1. Fa David kai Yehofa aini Psalm 18:46?

 SON leisi den polobelema di e miti u, e meke a libi e taanga gi u. Den sa kengi u libi wanboowanboo tu. Neen meke ai bigi gi u taki Yehofa de kabakaba fu yeepi u. Aini a artikel di pasa u be si taki Yehofa a wan Gadu di de a libi, ala yuu a de kabakaba fu yeepi u. We biibi taki ‘Yehofa de a libi’ te u meke moiti fu si den fasi fa ai yeepi u (Leisi Psalm 18:46.). Baka di David taki Gadu de a libi, neen a taki, Gadu a ‘mi siton mongo’ San David be wani taki di a taki, Gadu na a siton mongo fi en?

2. Saide a bun fu kon sabi saide David kai Yehofa ‘mi siton mongo’?

² Aini a artikel ya, wo si saide den taki Yehofa de enke wan siton mongo anga saw sa leli fu a sani ya. Wo luku saide u sa fitoow en. Boiti dati wo si tu faw sa meke moiti fu abi denseefi manii fu Yehofa di e meke a de enke wan siton mongo.

SAIDE DEN E KAI YEHOFA WAN SITON MONGO?

3. Fa Beibel e koboloiki a wowtu ‘siton mongo’ gaanse leisi? (Luku a fowtow a fesise.)

³ Son leisi Beibel e taki Yehofa de enke wan siton mongo. Ai taki a sani ya fu yeepi u fusutan san a wantu fu den manii di Yehofa abi. Gaanse leisi te den sama aini Beibel di be e dini Yehofa e gafa en fu den moin manii di a abi, da den be e taki a de enke wan siton mongo. A fosi peesi aini Beibel pe den e taki fu Yehofa taki ‘en a wan Siton Mongo’ a Deitolonomi 32:4. Di Hana be e begi a be taki: ‘Na a Gadu fu u wawan taanga enke wan siton mongo’ (1 Sam. 2:2). Habakuk be kai Yehofa ‘mi Siton Mongo’ (Hab. 1:12). A sama di sikiifi Psalm 73 be taki, Gadu na ‘a siton mongo di ai fitoow anga en hii ati’ (Ps. 73:26). Boiti dati, Yehofa e kai enseefi wan siton mongo tu (Yes. 44:8). Meke u luku dii manii fu  Yehofa di e meke a de enke wan ‘siton mongo’. Wo si tu fa den sani ya o yeepi u fu fitoow en.​—Deit. 32:31.

4. Saide u sa taki Yehofa de enke wan peesi pe u sa go kibii? (Psalm 94:22)

⁴ Yehofa de enke wan peesi pe u sa go kibii. Leti enke fa wan gaan siton mongo sa kibii wan sama kande te wan gaan alen efu gaan winta e wai, a letiso Yehofa e yeepi u te wi abi polobelema (Leisi Psalm 94:22.). Ai yeepi u fu wi anga en á poli. Ai soi u kiin tu taki den sani di e miti u nownow naw tyai ogii gi u fu ala ten. Ai paamisi u taki aini a ten di e kon aw puu iniiwan sani di e gi u booko-ede efuso di e meke we pina.​—Eseik. 34:25, 26.

5. Fa Yehofa de enke wan siton mongo pe u sa go kibii?

⁵ Wan fasi fa Yehofa sa kibii u te wi abi polobelema, a te we begi en. Te we begi Yehofa, ai gi u ‘a freide fi en’ di e kibii wi ati anga u fusutan (Filip. 4:6, 7). Meke u luku a toli fu Artem, wan baala di den be sooto fu en biibi ede. Di a be de a sitaafu-osu wan sikowtu be e poti akisi gi en naamo, aa be e libi bun anga a baala ya. A be wani meke a baala feele. A baala taki: ‘Ala yuu mi be e booko mi ede te a sikowtu ya be e sende kai mi fu poti akisi gi mi. Neen meke mi be e begi Yehofa, mi be akisi en fu a yeepi mi fu mi á buuya anga fu du sani anga koni’. Winsi san a sikowtu ya be e du tokuso aa be poi booko mi. Yehofa be yeepi mi, a be de enke wan sikotu di de a mi fesi e kibii mi’.

