1. Ta anni nga nigitta ni David si Jehova base ta Salmo 18:46?

 MATTOTOLAY ittam ta mundo nga awayya na tu lanna nga meparubang ittam ta problema nga mamarriga onu manguli paga lagu ta pattoletam. Fermi i pappabalo tam nga awayya tam makiyoffun kani Jehova! Ta nappasa nga artikulo, neperaddam ta nittam nga sigga-matolay nga Dios si Jehova anna sigga-paran nga manguffun ta nittam. Nu uffunan na ittam, mepasiguradu nittam nga “matolay si Jehova!” (Bibbigan i Salmo 18:​46, NW.) Ngem kabalin na nga kinagi yatun, inagalan ni David i Dios bilang “i Batù.” Ngatta nigitta na i sigga-matolay nga Dios nga si Jehova ta batu nga awan tu inango na?

2. Anni i gigiammuattam taw nga artikulo?

² Taw nga artikulo, gigiammuattam nu ngatta negitta si Jehova ta tadday nga batu anna nu anni i magigiammu tam meyannung ta nisa. Gigiammuattam gapa nu kunnasi tam imammatan yayya nga kunna Batu tam. Kabalin na, gigiammuattam nu kunnasi tam maparigan i kualidad ira ni Jehova nga kunna batu.

KUNNASI NABBALIN NGA KUNNA BATU SI JEHOVA?

3. Kunnasi nga maruddu nga iyusa na Biblia i uvovug nga “batu”? (Innan i letratu.)

³ Usan na Biblia i uvovug nga “batu” tapenu malippawa tam i karuan ta kualidad ni Jehova. Maruddu nga mabibbig yaw ta teksto ira nga mangidayaw ta nisa bilang Dios nga awan tu kagitta na. I ollu nga teksto nga pakabibbigattam nga si Jehova “i Batu” ay ta Deuteronomio 32:4. Nikagi ni Hana ta pakimallo na nga “awan tu batu nga kagitta na Dios tam.” (1 Sam. 2:2) Inagalan ni Habakuk si Jehova tu “i Batù.” (Hab. 1:12) Inagalan na nattura ta Salmo 73 i Dios bilang “i batu na futù.” (Sal. 73:​26, NW) Inagalan gapa mismu ni Jehova i baggi na nga batu. (Isa. 44:8) Gigiammuattam i tallu ta kualidad ira ni Jehova  nga namabbalin ta nisa nga kunna batu anna nu kunnasi tam mapabbalin yayya tu “i Batu tam.”—Deut. 32:31.

4. Ngatta akkiyegutan si Jehova? (Salmo 94:22)

⁴ Si Jehova ay akkiyegutan. Nu kunnasi tu pattaguan na tadday nga tolay i daka-dakal nga batu ta kappaganassing nga bagiu, protektan ittam ni Jehova nu meparubang ittam ta kappaganassing nga situasion. (Bibbigan i Salmo 94:​22, NW.) Uffunan na ittam nga protektan i relasiottam ta nisa anna ipasiguradu na nga awan tu ziga nga permanente nga makaperwisiu ta nittam. Nipromesa na paga lagu nga alsan na i maski anni nga mamavvurung onu mamarriga ta nittam.—Eze. 34:​25, 26.

5. Kunnasi nga mabbalin tu kunna batu nga Akkiyegutattam si Jehova?

⁵ I tadday nga makua tam tapenu mabbalin tu kunna batu nga Akkiyegutattam si Jehova ay nu makimallo ittam ta nisa. Nu makimallo ittam, iyawa ni Jehova i ‘imammo na Dios’ nga manangngal ta giffutuan anna ginnonopattam. (Fil. 4:​6, 7) Ikonsidera tam i ekspiriensa ni Brother Artem nga nefuku megafu ta pangurug na. Namippiga yayya nga pinakkiavutan na mapoporay nga imbestigador nga naniga-riga anna nangananassing nisa. Kinagi ni Artem: “Ma-stress ngà kada ipagal nà na imbestigador. . . . Kanayun ngà nga makimallo kani Jehova. Kiddawakku ta nisa nga uffunan nà nga mabbalin tu kalmadu anna mapeggan tu sirib. Ari nga umubra niakan i pangananassing na imbestigador. . . . Ta uffun ni Jehova, gittà i agga-taddag ta likug na pader nga batu.”

