1. ¿Kasa nüküjaka David nüchiki Jehová suluʼu Salmo 18:46?

 EESÜJAʼA sülatalaʼa sümüle wanee müliaa wamüin. Anapejeʼe waaʼin süka eein süpüla wachuntuin kaalinwaa nümüin Jehová soʼunnaa tia. Wekirajaa anainrü suluʼu ekirajaaya 25 nükaalinjain waya waneepia Jehová chi Maleiwa matüjainkai outaa. Weʼrapa nükaalinjain waya Jehová wayaawata aaʼu shiimain eein nia wamaa maʼaka nüküjain David suluʼu Salmo 18:46 (paashajeʼera). Müsü nünüiki David süchikijee nüküjain eein Jehová nümaa: «Müshi nia maʼaka saaʼin ipa miyoʼu». ¿Kasa nüküjeeka achiki?

2. ¿Kasa wekirajaainjatka anain sünain ekirajaayakat tüü?

² Sünain ekirajaayakat tüü wekirajaajeerü anain jamüin nüküjaka David müin nukuwaʼipa Jehová maʼaka saaʼin wanee ipa miyoʼu otta tü watüjakat süchiki tia. Wekirajaajeerü anain tü waaʼinrajatkat süpüla weʼitaain waaʼin nünain Jehová otta süpüla washatüin nukuwaʼipa.

MÜSHI JEHOVÁ MAʼAKA SAAʼIN WANEE IPA MIYOʼU

3. ¿Jamüsü sünüiki tü Bibliakat nüchiki Jehová? (Piirakaa sümüin tü ayaakuaakat).

³ Süpüla weʼraajüin nukuwaʼipa Jehová ashajünüsü suluʼu tü Bibliakat müin nia maʼaka saaʼin ipa miyoʼu. Ashajünüsü suluʼu tü Bibliakat nanüiki waneinnua wayuu namaiwajana aʼwaajakana Jehová saaʼujee anain maʼin nukuwaʼipa. Müshi Jehová namüin maʼaka saaʼin wanee ipa miyoʼu. Tü palajatkat sukua süshajünüin suluʼu tü Bibliakat müin Jehová maʼaka saaʼin ipa miyoʼu suluʼusü Deuteronomio 32:4. Anuu sünüiki Ana suʼuraajapa: «Maleiwakalee, pia chi pülashikai maʼin, müshi pia maʼaka saaʼin ipa miyoʼu» (1 Sam. 2:2). «Pia chi makai aka saaʼin Ipa miyoʼu tamüin» müsü nünüiki Habacuc nüchiki Jehová (Hab.  1:12). Naashin chi ashajakai Salmo 73 müshi Jehová nümüin maʼaka saaʼin wanee ipa miyoʼu (Sal. 73:26). Nüküjainña Jehová müin nia maʼaka saaʼin ipa miyoʼu (Is. 44:8). Wekirajaa sünain apünüinsü kasa wayaawateetka atuma müin Jehová maʼaka saaʼin ipa miyoʼu otta tü waaʼinrajatkat süpüla weʼitaain waaʼin nünain (Deut. 32:31).

4. ¿Jamüsü makaʼa nukuwaʼipa Jehová maʼaka saaʼin wanee ounjulaaya wamüin? (Salmo 94:22).

⁴ Naaʼinmajüin waya Jehová soʼunnaa müliaa. Soʼunnaa wawai eeshijaʼa nuunjulaale wanee wayuu suluʼu koʼushii jee shiale süʼütpaʼa wanee ipa miyoʼu. Müsia neʼe tü waaʼinrakat weʼrapa müliaa, eeshii süpüla wachuntuin kaalinwaa nümüin Jehová (paashajeʼera Salmo 94:22). Nükaalinjain waya Jehová süpüla anain wakuwaʼipa nümaa jee nüküjain wamüin motsoʼojeerüin sümaʼa tü müliaa weʼrakat. Nüküjainña najaʼttireerüin süpüshuaʼa tü müliakalü atuma waaʼin (Ezeq. 34:25, 26).

