1. Kulita ni Samu 18:46, Ndawichi katesele Yehova ni yika?

 TULI mu chifuchi chize lamba hanji kapinda mahasa kwalumuna mwono wetu susumuku. Alioze, twakusakwilila chinji mumu lia kupwa ni ukwaso wa Yehova. Ha mutwe wapalika, twalilongesanga ngwetu, Yehova kali Zambi ya mwono; iye kali hamwe ni yetu mashimbu eswe hanga atukwase. Muze twakumona ukwaso wacho twakupwa ni shindakenyo ngwetu, “Yehova kali Zambi ya mwono.” (Tanga Samu 18:46.) Hanyima lia kusoneka maliji wano, Ndawichi yavuluka Yehova ngwenyi: “Liwe liami.” Mumu liaka hanyima lia kwamba ngwenyi Yehova katwama ni mwono, mba yamutesa ni liwe chuma chize kuchishi mwono?

2. Yika mutulilongesa ha mutwe uno?

² Ha mutwe uno, mutumonaho chize Yehova anamuvuluka ngwo liwe ni yize kutesa chino chinatulongesa hali iye. Mutumona nawa ulemu wa kujikijila muli Yehova ni kumuvuluka ngwo, liwe lietu. Mba kusongo mutumona amwe majila waze mutuhasa kwimbulwilamo yitanga ya Yehova.

MUMU LIAKA YEHOVA ANAMUTESE NI LIWE?

3. Mu mutapu uka Mbimbiliya kanji-kanji yakuzachisa liji “liwe”? (Tala chizulie ha .)

³ Mbimbiliya yakutesa Yehova ni “liwe” hanga yitukwase kunyingika yitanga yenyi. Kanji-kanji, muze tuvumbi twa Yehova akumuhalisa mumu lia yitanga yenyi ya kukomwesa, ayo kakumusolola ngwe liwe. Mu Mbimbiliya, chisuho chitangu chize anavuluka Yehova ngwo “liwe,” chili ha Shimbi Yamuchiali 32:4. Mu kulemba chenyi, Hana yamba ngwenyi: “Liwe likwo liakuhi ngwe Zambi yetu.” (1 Samue. 2:2) Habakuke kavulukile Yehova ngwenyi, ‘liwe liami.’ (Haba. 1:12) Mutu yoze wasonekene Samu 73, kavulukile Yehova ngwenyi, ‘liwe lia mbunge yami.’ (Samu 73:26) Chikwo nawa, muze Yehova ahanjikile hali mwene, yalitesa ngwe liwe. (Iza. 44:8) Haliapwila, tutalenu yitanga yitatu ya Yehova yize yinasolola ngwo, iye kali liwe ni kulilongesa chize mutuhasa kumona Yehova ngwe “Liwe lietu.”—Shimbi 32:31.

4. Mu mutapu uka Yehova ali uchinyino? (Samu 94:22)

⁴ Yehova iye uchinyino wetu. Nyi vula munji matukwata, mutusa  tachi hanga tufupe chihela muze mutuswama. Chizechene nawa, muze tunapalika mu yipikalo ku mwono, Yehova mahasa kutufunga. (Tanga Samu 94:22.) Yehova matukwasa hanga tufunge usepa wetu ni iye. Iye kanatulakenya ngwenyi, kukushi yipikalo niyimwe mutupalika musono yize muyitunehena lamba lia mutolo. Kashika, kanalakenya kutulingila yuma yinji; kulutwe lia matangwa makwonona yuma yeswe yize yakutupinjisa ni kutunehena lamba.—Eze. 34:25, 26.

