1. Sɔgbe xá Ðɛhan 18:46 ɔ, étɛ́ wú Davídi ka sɔ́ Jexóva jlɛ́ dó?

 MǏ ÐO gbɛ nɔ wɛ ɖo gbɛ e mɛ tagba ma ɖó nukún lɛ́ sixú wá xwetɔ́n, bo d’avaja gbɛzán mǐtɔn mɛ, alǒ tlɛ bló bɔ é húzú bǐ mlɛ́mlɛ́ é ɖé mɛ. É su nukún mǐtɔn mɛ tawun ɖɔ mǐ sixú ba alɔdó Jexóva Mawu tɔn. Ðo xóta e wá yi é mɛ ɔ, è flín mǐ ɖɔ Mawu gbɛɖe ɔ wɛ Jexóva nyí, bo nɔ ɖo gbesisɔmɛ hwebǐnu bo ná d’alɔ mǐ. Ényí mǐ mɔ gǔdonɔnúmɛ tɔn ɔ, nǔ énɛ́ e mǐ mɔ kpɔ́n é nɔ vɔ́ gǎnjɛwú ná mǐ ɖɔ “Jexóva ɖo gbɛ!” (Xa Ðɛhan 18:46, nwt.) É ɖo mɔ̌ có, Davídi ɖɔ xó énɛ́ lɛ́ gúdo tlóló é ɔ, é ylɔ́ Mawu ɖɔ “Só” émítɔn. Étɛ́wú é ka sɔ́ Jexóva, Mawu gbɛɖe ɔ jlɛ́ dó nǔ funfúnmaɖoxomɛnánɔ ɖé wú, énɛ́ wɛ nyí só?

2. Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

² Ðo xóta élɔ́ mɛ ɔ, mǐ ná gbéjé nǔ e wú è sɔ́ Jexóva sɔ́ jlɛ́ dó só wú é kpó nǔ e nǔjlɛ́dónǔwú énɛ́ nɔ kplɔ́n mǐ dó wǔ tɔn é kpó kpɔ́n. Mǐ ná lɛ́ kplɔ́n lěe mǐ sixú wa gbɔn bo ná nɔ kpɔ́n ɛ dó mɔ Só mǐtɔn é. Gǔdo mɛ ɔ, mǐ ná ɖɔ xó dó ali ɖěɖěe nu mǐ sixú ɖó jijɔ Jexóva tɔn e zɔ́n bɔ é cí só ɖɔhun é ɖe lɛ́ jí.

NǓ E WÚ È YLƆ́ JEXÓVA ÐƆ SÓ É

3. Nɛ̌ Biblu ka nɔ zán xókwín “só” ɔ gbɔn hwɛhwɛ? (Kpɔ́n akpa ɔ jí é.)

³ Biblu nɔ zán xókwín “só” ɖo nǔjlɛ́dónǔwú linu bo ná dó d’alɔ mǐ bónú mǐ ná tuun jijɔ ɖěɖěe Jexóva ɖó lɛ́ é. Hwɛhwɛ ɔ, é nɔ tɔ́n ɖo akpáxwé ɖěɖěe è kpa susu nú Mawu ɖe, bo xlɛ́ ɖɔ é kún kpé we ó lɛ́ é mɛ. Sɛ́nflínmɛ 32:4 mɛ wɛ è jlɛ́ Jexóva dó “Só” wú ɖe azɔn nukɔntɔn ɔ. Ðo ɖɛ e Ana xo é mɛ ɔ, é ɖɔ: “Awǐnnya ɖě syɛ́n Mawu mǐtɔn ɖɔhun ǎ.” (1 Sam. 2:2) Xabakúku ylɔ́ Jexóva ɖɔ “Só ce.” (Xab. 1:12) Mɛ e wlán Ðɛhan 73​gɔ́ ɔ é ylɔ́ Mawu ɖɔ “sósyɛ́n ce.” (Ðɛh. 73:26) Gɔ́ ná ɔ, Jexóva tlɛ ylɔ́ éɖée ɖɔ só. (Eza. 44:8) Mi nú mǐ ní ɖɔ xó dó jijɔ Jexóva tɔn e zɔ́n bɔ é cí só ɖɔhun é atɔn wú, bo lɛ́ kplɔ́n lěe mǐ sixú sɔ́ ɛ dó ɖó “Só mǐtɔn” gbɔn é.—Sɛ́n. 32:31, nwt.