5. ¿Kasa waaʼinrajatka süpüla nükaalinjain waya Jehová?

⁵ Woʼuraajüle nümüin Jehová jimateerü waaʼin nutuma, naaʼinmajeerü tü suluʼukat waaʼin jee tü suluʼukat wekii (Filip. 4:6, 7). Jülüjataa waaʼin tü alatakat nümüin Artiom, wanee wawala püreesakai saaʼujee nunoujain. Eejachi wanee wayuu aluwataanaka nünainmüin süpüla nüsakiijüin nia, müliashi nia nutuma jee niimolojuin nia. Anuu nünüiki Artiom: «Mmotshi maʼin taya wanaa sümaa nüsakiijüin taya [...]. Tachuntapuʼuin nümüin Jehová nnojolinjachin mmoluin taya jee tatüjaainjatüin saaʼu tü taaʼinrajatkat. Jimatüsü taaʼin mayaainjeʼe süpüleeruaanüin taaʼin [...]. Naaʼinmajüin taya Jehová soʼu tia. Müshi nia tamüin maʼaka saaʼin wanee süsepü miichi aainjuushika süka ipa eere tounjulaain».

6. ¿Jamüsü weʼitaainjatkaʼa waaʼin waneepia nünain Jehová? (Isaías 26:3, 4).

⁶ Nnojoleena nüpütüin waya Jehová. Jamüsüjaʼa wanee ipa miyoʼu nnojotsü süpüla süsünneʼennüin eere shia. Müsia nukuwaʼipa Jehová, eejeechi nia waneepia wamaa süpüla nükaalinjain waya. Anasü weʼitaale waaʼin nünain Jehová, jama eejeechin nia süpüla kaʼikat süpüshuaʼa (paashajeʼera Isaías 26:3, 4). Watüjaakalaka saaʼu nikeraajeerüin waneepia nünüiki, naapajeerüin wanüiki woʼuraajapa nümüin jee nükaalinjeenain waya. Anasü weʼitaale waaʼin nünain Jehová süka waneepiain nia namaa na aʼyataashiikana nümüin (2 Sam. 22:26). Nnojoleetkalaka motuin naaʼin tü kasa anasü waaʼinrakat otta eʼreena waya kasa anasü nutuma (Heb. 6:10; 11:6).

7. ¿Jamüsü anakaʼa weʼitaale waaʼin nünain Jehová? (Piirakaa sümüin tü ayaakuaakat).

⁷ Weʼitaale maʼin waaʼin nünain Jehová meechi nia wamüin maʼaka saaʼin wanee ipa miyoʼu. Watüjaa aaʼulu aneerüin wakuwaʼipa waaʼinrüle süpüshuaʼa tü nümakat jaʼitairü kapüleein shia wamüin (Is. 48:17, 18). Akooʼomüinraasü maʼin wanoula nükaalinjapa maʼin waya Jehová. Watüjaa aaʼulu wachechereerüin waaʼin soʼunnaa müliaa süka eein nia wamaa. Eesüjaʼa sülatüle wanee kasa wamüin isaka süchiki sunouteʼerüin wayuu.  Nükaalinjeenapejeʼe waya Jehová soʼu tia. Anuu nünüiki Vladímir: «Aleewashi maʼin taya nümaa Jehová soʼu chajachin taya püreesain. Süka tamüiwaʼajachin chayaa jee isain tachiki tanouteʼerüin tü alatakat tamüin tayaawata aaʼulu niain neʼe Jehová akaalinjeechika taya».

8. (1) ¿Kasa watüjaka nüchiki Jehová? (2) ¿Jamüsü anakaʼa watüjaale saaʼu tia nüchiki Jehová? (Salmo 62:6, 7).

