1. Tëm noo Psalm 18:46, mit was hot Tawi Yeehoowa ferklaycht?

 UF EEN mool, khene mer propleeme mit mache woo unser leepe kans xlimer lose orer ënere. Meyer sin petanklich tas mer Yeehoowa suuche khene fer hilef kriin. Im letste artikel, hon mer kesiin tas Yeehoowa te lepeentiche Kot is un tas eyer imer fërtich fer uns helfe is. Sayn hilef kriin, lost uns noch sicher tas “Yeehoowa leept!” (Lees Psalm 18:46.) a Awer noo tiise wërter saan, hot Tawi Kot ferklaycht mit etwas woo net lepeentich is: tee hot Yeehoowa wii “mayn Fels” kenënt. Was wolt eyer saan?

2. Iwer was tuun mer in tiise artikel xpreche?

² Warom is Yeehoowa mit een fels ferklaycht? Was lërne mer iwer tëm too temit? Wii khene mer tëm wii unser Fels siin? Wii khene mer tëm sayn kwaliteete noo mache? Tas is was mer in tiise artikel lërne tuun.

WAROM IS YEEHOOWA WII EEN FELS?

3. Wii tuut ti Piipel tas wort “fels” ofts penutse? (Kuk tas pilt.)

³ Ti Piipel ferklaycht Yeehoowa mit een fels fer uns helfe etliche fon sayn kwaliteete ferxteen. Ofts, wën Kot sayn tiiner tëm loope weeche sayn wunerliche kwaliteete, tuun se Yeehoowa wii een fels in te Piipel pexraype. Yeehoowa is tas eyerste mool wii “te Fels” kenënt in Teuteronoomyum 32:4. In een kepeet, hot Ana kesaat tas “es kept khee fels soo wii unser Kot”. (1 Sam. 2:2) Hapakuk hot Yeehoowa wii “mayn Fels” kenënt. (Hap. 1:12) Te xrayper fom Psalm 73 hot Yeehoowa wii “te fels fon mayn hërts” pexrip. (Psal. 73:26) Un soo kaar Yeehoowa hot sich selepst wii een fels pexrip. (Isa. 44:8) Wole mer yets 3 kwaliteete noo kuke woo tsayche tas Yeehoowa wii een fels is un  wole mer aach lërne wii mer khene Yeehoowa wii “unser Fels” siin. (Teut. 32:31)

4. Wii soo is Yeehoowa een xuts plats? (Psalm 94:22)

⁴ Yeehoowa is een xuts plats. Torich een kefeerlich xtorm, khan een persoon xuts unich een fels fine. Kraat soo, Yeehoowa xitst uns torich ti xweyere tsayte fon unser leepe. (Lees Psalm 94:22.) b Tee helft uns unser fraayntxaft mit tëm xitse un lost niks uns eewiche xaate pringe. Un tee ferxprecht im futuer wech hoole ales was uns ëngstlichkheete pringt orer uns layte macht. (Ese. 34:25, 26)

5. Wii khene mer xuts fon Yeehoowa kriin?

⁵ Een aat wii mer khene xuts fon Yeehoowa kriin, is tsu tëm peete. Wën mer peete, kept uns Yeehoowa “Kot sayn friit” woo unser hërts un ketanke xitst. (Fili. 4:6, 7) Kuk mool Artem sayn speryens, een pruuter woo in kexpërt kep is weeche sayn klaape. Wii tee in te katee waar, hot een krop inwestikatoer tëm fiil mool aus kefroot. Tee hot Artem unertrikt un niter kextelt. “Imer wën te inwestikatoer mich aus kefroot hot, sin ich unruych kep — saat Artem. — Ich hon imer tsu Yeehoowa kepeet. Ich hon hilef ferlangt fer in ruu plaype un kluucheet hon. Opwool ti yachtung, sin ich in ruu keplip. (…) Weeche Yeehoowa sayn hilef, es waar wii wën een mauer aus xteen mich kexitst hot.”