6. Ngatta kanayun nga makapattalo ittam kani Jehova? (Isaias 26:​3, 4)

⁶ Si Jehova ay mapammakatalakkan. Kagitta na daka-dakal nga batu onu vukig nga ari vuluvuga meyali, ammu tam nga kanayun nga sigga-paran nga manguffun si Jehova ta nittam. Makapattalo ittam nisa megafu ta yayya “i mannanayun nga Batu.” (Bibbigan i Isaias 26:​3, 4.) Kanayun yayya nga sigga-matolay, yatutta matuppal na i promesa na ira, ginnan na i pakimallo tam ira, anna uffunan na ittam. Makapaddepende ittam gapa kani Jehova megafu ta matalo yayya turi ira ta masserbi nisa. (2 Sam. 22:26) Arian na vuluvuga makattaman i kuattam anna kanayun nga bala-balakkan na ittam.—Heb. 6:10; 11:6.

7. Anni i maekspiriensa tam nu mattalo ittam kani Jehova? (Innan gapa i letratu.)

⁷ Mapabbalittam tu kunna Batu tam si Jehova nu buu i pattalo tam nisa. Mattalo ittam nga mabenefisiowan ittam nu tuttulattam yayya maski paga ta mariga ira nga situasion. (Isa. 48:​17, 18) Habang uuffunan na ittam, mas mattalo ittam ta nisa. Kumbinsidu ittam nga si Jehova laman i makoffun tapenu maattammattam i maski anni nga problema. Maruddu nga ta situasion ira nga awan tu pappoffunattam, mapakurug tam nga mapammakatalakkan si Jehova. Kinagi ni Vladimir: “I keggà ta detention center i tiempo nga pinaka-aranni ngà kani Jehova. Nagigiammù nga mas mattalo kani Jehova megafu  ta magitetadday ngà anna ari ku kontroladu i situasion.”

8. (a) Ngatta makagi tam nga ari manguli si Jehova? (b) Kunnasi ittam mammakapia megafu ta i Dios i Batu tam? (Salmo 62:​6, 7)

⁸ Si Jehova ay ari manguli. Si Jehova ay kagitta na daka-dakal nga batu onu dadda nga ari meyala-ali. Arian na gapa nga manguli. Ari nga manguloli i kualidad na anna i gakkag na para ta totolay. (Mal. 3:6) Turi ta parrebelde ta Eden, ari nga inuli ni Jehova i gakkag na ta totolay. Kagitta na nitura ni apostol Pablo, si Jehova ay “arian na awayya nga pallikuran i baggi na.” (2 Tim. 2:13) Kebalinan naw nga maski anni i mesimmu onu kuan na tanakuan, ari nga manguloli i kualidad, gakkag, anna i estandarte ira ni Jehova. Gafu ta mattalo ittam ta ari manguloli nga Dios tam, ammu tam nga uffunan na ittam ta mariga ira nga tiempo anna tuppalan na i nipromesa na ira.—Bibbigan i Salmo 62:​6, 7.

9. Anni i magigiammum ta ekspiriensa ni Tatyana?

⁹ Mapabbalittam tu Batu tam si Jehova nu pannonopattam tu mapia i kualidad na ira anna i gakkag na para ta davvun anna ta totolay. Makoffun yatun tapenu kanayun ittam lagapa nga kalmadu anna matalo ta nisa ta tiempo na pakarigatan. (Sal. 16:8) Yatun i naekspiriensa ni Sister Tatyana nga na-house arrest megafu ta pangurug na. Kinagi na: “Matageno ku tu magitadday ngà. Kuruga mariga yatun ta ollu na. Kanayun nga makkafi i nono ku.” Yatutta ninono na tu mapia i meyannung kani Jehova anna ta gakkag na. Gafu tatun, naattamman na yatun nga pakarigatan, kalmadu laman yayya, anna nattalupaddian nga matalo. Kinagi na: “Nakoffun niakan i pakalippawa nu ngatta mesissimmu yaw tapenu meraddammakku nga kukukuakku yaw para kani Jehova. Nakoffun yaw niakan tapenu ari tu baggì i agga-nono ku.”

