1. Nk’oku biyerekenwe omu Zaburi ye 18:46, Daudi alishushanyize Yehova na bichi?

 MANGO maguma rhwakahurana n’ebibazo bikomere omu kalamo changwa byakahindamula akalamo kerhu loshi loshi. Rhugwerhe eshukrani y’okumenya oku nka rhulibirhire Yehova Mungu, akarhurhabala! Omu mwazi gugerere rhwaliyigire oku Yehova ali Mungu olamire n’okw’amango moshi aba tayari kurhuha oburhabale. Amango rhwamapata oburhabale bwage, echola chinarhuma rhwachizera oku “Yehova ali Mungu olamire!” (Osome Zaburi 18:46.) Chechirhumire, amango Daudi amala kuderha ebyola binwa, ayirika Mungu “Lubale lwani.” Bulagurhe Daudi ashushanyize Yehova Mungu olamire n’echintu chirhakayisa, k’okuderha olubale?

2. Bichi ebinwa bya Daudi by’okuderha oku Yehova ali nka Lubale lwage byakarhuyigiriza?

² Mu gunola mwazi, rhwayiga bulagurhe Yehova ayirikirwe lubale na bichi ebyola binwa by’omufano birhuyigirize oku bimulolere. Rhwashuba kubona nka gurhe nerhu rhwakamubona nka Lubale lwerhu. Buzinda, rhwayiga enjira rhwakayiganya mw’engeso za Yehova z’okuba nka lubale.

BULAGURHE YEHOVA AYIRIKIRWE LUBALE

3. Gurhe Ebiblia ezigana kolesa echinwa “lubale”? (Olole efoto y’okuchiganda.)

³ Ebiblia eshushanyize Yehova “n’olubale” omu kurhurhabala rhuyunve ziguma omu ngeso zage. Mango manene, abakozi ba Yehova bana musingiza eju y’engeso zage zisomeze. Bana muhuzanya omu Ebiblia n’olubale. Efasi y’oburhanzi Yehova ayirikirwe okw’ali “Lubale” hali omu Chitabu cha Kumbukumbu la Torati 32:4. Omu sala, Hana aderha ntya: “Nta lubale luli nka Mungu werhu.” (1 Sa. 2:2) Habakuki ayirikire Yehova “Lubale lwage.” (Hab. 1:12) Omwandisi we Zaburi ya 73 ayirikire Mungu “lubale l’omurhima gwage.” (Zb. 73:26) Na Yehova yenyine achiyirikire okw’ali nka lubale. (Isa. 44:8) Lekaga rhuganire ku ngeso esharhu za Yehova zinamujira abe nka lubale. Rhwamenya na gurhe rhwakamujira abe “Lubale lwerhu.”​—Kum. 32:31.

4. Nka gurhe Yehova ali malibirhiro? (Zaburi 94:22)

 ⁴ Yehova ali malibirhiro. Amango m’envula y’echihusi omuntu akapata obulanzi amango amachibisha omu lukunda. Intyo kon’oko Yehova anarhulanga amango rhuli rhwahurana ebibazo bikomere omu kalamo kerhu. (Osome Zaburi 94:22.) Anarhurhabala kulanga obwira bwerhu haguma naye, n’okurhurhabala rhuyemere kweri oku nta chintu n’echiguma rhuli rhwahurana zene chakarhulimbula loshi loshi. Anarhulaganyize oku nj’amala byoshi bili byarhubuza omurhula n’okurhuma rhurhaba omu bulanzi.​—Eze. 34:25, 26.

5. Nka gurhe Yehova akaba nka lubale lwerhu l’okulibirhiramo?

⁵ Njira nguma rhunajira Yehova abe lubale lwerhu l’okulibirhiramo, kuli kumusalira. Amango rhwamasalira, Yehova anarhuha “omurhula gwa Mungu” gunalanga omurhima n’obwenge bwerhu. (Flp. 4:6, 7) Rhuganire oku mufano gwa mwene-werhu Artem walifungirwe eju y’obwemere bwage. Amango aliri omu pirizo, omuntu waliri amusambisa aliri amukolera kubi n’okulonza kumuyubahisa. Mwene-werhu Artem aderhere ntya: “Buli mango m’okusamba naliri nayunva ndagire bwenene. . . . Naliri nasalira Yehova. Nanamuhema omurhula g’omu murhima n’obwengehe. Amayeri oyola muzuzi aliri akolesa ntacho mankolereko chiro haban’akatyu. . . . Kugerera oburhabale bwa Yehova, naliri nk’oyumangire enyuma w’echibambazi ch’ebale.”

