1. Baka ke dipadah ba Masmur 18:​46, David ngangauka Jehovah nama?

 KEKADANG, kitai engka napi penanggul ti ngenyit, ke ulih ngasuh pengidup kitai tusah tauka ngubah pengidup kitai. Tang, kitai amat besyukur laban ulih bepanggai ba Jehovah, ke ulih nulung kitai. Ba artikel sebedau tu, kitai dikingatka, Jehovah nya Petara ti idup, ke seruran sedia deka nulung kitai. Lebuh kitai bulih sukung ari Iya, nya ngasuh kitai andal agi, “Jehovah endang Petara ti idup!” (Bacha Masmur 18:​46, ari nota kaki.) a Tang, pengudah iya madahka nya, David mandingka Petara enggau utai ke enda idup. David ngangauka Jehovah “Gunung Batu aku.” Nama reti tu?

2. Nama deka dikerandauka kitai dalam artikel tu?

² Dalam artikel tu, kitai deka berandauka kebuah Jehovah digambarka baka gunung batu sereta utai ti ulih dipelajarka kitai pasal Iya ari gambaran nya. Kitai mega deka belajarka chara kitai ulih bepanggai ba Jehovah sebagai Gunung Batu kitai. Lalu ke penudi, kitai deka berandauka chara kitai ulih neladan sifat-sifat Jehovah ke baka gunung batu.

NAMA KEBUAH JEHOVAH DIKUMBAI GUNUNG BATU?

3. Baka ni Bup Kudus kesuah iya ngena leka jaku “batu”? (Peda mega gambar.)

³ Bup Kudus mandingka Jehovah enggau “batu” kena nulung kitai meretika sekeda ari sifat Iya. Dalam Bup Kudus, kesuah iya, lebuh bala nembiak Jehovah muji Petara ketegal sifat Iya ti ngalitka ati, sida ngambarka Iya baka “batu.” Kali keterubah Jehovah dikumbai “Gunung Batu” iya nya ba Ulang Adat 32:4. Dalam sampi, Hanah madahka: “Nadai gunung batu ke teguh baka Nuan, Petara kami.” (1 Sam. 2:2) Habakuk ngangauka Jehovah “Batu Penyaga aku.” (Hab. 1:​12, NWT) Penulis Masmur  73 ngangauka Petara “gunung batu aku.” (Mas. 73:​26, NWT) Lalu Jehovah indah ngumbai Diri baka gunung batu. (Isa. 44:​8, NWT) Aram kitai berandauka tiga iti sifat ke ngasuh Jehovah baka gunung batu sereta baka ni kitai ngasuh Iya nyadi “Gunung Batu” kitai.—U-dat. 32:31.

4. Baka ni Jehovah nyaga kitai? (Masmur 94:22)

⁴ Jehovah nyaga kitai ba maya ti tusah. Enti bisi ujan ti balat, orang ulih belindung dalam siti gua. Baka nya mega, Jehovah nyaga kitai lebuh kitai napi penusah ba pengidup kitai. (Bacha Masmur 94:22.) Iya nulung kitai nyaga kaul kitai enggau Iya sereta ngasuh kitai yakin, pemerinsa ke ditapi kitai diatu enda ulih ngemediska kitai belama iya. Lalu Iya mega besemaya, jemah ila Iya deka muai semua utai ke ngasuh kitai merinsa tauka tusah ati.—Esk. 34:​25, 26.

5. Baka ni Jehovah ulih nyadi Gunung Batu endur alai kitai belindung?

⁵ Siti chara kitai ulih nyadika Jehovah endur alai kitai belindung, iya nya besampi ngagai Iya. Lebuh kitai besampi, Jehovah meri kitai “pengelantang ari Petara” ke nyaga ati enggau runding kitai. (Plp. 4:​6, 7) Peratika pengalaman Artem, siku menyadi lelaki ke dijil ketegal pengarap iya. Maya ba rumah jil, siku pegawai dia mayuh kali nasat iya, ngemaluka iya, sereta nguji deka ngenakutka iya. Ku Artem madahka: “Aku amat stres tiap kali pegawai nya nasat aku. . . . Aku seruran besampi ngagai Jehovah. Aku minta Jehovah nulung aku mengkang tenang sereta ngembuan penemu-dalam. Taja pan balat diperinsa, aku agi ulih mengkang tenang. . . . Enggau tulung ari Jehovah, aku ngasaika diri baka benung bediri ba belakang siti dinding batu.”

