1. Cheʼ bajcheʼ miʼ yʌl Salmo 18:46, ¿chuqui tsiʼ yʌlʌ David tiʼ tojlel Jehová?

 CABɅL jax wocol ti ili pañimil, i mach yʌxʌlic laj co an chuqui miʼ mejlel ti ujtel muʼ bʌ i mejlel i qʼuextan laj cuxtʌlel. Pero miʼ ñʌchʼchocon lac pusicʼal cheʼ la cujil chaʼan miʼ mejlel laj cʼajtiben i coltaya Jehová. Ti jiñi yambʌ estudio tsaʼ laj cʼajtesa chaʼan Jehová jiñʌch jiñi cuxul bʌ Dios i chaʼan tiʼ pejtelel ora yaʼʌch an chaʼan miʼ coltañonla. Cheʼ jajayajl mi laj qʼuel bajcheʼ miʼ coltañonla, mi lac ñumen ñop chaʼan «cuxul lac Yum», cheʼ bajcheʼ tsiʼ yʌlʌ David yaʼ ti Salmo 18:46 (pejcan). Pero ti wiʼil, David tsiʼ yʌlʌ chaʼan Jehová jiñʌch jiñi «xajlel». ¿Chucoch tsiʼ yʌlʌ chaʼan Dios lajal bajcheʼ xajlel, cheʼ jiñi xajlel mach cuxulic?

2. ¿Chuqui mi caj laj qʼuel ti ili estudio?

² Ti ili estudio mi caj laj qʼuel chucoch jiñi Biblia miʼ yʌl chaʼan Jehová lajal bajcheʼ xajlel i chuqui miʼ pʌsbeñonla tiʼ tojlel. Cheʼ jaʼel, mi caj laj qʼuel bajcheʼ mi lac sujtesan Jehová ti lac Xajlel. I tiʼ yujtibal, mi caj laj qʼuel bajcheʼ tac miʼ mejlel lac lajin jiñi i melbal tac Jehová.

CHUCOCH MIʼ YɅJLEL CHAʼAN JEHOVÁ LAJAL BAJCHEʼ XAJLEL

3. ¿Chucoch miʼ yʌl jiñi Biblia chaʼan Jehová lajal bajcheʼ xajlel? (Qʼuele jiñi dibujo).

³ Jiñi Biblia miʼ yʌl chaʼan Jehová lajal bajcheʼ xajlel chaʼan miʼ coltañonla lac chʼʌmben i sujm chaʼpʼej uxpʼejl i melbal. An xucʼul bʌ wiñicob xʼixicob tsaʼ bʌ i yʌlʌyob chaʼan Jehová lajal bajcheʼ xajlel chaʼan miʼ tajob ti tʼan jiñi utsʼatax bʌ i melbal tac. Jiñi ñaxam bʌ texto baqui miʼ yʌjlel chaʼan Jehová «jiñʌch xajlel» yaʼʌch ti Deuteronomio 32:4. Ti jumpʼejl oración, Ana tsiʼ yʌlʌ chaʼan «maʼanic yambʌ Xajlel, jini jach Dios» (1 S. 2:2). I Habacuc tiʼ sube Jehová: «C Xajlel» (Hab. 1:12). Cheʼ jaʼel, ti Isaías  44:8, Jehová miʼ yʌl: «Xajlelon». Laʼ laj qʼuel uxpʼejl i melbal muʼ bʌ i pʌs chaʼan lajalʌch bajcheʼ xajlel, i bajcheʼ mi lac sujtesan ti «lac Xajlel» (Dt. 32:31).

4. ¿Chucoch miʼ mejlel la cʌl chaʼan Jehová jiñʌch lac putsʼib? (Salmo 94:22).