⁸ Matüjainsat aʼwanajawaa nukuwaʼipa Jehová. Nnojotsü süpüla sukutuleʼennüin wanee ipa miyoʼu. Müsia tü keeʼireekat naaʼin Jehová, nnojotsü süpüla shiiʼiratünüin (Mal. 3:6). Mayaainjeʼe niʼrüijaain wayumüin Adán sümaa Eva, nnojotsü niiʼiratüin Jehová tü keeʼireetüjütkalia naaʼin süpüleerua wayuu. Naashin chi aluwataaushikai Pablo nnojotsü süpüla naaʼinrüin Jehová «wanee kasa naata suulia tü nümakat» (2 Tim. 2:13). Tü watüjakat sünainjee tia shia matüjain aʼwanajawaa nukuwaʼipa Jehová, nnojotsü niiʼiratüin tü keeʼireekat naaʼin jee tü nuluwataakalü anain. Weʼitaainjeseʼe waaʼin sünain naaʼinmajeenain waya Jehová soʼunnaa müliaa jee nikeraajeerüin mapeena tü nümakat (paashajeʼera Salmo 62:6, 7).

9. ¿Kasa pütüjaka sünainjee Tatiana?

⁹ Jülüjale waaʼin tü nukuwaʼipakat Jehová otta tü keeʼireekat naaʼin süpüleerua wayuu jee süpüleerua tü mmakat, meechi nia wamüin maʼaka saaʼin wanee ipa miyoʼu eere wounjulaain. Waaʼinrüle tia wachechereerü waaʼin soʼunnaa müliaa jee waneepieena waya nümaa Jehová (Sal. 16:8). Jülüjataa waaʼin tü saaʼinrakat wanee wawala, Tatiana sünülia. Püreesasü shia saaʼujee sunoujain. Anuu sünüiki: «Püreesasü taya atumawaa chaa miichipaʼa, nnojotsü jaralüin chajatüin tamaa. [...] Kapüleesü maʼin tü alatakat tamüin, mojuwaisü taaʼin». Jülüjasü saaʼin Tatiana nukuwaʼipa Jehová jee tü naaʼinrajatkat mapeena. Shiyaawatüinjeseʼe saaʼu choʼujaain süchecherüin saaʼin soʼunnaa tü alatakat sümüin. Sutuma saaʼinrüin tia, jimatüsü saaʼin jee waneepiasü shia nümaa Jehová. Müsü shia: «Püreesasü taya atumawaa süka alin tapüla Jehová jee taaʼinrüin tü nüchekakat tapüleerua. Süka jülüjain taaʼin tia nnojotsü taaʼinmaain maʼin tü alatakat tamüin».

10. ¿Kasa paaʼinrajatka süpüla kanoulainjachin maʼin pia nünain Jehová?

¹⁰ Süka weʼreenain maʼin müliaa mapeena weʼitaainjatü maʼin waaʼin nünain Jehová. Kanoulainjana maʼin waya maaʼulu yaa sünain naapeerüin wamüin Jehová tü choʼujaajeetkat wamüin süpüla waneepiain waya nümaa otta süpüla wachecherüin waaʼin soʼunnaa müliaa. ¿Kasa paaʼinrajatka süpüla puuntuin tia? Anasü paashajeʼerüle suluʼujee tü Bibliakat tü nachikimaajatkat na wayuu namaiwajanakana otta müsia tü nachikimaajatkat na wawalayuukana. Jülüjale paaʼin tü naaʼinrakat Jehová napüleerua, meechi Jehová pümüin maʼaka saaʼin wanee ipa miyoʼu eere puunjulaain.

 WASHATA NUKUWAʼIPA JEHOVÁ

11. ¿Jamüsü anakaʼa washatüle nukuwaʼipa Jehová? (Paashajeʼera tü pütchikat « Jimaʼalii jüshata nukuwaʼipa Jehová»).

