1. ¿Salmo 18:46 dera Davidbara Jeowara kʼãrẽ kĩrãkʼabʉ asi?

 IDI EWADERA dayirãbara badu ewaride bedʼea zromata ũduseabʉ, maʉ̃ba dayirã bebʉra atiaʉde awuara baseabʉ. Mamina kʼãrẽ bia, kʼawuapanʉ baera Jeowaba dayirãta kʼarebaseabʉta. Nããbema artikulode kʼawuasida Daizezera wãrĩnu bʉta akʉza ewari jõmaʉ̃nẽ kʼarebabʉta dayirãra. Dayirãba bedʼea zroma ũdubʉrʉde, ũdudara Jeowaba sãwũã kʼarebabʉta naʉ̃ba ĩjãbibʉ Daizezera wãrĩnu zokʼai chʉta, Davidba Salmo 18:46​de jarada kĩrãkʼa (akʉra Salmo 18:46). Mawũãsidu tẽã Davidbara jarasi Daizezera mʉ̃ Mõgara. Mamina, ¿kʼãrẽa jarasi Davidbara Daizezera mõgara kĩrãkʼa bʉta, Jeowara zokʼai chʉbʉrʉ?

2. ¿Naʉ̃ artikulodera kʼãrẽ ʉ̃rʉ kʼawuadayi?

² Naʉ̃ artikulode kʼawuadayi kʼãrẽa jarabʉta Jeowara Mõgarata akʉza maʉ̃ba kʼãrẽta jaradiabʉta dayirãʼa iyi ʉ̃rʉ. Adewara kʼawuadayi dayirãbara Jeowara sãwũã dayirã Mõgara babiseabʉta, adewara sãwũã iya nebia ũdubibʉ kĩrãkʼa oseapanʉta.

KʼÃRẼA JARAPANɄ JEOWARA MÕGARATA

3. ¿Kʼãrẽta jarakĩrãbʉ Daizeze Bedʼeade Jeowara mõgara abʉbara? (Akʉra potota).

³ Daizeze Bedʼeabara jarabʉ Daizezera mõgara kĩrãkʼa bʉta, mawũã dayirã jara ũrĩbita iyi sode kʼãrẽ nebia erbʉ ʉ̃rʉ akʉza ẽbẽrarã iyi ode kʼẽrẽpa badaraba iyi nebia ʉ̃rʉ bedʼeabʉrʉdera jarapanasi iyira mõgara kĩrãkʼa bʉta. Deuteronomio 32:4​debʉrʉ jarakata jarasi Daizezera Mõgarata akʉza Anabida jarasi «neẽ mõgara Daizeze kĩrãkʼa bʉra» (1 Sam. 2:2). Habacucbida jarasi Jeowara iyi Mõgarata (Hab. 1:12). Salmo 73 bʉdabida jarasi Daizezera mõgara iyi sodebemata (Sal. 73:26). Adewara Jeowabida jarasi iyira Mõgarata (Is. 44:8). Akʉdaya kʼãrẽ nebia ũbeaba Jeowara mõgara babibʉta akʉza dayirãba sãwũã dayirã mõgara babiseabʉta (Deut. 32:31).

4. ¿Kʼãrẽa jaraseapanʉ Jeowara dayirã mirʉbarita? (Salmo 94:22).

 ⁴ Jeowabara kʼarebabʉ bedʼea zroma erbʉde. Nãgʉ zroma zebʉrʉdera ẽbẽrabara jʉrʉbʉ sama mirʉita, mõgara zromata ũdura mama wãbʉ mirʉita, maʉ̃ta neẽ bʉrʉ mõgara zobeade mirʉbʉ. Maʉ̃ kĩrãkʼa dayirãba bedʼea zroma ũdubʉrʉdera jʉrʉseabʉ Jeoware mirʉita, iya kʼarebai baera dayirãra (akʉra Salmo 94:22). Jeowabara nekʼãrẽ jõma obʉ dayirãta ewari jõmaʉ̃nẽ iyi kʼawa panamarẽã akʉza jarabʉ idi ewade dayirã kʼãwũã zʉbʉriabʉra ewari jõmaʉ̃nẽ ba ẽ baita (Ezeq. 34:​25, 26).

