1. Mowiwanana na Masalmo 18:46 Mwene Davidi omuladdanihile Yehova na eni?

 MWILABONI munkalihu ninogumanana makattamiho—vina dhorutxa dhigadhile otxinja—egumi yehu mohijedheleya. Iyo ninotamalela venjene sabwa ya okana nikamihedho na Yehova! Nsunzo nivirile, nihubutxedhiwa wi Yehova Mulugu onkalawovi vina oli omala-nawale wi anikamihedhe. Iyene aganikamihedha, ninozinddiyela wi Yehova okalawo! (Kengesa Masalmo 18:46.) Mbwenyi mmaleli Davidi oleba mazu aba, iyene ohiloga wi Yehova ddi Mwango waga. Sabwaya jani iyene amuladdaniha Yehova, Mulugu wokalawo na elobo ehina egumi—mwango?

2. Txini enasekeserhihu mwari mwa nsunzo ntti?

² Mu nsunzoni ntti ninele wona sabwaya enkuweliwa Yehova mwango nanda eji enisunziha eni mwaha wa iyene. Ninele wona sabwaya enfwanyelihu omukuluvela Yehova vina omukuwela Mwango wehu. Omamalelowa ninele wona marhe ananikamihedhe otagiha mikalelo dhaye.

YEHOVA ONKUWELELIWANI MWANGO

3. Bibilia onolabihedha nzu ntti mwango wi atapulele nni? (Koona ya kapa.)

³ Bibilia onomuladdaniha Yehova na mwango wi anikamihedhe ononelamo mikalelo dhaye. Dila dhinji alabeli a Yehova agamuttittimihaga sabwa ya mikalelo dhaye dhottikiniha anomuladdaniha na mwango. Dila yoroma Bibilia enimuladdanihiye Yehova na Mwango enfwanyeya va Olibiha 32:4. Munlobeloni na Ana, iyene ohiloga wi kawo mwango onladdanihiwa na Mulugu wehu. (1 Sam. 2:2) Habakuk ohiloga wi Yehova ddi mwango waga. (Hab. 1:12) Na maleba Masalmo 73 ohiloga wi Yehova ddi mwango wa murima waga. (Masal. 73:26) Vina Yehova mwinyene ohiviladdaniha na mwango. (Iza. 44:8) Ovano ninele wona mikalelo miraru dha Yehova dhinlagiha wi iyene oli ninga mwango  vina ninele osunza omona Yehova ninga “Mwango [wehu].”—Olib. 32:31.

4. Yehova oli dhavi ninga ttawela? (Masalmo 94:22)

⁴ Yehova ddi ttawela yehu. Mudhidhi wa pevo enddimuwa nigahittawela mugurugudhani wi nivuneye, na mukalelo wakakene nigagumanana makattamiho Yehova ononibarela. (Kengesa Masalmo 94:22.) Yehova onele onikamihedha obarela mandano ehu na iyene. Ononikuluveliha wi kawo makattamiho angumanihuna ovanene ananiputtule namukalakala. Mbwenyi Yehova ononipikirhela okosa elobo yina: Musogorho onele ogomiha dhilobo dhotene dhinnitotela odhugudheya vina goyi.—Ezek. 34:​25, 26.

5. Yehova anakale dhavi mwango wehu Wottawela?

⁵ Nlobelo mukalelo mmodha wa ofwanya Nibarelo na Yehova. Nigalobela, Yehova ononivaha “murenddele wa Mulugu” onkoya murima na mubuwelo wehu. (Fil. 4:​6, 7) Koona empadduweli Artem, mbali wafugeliwe sabwa ya nroromelo naye. Namapepesa makaniya waninvuza dila dhinjene, kamweddiha na oderetu vina wanimutxutxa. Artem ohiloga: “Mudhidhi wakuweliwa miyo wi ddivuziwe ddakala wozuzumene. . . . Mbwenyi ddannimulobelela Yehova ddimukumbirhaga murenddele wa mmurimani vina eziwelo.” “Marhe otene akosa namapepesa kattidda mpirha mwa miyo. . . . Na nikamihedho na Yehova yakala ninga ddela obareliwa na ngome.”