¹¹ Wekirajaaitpa anain jamüin maka nukuwaʼipa Jehová maʼaka saaʼin ipa miyoʼu. Anashii wekirajaale sünain tü waaʼinrajatkat süpüla washatüin nukuwaʼipa. Wakaalinjeena maʼin na wawalayuukana washatüle nukuwaʼipa Jehová. Müshi Jesús nümüin Simón: «‹Cefas münüinjachi jooluʼu pia›, (Pedro maluʼulu tia anülieekat)». «Shiʼipa ipa» maluʼulu tü anülieekat Cefas (Juan 1:42). Tü nüküjeekat Jesús nüchiki Pedro shia nümüliajeerüin naaʼin na anoujashiikana jee nükaalinjeenain naya süpüla katchin nanoula. Saashin tü Bibliakat müshii na laülaashiikana maʼaka saaʼin seemioushi wanee ipa miyoʼu süka naaʼinmajüin na wawalayuukana (Is. 32:2). Anakalaka watütüleʼerajiraale waaʼin wapüshuaʼa süpüla washatüin nukuwaʼipa Jehová, chi makai aka saaʼin ipa miyoʼu (Éf. 5:1).

12. ¿Kasa waaʼinrajatka süpüla wakaalinjain na wawalayuukana soʼunnaa müliaa?

¹² Wakaalinja na wawalayuu eʼrakana müliaa. Eeshii wawalayuu ajaʼttakana epia sutuma sukutkujaain mma jee sutuma waneirua kasa. Eeshii na apütakana nepia sutuma eein atkawaa suluʼu tü mma eere kepiain naya. Weeʼiyateerü wamanee namüin naya wawalayuukana wounejaale naya wepialuʼumüin. «Keemeerü maʼin tü mmapaʼakat sülüʼütpa sükalia süpüla sajaʼttüin kasa mojusü». Anashii wakaalinjiraale wapüshuaʼa (2 Tim. 3:1). Eesü süpüla wamüliajüin naaʼin na wawalayuukana jee weeʼiyatüin naalin wapüla. Kamanee waya namüin nantapa suluʼumüin tü Piichi Outkajaaleekat. Waaʼinrüle tia aijiraajeena waya jee aneerü waaʼin wapüshuaʼa. Nnojoluitpa aijiraain wayuu maaʼulu otta eʼrünnüü wayumüin. Müsüjeseʼe anain watütüleʼerüle naaʼin na  wawalayuukana sünain tü outkajawaakat otta weeʼiyata naalin wapüla.

13. ¿Kasa naaʼinrajatka na laülaashiikana süpüla nakaalinjain na wawalayuukana? (Piirakaa sümüin tü ayaakuaakat).

¹³ Natütüleʼerüin naaʼin na laülaashiikana na wawalayuukana soʼunnaa müliaa. Sülatalaʼa sümüle wanee kasa namüin na wawalayuukana jee ayuuijaʼalaʼa nümüle wanee wawala nakumajamaatüin sukuwaʼipa na laülaashiikana süpüla nakaalinjain naya. Otta natütüleʼerüin naaʼin na wawalayuukana sükajee tü Bibliakat. Kamaneere wanee laülaashi jee kapürale naaʼin nakuwaʼipa na waneinnua nnojoleena mmoluin na wawalayuukana sünain achuntaa kaalinwaa nümüin. Müle nakuwaʼipa na laülaashiikana nayaawateerü aaʼu na wawalayuukana alin naya napüla jee naapaajeerü amaa tü namakat namüin sükajee tü Bibliakat (1 Tes. 2:7, 8, 11).

14. ¿Kasa waaʼinrajatka süpüla jüüjüüin waya?

¹⁴ Jüüjüü waya. Anashii weʼnnaajüle suluʼu wakaalinjaliin, shialeekajaʼa soʼunnaa müliaa (Prov. 17:17). ¿Kasa waaʼinrajatka süpüla natüjaain saaʼu na waneinnua jüüjüüin waya sünain kasa süpüshuaʼa? Anasü washatüle nukuwaʼipa Jehová, wekeraaja wanüiki jee wanta maalü sünain tü outkajawaakat (Mat. 5:37). Anashii wakaalinjale na choʼujaakana amüin kaalinwaa. Saapünüle wamüin wanee aʼyatawaa anasü waainjale shia wanaapünaa sümaa tü münakat wamüin.

15. ¿Jamüsü aneetkaʼa nakuwaʼipa na wawalayuukana jüüjüüle na laülaashiikana?