4. Nɛ̌ Jexóva ka nyí bibɛtɛn ɖé gbɔn? (Ðɛhan 94:22)

⁴ Jexóva nyí bibɛtɛn ɖé. Lěe só ɖaxó ɖé sixú nya ɖo xɛ mɛɖé  jí ɖo jɔhɔn syɛ́nsyɛ́n e ɖo adǎn jí é ɖé nukɔn gbɔn é ɔ, Jexóva nɔ nya xɛ ɖo mǐ jí hwenu e mǐ ɖo ninɔmɛ syɛ́nsyɛ́n lɛ́ ɖí xwi xá wɛ é. (Xa Ðɛhan 94:22.) É nɔ bló bɔ mǐ nɔ nɔ ayijayǐ mɛ, bo nɔ xɔ mǐ ɖo nǔ e sixú zɔ́n bɔ mǐ ná se wǔvɛ́ káká sɔ́yi lɛ́ é sí. Gɔ́ ná ɔ, é lɛ́ dó akpá ɖɔ ɖo sɔgúdo ɔ, émí ná ɖe nǔ ɖěbǔ e sixú ɖó linkpɔ́n, alǒ wǔvɛ́ nú mǐ lɛ́ é síin.—Ezek. 34:25, 26.

5. Nɛ̌ Jexóva ka sixú húzú Bibɛtɛn e cí só ɖɔhun é nú mǐ gbɔn?

⁵ Ali e nu mǐ nɔ sɔ́ Jexóva dó ɖó só mǐtɔn e glɔ́ mǐ nɔ ba bibɛtɛn ɖe é ɖokpó wɛ nyí gbɔn ɖɛ xixo sɛ́dó è gblamɛ. Ényí mǐ xo ɖɛ ɔ, Jexóva nɔ ná mǐ “fífá Mawu tɔn,” éé nɔ nya xɛ ɖo ayi mǐtɔn kpó linlin mǐtɔn lɛ́ kpó jí é. (Filí. 4:6, 7) Ð’ayi nǔ e nɔví súnnu Artem, éé è wlí dó gan mɛ ɖó nǔɖiɖi tɔn wú é mɔ kpɔ́n é wú. Azɔn mɔ̌kpán wɛ nǔdobatɔ́ hunnylámɔnɔ e gbídí kɔ n’i, bo lɛ́ dó winnyá ɛ é kan nǔ byɔ́ ɛ. Artem ɖɔ: “Un nɔ ɖó linkpɔ́n hweɖébǔnu e nǔdobatɔ́ ɔ kan nǔ byɔ́ mì é. . . . Un nɔ xo ɖɛ sɛ́dó Jexóva hwebǐnu. Un nɔ byɔ́ ɛ ɖɔ é ní d’alɔ mì nú má ɖó fífá ayi mɛ tɔn kpó nǔnywɛ́ kpó. Wlɛnwín e nǔdobatɔ́ ɔ zán lɛ́ é ɖu ɖo jǐ ce ǎ. . . . Kpó alɔdó Jexóva tɔn kpó ɔ, é cí ɖɔ awǐnnya ɖaxó ɖé gúdo wɛ un ɖo te ɖe ɖɔhun.”