6. Nama kebuah kitai ulih seruran bepanggai ba Jehovah? (Isaiah 26:​3, 4)

⁶ Jehovah ulih dikearapka. Baka siti gunung batu ke enda ulih bekinsit, kitai nemu Jehovah mega seruran besedia deka nulung kitai. Kitai ulih andalka Iya, laban Jehovah nya “Gunung Batu ti meruan belama iya.” (Bacha Isaiah 26:​3, 4, ari nota kaki.) b Ketegal Iya Petara ti idup lalu seruran bisi, Iya ulih ngamatka semaya Iya, ningaka sampi kitai, sereta meri kitai sukung ke diguna kitai. Kitai mega ulih bepanggai ba Jehovah laban Iya Petara ti tetap ati ngagai sida ke nyembah Iya. (2 Sam. 22:26) Iya seruran deka ingatka utai ti dikereja kitai, lalu deka ngupah kitai.—Heb. 6:10; 11:6.

7. Nama penguntung ke deka diasaika kitai lebuh kitai bepanggai ba Jehovah? (Peda mega gambar.)

⁷ Kitai ngasuh Jehovah nyadi Gunung Batu kitai lebuh kitai bepanggai ba Iya enggau pengabis ati. Kitai andal, lebuh kitai ngasika Iya, indah ba maya ti tusah, kitai deka bulih penguntung. (Isa. 48:​17, 18) Tiap kali kitai meda Jehovah nulung kitai, kitai deka majak agi arapka Iya. Enggau nya, kitai ulih besedia  agi napi penguji, laban kitai nemu Jehovah deka nulung kitai tan napi penguji nya, enda ngira pemesai penguji nya. Lebuh kitai napi penanggul ke enda ulih diputarka sapa-sapa, nya meh baru iya kitai sedar Jehovah seruran ulih dikearapka kitai. Ku Vladimir madahka: “Timpuh aku ditan nya meh maya ti pemadu manah ke kaul aku ngagai Jehovah. Aku belajar arap agi ngagai Jehovah laban aku kediri aja. Lalu aku enda ulih ngereja nama-nama utai kena ngubah situasi aku.”

8. (a) Nama kebuah kitai ulih madahka Jehovah enda berubah? (b) Nama penguntung iya enti Jehovah nyadi Gunung Batu kitai? (Masmur 62:​6, 7)

⁸ Jehovah enda berubah. Baka gunung batu, Jehovah mega enda berubah. Personaliti enggau tuju Iya enda kala berubah. (Mal. 3:6) Lebuh Adam seduai Awa angkat ngelaban Iya, Jehovah enda ngubah tuju Iya ke mensia. Baka ke ditulis Rasul Paul, Jehovah “enda ulih ngelaban Diri Empu.” (2 Tim. 2:13) Reti iya, enda ngira nama utai ke nyadi tauka utai ke dikereja orang bukai, Jehovah enda sekali-kali ngubah sifat Iya, tuju Iya, tauka standard Iya. Ketegal Jehovah enda kala berubah, kitai ulih andal, Iya deka nulung kitai ba maya ti tusah sereta ngamatka semaya Iya ke jemah ila.—Bacha Masmur 62:​6, 7.

9. Nama dipelajarka nuan ari pengalaman Tatyana?

⁹ Jehovah ulih nyadi Gunung Batu kitai enti kitai belematika sifat Iya sereta tuju Iya ke mensia enggau ke dunya. Nya deka nulung kitai arap agi ke Iya. Kitai mega deka tenang agi lebuh napi penguji sereta mengkang tetap ati ngagai Iya. (Mas. 16:8) Nya meh utai ke nyadi ngagai siku menyadi indu ke benama Tatyana, ke ditan ba rumah iya empu ketegal pengarap iya. Ku iya madahka: “Aku berasai kediri. Terubah iya, tu amat tusah. Aku suah berasai asa ati.” Tang udah nya, lebuh iya belematika pasal Jehovah sereta tuju Iya ke mensia, tu nulung iya sedar kebuah iya patut tan napi penguji nya. Tu nulung iya berasai tenang sereta meri iya pengering ngambika ulih mengkang tetap ati. Ku iya nampung: “Aku nemu, semua penguji ke benung ditapi aku nya ketegal aku rinduka Jehovah. Tu udah nulung aku badu agi berundingka penanggul diri empu.”