5. Kuchi Yehova mahasa kupwa uchinyino wetu?

⁵ Jila yimwe ya kuwanyina uchinyino kuli Yehova, yili kulemba. Muze twakulemba, Yehova kakutwaha “sambukila ya Zambi” yize yakufunga mbunge ni manyonga jetu. (Fwili. 4:6, 7) Talenu yize yalingiwile kuli Artem, umwe ndumbu yoze asele mu zuwo lia ususu mumu lia ufulielo wenyi. Ngaji yoze wapwile ni kutala ha mulonga wenyi, yamuhula ha yisuho yinji ni kumulinga yuma yize kuyalitele. Artem yamba ngwenyi: “Mashimbu eswe waze ngaji apwile ni kungusanyika, kapwile mashimbu akusakalala chinji. Kashika, te nakulemba kuli Yehova ni kumwita sambukila ya ku mbunge ni mana. Ngaji wacho kakahashile kukokolola ufulielo wami. Nyi ukwaso wa Yehova, napwile ngwe nguli wa kufunga mu umwe kaposhi mukolo.”

6. Mumu liaka mutuhasa kujikijila muli Yehova mashimbu eswe? (Izaia 26:3, 4)

⁶ Yehova kali Zambi yoze twatamba kujikijila. Ngwe chizechene chapwa mulundu hanji liwe linene lize kulishi kukatuka mu chihela chalio, Yehova kechi keza kalumuka. Iye nawa kakupwa hamuwika ni yetu hanga atukwase. Kashika, mutuhasa kumujikijila mumu iye kali “liwe lia mutolo.” (Tanga Izaia 26:3, 4.) Yehova manunga ni mwono, chikwo nawa, manunga ni kulihana hanga amanunune yilakenyo yenyi, apanjike yilemba yetu ni kutukwasa ha shimbu lieswalio mutufupa ukwaso wenyi. Mutuhasa nawa kujikijila muli Yehova, mumu iye kashishika kuli waze akumulingila. (2 Samue. 22:26) Iye kechi keza kavulama yuma yize twakumulingila, chikwo nawa, manunga ni kutuwahisa.—Hepre. 6:10; 11:6.

7. Yika muyilingiwa nyi mutujikijila muli Yehova? (Tala nawa chizulie.)

⁷ Twakupwisa Yehova liwe lietu muze twakujikijila muli iye ni mbunge yeswe. Tuli ni shindakenyo ngwetu, nyi mutumwononokena chipwe muze mutupalika mu lamba ni mu yipikalo, mutuyuka. (Iza. 48:17, 18) Ha shimbu lieswe mutumona chize Yehova atukwasa, ujikijilo wetu muli iye muwoka ni kupwa ni shindakenyo ngwetu, Yehova mwe wika mahasa kutukwasa muze mutupalika mu yipikalo, chipwe ngwe muyoka chinji. Kanji-kanji, muze twakupalika mu yuma yize yakusoloka ngwe kuyichi kuhwa, twakuhasa kumona ulemu wa kujikijila muli Yehova. Yino ye amwene ndumbu Vladimir, mba yamba ngwenyi: “Mashimbu waze napwile mu zuwo lia ususu, kapwile mashimbu waze usepa wami ni Yehova wakolele chinji kuhiana. Nalilongesele kujikijila chinji muli Yehova, mumu napwile ukawami; chakapwile ni kumona chize mungutuhuka mu zuwo lia ususu.”

8. (a) Mumu liaka tunambe ngwetu, Yehova keshi kwalumuka? (b) Mumu liaka chili chilemu kupwisa Yehova liwe lietu? (Samu 62:6, 7)

⁸ Yehova keshi kwalumuka. Ngwe chizechene  lwapwa luliwe lunene, utu wa Yehova ni upale wenyi kuyishi kwalumuka. (Mala. 3:6) Muze Alama ni Eva ehukile Yehova, iye kakalumwine upale wenyi hali atu. Postolo Paulu kambile ngwenyi, Zambi “kechi kuhasa kulikala iye mwene.” (2 Timo. 2:13) Maliji wano kanasolola ngwo, chipwe ngwe mukulingiwa chuma cheswacho, hanji atu malinga yeswayo, Yehova kechi kwalumuna mutapu wenyi wa kulingilamo yuma. Kechi kwalumuna upale wenyi, chipwe shimbi jenyi. Kashika, mutuhasa kujikijila muli Zambi yetu yoze keshi kwalumuka, ni kupwa ni shindakenyo ngwetu iye matukwasa ha mashimbu a lamba ni kumanununa yilakenyo yenyi yeswe ya kulutwe lia matangwa.—Tanga Samu 62:6, 7.