6. Étɛ́wú mǐ ka sixú gán jɛ Jexóva wú hwebǐnu? (Ezayíi 26:3, 4)

⁶ Mɛ ɖejidéwú wɛ Jexóva nyí. Lěe só ɖe, bo ma nɔ sɛ do ǎ é ɖɔhun ɔ, Jexóva nɔ ɖo fínɛ́ nú mǐ hwebǐnu. Mǐ sixú ɖeji dó wǔ tɔn, ɖó ‘só e ɖo te tɛgbɛ’ é ɖé wɛ é nyí. (Xa Ezayíi 26:3, 4.) É ná ɖo gbɛ hwebǐnu bo ná ɖe akpá tɔn lɛ́, ɖótó ɖɛ mǐtɔn lɛ́, lobo lɛ́ nɔ gǔdo nú mǐ lěe mǐ ɖó hudó tɔn gbɔn é. Mǐ sixú lɛ́ gán jɛ Jexóva wú, ɖó é nɔ nɔ gbejí nú mɛ e nɔ sɛn ɛ lɛ́ é. (2 Sam. 22:26) É ná wɔn nǔ e mǐ nɔ wa lɛ́ é gbeɖé ǎ, é ná dó ajɔ yětɔn mǐ hwebǐnu.—Ebl. 6:10; 11:6.

7. Ényí mǐ gán jɛ Jexóva wú ɔ, étɛ́ mǐ ka ná mɔ? (Kpɔ́n fɔtóo ɔ lɔmɔ̌.)

⁷ Mǐ nɔ sɔ́ Jexóva dó ɖó Só mǐtɔn, ényí mǐ gán jɛ wǔ tɔn bǐ mlɛ́mlɛ́ ɔ nɛ́. Mǐ ɖeji ɖɔ ényí mǐ nɔ se tónú n’i, é ná bo tlɛ nyí ɖo ninɔmɛ vɛ́ wǔ lɛ́ mɛ ɔ, mǐ ná ɖu le tɔn. (Eza. 48:17, 18) Ényí mǐ ɖo lěe é nɔ nɔ gǔdo nú mǐ gbɔn é mɔ wɛ ɔ, jiɖe e mǐ ɖó dó wǔ tɔn é ná jɛjí. Mǐ ná wá ɖo gbesisɔmɛ hú gǎn bá ɖí xwi xá tagba ɖěɖěe Jexóva kɛ́ɖɛ́ jɛ́n sixú d’alɔ mǐ bɔ mǐ ná gbɔn yě mɛ dín lɛ́ é. Hwɛhwɛ ɔ, ényí mǐ ɖo ninɔmɛ ɖěɖěe mɛ mɛ ɖěvo ɖěbǔ ma sɔ́ ɖe bo ná d’alɔ mǐ ǎ lɛ́ é mɛ ɔ, mǐ nɔ wá mɔ lě do Jexóva nyí mɛ ɖejidéwú sɔ é. Vladimir ɖɔ: “Un mɔ ɖɔ un sɛkpɔ́ Jexóva hú gǎn hwenu e un ɖo gankpá mɛ é. Un kplɔ́n bo ɖeji dó Jexóva wú d’é jí, ɖó un ɖo nyiɖokpó, bo ka lɛ́ ɖó acɛ ɖěbǔ dó ninɔmɛ ɔ jí ǎ.”

8. (a) Étɛ́wú mǐ ka sixú ɖɔ ɖɔ Jexóva kún nɔ húzú ó? (b) Nɛ̌ mǐ ka nɔ ɖu le sɔ́ e mǐ sɔ́ Mawu dó ɖó Só mǐtɔn é tɔn gbɔn? (Ðɛhan 62:7, 8)