⁴ Jehová jiñʌch lac putsʼib. Cheʼ bʌ miʼ tilel tsʌts bʌ icʼ jaʼal, an muʼ bʌ i majlelob ti putsʼel tiʼ mal chʼen o tiʼ yebal colem xajlel. Miʼ mejlel la cʌl chaʼan cheʼʌch miʼ yujtel jaʼel cheʼ mi lac ñusan jumpʼejl wocol, mi lac sʌclan laj coltʌntel ti Jehová (pejcan Salmo 94:22). Jin miʼ cʌntañonla, i mach yʌlʌyic chuqui ti wocol mi lac ñusan miʼ mejlel i chaʼ tojʼesan. I mach cojachi, an i yʌlʌ chaʼan mi caj i jisan pejtelel muʼ bʌ i yʌqʼueñonla lac ñusan wocol o muʼ bʌ i chilbeñonla lac ñʌchʼtʌlel (Ez. 34:25, 26).

5. ¿Chuqui yom mi lac mel chaʼan mi lac sujtesan Jehová ti lac putsʼib?

⁵ Junchajp bajcheʼ mi lac sujtesan Jehová ti lac putsʼib jiñʌch cheʼ mi lac mel oración. Cheʼ bʌ mi lac mel, mi lac taj jiñi «i ñʌchʼtʌlel Dios» muʼ bʌ i cʌntan lac pusicʼal yicʼot lac ñaʼtʌbal (Filip. 4:6, 7). Jiñʌch tsaʼ bʌ ujti tiʼ tojlel Artiom, tsaʼ bʌ otsʌnti ti cárcel tiʼ caj i ñopbal. Cheʼ yaʼan ti cárcel, tsaʼ wen pʼumpʼun ticʼlʌnti chaʼan miʼ yʌl chuqui yujil. Jiñi hermano miʼ yʌl: «Jajayajl mic pʌjyel majlel chaʼan mij cʼajtibentel chuqui cujil, miʼ wen tejchel c bʌqʼuen. [ . . . ] Tiʼ pejtelel ora tsaʼ c melbe oración Jehová chaʼan mij cʼajtiben c ñʌchʼtʌlel yicʼot c ñaʼtʌbal. Chʌn xucʼul tsaʼ ajñiyon anquese cabʌl chuqui tsiʼ lon mele jiñi investigador […]. Jehová tsaʼʌch i cʌntayon, lajal bajcheʼ jumpʼejl muralla chaʼañon».

6. ¿Chucoch miʼ mejlel lac ñop chaʼan Jehová tiʼ pejtelel ora mi caj i coltañonla? (Isaías 26:3, 4).

⁶ Jehová xucʼul i maʼañic miʼ wis cʌyonla. Lajal bajcheʼ jumpʼejl colem xajlel o jumpʼejl wits maʼañic miʼ ñijcan i bʌ yaʼ baqui an, la cujil chaʼan Jehová tiʼ pejtelel ora yaʼ mi caj i yajñel chaʼan mi ʼ coltañonla. Miʼ mejlel lac ñop tiʼ tojlel come jiñʌch jiñi «Xajlel am bʌ tiʼ pejtelel ora» (pejcan Isaías 26:3, 4, TNM). a Come Jehová cuxul tiʼ pejtelel ora mi caj i tsʼʌctesan pejtelel albil bʌ i chaʼan, mi caj i ñʌchʼtañonla yicʼot mi caj i coltañonla. Cheʼ jaʼel, mi lac ñop tiʼ tojlel come xucʼul tiʼ tojlel i wiñicob (2 S. 22:26). Maʼañic baʼ ora mi caj i ñajʌtesan jiñi muʼ bʌ lac mel yicʼot mi caj i yʌqʼueñonla lac majtan (Heb. 6:10; 11:6).

7. ¿Bajcheʼ miʼ coltañonla cheʼ mi lac ñop ti Jehová? (Qʼuele jaʼel jiñi foto).