6. Saide u sa fitoow Yehofa ala yuu? (Yesaya 26:3, 4)

⁶ U sa fitoow Yehofa ala yuu. Leti enke fa wan gaan siton mongo á poi komoto a pe a de, a letiso u sa biibi taki ala yuu Yehofa de kabakaba fu yeepi u. U sa fitoow en tu, bika en na ‘a Siton mongo di e tan fu teego’ (leisi Yesaya 26:3, 4.). Fu di a de a libi, fu di a nai dede, meke ala yuu a poi du san a paamisi. A poi aliki den begi fu u. A poi gi wi a yeepi di wi abi fanowdu. U sabi taki Yehofa o yeepi u tu, bika noiti ai gwe fika den sama di e dini en (2 Sam. 22:26). Noiti ai feegete den sani di we du gi en. Aw pai wi tu.​—Heb. 6:10; 11:6.

7. Fa sani o waka te we fitoow Yehofa? (Luku a fowtow tu.)

⁷ Yehofa o de enke wan siton mongo gi u, te we fitoow en. U sabi tu taki wo fende wini efu we fitoow en, winsi son leisi sani á makiliki gi u (Yes. 48:17, 18). Wo moo fitoow Yehofa te we si ala yuu baka taki ai yeepi u. Aw yeepi u fu biibi taki neen na a wan enkii Sama di o poi yeepi u fu holidoo winsi sowtu tesi e miti u. Son leisi we kon si taki sama á poi yeepi u anga son tesi efuso polobelema di wi abi, boiti Yehofa. Wan baala den e kai Vladimir taki: ‘A ten di den be sooto mi, mi be fii taki mi anga Yehofa toon moo bun mati. Mi be leli fu moo fitoow en, bika a ten di mi be de mi wawan neen be de a wan kodo sama di be poi yeepi mi’.

8. (a) Saide u sa taki Yehofa nai kengi? (b) Sowtu wini we fende te Gadu de enke wan Siton mongo gi u? (Psalm 62:6, 7)

 ⁸ Yehofa nai kengi. Leti enke wan gaan bigi siton mongo di nai diipi komoto a pe a de, a letiso Yehofa nai kengi. En manii anga den sani di a abi a pakisei fu du nai kengi (Male. 3:6). Di Adan anga Eva taangayesi Yehofa aini a dyali fu Eden, Yehofa á kengi san a be abi a pakisei fu du gi libisama. Apostel Pawlesi be taki: ‘Ala yuu Yehofa e tyai enseefi enke fa a de tuutuu’ (2 Tim. 2:13). A sani ya wani taki winsi sai pasa efuso winsi san sama e du, noiti Yehofa nai kengi. A naw kengi san a abi a pakisei fu du gi libisama anga a goontapu ya. A naw kengi den weiti fi en fu sama ede. Fu di Yehofa nai kengi, meke u sa biibi taki aw yeepi u te wi abi polobelema, aw du san a paamisi aini a ten di e kon tu.​—Leisi Psalm 62:6, 7.

9. San a toli fu Tatyana e leli u?

⁹ Efu we teke ten pakisei den manii di Yehofa abi anga san a abi a pakisei fu du gi libisama anga a goontapu ya, a sani ya o yeepi u fu si Yehofa enke a siton mongo fuu. Te we du a sani ya aw yeepi u fu wi á buuya, aw yeepi u fu wi á gwe fika Yehofa te tesi e miti u (Ps. 16:8). Na a sani ya be miti wan sisa den e kai Tatyana. Lanti be gi en sitaafu taki aa be mu komoto a osu fi en biibi ede. A sisa ya taki: ‘Mi be e fii enke a mi wawan de. Na a bigin aa be makiliki. Mi be e booko mi ede tu’. Ma di a teke ten pakisei saide den sani ya e miti en anga san Yehofa abi a pakisei gi libisama, a sani ya yeepi en fu si on pelensipali a de fu holidoo te tesi e miti u. A yeepi en fu aa booko en ede moo, a sani ya gi en taanga-sikin tu fu aa gwe fika Yehofa. A sisa ya taki: ‘Di mi kon fusutan saide den sani ya e pasa, a sani ya yeepi mi fu pakisei taki a fu di mi e dini Yehofa ede meke den sani ya e miti mi. A sani ya yeepi mi tu fu fitoow Yehofa.’