10. Baka ni Jehovah ulih nyadi Gunung Batu kitai diatu?

¹⁰ Enda lama agi, kitai deka napi maya ti amat tusah. Ketegal nya, kitai patut majak agi bepanggai ba Jehovah ari ke suba. Nyadi, diatu meh maya iya kitai patut negapka agi pengarap kitai ngagai Jehovah, lalu andal enggau pengabis ati, Iya deka nulung kitai mengkang tetap ati ngagai Iya, enda ngira situasi ke ditapi kitai. Baka ni kitai ulih ngereja nya? Bacha meh cherita Bup Kudus sereta pengalaman bala menyadi Kristian kemayaharitu. Peratika chara Jehovah udah nyukung bala nembiak Iya. Belematika meh semua cherita tu. Lebuh nuan ngereja nya, nuan ulih ngaga Jehovah nyadi Gunung Batu nuan!

NELADAN SIFAT JEHOVAH

11. Nama kebuah kitai deka neladan sifat Jehovah? (Peda mega kutak “ Juluk Ati ke Bala Menyadi Lelaki ti Biak.”)

¹¹ Kitai udah beratika sifat Jehovah ke ngasuh  Iya nyadi baka siti gunung batu. Diatu, peratika chara kitai ulih neladan sifat Iya. Enti kitai enggau naka ulih neladan sifat Jehovah, kitai ulih negapka bala menyadi kitai. Ambika chunto, Jesus meri Simon nama Kefas (ke disalinka ngagai “Peter”), ke mai reti “Sigi Batu.” (Jhn. 1:42) Tu nunjukka Peter deka ngelantangka ati bala menyadi ba raban gempuru, sereta negapka pengarap sida. Bala tuai gempuru dikumbai “baka ayuk batu ti besai.” Tu ngambarka chara sida deka nyaga bala menyadi ba raban gempuru. (Isa. 32:2) Tang kebendar iya, semua kitai ulih meransang pangan diri enti kitai neladan sifat Jehovah.—Eps. 5:1.

12. Baka ni kitai ulih nulung bala menyadi ke napi penusah?

¹² Jaga meh bala menyadi nuan ke napi penusah. Kekadang, kitai ulih mai bala menyadi diau enggau kitai lebuh endur sida ditinggang bencana alam tauka perang. Ketegal situasi “ba hari ti penudi” ke majak balat, kitai bisi mayuh peluang alai kitai ulih nulung pangan diri. (2 Tim. 3:1) Kitai mega ulih ngelantangka ati sereta ngayanka pengerindu ngagai sida. Siti chara kitai ulih ngereja nya, iya nya bejaku enggau sida lebuh sida datai ngagai gempuru sereta ngelantangka ati sida. Mayuh orang kemayaharitu ngintu pangan diri enggau chara ti kasar. Tu ulih ngasuh bala menyadi Kristian kitai amat stres sereta berasai enda dikesayau. Nya alai, lebuh bala menyadi kitai datai ngagai gempuru, kitai deka enggau naka ulih meransang sida ngambika sida berasai dikesayau.

13. Baka ni bala tuai gempuru ulih ngelantangka ati bala menyadi ke ditinggang penusah? (Peda mega gambar.)

¹³ Bala tuai gempuru ulih ngelantangka ati bala menyadi ke ditinggang penusah. Lebuh bisi bencana alam tauka kecemasan berubat, bala tuai gempuru enggau jampat ngatur tulung ke bala menyadi Kristian. Sida mega  meri iring sereta peransang ari Bup Kudus. Bala menyadi deka nyamai agi minta tulung ari tuai gempuru enti sida nemu, iya deka bejaku manah enggau sida, ningaka sida, sereta nguji meretika asai ati sida. Sifat ke baka nya deka nulung orang bukai berasai dikesayau, lalu sida deka senang agi nitihka iring ari Bup Kudus ke diberi tuai gempuru.—1 Tes. 2:​7, 8, 11.

