1. Salmo 18:46 yekänti, ¿Davidkwe Jehová ketani drebätä?

 NI ÑAKA nüne kä kwin te, ye medenbätä kukwe tare raba nakainkä jötrö nibätä. ¡Akwa ni raba ja di kärere Jehovai ja dimikakäre ye tä ni töi mike jäme! Kukwe ja tötikara käne yebätä, Jehová ye abokän Ngöbö nire aune tä juto biare ni dimikakäre rababa gare nie. “¡Jehová ye metre aune tä nire!” ye köböire nita nemen dite aune tödeka nikwe tä nirien bäri, Davidkwe niebare Salmo 18:46 erere (ñäkädrebätä). a Ye bitikäre, Davidkwe niebare Jehová ye “Jä tikwe”. ¿Ñobätä Davidkwe, Ngöbö nire, ye ketani jä jondron ñaka nire yebätä?

2. ¿Dre rabai gare nie kukwe ja tötikara nekänti?

² Ñobätä Jehová ye abokän jä kwrere nieta Bibliakwe aune kukwe bämikata ye tä dre driere nie yebätä ja kitai. Jehová rabadre Jä nikwe yekäre dre nuaindre. Mrä mada kukwe keta kabre biti ni raba töi kwin kwe ye bämike ye rabai gare nie kukwe ja tötikara nekänti.

ÑOBÄTÄ JEHOVÁ YE JÄ KWRERE NIETA

3. ¿Biblia tä blite jä yebätä ngwane dre gärätä kwe? (mikadre ñärärä).

³ Biblia ye tä Jehová ye kete jä yebätä niara töi kwin ye mikakäre nüke gare nie. Aune Bibliabätä nitre Jehová mikaka täte kirabe ye tä Jehová töi kwin keta kabre ye käikitekä ngwane, tä kete jä yebätä. Kena Jehová kädekaninte “Jä” ye kwrere Bibliabätä ye raba kwen nie Deuteronomio 32:4 yete. Ana käkwe orasion nuainbare ye ngwane niebare kwe “jä ñaka jire Ngöbö nikwe ye kwrere” (1 Sam. 2:2). Aune Habacuc käkwe niebare Jehová ye abokän “jä tikwe” (Hab. 1:12). Arato ni Salmo 73 tikaka  käkwe niebare Jehová ye abokän “jä ti brukwäkwe ye erere” (Sal. 73:26). Aune Jehová ara käkwe ja kädekani “Jä” ye kwrere (Is. 44:8). Jehová töi kwin ketamä abokän tä bämike niara ye jä ye kwrere aune dre nuaindre ne kwe rabadre “Jä nikwe” ye kwrere yebätä ja kitai” (Deut. 32:31).

4. ¿Jehová ye ni kriemikaka ñobätä ni raba niere? (Salmo 94:22).

⁴ Jehová ye abokän ni kriemikaka. Ñü muriebe minimini jatadre mate, ye ngwane, ni iti raba niken ja kriemike kä mäkä täni o raba niken jä kri täni. Ye erere arato, kukwe tare ben ni ja tuai ye ngwane, ni raba ja kriemike Jehová yebiti (ñäkädre Salmo 94:22 yebätä). b Niara tä ni kriemike aune kukwe tare rabadre bare nibätä abokän raba ni mike ja tare nike kärekäre ye niara ñan tuenmetre, akwa ye ñan. Ja känenkäre, kukwe tare tä ni mike muen aune ñaka tä ni mike nüne kä jutobiti ye diainkä jökrä kwe tä käbämike (Ezeq. 34:​25, 26).

5. ¿Jehová rabadre ni kriemikaka yekäre dre nuaindre?

⁵ Nita orare Jehovai yebiti nita bämike nita ja kriemikebätä. Nita ye erere nuainne ngwane, “kä jäme Ngöbökwe”, tä ni töi aune ni brukwä kriemike (Filip. 4:​6, 7). Dre namani bare Artiombätä ye ani mike gare jai, kukwe mika nämäne täte kwe yebätä nakani ngite. Nuain nämäne tare aune mika nämäne ja dibiti kukwe niekäre. Niara tä niere: “Kukwe ngwantari nämä kite tie ye ngwane, ti nämä nemen ja töibikaire aune kä jürä nämä nemen krubäte tibätä […]. Akwa käre ti nämä ja di kärere Jehovai ne kwe ti töi mikadre jäme kwe aune ti mikadre töbätä kwe. Kukwe ñokwa nie nämäne tie ti töi kwitakäre akwa tikwe ja ngwanba metre […]. Jehová ye rababa ki ye kwrere ti kräke”.