5. ¿Kʼãrẽta odaibara Jeowata dayirã mirʉbari bamarẽã?

⁵ Dayirãbara Jeowa kʼarebara ũduseabʉ Jeowaʼa yiwidʼipanʉne. Jeowaba dayirãra adʉʼa babiyi akʉza akʉyi dayirã sota, adewara dayirã krĩchata (Filip. 4:​6, 7). Akʉdaya Artiom nebʉrata, iyira karsel eda edesida iya ĩjãbʉ kʼarea. Iyi karselde eda bʉeda, ẽbẽra abaʉba iyaʼa bedʼea badua widibasi akʉza zʉbʉria osi, adewara daʉperakĩrãbasi. Iya jarabʉ: «Mʉ̃a badʉa widibʉdadera mʉ̃ra mejãcha krĩcha zroma obasi, maʉ̃ kʼarea Jeowaʼa yiwidʼibasi mʉ̃ta adʉʼa babimarẽã akʉza krĩcha biata diamarẽã. Mʉ̃ mawũã mejãcha zʉbʉria opanasimina mʉ̃ra adʉʼa basi akʉza Jeowaʉ̃me kʼẽrẽpa basi. Maʉ̃ba Jeowara mʉ̃itara muro kĩrãkʼa basi.

6. ¿Kʼãrẽ kʼãrẽa ewari jõmaʉ̃nẽ ĩjãseapanʉ Jeowa ʉ̃rʉ? (Isaías 26:​3, 4).

⁶ Jeowara kʼẽrẽpa bʉ akʉza dayirãra doba amae ẽ bayi. Mõgara zromara ewari jõmaʉ̃nẽ ariya pikibʉ, abarika dayirãba bedʼea zroma erbʉdera Jeowara dayirã kʼawa bayi dayirã kʼarebaita, iyi ʉ̃rʉ ĩjãseapanʉ Jeowara Mõgara kĩrãkʼa pikibʉ baera (akʉra Isaías 26:​3, 4). Jeowara ewari jõmaʉ̃nẽ zokʼaibʉ baera iya nekʼãrẽ oya adara aripe oyi, adewara ũrĩbʉ dayirã yiwidʼira akʉza kʼarebabʉ dayirãba kʼareba nesidabʉde. Maʉ̃ awuara ĩjãpanʉ Jeowabara doba amae ẽ baita iyi ode kʼẽrẽpa panʉrãra (2 Sam. 22:26). Jeowabara jipa kĩrãdʉa ẽ dayirãba iyi kʼarea nekʼãrẽ bia obʉra akʉza maʉ̃ kʼarea ewari jõmaʉ̃nẽ nebia diayi (Heb. 6:10; 11:6).

7. ¿Kʼãrẽ nebiata ũdubʉ Jeowa ʉ̃rʉ ĩjãbʉba? (Akʉra potota).

⁷ Adewara Jeowara dayirã Mõgara babiseabʉ ewari jõmaʉ̃nẽ iyi ʉ̃rʉ ĩjãpanʉne. Dayirãba biʼia kʼawuapanʉ bedʼea zroma ũdʉbʉrʉde ũrĩpanʉbʉrʉ iya zokʼabʉta tẽã jʉ̃neane nebia ũdʉdaita (Is. 48:​17, 18). Dayirãba ũdʉbʉrʉza Jeowaba sãwũã kʼarebabʉta, iyi ʉ̃rʉ audre zarea ĩjãnañi. Maʉ̃ba awuantadayi bedʼea zromara zebʉrʉra Jeowa kʼarebadeba. Ĩjãpanʉ Jeowabʉrʉ kʼarebaita dayirãba bedʼea zroma erbʉra, maʉ̃ra dayirãitara kʼaiba kʼareba ẽ kĩrãkʼabʉmina. Mebẽã Vladímirba jarabʉ: «Mʉ̃ karselde bʉde audre Jeowa kʼawa bʉta sentisi. Mama audre ĩjãsi Jeowa ʉ̃rʉ abapai basi baera akʉza kʼãrẽ obe ẽ basi baera mʉ̃ bedʼea zroma ara oita».