14. Baka ni kitai nunjukka diri tau dikearapka?

¹⁴ Tau dikearapka. Kitai dekaka bala menyadi nemu, sida ulih arapka kitai, kelebih agi lebuh sida ditinggang penusah. (J-lam. 17:17) Nama ulih digaga kitai ngambika orang bukai ulih arapka kitai? Kitai bebendar neladan Jehovah ninting hari. Ambika chunto, kitai ulih ngamatka semaya ke digaga kitai, sereta datai nitihka jam ke udah ditetapka. (Mat. 5:37) Tauka, enti kitai nemu bala menyadi begunaka tulung, kitai ulih nulung sida. Nambahka nya, kitai mega deka nembuka sebarang tugasan ke diterima kitai, sejalai enggau iring ke diberi ngagai kitai.

15. Nama penguntung ke diulih raban gempuru enti bala tuai gempuru ulih dikearapka?

¹⁵ Nama penguntung ke diulih raban gempuru enti bala tuai gempuru ulih dikearapka? Enti bala menyadi nemu, sida ulih ngiga bala tuai gempuru ba sebarang maya, sida deka kurang agi berasai irau. Bala menyadi mega berasai dikesayau lebuh sida nemu, bala tuai gempuru besedia deka nulung sida. Lebuh bala tuai gempuru ngena Bup Kudus enggau litaricha kitai meri jaku lalau, lalu ukai bepelasarka penemu diri empu, bala menyadi deka arap  agi ke sida. Bala menyadi mega arapka bala tuai gempuru ke ngamatka semaya sida, sereta enda madahka pekara peribadi sida ngagai orang bukai.

16. Nama penguntung ke diulih kitai enggau orang bukai lebuh kitai nitihka standard Jehovah?

¹⁶ Seruran nitihka standard Jehovah. Enti kitai ngasika Jehovah ba semua pekara, lalu ngaga pemutus bepelasarka Bup Kudus, kitai deka nyadi teladan ti manah ke orang bukai. Lebuh kitai belajarka Bup Kudus sereta negapka pengarap kitai ngagai Jehovah, kitai deka mengkang setia ngagai Iya, sereta nitihka standard Iya. Kitai ulih ngelala ajar ti pelesu sereta penemu ke enda sejalai enggau runding Jehovah, lalu enda dilimpangka utai ke baka tu. (Eps. 4:14; Jas. 1:​6-8) Pengarap kitai ba Jehovah sereta semaya Iya deka nulung kitai mengkang tenang lebuh nerima berita ti enda manah. (Mas. 112:​7, 8) Kitai mega ulih nulung orang bukai ke benung napi penusah.—1 Tes. 3:​2, 3.

17. Baka ni tuai gempuru ulih nulung bala menyadi mengkang tenang sereta ngembuan pengarap ti tegap ngagai Jehovah?

¹⁷ Bala tuai gempuru patut ngereja semua utai enggau pengumbas iya, nemu berunding enggau manah, masuk akal, sereta teratur. Sida nulung orang bukai mengkang tenang sereta ngembuan pengarap ti tegap ngagai Jehovah. Sida mega negapka raban gempuru lebuh sida “bepegai rat ba pesan ke tau dikearapka.” (Tit. 1:9; 1 Tim. 3:​1-3) Nengah teladan sereta pengawa datai meransang, bala tuai gempuru nulung bala menyadi datai begempuru, nginjil, sereta belajarka Bup Kudus enggau tetap. Lebuh bala menyadi bisi penanggul ke ngasuh sida irau, bala tuai gempuru ngingatka sida ngambika bepanggai ba Jehovah sereta betumpu ba semaya Iya.

18. Nama kebuah kitai deka muji Jehovah sereta majak semak ngagai Iya? (Peda mega kutak “ Siti Chara Majak Semak ngagai Jehovah.”)

¹⁸ Pengudah beratika sifat-sifat Jehovah ti ngalitka ati, baka Raja David, kitai ulih madahka: “Awakka Jehovah, Gunung Batu aku, dipuji!” (Mas. 144:​1, NWT) Kitai ulih seruran bepanggai ba Jehovah. Indah lebuh kitai mansang tuai, kitai ulih andal, Iya deka terus nulung kitai mengkang semak ngagai Iya. Lalu, kitai ulih madahka: “Iya meh Gunung Batu aku.”—Mas. 92:​14, 15, NWT.