⁷ Yambʌ bajcheʼ mi lac sujtesan Jehová ti lac Xajlel jiñʌch cheʼ ti jumpʼejl lac pusicʼal mi lac ñop tiʼ tojlel. La cujil chaʼan cabʌlʌch i wenlel cheʼ mi lac jacʼben i tʼan anquese woli (choncol) lac ñusan wocol (Is. 48:17, 18). Cheʼ mi laj qʼuel bajcheʼ miʼ coltañonla mi lac ñumen ñop tiʼ tojlel, i cheʼ bajcheʼ jiñi ñumen chajpʌbilonla chaʼan jiñi ñumen tsʌts tac bʌ wocol. An i tajol mi lac ñusan wocol tac baqui maʼañic majqui yambʌ miʼ mejlel i coltañonla, pero Jehová yaʼʌch an yicʼotonla i maʼañic baʼ ora mi caj i cʌyonla. Juntiquil hermano i cʼabaʼ Vladímir tsiʼ yʌlʌ: «Baqui ñumen lʌcʼʌl tsaʼ cubi c bʌ ti Jehová jiñʌch cheʼ yaʼañon ti cárcel. Tsaʼ j cʌñʌ c ñumen  ñop tiʼ tojlel come c bajñel jach i maʼañic chuqui miʼ mejlel c mel chaʼan mij qʼuextan bajcheʼ añon».

8. a) ¿Chucoch miʼ mejlel la cʌl chaʼan Jehová maʼañic miʼ qʼuextʌyel? b) ¿Bajcheʼ miʼ mejlel lac sujtesan Jehová bajcheʼ lac Xajlel? (Salmo 62:6, 7).

⁸ Jehová maʼañic miʼ qʼuextʌyel. Jehová lajal bajcheʼ jumpʼejl colem xajlel o jumpʼejl wits maʼañic bʌ miʼ qʼuextʌyel. Maʼañic miʼ qʼuextʌyel bajcheʼ yilal i melbal (chaʼlibal) yicʼot yom tac bʌ i mel (Mal. 3:6). Cheʼ bʌ Adán yicʼot Eva tsiʼ yʌcʼʌyob i bʌ tiʼ contra, Jehová maʼañic tsiʼ qʼuexta jiñi yom bʌ chaʼan ili pañimil. Jiñi apóstol Pablo tsiʼ yʌlʌ jaʼel chaʼan Jehová «maʼañic miʼ mejlel i wʌlʌc contrajin i tʼan» (2 Tim. 2:13). Ili yom i yʌl chaʼan mach yʌlʌyic chuqui miʼ yujtel o chuqui miʼ melob yañoʼ bʌ, maʼañic baʼ ora mi caj i qʼuextan bajcheʼ yilal i melbal, jiñi yom bʌ i mel yicʼot jiñi i mandar tac. Cheʼ la cujil iliyi miʼ coltañonla lac ñumen ñop chaʼan mi caj i coltañonla cheʼ bʌ mi lac ñusan wocol yicʼot chaʼan mi caj i tsʼʌctesan pejtelel albil bʌ i chaʼan (pejcan Salmo 62:6, 7).

9. ¿Chuqui maʼ cʌn tiʼ tojlel Tatiana?

⁹ Yambʌ muʼ bʌ i mejlel i coltañonla chaʼan mi laj qʼuel Jehová bajcheʼ lac xajlel jiñʌch cheʼ chʌn cʼajal lac chaʼan jiñi i melbal tac yicʼot jiñi ñaʼtʌbil bʌ i mel chaʼan ili pañimil. Jiñʌch muʼ bʌ caj i coltañonla chaʼan maʼañic mi lac sʌt lac ñʌchʼtʌlel yicʼot chaʼan xucʼul mi la cajñel cheʼ mi lac ñusan tsʌts tac bʌ wocol (Sal. 16:8). Jiñʌch tsaʼ bʌ ujti tiʼ tojlel Tatiana. Jiñi añoʼ bʌ i yeʼtel tiʼ subeyob chaʼan maʼañic mi caj i mejlel ti loqʼuel tiʼ yotot, jiñi hermana tsiʼ yʌlʌ: «C bajñel jach tsaʼ subentiyon ajñel. [ . . . ] Ti ñaxan wen wocolʌch tsaʼ c ñusa, an i tajol wen chʼijyemon tsaʼ cubi c bʌ». Pero tsaʼ bʌ i colta chaʼan miʼ ñusan majlel jiñi wocol jiñʌch cheʼ tsaʼ caji i ñaʼtan Jehová yicʼot jiñi muʼ bʌ caj i mel ila ti pañimil. Miʼ bej al: «Cheʼ bajcheʼ jiñi tsaʼ mejli j cʼajtesan chaʼan woli c ñusan jiñi wocol come mij cʼuxbin Jehová yicʼot com c mel chuqui miʼ mulan. Jiñʌch am bʌ i coltayon chaʼan maʼañic mij cʌlʌx ñaʼtan c bʌ».