8. (1) ¿Kʼãrẽa jaraseapanʉ Jeowara kĩrã awuara bʉ ẽãta? (2) ¿Kʼãrẽ nebiata ũdudai dayirãba Jeowata Mõgara kĩrãkʼa akʉpanʉbʉrʉ? (Salmo 62:​6, 7).

⁸ Jeowara kĩrã awuarabʉ ẽ. Mõgara zromara ewari jõmaʉ̃nẽ ariya chʉ akʉza iyi sãwũã chʉra awuara ẽ. Abarika bʉ Jeowata  iyi sãwũã bʉra awuaratoto chʉ ẽ akʉza iya kʼãrẽ oita krĩchabʉra awuara krĩchatoto chʉ ẽ (Mal. 3:6). Adán Evaʉ̃meba Jeowaba zokʼabʉta ũrĩ ẽ basidera, Jeowabara awuara oita krĩcha ẽ basi. Apostol Pablobara jarasi Jeowabara awuara oita jarabe ẽãta iya oya adara (2 Tim. 2:13). Maʉ̃ba jarakĩrãbʉ naʉ̃ drʉade kʼãrẽ berabaribʉba akʉza ẽbẽrarãba kʼãrẽ obʉrʉba awuara babi ẽ Jeowara, mia iyi sãwũã chʉde, mia iyi kʼãrẽ oita krĩchabʉde akʉza iya zokʼabʉde. Mawũã Jeowara kĩrã awuara bʉ ẽ baera ĩjãpanʉ dayirãba bedʼea zroma erbʉdera iya kʼarebaita akʉza iya dayirã nekʼãrẽ bia diaya adara mawũã oita (akʉra Salmo 62:​6, 7).

9. ¿Kʼãrẽta kʼawuasi bʉara Tatiana berabaridadebara?

⁹ Dayirãba bia krĩchabʉbʉrʉ Jeowaba iyi sode kʼãrẽ nebia erbʉ ʉ̃rʉ akʉza Jeowaba kʼãrẽ nebia oita krĩchabʉ ʉ̃rʉ mawũãra audre ĩjãñi iyi ʉ̃rʉ akʉza Jeowara dayirã Mõgara babidayi. Naʉ̃ba biode kʼarebayi dayirãba bedʼea zroma ũdubʉrʉde adʉʼa panaita (Sal. 16:8). Mawũã berabarisi mebẽã Tatianata, iyira jeneneraba iyi deda jida erpanasi. Iya jarasi: «Mʉ̃a jarasida mʉ̃ra abapai baibarata, nããrãra mʉ̃ita maʉ̃ra mejãcha zare basi abapai basi baera akʉza sopʉa basi baera». Maʉ̃ awuantaita iyara krĩchasi Jeowa ʉ̃rʉ akʉza Jeowaba kʼãrẽta oita krĩchabʉ ʉ̃rʉ, maʉ̃ba kʼawuasi kʼãrẽa yibiata iyi zarea bʼaita. Adewara maʉ̃ba kʼarebasi adʉʼa bʼaita akʉza kʼẽrẽpa bʼaita Jeowaʉ̃me. Akʉza iya jarabʉ: «Mʉ̃a kʼawuasi mʉ̃ kʼãwũã berabarinʉmʉta Jeowata kãga baera akʉza iya zokʼabʉta obʉ baera. Naʉ̃ba kʼarebasi mʉ̃a mejãcha krĩcha ẽ baita mʉ̃a bedʼea zroma ũdʉnʉmʉ ʉ̃rʉ».

10. ¿Sãwũã Jeowara bʉ Mõgara babiseabʉ?

