1. 2 Samuel 22:47-ant Davidan Jehovak koslea vostuk sor kelo?

 AIZ ami jietat tea sonvsarant kednam-i kitem-i ghoddonk xokta. Ani ekuch dhopkean amchem jivit bodlonk xokta. Punn oslea vellar ami Jehovacher patieun ravonk zata mhunn ami kitlim upkari asat nhoi! Ami fattlea lekhant xiklolim toxim, Jehova ek jivo Dev zaun asa ani to amkam modot korunk sodanch toiar asa. Hem ami onnbhovtat tednam “Sorvespor jivo asa” mhunn amchi khatri anikui vaddtta. (2 Samuel 22:47 vachat.) Punn Davidan “Sorvespor jivo asa” oxem mhunnttlea uprant, taka eka oslea vostuk sor kelo zaka jiv na. Tannem mhunnttlem: “To mhojem Khoddop.” Tor tachea hea utrancho orth kitem aslo?

2. Hea lekhant ami kitem polloitolim?

² Hea lekhant, Jehovak Khoddop kiteak mhunnttla ani tantuntlean tache vixim ami kitem xiktat tem ami polloitolim. Toxench, ami Jehovak amchem Khoddop koxem korunk zata ani tache gunn koxe apnnaunk zatat tem-ui ami polloitolim.

JEHOVAK KHODDOP KITEAK MHUNNTTLA?

3. Bible-ant zaite pavtti Jehovak eka ‘khoddpak’ kiteak sor kela? ( Chitr polloiat.)

³ Jehovache thodde gunn amkam somzonk Bible-ant taka eka ‘khoddpak’ sor kela. Zaite pavtti, Jehovachea ojapachea gunnam vixim uloitana tachea sevokamnim taka khoddop mhunnttlolo asa. Sogleant poilim, Dusri Somurt 32:4-ant (NW) Jehovak “Khoddop” mhunnttla. Tea bhair, Hana-n aplea magnneant Jehova vixim oxem mhunnttlem: “Amchea Deva sarkem anink dusrem khoddop na.” (1 Sam. 2:2) Toxench, Habakukan Jehovak ‘mhojem Khoddop’ mhunnttlem. (Hab. 1:12) Ani Stotr 73-achea boroupean, Jehova Devak, “mhojea kallzachem khoddop” oxem mhunnttlem. (St. 73:26, NW) Toxench, Jehovan pasun svotak khoddop mhunnttlolo asa. (Iz. 44:8) Tor Jehovachea khoinchea tin gunnank lagon to ek Khoddop mhunn ami mhunnonk zata, ani ami Jehovak “amchem Khoddop” koxem korunk zata tem fuddem polloum-ia.​—St. 95:1.

4. Jehova amcho asro koso zaun asa? (Stotr 94:22)

 ⁴ Jehova amcho asro zaun asa. Eka bhirankull vadolla vellar, ek munis khoddpa sokol aslolea eke dholint asro gheunk xokta. Tech toren, amchea jivitant eka orthan vadollam ietat tednam, Jehova amkam asro zaunk xokta. (Stotr 94:22 vachat.) Oslea vellar tachea sangata amchi ixttagot samballunk to amkam modot korta ani amkam sasnak luksonn zata toslem kainch to zaunk dina. Titlench nhoi, to amkam bhas dita ki amchi xanti piddʼddear zata vo amkam tras zatat tem soglem to fuddarak kaddun uddoitolo ani amkam surokxit dovortolo.​—Ez. 34:25, 26.

5. Ami Jehovak amcho Asro koso korunk zata?

⁵ Jehovak amcho Asro korunk ek vatt mhunnttlear, tache lagim magnnem korop. Ami oxem kortat tednam, Dev amkam ‘apli xanti’ dita, ji amchea kallzachi ani chintnanchi rakhonn korta. (Filp. 4:6, 7) Hea vixim ami bhav Artem-achem udharonn polloum-ia. Tachea bhavarthak lagon taka bondkhonnint ghatlolo. Bondkhonnintlo officer zaite pavtti taka prosn vicharun tacher dobhav ghaltalo ani dhomki diun taka bhivoitalo. Bhav sangta: “To officer mhaka prosn vicharunk apoitalo title-i pavtti mhaka usko zatalo . . . Hanv sodanch Jehova lagim magnnem kortalom. Mhaka xant ravonk modot kor ani mhaka zannvai di mhunn hanv tachea lagim magtalom. Tor tea officer-an mhaka prosn vicharun kitlo-i dobhav ghatlear pasun, hanv xant ravonk pavlom . . . Jehovache modotin, eka orthan hanv khoddpa fattlean asro ghetam oxem mhaka dislem.”

