1. Segundo o Salmo 18:46 (TNM), con que compara David a Xehová?

 VIVIMOS nun mundo no que os problemas inesperados poden crearnos dificultades ou incluso cambiar completamente a nosa vida. Canto agradecemos poder contar coa axuda de Xehová Deus! No artigo anterior recordamos que Xehová é o Deus vivo e que sempre está preparado para axudarnos. Cando vemos o seu apoio convencémonos aínda máis de que “Xehová vive!” (le Salmo 18:46, TNM). Pero xusto despois de dicir estas palabras, David chamoulle a Xehová “a miña Roca”. Por que compararía el o Deus vivo cun obxecto inanimado como unha roca?

2. Que imos analizar neste artigo?

² Neste artigo imos analizar por que se di que Xehová é coma unha roca e que nos ensina sobre el esta comparación. Tamén imos aprender como podemos velo como a nosa Roca. E, por último, veremos algunhas formas nas que podemos imitalo.

EN QUE SENTIDO É XEHOVÁ COMA UNHA ROCA?

3. Como se utilizan a miúdo na Biblia as palabras “roca” ou “penedo”? (Ver a imaxe).

³ A Biblia compara a Xehová cunha “roca” ou “penedo” para axudarnos a entender algunhas das súas cualidades. Moitas veces utilízase esta comparación en pasaxes da Biblia nos que se louva a Xehová e se destaca que non hai Deus coma el. Aparece por primeira vez en Deuteronomio 32:4. Tamén a utilizou Ana cando, nunha oración, dixo: “Non hai rocha coma o noso Deus!” (1 Sam. 2:2). Noutra ocasión, Habacuc chamou a Xehová “Penedo” (Hab. 1:12). O escritor do Salmo 73 dixo: “Deus é [...] a miña rocha” (Sal. 73:26). E incluso Xehová utilizou esta comparación para describirse a si mesmo (Is. 44:8). Imos analizar tres cualidades de Xehová que fan que sexa coma unha roca e aprender como pode chegar a converterse no “noso Penedo” (Deut. 32:31).

4. En que sentido é Xehová un refuxio? (Salmo 94:22).

 ⁴ Xehová é un refuxio. Cando hai un temporal perigoso, poderiamos protexernos se nos metemos nunha cova. Da mesma forma, Xehová protéxenos nos momentos difíciles da nosa vida (le Salmo 94:22). Axúdanos a manter a salvo a nosa relación con el e asegúranos que nada do que suframos agora pode causarnos dano permanente. Incluso vai máis alá: promete que eliminará todo o que nos provoca ansiedade e sufrimento (Ezeq. 34:25, 26).

5. Como pode Xehová chegar a ser un refuxio para nós?

⁵ Unha forma na que podemos refuxiarnos en Xehová é orándolle. Cando o facemos, recibimos “a paz de Deus” que protexe o noso corazón e a nosa mente (Filip. 4:6, 7). Vexamos a experiencia de Artem, un irmán que estivo no cárcere debido á súa fe. Mentres estaba alí, interrogouno moitas veces un investigador que o humillaba e o intentaba asustar. Artem dixo: “Sentía moita angustia cada vez que me interrogaba. [...] Eu sempre lle oraba a Xehová pedíndolle paz mental e sabedoría. [...] As tácticas deste investigador non funcionaron comigo. [...] Coa axuda de Xehová sentíame coma se estivese a salvo detrás dun muro de pedra”.

6. Por que podemos confiar sempre en Xehová? (Isaías 26:3, 4).

⁶ Xehová é confiable. Igual que unha roca grande sempre se mantén no seu sitio, Xehová sempre está listo para axudarnos. Podemos confiar nel porque é “Rocha para sempre” (le Isaías 26:3, 4). Xamais deixará de cumprir as súas promesas, escoitar as nosas oracións e darnos a axuda que necesitemos. Podemos contar con Xehová en todo momento porque el é leal ós seus servos (2 Sam. 22:26). Nunca esquecerá o que facemos e recompensaranos por iso (Heb. 6:10; 11:6).