6. Bulagurhe rhwakalangalira Yehova amango moshi? (Isaya 26:3, 4)

⁶ Yehova ali wakuchizerwa. Kuguma n’ok’olubale lurhakarhenga ahaluli, Yehova aliho buli mango y’arhurhabala. Rhwakamulangalira bulala ali “Lubale esiku n’amango.” (Osome Isaya 26:3, 4.) Agenderera kuba aliho y’ayeneza ebilagane byage, y’ayunviriza amasala merhu, n’okurhuhereza oburhabale rhukenere. Kandi rhwakalangalira Yehova bulala ali mwimana ku balala bana muharamya. (2 Sa. 22:26) Nta mango nj’ayibagira ebirhwamukolere, n’amango moshi nj’arhuhemba.​—Ebr. 6:10; 11:6.

7. Bichi rhwakachibonera amango rhwamalangalira Yehova? (Olole n’efoto.)

⁷ Rhunajira Yehova abe Lubale lwerhu amango rhwamamulangalira n’omurhima goshi. Rhulangalire oku rhukamukenga chiro n’omu bibazo bikomere, rhwapata enyungu. (Isa. 48:17, 18) Oku rhunali rhwachibonera okuntu yarhurhabala, ku rhwanagenderera kumulangalira bwenene. Naho, rhwaba eyi rhuchirheganyize bwinja bwinja kulwisa ebibazo Yehova yewe yenyine akarhurhabala kumala. Amango rhuli rhwahurana ebibazo eyi na nta muntu rhwakalibirhira okw’arhurhabale, aho harhunaja rhwachibonera oku Yehova ali wakulangalirwa bwenene. Mwene-werhu Vladimir aderhere ntya: “Ebisanzi namalire eyindi omu pirizo, bye byaliri bisanzi bikwirire bwenene oku bilolere obwira bwani haguma na Yehova. Naliyigire kulangalira Yehova bwenene bulala naliri nyenyine, na yenyine yi wakantabere kulembera ebibazo nalirimo.”

8. a) Bulagurhe rhwakaderha oku Yehova arhashaganyika? b) Okugwarha Mungu oli nka Lubale kunarhulerhera nyungu zihe? (Zaburi 62:6, 7)

⁸ Yehova arhashaganyika. Yehova ali nka lubale luzibu-zibu, changwa nka musozi gunayorha  ogo g’onogo. Engeso zage n’omuhigo gwage birhahindamuka. (Mal. 3:6) Amango Adamu na Eva bachijira bigamba, Yehova arhahindamulaga omuhigo gwage aligwerhe oku bantu. Nk’okw’entumwa Paulo ayandikaga, Yehova “arhakachihakana yewe yenyine.” (2 Ti. 2:13) K’okuderha oku chiro byaba gurhe, chiro abantu bajira gurhe, Yehova arhakafa ahindamwire engeso zage, omuhigo gwage changwa amakanuni mage. Bulala Yehova arhahindamuka, rhumenyere okw’arhurhabala omu bihe bikomere n’oku nj’ayeneza ebilagane byage by’amango mayinjire.​—Osome Zaburi 62:6, 7.

9. Bichi ebi Tatyana agereremo bikuyigirize?

⁹ Nka rhukengerere oku ngeso za Yehova, n’omuhigo agwerhe oku gulu n’oku bantu, echola chakarhurhabala rhumulangalire, n’okumujira Lubale lwerhu. Echola charhurhabala rhuyorhe rhurhulerere n’okuyorha bemana kuye amango m’ebigeregezo. (Zb. 16:8) Intyo kubyaliberere mwali-werhu oyirikirwe Tatyana bashwekaga eju y’obwemere bwage. Aderhere ntya: “Nalichibuganire indi nyenyine. Okumurhondero byalikomere. Mango manene, naliri nachiyunva nvunikire omurhima.” Naho, arhondera kukengera ku Yehova n’oku muhigo gwage oku bilolere abantu. Arhegera bulagurhe kw’aliri kwakamaro okulembera echola chigeregezo. Okujira ntyo kwamurhabala achiyunve arhulerere, kwanamuhereza emisi y’okuyorha mwimana. Ayongerere ntya: “Okumenya bulagurhe ebyola byaliri byarhengerera, kwali ntabere nyibuke oku ndi napata ebila bibazo byoshi bulala yinakolera Yehova. Echola charhuma ntachiyinja n’achiseza k’obwenge.”