6. Warom khene mer imer uf Yeehoowa traue? (Isayas 26:3, 4)

⁶ Yeehoowa is yemant woo mer traue khene. Soo wii een kroos fels orer përich sich net fom plats ënert, soo sin mer uns sicher tas Yeehoowa pay uns wërt fer uns helfe. Meyer khene uf tëm traue, wayl eyer “te eewiche Fels” is. (Lees Isayas 26:3, 4.) c Tee wërt imer lepeentich sin fer sayn ferxpreche hale, unser kepeete horiche un uns hilef kepe. Meyer khene aach uf Yeehoowa traue wayl eyer leaal is mit tëne woo tëm tiine. (2 Sam. 22:26) Tee tuut sich nii ferkese fon was mer mache un tee tuut uns imer peloone. (Hep. 6:10; 11:6)

7. Wën mer uf Yeehoowa traue, was tuut mit uns pasiire? (Kuk aach tas pilt.)

⁷ Yeehoowa wërt unser Fels sin wën mer kans uf tëm traue. Meyer sin uns sicher tas, wën mer tëm foliche soo kaar in te xweyere tsayte, tuun mer nutse kriin. (Isa. 48:17, 18) Yeetes mool woo mer mërke Yeehoowa sayn hilef in unser leepe, wërt unser fertraung uf tëm xtërker. Meyer kriin ti sicherheet tas ploos Yeehoowa uns helfe khan kwalkee proop aus hale — een tuun wii xweyer se is. Ofts, wën mer situatsyoone mit mache woo nimant uns helfe khan, mërke mer wii fiil mer uf Yeehoowa traue khene. Vladimir saat: “Ich hat mich noch nii soo ticht pay Yeehoowa kexpiirt wii in te tsayt woo ich in te katee waar. Ich hon kelërnt mee uf tëm traue, wayl ich kans aleen waar un khee kontrol iwer mayn situatsyoon hat.”

8. (a) Warom khene mer saan tas Yeehoowa sich net ënert? (b) Was fer nutse kriin mer wayl Yeehoowa unser Fels is? (Psalm 62:6, 7)

 ⁸ Yeehoowa ënert sich net. Soo wii een mechtich kroos fels, is Yeehoowa fest un tee ënert sich net. Sayn personaliteet un sayn tsiil tuun sich nii ënere. (Mal. 3:6) Wii Aatam un Ewa sich repeliirt hon, hot Kot sayn tsiil fer ti mënxe net keënert. Soo wii te aphostel Phaul kexrip hot, Yeehoowa “khan net etwas mache woo keet keeche was eyer is”. (2 Tim. 2:13) Es wil saan tas, ekaal was pasiirt orer ti anere mache, Yeehoowa tuut nii sayn kwaliteete, tsiil orer kesetse ënere. Wayl Yeehoowa sich nii ënere tuut, sin mer uns sicher tas eyer uns helfe tuut in te xweyere tsayte un sayn ferxpreche fer te futuer hale tuut. (Lees Psalm 62:6, 7.) d

9. Was host tuu mit Tatyana sayn speryens kelërnt?

⁹ Yeehoowa wërt unser Fels sin wën mer triwer noo tenke aan sayn kwaliteete un aan sayn tsiil fer ti eyert un ti mënxe. Tas mache, tuut uns helfe in ruu plaype un leaal tsu tëm sin torich ti proope. (Psal. 16:8) Tas is mit een xwester pasiirt, woo Tatyana heest. Tii solt inkexpërt in sayn haus plaype weeche sayn klaape. “Ich waar kans aleen — saat se. — Es waar, am aanfang, kaar net laycht un ich sin ofts oone muut kep.” Awer tan hot se aan kefang triwer noo tenke aan Yeehoowa un sayn tsiil fer ti mënxe. Too hot se kemërkt wii wichtich es waar tiise proop aus hale. Tas hot se keholef sich in ruu xpiire un hot se kraft kep fer troy plaype. Tii hot kesaat: “Ferxteen warom tas mit mich am pasiire waar, hot mich keholef mich traan tenke tas ich in tiise situatsyoon waar weeche Yeehoowa. Tas hot mich keholef noo lose aan mich selepst tenke.”

