AWTIK POU ÉTIDYÉ 26
KANTIK 8 Jéova sé kachèt an nou
Fèfon asi Jéova Gwo Wòch a-w
« Pa ni pon gwo wòch kon Bondyé an nou » (1 SAM. 2:2).
ON TI LIDÉ ASI SA NOU KAY VWÈ
An-nou vwè ki kalité Jéova ni ki ka fè kè yo ka kriyé-y « Gwo Wòch-la » é an-nou vwè kijan nou pé imité sé kalité-lasa.
1. An Sòm 18:46, èvè ki biten David konparé Jéova ?
DÉLÈ, pwoblèm pé enn tonbé asi nou kifè biten-la pé vin pi rèd pou nou oben sa pé chanjé vi an nou bout-pou-bout. Lè sa ka rivé-nou, a pa ti kontan nou ka kontan davwa nou pé fèfon asi Jéova ! Adan awtik-la ki té avan la, nou vwè kè Jéova sé Dyé vivan la é kè i toujou paré a édé-nou. É lè noumenm an nou ka vwè jan i ka soutyenn-nou, nou pi sèten ankò kè « Jéova vivan » (li Sòm 18:46). Apré David di kè Jéova vivan, i di kè Jéova sé « Gwo Wòch » a-y. Men on gwo wòch, a pa on biten ki vivan, alò poukwa i konparé Jéova èvè on gwo wòch ?
2. Ka nou ké vwè adan awtik-lasa ?
2 Adan awtik-lasa nou ké vwè poukwa yo ka di kè Jéova sé on gwo wòch é ka sa ka aprann-nou asi-y. Nou ké vwè osi ka pou nou fè pou i vin Gwo Wòch an nou. É pou fin, nou ké vwè kijan nou pé imité kalité a Jéova.
POUKWA JÉOVA SÉ ON GWO WÒCH
3. Poukwa souvantfwa adan Labib yo ka konparé Jéova èvè on gwo wòch ? (gadé imaj-la ).
3 Labib ka konparé Jéova èvè on « gwo wòch » pou édé-nou konprann sèwten kalité kè i ni. Souvantfwa adan Labib, lè sèwvitè a-y ka ba-y louwanj pou sé bèl kalité-la i ni la, yo ka kriyé-y « Gwo Wòch-la ». Prèmyé koté yo ka kriyé-y konsa sé an Détéwonòm 32:4. Adan on priyè i fè, Àn di kè « pa ni pon gwo wòch kon Bondyé an nou » (1 Sam. 2:2). Abakik kriyé Jéova « Gwo Wòch an mwen » (Abak. 1:12). Moun-la ki maké Sòm 73 la kriyé Jéova « gwo wòch a tchè an mwen » (Sòm 73:26). É Jéova limenm sèvi èvè èksprésyon-lasa pou palé dè-y menm (Iz. 44:8). An-nou palé dè 3 kalité ki ka fè kè Jéova kon on gwo wòch é an-nou vwè osi ka nou pé fè pou Jéova vin « Gwo Wòch an nou » (Dét. 32:31).
Sèwvitè a Jéova ka vwè-y kon on gwo wòch kivédi on koté yo pé kouri kaché pou yo santi-yo ansékirité (gadé paragraf 3 la).
4. Jéova sé on koté moun pé kouri kaché. Kijansa ? (Sòm 94:22).
4 Jéova sé on koté ou pé kouri kaché. Lèwvwè ni on gwo tanpèt, on moun pé a-y kaché dèyè on gwo wòch. Menmjan-la, Jéova ka pwotéjé-nou lèwvwè nou ka jwenn difikilté adan vi an nou (li Sòm 94:22). I ka fè ansòt pou nou rété bon bon zanmi èvè-y é i ka pwomèt-nou kè biten ki ka fè-nou soufè konnyéla pé’é diré pou touttan. I ka jou di-nou kè talè, i ké fè tousa ki ka istrésé-nou é ki ka fè-nou soufè disparèt (Ézék. 34:25, 26).