⁸ Jexóva nɔ húzú ǎ. Só ɖaxó ɖé ɖɔhun ɔ, Jexóva lí dǒ, bo nɔ sɛ do ǎ. Mɛ alɔkpa e é nyí é kpó linlin tɔn kpó nɔ húzú gbeɖé ǎ. (Mal. 3:6) È fɔ́n gǔ dó Jexóva jí ɖo Edɛ́ni có, é húzú linlin e é ɖó nú gbɛtɔ́ lɛ́ é ǎ. Lěe mɛsɛ́dó Pɔ́lu wlán gbɔn é ɔ, Jexóva “sixú gbɛ́ éɖée ǎ.”  (2 Tim. 2:13) Énɛ́ ɖo xlɛ́xlɛ́ wɛ ɖɔ nǔ ɖěbǔ ná bo jɛ, alǒ mɛ ɖěvo lɛ́ ná bo wa nǔ ɖěbǔ ɔ, Jexóva kún ná jó jijɔ tɔn lɛ́, linlin tɔn, alǒ nǔgbódodó tɔn lɛ́ dó gbeɖé ó. Kpó jiɖe e mǐ ɖó dó Mawu mǐtɔn e ma nɔ húzú ǎ é wú é kpó ɔ, mǐ sixú ɖó nukún ɖɔ é ná hwlɛ́n mǐ, bo lɛ́ d’alɔ mǐ bɔ mǐ ná ɖí xwi xá ninɔmɛ vɛ́ wǔ lɛ́.—Xa Ðɛhan 62:7, 8.

9. Étɛ́ nǔ e jɛ dó Tatyana jí é ka kplɔ́n we?

⁹ Mǐ nɔ sɔ́ Jexóva dó ɖó Só mǐtɔn gbɔn ayi sísɔ́ ɖó mɛ alɔkpa e é nyí é jí, kpó linlin tɔn hinhɛn dó ayi mɛ gbánwúngbánwún kpó gblamɛ. Mɔ̌ wiwa sixú d’alɔ mǐ bɔ mǐ ná ɖó ayijayǐ, bo lɛ́ nɔ gbejí n’i hwenu e mǐ ɖo tagba lɛ́ ɖí xwi xá wɛ é. (Ðɛh. 16:8) Mɔ̌ wɛ é nyí gbɔn nú nɔví nyɔ̌nu Tatyana e è sú dó xwé ɖé gbe ɖó nǔɖiɖi tɔn wú é. É ɖɔ: “Un mɔ ɖɔ un ɖo nyiɖokpó tawun. É vɛ́ wǔ nú mì tawun ɖo bǐbɛ́mɛ. Awakanmɛ nɔ kú mì hwɛhwɛ.” É ɖo mɔ̌ có, hwenu e é mɔ lěe tagba tɔn kunkplá Jexóva kpó linlin Tɔn kpó gbɔn é ɔ, é kpé wú bo dɛ, bo lɛ́ ɖó fífá ayi mɛ tɔn. É ɖɔ: “Nukúnnú mimɔ jɛ nǔ e wú nǔ énɛ́ ɖo gbigbo mì wɛ é mɛ d’alɔ mì bɔ un flín ɖɔ wǎn e un yí nú Jexóva, [bo ba ɖɔ nǔ ce ní nyɔ́ nukún tɔn mɛ é] wú wɛ un ɖo ninɔmɛ énɛ́ lɛ́ mɛ. Énɛ́ d’alɔ mì bɔ un sɔ́ nɔ lin tamɛ dó nyiɖésúnɔ jí ɖě ǎ.”

10. Nɛ̌ Jexóva ka sixú nyí Só mǐtɔn din gbɔn?

¹⁰ Ðo azǎn e ɖo nukɔn ja lɛ́ é mɛ ɔ, mǐ ná mɔ tagba ɖěɖěe ná byɔ́ ɖɔ mǐ ní gán jɛ Jexóva wú lěe mǐ ma ko bló gbɔn kpɔ́n ǎ lɛ́ é. Din wɛ nyí hwenu ɔ bɔ mǐ ná ná hlɔ̌nhlɔ́n gǎn e mǐ gán jɛ wú ɖɔ é ná ná nǔ ɖěbǔ e sín hudó mǐ ɖó bo ná dɛ kpó gbejíninɔ kpó lɛ́ é mǐ é. Nɛ̌ mǐ ka sixú wa mɔ̌ gbɔn? Nɔ xa tan Biblu tɔn lɛ́ kpó nǔ e Kúnnuɖetɔ́ égbé tɔn lɛ́ ko mɔ kpɔ́n lɛ́ é kpó. Nɔ ɖ’ayi lěe Mawu ko nɔ gǔdo nú mɛsɛntɔ́ tɔn lɛ́ gbɔn é wú. Nɔ lin tamɛ dó tan énɛ́ lɛ́ jí ganjí. Mɔ̌ wiwa sixú d’alɔ we bɔ a ná sɔ́ Jexóva dó ɖó Só towe.