10. ¿Chuqui mi caj i coltañet chaʼan maʼ sujtesan Jehová ti a Xajlel?

¹⁰ Mach jalix yom chaʼan miʼ tilel ñumen tsʌts tac bʌ wocol i yom mi caj lac pʌs chaʼan mi lac ñop Jehová ti jumpʼejl lac pusicʼal. Jin chaʼan, cʼʌlʌl ili ora yom mi lac ñumen ñop chaʼan Jehová mi caj i yʌqʼueñonla i cʼʌjñibal bʌ lac chaʼan chaʼan mi lac lʌtʼ yicʼot chʌn xucʼul mi la cajñel. ¿Bajcheʼ miʼ mejlel lac mel? Jiñʌch cheʼ mi lac pejcan jiñi relato tac am bʌ ti Biblia yicʼot i experiencia jiñi hermanojob ili ora. Wen ñaʼtan chuqui tac tsiʼ ñusayob i wen qʼuele bajcheʼ Jehová tiʼ pejtelel ora an i pʌsʌ chaʼan jiñʌch jiñi xajlel cheʼ an i colta i wiñicob chaʼan miʼ lʌtʼob jiñi wocol tac. Jiñi mi caj i coltañet chaʼan maʼ sujtesan Jehová ti a Xajlel.

LAʼ LAC LAJIN JIÑI I MELBAL TAC JEHOVÁ

11. ¿Chucoch weñʌch cheʼ mi lac lajin Jehová? (Qʼuele jaʼel jiñi recuadro « Jumpʼejl meta chaʼan jiñi xcolelob»).

¹¹ Tsaʼix laj qʼuele chucoch miʼ mejlel la cʌl chaʼan Jehová lajal bajcheʼ xajlel. Wʌle mi caj laj qʼuel bajcheʼ miʼ mejlel lac lajin. Mi mucʼʌch lac  ñumen chaʼlen wersa lac lajin Jehová, mi caj i mejlel lac ñumen coltan jiñi hermanojob. Jumpʼejl ejemplo, Jesús tsiʼ yotsʌbe i cʼabaʼ Simón bajcheʼ Cefas (ti griego Pedro, ili yom i yʌl «xajlel») (Juan 1:42). Cheʼ bajcheʼ jiñi tsiʼ yʌcʼʌ ti ñaʼtʌntel chaʼan Pedro mi caj i ñuqʼuesʌben i pusicʼal jiñi hermanojob yicʼot mi caj i pʼʌtʼesañob chaʼan chʌn xucʼul miʼ yajñelob. Jiñi Biblia miʼ yʌl jaʼel chaʼan jiñi ancianojob lajalob bajcheʼ «lechʼel bʌ xajlel» muʼ bʌ i yʌcʼ axñal come miʼ cʌntañob jiñi hermanojob (Is. 32:2). Tiʼ sujm, ti lac pejtelel miʼ mejlel lac lajin Jehová i mi laj coltan chaʼan chʌn pʼʌtʌl miʼ yajñel jiñi congregación (Efes. 5:1).

12. ¿Bajcheʼ miʼ mejlel laj coltan jiñi hermanojob?