5. Ka nou pé fè pou Jéova vin koté-la nou ka kouri kaché la ?
5 Nou ka fè ansòt pou Jéova vin koté-la nou ka kouri kaché la lèwvwè nou ka priyé-y. A moman-lasa, i ké ban-nou lapé-la ki ka vin dè-y é sa ké pwotéjé tchè an nou é lèspri an nou (Filip. 4:6, 7). An-nou palé dè sa ki rivé on frè non a-y sé Artem. Yo mété-y lajòl pas i té ni fwa an Jéova. Adan lajòl-la, ni on boug ki té ka fè on ankèt asi-y é a plizyè rèpriz boug-lasa té ka éséyé fè-y palé. I té ka mèt bon présyon asi-y é i té ka fè-y wont. Misyé-lasa té ni bon méchansté an kò a-y. Mi sa Artem ka rakonté : « An té istrésé chakfwa boug-la té ka kriyé-mwen pou i té entéwojé-mwen. […] An toujou té ka priyé Jéova. An té ka mandé-y trankilizé-mwen é ban-mwen sajès. » Mi sa i ka di ankò : « Magré tousa misyé-la té ka éséyé fè pou pèwsékité-mwen, an té ka rété kalm. […] Grasa Jéova, sé té konsi an té kaché dèyè on gwo masonn ki fèt èvè wòch. »
6. Nou pé fè Jéova konfyans toutlè. Poukwa nou ka di sa ? (Izayi 26:3, 4).
6 Jéova sé on moun ou pé ni konfyans adan-y. Menmjan on gwo wòch oben on montangn ké toujou rété la i yé la, sé menmjan-la Jéova ké toujou la pou nou. Nou pé fè-y konfyans pas i sé « Gwo Wòch-la ki la pou touttan » (li Izayi 26:3, 4). Konm i sé Bondyé-la ki vivan la, i ké toujou la pou fè sa i pwomèt, pou kouté priyè an nou é pou soutyenn-nou. Nou pé konté asi-y osi pas i fidèl èvè moun ki ka sèvi-y (2 Sam. 22:26). I pé’é jen oubliyé sa nou ka fè é i toujou ké rékonpansé-nou (Ébr. 6:10 ; 11:6).
7. Ka nou ké konstaté si nou ka fèfon asi Jéova ? (gadé imaj-la osi).
7 Nou ka fè ansòt pou Jéova vin Gwo Wòch an nou lèwvwè nou ka fèfon asi-y a san pou san. Nou sèten kè si nou ka obéyi-y menm lèwvwè sa difisil, sa ké pwokiré-nou onlo byenfé (Iz. 48:17, 18). Chakfwa nou ka vwè kè i ka soutyenn-nou, nou ka fè-y konfyans plis ankò. Nou ka vin sèten kè sé enki Jéova ki ké pé édé-nou andiré nenpòt ki éprèv menmsi sé éprèv-la rèd. Souvantfwa, lèwvwè nou ka touvé-nou adan on sitiyasyon difisil é kè sé enki Jéova ki pé édé-nou adan on sitiyasyon konsa, nou ka vwè jan i sé on moun nou pé fèfon asi-y. Sé sa Vladimir konstaté. Yo té fèmé-y adan on sòt dè lajòl pas i té ni fwa adan Jéova. Mi sa i ka di : « Pannan tout tan-la an té fèmé la, an santi kè an té vin pibon zanmi èvè Jéova. An aprann fè-y konfyans plis ankò, pas an té tousèl é an pa té pé chanjé ayen adan sitiyasyon-la an té yé la. »
Jéova ka vin Gwo Wòch an nou lèwvwè nou ka fèfon asi-y a san pou san (gadé paragraf 7 la).
8. a) Poukwa nou pé di kè Jéova pa ka chanjé ? b) Lè Jéova sé Gwo Wòch an nou, ki byenfé sa ka pwokiré-nou ? (Sòm 62:6, 7).