6. Ninfwanyelela nni omukuluvela Yehova? (Izaiya 26:​3, 4)

⁶ Yehova ddokuluveleya. Dhahene ninga mwango ohinwodha obudduwa mburo olani, Yehova txipo kantxinja vina oli womala-nawale wi anikamihedhe. Enowodheya iyo omukuluvela Yehova sabwani iyene Mwango wa mukalakala. (Kengesa Izaiya 26:​3, 4.) Yehova Mulugu onkalawovi vina oli omala-nawale wi akwanihedhe mapikirhelo aye, avuruwane malobelo ehu vina anivahe nikamihedho ninfunihu. Ninofwanyela vina omukuluvela Yehova sabwani iyene onoweddeyana na abale animulabela. (2 Sam. 22:26) Txipo kandduwala mabasa animukoselihu, vina onele onittuva sabwa ya ejuwene.—Aheb. 6:10; 11:6.

7. Txini enapadduwe akala ninomukuluvela Yehova? (Koona vina foto.)

⁷ Iyo ninomukosa Yehova Mwango wehu nigamukuluvela kakamwe. Ninokuluvela wi nigamwiwelela Yehova masiki nigumanana makattamiho, weddeyana wehu na iyene onele odhana dhopurelamo. (Iza. 48:​17, 18) Mudhidhi onzinddiyelihu nikamihedho na Yehova nikuluvelo nehu ninowunuwa. Vina ninokana nikuluvelo nawi ddi Yehova bahi onwodha onikamihedha ovilela makattamiho-makattamihovi. Dila dhinji dhingumanihuna makattamiho anonihu ninga kanagome ninozinddiyela wi ninofwanyelela omukuluvela Yehova. Jijuwene enonelimo mbali Vladimir. Iyene ohiloga: “Mudhidhi walimi mburho obule wafugeliwe miyo mandano aga na Yehova ahiliba. Ddahisunza omukuluvela Yehova sabwani ddali meka vina kaddigawodhile ogomiha makattamihoya meka.”

8. (a) Ninlogela nni wi Yehova kantxinja? (b) Ekalele nni yapama Yehova okala Mwango wehu? (Masalmo 62:​6, 7)

 ⁸ Yehova kantxinja. Dhahene ninga mwango munddimuwa, ekalelo ya Yehova vina efunelo yaye kintxinja. (Mal. 3:6) Adamu na Eva mmusadduwelani Yehova, iyene katxinjile efunelo yaye na nlogo na attu. Murumiwi Paulo ohiloga wi Yehova “kanwodha ovivanya mwinyene.” (2 Tim. 2:13) Eji entapulela wi kintanala empadduwa obe enkosa attu ena, Yehova txipo kantxinja dhokosa dhaye, efunelo yaye nne vina magano aye. Ninofwanyelela omukuluvela Mulugu wehu ohintxinja, okuluvela wi onele onikamihedha midhidhi dhorutxa vina musogorho onele wakwanihedha mapikirhelo aye.—Kengesa Masalmo 62:​6, 7.

9. Txini esunziliwe na empadduweli Tatyana?

⁹ Nigatanalela mikalelo dha Yehova, efunelo yaye na elabo ya vati vina nlogo na attu enele onikamihedha okala ofwaseya vina aweddeyana nigehiwaga. (Masal. 16:8) Jijuwene epadduwile na murogora okuweliwa Tatyana wafugeliwe sabwa ya nroromelo naye. Iyene ohiloga: “Ddali meka. Vamaromo yali elobo yorutxa vaddiddi.” “Ddahikumuwa venjene.” Mbwenyi iyene wahiroma otanalela efunelo ya Yehova na nlogo na attu vina wahinonelamo ttima ya ovilela makattamiho abale, eji yahimukamihedha okala wofwaseyene vina yahinvaha guru ya owodha ovilela. Iyene ohiloga: “Ononelamo wi ddatabuwela sabwa ya omulabela Yehova ehiddikamihedha ohizuzumela makattamiho aga bahi.”

