1. Hnei Dravita hna aceitunë Iehova me nemen ngöne Salamo 18:46?

 EASA mel ngöne la fen laka, tru la itre jol ka saze la mele së. Easa olene koi Iehova, ke Nyidrëti palahi a xatua së! Ame ngöne lo tane mekun ka ase hë, hne së hna ce wange ka hape, Nyidrëti hi la Akötresie ka mel nge aja i Nyidrëti palahi troa xatua së. Nge ame la easa öhne ka hape, Nyidrëti a xatua së, ke kola acatrene la mejiune së laka, Akötresie “ka mele Iehova!” (E jë la Salamo 18:46.) Thupene lai, hnei Dravita hna hë Nyidrëti ka hape, “Giting.” Pine nemene matre hnei Dravita hna aceitunë Iehova, Akötresie ka mel memine la git?

2. Hnauëne laka, loi e tro sa atre la kepin matre Dravita a hë Iehova ka hape, “Giting”?

² Ame ngöne la tane mekune celë, tro sa ce wange la kepine matre kola hë Iehova ka hape, git, memine la hna ini së göi Nyidrë. Ketre, tro sa ce wange la nyine tro sa kuca, matre goeë Nyidrë ceitu me Giti së. Nge tro mina fe sa ce wange la aqane tro sa nyitipun la itre thiina ka amaman ka hape, ame Nyidrë ke git.

HNAUËNE LA KOLA HË IEHOVA KA HAPE GIT

3. Hnauëne la Tusi Hmitrötr a aceitunë Iehova memine la “git”? (Wange icetrön.)

³ Tusi Hmitrötr a aceitunë Iehova memine la “git” matre xatua së troa atre hnyawa la pengöi Nyidrë. Ame la kola qeje Nyidrë ka hape, git, ke göne matre atrunyi Nyidrë me amamane ka hape, pëkö sai Nyidrë. Kolo petre hi a hane hë Iehova ka hape, “Git” ngöne Dreuteronomi 32:4. Hnei Hana hna thith ka hape, “pëkö git ka catr tune la Akötresi së.” (1 Sam. 2:2) Hnei Habakuka fe hna hë Iehova ka hape, “Git.” (Habak. 1:​12) Nge hnene la atre cinyihane la Salamo  73 hna hë Nyidrëti ka hape, “giti ne la hning.” (Sal. 73:26) Ketre, hnei Iehova hna qeje Nyidrëti kö ka hape, hugit. (Isa. 44:8) Tro sa ce wange la köni kepin, matre kola aceitunë Iehova, me git me aqane tro sa goeë Nyidrë ceitu me ‘Giti së.’​—Dreut. 32:31.

4. Pine nemen matre Iehova la hnë zae së? (Salamo 94:22)

⁴ Iehova la hnë zae. Ame ngöne la ijine wene, easa canga kötre zae fene la hugit. Ketre tun, Iehova a thupë së la kola traqa la itre jol ngöne la mele së. (E jë la Salamo 94:22.) Nyidrëti a xatua së matre tro palahi a catre la imelekeu së me Nyidrë, nge tha tro kö la itre jol a akötrë së palua. Nge ase hë Nyidrëti qaja ka hape, tro kö Nyidrëti a apatren elany la itre ewekë ka thë la tingeting me akötrë së.​—Ezek. 34:​25, 26.

5. Nemene la nyine tro sa kuca matre tro Iehova a Hnë Zae së?

⁵ Tro Iehova a Hnë Zae së, e tro sa thithi koi Nyidrë. Nge tro Nyidrëti lai a hamë së la “tingetinge” i Nyidrë ka troa thupëne la hni me mekuna së. (Fil. 4:​6, 7) Tro sa ce wange la hna melëne hnei Artem, ketre trejin trahmany hna akalabusin, pine la lapaune i angeic. Ame lo angeic ngöne la kalabus, hnene la ketre polis hna lapa thaipië angeic me axounyi angeic. Öni angeic, “Ame la kola hë ni hnene lai polis cili, ke eni a xou. . . . Matre eni a canga thith koi Iehova. Eni a sipo Nyidrë troa akeukawane la hning me hamë ni la inamacan. Pëkö thangane koi ni la itre nyinyithiina ne lai polis. . . . Hnei Iehova hna xatua ni, matre kösë hetre itraetë qëmekeng.”