10. Fa Yehofa sa de enke u siton mongo?

¹⁰ Aini a ten di e kon u mu moo fitoow Yehofa, bika sani o miti u di o meke a taanga gi u fu holidoo. Neen meke a nownow kaba u mu meke moiti fu moo fitoow Yehofa. U mu biibi tu taki aw yeepi u fu wa gwe fika en winsi sai e miti u. Faw sa du a sani ya? U sa leisi toli aini Beibel anga toli fu sama di e dini Yehofa aini a ten ya. Luku fa Yehofa holibaka gi den sama di e dini en. Teke ten pakisei den toli ya. Te we du den sani ya, den o yeepi u fu si Yehofa enke u siton mongo.

MEKE MOITI FU ABI DEN MANII FU YEHOFA

11. Saide u mu meke moiti fu abi den manii fu Yehofa? (Luku a faki di den e kai ‘ Maiki di yonkuu baala sa poti’)

¹¹ U si den manii fu Yehofa di e meke a de enke wan siton mongo gi u. Ma now wo go luku faw seefi sa meke moiti fu abi den manii ya. Efu u wani gi den baala anga sisa fu u taanga-sikin u mu meke moiti fu abi den  manii fu Yehofa. Yesesi be gi Simon a nen Seifas. Aini Giikitongo a nen ya wani taki Peitilisi. Peitilisi wani taki wan pisi siton (Yohanisi 1:42). Yesesi be gi Peitilisi a nen ya, fu di a be taki Peitilisi be o gi taawan aini a kemeente taanga-sikin. A be o yeepi den fu taanga den biibi tu. Den owluman aini a kemeente de ‘enke a koo fu wan gaan siton’. A sani ya e soi fa den owluman e meke ala moiti fu kibii den baala anga sisa aini a kemeente (Yes. 32:2). Ma winsi fa den owluman e du a sani ya, tokuso na ala u mu meke moiti fu gi useefi taanga-sikin fu kon abi den manii fu Yehofa.​—Efe. 5:1.

12. Faw sa yeepi den baala anga sisa fuu te den abi booko-ede?

¹² Yeepi i baala anga i sisa te den abi booko-ede. Son yuu te gaan ogii pasa a wan peesi efuso feti booko a wan kondee, u mu de kabakaba fu yeepi u baala anga u sisa. Fu di sani e kon moo ogii aini ‘den lasiti dei ya’, meke u mu de kabakaba fu gi den baala anga sisa fuu den sani di den abi fanowdu (2 Tim. 3:1). U sa gi den taanga-sikin, u sa soi den taki u lobi den tu. Wan fasi faw sa du a sani ya, a te we taki anga den te den kon a den komakandaa, u mu toosutu den tu. Te sama kon a den komakandaa fuu den mu fii taki u lobi den. Den mu si den komakandaa fuu enke wan peesi pe den e fende taanga-sikin. Den baala anga sisa fuu sa booko den ede efuso fii enke sama aa lobi den, fu di omen sama aini a ten ya nai libi bun anga taawan. Neen meke te den kon a den komakandaa, u mu meke moiti fu gi den taanga-sikin, u mu soi den taki u lobi den tu.

13. Fa owluman sa toosutu den baala anga den sisa te den abi booko-ede? (Luku a fowtow tu.)

¹³ Owluman sa toosutu baala anga sisa te tesi e miti den. Den owluman e du ala san den poi fu yeepi den baala anga sisa te wan  gaan ogii pasa a wan peesi efuso te den abi dataa yeepi fanowdu. Den e koboloiki a Beibel fu gi den baala anga sisa taanga-sikin tu. Te owluman e taki switi anga taawan, te den lobi aliki efuso te den e meke moiti fu fusutan fa taawan e fii, aw moo makiliki gi baala anga sisa fu go suku yeepi a den. Den manii ya o meke den baala anga sisa fii taki den lobi den, aw moo makiliki gi den tu fu wooko anga den sani di den e taigi den.​—1 Tes. 2:7, 8, 11.