ÐǑ JIJƆ JEXÓVA TƆN LƐ́

11. Étɛ́wú mǐ ka jló ná nɔ ɖe jijɔ Jexóva tɔn lɛ́ xlɛ́? (Kpɔ́n gbǎví “ Nǔ e gbé nɔví súnnu wínnyáwínnyá lɛ́ sixú nya é ɖé” ɔ lɔmɔ̌.)

¹¹ Mǐ ko ɖɔ xó dó jijɔ Jexóva tɔn ɖěɖěe zɔ́n bɔ é cí Só ɖɔhun nú mǐ lɛ́ é wú. Din ɔ, mǐ ní ɖɔ xó dó lěe mǐ sixú ɖó jijɔ énɛ́ lɛ́ gbɔn é wú. Lě do mǐ wa mɔ̌ ganjí sɔ é ɔ, mɔ̌ do wɛ mǐ ná ɖo gbesisɔmɛ bo ná ná hlɔ̌nhlɔ́n agun ɔ ganjí sɔ. Ði kpɔ́ndéwú ɔ, Jezu sun nyǐ Sinmɔ́ɔ ɖɔ Sefási (è tínmɛ dó “Piyɛ́ɛ”), tínmɛ tɔn wɛ nyí “Awǐnnyaxwɛ.” (Jaan 1:42) Énɛ́ xlɛ́ ɖɔ é ná nyí jɔtɛn gbɔdónúmɛ tɔn nú mɛ ɖěvo lɛ́ ɖo agun ɔ mɛ, lobo lɛ́ ná hlɔ̌nhlɔ́n nǔɖiɖi yětɔn. È ɖɔ dó mɛxó agun tɔn lɛ́ wú ɖɔ yě cí “só ɖaxó ɖé sín yɛtɛn” ɖɔhun. Énɛ́ xlɛ́ lěe yě nɔ nya xɛ ɖo mɛ e ɖo agun ɔ mɛ lɛ́ é jí gbɔn é. (Eza. 32:2) É ɖo wɛn ɖɔ, ényí nɔví súnnu kpó nɔví nyɔ̌nu kpó e ɖo agun ɔ mɛ lɛ́ é bǐ nɔ ɖe jijɔ Jexóva tɔn lɛ́ xlɛ́ ɔ, agun ɔ nɔ ɖu le tɔn.—Efɛ́. 5:1.

12. Tínmɛ ali ɖěɖěe nu mǐ sixú nyí bibɛtɛn nú mɛ ɖěvo lɛ́ ɖe é.

¹² Nyǐ bibɛtɛn ɖé. Ényí nɔví mǐtɔn lɛ́ sín xwé  gblé, alǒ ényí é byɔ́ ɖɔ yě ní hɔn jó xwé yětɔn lɛ́ dó ɖó adla j’ayǐ, alǒ ahwan wú ɔ, mǐ sixú yí yě dó xwé mǐtɔn lɛ́ gbe. Ée “azǎn gǔdo gúdo tɔn lɛ́” ná ɖo nylǎnylá d’é jí wɛ é ɔ, é ɖo wɛn ɖɔ, ali ná lɛ́ hun nú mǐ d’é jí bɔ mǐ ná d’alɔ nɔví mǐtɔn lɛ́. (2 Tim. 3:1) Mǐ sixú lɛ́ dó gbɔ nú nɔví mǐtɔn lɛ́, bo lɛ́ ɖe wǎnyíyí xlɛ́ yě lěe yě ɖó hudó tɔn gbɔn é. Ali e nu mǐ sixú wa mɔ̌ ɖe é ɖokpó wɛ nyí gbɔn xó ɖiɖɔ xá yě hwenu e yě wá kplé lɛ́ jí é kpó gbɔ dídó nú yě kpó gblamɛ. Mǐ ba ɖɔ agun ɔ ní nyí nɔtɛn wǎnyíyí kpó wǔsyɛ́n dó lanmɛ nú mɛ kpó tɔn. Mǐ ɖo gbɛ nɔ wɛ ɖo gbɛ e mɛ hunnylánylá, ya ma ké nú mɛ kpó adohu adohu kpó gɔ́ é ɖé mɛ. Énɛ́ wú ɔ, ényí nɔví súnnu kpó nɔví nyɔ̌nu kpó mǐtɔn lɛ́ wá kplé lɛ́ jí ɔ, mǐ ba ná wa nǔ e wú mǐ kpé é bǐ bɔ yě ná mɔ ɖɔ è yí wǎn nú émí, mɔ kɔfánúmɛ, bo lɛ́ ɖo ayijayǐ mɛ.