6. Pine nemene matre easa mejiune koi Iehova? (Isaia 26:​3, 4)

⁶ Iehova la Atre nyine tro sa mejiune kow. Ame la git, ke tha ka enienije kö, matre tui Iehova, tro palahi Nyidrëti a ce me easë. Easa mejiune koi Nyidrë, ke Nyidrëti la “giti ka epine palua.” (E jë la Isaia 26:​3, 4.) Pine laka Akötresie ka mele Iehova, tro palahi Nyidrëti a eatrëne la hnei Nyidrëti hna qaja me drenge la itre thithi së, me xatua së ngöne la nyipi ijin. Ketre, easa mejiune koi Nyidrë, ke ka nyipici Nyidrë kowe la itre hlue i Nyidrë. (2 Sam. 22:26) Tha tro pi kö Nyidrëti a thëthëhmine la itre huliwa së, nge tro kö Nyidrëti a amanathithi së.​—Heb. 6:​10; 11:6.

7. Nemene la hne së hna troa öhne e tro sa mejiune koi Iehova? (Wange ju fe la iatr.)

⁷ Easa goeë Iehova ceitu me Giti së la easa mejiune koi Nyidrë. Xecie koi së laka, e tro sa drengethenge Nyidrë qëmekene la itre jol, tro së lai a kepe thangane ka loi. (Isa. 48:​17, 18) Ame la easa öhne la ixatua Iehova, ke kola acatrene catrëne la mejiune së koi Nyidrë. Ame cili xecie koi së laka, Iehova hmekuje hi la ka atreine xatua së ngöne la nöjei pengöne jol. Matre ame la easa qëmek kowe la ketre itupath laka, pëkö ka atreine xatua së, easa öhne e cili laka, ce Iehova palahi me easë. Celë hi hna öhne hnei Vladimir hna akalabusin pine la lapaune i angeic. Öni  angeic, “Ame la ijine kola akalabusi ni, ke kolo hi lai a catrecatre la lapauneng koi Iehova. Nge pine laka, pëkö nyine tro ni a kuca, matre hnenge hna catre mejiune koi Iehova.”

8. (a) Hnauëne la easa qaja ka hape, tha ka saze kö Iehova? (b) Nemene la itre eloin e tro sa goeë Akötresie ceitu me Giti së? (Salamo 62:​6, 7)

⁸ Tha ka saze kö Iehova. Tune la git ka catr nge ka tha enij, tha ka saze kö la pengö i Iehova me aja i Nyidrë. (Mala. 3:6) Ame la Adramu me Eva a ena la wathebo, tha hnei Iehova kö hna saze la aja i Nyidrë kowe la itre atr. Tune la hna qaja hnei Paulo aposetolo, “thatreine kö [Iehova] thoi koi nyidrëti kö.” (2 Tim. 2:​13) Kolo lai a hape, ngacama kuca ju hë së la nöjei ewekë, ngo tha tro pi kö a saze la pengö i Nyidrë me aja i Nyidrë. Nge ka nyipici palahi Nyidrë kowe la itre trepene meköti Nyidrë. Haawe, catre jë së mejiune kowe la Akötresi së ka tha saze kö, ke atre hi së laka, tro kö Nyidrëti a xatua së ngöne la itre ijine jol.​—E jë la Salamo 62:​6, 7.

9. Nemene la hne së hna inine qa ngöne la hna melëne hnei Tatyana?

⁹ Easa goeë Iehova ceitu me Giti së, la easa lapa mekune la pengö i Nyidrë memine la aja i Nyidrëti koi së. Tro hë së lai a tingeting me mele nyipici ngöne la itre itupath. (Sal. 16:8) Celë hi hna öhne hnei Tatyana, ketre trejine föe hna akalabusin pine la lapaune i angeic. Öni angeic,“Eni cas pe hi. Jole catre koi ni lo xötrei. Eni palahi a dekurag.” Ngo ame hë la Tatyana a trotrohnine ka hape, hna akalabusi angeic pi Iehova memine la aja i Nyidrë, ke tingetinge pi hi la hni angeic nge hetre trengecatre i angeic hmaca jë. Öni angeic: “Kola traqa koi ni la itre jole cili, ke eni a nyihlue Iehova. Celë hi ka xatua ni troa lapa tingeting me mele nyipici.”