¹² Laʼ laj coltan jiñi hermanojob cheʼ bʌ miʼ ñusañob wocol. Mi jiñi hermanojob miʼ ñusañob wocol tiʼ caj butʼjaʼ, guerra o yan tac bʌ, miʼ mejlel la cotsañob ti la cotot. Ti ili cojix tac bʌ qʼuin jiñi wocol tac woli (yʌquel) i ñumen tsʌtsʼan majlel, jin chaʼan cabʌl bajcheʼ mi caj i mejlel laj coltan lac bʌ (2 Tim. 3:1). Yambʌ bajcheʼ miʼ mejlel laj coltan jiñi hermanojob jiñʌch cheʼ mi lac ñuqʼuesʌbeñob i pusicʼal yicʼot mi lac pʌsbeñob laj cʼuxbiya. Jumpʼejl ejemplo, cheʼ bʌ jiñi hermanojob miʼ cʼotelob ti tempa bʌ la com lac pejcañob yicʼot mi lac ñuqʼuesʌbeñob i pusicʼal. Cheʼ bajcheʼ jiñi mi la cʌqʼueñob i yubin chaʼan mucʼʌch i cʼuxbintelob. Jiñi lac piʼʌlob maʼañic miʼ chʌn pʌsob cʼuxbiya, jin chaʼan cheʼ bʌ jiñi hermanojob miʼ yajñelob ti tempa bʌ la com la cʌqʼueñob i yubin chaʼan mi laj qʼuelob ti ñuc yicʼot chaʼan mucʼʌch laj cʼuxbiñob.

13. ¿Chuqui miʼ mejlel i melob jiñi ancianojob chaʼan miʼ coltañob jiñi hermanojob? (Qʼuele jaʼel jiñi foto).

¹³ Jiñi ancianojob miʼ coltañob jiñi hermanojob cheʼ bʌ miʼ ñusañob wocol. Cheʼ bʌ an chuqui miʼ yujtel, jiñi ancianojob ti ora miʼ qʼuelob chuqui miʼ mejlel i melob chaʼan miʼ coltañob jiñi hermanojob. Cheʼ jaʼel miʼ cʼʌñob jiñi Biblia chaʼan miʼ coltañob. Mi jiñi hermanojob yujilob chaʼan juntiquil anciano uts, miʼ chʼʌmbeñob  i sujm yicʼot mucʼʌch i ñʌchʼtañob mi caj i mulañob i cʼajtibeñob coltaya. Ili melbalʌl tac miʼ yʌqʼueñob i yubin jiñi hermanojob chaʼan mucʼʌch i cʼuxbintelob i mach wocolic mi caj i yubiñob chaʼan miʼ jacʼob baqui jach bʌ ticʼojel (1 Tes. 2:7, 8, 11).

14. ¿Chuqui miʼ mejlel lac mel chaʼan jiñi yambʌlob mucʼʌch i ñopob ti lac tojlel?

¹⁴ Laʼ lac pʌs chaʼan miʼ mejlel i ñopob ti lac tojlel. Tiʼ sujm, ti lac pejtelel la com chaʼan jiñi yambʌlob yujilob chaʼan yaʼʌch mi caj la cajñel yicʼotob tiʼ pejtelel ora, ñumento cheʼ bʌ wocol woliʼ ñusañob (Pr. 17:17). Pero ¿chuqui miʼ mejlel lac mel chaʼan miʼ ñopob ti lac tojlel? Miʼ mejlel lac chaʼlen wersa lac lajin i melbal tac Jehová. Jumpʼejl ejemplo, yom mi lac tsʼʌctesan lac tʼan yicʼot yom puntualonla (Mat. 5:37). Cheʼ jaʼel, mi la cujil chaʼan an majqui yom coltʌntel, laʼ lac suben chaʼan mi laj coltan. I mi an chuqui mi lac subentel lac mel, laʼ lac mel cheʼʌch bajcheʼ tsaʼ subentiyonla.

15. ¿Baqui bʌ i wenlel cheʼ mucʼʌch i mejlel lac ñop tiʼ tojlel jiñi ancianojob?

¹⁵ Jiñi ancianojob cheʼ bʌ yilalob i melbal bajcheʼ ili miʼ wen coltañob jiñi congregación. Jumpʼejl ejemplo, jiñi hermanojob wen cʌntʌbil  miʼ yubiñob i bʌ cheʼ bʌ juntiquil anciano miʼ pʌs chaʼan bajcheʼ jach ora miʼ mejlel ti pejcʌntel. Cheʼ jaʼel, cheʼ bʌ joy ora chajpʌbilob chaʼan miʼ coltañob jiñi hermanojob, miʼ yʌqʼueñob i yubin chaʼan mucʼʌch i cʼuxbintelob. I cheʼ bʌ chuculʌch ti Biblia yicʼot ti lac jun tac jiñi ticʼojel tac muʼ bʌ i yʌcʼob, jiñi hermanojob miʼ ñumen ñopob tiʼ tojlel. I cheʼʌch miʼ yujtel jaʼel cheʼ bʌ mucʼʌch i tsʼʌctesañob i tʼan i maʼañic miʼ luʼ alob chuqui yujilob tiʼ tojlel yañoʼ bʌ.