¹⁰ Aranʉ dayirãba ũdʉdayi bedʼea zromata, maʉ̃ne nesidadayi audre Jeowa ʉ̃rʉ ĩjãnaita. Maʉ̃ba dayirãbara kʼãwũãena ĩjãnaibara Jeowabara dayirãba nesidabʉra jõma diaita mawũã iyiʉ̃me kʼẽrẽpa bamarẽã akʉza bedʼea zroma awuantamarẽã. Mawũẽra bʉara ¿kʼãrẽta oseabʉ mawũã audre ĩjãita? Akʉra Daizeze Bedʼeade nebʉra bʉta akʉza idi ewade mebẽrã ʉ̃rʉ nebʉra bʉta. Mõbe krĩchara sãwũã Jeowaba ũdʉbisita iyira Mõgara kĩrãkʼa bʉta iyi ode kʼẽrẽpa panʉra. Naʉ̃ba kʼarebayi bʉabida Jeowata akʉmarẽã mõgara kĩrãkʼa.

JEOWADE KĨRÃKʼA ODADRɄ

11. ¿Kʼãrẽa yibia Jeowade kĩrãkʼa odaita? (Akʉra rekuadro  Mebẽrã warraraba kʼãrẽta oseabʉta).

¹¹ Dayirãba kʼawuasida Jeowaba iya nebia ũdubibʉdeba iyira mõgara kĩrãkʼa bʉta. Mawũẽra atia kʼawuadayi kʼãrẽta sãwũã odaibarata dayirãba iyide kĩrãkʼa odaita. Dayirãta audre zarea opanʉbʉrʉ Jeowade kĩrãkʼa oita mawũãra audre kʼarebadayi kongregasionebemarata. Bari jaraita, Jesuba Simónʼa trʉ̃ diasi, jarasi Cefas (Pedro), naʉ̃ba jarakĩrãbʉ Mõgarata (Juan 1:42). Jesuba naʉ̃ bedʼeabara jarakĩrãbasi Pedrobara mebẽrã kongregasionebema so zarea diaibasita akʉza kʼarebaibasita ãya ĩjãbʉta audre zarea erpanamarẽã. Daizeze Bedʼeaba jarabʉ zõrãrã kongregasionebemara  bisia mejãcha teinʉmʉne mõgara zromaba sõbra diabʉ kĩrãkʼa bʉta, ãya bia akʉpanʉ baera mebẽrã kongregasionebemarata (Is. 32:2). Mamina dayirãbida mebẽrãta kʼarebaseapanʉ dayirãba Jeowade kĩrãkʼa opanʉbʉrʉ, mawũã ãyitaʼa mõgara zroma kĩrãkʼa baseapanʉ (Efes. 5:1).

12. ¿Sãwũã kʼarebaseapanʉ mebẽrã bedʼea zroma erbʉdera?

¹² Bedʼea zroma erbʉde kʼarebara mebẽrãra. Mebẽrãta naʉ̃ drʉade neida berabaribʉba, mawũã ẽ bʉrʉ yõba ãyi dedaʉba wãibarabʉrʉ dayirãra zarea odaibara dayi deda weita. Naʉ̃ ewari jõbodoare dayirãba ũdu wãna wuabʉrʉ wãta bedʼea zromara, maʉ̃ba zarea odaibara dayirãi yiya kʼarebadaita (2 Tim. 3:1). Dayirãbara kʼarebaseabʉ mebẽrãra audre Jeowa kʼawa bamarẽã akʉza ãyaʼa kãga ũdubiseabʉ. Bari jaraita, ãba yi jʉrebʉrʉde ãyaʼa so zarea diaseabʉ akʉza ũrĩseabʉ ãyi bedʼeata. Idi ewadera ẽbẽrarãbara kãgabʉta ũdubida ẽ, maʉ̃ba yibia bayi mebẽrã ãba yi jʉrebarieda jʉ̃ẽbʉrʉdera ãyaʼa kãga ũdʉbita akʉza bia edaita, ãyita mawũã bia sentimarẽã.