13. Nɛ̌ ɖo tají ɔ, mɛxó agun tɔn lɛ́ ka sixú húzú bibɛtɛn nú mɛ ɖěvo lɛ́ gbɔn? (Kpɔ́n fɔtóo ɔ lɔmɔ̌.)

¹³ Mɛxó agun tɔn lɛ́ sixú nyí bibɛtɛn ɖé nú mɛ e ɖo agun ɔ mɛ bo ɖo didɛ wɛ ɖo jɔhɔn syɛ́nsyɛ́n lɛ́ nu lě tlɔlɔ, alǒ ɖo nǔjlɛ́dónǔwú linu lɛ́ é. Ðo adla j’ayi lɛ́ kpó ajijimɛnú e kunkplá dotóoxwéxó lɛ́ é kpó hwenu ɔ, mɛxó agun tɔn lɛ́ nɔ yá wǔ bló tito bo nɔ d’alɔ nɔví lɛ́ ɖo ali tawun tawun lɛ́ nu. Yě nɔ lɛ́ d’alɔ ɖo gbigbɔ lixo. É ná bɔ wǔ nú nɔví lɛ́ bɔ yě ná byɔ́ mɛxó agun tɔn ɖé ɖɔ é ní d’alɔ émí ényí yě tuun ɖɔ é ná ɖɔ xó xá émí kpó xomɛnyínyɔ́ kpó, ná ɖótó émí, bo ná lɛ́ tɛ́n kpɔ́n bo mɔ nukúnnú jɛ lěe nǔ cí nú émí é mɛ ɔ nɛ́. Jijɔ énɛ́ lɛ́ nɔ zɔ́n bɔ yě nɔ mɔ ɖɔ è yí wǎn nú émí, mɔ̌ mɛ ɔ, é ná bɔ wǔ nú yě hú gǎn bɔ yě ná xwedó wě ɖěbǔ e mɛxó agun tɔn ɖé sixú ɖe xá yě bɔ é ná jínjɔ́n Biblu jí é.—1 Tɛ. 2:7, 8, 11.

14. Nɛ̌ mǐ ka sixú ɖe xlɛ́ ɖɔ mǐ nyí mɛ ɖejidéwú gbɔn?

¹⁴ Nyǐ mɛ ɖejidéwú. Mǐ ba ɖɔ mɛ ɖěvo lɛ́ ní kpé wú, bo nɔ gán jɛ mǐ wú, tají ɔ, ɖo hwenu vɛ́ wǔ lɛ́ mɛ. (Nǔx. 17:17, nwt) Étɛ́ mǐ ka sixú  wa bɔ mɛ ɖěvo lɛ́ ná nɔ ɖeji dó mǐ wú? Mǐ sixú dó gǎn bo nɔ ɖe jijɔ Mawu tɔn lɛ́ xlɛ́ hwebǐnu, ɖi akpá e mǐ dó lɛ́ é ɖiɖe kpó nǔ e wú mǐ kpé é bǐ wiwa bá dó nɔ ganmɛ jí kpó mɔ̌. (Mat. 5:37) Mǐ sixú lɛ́ dó alɔ tawun tawun lɛ́ mɛ ɖěvo lɛ́ hwenu e é byɔ́ ɖó mɔ̌ é. Gɔ́ ná ɔ, mǐ nɔ tɛ́n kpɔ́n bo nɔ wa azɔ̌ e è zɔ́n mǐ lɛ́ é sɔgbe xá wě e è ɖe xá mǐ lɛ́ é.