¹⁵ Anasü nakuwaʼipa na wawalayuukana jüüjüüle na laülaashiikana. Kachipünaale naaʼin wanee laülaashi na wawalayuu nüküjakana amaa pütchi arütkaweena naya nünainmüin sünain achuntaa kaalinwaa jee nayaawateerü  aaʼu alin naya nüpüla. Nachiaale na laülaashiikana na wawalayuukana sükajee tü sümakat tü Bibliakat otta sükajee tü sümakat tü karaloʼuta wamaʼanakat, naapaajeerü amaa tü namakat namüin. Nekeraajüle na laülaashiikana tü namakat otta nnojorüle naküjain yalapünaa tü namakat na wawalayuukana namüin, aneerü naaʼin na wawalayuukana naashajaapa namaa.

16. ¿Jamüsü aneetkaʼa wakuwaʼipa otta nakuwaʼipa na waneinnua waaʼinrüle tü anakat noʼuluʼu Jehová?

¹⁶ Waaʼinra tü anakat noʼuluʼu Jehová. Woonoole sümaa nünüiki Jehová jee waneeküle kasa wanaapünaa sümaa tü sümakat tü Bibliakat aneerü wakuwaʼipa napüleerua na waneinnua. Wekirajaale sünain tü Nünüikikat Maleiwa katchinjeerü wanoula otta waneepieena waya nümaa. Waaʼinrüle tia nnojoleena emeejünüin waya jee nnojoleerü woʼunuin süchiirua tü sümakat wayuu (Éf. 4:14; Sant. 1:6-8). Kanourale waya nünain Jehová otta jülüjale waaʼin tü kasa anasü naapüinjatkat wamüin, nnojoleerü ayoʼujaain waaʼin waapapa süchiki kasa mojusü (Sal. 112:7, 8). Eeshiʼiya süpüla wakaalinjain na eʼrakana müliaa (1 Tes. 3:2, 3).

17. ¿Kasa naaʼinrajatka na laülaashiikana süpüla anain nakuwaʼipa napüleerua na wawalayuukana?

¹⁷ Niisattüinjatü nukuwaʼipa wanee laülaashi, laülaainjatü naaʼin, nnojoishi icheinjachin süchiirua nünüiki otta lotuinjatü sukuwaʼipa tü kasa naainjakat. Jüüjüüle nia sümüin tü nümakat Maleiwa nükaalinjeena na wawalayuukana süpüla katsüin nanoula sümaa nachecherüin naaʼin (Tito 1:9; 1 Tim. 3:1-3). Anale nakuwaʼipa na laülaashiikana napüleerua na wawalayuukana jee nalapalaale naaʼu, outkajaweena naya waneepia, aküjeena naya pütchi waneepia jee naaʼinmaajeerü tü ekirajawaakat sünain tü Bibliakat. Shapaale maʼin naaʼin na wawalayuukana saaʼu wanee kasa alataka namüin akaalinjünüshii naya natuma na laülaashiikana süpüla neʼitaain naaʼin nünain Jehová jee süpüla jülüjain naaʼin tü kasa anasü eejeetkat mapeena.

18. ¿Jamüshi waʼwaajeekaʼa Jehová jee aleeweekaʼa maʼin waya nümaa? (Paashajeʼera tü pütchikat « Waaʼinrajatka süpüla aleewain maʼin waya nümaa Jehová»).

¹⁸ Wekirajaaitpa anain tü nukuwaʼipakat Jehová. Eekalaka süpüla wamüin maʼaka naaʼin David, chi aluwataashikai: «Kasataalejeseʼe nuʼwaajünüin Jehová, chi makai aka saaʼin wanee ipa miyoʼu eere tounjulaain» (Sal. 144:1). Eesü süpüla weʼitaain waaʼin nünain Jehová waneepia. Laülaainnale waya eesü süpüla weʼitaain waaʼin sünain nükaalinjeenain waya Jehová süpüla waneepiain waya nümaa. Eekalaka süpüla wamüin mayaa: «Müshi nia tamüin maʼaka saaʼin wanee ipa miyoʼu eere tounjulaain» (Sal. 92:14, 15).