10. Gurhe Yehova akaba Lubale lwerhu zene?

¹⁰ Omusiku zayinjire, rhwahurana ebibazo bikomere byarhuhema rhulangalire Yehova bwenene kulusha zene. Zene kakasanzi k’okukomeza obwizere bwerhu oku nj’arhuha byoshi rhukenere yi rhulembera oku bwimana. Nka gurhe rhwakajira ntyo? Omu kusoma engani ze Biblia n’emifano y’abakozi ba Yehova bazene. Orhegere nka gurhe Mungu aliyerekene engeso zili nka z’olubale omu kurhabala abakozi bage. Owaze bwenene kw’ezola ngani. Okujirantyo kwakurhabala ojire Yehova Lubale lwawe.

OYIGANYE ENGESO ZA YEHOVA ZILI NKA LUBALE

11. Bulagurhe rhulonzeze kuyiganya engeso za Yehova zili nka lubale? (Olole echisanduku “ Omuhigo ku Bene-berhu Bachili Misole.”)

¹¹ Rhwabwene nka gurhe Yehova anayerekana kwali nka lubale. Rhujage rhwalola nka gurhe rhwakayiganya engeso zage zinja zili nka lubale. Nka rhujirire okwerhu koshi rhugalire yi rhuyiganya engeso za Yehova, rhwakakomeza bene-berhu na bali-berhu. Omufano, Yesu alihere Simoni ezino lya Kefa (litafsiribwe “Petro”), k’okuderha “Chisharhe ch’Olubale.” (Yoh. 1:42) Yesu aliderhere oku Petro akarhulirize abandi omu chibaga n’okw’akakomeze obwemere bwabo. Abashamuka be chibaga bali nka “nchuchu y’olubale luzibu-zibu.” K’okuderha banalanga balala bali omu chibaga. (Isa. 32:2) Kweri, echibaga  choshi chinapata enyungu amango bene-berhu na bali-berhu boshi yi bayiganya engeso za Yehova zili nka lubale.​—Efe. 5:1.

12. Fasiriya nka gurhe rhwakaba malibirhiro m’abandi.

¹² Obe malibirhiro. Amango bene-berhu na bali-berhu bamaheza ahamwabo changwa bamahama eju y’echinjira changwa eju y’evita, rhwakabera nabo ahamwa berhu. Nk’okw’ehali yizagenderera kubiha bwenene “mu zinola siku z’obuzinda,” rhwagwarha njira zinene z’okurhabalamo bene-berhu na bali-berhu. (2 Ti. 3:1) Kandi rhwakaha bene-berhu na bali-berhu echirhulirizo n’okubayereka obuzigire bakenere. Njira nguma rhwakagala kujiramo ntyo kuli kuganira nabo amango bamayinja oku mbuganano n’oku baheba omurhima. Rhulonzeze echibaga ebe fasi y’obuzigire n’okuhebana omurhima. Zene, bantu banene yi bakolerana kubi. Echola chakarhuma bene-berhu na bali-berhu bayunva mulago gunene n’okuchiyunva nka ntaye obazigire. Bobola, amango bene-berhu na bali-berhu bamayinja oku mbuganano, rhulonzeze kujira okwerhu koshi rhugalire yi bachiyunva bazigirwe, baluhukire banali omu bulanzi.

13. Gurhe abashamuka bakaba malibirhiro m’abandi? (Olole n’efoto.)

¹³ Abashamuka bakaba hantu bene-berhu na bali-berhu bakalibirhira amango bali bahurana ebibazo bikomere. Amango m’echinjira changwa amango bihemerwe kubukwa juba juba, bihemere abashamuka bapange juba juba gurhe barhabala bene-babo na bali-babo. Banahana n’oburhabale bw’ekiroho. Bene-berhu na bali-berhu bachiyunva huru kuja kuhema omushamuka oburhabale nka bamenyere okw’abaganiza bwinja, okw’abayunviriza, n’okwachihangana kuchiheba oku nafasi yabo. Engeso zili nk’ezola zinarhabala abandi bachiyunve bazigirwe, n’echola chanarhuma byabayorohera kukolesa amahano me Biblia omushamuka akabaha.​—1 Te. 2:7, 8, 11.