6. ¿Ñobätä ni raba tö ngwen käre Jehovai? (Isaías 26:​3, 4).

⁶ Tö ngwan raba Jehovai. Jä o ngutuä kri ñaka tä niken mento ye kwrere Jehová tä käre yete juto biare ni dimikakäre, ye ie tö ngwan raba. Niara “Jä kärekäre” yebätä ni raba tö ngwenbiti (ñäkädre Isaías 26:​3, 4 yebätä). c Aune niara täi käre yete ja kukwei kitaninkä kwe ye mikakäre nemen bare, aune orasion nikwe kukwe nuakäre, ja di ribei ie ngwane ni dimikai kwe. Nita tö ngwen Jehovai ñobätä ñan aune nire tä niara mike täte yei tä ja ngwen metre (2 Sam. 22:26). Aune dre dre nuainta nikwe ye ñaka käi kwitaikä jire jabiti kwe aune kukwe kwin mikadi nemen bare kwe ni kräke (Heb. 6:10; 11:6).

7. ¿Nita tö ngwen Jehovai ye ñobätä kwin ni kräke? (Üai mikadre ñärärä).

⁷ Jehová rabadre jä kwrere ni kräke yekäre tö ngwandre kwatibe ie. Arato gare metre nie nita ja tare nike ye ngwane nikwe niara mikadre täte ye kwin ni kräke (Is. 48:​17, 18). Tä ni dimike ye ngwane, nita tö ngwen ie ye tä nemen bäri dite.  Jehová diebiti ni tädi juto biare ja tuakäre kukwe tare rabadre bare nibätä ye ngwane. Ruäre ngwane ni mada ñaka raba ni dimike jire tä nemen ruin nie ye ngwane, Jehová tä yete ni dimikakäre käre aune ñaka ni mikaite kaibe gare metre nie. Ja mräkä Vladimir tä niere: “Ti rakaba ngite ye ngwane ja rababa ruin bäri Jehová ken tie. Aune ye ngwane ti rababa tö ngwen bäri ñobätä ñan aune ti nämä kaibe yebätä aune tikwe ja nuaindre ye ñaka rababa gare tie”.

8. a) ¿Jehová tä kwekebe yete ja käntibe ye ñobätä nie raba? b) ¿Jehová ye abokän Jä ye kwrere mikadre tuin jai ye ñobätä kwin ni kräke? (Salmo 62:​6, 7).

⁸ Jehová ye abokän tä kwekebe yete. Jä kri aune ngutuä kri tä kwekebe yete aune ñaka nikwitekä tibien ye erere Jehová. Niara töita ño kä ja känenkäre kräke aune tä ja ngwen ño ye ñaka kwite jire (Mal. 3:6). Adán aune Eva ja mikani rüere ye ngwane, niara töita ño nitre kä tibienbätä kräke yebätä ñaka ja töi kwitani jire kwe. Apóstol Pablo käkwe niebare, Jehová “niara abko ñan raba ja kukwei kite temen” (2 Tim. 2:13). Ne tä mike gare nie nitre tä ja ngwen ño o dre nuainne akwa Jehovata ja ngwen ño aune töita dre nuainbätä ja känenkäre ye erere mikai nemen bare kwe. Kukwe ne rabadre gare nie ye tä ni dimike tö ngwen bäri ie ja tuata kukwe tare ben ye ngwane aune kukwe käbämikata kwe yebiti arato (ñäkädre Salmo 62:​6, 7 yebätä). d

9. ¿Dre nemen gare mäi Tatiana yebätä?

⁹ Jehová töi kwin keta kabre aune töita ño kä tibien kräke bätä nitre kä tibienbätä kräke yebätä töbikadre, ye käkwe ni dimikai niara ye mike tuin jai jä ni kriemikakäre ye kwrere. Ye käkwe ni dimikai ñaka ja töibikare kukwe tare ben ni täi ja tuin ye ngwane (Sal. 16:8). Ye erere namani bare meri iti testiko kä Tatiana yebätä, niara nakani ngite nämäne Jehová mike täte yebätä. Tä niere: “Ni mada ñaka mikaba näin tikänti, kenanbe ñan rababa nuäre ti kräke aune ti di riakaba”. Tatiana nämäne töbike kukwe nämäne nemen barebätä yebätä aune nükani gare ie, kukwe jökrä ye nämäne nakainkäbätä Jehová mikabätä täte yekwe mikani dite. Niara tä niere: “Jehová tare tikwe aune dre tuin kwin ie erere ti nämä nuainne, yebätä ti nämä yete ti ngwanba törö jai. Aune ñaka töbike ja aibebätä”.