10. Wii khan Yeehoowa unser Fels yets sin?

¹⁰ Klaych, tuun mer xlime proope mit mache un es wërt neetich uf Yeehoowa traue mee wii noch nii. Tes weeche, yets is ti tsayt fer unser klaape aan Yeehoowa ferxtërke un uns sicher sin tas eyer uns helfe tuut troy plaype foer kwalkee proop. Wii khene mer tas mache? Lees piiplixe kexichte un aach speryense fon Yeehoowa sayn tiiner hayt tsu taach. Mërk wii Yeehoowa sayn tiiner helft. Un tenk tiif too triwer noo. Tas mache, khan tich helfe Yeehoowa wii tayn Fels siin.

MACH YEEHOOWA SAYN KWALITEETE NOO

11. Warom wole mer Yeehoowa sayn kwaliteete noo mache? (Kuk aach te khaste “ Een tsiil fer ti yunge priiter”.)

¹¹ Meyer hon kesiin wii Yeehoowa sayn kwaliteete pewayse tas eyer wii een fels is. Awer yets wole mer siin wii mer tiise kwaliteete noo mache khene. Wën mer uns aan xtrenge fer Yeehoowa sayn kwaliteete noo mache, khene mer unser priiter un xwestere ferxtërke. Tsum payxpiil, Yeesus hot fer Simon te naame Sëfas kep, woo iwersetst is Pheeter un petayt “een  xtik xteen”. (Yoo. 1:42) Yeesus wolt tsayche tas Pheeter teet ti anere in te kemaynt treeste un sayn klaape ferxtërke. Ti elteste in te kemaynt sin pexrip wii “te xate fon een kroos fels”; tas petayt tas se xitse tuun ti priiter un xwestere in te kemaynt. (Isa. 32:2) Kewis kriit ti kemaynt nutse wën al ti priiter un xwestere Yeehoowa sayn kwaliteete noo mache. (Ëfe. 5:1)

12. Wii khene mer een xuts plats fer ti anere sin?

¹² Say een xuts plats fer ti priiter un xwestere. Als mool, khene mer unser priiter un xwestere in unser haus xitse weeche een natuer unklik orer een kriich. Ti situatsyoon in tiise “letste taache” is yeete taach xlimer; tes weeche kriin mer mee oportuniteete fer eene te aner helfe. (2 Tim. 3:1) Meyer khene aach een xuts plats fer unser priiter un xwestere sin wën mer se treeste un liipe. Meyer khene, tsum payxpiil, mit tëne xpreche im Raych Saal tas se sich tehëm xpiire. Meyer wole hon tas ti kemaynt een liiplich un ufmuutich plats wërt. Meyer leepe in een welt woo ti layt sich khalt un krop pehantele. Soo, wën unser priiter un xwestere tsu te fersamlunge khome, wole mer unser pestes mache tas se sich keliipt, uf kemuut un in sicherheet xpiire.

13. Wii khene ti elteste een xuts plats fer ti priiter sin? (Kuk aach tas pilt.)

¹³ Ti elteste khene wii een xuts plats sin fer ti priiter woo xweyere situatsyoone mit mache. Tsum payxpiil, wën een natuer unklik orer een kesuntheet emerxëns pasiirt, tuun ti elteste klaych hilef fer sayn priiter un xwestere orkanisiire. Tii penutse aach ti Piipel fer ti priiter oryentiire un uf muute. Es wërt laychter fer ti priiter hilef fer een elteste ferlange wën eyer liiplich un wilich fer se horiche is un empatii tsaycht. Tiise kwaliteete tuun ti anere helfe sich keliipt xpiire un, soo, es wërt tëne laychter ti piiplixe oryentiirunge woo ti elteste se kepe, aan wëne. (1 The. 2:7, 8, 11)