9. Yika walilongesa ha yize yalingiwile kuli ndumbu Tatyana?

⁹ Nyi twapukuna ha yitanga ya Yehova ni ha upale wenyi hano hashi ni hali atu, chino muchitukwasa hanga tuhwime mbunge ni kufunga ungunu wetu kuli iye muze mutupalika mu yipikalo. (Samu 16:8) Yino ye yalingiwile kuli ndumbu wa pwo Tatyana, yoze asele mu zuwo lia ususu mumu lia ufulielo wenyi. Iye yamba ngwenyi: “Napwile ukawami mashimbu eswe. Chapwile chikalu chinji ku uputukilo, chocho yinguputuka kunenganyana.” Alioze, muze aputukile kupukuna hali Yehova ni ha upale wenyi hali atu, ni muze anyingikine mumu liaka chili chilemu kukumba yihungumiona yize te anapalika, yichimukwasa kuhwima mbunge ni kupwa ni tachi ja kunyongonona. Yamba nawa ngwenyi: “Kunyingika chitela cha yize te yinalingiwa kuli yami, changukwashile kwiuluka ngwami, yuma yacho yinalingiwa mumu lia Yehova. Chino changukwashile kuhona kujikijila chinji hali yami mwene.”

10. Kuchi mutuhasa kupwisa Yehova uchinyino wetu kukatuka haliapwila?

¹⁰ Kwasala hakehe mutupalika ha mashimbu akalu, haze mutufupiwa kujikijila chinji muli Yehova kuhiana ku mashimbu akunyima. Kashika, chili chilemu kukolesa ujikijilo ni ufulielo wetu muli Yehova kukatuka haliapwila, ngwo matukwasa ha yeswe yize mutufupiwa hanga tukanunge ni kushishika kuli iye. Kuchi mutuhasa kuchilinga? Mutuchilinga ha kutanga sango jili mu Mbimbiliya ja tuvumbi twa Yehova a ku shakulu, ni ha yilweza ya mandumbu jetu a ha mashimbu wano waze Yehova akwashile hanga anyongonone. Muze unatange yilweza yino, nyonga ha chize Yehova akwashile tuvumbi twenyi wano. Sako mashimbu hanga upukune ha yilweza yacho. Nyi wachilinga, mumona pundu ngwe Yehova kali liwe lie.

IMBULULA YITANGA YA YEHOVA

11. Mumu liaka tunazange kwimbulula yitanga ya Yehova? (Tala nawa mushete, “ Yuma Yika ya ku Ufulielo Yize Akweze Mahasa Kutesa?”)

¹¹ Twamona yimwe yitanga yize yakutwala Yehova alitese ni liwe. Haliapwila mutumona chize mutuhasa kwimbulula yitanga yacho. Nyi mutusa tachi twimbulule Yehova, chino muchitukwasa hanga tutakamise mandumbu jetu. Ngwe chilweza, Yesu kalukile Semone, jina lia Sefwa “(lize linalumbunuka ngwo, Petulu).” Jina lino linalumbunuka chihanda cha liwe. (Yoa. 1:42) Hachino, Yesu kasolwele ngwenyi, Petulu te makolweza mandumbu mu chikungulwila ni kutakamisa ufulielo wo. Makulwana a mu chikungulwila,  kakwasolola ngwe “chizulie cha luliwe lunene.” Maliji wano kanasolola ngwo, makulwana kakufunga mandumbu jo. (Iza. 32:2) Chipwe chocho, hi wika ko makulwana a mu chikungulwila, yetu eswe mutuhasa kwimbulula yitanga ya Yehova ni kutakamisa akwetu mu chikungulwila.—Efwe. 5:1.