10. Kunnasi tam mapabbalin si Jehova nga Batu tam sangawe?

¹⁰ Ta mappange, meparubang ittam ta madduruma nga pakarigatan nga mas kawagattam i uffun ni Jehova. Sangawe ngana i tiempo tu paladdattam i pangurug tam nga iyawa na i maski anni nga kawagattam tapenu matalo ittam nga makapagattam. Kunnasi tam nga makua yatun? Bibbigammu i istoria ira ta Biblia anna i ekspiriensa na Saksi ira ni Jehova ta kaggawattam. Gigiammuammu nu kunnasi nga ipasingan ni Jehova i kagitta na batu nga kualidad na ira tapenu suportan i aripan na ira. Pannonopammu tu mapia danatun tapenu mapabbalimmu tu Batum si Jehova.

PARIGAN I KUNNA BATU NGA KUALIDAD IRA NI JEHOVA

11. Ngatta ikaya tam nga parigan i kunna batu ira nga kualidad ni Jehova? (Innan i kahon nga “ Goal Para ta Kabataan ira nga Brother.”)

¹¹ Nagigiammu tam nu kunnasi pinakurug ni Jehova nga megitta yayya ta batu. Gigiammuattam sangawe nu kunnasi tam parigan i kunna batu nga kualidad ira ni Jehova. Nu kuattam i adde na mawayya tam tapenu parigan  i kualidad ira ni Jehova, mapatuyag tam i wawwaragi tam. Angngarigan na, ningaganan ni Jesus si Simon tu Cefas (ne-translate tu “Pedro”) nga kebalinan na ay “Tadday nga Batu.” (Juan 1:42) Kayà kagian ni Jesus nga mabanna-bannayan ni Pedro i tanakuan ta kongregasion anna mapatuyag na i pangurug da. Nedeskriba i elder ira ta kongregasion nga kunna “aninu na dakal nga batu.” Kebalinan natun nga protektadda danuri egga ta kongregasion. (Isa. 32:2) Siempre, mabenefisiowan i kongregasion nu parigan na ngamin nga wawwaragi i kunna batu nga kualidad ira ni Jehova.—Efe. 5:1.

12. Kunnasi ittam mabbalin tu akkiyegutan na tanakuan?

¹² Mabbalin tu akkiyegutan. Nu nadaral i babalay na wawwaragi ta kalamidad onu gerra, puede tam ira paddianan ta baletam. Habang mas mallala i situasion ta “pangurianan ira nga aggaw,” mas aru i oportunidad tam nga makka-uffu-uffun. (2 Tim. 3:1) Iyawa tam gapa i pakawagan na wawwaragi ta emosional anna espiritual. Makua tam yaw nu matageno da nga welcome ira ta Kingdom Hall. Ikaya tam nga matageno da nga iddeddu ira na wawwaragi. Mattotolay ittam ta mundo nga makapa-stress anna awan tu allo anna aya na. Nu magatende gafu i wawwaragi tam ta study, ikaya tam kuan i ngamin tapenu matageno da i aya, pamanna-bannay, anna imammo.

13. Kunnasi mabbalin tu akkiyegutan na tanakuan i elder ira? (Innan gapa i letratu.)

¹³ Awayya na mabbalin tu akkiyegutan i elder ira para ta wawwaragi nga meparubang ta madduruma nga kapurueba. Nu egga i kalamidad onu medikal ira nga emergency, insigida nga uffunan na elder ira i wawwaragi da. Uffunadda gapa ira ta espiritual. Komfortable nga umaranni i wawwaragi ta tadday nga elder nu ammu da nga masippo yayya nga makibbida  nira, magginna yayya ta nira, anna malippawa na i mataga-tageno da. Makoffun yatun ira nga kualidad tapenu matageno na tanakuan nga meddeddu ira. Yatutta mabi laman para ta nira nga iyaplika i tabarang na tadday nga elder nu naggafu yatun ta Biblia.—1 Tes. 2:​7, 8, 11.