10. Ninawodhe dhavi oromana ovanene omuttiya Yehova okala Mwango wehu?

¹⁰ Mohigonela ninele ogumanana nsaka norutxa vaddiddi, enele ofuneya omukuluvela Yehova opitta wale. Mwadhawene jamakamaka oromana ovanene olibiha nikuluvelo nehu vina nroromelo nehu nawi Yehova onele onivaha nikamihedho ninfunehu wi nidhowegevi nikalaga aweddeyana na iyene. Ninawodhe dhavi okosa ejuwene? Modhela wengesa mapadduwo a mBibiliani a adhari a Yehova a masaka awale vina dhotagiha dha abali na arogora a masaka abano akamihedhiwe ovilela na Yehova. Ogengesaga mapadduwo aba katanalela mukalelo wakamihedhile Yehova adhari aye vina katamela mudhidhi wa osunza dhotagihadha. Ogakosa dhahene onele wona wi Yehova ddi Mwango wawo.

OTAGIHE MIKALELO DHA YEHOVA

11. Ninfunela nni otagiha mikalelo dha Yehova? (Koona vina kasha  “Dhogana Dhinfwanyela Okana Abali ali Azombwe.”)

¹¹ Mpaka veneva nihisunza mikalelo dha Yehova dhinnikamihedha ononelamo sabwaya enladdanihiwiye na mwango. Ovano ninfuna nisekeserhe ninawodhe dhavi otagiha mikalelo dha Yehova. Nigakosa mpaka munwodhelihu wi nimutagihe Yehova ninele walibiha abalihu. Motagiha, Yezu ohinvaha Simoni nzina na Sefas (nintapulela “Pedro”), nzina ntti nintapulela “Paddaso ya Mwango.” (Jo. 1:42) Dhahene Yezu ohinonihedhamo wi Pedro agahavaha nipangarhazo abali a mmulogoni vina agahilibiha nroromelo nawa. Anddimuwa a mmulogoni  anologiwa ninga “mundduri wa mwango.” Eji entapulela wi anddimuwa a mmulogoni anowavaha nibarelo abali a mmulogoni. (Iza. 32:2) Ebaribari wi iyo notene ottiya anddimuwa a mmulogoni bahi ninowodha otagiha mikalelo dha Yehova vina wapangarhaza ena mmulogoni.—Ef. 5:1.

12. Ninawodhe dhavi okala ttawela ya abalihu?

¹² Kakala ttawela ya abali. Abalihu agapattiwa dhifoyo obe koddo, txino enele ofuneya iyo okala yottawela yawa. “Masaka [aba] omariha” dhilobo dhinelege odhowavi dhigattabwa nona enele ofuneya wakamihedha abalihu. (2 Tim. 3:1) Mbwenyi ottiya wavaha bahi nikamihedho mpaddi womuyani ninofwanyela vina wavaha nikamihedho ninfunani vina watonyihedha okwela. Mukalelo mmodha wa okosa ejuwene bwa ologa na awene o Nyumbani ya Omwene vina wavaha nipangarhazo ninfunani. Iyo ninfuna wi mulogo wehu okale mburho wa murenddele mwenemo munafwanye abalihu nipangarhazo vina okwela. Ninkalawo mwilaboni mumpadduwa dhilobo dhinji dhorutxa dhinnittukulela ozuzuma, mwa dhahene abalihu agadhowa o matugumanoni iyo ninfuna nikose mpaka munwodhelihu wi nattukulele awene ozinddiyela wi anokweliwa, anobareliwa vina anokana guru enfunani.

13. Anddimuwa a mmulogoni anawodhe dhavi okala ttawela ya abali? (Koona vina foto.)

¹³ Enowodheya anddimuwa a mmulogoni okala ttawela ya abali ampattiwa makattamiho ottiyana-ttiyana. Vagapadduwa efoyo obe makattamiho a egumi anddimuwa a mmulogoni momaguva-mwene anokosa masasanyedho wi àkamihedhe abali. Awene vina anomulabihedha Bibilia wi àvahe malago vina àpangarhaze. Abali anele okala otapuwa wi akumbirhe nikamihedho na munddimuwa wa mulogo onziwiwa ninga muttu onlagiha oderetu, onatanala ena vina onivilibihedha ononelemo mukalelo oniviwamo abali. Munddimuwa wa mmulogoni  onlagiha mikalelo esi onele wakamihedha abali ena wona wi anokweliwa, dhahene enele okala yovevuwa abali ena ofwara malago andela mBibiliani anvahiwani na anddimuwa a mmulogoni.—1 Tes. 2:​7, 8, 11.