6. Ami sodanch Jehovacher kiteak patieunk zata? (Izaias 26:3, 4)

⁶ Jehova patieupa sarko asa. Ek vhoddlem khoddop konnui halounk xokona. Tem sodanch asa thoinch urta. Teach bhaxen, amkam modot diunk Jehova sodanch asa. “Sorvespor sodankal thir Khoddop” zaun asa dekhun ami tacher patieunk zata. (Izaias 26:3, 4 vachat.) Apnnem dilʼleo bhasaunneo samballunk, amchim magnnim aikonk, ani goroz tednam amkam modot diunk Jehova sodanch jivo astolo. Toxench, apleachi bhokti kortoleank Jehova sodanch visvaxi asa. (2 Sam. 22:26) Tor ami tacher patieunk zata. Ami tachea pasot jem kitem kortat, tem to kednanch visorchona. Ani ami kelʼlea vavra pasot to sodanch amkam inam ditolo.​—Heb. 6:10; 11:6.

7. Ami Jehovacher patietat tednam kitem zaunk pavta? (Chitr pasun polloiat.)

⁷ Jehovak amchem Khoddop korunk anik ek vatt mhunnttlear, purnn toren tacher patieun ravop. Ekdom kotthin poristhitimnim pasun Jehovacheo adnea pallʼllear amkam faido zatolo mhunn ami visvas dovortat. (Iz. 48:17, 18) Ani oslea vellar to amkam modot korta mhunn ami polloitat tednam, tacher amcho visvas vaddtta. Hea vorvim, fuddarak ietolea kotthin poristhitincho fuddo korunk fokot Jehova amkam modot korunk xokta mhunn amchi khatri ghott zata. Ani choddxe pavtti amkam modot korunk konn asona punn fokot Jehova asta tednam, to kitlo patieupa sarko asa tem amkam kollon ieta. Hea vixim Vladimir nanvacho bhav sangta: “Hanv bondkhonnint aslom tednam Jehova sangata mhoji ixttagot ekdom ghott zali. Karonn hanv tea zagear ekttoch aslom ani tem soglem sosunk fokot Jehova mhaka modot korunk xoktalo. Tor tea vellar, hanv Jehovacher anikui chodd patieun ravonk xiklom.”

8. (a) Jehova kednanch bodolchona mhunn ami kiteak mhunnonk zata? (b) Jehova amchem Khoddop aslolean amkam koxi modot zata? (Stotr 62:6, 7)

⁸ Jehova sodanch sarkem tem korta ani to  kednanch bodolna. Eka vhodd khoddpa bhaxen Jehova sodanch thir asta. To aplo sobhav ani udʼdhex kednanch bodolna. (Mal. 3:6) Adanv ani Even, tachea add patok kelem tednam, Jehovan munxakulla pasot aplo udʼdhex bodlunk na. Karonn apostl Paulun sanglem toxem, Jehova “apleach add kednam vochonk xokona.” (2 Tim. 2:13) Hacho orth, kitem-i zalear vo konnem-i kitem kelear pasun, Jehova kednanch aple gunn, udʼdhex vo dorje bodolchona. Tor amcho Dev thir asa vo to kednanch bodolchona hem zannam zalʼlean, amchea trasanchea vellar to amkam modot kortolo ani fuddara pasot tannem jem bhasailam tem to purnn kortoloch mhunn ami ghott bhavarth dovrunk zata.​—Stotr 62:6, 7 vachat.

9. Bhoinn Tatyana-chea onnbhovantlean tumi kitem xiklim?

⁹ Jehovak amchem Khoddop korunk anik ek vatt mhunnttlear, tachea gunnancher, toxench prithum ani munxakulla pasot tacho udʼdhex kitem asa tacher niall korop. Oxem kelʼlean, tacher visvas dovrunk, xant ravonk ani trasam vellar amchem visvaxiponn samballunk amkam modot zatoli. (St. 16:8) Oxench Tatyana nanvache bhoinnin onnbhovlem. Tichea bhavarthak lagon, tika ghorant koidi korun dovorloli tednam, tika koxem bhoglem tem ti sangta: “Hanv eksurem aslem. Ani survatek hem mhaka khub kotthin aslem. Tea pasot, zaite pavtti hanv niraxi astalem.” Punn uprant ti Jehovacher ani prithume pasot aslolea tachea udʼdhexacher niall korunk lagli. Oxem kelʼlean, tiche tras sosop kiteak itlem gorjechem tem tika kollon ailem. Hea vorvim, ti xant ravonk pavli ani visvaxi ravonk tika modot zali. Ti mhunntta: “Hanv Jehovacho mog kortam ani taka manvota tem korunk sodhtam dekhun hanv hea poristhitint asa mhunn hanvem ugddas dovorlo. Oxem kelʼlean, mhojeach vixim chintina zaunk mhaka modot zali.”