8 Jéova pa jen ka chanjé. Jéova kon on gwo wòch oben i kon on montangn, kivédi i toujou ka rété menm moun-la. Pèwsonalité a-y é pwojé a-y pa jen ka chanjé (Mal. 3:6). Lè Adan é Èv ba Bondyé do, Bondyé pa chanjé pwojé a-y. Dayè mi sa lapòt Pyè ni lokazyon di : « I pé pa kontrèdi-y limenm a-y » (2 Tim. 2:13). Sa vé di kè kèlkèswa sa ki té’é rivé oben kèlkèswa sa moun té’é fè, i ké toujou rété kon i ja yé la, i pé’é chanjé pwojé a-y é i pé’é chanjé prensip a-y nonplis. É konm Jéova pa ka chanjé, lè nou ké pasé penn é péripési, nou pé sèten i ké la pou édé-nou é kè talè i ké fè tousa i pwomèt (li Sòm 62:6, 7).
9. Ka ègzanp a Tatiana ka aprann-nou ?
9 Nou pé fè ansòt pou Jéova vin Gwo Wòch an nou lèwvwè nou ka sonjé ki jan dè moun i yé é lè nou ka rété konsantré asi pwojé a-y toutlè. Si nou ka fè sa, sa ké édé-nou rété kalm é sa ké édé-nou rété fidèl a Jéova lèwvwè nou ké ka jwenn éprèv (Sòm 16:8). Sé sa ki pasé pou Tatiana. Lalwa oblijé sè-lasa rété fèmé akaz a-y pas i té ni fwa an Jéova. Mi sa i ka èspliké : « An vin touvé-mwen tousèl. [...] Odépa, sa té rèd toubònman. Souvantfwa an té ka santi-mwen tris. » Men lèwvwè i konprann pibyen kè éprèv-la i té ka jwenn la té lyanné èvè Jéova é pwojé a-y, sa trankilizé Tatiana é sa ba-y bon fòs pou i té rété fidèl. Mi sa i ka di ankò : « Lè an vin konprann poukwa sa té ka rivé-mwen, sa édé-mwen sonjé kè sé pou Jéova an té ka touvé-mwen adan sitiyasyon-lasa. Dépi sa, an arété konsantré-mwen enki asi mwenmenm. »
10. Ka nou pé fè, dépi alè, pou Jéova vin Gwo Wòch an nou ?
10 Talè, nou ké jwenn bout-rèd é fò-nou ké fèfon asi Jéova kon nou po’o jen fè-y avan. Alò sé alè pou nou fè on travay asi nou pou nou sèten kè i ké ban-nou tousa nou bizwen pou nou rété fidèl a-y. Kijan ou pé fè sa ? Ou pé li istwa ki an Bib-la é ègzanp a frè é sè ki ka viv a épòk an nou. Toupannan ou ka li sé istwa-lasa, éséyé vwè kijan Jéova montré i té on gwo wòch pou yo. Pran on ti tan pou réfléchi asi sa ou ka li. Si ou fè sa, Jéova ké vin Gwo Wòch a-w.
IMITÉ JÉOVA, GWO WÒCH AN NOU
11. Poukwa nou vé imité sé kalité-la Jéova ni la ? (gadé osi ti karé-la « On òbjèktif pou sé jennfrè-la »).
11 Nou sòti ègzaminé poukwa Jéova sé on gwo wòch pou nou. Alèla, an-nou vwè kijan nou pé imité-y. Pli nou ké fè éfò pou imité-y, pli nou ké pé fòwtifyé frè é sè an nou adan lasanblé-la. Pa ègzanp, Jézi di Simon kè konnyéla non ay sé ké Séfas (non-lasa ka bay « Pyè » lè yo ka tradui-y). Non-lasa vlé di « mòso wòch » (Jan 1:42). Jézi ba-y non-lasa pou montré kè Pyè té’é ankourajé frè é sè a-y adan lasanblé-la é i té’é édé-yo ni on fwa ki solid. Yo ka konparé sé ansyen-la èvè « lonbraj a on gwo wòch ». Imaj-lasa ka montré kijan yo ka pwotéjé frè é sè a lasanblé-la (Iz. 32:2). Men nou ka tou konprann kè sa ka fè lasanblé-la dibyen osi lèwvwè chak moun ka imité kalité a Jéova, ki sé on frè ki sé on sè (Éféz. 5:1).