14. Ninalagihe dhavi wi nili okuluveleya?

¹⁴ Okale wokuluveleya. Iyo ninfuna wi ena aziwe wila anele okana nikamihedho nehu agapattiwa makattamiho. (Gano 17:17) Mbwenyi txini enfwanyelihu okosa wi abali aziwe wi nili okuluveleya? Enowodheya iyo okosa mpaka munwodhelihu wi nimutagihe Yehova masiku otene, motagiha modhela wakwanihedha na mudhidhiya dhimpikirhelihu. (Mt. 5:37) Mbwenyi enowodheya ovilibihedha wi nimukamihedhe muttu onfuna nikamihedho. Ottiya ejo ninfuna nakwanihedhe mabasa otene anttomeliwihu mmulogoni mowiwanana na malago akelilehu.

15. Anddimuwa a mmulogoni okuluveleya ankamihedha dhavi mulogo?

¹⁵ Anddimuwa a mmulogoni okuluveleya ali ninga nvaho wa mulogoya. Dhavi? Abali a mmulogoni agaziwa wi anele okamihedhiwa na anddimuwa a mmulogoni dila dhotene dhinfunani nikamihedho, anokala ofwaseyene. Abali  vina anowona wi anokweliwa agazinddiyela wi anddimuwa a mmulogoni ali omala-nawale wila àvahe nikamihedho ninfunani. Abali vina anele wakuluvela venjene anddimuwa a mmulogoni agazinddiyela wi awene anomulabihedha Bibilia vina mapublikasau ehu ottiya monelo wawa agavahaga malago. Abali na arogora anowakuluvela anddimuwa a mmulogoni ahinawaddela attu ena makani awa omwinya vina anvirihamo dhimpikirhelani.

16. Ekalele nni yamakamaka dila dhotene ofwara malago a Yehova?

¹⁶ Mudhidhi wetene kafwara malago a Yehova. Nigamwiwelela Yehova mwa dhilobo dhotedhene vina nigakosa dhogana dhiniwanana na magano a mBibiliani ninele okala tagiha ya abali. Nigamusunzaga Bibilia, nilibiha nroromelo nehu ninele okala oweddeyana na Yehova vina magano aye. Kaninapattiwe na masunziho ottambi vina dhubuwelo dhihiniwanana na ensunziha Bibilia. (Ef. 4:14; Tia. 1:​6-8) Nigakela muselu wabure iyo ninokala ofwaseyene sabwani ninororomela vina ninokuluvela mapikirhelo a Yehova. (Masal. 112:​7, 8) Ninowodha vina wakamihedha abale angumanana dhoweha vina makattamiho orutxa.—1 Tes. 3:​2, 3.

17. Anddimuwa a mmulogoni anawodhe dhavi wakamihedha abali okalavi ororomeleya?

¹⁷ Anddimuwa a mmulogoni anofwanyela okala attu ahina yosumuleliwana, a malago, oriheya vina ovipimelela. Alobwana aba anowakamihedha ena okala ofwaseyene vina omuroromela venjene Yehova. Awene anowalibiha abali a mmulogoni modhela weddana magano a nroromelo. (Tito 1:9; 1 Tim. 3:​1-3) Na yotagiha yawa vina masasanyedho ankosani a wawaredhela abali, anddimuwa a mmulogoni anowakamihedha anamalaleya ohijombela matugumano, mabasa a olaleya vina nsunzo nomwinya. Abali agapattiwa makattamiho vina agakala odhugudheyene, anddimuwa a mmulogoni anowawubutxedha wi anofwanyela omukuluvela Yehova vina ozuzumela mapikirhelo aye.

18. Ninfunela nni omuttittimiha Yehova vina okalavi ofiyedheya na iyene? (Koona vina kasha “ Mukalelo Mmodha wa Okala Wofiyedheya na Yehova.”)

¹⁸ Mumalilehu osunza mikalelo dhing’onovi dha Yehova, enowodheya ologa dhahene ninga Mwene Davidi: “Atamaliwe Nabuya [Yehova], Mwango vanthawelimi.” (Masal. 144:1) Enowodheya omukuluvela Yehova mwari mwa egumi yehu yotene. Masiki akala ninowuluvala, ninokuluvela wi Yehova onele odhowagavi anikamihedhaga okala ofiyedheya na iyene. Dhahene ninele ologa wi Yehova ddi Mwango waga.—Masal. 92:​14, 15.