10. Jehovak atam amchem Khoddop korunk amkam koxi modot zatoli?

¹⁰ Beginuch amkam ekdom kotthin poristhitincho fuddo korunk poddttolo. Ani tea vellar, ami Jehovacher poilim poros anikui chodd patieun ravonk poddttolem. Tor tacher amcho bhavarth ghott korunk, ani to amkam kosle-i poristhitint visvaxi ravonk modot kortolo mhunn amchi khatri vaddounk, atam amkam aslolo vell ami uzar korunk zai. Hem ami koxem korunk zata? Bible-ant aslolea Jehovachea visvaxi sevokanchim udharonnam, toxench amchea kallar jietolea bhav-bhoinnanche onnbhov ami vachunk zai. Tea vixim ami bariksannen niall korunk zai, ani Jehova tankam koso ek Khoddop zaun aslolo tacher ami dhean diunk zai. Oxem kelear, Jehovak amchem Khoddop korunk amkam modot zatoli.

JEHOVACHE GUNN APNNAIAT

11. Ami Jehovache gunn kiteak apnnaunk sodhtat? (“ Tornnattea Bhavamno—Tumi Koslo Dhei Dovrunk Zata?” hem boks pasun polloiat.)

¹¹ Atam meren Jehovachea khoinchea gunnank lagon to eka khoddpa sarko zaun asa tem ami polloilem. Tor atam, ami tache he gunn koxe apnnaunk zatat tem polloum-ia. Oxem korunk, ami zata titlo vavr kortat tednam, ami amchea bhav-bhoinnank ghottai diunk pavtolim. Udharonnak, Jezun Simanvak, Kefas hem nanv dilem (hem utor “Pedru” mhunn bhaxantor kortat) zacho orth, “Khoddpacho Kuddko” zaun asa. (Ju. 1:42) Tor Jezu sangonk sodhtalo ki Pedru udexim  sobhentlea bhav-bhoinnank ghottai ani urba mellttoli. Sobhentle vhoddil ‘mozbut khoddpache savlle sarke’ asat. Hacho orth, te sobhentlea bhav-bhoinnanchi rakhonn kortat. (Iz. 32:2) Punn ami soglim Jehovache gunn apnnaitat tednam, ami eka-mekak urba diunk pavtat.​—Ef. 5:1.

12. Ami dusreank asro koso zaunk xoktat?

¹² Bhav-bhoinnank asro koso zaiat. Odruxttank vo zhuzank lagon, thodde pavtti bhav-bhoinnanchea ghorancho nas zata, vo tankam tanchim ghoram soddun pollon vochonk poddtta. Oslea vellar, ami tankam amchea ghoramnim asro diunk zata. Hea “nimannea disamnim” poristhiti bigddot voita toxi, tankam modot korunk amkam anikui sondhi mellttoli. (2 Tim. 3:1) Toxench, ami tankam mog dakhounk ani bhuzvonn diunk zata. Oxem korunk ek vatt mhunnttlear, mittingek tanchea lagim ulounk vell kaddun tankam ghottai melltta toslim utram ami ulounk zatat. Karonn aiz sonvsarant choddso lok eka-meka sangata krur toren vagtat. Tor bhav-bhoinnank usko zaunk xokta, ani konnuch tancho mog korina oxem tankam disonk puro. Taka lagon, sobhent mog ani urba melltta hem tannim onnbhovlolem amkam zai. Hea pasot, tankam mog dakhounk, bhuzvonn diunk, ani urba diunk amchean zata tem soglem ami korunk sodhtat.

13. Vhoddil bhav-bhoinnam pasot koxe toren asro zaunk xoktat? (Chitr pasun polloiat.)

¹³ Bhav-bhoinnank vadolla sarkea trasancho fuddo korunk poddtta tednam, vhoddil tankam asro koso zaunk xoktat. Zoxem odruxttam ghoddttat, ani bhav-bhoinnanchi bholaiki okosmat bigoddtta tednam, vhoddil tankam modot korunk rokddich manddavoll kortat. Toxench, te tankam Bible-achea adarit margdorxon ani urba pasun ditat. Te tanchea lagim doiall toren uloitat, tanchem aikotat, ani tankam koxem bhogta tem somzon ghetat tednam, tanche lagim ulounk bhav-bhoinnam fattim soronant. Vhoddil hea toren vagtat tednam, te tancho mog kortat mhunn bhav-bhoinnank kollon ieta. Hea vorvim, Bible-antlean tannim dilʼlo koslo-i solʼlo apnnaunk tankam sompem zata.​—1 Tes. 2:7, 8, 11.

