 Vat. 3:2, 3.

17. Madhota ma nga va vhunisa kutxani vanathu ti to ve simama va di tsani amu ka likholo?

¹⁷ Madhota ma fanete kuva i di vathu vo tiñola, va mapimu, va di ni ndhuma ya yinene ni kudinganisela. Madhota ma tshumela ma vhuna vamwani ku va vo thuta ni ku va ni likholo lo tsana ka Jehovha. Ona ma tshumela ma tsanisa dibanza ngu ku va ‘o thembeka kutxhumayelani ka Dipswi.’ (Tit. 1:9; 1 Tim. 3:1-3) Ngu txikombiso txawe ni ngu ku maha maendo a wudyisi, madhota ma vhuna vahuweleli va dibanza ti to ve pateka ka yotshe mitshangano, ka mthumo wo txhumayela ni ku ti mahela gondo ya mʼthu apune. Mbimo yi vanathu va wonisako ni sikarato, madhota ma va khumbutisa txilaveko txo themba Jehovha ni ku veka mapimu ka sithembiso sakwe.

18. Ngu kutxani hi di fanete kudhumisa Jehovha ni ku mbimo yotshe hi simama hi tshuketa hafuhi kwakwe? (Wona dikwadru adi di ku “ Nzila yo simama u tshuketa ka Jehovha.”)

¹⁸ Msana ka kuva hi di gondile tifanelo to kari ta Jehovha, nathu hi nga womba ati Dhavhidha a nga bhala atxi: “Ana dhumiswi Mkoma i ku Dirigwi dangu.” (Mas. 144:1) Athu mbimo yotshe hi nga themba Jehovha wutomi wathu wotshe. Hambi se hi di kute ngu tanga hi nga themba ti to Jehovha a na simama a hi vhuna kusimama hi va hafuhi nayo. Ni ku nathu hi nga womba ti to Jehovha “Dirigwi dathu.”—Mas. 92:14, 15, NM.