12. Ka nou pé fè pou nou vin on koté frè é sè an nou pé kouri kaché ?
12 Vin on koté frè é sè a-w pé kouri kaché. Lè frè é sè an nou ka pèd kaz a yo oben kè yo oblijé kité kaz a yo parapòt a katastwòf natirèl oben lagè, nou pé akéyi-yo akaz an nou. Biten-la ka vin dè plizanpli rèd pannan « sé dènyé jou-la », kifè pétèt yonn ké ni lokazyon édé lòt pli souvan (2 Tim. 3:1). Anplisdisa, nou pé ba frè é sè an nou lanmou-la é rékonfò-la yo bizwen-la. Pa ègzanp, lè yo ka vin lasal, nou pé akéyi-yo bra gran wouvè. Sa nou vé sé kè ni on bon ti anbyans adan lasanblé-la pou tout sé frè é sè la woupran fòs. Adan mond-la nou ka viv adan-y la, sé moun-la rèd. Kifè frè é sè an nou istrésé é yo ni lenprésyon kè ponmoun pa enmé-yo. Sé pousa lèwvwè yo ka vin pran on ti souf lasal, nou vé fè tousa nou pé pou ankourajé-yo é pou yo santi jan nou enmé-yo.
13. Kijan sé ansyen-la pé vin on koté sé frè é sè a lasanblé-la pé kouri kaché ? (gadé imaj-la osi).
13 Sé ansyen-la pé vin on koté sé frè é sè a lasanblé-la pé kouri kaché lèwvwè yo ka jwenn diféran kalté éprèv. Siwvwè ni on katastwòf ki fèt oben siwvwè fò yo swangné on frè oben on sè vitman-présé, tousuit yo ka pran dispozisyon pou édé sé frè é sè la ki bizwen la. Anplisdisa, sé ansyen-la ka sèvi èvè Labib pou édé frè é sè a yo sav ka pou yo fè é pou ankourajé-yo. Sé frè é sè la ké kriyé on ansyen pi fasilman siwvwè i ni dousè, kè i ni konpasyon é kè i paré pou kouté. Lèwvwè on ansyen ni dé kalité kon séla, sé frè é sè a lasanblé-la ka santi kè yo enmé-yo, é a moman-lasa, kèlkanswa konsèy-la ki adan Bib-la yo té’é pé ba-yo la, sa ké pi fasil pou yo dè aksèpté-y (1 Tés. 2:7, 8, 11).
Sé ansyen-la ka konsolé frè é sè a yo lè yo ka jwenn difikilté a (gadé paragraf 13 la).
14. Kijan nou pé montré kè nou sé on moun yo pé ni konfyans adan-y ?
14 Fò ou sé on moun yo pé ni konfyans adan-y. Noutout té’é anvi kè lézòt sav kè yo pé konté asi nou siwtou lèwvwè ni difikilté (Pwov. 17:17). Men ka nou pé fè pou lézòt fè-nou konfyans ? An-nou fè ansòt pou nou imité Jéova touléjou a vi an nou. Pa ègzanp, an-nou tchenn a mo an nou é an-nou fè tousa nou pé pou nou toujou alè adan tousa nou ka fè (Mat. 5:37). Si nou sav osi kè on moun bizwen on biten, an-nou fè on biten pou édé-y. É lèwvwè yo ka ban-nou on travay a fè adan lasanblé-la, é kè yo ka èspliké-nou kijan pou nou fè travay-la, an-nou fè travay-la byen konm i fo kon yo ka mandé-nou fè-y.