14. Patieupa sarkim munxam zaunk ami kitem korunk zata?

 ¹⁴ Patieupa sarkim zaiat. Bhav-bhoinnam kotthin poristhitint astat tednam tim amcher patieunk xoktat, hem tim zannam zalʼlim amkam zai. (Mho. 17:17) Tor patieupa sarkim munxam zaunk ami kitem korunk zata? Kristi gunn dakhounk ami sodanch vavr korunk zai. Udharonnak, ami dusreank dilʼlem utor samballunk zai ani soglim kamam time-ar korunk zai. (Mt. 5:37) Toxench, bhav-bhoinnank modotichi goroz asa mhunn amkam kolltta zalear, ami fuddem soron tankam modot korunk zai. Itlench nhoi, sobhent amkam kosleo-i zobabdareo ditat zalear, amkam dilʼlea nirdexona pormonnem ami teo korun sompounk zai.

15. Vhoddil patieupa sarke astat tednam bhav-bhoinnank koso faido zata?

¹⁵ Vhoddil patieupa sarke astat tednam bhav-bhoinnank koso faido zata? Gorjechea vellar bhav-bhoinnam vhoddilank rokddinch sompork korunk xoktat mhunn tankam khobor asta tednam, tankam chodd usko zaina. Toxench, vhoddil tankam modot korunk toiar asat mhunn tim zannant tednam, vhoddilank tanchi kallji asa mhunn tankam kolltta. Tea bhair, vhoddil tankam aplea  chintpachea adarit nhoi, punn Bible ani Bible-achea adarit aslolea prokaxonantlean solʼlo ditat tednam, tim tancher visvas dovrunk pavtat. Itlench nhoi, bhav-bhoinnam vixim dusreank sangonk zainant te vixoi vhoddil dusreank sangonant, ani apnnem dilʼlem utor samballttat tednam, bhav-bhoinnam tancher anikui visvas dovrunk pavtat.

16. Jehovache nodren sarkem asa tem kelear amkam toxench bhav-bhoinnank koso faido zatolo?

¹⁶ Jehovache nodren sarkem asa tench korat. Ami Jehovachem aikotat ani Bible-achea adarit nirnnoi ghetat zalear, dusreank ami bori dekh dovortolim. Toxench, ami Devachea Utracho obheas kortat ani Jehovacher amcho bhavarth vaddoitat tednam, ami taka visvaxi ravtolim ani tache dorje pallttolim. Tea bhair, kosli-i khotti xikounn ani Jehovachea chintpa add aslole vichar ami sompeponnim vollkhonk pavtolim ani tantunt fosonk pavchimnant. (Ef. 4:14; Jak. 1:6-8) Itlench nhoi, amkam kosli-i vaitt khobor mellʼllear pasun, Jehovacher ani tachea bhasaunneancher aslolo amcho bhavarth amkam xant ravonk modot kortolo. (St. 112:7, 8) Ani amchim bhav-bhoinnam trasancho fuddo kortat tednam, tancho bhavarth ghott samballunk ami tankam modot korunk pavtolim.​—1 Tes. 3:2, 3.

17. Vhoddil bhav-bhoinnank xant ravonk ani Jehovacher ghott bhavarth dovrunk koxe modot korunk xoktat?

¹⁷ Vhoddil aplea sonvoim-ancher tabo dovortat, sarkem chintop dovortat, kaidea pormonnem choltat ani somjikai dakhoitat. Toxench, ‘tanchi xikoupachi kola, visvas dovrunk zata toslea, Devachea utrachea adarit asta.’ (Tit. 1:9; 1 Tim. 3:1-3) Hea vorvim bhav-bhoinnank xant ravonk ani Jehovacher ghott bhavarth dovrunk te modot kortat. Toxench, tanchea svotachea udharonnantlean, ani gonvlli bhett korun te bhav-bhoinnank chukonastana mittingek hajir zaunk, porgottnni korunk ani svotacho obheas korunk modot kortat. Tea bhair, bhav-bhoinnank koslea-i kotthin poristhitik lagon usko zata tednam, tannim Jehovacher patieun ravonk zai ani aplem dhean tachea bhasaunneancher dovrunk zai mhunn vhoddil tanchea ugddasak haddttat.

18. Ami Jehovak kiteak vakhannunk ani chittkon ravonk sodhtat? (“ Jehova Sangata Tumchi Ixttagot Ghott Korat—Koxi?” hem boks pasun polloiat.)

¹⁸ Jehovachea sobit gunnam vixim obheas kelea uprant, Raza Davida bhaxen ami oxem mhunnonk pavtat: “Sorvespor mhojem Khoddop: hanv Taka vakhanntam!” (St. 144:1) Khorench, ami Jehovacher sodanch patieunk zata. Karonn ami zannttim zalear pasun, taka chittkon ravonk to amkam modot korit ravtolo. Tor ami tacher visvas dovrunk zata, ani tache vixim khatren oxem mhunnonk zata: “To ekloch mhojem Khoddop!”​—St. 92:14, 15.