10. ¿Jehová rabadre Jä ja kriemikakäre ye kwrere mä kräke yekäre mäkwe dre nuaindre?

¹⁰ Kukwe tare köböra kite nakainkä ye medenbätä nikwe tö ngwandre ye nikwe ribei bäri jai. Nengwane nikwe ja di ribei ye ngwane Jehovakwe ni dimikai ja ngwen metre yei tö ngwandre kwatibe. Akwa ¿tö ngwanta nikwe ye mikakäre bäri dite dre nuaindre? Ñäkädre kukwe namani bare kirabe Bibliabätä yebätä, arato nengwane ja mräkätrebätä kukweta nemen bare yebätä. Nitre Jehová mikaka täte ye kräke Jehová namani ño Jä ja kriemikakäre ye kwrere ye mikadre gare jai. Aune töbikadretaribätä  ye käkwe ni dimikai niara mike tuin jai Jä ja kriemikakäre ye kwrere.

JEHOVÁ TÖI KWIN YE ERERE JA NGWANDRE

11. ¿Töi kwin keta kabre Jehovakwe ye erere ja ngwandre ye ñobätä kwin? (Recuadro “ Monsotre bati raba kukwe ne mike nuaindre jai” ye mikadre ñärärä).

¹¹ Jehová töi kwin keta kabre abokän ruärebätä ja kiti käkwe miri gare metre nie Jehová ye abokän jä ja kriemikara ye kwrere. Akwa ja käne mada ni raba ja ngwen ño niara erere yebätä ja kitai. Nikwe ja di ngwen bäri ja ngwen niara erere ngwane, rabai bäri nuäre ni kräke ja mräkätre konkrekasionte dimikakäre. Ñodre, Jesús käkwe Simón kädekani Cefas (ye abokän kwitata Pedro) aune ye “jäkwata kri” ye kwrere meden gärätä (Juan 1:42). Yebiti mikani gare kwe Pedro ye abokän rabai konkrekasion dimikaka aune töi mikaka jäme. Ne madakäre Biblia tä niere nitre umbre konkrekasionte ye “jäkwata kri känti ja kriata” abokän tä ja mräkätre konkrekasionte ye kriemike (Is. 32:2). Metrere Jehová töi kwin keta kabre ye erere ni raba ja ngwen aune nemen jä ja kriemikakäre konkrekasionte ye kwrere (Efes. 5:1).

12. ¿Dre nuaindre rabakäre kä ja kriemikara ye kwrere ja mräkätre kräke?

¹² Ni rabadre kä ja kriemikara ye kwrere ja mräkätre kräke. Kukwe tare tä nemen bare o rüta nakainkä ye ngwane, ni raba ja mräkätre kain ngäbiti ja gwirete. “Kä krüte” ne näire, kukwe bäri tare tä nemen bare, yebätä ni rabadre ja dimike bäri kwärikwäri (2 Tim. 3:1). Ni raba nemen kä ja kriemikara ye kwrere ja mräkätre kräke nita niaratre töi mike jäme aune dimike ja üairebiti yebiti. Ñodre, tätre niken gätäbätä ye ngwane, nikwe kadre ngäbiti kwin aune kä rabadre jutobätä yekäre. Kä te nita nüne nete nitre ñaka ja mike ütiäte aune ñaka ja tarere. Ye medenbätä, ja mräkätre ye tare nikwe aune ja rabadre ruin kriemikani ie gätäte ie ni tö.

13. ¿Nitre umbre ji ngwanka ye raba nemen ño kä ja kriemikara ye kwrere? (Üai mikadre ñärärä).

 ¹³ Ja mräkätre umbre ji ngwanka konkrekasionte ye raba nemen kä ja kriemikara ye kwrere ja mräkätre kräke. Ñodre, kukwe tare tä nemen bare o ja mräkätre jänrikadre hospital ye tä nemen ribere jai jötrö ngwarbe ye ngwane nitre umbre tä dimike, arato dimikata ja üairebiti kwetrekwe. Ni umbre ji ngwanka ye tä ni mada tarere, ni mada töi mike nüke gare jai aune ni kukwe nua gare kwin ie ngwane, tä nemen nuäre ja mräkätre kräke ja di käräkäre ie. Aune niaratre tä mäträre Bibliabiti ye mikakäre täte arato (1 Tes. 2:​7, 8, 11).