15. Lèwvwè sé ansyen-la ka montré kè yo sé dé moun yo pé fè konfyans, ki byenfé sa ka pwokiré lasanblé-la ?
15 Lèwvwè sé ansyen-la sé dé moun yo pé fè konfyans, sa ka fè tout lasanblé-la dibyen. Kijansa ? Lèwvwè sé frè é sè la pé rivé jwenn-yo fasilman, pa ègzanp, lèwvwè yo ka rivé jwenn rèsponsab a gwoup a yo san pon pwoblèm, yo ka santi kè sé ansyen-la ka soutyenn-yo. Anplisdisa, yo ka santi kè sé ansyen-la enmé-yo lè yo ka vwè kè sé ansyen-la anvi édé-yo. Dayè, sé frè é sè la ka fè sé ansyen-la plis konfyans ankò lèwvwè yo ka sèvi èvè Labib oben èvè piblikasyon an nou pou ba lézòt konsèy, olyé yo bay avi a yo ki ta yo. É sé frè é sè la ka fè sé ansyen-la konfyans osi lèwvwè yo pa k’ay répété dé biten ki ka konsèwné vi pèwsonèl a sé frè é sè la, é lèwvwè yo ka tchenn a mo a yo.
16. Lèwvwè nou toujou ka fè sa Jéova enmé, ki byenfé sa ka pwokiré ki nou ki lézòt ?
16 Toujou fè sa Jéova enmé. Si nou ka obéyi Jéova adan tousa nou ka fè é si nou toujou ka bazé-nou asi prensip a Jéova lè nou ni on désizyon a pran, nou ké vin on bèl ègzanp pou lézòt. Pi nou ka étidyé Bib-la, pi fwa an nou ka vin fò é pi nou ka byen chouké adan lavérité. A moman-lasa, nou ka rivé sav si on ansègnman oben on biten yo ka di-nou pa annakò èvè sa Bondyé ka pansé é nou pa ka lésé sé biten-lasa jouwé an tèt an nou (Éféz. 4:14 ; Jak 1:6-8). É konm nou ni fwa adan Jéova é adan pwomès a-y, lèwvwè nou ka tann on mové nouvèl, nou ka rété kalm (Sòm 112:7, 8). É lèwvwè moun ka jwenn éprèv, nou ka rivé soutyenn-yo (1 Tés. 3:2, 3).
17. Kijan sé ansyen-la pé édé lézòt rété kalm é a ni on fwa ki solid ?
17 Fò sé ansyen-la montré kè yo sé dé moun ki pa two radikal adan labitid a yo, ki ka pran tan réfléchi, dé moun zafè a yo annòd é ki rézonab. Sé nonm-lasa ka édé lézòt rété kalm é a fè Jéova konfyans plis ankò. É yo ka ba sé frè é sè la bon fòs osi lè yo « ka rété byen kolé asi pawòl-la ki fidèl la » (Tit 1:9 ; 1 Tim. 3:1-3). Grasa bèl ègzanp a yo é grasa sé vizit-la yo ka fè la pou ankourajé frè é sè a yo, sé ansyen-la ka édé sé frè é sè la a ni dé bon labitid, kon vin réinyon, préché é étidyé tousèl a yo chak simenn. Lèwvwè sé frè é sè a lasanblé-la ka jwenn dé sitiyasyon ki ka soukwé-yo bon soukwé la, sé ansyen-la pé fè onlo biten pou édé-yo lèwvwè yo ka ankourajé-yo a kontinyé konsantré-yo asi Jéova é pwomès a-y.
18. Poukwa nou anvi ba Jéova louwanj é nou anvi vin pi bon zanmi èvè-y ankò ? (gadé ti karé-la : « On biten ou pé fè pou vin pi bon zanmi èvè Jéova »).
18 Aprézan kè nou fin vwè déotwa bèl kalité Jéova ni, nou anvi di menm biten ki wa David : « An-nou ba Jéova louwanj » (Sòm 144:1). Nou toujou pé konté asi Jéova. Menm lèwvwè nou ké vin vyé, nou pé sèten kè Jéova ké toujou édé-nou rété bon bon zanmi èvè-y. Sé pousa nouchak pé di kè Jéova sé « Gwo Wòch an mwen » (Sòm 92:14, 15).
KANTIK 150 Chèché Bondyé pou ou pé sa sové
a SA NOU KA VWÈ ASI IMAJ-LA : Toupannan i lasal, on sè ka santi-y alèz pou ay vwè sé ansyen-la.