10. Nemene la nyine tro sa kuca enehila matre tro Iehova a Giti së?

¹⁰ Easenyi hë tro sa cile kowe la itre itupath, matre nyipiewekë tro sa catre mejiune koi Iehova. Enehila hi la ijine tro sa acatrene la mejiune së laka, tro kö Iehova a hamë së la ka nyipiewekë, matre mele nyipici koi Nyidrë. Troa tune kaa? E jë la itre hna melëne hnene la itre hlue i Iehova ekö e hnine la Tusi Hmitrötr, me itre hna melën hnene la itre hlue i Iehova enehila. Thele jë la aqane amamane Nyidrë ka hape, git Nyidrë koi angatr. Lapa mekune jë la itre hna melëne cili. Tro hë Iehova lai a Giti së.

NYITIPU IEHOVA JË, GITI SË

11. Hnauëne la tro sa nyitipun la itre thiina i Iehova? (Wange ju fe la hna eköhagen “ Itre Objectif Kowe La Itre Trejin Nekötrahmany.”)

¹¹ Hne së hna ce wange la itre kepin matre Iehova la giti së. Tro pena sa ce wange la aqane tro sa nyitipu Nyidrë. Maine tro sa nyitipu Nyidrë, tro së lai a atreine acatrene la ekalesia. Hnei Iesu hna ati ëjei Simona ka hape, Kefa (kola hape “Peteru”),  nge ame la aliene la ëje i angeic, ke “Wene Etë.” (Ioa. 1:​42) Kola ati ëjei angeice tun, ke tro angeic a akeukawane la ekalesia me xatua ej. Hna aceitunëne la itre qatre thup me “ga xapo ne la giti atraqate.” Kola aceitunë angatre tun, ke angatr a thupëne la itre ekalesia. (Isa. 32:2) Kola acatrene la ekalesia, la itre trejin a nyitipun la itre thiina i Iehova.​—Efe. 5:1.

12. Nemene la itre aqane tro sa hnë kötre zae kowe la itre trejin.

¹² Xatuane jë la itre trejin ngöne la ijine jol. Ame la itre trejin a pë hnalapa hnene la itre isi maine ketre hulö, ijije hi tro sa hnë zae angatr. Tune kaa? Troa hë angatr kowe la hnalapa i easë. Pine laka kola ngazo catre la mel ngöne la “itre drai ne la pun”, matre nyipiewekë tro sa itö ixatua. (2 Tim. 3:1) Ketre, ijiji së fe troa hnë kötre zae kowe la itre trejin ngöne la easa akeukawanyi angatr me hnimi angatr. Loi e tro sa kepe angatre hnyawa la angatr a traqa kowe la Uma Ne Baselaia. Aqane tro hi së lai a acatrene la ihnim me madrin ngöne la ekalesia. Easa mel ngöne la fen ka ngazo me jol. Celë hi matre, ame la itre trejin a sine la itre icasikeu, easa kuca asë la hne së hna atrein, matre amamane la ihnimi së me ithuecatre koi angatr.

13. Tune kaa la aqane tro la itre qatre thup a hnë kötre zae kowe la itre trejin? (Wange ju fe la iatr.)

¹³ Itre qatre thup la hnë zae kowe la itre trejin ka cil kowe la nöjei pengöne jol. Ame la kola traqa la hulö maine wezipo la ketre trejin, itre qatre thup a canga hamë ixatua. Angatre fe a hamëne la itre ithuecatr qa hnine la Tusi Hmitrötr. Tro hi la itre trejin a sipo ixatua kowe la qatre thup ka menyik, me ihnim, me ka atreine dreng. Ketre canga tro hi la itre trejin a kapa la itre ihaji hna hamën hnene la qatre thup ka amamane la itre thiina cili.​—1 Thes. 2:​7, 8, 11.