13. ¿Zõrãrãbara sãwũã kʼarebaseabʉ mebẽrã kongregasionebemara ãya bedʼea zroma erbʉdera? (Akʉra potota).

¹³ Zõrãrãbara biode kʼarebaseabʉ mebẽrã kongregasionebema bedʼea zromane berabaribʉra. Drʉade neida berabaribʉba zʉbʉria obʉrʉde, mawũã ẽ bʉrʉ kayabʉde zõrãrã kongregasionebemabara mesera jʉrʉbʉ sãwũã kʼarebaita maʉ̃ra mebẽrãra. Adewara zõrãrãbara so zarea diabʉ naʉ̃ra mebẽrã Daizeze Bedʼeadeba. Zõrãrã abaʉba ũdʉbibʉbʉrʉ mia bedʼeaseabʉta, ũrĩbʉta ãyi bedʼeata, wuabemarata so zʉbʉria akʉbʉta, mawũãra jõmaʉ̃ta iyiʉ̃me bedʼeakĩrãnañi. Zõrãrã mawũã bʉba kʼarebabʉ mebẽrãba ũdudamarẽã iyi kãgata akʉza iya Daizeze Bedʼeadeba ũrãgʼa diabʉrʉdera ũrĩkĩrãnañi (1 Tes. 2:​7, 8, 11).

14. ¿Sãwũã ũdubiseapanʉ dayirã ʉ̃rʉ ĩjãseabʉta?

 ¹⁴ Ũdubira bʉ ʉ̃rʉ ĩjãseabʉta. Jõmaʉ̃ba kãgapanʉ wuabemaraba dayirã ʉ̃rʉ ĩjãnamarẽã bari jaraita ĩjãnamarẽã ãyi kʼareba nesidabʉrʉde dayirãba wãrĩnʉ kʼarebaita (Prov. 17:17). ¿Kʼãrẽta oseabʉ wuabemaraba bʉ ʉ̃rʉ ĩjãnamarẽã? Zarea odaibara Jeowaba nebia erbʉta dayirãbida oũdʉbidaita. Bari jaraita, dayirãba nekʼãrẽ oya adara aripe oibara akʉza ãza jʉ̃ẽ ẽ baibara (Mat. 5:37). Akʉza dayirãbara kʼarebaseabʉ yi kʼareba nesidabʉrata, adewara dayirã nekʼãrẽ omarẽã jarasidabʉrʉ akʉza jarasidabʉrʉ sãwũã oibarata, maʉ̃ra ãyaʼa jaradade odaibara.

15. ¿Zõrãrã abaʉba ũdubibʉbʉrʉ iyi ʉ̃rʉ ĩjãseabʉta kʼãrẽ nebiata ũdupanʉ mebẽrãbara?

¹⁵ ¿Zõrãrã abaʉba ũdʉbibʉbʉrʉ iyi ʉ̃rʉ ĩjãseabʉta kʼãrẽ nebiata ũdʉpanʉ mebẽrãbara? Mebẽrãba kʼawuabʉbʉrʉ ãyi bedʼea zroma erbʉde zõrãrã abaʉta trʉ̃seabʉta, naʉ̃ba kʼarebayi ãyi mejãcha krĩcha zroma oẽ baita. Zõrãrãba ũdʉbidara mebẽrãra kʼarebakĩrãbʉta, mawũãra mebẽrãbara kʼawuadayi zõrãrãbara ãyira kãgabʉta. Zõrãrãba zokʼapanʉbʉrʉ ũrãgʼa diabʉrʉde Daizeze Bedʼeata  akʉza dayirã kartata, naʉ̃ba kʼarebayi mebẽrãba ãyaʼa ũrãgʼa diabʉde audre ĩjãnamarẽã ãyi ʉ̃rʉ, ãyi krĩchata jaradiapanʉ ẽ baera. Adewara mebẽrãbara audre ĩjãpanʉ zõrãrã ʉ̃rʉ ãyaʼa jaradapeadata wuabema jara ẽ bʉrʉ akʉza ãyaʼa nekʼãrẽ oya adata aripe opanʉbʉrʉ.