16. ¿Baqui bʌ i wenlel cheʼ maʼañic mi la cʌcʼ chaʼan an chuqui miʼ ñijcañonla?

¹⁶ Laʼ lac mel chuqui wem bʌ miʼ qʼuel Jehová. Mi mucʼʌch lac jacʼben i tʼan Jehová yicʼot mi lac chʼʌm ti ñuc jiñi principio tac tiʼ pejtelel chuqui mi lac mel, mi caj laj cʌcʼ wem bʌ ejemplo. Cheʼ bʌ mi lac pejcan jiñi Biblia yicʼot mi lac pʼʌtʼesan lac ñopoñel ti Jehová, chʌn xucʼul mi caj la cajñel. Maʼañic mi caj laj cʌcʼ lac bʌ ti lotintel ti jiñi mach bʌ i sujmic i cʌntesa ili pañimil (Efes. 4:14; Sant. 1:6-8). Come mi lac ñop Jehová yicʼot jiñi albil tac bʌ i chaʼan miʼ ñʌchʼchocon lac pusicʼal cheʼ bʌ mi lac subentel mach bʌ weñic o an chuqui miʼ yujtel (Sal. 112:7, 8). I cheʼ jaʼel, miʼ mejlel laj coltan jiñi woli bʌ i ñusañob wocol (1 Tes. 3:2, 3).

17. ¿Chuqui yom miʼ melob jiñi ancianojob chaʼan jiñi hermanojob chʌn pʼʌtʌl miʼ yajñelob?

¹⁷ Jiñi ancianojob yom pʼisbil jach ti chuqui miʼ melob, yom añob wem bʌ i ñaʼtʌbal, maʼañic miʼ tsʌtsʼesañob i bʌ tiʼ tʼan yicʼot toj bajcheʼ chumulob. Cheʼ mucʼʌch i chucob i bʌ «ti jiñi xucʼul bʌ tʼan» miʼ coltañob jiñi congregación chaʼan pʼʌtʌl miʼ yajñel (Tito 1:9; 1 Tim. 3:1-3). Cheʼ bʌ miʼ yʌcʼob wem bʌ ejemplo i miʼ cʌntan jiñi hermanojob miʼ coltañob chaʼan maʼañic miʼ cʌyob tempa bʌ, subtʼan yicʼot chaʼan miʼ chaʼleñob estudio. I cheʼ bʌ miʼ ñusañob wocol tac muʼ bʌ i yʌcʼob ti pensar, jiñi ancianojob miʼ cʼajtesʌbeñob chaʼan yom miʼ ñopob Jehová yicʼot muʼ bʌ caj i mel ti talto bʌ qʼuin.

18. ¿Chucoch la com lac chʼujutesan Jehová yicʼot lʌcʼʌl mi la cajñel tiʼ tojlel? (Qʼuele jiñi recuadro « Junchajp bajcheʼ miʼ mejlel a lʌcʼtesan a bʌ ti Jehová»).

¹⁸ Cheʼ tsaʼix laj qʼuele jiñi utsʼatax bʌ i melbal tac Jehová cheʼʌch mi la cubin lac bʌ bajcheʼ jiñi rey David cheʼ bʌ tsiʼ yʌlʌ: «Laʼ chʼujutesʌntic lac Yum. Jiñʌch Xajlel» (Sal. 144:1). Miʼ mejlel lac ñop Jehová tiʼ pejtelel ora. Cʼʌlʌl cheʼ bʌ ñoxoñixla mi caj i coltañonla chaʼan chʌn lʌcʼʌl mi lac bej ajñel tiʼ tojlel. Ti lac pejtelel miʼ mejlel la cʌl tiʼ tojlel Jehová: «Jiñʌch c xajlel» (Sal. 92:14, 15).