15. Ényí mɛxó agun tɔn lɛ́ nyí mɛ ɖejidéwú ɔ, nɛ̌ agun ɔ ka nɔ ɖu le tɔn gbɔn?

¹⁵ Nyɔ̌ná ɖé wɛ mɛxó agun tɔn ɖejidéwú lɛ́ nyí nú agun ɔ. Gbɔn nɛ̌ é? Ényí nɔví súnnu lɛ́ kpó nɔví nyɔ̌nu lɛ́ kpó tuun ɖɔ émí sixú ylɔ́ mɛxó agun tɔn lɛ́ hweɖébǔnu e émí ɖó hudó alɔdó tɔn é ɔ, énɛ́ nɔ ɖe linkpɔ́n yětɔn kpo. Wɛnjlátɔ́ lɛ́ nɔ lɛ́ mɔ ɖɔ è yí wǎn nú émí, ényí yě mɔ ɖɔ mɛxó agun tɔn lɛ́ ɖo gbesisɔmɛ bo ná d’alɔ yě ɔ nɛ́. Ényí mɛxó agun tɔn lɛ́ nɔ zán Biblu kpó wěma jínjɔ́n Biblu jí lɛ́ kpó dó ɖe wě xá mɛ bɔ é ma nyí linlin yěɖésúnɔ tɔn lɛ́ wɛ yě nɔ zán dó ɖe wě xá mɛ ǎ ɔ, nɔví lɛ́ ná ɖeji dó yě wú hú gǎn. Nɔví lɛ́ nɔ lɛ́ ɖeji dó mɛxó agun tɔn ɖěɖěe ma nɔ fúnfún kpáxó yětɔn lɛ́ kpé ǎ, bo nɔ lɛ́ ɖe akpá yětɔn lɛ́ é wú.

16. Ényí mǐ nɔ wa nǔ e Jexóva ɖɔ é sɔgbe é ɔ, nɛ̌ mǐɖésúnɔ kpó mɛ ɖěvo lɛ́ kpó ka nɔ ɖu le tɔn gbɔn?

 ¹⁶ Nɔ wa nǔ e Jexóva ɖɔ ɖɔ é sɔgbe é hwebǐnu. Ényí mǐ nɔ se tónú nú Jexóva ɖo nǔ bǐ mɛ, bo nɔ lɛ́ wá gbeta ɖěɖěe jínjɔ́n Biblu jí lɛ́ é kɔn ɔ, mǐ nɔ nyí kpɔ́ndéwú ɖagbe nú mɛ ɖěvo lɛ́. Ényí mǐ nɔ kplɔ́n Xó Mawu tɔn, bo nɔ ná hlɔ̌nhlɔ́n nǔ e mǐ ɖi nú Jexóva é ɔ, mǐ nɔ nɔ gbejí nú é kpó nǔgbódodó tɔn lɛ́ kpó. Mǐ ná tuun adingban núkplɔ́nmɛ lɛ́ kpó linlin ɖěɖěe ma sɔgbe xá linlin Jexóva tɔn ǎ lɛ́ é kpó, bɔ yě sɔ́ ná wa nǔ dó mǐ wú ǎ. (Efɛ́. 4:14; Ja. 1:6-8) Nǔ e mǐ ɖi nú Jexóva kpó akpá tɔn lɛ́ kpó é nɔ zɔ́n bɔ mǐ nɔ nɔ jlɛ̌ jí hwenu e mǐ se wɛn nyanya lɛ́ é. (Ðɛh. 112:7, 8) É nɔ lɛ́ zɔ́n bɔ mǐ nɔ kpé wú bo nɔ d’alɔ mɛ ɖěɖěe ɖo tagba lɛ́ ɖí xwi xá wɛ é.—1 Tɛ. 3:2, 3.