12. Kuchi mutuhasa kupwa uchinyino kuli mandumbu jetu?

¹² Pwako uchinyino wa mandumbu je. Muze mandumbu jetu akupalika mu luyinda wa chisemewa, hanji mu jita, muchilita kwaha uchinyino uze anafupu. Yuma ha matangwa wano a kusula muyinunga ni kupihia chinji kuhiana, kashika mutusa tachi hanga tupwe ni kulikwasa. (2 Timo. 3:1) Alioze, kuchizako ukwaso wa ku musunya, mutuhasa nawa kusolwela mandumbu jetu zango ni kwaha utakamiso uze anafupu. Jila yimwe ya kuchilingila yili kuhanjika no muze tuli ku Zuwo lia Wanangana ni kwaha utakamiso uze anafupu. Tunazange hanga chikungulwila chipwe chihela cha sambukila muze mandumbu jetu mahasa kuwana utakamiso ni zango. Yetu tuli mu chifuchi muze yuma yinakale chinji, kumushi zango; nawa yuma yize yinalingiwamo yinatwale atu anji kusakalala. Kashika muze mandumbu jetu maya ku kukunguluka, tunazange kusa tachi hanga alivwe ngwo twakwazanga, ahuzuluke ku mbunge ni kulivwa ngwo kali mu ufunge upema.

13. Kuchi makulwana mahasa kupwa uchinyino kuli akwo? (Tala nawa chizulie.)

¹³ Makulwana a mu chikungulwila mahasa kupwa uchinyino wa mandumbu waze anapalika mu yipikalo yeka ni yeka. Ha mashimbu waze kunalingiwa luyinda wa chisemewa hanji kuli umwe musongo, makulwana kakulinga yuma kafuji-fuji hanga akwase mandumbu jo. Ayo nawa kakuhana usongwelo ni utakamiso kuli mandumbu jo, kupalikila mu Mbimbiliya. Mandumbu makundama kuli makulwana ni kwita ukwaso nyi o manyingika ngwo, makulwana jacho kapwa yimbovu, atu ashi, nawa kakusa tachi hanga anyingike chize mandumbu jo anevu ku mbunge. Mukulwana wa  mu chikungulwila yoze wakusolola yitanga yino, kakukwasa mandumbu jenyi hanga alivwe ngwo kanaazange. Kulinga chino, muchikwasa mandumbu hanga akaule usongwelo unakatuka mu Mbimbiliya uze maaha kuli makulwana.—1 Tesa. 2:7, 8, 11.

14. Yika mutuhasa kulinga hanga tupwe atu waze akwetu mahasa kujikijila?

¹⁴ Pwako mutu yoze akwenu majikijila. Tunazange kupwa atu waze akwetu majikijila ngwo, mutuhasa kwakwasa muze mapalika mu yipikalo. (Yishi. 17:17) Yika mutuhasa kulinga yize muyikwasa mandumbu jetu atumone ngwo tuli atu waze o mahasa kujikijila? Chuma mutulinga chili chino, kusa tachi hanga twimbulule Yehova tangwa ha tangwa. Ngwe chilweza, twatamba kusa tachi hanga tupwe ni kumanununa yuma yize twakulakenya ni kupwa atu waze akulinga yuma ha shimbu. (Mateu 5:37) Mutuhasa nawa kusa tachi hanga tukwase ndumbu mweswawo unafupiwa ukwaso. Kuchizako yino yeswe, tunazange kulinga kanawa yiteli yeswe tuli nayo mu chikungulwila kulita ni usongwelo uze twakutambula.