7. De que nos damos conta cando confiamos en Xehová? (Ver tamén a imaxe).

⁷ Demostramos que Xehová é a nosa Roca cando confiamos por completo nel. Estamos seguros de que obedecelo sempre é o mellor para nós, incluso cando pasamos por probas difíciles (Is. 48:17, 18). Ó ver como nos apoia, medra a nosa confianza nel. E isto prepáranos para facerlles fronte a problemas que só poderemos superar coa súa axuda. A miúdo é neste tipo de situacións nas que nos damos conta do confiable que é Xehová. Un irmán que se chama Vladimir di: “Nunca me sentín tan cerca de Xehová coma cando estiven no centro de detención. [...] Como estaba só e ninguén máis me podía axudar, aprendín a confiar máis nel”.

8. a) Por que podemos dicir que Xehová é estable? b) Como nos beneficia que Deus sexa a nosa Roca? (Salmo 62:7, 8 [62:6, 7, TNM]).

⁸ Xehová é estable. Igual que unha  enorme roca, Xehová é firme e estable. A súa personalidade e o seu propósito nunca cambian (Mal. 3:6). A pesar de que Adán e Eva se rebelaron, el mantivo o seu propósito para a humanidade. Como escribiu o apóstolo Paulo, Xehová “non pode arrenegar de si mesmo” (2 Tim. 2:13). Non importa o que ocorra ou o que outros fagan, Xehová nunca cambiará a súa forma de ser, o seu propósito e as súas normas. Que sexa tan estable dános a seguridade de que el sempre nos axudará cando pasemos por dificultades e manterá as súas promesas para o futuro (le Salmo 62:7, 8 [62:6, 7, TNM]).

9. Que che ensina a experiencia de Tatyana?

⁹ Faremos que Xehová sexa a nosa Roca, é dicir, confiaremos nel, se meditamos nas súas cualidades e temos sempre en mente o seu propósito. Facer isto axudaranos a manternos estables en sentido emocional mentres aguantamos as probas (Sal. 16:8). Isto foi o que experimentou Tatyana, que estivo baixo arresto domiciliario debido á súa fe. Ela conta: “Estaba completamente soa. [...] Ó principio foi moi difícil, e moitas veces sentíame desanimada”. Pero, cando se puxo a pensar en como a súa proba estaba relacionada con Xehová e o seu propósito para a humanidade, foi capaz de manter a calma e recuperar as forzas para seguir sendo fiel. Ela dixo: “Entender que estaba nesa situación porque amo a Xehová e quero facer o que a el lle gusta axudoume a non centrarme tanto en min mesma”.

10. Como podes facer de Xehová a túa Roca?

¹⁰ Pronto pasaremos por momentos moi difíciles e necesitaremos confiar en Xehová máis ca nunca. Agora é o momento de fortalecer a nosa convicción de que el nos dará todo o que necesitamos para aguantar fielmente. E como podemos facer isto? Lendo relatos da Biblia e experiencias de Testemuñas leais da actualidade. Cando o fagas, fíxate en como Xehová demostrou ser coma unha roca para os seus servos. Reflexionar nestes relatos axudarache a facer de Xehová a túa Roca.

IMITEMOS AS CUALIDADES DE XEHOVÁ

11. Por que queremos imitar as cualidades de Xehová? (Mira tamén o recadro “ Unha meta para os irmáns novos”).

¹¹ Acabamos de analizar algunhas cualidades de Xehová que demostran que é coma unha roca. Agora imos ver como podemos imitalas nós. Canto mellor o fagamos, máis preparados estaremos para fortalecer os irmáns e irmás. Por exemplo, Xesús deulle a Simón o nome de Kefas (que traducido é Pedro). Este nome significa “anaco de roca” (Xoán 1:42). Isto indicaba que Pedro chegaría a ser unha fonte de ánimo e estabilidade para  a congregación. Dos anciáns dise que son coma “a sombra dun penedo”. Esta expresión ilustra moi ben como protexen eles os irmáns (Is. 32:2). Pero a congregación benefíciase cando todos, irmáns e irmás, imitamos as cualidades de Xehová (Ef. 5:1).

12. Menciona algunhas formas nas que podemos ser un refuxio para os demais.

¹² Sé un refuxio. Ás veces podemos ofrecerlles refuxio ós nosos irmáns de forma literal cando hai un desastre natural, disturbios civís ou guerras. A medida que avanzan os “días derradeiros”, ou últimos días, as condicións empeorarán e seguro que teremos máis oportunidades de axudarnos uns ós outros (2 Tim. 3:1). E tamén podemos ser un refuxio en sentido emocional e espiritual. Unha maneira de conseguilo é facendo que os que veñen ó Salón do Reino se sintan ben recibidos, contribuíndo así a que haxa un ambiente agradable na congregación. Vivimos nun mundo cruel, frío e estresante. Por iso queremos que cando os nosos irmáns asistan ás reunións se sintan queridos, reconfortados e seguros.