17. Nɛ̌ mɛxó agun tɔn lɛ́ ka nɔ d’alɔ mɛ ɖěvo lɛ́ bɔ yě nɔ ɖó ayijayǐ, bo nɔ lɛ́ ɖó nǔɖiɖi syɛ́nsyɛ́n nú Jexóva gbɔn?

¹⁷ Mɛxó agun tɔn lɛ́ ɖó ná nɔ nɔ jlɛ̌ jí ɖo walɔ yětɔn lɛ́ mɛ, yě ɖó ná nɔ ɖó ayi te, bo ná nɔ nɔ tito jí. Súnnu énɛ́ lɛ́ nɔ d’alɔ mɛ ɖěvo lɛ́ bɔ yě nɔ ɖó ayijayǐ kpó nǔɖiɖi syɛ́nsyɛ́n kpó nú Jexóva, lobo nɔ ná hlɔ̌nhlɔ́n agun ɔ gbɔn tɛ́ e yě nɔ “tɛ́ dó xó nǔgbó ɔ wú gbánwúngbánwún” é gblamɛ. (Ti. 1:9; 1 Tim. 3:1-3) Gbɔn kpɔ́ndéwú e mɛxó agun tɔn lɛ́ nɔ sɔ́ ɖ’ayǐ é kpó mɛbakpɔ́n lɛ̌ngbɔ́nyitɔ́ tɔn e yě nɔ bló lɛ́ é kpó gblamɛ ɔ, yě nɔ d’alɔ wɛnjlátɔ́ lɛ́ bɔ yě nɔ yi kplé lɛ́, nɔ ɖ’alɔ ɖo sinsɛnzɔ́ ɔ mɛ, lobo nɔ lɛ́ kplɔ́n nǔ yěɖésúnɔ ɖo gbesisɔmɛ. Ényí nɔví súnnu lɛ́ kpó nɔví nyɔ̌nu lɛ́ kpó ɖo ninɔmɛ e nɔ ɖó adohu nú mɛ lɛ́ é mɛ gbɔn wɛ ɔ, mɛxó agun tɔn lɛ́ sixú d’alɔ yě tawun, gbɔn wǔsyɛ́n dídó lanmɛ nú yě bónú yě ná sɔ́ ayi yětɔn bǐ ɖó Jexóva kpó linlin tɔn lɛ́ kpó jí gblamɛ.

18. Étɛ́wú mǐ ka ba ná kpa susu nú Jexóva, bo lɛ́ sɛkpɔ́ ɛ d’é jí? (Kpɔ́n gbǎví “ Ali e nu a sixú vɛ́ xá Jexóva ɖe é ɖé” ɔ lɔmɔ̌.)

¹⁸ Ée mǐ gbéjé jijɔ ɖaaɖagbe Jexóva tɔn lɛ́ kpɔ́n gúdo din é ɔ, mǐ sixú ɖɔ axɔ́sú Davídi ɖɔhun ɖɔ: ‘Susu nú Jexóva, só ce e wú un gán jɛ é!’ (Ðɛh. 144:1) Mǐ sixú nɔ gán jɛ Jexóva wú hwebǐnu. Ðo gbɛzán mǐtɔn bǐ mɛ, é ná bo tlɛ nyí ɖo mɛxóxwe mɛ ɔ, mǐ ɖó hwɛjijɔ e wú mǐ ná ɖɔ: “[É] wɛ nyí só e jí un dó ɖɔ do ɖó é,” bo ɖeji ɖɔ é ná d’alɔ mǐ bɔ mǐ ná zin ɖo gbigbɔ lixo.—Ðɛh. 92:15, 16.