14. Wii khene mer tsayche tas mer layt sin woo ti anere traue khene?

 ¹⁴ Say yemant woo ti anere traue khene. Meyer wole hon tas ti anere wise tas mer se helfe tuun, hauptseechlich torich ti xweyere tsayte. (Xpr. 17:17) Was khene mer mache tas ti anere uf uns traue? Meyer mise uns aan xtrenge fer Yeehoowa yeete taach noo mache. Tsum payxpiil: meyer mise unser ferxpreche hale un phinktlich sin. (Mat. 5:37) Meyer khene uns aach aan piite fer se helfe tii woo es prayche. Un wën mer een flicht in te kemaynt kriin, sole mer uns aan xtrenge fer tas erfiile tëm noo te oryentiirunge woo mer kriin.

15. Was fer nutse kriit ti kemaynt wën ti priiter uf te elteste traue khene?

¹⁵ Was fer nutse kriit ti kemaynt wën ti priiter uf te elteste traue khene? Ti puplikatoore xpiire sich in ruu wën se wise tas se ti elteste ruufe khene imer wën se hilef prayche. Ti priiter un xwestere xpiire sich aach keliipt wën se wise tas ti elteste wilich sin fer tëne helfe. Wën ti elteste ti Piipel un unser puplikatsyoone penutse fer aanreete kepe, xtats sayn aychne  mënung saan, tuun ti priiter noch mee uf tëne traue. Tas selwiche pasiirt wën ti elteste sayn ferxpreche hale un net fer ti anere fertseele ti sache woo thërfe net aus keprayt wëre.

16. Was fer nutse kriin meyer un ti anere wën mer mache was Yeehoowa saat richtich is?

¹⁶ Mach wayter was Yeehoowa saat richtich is. Wën mer Yeehoowa in ales foliche un ëntxlise mache woo sich aan te Piipel xtaype, wëre mer een kuut payxpiil fer ti anere. Wën mer Kot sayn Wort xtutiire un unser klaape ferxtërke, wëre mer leaal tsu Yeehoowa un sayn kesetse. Meyer tuun klaych ti itee un falxe inlërnunge woo keeche Kot sayn mënung keen, erkhëne; un meyer wëre net fon tëne influentsiirt. (Ëfe. 4:14; Tya. 1:6-8) Unser klaape aan Yeehoowa un sayn ferxpreche halt uns in ruu wën mer xlechte notisye kriin. (Psal. 112:7, 8) Meyer khene aach helfe tii woo xwiirichkheete mit mache. (1 The. 3:2, 3)

17. Wii khene ti elteste ti priiter un xwestere helfe in ruu plaype un een xtarke klaape hon?

¹⁷ Ti elteste sole moos in sayn kewoonheete hon un aach ferninftich, orkanisiirt un net xtreng sin. Ti elteste helfe aach ti anere in ruu plaype un een xtarke klaape hon. Tii ferxtërke ti kemaynt wën se “sich fest aan tëm troy wort hale”. (Tit. 1:9; 1 Tim. 3:1-3) Wën ti elteste een kuute payxpiil kepe un ti puplikatoore uf phase, khene se tëne helfe imer tsu te fersamlunge un ti preetich aarwayt keen un sayn perseenlich xtuutyum mache. Wën ti priiter un xwestere propleeme mit mache woo se ëngstlich lose, tuun ti elteste se uf muute sich aan Yeehoowa un sayn ferxpreche traan hale.

18. Warom wole mer Yeehoowa loope un imer tichter pay tëm khome? (Kuk aach te khaste “ Een aat fer tichter pay Kot khome”.)

¹⁸ Noo tas mer iwer Yeehoowa sayn wunerliche kwaliteete xtutiirt hon, xpiire mer uns soo wii te kheenich Tawi, woo kesaat hot: “Yeehoowa, mayn fels, sol keloopt wëre!” (Psal. 144:1) Meyer khene imer uf Yeehoowa traue. Torich unser kanse leepe, soo kaar wën mer elter wëre, tuut Yeehoowa uns wayter helfe ticht pay tëm plaype. Un soo, khene mer saan: “Tee is mayn Fels.” (Psal. 92:14, 15)