14. Saw mu du efu u wani taawan fitoow u?

¹⁴ U mu de sama di taawan poi fitoow. U wani taawan sabi wi enke sama di den sa fitoow te den abi booko-ede (Odo. 17:17). Sai sa du fu taawan sa fitoow i? U mu meke moiti fu du sani enke Yehofa ala yuu. Wantu fasi faw sa du a sani ya, a te we du saw paamisi anga te we holi useefi naa yuu di u gi a sama (Mat. 5:37). Efu u sabi taki wan sama abi yeepi fanowdu, u sa yeepi den. Boiti den sani ya, u mu meke moiti fu tyai den taa faantiwowtu di u kisi aini a kemeente tu.

15. Sowtu wini den baala anga sisa e fende te den sa fitoow den owluman?

¹⁵ Sowtu wini den baala anga sisa e fende te den sa fitoow den owluman? Te baala anga sisa sabi taki den sa telefon den owluman te den abi den fanowdu, a sani ya e yeepi den fu den á booko den ede tumisi. Den e fii taki den owluman lobi den tu, te den de kabakaba fu yeepi den. Efu den owluman e koboloiki a Beibel anga den taa  buku fu a olikanisâsi fu gi a kemeente leli, a sani ya o meke den baala anga sisa moo fitoow den. Wan taa sani di o meke den fitoow den owluman tu, a te den e holi denseefi a san den paamisi anga te den nai taigi taawan den kibii toli fu den.

16. Sowtu wini wi anga taawan e fende te we du sani enke fa Yehofa wani?

¹⁶ Meke moiti fu du sani ala yuu enke fa Yehofa wani. Efu we aliki Yehofa ala yuu, efu we meke moiti fu wooko anga a Beibel te u mu du wan sani, taawan o man waka aw baka. Te we sutudeli a Beibel anga te we meke moiti fu taanga u biibi, a sani ya o yepi u fu wa gwe fika Yehofa. Aw yeepi u tu fu du san den weiti fi en e taki. Den sani ya o yeepi u fu sabi efu den sani di sama e taki, e kai anga san Yehofa e leli u. Den o yeepi u tu fu sama aa fende u koli (Efe. 4:14; Yak. 1:6-8). Te we yee takuu nyunsu da a fitoow di we fitoow Yehofa anga den sani di a paamisi u, e yeepi u fu wa buuya (Ps. 112:7, 8). Wo poi yeepi taawan tu te tesi e miti den.​—1 Tes. 3:2, 3.

17. Fa owluman sa yeepi den baala anga sisa fu fitoow Yehofa?

¹⁷ Owluman á mu e du sani pasa peesi, den mu de anga kiin fusutan, den á mu e du sani fanyafanya, den á mu e suku fini anga sani tumisi tu. Den man ya e yeepi baala anga sisa fu den á buuya, den e yeepi den fu fitoow Yehofa, den e gi a kemeente taanga-sikin tu fu ‘du sani finifini enke fa a bosikopu di u sa fitoow e soi’ (Titesi 1:9; 1 Tim. 3:1-3). A fasi fa den baala ya e tyai denseefi enke sikapuman e yeepi den baala anga sisa fu go a den komakandaa ala yuu, fu du a peleikiwooko anga fu sutudeli anga denseefi. Te baala anga sisa abi polobelema, owluman sa gi den taanga-sikin fu fitoow Yehofa da den luku go a den sani di a paamisi u.

18. Saide u mu gafa Yehofa? Saide u mu meke moiti fu kon koosube neen? (Luku a faki ‘ wantu fasi faw sa kon moo koosube a Yehofa’.)

¹⁸ Baka di u luku den moin manii di Yehofa abi, da leti enke kownu David useefi sa taki: ‘Meke den gafa Yehofa a Siton-mongo fu mi’ (Ps. 144:1). U sa fitoow Yehofa ala yuu. Winsi u kon gaandi seefi tokuso u sa biibi taki Yehofa o yeepi u fu tan koosube neen. Neen meke useefi sa taki: ‘Neen a mi siton mongo’.​—Ps. 92:14, 15.