14. Gurhe rhwakayerekana oku rhuli bakuchizerwa?

 ¹⁴ Obe wakuchizerwa. Rhuba rhulonzeze abandi banihire oku rhwakabarhabala, ahanene amango m’ebibazo. (Mez. 17:17) Gurhe rhwakajira yi rhuba bantu abandi bakachizera? Rhunajira okwerhu koshi yi rhuyiganya Yehova buli lusiku. Omufano, omu kuyeneza ebilagane byerhu n’oku kenga ebisanzi. (Mt. 5:37) Changwa nka rhumenyere muntu mulebe okenere oburhabale, rhwakamurhabala. Kandi, rhunajira okwerhu koshi yi rhuyeneza engabane zerhu omu kukulikira obwerekezi rhwahabirwe.

15. Bunguke buhe echibaga chinapata amango abashamuka bali banihirwa changwa bakuchizerwa?

¹⁵ Abashamuka banihirwa eli migisho oku chibaga. Nka gurhe? Abahubiri banachiyunva bwinja amango bakagala kuganira n’abashamuka amango moshi moshi bakaba bakenere oburhabale. Omufano, nk’omwimangizi we chikundi chabo ch’amahubiri. Bene-berhu na bali-berhu banashuba kuchiyunva bazigirwe amango bamamenya okw’abashamuka bali tayari kubarhabala. Na bulala amahano mabashamuka maba mayumangire oku Biblia n’oku bitabu by’omuja  mwimana onakengukire s’arhali oku mawazo mabo, bene-babo na bali-babo banabalangalira. Eyindi mpanvu enarhuma bene-berhu na bali-berhu balangalira abashamuka, eli bulala banabika esiri y’ebintu bababalire barhalonzeze okw’abandi babimenye, banayeneza n’ebilagane byabo.

16. Nyungu zihe rhunapata amango rhwamajira ebi Yehova abwene oku bili binja?

¹⁶ Buli mango ojire ebi Yehova aderhere oku bili binja. Nka rhukengere Yehova omu bintu byoshi n’okurhola esimikiro ziyumangire oku Biblia, rhwaba mufano gwinja oku bandi. Amango rhuli rhwayiga Echinwa cha Mungu n’okukomeza obwemere bwerhu mu Yehova, rhwaba bemana kuye n’oku makanuni mage. Rhwamenya enyigirizo z’obubeshi n’amawazo marhapatene na ma Yehova, rhurhanarhebekwa n’amola mawazo. (Efe. 4:14; Yak. 1:6-8) Obwemere bwerhu mu Yehova n’omu bilagane byage binarhurhabala kuyorha rhurhulerere amango rhwamayunva emyazi mibi. (Zb. 112:7, 8) Kandi, rhwagwarha obuhashe b’okurhabala balala bakaba bali bahurana ebigeregezo.​—1 Te. 3:2, 3.

17. Bichi binarhabala abashamuka babe bantu bakarhuma abandi barhashaganyika?

¹⁷ Abashamuka bakwanene kugwarha olugero omu ngeso zabo, obwenge burhulerere, oku panga ebintu bwinja, banayunva n’abandi. Abashamuka banarhabala abandi barhulere, bagwarhe n’obwemere bukomere mu Yehova n’oku komeza echibaga “chinanire bwenene echinwa ch’obwimana.” (Tit. 1:9; 1 Ti. 3:1-3) Kugerera omufano gwabo n’akasi kabo k’obulagizi, abashamuka banarhabala abahubiri bahike oku mbuganano, oku mahubiri, n’okujira efunzo lyabo lyabo oku kahunda. Amango bene-berhu na bali-berhu bagwerhe ebibazo bibalazize, abashamuka banabayibusa oku balangalire Yehova n’okuseza obwenge oku bilagane byage.

18. Bulagurhe rhulonzeze kusingiza Yehova n’okuba hofi-hofi bwenene naye? (Olole n’echisanduku “ Enjira Rhwakayegera mu Yehova.”)

¹⁸ Omu kumala kuganira oku ngeso zinja za Yehova, rhwakaderha kuguma n’Omwami Daudi: “Yehova Lubale lwani, asingizwe.” (Zb. 144:1) Amango moshi Yehova aba Mungu rhwakalangalira. Omu kalamo kerhu koshi chiro n’amango rhwamashaja, rhulangalire kw’agenderera kurhurhabala rhugenderere kubera hofi naye. Rhwakana derha nantya: “Ali Lubale lwani.”​—Zb. 92:14, 15.