14. ¿Dre nuaindre ne kwe tö ngwandre nie?

¹⁴ Tö ngwan rabadre nibiti. Nitrekwe ni känändre ja dimikakäre ye ie ni tö, aune bärira jire kukwe tare tä nemen bare ye ngwane (Prov. 17:17). ¿Dre nuaindre ne kwe tö ngwandre nie? Nita dre käbämike ye erere mikadre nemen bare aune ñongwane o ora nuäi nieta ye erere ni rabadre nuainne (Mat. 5:37). Arato ja mikadre juto nitre dimikakäre. Sribi mikata ni kisete ye ngwane dre dre nuaindre sribi ye nuainkäre ye erere mikadre täte.

15. ¿Ni umbre ji ngwanka konkrekasionte yebiti tö ngwanta ye tä konkrekasion dimike ño?

¹⁵ Ni umbre ji ngwanka ie tö ngwan raba ye  ngwane tä konkrekasion dimike krubäte. Ñodre, ni umbre ji ngwanka tä ja mräkätre grupo kwe yete ye dimike aune ja mräkätre raba niara kärere töi jämebiti ye ngwane jata nemen ruin kwin ja mräkätre ie. Nitre umbre ji ngwanka ye tä juto biare ja mräkätre dimikakäre ngwane jata nemen ruin tarebare ja mräkätre ie arato. Ne madakäre, tä mäträre akwa tä töbike ño ye ñan ai nieta kwe ñakare aune Biblia aune täräkwata bianta juta Ngöbökwe tä dre niere yebiti tä nuainne ngwane ja mräkätre tä nemen tö ngwen bäri ie. Kukwe ruäre nitre umbre ñaka kä driere ni jökrä ben yebätä tä ja ngübarebiti aune tä ja kukwe mike nemen bare ye ngwane arato.

16. ¿Kukwe tuin kwin Jehovai ye nita nuainne käre ye tä ni dimike ño aune nita nitre mada dimike ño?

¹⁶ Kukwe tuin kwin Jehovai ye erere nuaindre käre. Kukwe ja jie ngwankäre Bibliabiti ye ererebiti nikwe ja jie ngwain käre ngwane kukwe kwin bämikai jankunu nitre mada käne. Nikwe ja tötikai Bibliabätä tödeka mikakäre dite aune tö ngwankäre bäri kukwe metrebiti ye köböire, nitre kä nebätä tä töbike ño ye erere nikwe ñaka töbikai ngwarbe kwäräkwärä (Efes. 4:14; Sant. 1:​6-8). Kukwe blo nieta kukwe nuata nikwe ye ngwane tödeka aune kukwe käbämikata Jehovakwe ye tä ni dimike ñaka töbike krubäte (Sal. 112:​7, 8). Arato ni raba nitre tä ja tuin kukwe tare ben ye dimike (1 Tes. 3:​2, 3).

17. ¿Dre nitre umbre ji ngwanka dimikai konkrekasion tädre dite yekäre?

¹⁷ Ni umbre ji ngwanka ye rabadre töbike kwin ja käne, ni töi mike nüke gare jai aune ja ükete kwin. Rabadre Ngöbö kukwei metre diribare ye ‘ketete dime’ aune konkrekasion dimike Ngöbö töita ño ye erere nuainne käre (Tito 1:9; 1 Tim. 3:​1-3). Tätre kukwe kwin bämike nitre kukwe driekä ye käne, tä Ngöbö kukwei mike täte, käre tä kwen gätäbätä, kukwe driere aune ja tötike kaibe. Aune ja mräkätre tä ja tuin kukwe tare ben tä ngwen ja tare nike aune töbike ye ngwane nitre umbre tä juto biare dimikakäre Jehová töita dre nuainbätä ye ngwankäre törö ietre.

18. ¿Ñobätä ni tö Jehová käikitaikä aune rökrai bäri ken? (Recuadro “ Kukwe keteiti raba ni dimike nökrö Jehová ken” ye mikadre ñärärä).

¹⁸ Töi kwin keta kabre Jehovabätä nikwe mirira gare jai ye bitikäre ja nemen ruin nie David erere. Niebare kwe: “Jehová Ngöbö, Jä tikwe ye rabadre käikitaninkä” (Sal. 144:1). Jehová ye abokän Ngöbö nikwebiti ni raba tö ngwen käre aune kä jökrä ngwane. Nita monsore o bati nememe umbre ngwane niara tä ni dimike käre. Yebätä ni raba niere töi kwatibebiti Jehová ye abokän : “Jä tikwe” (Sal. 92:​14, 15).