14. Nemene la nyine tro sa kuca matre tro la itre xan a mejiune koi së?

 ¹⁴ Loi e troa mejiune koi eö. Easa ajane tro la itre xan a mejiune koi së, ngöne la itre ijine jol. (It. Ed. 17:17) Nemene la nyine tro sa kuca, matre tro la itre xan a mejiune koi së? Isine jë troa huliwane la itre thiina i Iehova. Tune kaa? Troa eatrëne la itre hne së hna sisiny me metrötrëne la hawa. (Mat. 5:​37) Maine easa drenge ka hape, ketre a aja ixatua, the cile kö së hamë ixatua. Ketre, isine jë së troa eatrëne la itre hnëqa hna athip koi së, thenge la itre hna amekötin.

15. Nemene la itre thangane ka loi kowe la ekalesia, la itre qatre thup a amamane ka hape, ijiji hi troa mejiune koi angatr?

¹⁵ Tru la itre thangane ka loi kowe la ekalesia, la itre qatre thup a amamane ka hape, ijije hi tro sa mejiune koi angatr. Kola hapeu lai? Tro la itre trejin a mejiun kowe la itre qatre thup, tune la ka thupëne la gurup ne cainöj, la nyidrëti a canga sa la telefon ngöne la angatr a hë. Ketre, drenge hi angatr la ihnimine la itre qatre thup, la itre qatre thup a canga xatua angatr. Kola acatrene la mejiune i angatr kowe la itre qatre thup, la itre qatre thup a haji angatr jëne la  Tusi Hmitrötr me itre itusi së, ngo tha thenge kö la itre sipu mekuna i angatr. Ketre, tro la itre trejin a mejiun kowe la itre qatre thup, ke tha angatre kö a qaja la mel ne la itre xaa trejin maine iqajakeune la itre hna qaja acony koi angatr. Ketre ame la hnei angatr hna qaja, ke angatr a isine troa eatrën.

16. Nemene la thangane ka loi koi së me koi itre xan, e tro palahi sa kuca la meköt?

¹⁶ Tro palahi eö a kuca la meköt. Maine tro palahi sa isine troa kuca la meköt me axecië mekun thenge la itre trepene meköti Iehova, tro lai a hetre thangane ka loi kowe la itre trejin. Maine tro sa inine la Tusi Hmitrötr me acatrene la lapaune së, tro hë së lai a catr ngöne la nyipici. Tha tro kö së lai a luelu, nge tha tro kö a akeinyi së hnene la itre ini thoi maine mekuna i fen. (Efe. 4:​14; Iako. 1:​6-8) Nge ame la easa kapa la itre maca ka ngazo, tro la lapaune së koi Iehova me kowe la itre hnei Nyidrëti hna thingehnaean a xatua së troa lapa tingeting. (Sal. 112:​7, 8) Ketre, atreine hë së xatuan la itre ka cil kowe la itre jol.​—1 Thes. 3:​2, 3.

17. Nemene la ka aijijëne la itre qatre thup troa xatuane la ekalesia?

¹⁷ Nyipiewekë tro la itre qatre thup a atreine tulu ewekë me waiewekë, nge tha angatre kö a catre fë mekun. Angatr a “qale catre kowe la trengewekë ne nyipici,” nge celë hi ka xatuane la ekalesia troa tingeting me lapaune koi Iehova. (Tito 1:9; 1 Tim. 3:​1-3) Jëne la tulu me itre huliwa i angatr ngöne la ekalesia, angatr a xatuane la itre trejin troa catre sine la itre icasikeu, me cainöj me ini Tusi cas. Ame la ketre trejin a cile kowe la itre jol, itre qatre thup a xatua angeic troa goeë catrë Iehova me itre hnei Nyidrëti hna thingehnaean.

18. Pine nemene matre aja së troa atrunyi Iehova me lapa qale koi Nyidrë? (Wange ju fe la hna eköhagen “ Aqane Tro Sa Easenyi Iehova.”)

¹⁸ Thupene la hne së hna ce wange la itre xaa thiina ka mingöminge i Iehova, easa pi tui Dravita me qaja ka hape: “Loi e troa atrunyi Iehova, la Giting.” (Sal. 144:1) Loi e tro palahi sa mejiun koi Iehova. Xecie koi së laka, tro palahi Iehova a xatua së troa lapa qale koi Nyidrë, ngacama easa utipië trootro. Haawe, ijiji easë fe troa qaja ka hape: “Nyidrëti la Giting.”​—Sal. 92:​14, 15.