13. Como poden chegar a ser os anciáns un refuxio para os que pasan por momentos difíciles? (Ver tamén a imaxe).

¹³ Os anciáns poden chegar a ser un refuxio para os irmáns que están pasando por momentos difíciles. Por exemplo, cando ocorren desastres naturais ou emerxencias médicas, os anciáns rapidamente organizan a axuda que necesitan os seus irmáns. Tamén usan a Biblia para dar guía e ánimo. É máis probable que os irmáns lle pidan axuda a un ancián se saben que é amable, comprensivo e que está disposto a escoitar. Que os  anciáns demostren estas cualidades facilitará que, cando dean consellos baseados na Biblia, os irmáns estean máis dispostos a aplicalos (1 Tes. 2:7, 8, 11, 12). Ademais, contribuirá a que os demais se sintan ben coidados.

14. Como podemos demostrar que somos confiables?

¹⁴ Sé confiable. Queremos que os demais saiban que poden contar con nós, sobre todo nos momentos difíciles (Prov. 17:17). Como podemos ganarnos a reputación de ser persoas confiables? Esforzándonos por imitar a Xehová día tras día, por exemplo, cumprindo as nosas promesas e facendo todo o posible por ser puntuais (Mat. 5:37). Tamén podemos axudarlles de maneiras prácticas ós que o necesitan. Ademais, asegurámonos de cumprir coas nosas responsabilidades dentro da congregación seguindo as instrucións que recibimos.

15. Como se beneficia a congregación de que os anciáns sexan confiables?

¹⁵ Como se beneficia a congregación cando os anciáns son confiables? Os irmáns séntense tranquilos e queridos cando saben que poden chamar os anciáns en  calquera momento e que estes terán unha boa disposición para axudar. Os anciáns tamén conseguirán que os publicadores confíen neles se basean os consellos na Biblia ou nas publicacións do escravo fiel, e non na súa propia opinión. Ademais é importante que non lles conten a outros asuntos confidenciais e que cumpran o que prometen.

16. Como nos beneficiamos tanto nós como os demais cando somos estables?

¹⁶ Sé estable. Podemos ser unha boa influencia para os demais se nos mantemos firmes en canto ó que é correcto e se tomamos decisións baseadas en principios bíblicos. Cando estudamos a Palabra de Deus e fortalecemos a nosa fe en Xehová, mantémonos firmes na verdade. Desta maneira recoñeceremos as ensinanzas falsas e as ideas que non están de acordo coa maneira de pensar de Xehová, e non nos deixaremos influír por elas (Ef. 4:14; Sant. 1:6-8). Ademais, a nosa fe en Deus e nas súas promesas axúdanos a manter a calma cando recibimos malas noticias (Sal. 112:7, 8). E seremos capaces de axudar a outros que estean pasando por probas (1 Tes. 3:2, 3).

17. Como poden os anciáns axudarlles ós irmáns a manter a estabilidade?

¹⁷ Os anciáns deben ser moderados nos hábitos, ordenados, razoables e ter bo xuízo. Cando estes homes se aferran á “palabra certa” fortalecen a congregación e danlle estabilidade (Tito 1:9; 1 Tim. 3:1-3). Polo seu exemplo e pola maneira na que coidan das ovelliñas de Xehová, axúdanlles a ser regulares na asistencia ás reunións, na predicación e no estudo persoal. Cando os irmáns se enfrontan a probas que lles provocan ansiedade, os anciáns recórdanlles que confíen en Xehová e que manteñan a vista fixa nas súas promesas.

18. Por que queremos louvar a Xehová e acercarnos aínda máis a el? (Mira tamén o recadro “ Unha maneira de acercarnos máis a Xehová”).

¹⁸ Despois de analizar estas marabillosas cualidades de Xehová, podemos afirmar o mesmo que o rei David: “Bendito o Señor, a miña rocha” (Sal. 144:1). Sempre poderemos confiar nel. Incluso se nos facemos maiores, sabemos que el nos seguirá axudando a manternos cerca del. E poderemos dicir: “É o Señor, a miña rocha” (Sal. 92:15, 16 [92:14, 15, TNM]).