16. ¿Sãwũã kʼarebabʉ kĩrã awuaratoto chʉ ẽ bara dayirãta akʉza wuabemarata?

¹⁶ Kĩrã awuara barãra. Ewari jõmaʉ̃nẽ ũrĩpanʉbʉrʉ Jeowaba zokʼabʉta akʉza nekʼãrẽ oi nãã Daizeze Bedʼeaba jarabʉde opanʉbʉrʉ, yiza bia bayi wuabemaraita. Dayirãba Daizeze Bedʼeata estudiapanʉbʉrʉ akʉza dayirãba ĩjãbʉta zarea erpanʉbʉrʉ, naʉ̃ba kʼarebayi iyiʉ̃me kʼẽrẽpa bʼaita akʉza iya zokʼabʉta opanaita. Mawũã odara naʉ̃ drʉaba jaradiabʉta oda ẽ bayi akʉza dayirã krĩchara badua awuara totonʉma ẽ bayi, awuarabʉrʉ audre Jeowa kʼawa panañi (Efes. 4:14; Sant. 1:​6-8). Jeowaba nebia weya abʉ ʉ̃rʉ ĩjãpanʉba kʼarebabʉ dayirãba idi ewade bedʼea zroma ũdupanʉmina kʼẽrẽpa bʼaita (Sal. 112:​7, 8). Adewara kʼarebaseapanʉ yi bedʼea zromane berabarinʉmʉta (1 Tes. 3:​2, 3).

17. ¿Kʼãrẽba kʼarebaseabʉ zõrãrãba obʉdeba wuabemara kʼarebaita?

¹⁷ Zõrãrã kongregasionebemara bia krĩcha kʼawuabaibara, kʼãrẽ daʉcha erbaibara akʉza kãga ẽ baibara iya jarabʉrʉta wuabemaba omarẽã, adewara kʼẽrẽpa baibara. Daizeze Bedʼeaba jarabʉta opanʉbʉrʉ, kʼarebabʉ mebẽrã kongregasionebemata aduʼa panamarẽã akʉza ãya ĩjãbʉta zarea erpanamarẽã (Tito 1:9; 1 Tim. 3:​1-3). Zõrãrãba yiza bia diabʉrʉde akʉza mebẽrã so zarea diabʉrʉde kʼarebapanʉ nejaradiabarirãra badʉa Daizeze Bedʼea jaradia wãpanamarẽã akʉza ãyi dobaʉba Daizeze Bedʼea kʼawuadamarẽã, adewara ãba yi jʉrebarima wãnamarẽã. Mebẽrãba bedʼea zroma ũdubʉrʉdera zõrãrãbara ãyaʼa kĩrãbebipanʉ Jeowa ʉ̃rʉ ĩjãibarata akʉza kĩrãbeibarata Jeowaba kʼãrẽ nebia weya abʉ ʉ̃rʉ.

18. ¿Kʼãrẽa Jeowa ʉ̃rʉ ibia bedʼeakĩrãpanʉ akʉza audre iyi kʼawa bakĩrãpanʉ? (Akʉra rekuadro  sãwũã Jeowa kʼawa baseabʉta).

¹⁸ Dayirãba bia kʼawuasida Jeowaba iyi sode kʼãrẽ nebia erbʉ ʉ̃rʉ, maʉ̃ba dayirãbara jaraseapanʉ Jeowara dayirã Mõgarata (Sal. 144:1). Dayirãbara ewari jõmaʉ̃nẽ ĩjãseapanʉ Jeowa ʉ̃rʉ. Zõnabasimina dayirãbara ĩjãseabʉ Jeowaba kʼarebaita akʉza iyira dayirã kʼawa bʼaita. Maʉ̃ba jaraseapanʉ iyira mʉ̃ Mõgara (Sal. 92:​14, 15).