14. Kunnasi tam mepasingan tu mapammakatalakkan ittam?

¹⁴ Mabbalin tu mapammakatalakkan. Ikaya tam nga sittam i pakiyoffunan na tanakuan, mas ngana ta tiempo na pakarigatan. (Prov. 17:17) Kunnasi tam mepasingan nga mapammakatalakkan ittam? Kuattam i adde na mawayya tam tapenu mepasingan i nadiosan ira nga kualidad kagitta na pattuppal ta promesa tam ira anna kanayun nga pabbalin tu on time. (Mat. 5:37) Uffunattam gapa ta praktikal danuri makawag. Siguraduattam gapa nga balinattam i annungattam ira base ta instruksion nga malawa tam.

15. Kunnasi nga mabenefisiowan i kongregasion nu mapammakatalakkan i elder ira?

¹⁵ Mabenefisiowan i kongregasion nu mapammakatalakkan i elder ira. Kunnasi? Matageno na publisher ira nga egga i massuporta nira nu mabi da laman nga makontak i elder ira, kagitta na field service group overseer da.  Matageno gapa na publisher ira nga matangngallan ira nu ammu da tu ikaya na elder ira nga uffunan ira. Nu ibase na elder ira i tabarang da ta Biblia anna ta publikasion ira na matalo nga aripan, imbes tu ta sarili da nga opinion, mas pattalakkan ira na wawwaragi. Mas gapa makkomfiansa i wawwaragi ta elder nu arian na ikagi ta tanakuan i konfidensial ira nga gannug anna nu kuan na i nipromesa na.

16. Kunnasi ittam mabenefisiowan anna i tanakuan nu matuyag ittam?

¹⁶ Mabbalin tu matuyag. Makasta i influwensia tam ta tanakuan nu itaddaggattam i fustu anna nu maddesision ittam base ta prinsipio ira na Biblia. Nu gigiammuattam i Biblia anna paladdattam i pangurug tam kani Jehova, mabbalin ittam tu matalo ta nisa anna ta estandarte na ira. Itaddaggattam nu anni i fustu anna ari ittam mappa-influwensia ta falsu ira nga tuddu anna ta makamundo nga appana-panono. (Efe. 4:14; Sant. 1:​6-8) Megafu ta pangurug tam kani Jehova anna ta promesa na ira, kalmadu ittam lagapa maski nu makaginna ittam tu marake ira nga balita. (Sal. 112:​7, 8) Moffunattam gapa danuri problemadu.—1 Tes. 3:​2, 3.

17. Kunnasi nga moffunan na elder ira i tanakuan?

¹⁷ Mawag tu matangngallan na elder ira i baggi da, mapia i appana-panono da, organisadu, anna balanse. Nu ‘ariadda ibbattan i kurug nga uvovug,’ moffunadda i tanakuan nga massikan i pangurug da kani Jehova anna mabbalin tu kalmadu. Mapasikadda gapa i kongregasion. (Tito 1:9; 1 Tim. 3:​1-3) Gukaban na ehemplo anna pash-shepherding da, moffunan na elder ira i publisher nga kanayun nga makistudy, mallawan, anna mappersonal study. Nu problemadu i wawwaragi, pagaramman ira na elder ira nga kanayun nga mattalo kani Jehova anna ta promesa na ira.

18. Ngatta ikaya tam nga dayawan si Jehova anna mas maddukko ta nisa? (Innan gapa i kahon nga “ Nu Kunnasi nga Mas Maddukko Kani Jehova.”)

¹⁸ Kabalittam nga nagigiammu i meyannung ta makakkasta ira nga kualidad ni Jehova, awayya tam gapa makagi i nakagi ni Patul David: “Maraya-rayaw si Jehova nga Batù.” (Sal. 144:​1, NW) Kanayun ittam nga makapattalo kani Jehova. Maski paga sonu lakay onu bako ittam ngana, makkomfiansa ittam nga tulu-tuloy nga uffunan na ittam ta espiritual. Yari tu makagi tam: “Yayya i Batù.”—Sal. 92:​14, 15, NW.