15. Kuchi makulwana waze akusolola ngwo akwo mahasa kwajikijila akuyukisa chikungulwila?

¹⁵ Makulwana a mu chikungulwila waze akusolola ngwo akwo mahasa kwajikijila, kapwa chawana chilemu mu chikungulwila. Mu mutapu uka? Muze mandumbu akunyingika ngwo, mahasa kusanyika makulwana ha shimbu lieswalio mafupiwa ukwaso, ayo kakuhuzuluka ku mbunge. Mandumbu kakulivwa nawa ngwo kakwazanga muze akunyingika ngwo, makulwana kali hamwe no mashimbu eswe hanga aakwase ha yize anafupu. Chikwo nawa, mandumbu majikijila chinji muli makulwana muze manyingika ngwo, makulwana  kakwaha utakamiso uze unakatuka mu Mbimbiliya ni mu mikanda yetu hi ha manyonga jo ene ko. Kuchizako yino, mandumbu kakujikijila chinji muli makulwana waze keshi kulweza akwo yuma yambala, nawa akumanununa yize akulakenya.

16. Mumu liaka chili chilemu kukaula usongwelo wa Yehova mashimbu eswe?

¹⁶ Kaula usongwelo wa Yehova mashimbu eswe. Nyi twakwononokena Yehova mu yuma yeswe, ni kukwata yiyulo yize yinakatuka mu Mbimbiliya, mutupwa yilweza yipema yize akwetu membulula. Nyi twalilongesa Mbimbiliya ni kukolesa ufulielo wetu muli Yehova, mutushishika kuli iye ni ku usongwelo wenyi. Nyi twachilinga, kechi kuhasa kutupiangula ku usongwelo wa mahuza, chipwe ku kunyonga cha hano hashi chize chakulimika ni yize Yehova akutulongesa. (Efwe. 4:14; Tia. 1:6-8) Muze twakutambula jimwe sango jipi, yetu twakuhwima mbunge, mumu twakufuliela ni kujikijila ha yilakenyo ya Yehova. (Samu 112:7, 8) Chikwo nawa, twakuhasa kukwasa waze anapalika mu yipikalo ni mu yihungumiona.—1 Tesa. 3:2, 3.

17. Kuchi makulwana mahasa kukwasa mandumbu hanga ajikize ni kufunga ufulielo wo?

¹⁷ Makulwana a mu chikungulwila, katamba kupwa ni yitanga yipema, mana, kupwa atu waze akululieka kanawa yuma ni kupwa atu ashi. Ayo katamba kukwasa akwo hanga apwe ni kuhwima mbunge ni kukolesa ufulielo wo muli Yehova. Ayo nawa katamba kukolweza mandumbu mu chikungulwila hanga alikwachilile ku ‘liji lia umwenemwene.’ (Titu 1:9; 1 Timo. 3:1-3) Kupalikila mu chilweza cho ni muze akuya ni kumeneka mandumbu, makulwana kakukwasa akwa-kwambujola eswe mu chikungulwila apwe ni kukunguluka mashimbu eswe, kwambujola ni kulinga longeso lia wika. Muze mandumbu akupalika mu yihungumiona ni kuputuka kusakalala, makulwana kakweulula ulemu wa kujikijila muli Yehova ni kulihulikila ha yilakenyo yenyi.

18. Mumu liaka tunazange kuhalisa Yehova ni kununga kupwa hamwe nenyi mashimbu eswe? (Tala nawa mushete, “ Yize Muyitukwasa Kukundama kuli Yehova.”)

¹⁸ Hanyima lia kulilongesa yimwe yitanga ya Yehova, ni yetu mutuhasa kwamba ngwe Ndawichi yoze wasonekene ngwenyi: “Yehova liwe liami; afumane.” (Samu 144:1) Yetu mutuhasa kujikijila muli Yehova ku mwono wetu weswe. Nyi twachilinga, chipwe muze mutupwa tushinakaji, nihindu mutujikijila muli Yehova ngwetu, manunga ni kutukwasa hanga tukundame kuli iye. Hachino, mutuhasa kwamba ngwetu: “Yehova iye liwe liami.”—Samu 92:14, 15.